بين الطنة والرنة ضعت بين الحماية والكنة الحلقة 11

بين الطنة والرنة ضعت بين الحماية والكنة الحلقة 11
نكمل لكم هذه القصة الشيقة والممتعة والتي نقدمها لكم في قسم المنوعات في تطبيق #زاكي, قراءة ممتعة نتمناها لكم

#بين_الطنة_والرنة_ضعت_بين_الحماية_والكنة

الحلقة الحادية عشر بعنوان( ليلة العيد)

سجلي يا هند حتى عمك ما ينسى اشي
بدي سمنة وطحين وسميد وباكيتات عجوة بدنا نلحق نعمل معمول العيد )
( حاضر عمتي هيني سجلتهم كلهم ،،،، وهسا انا بدي اروح عند اهلي عازميني عالفطور )
( روحي بتريحي اليوم جايات عندي حورية ونجاة )

لبست عحالي وظليت طالعة على اهلي بس مريت عالسوق شوي بدي اخد ايشي بطريقي اخدت شوية قطايف وعلبتين عصير ورحت كانت امي عاملتلي بامية ومقلوبة فول ساعدتها شوي وقعدنا بالحوش ليجي وقت الفطور وطبعا القعدة ما بتحلى الا بخالتي ام حسين وخالتي ام زهير وام تيسير وبناتهم
( شو يا هند احكيلنا حلوة سلفتك الجديدة )
( والله يا خالتي ام حسين حلوة بس ما بتعرف تحكي كلمتين عبعض يا خالتي ام تيسير ومع هيك بحبوها )
( ديري بالك يا هند الي متل هيك بكونو من تحت لتحت )
( لا تخافيش علي انا هند بنت ابتهاج )
( امي: عملتو كعك العيد يما )
( بكرة ان شاء الله الليلة عمي بدو يجيوهم وتحضرهم عمتي وبكرة بعد الفطرة بدنا نبلش )
وبهالوقت اجت بنت ام تيسير بتنادي على امها بنتها زهور جاي حردانة قال لانها نسيت تصحي زوجها عالسحور
خالتي ام تيسير روحت والجارات كل وحدة نزلت عبيتها وانا وامي حضرنا السفرة وقبل ما ياذن كل وحدة من هالجارات بعتتلنا صحن اكل ام تيسير عاملة مسخن ومكترة البصلات عليهم وام حسين عاملة كوسا ودوالي
وام زهير عاملة منزلة باتنجان اكلنا وقمت انا وامي جلينا الجليات
بدكو الصراحة اشتقت لرمضان عند اهلي اشتقت لكاسة الشاي الي كنا نشربها بعد الفطور واشتقت لجمعات جاراتنا كل عشر دقايق وكل مرة بجتمعو عندهم اخبار جديدة
واشتقت لولاد الحارة الي صواتهم بعد الفطور بكون معبي الدنيا وصوت الفقيع يرقع بالحارة والطابة الي كل شوي بتنط على حوشنا
التمو الجارات عنا حطينا صحن هالبزر وجاط هالقطايف وقعدنا تحت الدالية بالحوش وانا ناديت عجبر ابن ابنها لام تحسين هاي كانت الخياطة عنا بالحارة وبس توفت الله يرحمها استلمت بنتها بدالها
حكتله يروح يشتريلي كم حبة شوكلاته كوكو عاشور على كم باكيت شيبس رينغو وخالتي ام زهير حلفت الا هي تدفع حقهم
بعدالفطور مرق علي سامي لنروح وابوي كان زعلان منه وعاتبه ليش ما اجا افطر معنا بس سامي حكاله لانه هالفترة مشغول بعرس اخوه
روحنا عالبيت وكانت حورية ونجاة عند حماتي بحضرو لتاني يوم ولكعك العيد وهاي الليلة نمت بكير حتى اقدر اصحى وونقوم نتسحر مش يصير فيي متل زهور بنتها لام تيسير
صحيت قبل الاذان بساعة صحيت سامي ونزلنا عبيت عمي كانو لسا نايمين صحيت نجاة وحورية وقمنا قلينا كم حبة بطاطا وعملنا متبل وتسحرنا
واحنا بنجلي الجليات نادى علينا عمي وناول كل وحدة فينا خمسطاش الليرة عشان ننزل نشتري اواعي للعيد

بسنا ايده وانا كنت مفكرة اشتري تنورة جينز بنية وجاكيت اخضر متل هاد الي كانت لابسته كوثر لما رحنا خطبناها

( هند روحي عند ام رفعت احكيلها عمتي اليوم بدها تعمل كعك خليها تخبرلي نسوان الحارة يتجمعو عندي بعد الفطرة وجيبلي من عندها قوالب الكعك احكيلها بدنا نقشة حلوة )
( حاضر عمتي )
خبرت خالتي ام رفعت واخدت منها القوالب وهي خبرت نسوان الحارة فش بعد الفطور بنص ساعة تجمعو عنا
وبلشنا شغل حماتي وام رفعت يحشو وانا وحورية ندق ونجاة تخبز وبنات الجيران يوخدو ويضبو بالطناجر
قمت عملت كاسة شاي وعبيت صحن ووديته مع ابن حورية لعمي ولسامي واخوه عالسطح ولا هي فايتة كوثر وامها قال جايات يساعدونا
حماتي ضحك سنها بس شافتها وسالم حسه قلبه انه اجت كوثر وصار رايح جاي يطل علينا
ام سميح قعدت تحشي مع عمتي وكوثر قعدت تعمل بالزردات هاي الكعكة الي متل الاسورة وكل وحدة تطلع معها شكل ايشي كبير وايشي صغير وكل ما عمتي تعجبها وحدة تحكي هي عملتها وكل وحدة خربانة تحكي هاي هند عملتها طفح الكيل معي كنت بدي امسك راسها واحطه بين العجوة بس لا يا هند اصبري انتي العاقلة انا بدبرك بمعرفتي

خلصنا شغل وانا ما عاد فيي حيل اتحرك نظفنا البيت وحكيت لكوثر تشطف واتريها ما بتعرف تقشط بالكعب الي لابسته
بس ولو
( تعالي كوثر خدي هاي الحفاي كتير منيحة هاي جبلي اياها سامي اول ما تزوجت )
لبستها اكتر حفاي بتزحلق وهي بلشت تشطف توقف من هون وتزحلق من هون
كانت واقفة بالصالة ظلت داعمة لعند كيس الزبالة الي حطناه عباب البيت مع فتحة سالم الباب هو شاف هالشوفة راح ما يغمى عليه
اااخ بس لو تشوفو كيف عمتي وبناتها هجمو عليها وصارو يشيلو فيها والشاطرة الي صارت بدها تشطف عنها
عمتي اطلعت فيي تطليعة وكأنها فهمت انه كوثر وقعت بسبب حفايتي يلا تعيش وياما رح توكل غيرها
وهالليلة نمت بدون ما احس عحالي من التعب وتاني يوم من الصبح نزلت انا وعمتي وبناتها واخدت كوثر معنا رحنا نشتري اواعي للعيد
لفينا ودورنا بالاخير حورية اشتريت تنورة جينز مع بلوزة صفرا وصندل بني
ونجاة نفس الايشي بس غيرت لون البلوزة لاحمر
وانا اشتريت تنورة بنية وبلوزة خضرا خلص بنفسي اللون الاخضر
اما كوثر هالداهية اشترت بنطلون جينز شلستون ووبلوزة لونها ابيض قال ما هي بالدار وبس تطلع بتلبس عباي )
روحنا عالبيت كان عنا اكل بايت من قبل يوم وسامي جاب معه صحن حمص وصحن فول وكيس فلافل
وجايب معه جريدة الرأي قال كاتبين فيها متى متوقعين العيد
انا مسكت الجريدة وقعدت احل كلمة متقاطعة
في من ضمنها سؤال
كلمة من خمس حروف قال ايشي بلدغ وبلسع وبيوكل ما بيشبع فكري يا هند فكري ايوا هاي حماتي بس خليني اعد عاصابعي الحروف
ح م ا ت ي ايوا هيهم خمسة
ووحدة تانية كلمة من اربع حروف قال ( من تحت لتحت وعند الزوج الي بخت )
ايوا وهاي حلها كوثر
ها ك و ث ر هيهم اربع حروف
مزعت صفحة الحزازير وضبيت الجريدة بلاش حدا يشوفها
وطلعت انا وسامي لفوق كان جايبلي بزر ابيض وشوية ملبس عقضامة تسلينا فيهم قبل لنام للسحور
لانه رمضان قرب يخلص والعيد صار عالابواب ولازم انام بكير قبل تعزيلة العيد

( يلا يا هند يا دوب نلحق نخلص تعزيل انزليلي بسرعة الكل بحكي انه بكرة العيد
نزلت وبلشنا شغل انا استلمت مسح الشبابيك وحورية كانت جاي تساعدنا اعطتها عمتي فرك السجاد وعمتي طلعت عالسلم تعزل السدة وحطت كومة كراكيب هدول لما بيجي موفق عالباص بعد العيد بدها تبعيه اياهم
وما خلصنا شغل الا قبل الفطور بساعة
كانت عمتي رادة العدس نعمل مجدرة ما هو هيك رمضان بنبلش فيه فيه باكلات اشكال الوان وبعد هيك بتصير تخف المنتجات
وشوي الا اجا عمي وسامي جايبين معهم حلو العيد علبة بلازا وباكيت ناشد وبيض حمام للولاد قعدنا وفتحنا عالتلفزيون الاردني وقبل ما تيجي اخبار الساعة تمنية اعلنوها انه تاني يوم العيد قمت سلمت على عمي وعمتي وبست ايدهم وعايدنا على بعض وسهرنا عندهم وطلعت على بيتي اغلي القهوة واجهزها وحطيت جاط للمعمول و صفط للحلو ولا هو سامي جاي من وراي معه كيس
مش قليل هالسامي جايبلي بيجامة متل هدولاك الستان تذكرتوهم لونها نهدي غمزني هديك الغمزة وحكالي يلا بما انه رمضان خلص البسيلنا هالبيجامة
الله يدلها عالخير هالزهور بنت ام تيسير دلتنا عالمحل وجبنا من عنده كل الالوان اه صحيح زهور تذكرتها ان شاء الله تكون رجعت لزوجها قبل هالعيد
صحينا الصبح عصوت التكبيرات ايشي بفرح القلب ولبسنا عبايتنا وطلعنا كلنا عصلاة العيد
كانو كل الجارات ملتمات بالمسجد وما تركو سيرة ولا موضوع الا وحكو فيه مع انهم امبارح شافو بعض
وبعد الصلاة عمي وولاده راحو عالمقبرة واحنا روحنا نعمل فطور ونجهز قبل ما العالم يجو يعايدو علينا
قلينا كبدة ومعلاق ولا هالباب بدق
كانو اخواتها لعمتي ما شاء الله هدول الله معطيهم كل واحد حط بايدها عشر ليرات
وانا عمي وسلفي سلمو علي وعايدوني كل واحد خمسة
بس ابصر قديش يعايدو كوثر
بعد شوي اجو عنا دار ابو رفعت عايدو علينا وعزمو وحلفو الف يمين الا سالم يكون حمام عرسه عندهم
انا طلعت عبيتي استنى بابوي وعمامي بس انا وبنات عمي كتار لهيك بدنا وقت ليلفو علينا فتحت التلفزيون وقعدت احضر مسرحية العيال كبرت لحتى يجي ابوي
رنيت على امي حكيت لحالي باخد وبعطي معها
( يما كل عام وانتي بخير ينعاد عليكي بالصحة والسلامة )
( وانتي بخير يما )
عرفت كل اخبار الحارة من امي وعرفت كل وحدة من الجارات شو لابسة وشو شارية للعيد وحكتلي انه كعكاتها زبطو وطلعو زاكيين كتير مش متل كعكات ام تيسير يا حرام تعبت عليهم وطلعو كتير يابسات شكلها حاطة زيت زتون عليهم

( ها يما هي الجرس برن شكله ابوي وعمامي وصلو
برجع بحكي معك )

دخلو لعندي يعايدو علي بس ما طولو لانه عندهم لف كتير لسا وكل واحد حط بايدي خمسة
يعني جمعتلي مبلغ منيح لحتى اشتري لبسة منيحة لعرس سالم وهيك صرنا بدنا نحضر حالنا للعرس وكل عام وانتو بخير

…..يتبع في الحلقة القادمة

#حنين_طه