بين الطنة والرنة ضعت بين الحماية والكنة الحلقة 13

بين الطنة والرنة ضعت بين الحماية والكنة الحلقة 13
نكمل لكم هذه القصة الشيقة والممتعة والتي نقدمها لكم في قسم المنوعات في تطبيق #زاكي, قراءة ممتعة نتمناها لكم

#بين_الطنة_والرنة_ضعت_بين_الحماية_والكنة

الحلقة التالتة عشر بعنوان ( سفرة حماتي )

هييي هيهم وصلو اهلها لكوثر والله حاملين ومحملين لازم انزل اشوف شو جايبين لبست عحالي دشداشة فضفاضة لانه ما عاد في ايشي اجا علي
نزلت لعند دار عمي ولا هم اهلها جايبنلها معهم عالصبحية جهاز بتركب عالتلفزيون بجيب عشر قنوات وحكو انه عدنان ابن ابو عدنان الخضرجي بده يجيب صحن كبير ويركبه عالسطح عشان يزبط هاد الجهاز ااااخ نيالها هسا بتقضيها من مسلسل لمسلسل وبتشوف حالها ولا ما هي هدية محرزة وجايبن باكيت برمة الي ما حدا بقدر يحلم فيه
امها وخالاتها يطلعو فيها يتغامزو ويتلامازو كنت بدي ابقها هالبحصة واحكيلهم تعالو بكرة بتطمنو الليلة الماضية كوثر كانت مسهولة بس مسكت لساني بالموت
وقبل ما يطلعو حماتي غدتهم كاينة هي وبناتها طابخات وعاملات مسخن
روحو اهلها وانا ظليت استنى بعدنان يجي بركب الصحن بدي اشوف شو بجيب بس عدنان طول وانا نعست حملت حالي وطلعت عبيتي انام وحكيت بكرة بنزل بشوف ويا خبر هسا بفلوس بكرة ببلاش
والله نمت وما دريت عحالي حتى سامي اجا وما حسيت عليه وما صحيت الا عصوت حماتي

شو يا ابو جلال ليش هالقد ايدك ماسكة زويدهم شوي ما انت شايف هالاغراض عشرة عمر )

كنت سامعة حماتي وهي عم بتفاصل بابو جلال عالبيكب عشان يشتري منها شوية كراكيب طالتهم لما عزلت السدة
نزلت لعندهم كانو بنقرو بكوسا بدهم يعملو محاشي وقاعدات قبال هالتلفزيون وفاتحات على استغفر الله نسوان بتغني وبترقص هدول لو البس متلهم مش بس رح يلزقلي سامي بالبيت لا احتمال حتى لما يضطر يطلع من البيت يوخدني معه

حماتي كانت راسمة تطلع عالحج بس ما صحلها لهيك قرر سامي يوخدها ويطلع فيها عمرة
راح حجز الهم وبلشنا نجهزلهم عشان السفر
اجت علينا خالتي ام رفعت وصارت تساعدنا عملنا لحماتي قراص بسبانخ وحطتلها بالشنتة ( كيس تفاح وموز وليمون ) وكيس في بزر وفستق وكل شوي تحكيلنا كترو بدنا نطعم الناس الي معنا بالباص
التمو عنا الجارات يودعوها لحماتي وكل وحدة عندها دعوة حكتها لحماتي تدعيلها اياها الي بدها تطلق كنتها والي بدها ربنا يرزقها الف دينار لا وقاعدات بتمنو وهن مبحلقات بالنسوان الي عالتلفزيون وول طيب عالاقل شيلو عشان الله يستحيب
المسا اجت حورية ونجاة وولادهم سهرو وودعو امهم وسامي لانه من الصبح بدهم يتسهلو والطريق طويلة
وسامي طول الوقت يوصي بعمتي يما الحمامات بس عالاستراحات مش كل شوي بدك حمام
اتسهل سامي وعمتي وانا اخدت شنتتي ورحت اقعد عند امي واول ما وصلت طبو علي نسوان الحارة قال لاني جايبة معي شنتتة اواعيي فكروني جاي مطلقة هاي اكيد هديل واسيل ونهيل بنات ام لطفي الي خبرو الحارة لاني وانا جاي لقيتهم بلعبو حجلة بالشارع
ما هي طب الجرة عتمها بتطلع البنت لامها
( ام حسين : ولك يا هند ليكون في ايشي وانتي ما بدك تحكي اذا زوجك مطلقك ولا ايشي احكي )
( ام زهير : اهم ايشي يا هند تكوني جبتي معك ذهبك )
( فال الله ولا فالكم كلها كم يوم وراجعة سامي طلع عالعمرة مع عمتي حكيت لحالي ليش بدي اقعد هناك لحالي على اطبخي يا هند لعمك ما هي هالمنكوبة كوثر بتعرفش تطبخ)
( ام حسين : وبأي شهر صرتي يا هند ترا نافشة كتير ما شاء الله )
( بالتامن يلا هانت ،،،، هسا المهم لا تنسوني شو بدي احكي مش دار اهلها لكوثر جابولها معهم عالصبحية صطلايت )
( وشو هاد الصطلايت يا هند )
( هاد يما صحن كبير بتركب عسطح البيت وفي جهاز بينحط عند التلفزيون وبتصيري تقلبي بس بجيب شغلات والعياذ بالله )
( قولي وغيري ولك هند هو من قليل ربنا غضبان عالبشر شوفي صرنا بنص شهر عشرة ولهسا ما مطرت ولا مرة )

روحو الجارات من عنا واجا ابوي المسا جايب صفط هريسة حليت معه باكيت عصير وقعدنا نوكل فيه كنت حابة نطلع نقعد بالحوش بس الدنيا صارت تبرد امي من تاني يوم طلعت هالسجاد وفرشناه وعزلت السدة ونزلت صوبة الكاز من فوق
وكل يوم قبل الشحادة وبنتها خالتي ام حسين وام زهير عنا
( هند ولك هند )
( نعم يما )
كانت امي بتفضي بشوالات البصل وحكتلي اضب الشوالات الفاضية بنفعو ليف للحمام
( هند يما هسا بيجو الجارات يفطرو ام حسين حكتلي انها عاملة مناقيش زعتر عند ابو فهيم الخباز )
( هو لسا عايش ابو فهيم يما )
( ولك ما قلتلك انه ابو فهيم بعد ما ابنه تزوج هاي الاجنبية صار كل يوم يقعدله قال بده اياه يبيع المخبز ويفتحه ايشي شكلها هي بتعبي براسه )
( يما الاجنبيات مش متلنا ما عندهم هاد الحكي )
( هسا المهم قومي حطي بريق الشاي عالنار قبل ما تيجي ام حسين وناوليني بطريقك علبة الخياطة من على ظهر النملية خليني اقطب هاللحافات)
رديت الشاي و جبت لامي عدة الخياطة الي حاطيتهم امي بعلبة البلازا بعد شوي طلت خالتي اام حسين جايبة هالمناقيش و جاي وهالمرة ساخية بالزعترات
افطرنا وعملت فنجان قهوة وقعدنا نشرب
قعدت عنا شوي وساعدتنا بالطبيخ وروحت المسا اجا ابوي سخنا الي زاد من المناقيش وتعشينا عليه وفتح ابوي التلفزيون يتفرج وبعد شوي سكرت قناة عمان وسوريا وطلعلنا هاد الدويرة الكبيرة مع صوت هاي الزنة تن تن تن يعني سكرنا اطفو التلفزيون احسنلكم قمت انا اقترحت على ابوي وحكيتله يجيب سطلايت متل الي جابوه اهل كوثر بس امي كانت تجحر في وتعص عشفتها
( شو هو هاد يابا السطلايت )
بعد ما شفت امي بتتحلفي ( اه لا يابا سلامة خيرك هاي لعبة )
اقتنع ابوي هالمسكين انها لعبة وقام حط راسه ونام وانا تاني يوم من الصبح ضبيت اغراضي وروحت عبيتي ما هو مش ظايل ايشي لجية عمتي وسامي لقيت البيت معفن وريحته طالعة هالكوثر لا هي للسدة ولا للهدة
اول ما وصلت رنيت على حورية ونجاة يجو يساعدونا بالتعزيل وفرش السجاد وفهمتها لهاي كوثر اذا ما بتشد حيلها وبتشتغل متل الخلق لتوكل قتلة وتفرق عالحارة
بعد ساعتين وصلت حورية ونجاة فرشنا الموكيت تحت السجاد وحطينا الحصيرة بقلب المطبخ وعبينا الصوبة كاز وجهزنها وطلنا اللحافات ما خلصنا ولا احنا مهدود حيلنا بدنا نفرفش شوي ونتفرج عالسطلايت ولا هي هالداهية كوثر قال متابعة مسلسل اسمه الكواسر وما رضيت تحطلنا على ايشي وولاد حورية يبكو بدهم يتفرجو على ماوكلي بس تنحت وتنحت
الله الغاني عنها مالها عمان وسوريا الارضية طلعت على بيتي ارتاح وما نزلت تاني يوم غير عصوت عمي وسالم قال بدهم يزينو باب البيت لعمتي لانه كان نفسها تروح حج وما صحلها كانو جايبين هالقصب وقاعدين بزينو

المسا وصلو عمتي وسامي وسالم وعمي راحو يجبوهم وكل نسوان الحارة كبيرها وصغيرها تجمع عنا يباركو لعمتي بالعمرة والي تزغرد والي تهاهي
عمتي كانت جايبة لكل بيت بالحارة سجادة ومسبحة ومسواك وجايبة لكل ولد صغير
لعبة زي شكل التلفزيون بتطلعي فيها بتشوفي مكة
وللبنات اساور ودناديش والي جابت دشداشة خضرا مقصبة
قعدنا معهم لنهاية السهرة وطلعنا على بيتنا اجا سامي وفتحلي هديته كان جايبلي بيجامة هي مو ستان متل هدولاك قطن بس بتمشي الحال متحلحل هالسامي ولسا بدي البسها
( سامي وك سامي قوم قوم في ايشي طق قوم يا سامي بدي اولد )
( نامي يا هند انا طول الطريق ما نمت لسا بكير لساتك بالتامن )
وفش خمس دقايق والتمت الدنيا عصوتي
راح سامي يدبر سيارة نطلع فيها عالمستشفى
وقعدت كوثر وعمتي جنبي
( ااااخ كوثر هاتي ايدك هاتي )
( ولك الله لا يوفقك موتني عض )
( مش مني مش مني من الطلق عمتي عمتي الله يخليكي هاتي ايدك ما بوجعك )
عمتي من العضة عيونها شقلبو ووجها قلب احمر عازرق ولا شوي كنت اكلتها مش بس عضيتها
مسكت كوثر من شعرها وعمتي ايدها بتمي انا اصرخ من الطلق وهم يصرخو من الوجع
لحتى اجا سامي جاب هالسيارة. وطلعنا

..،،، يتبع في الحلقة القادمة
#حنين_طه