سنة أولى زواج قصة واقعية حلقة 6 + الأخيرة
سنة أولى زواج قصة واقعية حلقة 6 + الأخيرة
نرحب بكل قراءنا الأعزاء في زاكي, نكمل لكم اليوم في قسم المنوعات في زاكي أحداث هذه القصة المميزة, التي نأمل أن تنال علىى رضاكم, قراءة ممتعة وجميلة نتمناها لكم, وننتظر رأيكم وتعليقاتكم على القصة.
#قصص_من_الواقع
#سنة_اولى_زواج
#بقلم_لؤلؤةالبحر
الحلقة 6
الحياة با جماعة تجارب ….بس تجارب عن تجارب بتفرق ….يعني فيه تجارب غاليه مثل حق السجادة وحق الاواعي…وخاصة القمصان ….لانه حبيبتي ميرا الله يحفظها في يوم …حكتلها
قصي: مرمورتي. .أميرتي
ميرا : نعم حبيبي …
قصي : أي بس تحكي نعم حبيبي بنسى شو كنت بدي احكي …لاني يا جماعة معذور. …لاني تربيت في بيت خالي من العنصر الأنثوي ….والنعومة…طبعا غير امي قصدي بلاش يوصلها الحكي …..وهون اتذكرت وحكتلها حبيبتي ولا قميص مكوي. ..اوخذهن عالمغسلة والا تكويهن ….
دقت عصدرها…وحكت
ميرا: يا باطل …اليوم بترجع كلهن مكويات بس انا بحب أجمع الكوي كلو مرة واحدة بتسلى اكثر. …
(ميرا الاميرة بدها تتسلى بالكوي شكلو عندها هواية بالكوي انبسطت فيه شي طلع بتعرفو وبسليها. ..المهم رحت عشغلي. ..ورجعت لقيت ميرا الاميرة خدودها مثل حبة البندورة وعيونها حمر ….فكرتها مريضة ولسه بحكيلها مالك …انفتحت حنفية دموعها. .
ميرا: هاد المكوى مغشوش ومش نوعية اصلية
قصي : ليش يا حبيبتي يا مرمورتي والله تيفال فرنسي يا بنت الحلال شو مغشوش ..وهون فهمت هي كل ما تعمل مصيبة بتحكي عن الشغلة مغشوشة. .فاتداركت الوضع وحكتلها. .
قصي: حبيبتي من الاخر شو عملتي احكي صدقيني ما بلومك بس هاتي الصافي
( قال هاتي قال ياريتها ما هاهات. ..القمصان ثلاث ارباعهن محروقات اشي من الضهر واشي من قدام شفت هالشوفة …بطلت استوعب ….أقل قميص حقه هالقد …بس الحق علي ليش الحكي …انا بتعلمش كان لميتهن ووديتهن عالمغسلة وما فتحتش ثمي. .كان لازم اسالها ..انا الحق علي ياجماعة انا بتعلمش. ..مرمورتي ملهاش دخل صدقوني….
وهيك راضيتها يا جماعة …وحكتلها فداكي ورحت بالليل عالسوق وجبت غيرهن ….
لا وامي الله يحفظها بتتصل زعلانه ليش بتسالش عأمك من لما اتجوزت نسيتنا. …كنت بدي احكيلها هي بنت اختك مخلية براسي عقل ….بس يلا أهم شي ميرا الاميرة تزعلش والله فش منها بالدنيا ….
المهم اشتريت القمصان وجبت لها معي هديه عشان اصالحها وروحت … لقيتها بتحكي مع خالتي عالتلفون وبتوخذ منها طريقة الكفتة. ..بتهداش كل شوي بتطلع بمصيبة قصدي بتطلع بفكرة بدها تجربها وخاصة انها اتعلمت ع الفرن ….وهات اقنعها ياحبيبتي انا مسامحك بديش كفته ..وهي ابدا مصممة قال امي حاكتلها أنها اكلتي المفضلة …عاد يا جماعة بحبهاش كثير …وهيك صممت وعملت مرمورتي ثاني يوم صينية هالكفتة. ..هلأ انسو الشكل ..وانسو طعم الشياط فيها لانها ملزقة ومش كاينة داهنة الصينية زيت قبل لتفردها. .بس انه حجم الصينية الي عاملتو بكفينا وبكفي عمارة …راحت اللحمة يا جماعة وانا من قهري قعدت خمس أيام اوكل فيها ولا اكبها…اه والا وجع البطن ولا كب الطبيخ. .وهيك بتقدرو تحكو صرت أكره طبختين المجدرة والكفتة…
مش مهم المهم ميرا الاميرة تكون مبسوطة حبيبة قلبي هاي …
💑💑💑💑💑💑💑💑💑💑💑💑💑💑💑💑💑
#قصص_من_الواقع
#سنة_اولى_زواج
#بقلم_لؤلؤةالبحر
الحلقة الاخيرة
كثير كنت بس واحد من صحابي يتجوز ونروح نباركلو. .نلاقي مرته عامله هالوليمةوهالسفرة من هون لهناك……وانا من وقت ما اجت ميرا الاميرة …والشباب كل يوم…..يا عريس بدنا نيجي نباركلك….انت ما قصرت معنا بس اتجوزنا …اااخ ياريتني قصرت والله اني ندمان…..وانا كل يوم بطلع بعذر ….لانه عارف ميرا الاميرة لسه ما اتعلمتش تعمل هالوليمة ولهسا ما زبطت طبخة واحدة….بس خلص انحطيت تحت الأمر الواقع وحكولي جاين نباركلك ….يعني افهمها حظرلنا عشا ….هسا من ناحية الدار نظيفة والحمدلله لأنه ما حكتلكو هي عندها وسواس اسمه نظافة يعني ممكن تشطف المطبخ والحمام كل ما تدخلهن من باب التسلية حتى لقيتها مرة بتمسح بدرج العمارة مش عاجبها. …بس فكرة انه تطبخ هون المصيبة…وهذول معظمهم عزابية وبدهم اكل بيتي يعني زهقانين الاكل الجاهز…..بس كنت ناوي احكيلهم انه مرتي تعبانة ومشو حالكو بالجاهز وخلصت وخلصنا….ورحت جبت الاكل وحطيته وشديت عليها بس حطيه بصحون بس …والله ما طلبت غير هيك….هي مسكينة شافت هالعدد الداخل…تقول كتيبة… ارتبكت يا حرام راحت نص الصحون وقعن والاكل نكب ….والناس جوا سامعين مهرجان التكسير…وكملتها بقنينة الببسي اجت تصب …شكلي كاين خاضها وانا جاي فتحتها المسكينة وفارت بوجهها صارت ميرا نصها كاتشاب ورز والنص الثاني ببسي…وانا بس شفتها ……مقدرتش وقعت عالارض من الضحك وهي مثل الصوص المنفوش………يمكن برد قلبي شوي من مقالبها معي …وهون اشتغلت حنفية العياط. …وهاتلك ساعة مراضاة والشباب جوا …وربكو حميد وقتها كان معي رقم الدلفري نص ساعة واكل جديد كان جاي …بهمش فداها يا جماعة هاي ميرا الاميرة ….بنت خالتي والله لو زعلتها عارفين ترا خالتي امي جنبها نقطة ببحر…..
واكيد كثير بتحكو لا انت مش طبيعي ….بس الفكرة يا جماعة اني بحبها ورغم كل المصايب الي عملتها بس ماحد اجا متعلم من بطن امه……صدقوني انا هيك بقنع حالي ….
…وهيك مرت العزومة عخير ….
والشباب روحت شبعانة الحمدلله. ..
…..
هلا صح المواقف بتخلصش …. بس كلو كان اول الزواج …. بذكر مرة صحتني من احلا نومة قال ايش قوم اشرب معي عصير ….وأنا بعرفش كيف قعدت شربت ورجعت نمت ….والحموضة طفحت عمعدتي لانخنقت….بس بهمش زهقانة مهي وبدها حد يشرب معها ….
ومرة اول رمضان ….حطينا المنبه لنصحى نتسحر ونمنا والصح انا اركنت عليها تحط …وهي المسكينة مش كاينة عارفة انه الساعة واقفة وهيك لارنت ولا تسحرنا. ….بهمش يا جماعة جل من لا يسهو. ..
…
وهيك ظلت المواقف الي انا بعتبرها ملح الحياة اليومية ليوم جيت من الشغل ..افتح الباب ..الباب بفتحش …أدق مرمورتي بتفتحش ومخليه المفتاح بالباب انا وقتها خلاص فيوزاتي طقت…ولعت…الدنيا نار وبدي افوت …وظليت أدق لطلعتلي الجارات وطلن علي …ولأول مرة بعرف انه جارتي ع اليمين مصرية والشمال سورية ….
أتلفت ع المصرية ..
المصرية: خير يا بشمهندس مالها المدام ميرا فيه حاجة
أتلفت على السورية
السورية : خير لك ابني شو بها ميرا
هون صفنت. ..شو بدي احكيلهن المدام لحشتني يا خالة ع الدرج. .وإلا المدام لطعتني ع السلم يختي. …
وهون مسكت أعصابي وحكتلهم والله الي ساعة بدق عليها شكلها نايمة مسكينة ..نطت المصرية ..
المصرية : تصدق بالله انا كمان خبطت عليها كنت عاوزه اديها صحن كوشري مفتحتش
ردت عليها السورية
السورية : ايه والله وانا اشتهليها هالكبات ما ردت …
هون مخي فقع. .معقول صار معها اشي …وصرت بدي إكسر الباب …وإلا هي فتحت …وبس شفتها…..منيحة ….خلص قررت بدي ارجعها لامها …..بس بيني وبين حالي هظا القرار ما نطقتوش رسمي … ولسه بدي افتح ثمي وبدي اعاتبها قدام الجارات عشان أبين رجال…..وإلا نطوا الجارات …اخذو الجبهة عني وقامن بالواجب الصراحة ….وهي بكل برود اعصاب ردت عليهم
ميرا : والله ياجماعة انا من الصبح ما صحيت …مش قادرة اصحى …بس اتذكرت المفتاح..وجيت اشيلو….سمعت صوتكو ..فتحت …وبتحكي وشوي حتغفى عالباب ..وانا البركان عندي وصل للانفجار بس ماسك حالي قدام العرب بديش يحكو عني رجعي …وهون اجاكي يا ميرا الفرج…نطت جارتنا السورية جنبي …وإلا بتحكيلي ..
السورية : لك ابني لتكون مرتك حامل ..نومها نوم حمل
سحبتني المصرية
المصرية : تصدق جايز تكون حامل اه وربنا …ده شكل واحده حامل …
وهون يا جماعة نجوم الليل لمعت قدامي وشفت ميرا القمر … اتطلعت فيها وحكتلها حبيبتي روحي البسي خلينا نروح الدكتور … وكنت ناوي اذا مش حامل من الدكتور ع المطار …بس باركولي..مرمورتي حامل ….وانا حصير أب. ..وألقى يا قصي لتلقى بس بهمش المهم ميرا الاميرة حبيبتي طلعت بريئة والحمل السبب. … مش انه هي مهملة …
وهيك يا جماعة قضينا فترة سنة أولى نتعرف على بعض ونعرف الحقائق المرة ….فعلا الي بحكيلك الجيزة مثل البطيخة صدق …والله رحم ميرا اني طلعت من نصيبها لأنه غيري ما بتحمل. …بس بتظل بنت خالتي …وحبيبة عمري ميرا الاميرة ..وهيك خلصت الي عندي مع انه الحكي بخلصش. ..بخاطركو. …وصحيح قبل لا ختم. ..اجا ياسين وصرت ابو ياسين باركولي…..
تمت