بين الطنة والرنة ضعت بين الحماية والكنة الحلقة 9

بين الطنة والرنة ضعت بين الحماية والكنة الحلقة 9
نكمل لكم هذه القصة الشيقة والممتعة والتي نقدمها لكم في قسم المنوعات في تطبيق #زاكي, قراءة ممتعة نتمناها لكم

#بين_الطنة_والرنة_ضعت_بين_الحماية_والكنة

الحلقة التاسعة بعنوان ( شهررمضان )

يا ترا شو صوت هالكركعة هاد الي تحت ااخ هاي اكيد حماتي وبناتها رايحات يشوفو بنتها لام سميح هسا صارت بدها تخطب من عندها عأساس كانت خايفة من ام سميح تسرق عمي
يروحو انا شو دخلني احسن ايشي اعمل فنجان قهوة واقعد اتفرج عالتلفزيون هسا بيجبو الحصن بس لحالي بدي اشرب القهوة اي انا اذا بظله لساني بتمي اكتر من دقيقة بتعب احسن ايشي اروح عند خالتي ام رفعت واعزم عليها تيجي تشرب عندي فنجان قهوة وبطريقي بعرف شوية اخبار
حملت حالي وطلعت عند خالتي ام طلعت اعزم عليها تيجي تشرب عندي فنجان قهوة بس هي حكتلي خلص ليش بدنا نروح عندك خلص فوتي وبنشربها هون سوا ما حبيت افشلها
( اه يا خالتي ام رفعت شفتي حماتي وبناتها راحو يخطبو لابنها ولا وحدة حكتلي تعالي معنا يا هند )
( ما هو انتي يا هند بتعرفيش اضبي لسانك بتمك خافو تخربيلهم الخطبة )
( هسا انا لساني بفوتش بتمي ولا الي بحكي كلمة حق بصير لسانه طويل )
( طيب هسا فكينا منهم ومن سيرتهم احكيلي كيف حملك بتحسي بوحام )
( اه والله بحس )
( شو بتحسي )
( احيانا بحس اني مش طايقة لا سامي ولا امه )
( هسا هاد هو وحامك)
( اه مش بقولو انه في نسوان بس يحملو بصير يكرهو زواجهم انا هيك وامه معه
هييييي شكله حماتي وبناتها روحو بخاطرك خليني اروح اشوف شو صار )
( ولك تعالي لا تبينيلهم انك مهتمة )
( ما هو اذا ما عرفت بطق بخاطرك يا خالتي ومشكورة عالقهوة )

طلعت من عندها وبوجهي عند حماتي
( شو عمتي رجعتو ها طمنيني )
( اطمني اتفقنا عكل شي وبس يجي ابني سالم بدنا نروح حتى يشوفها واذا عجبته اتكلنا على الله )
(يلا مبروك )

وهون اجا دور نجاة هاي الي ما كانت تعرف تحكي كلمتين هسا طلع صوتها
( شفتي يما شفتي هالمشبك الي عاملته ام سميح بشهي والله انها معدلة ونفسهم طيبة مش متل هالجماعة )
( شو قصدك ست نجاة بهالجماعة اهلي لما اجيتو خطبتوني جابو قالب دحداح هالقد كبره
( اه يلا عاد لسا الك عين تحكي كل حقه ليرتين )
( ييييي شوف مين بحكي ولك نجاة انتي ام البخل قديش الي متزوجة بعمرنا ما مرينا عليكي وحلفتي يمين علينا نتعشى عندك بدناش يختي تجيبلنا فروج عالاقل من حواضر البيت اقلي حبة بندورة ولا فتحيلك علبة سردين )
( والله لاطوله لسانك يا ام لسان انا احب ما علي تتعشو عندي بس انتو لما تيجو عندي ما بكون عندي ايشي )
( كذابة انا شفت تلاجتك بعيني مليانة ولك احكيلك بلاش عشا الفواكه التفاح والموز الي بنجيبهم معنا قدميلنا منهم لسا بتعمليلنا كاسة هالشاي وبتحكيلنا حيلك )

هون حماتي هي الي انهت الطوشة
( ولك اسكتو انتي واياها هيا بيجي ابو سامي بلاقي صواتكم بالشارع
ضبي لسانك يا هند وروحي عبيتك وانتي يما يا نجاة لا تجادليها تعالن يما عندي عغرفتي نتناقش بخصوص العروس
وفاتو عالغرفة وسكرو الباب وراهم وانا متل الي كبيتي علي سطل مي باردة
بس ماشي انا بعرفكم مين هي هند
طلعت على بيتي سلقت راس الملفوف وقعدت الفه وفتحت التلفزيون على فكر واربح
مع جية سامي
( يعطيك العافية يا ابو الاء )
( الله يعافيكي يا رب )
( صحيح سامي انا بحكيلك ابو الاء بس ما عمري فكرت اسالك لو جبت ولد شو بدك تسميه )
( بدي اسميه خليل هيك اسم فيه محبة )
( والله اسم خليل حلو )
( اليوم طلبت من صاحبي يعطيني الباص تبعه عشان بعد بكرة بوصل اخوي سالم وبدنا نروح نجيبو من مجمع العبدلي )
( وانا بدي اروح معكم )
( اذا بدك باخدك بس الطريق طويلة وانتي حامل )
( تخافش يا زلمة الحامي الله هسا المهم عارف يا سامي شو جاي عبالي )
( هند انتي بهالحمل ما ظل ايشي ما اجا عبالك خلصيني احكي )
( خلص بطل الي نفس احكي بس رح احكيلك عشان ما تقول هند خبت علي
جاي عبالي تفاح بعنبر )
( هاي بسيطة بس هسا احكيلي البياع تبع البيجامات ما جاب الوان جديدة غير الفوشي والازرق )
( ههههههه خلص بخلي زهور بنتها لام تيسير تشوفلي )

سامي كان زلمة مسكين مقارنة مع هالزلام الي بسمع عنهم من الجارات
قال ربحية بنت سلفها لام زهير جارة امي زوجها بصبحها بقتلة وبمسيها بقتلة وبحكو انه مرة كاينة مروحة عند اهلها ووجها مطبع والله حزنت عليها لما عرفت احسن ايشي هيك يوم لما اروح عند امي ابعت وراها افهمها كيف تتعامل معه ولا تظلها توكل قتل
المهم سامي جاب الباص قبل بليلة لانه تاني يوم كنا بدنا نطلع من الساعة ستة الصبح نجيب سلفي وحماتي خبرت بناتها وهديك الليلة سهرنا كلنا عند دار حماي كان سامي جايب للسهرة بوظة هيك كيس كبير فيه كف احمر وميمو بس انا جابلي بوظة بترا وطلعلي اياها بالسرقة لفوق عتلاجتي
بعرفني بتوحم
مو اتاري نجاة عملتها حردة قال وبدهاش تحكي معي بس دواها عندي لمحتها وهي بتعطي ابنها شلن من شنتتها في معها قلم حمرة لون احمر والله كان نفسي اخده احط منه بس ما بكسر حالي لالها
وخلصت هالسهرة وكل واحد فينا راح ينام وهو يحلم يا ترى سالم شو جايبلنا معه هدية
ومن الساعة خمسة الفجر فزينا لبسنا وطلعنا بهالباص

( يما يا سامي اشتريلنا سندويشتين فلافل طلعنا بدون فطور )
( يما اصبرو شوي هسا بالعبدلي في عربيات بيبعو خبز عليه سمسم وزعتر بجنن )
( طيب يما شغللنا اغنية )
وشغل سامي اغنية السود عيونه لمصطفى قمر واحنا نزقف

( بسم الله الرحمن الرحيم )
( خير يابا مالك شو ليش وقف الباص )
( مش عارف ماله بطل يشتغل لازم حدا ينزل يدفشه شوي )
( ومين بده ينزل انت عارف هاد باص بده قوة )
طبعا انا حامل ما بنزل لهيك نزلت عمتي وعمي وحورية ونجاة وبلشو يدفشو
وسامي يدعس بنزين وانا بشجع بسامي ( ايوا يا سامي سوق سوق )
استغليت هالوقت انهم تحت وفتحت شنتة نجاة طولت منها قلم الحمرة شلت عنه الغطاة وفتحته ورجعت سكرت الشنتة
بسرعة قبل ما الباص يمشي وهم يرجعو يركبو
وصلنا عالعبدلي
اول ايشي عملناه اشترينا كعك من العرباية مع شوية زعتر واكلناه كل كعكة طلع حقها قرشين ونص
بدكو الصراحة هالعبدلي بجنن فيه بسطات بتوخد العقل
لفلفنا شوي نشتري وهون صرختلك نجاة صوت
( الله يوخدك يا هند )
( خير يا ست نجاة ليش بتدعي علي )
( ولك انتي فش حدا قادرلك شوفو كيف شنتتي متلغمطة بالحمرة انا متأكدة فش حدا بعملها غيرها )
ولاول مرة سامي بتزحزح ( يختي انتو كل ايشي بتحطوه بظهر هند خافو الله )
( عمي:خلص اسكتو نجاة اسكتي بديش اسمع صوتك والشنتة بتنغسل هسا جاي اخوكي بديش انكد عليه
قعدنا عالكراسي نستنى وعمتي وبناتها بطلعو فيي عليم الله لو عمي وسامي مش موجودين لخلعولي شعري

( هي وصل الباص اجا سالم )
وقفنا كلنا نستناه لنزل من الباص هجم على عمي وباس ايده وراسه وراح باس ايد حماتي وحضن خواته بعدين لف وجهه علي وحكالي كيفك يختي
( الحمد لله عسلامتك )
والله سالم حامل ومحمل ما هو مقصر مش مخلي شناتي
حطهم سامي بالباص وركب سالم معنا وظلينا طالعين عالدار
وطول الطريق يحكيلنا سالم قديش اشتاق لامه وابوه وكيف كان عايش وحداني لهيك قرر يرجع يخطب ويتزوج
ولما وصلنا هجمو عليه ولاد خواته وولاد الجيران كلهم بدهم يسلمو

اول ما فتنا سألناه اذا مفطر وحكالنا انه اكل عالطريق وبلش يفتح بهالهدايا
كان جايب لعمتي عباية مقصبة بتجنن والي ولحورية ونجاة شنتات كل وحدة موديل هي شنتتي حلوة بس شنتتة حورية عجبتني اكتر
وجايب لعمي دشداشة وحفاية ولسامي قميصين وحط بايد كل وحدة من خواته عشر ليرات بس عمتي اعطاها عشرين
وقمنا نجهز للغدا وعملناله مقلوبة زهرة وببيتنجان
والمسوية قعدت حماتي تحكيله عن بنتها لام سميح بس هو حكالها اجلي يما هالموضوع كم يوم خاصة انه رمضان عالباب وكنا كلنا فاتحين عالتلفزيون بنستنى نشوف اذا رح يعلنو رمضان تاني يوم
واكدوها انه تاني يوم رمضان قمنا وسلمنا على بعض حتى انا سلمت على نجاة ورحت حكيت تلفون مع امي عيدت عليها
( وصل سلفك اه احكيلي شو جابلك هدية و شو في اخبار وشو جاب لامه هدايا )
( بالهمس يما بعدين بحكيلك كلهم هسا جنبي )

حورية ونجاة روحو عبيوتهم لانه اول يوم رمضان لازم يكونو هناك واحنا تركنا سالم يرتاح شوي ويشبع من امه وابوه واتفقنا انه نلتقي عالسحور
طلعت عالبيت نقعت قمر دين بمي عشان نشربه عالسحور وحطينا راسنا ونمنا لحتى نفيق عالسحور مصحصحين ونجهز لاول يوم رمضان
……يتبع في الحلقة القادمة
#حنين_طه