قصة جريمة مغفورة الجزء الأول
نرحب بكل قراءنا الأعزاء في زاكي, نعرض لكم اليوم في قسم المنوعات في زاكي أحداث هذه القصة المميزة, التي نأمل ن تنال على رضاكم, قراءة ممتعة وجميلة نتمناها لكم, وننتظر رأيكم وتعليقاتكم على القصة.
#جريمة_مغفورة_بقلم_حنين_طه
يلا يا يمنى حضري المي السخنة ختام رح تولد اتحملي لك بنتي شوي
…………..
شدي يا رحاب كمان شوي ما بقى كتير رح تولدي
………..
مبروك يا ختام هي بنتك ما شاء الله متل القمر شو رح تسميها
ختام ( رح سميها رزان بحب هالاسم كتير )
بتعرفي يا ختام انه ام سعيد اللفاية ولدت اليوم كمان )
ختام ( جد ،،، والله فرحتلها من قلبي انا وهي حملنا سوا
شو جابت )
جابت بنت متل القمر ورح تسميها اماني قال لانه امنيتها من زمان يكون عندها بنت وهالبنت كانت متل كومة اماني )
ختام ( يلا الله يباركلها يا رب )
……………
بعد مرور عشرين عام
روما ( الخادمة ) ( ست رزان الست والبيك ناطرينك تحت عالغدا تفضلي )
رزان ( يلا جاي بس لانهي هاللوحة من ايدي يلا قديه تعبت وانا عم ارسمها حلو ما )
روما ( بصراحة ست رزان قديه بشوفك بترسمي بس بحياتي ما فهمت شي من روساماتك )
رزان ( ههههههه ايه فن تعجيزي هيدا لانه )
رمت رزان الفرشاية من ايدها مسحت عرقها بايدها المتوسخين ونزلت لتحت لتاكل مع امه وابوها )
سحبت رزان الكرسي وقعدت
ختام ( لك ليش هيك حالتك ما عرفتي تغسلي وجهك قبل ما تنزلي هلا بس يشوفك ابوكي رح يجن عليكي )
رزان ( ييي شوفيها لك امي هو انا قاعدة قدام حدا غريب انتي امي وهو ابي
صحيح وينه ابي مو شايفته عالسفرة )
ختام ( اجت اماني بنت ام سعيد من شوي ودخلت هي وابوكي عالغرفة )
كانت رزان بتاكل بشراهة ( اماني عنا ليش ما طلعت عندي والله مشتاقلها )
ختام ( الله يعينها شكلها محتاجة شوية مصاري واجت تاخد من ابوكي وبتعرفي ابوكي ما بحب بس يتصدق يخلي حدا يعرف بشي )
حطت رزان المعلقة من ايدي ( مستحيل اماني تطلب فلوس من حدا هي رفقيتي وانا بعرفها منيح بعدين لو كانت فعلا محتاجة كان طلبت مني انا رفيقتها ليش لتطلب من ابي )
رفعت ختام كتافها ( ابصر )
بعد شوي طلعت اماني مع ابو رزان من الغرفة قربت لعند رزان وامها عالطاولة
اماني ( صحتين وهنا )
رزان (لك اماني انتي من متى هون نطرتك كتير كنت بدي فرجيكي رسمتي الجديدة الي بدي فوت فيها عالمعرض )
كان وش اماني اصفر وذبلان ( يلا هلا بشوفها بس كان بدي شي من عمو )
رزان ( اها يا عيني عالاسرار )
ابو رزان ( اماني بمثابة بنتي ابوها اله عمر بيشتغل عنا هون ومتل اخي وامها معنى من زمان لهيك ما بفرقها عنك يا رزان )
اماني( تسلم عمو )
رزان ( ايه انا اصلا بحمد ربي انه بعتلي اياها ما بشوفها الا متل اختي )
قامت رزان عن الغدا وسحبت اماني من ايدها وراحو على غرفتها
قعدت وزان تفرجي اماني باللوحات والتانية ما في الا تهز براسها
رزان ( لك اماني شو بك عبري احكي منشان الله لسا كل ما بفرجيكي لوحة بتهزي براسك وبس )
اماني ( تعبانة شوي بس )
طملت رزان عركبها وقعدت مقابيل اماني رفعت راسها بايدها
رزان ( اماني اطلعي فيني انتي بتعرفي قديه انا بحبك واحنا ربينا سوا لك حتى انا واياكي نولدنا سوا بنفس اليوم واللحظة اذا بتحتاجي اي شي بيوم بس اطلبي مني والله عيوني الك )
اماني ( يييييي لك مالك والله ما في شي بس كنت عم احكي مع ابوكي بلكي بلاقيلي شغل عنده باحدى شركاته لاحمد )
رزان ( اووووه يا عمي يا عمي الحب الحب هيك لكن سبب زيارتك هي الحب )
اماني ( ههههههه هيك شي )
رزان ( ومتى بدك تعرفينا عليه سعيد الحظ)
اماني ( قريبا جدا ههههه وانتي ست رزان شو اخبار القلب معك )
رزان ( انا لك لا مستحيل ما رح لاقي شب يرضى بالجنون الي انا فيه لك انا امي وابي لولا العيب بيتبرو مني )
اماني( هههههههههههه مزبوط والله )
رجعت اماني على بيتها والي كان غرفتين صغار بارض الحديقة تبع بيت اهلها لرزان
ام اماني ( جيتي لك امي )
اماني ( اه جيت وين بدي روح يعني )
ام اماني ( ليش عم تحكي هيك معي والله انا لانه بالي انشغل عليكي )
اماني ( حاجتك بقا لسا كل شوي بالي انشغل عليكي
لك انا زهقانة حالي حلو عني بقا كرهت حياة الفقر والذل كرهت الاهانة والبهدلة كرهت الحاجة كرهت شوف الايشي الي نفسي فيه وما اقدر جيبه وانتو شو ما في علسانكم غير عملنا كل شي بنقدر عليه كرمالك دخلك شو عملتو عشاني
بيت ما عنا
اكل لولا دار ابو رزان ما بعمرنا شبعنا لبس لحتى تتكرم علي رزان خانوم وتعطيني فضلة تيابها بشو هي احسن مني ليكون عندها قصر وسواق وسيارة ولبس وطلعة ونزلة وانا موت هون وانا بشوفها بعز احكي امي احكي ليش سكتي فهموها بقى انا زهقت ومن هلا ورايح ما عاد تشوفيني الا بالمناسبات تمام
بدي اطلع وشوف الدنيا والحياة بدي اشتغل بدي جيب مصاري بدي ادعس على كل الدنيا وامشي )
ام اماني ( يا بنتي مو كل شي بالدنيا المصاري الدنيا فيها الحب الحنان اهم من فلوس الدنيا كلها بعدين ليكو احمد بده يخطبك ما بكفيكي حبي انا وابوكي واحمد )
اماني ( ايه بروح بشتري بحبكم لالي اكل وبشتري بيت وبتعرفي شو بروح عند بياعين لتياب بقلهم دخيل عينكم خدو شوي من حب اهلي بدي اشتري فيهم
امي فيقي بقا هالحكي ما بقا يطعمي خبز )
احيانا الانسان بيحكي كلام كتير ما بيعرف انه اللسان متل السيف فيه كلام كتير بيجرح الي قبالنا ونحنا ما بنعرف او يمكن بنكون بنعرف انه جرحنا هالشخص بس بنتغافل
دخلت اماني عغرفتها وقفلت الباب انزوت عحالها بالغرفة وصارت تبكي مع كل دمعة غصة ومع كل غصة قهر وحرقة دم
وامها بقيت برا صافنة وساكتة معقول هي بنتي الي ربيتها وتعبت عليها معقول هي اماني الي كنت احرم حالي لاطعميها ولبسها
طول عمري بمسح دمعتها قبل ما تنزل عخدها ليش هلا هي نزلت دموعي قدامها شلال ومع هيك لفت ظهرها ومشيت كل هالقد الام بتتعب وبتشقى وبالاخير خلص ما بيعود تعبها اله اي قيمة بعيون ولادها
اجا ابو اماني من برا وحاولت مرته ما تبينله قهرها ووجع قلبها من اماني حطو العشا وتعشو
ابو اماني ( شو وينها اماني ليش ما عم شوفها صرلها زمان ما قعدت معنا عالاكل اشتقتلها والله )
ام اماني ( اكلت عند رزان مو جوعانة )
ابو اماني ( هلا رزان اولى منا تقعد معها وتاكل عندها )
ام اماني ( خلص بقا يا رجال بتكون اشتهت الاكل الي حطوه واكلت منه لا تعملها قصة )
ابو اماني ( طيب خلص متل ما بدكم
بدي قوم نام الساعة صارت 12 بعد نص ليل وبكرة عندي شغل من الصبح )
ام اماني ( ايه قوم نام وارتاح الله يعطيك العافية )
في منزل رزان
دق دق دق
رزان ( ادخل )
روما ( مرحبا ست رزان بتسمحيلي فوت )
رزان ( طبعا فوتي تفضلي )
روما ( فكرتك نايمة كنت خايفة ازعجك )
رزان ( لا بتعرفيني روما قبل معرضي عيني ما بتغفى ولا بيجيني نوم بس انتي شو مسهرك )
روما ( كان عندي شوية شغل هلا لخلصته )
رزان ( ايه الله يعطيكي العافية
روما شو بك كانه في بتمك حكي احكي )
روما ( اه لا ولا شي خلص خليني روح بلا ما عطلك اكتر)
رزان( عطلتيني ومشي الحال وهلا قوليلي شو في )
روما ( بصراحة ست رزان وما تقولي لحدا انه الكلام طلع علساني
قبل شوي كنت عم اتفقد الحديقة الخارجية وقت شفت
شفت )
رزان ( ايه شو شفتي )
روما ( شفت اماني طالعة من بيت اهلها لبرا بس ما بعرف وين راحت وهي مو اول مرة بشوفها بتطلع بهيك وقت )
رزان ( شو اماني طلعت هلا من البيت
غريبة شو مطلعها بهيك وقت لبرا الدنيا صارت نص ليل
ليكي روما الي قلتيلي اياه رح يبقى بينا انا واياكي تمام
ما بدي حدا يعرف فيه انا بس لخلص المعرض وبحاول افهم كل شي )
روما ( حاضر يا انسة انا رح روح نام بتحبي اعملك شي قبل ما فوت نام )
رزان ( لا تسلم ايدك )
طلعت روما من عند رزان وتركتها حايرة بافكارها
وما عاد الها نفس ترسم او حتى تخط ولو خربوشة صغيرة
رمت الاقلام من ايدها
رزان ( اافت يا ربي هالبنت رح تخرب عم تمشي بطريق مظلم كتير الله يستر )
بقيت رزان طول الليل بالمرسم ترسم وتعيد لانه من كتر التوتر ما عاد طلع معها شي حتى تاني نهار اجت روما عليها لقيتها نايمة بين لوحاتها وروسامتها
روما ( يا انسة قومي هيك ظهرك رح يوجعك )
رزان ( اااخ والله يا روما مو قادرة اتحرك الله يعدي هالمعرض عخير ليكي شو بدي قلك اوعي تقولي لامي او لابي اني كنت نايمة بالمرسم ايه حبابة انتي )
قامت رزان من مطرحها لملمت شعرها بطريقة مخربطة وراحت غسلت وجهها وطلعت عالحديقة لتفطر مع امها وابوها لقيتهم عم يحكو مع ام اماني لانه كانت زايدة الملح عالفطور وحارقة البيض وكل شي عاملته مو زابطعالفطور وهي اول مرة بيطلع معها شي مو صح
نزلت دمعة من عين ام اماني حرقت قلب رزان قبل ما تحرق قلب ام اماني مسكت فاينة ومسحتلها دمعتها
رزان( عادي يعني احنا بشر وبنغلط تسلم ايدك خالة )
دخلت ام اماني لجوا ولحقتها رزان
رزان( خالة انطري شوي قليلي مالك فيكي شي
لا تخبي علي انا متل اماني ولو )
ام اماني ( هو في حدا كاسر ظهري غير اماني
متغيرة كتير وما عادت متل اول )
رزان ( خلص اهدي كل شي رح بكون منيح )
رزان بتعرف انه في شي عم يصير بس ما بتعرف شو هو ما حكت شي لام اماني واكتفت بانه توعدها كل شي رح يكون منيح
كانت ناوية رزان بالليل تروح عند اماني وتحكي معها بس ما لحقت لانه قبل ما تروح لعندها بنص ساعة اجت روما تركض وتلهث حتى تخبر رزان انه اماني لقيوها اهلها منتحرة وغرقانة بدمها
ما ابشعه من شعور لما تكون بدك تعمل شي وما تلحق بسبب شي ظرف
بتقعد وقتها مع حالك وما بتعرف تلوم نفسك او تعاتب قلبك الي ما قدر يكون دليك لحتى ياخدك عند شخص بتحبه وتقدر تمنعه يأذي نفسه قبل فوات الاوان
حالة من التعب النفسي مرت فيها العيلتين
عيلة اهلها لاماني وعيلة اهل رزان بحكم العشرة وبحكم تعلق رزان باماني بس الايام لو ما محت الالم بتخففه
قدرت رزان تتجاوز محنة موت اماني لكن بعد ما راح عليها المعرض
ويمكن بعد ما احلامها تلاشت ونكسرت
رزان ( صباح الخير خالة )
ام اماني ( صباح الورد يا بنتي شو خلص نويتي تتسهلي)
رزان( ايه والله بعد ما راح علي المعرض ما بقيلي هون شي بدي روح لبرا وشوف )
ام اماني( طيب بنتي ليش ما بتخلي ابوكي يساعدك اسم الله ربنا فاتحها عليه ومعطيه من خيره )
رزان ( لا خالة بتعرفيني رافضة الموضوع تماما ما بدي ابي يساعدني بشي بدي ابني حالي من حالي انا عندي موهبة الرسم ولازم كون نفسي بنفسي
اساسا انا ما صدقت متى ابي وافق وقبل يخليني سافر واقدر انجح)
ام اماني ( موفقة يا بنتي ربي يحميكي ويهدي بالك
)
رزان ( ما عاد بدي شوف دموع اماني راحت لعند ربها بس انا موجودة الا نسيتي انه انا كمان بنتك انا واماني مولودين بنفس الساعة واليوم )
ام اماني ( ربي بيشهد علي انه محبتك من محبتها )
باست رزان جبين ام اماني وطلعت سلمت عامها وابوها لحتى تسافر
ابو رزان ( رزان بنتي انتي هلا رايحة عمكان بعيد ومجهول انا رح امنلك هناك بيت وسيارة وكل شي بتحتاجيه وحجزتلك بالطيارة بالهاي كلاس
بس بدي تعرفي شغلة عند ابوكي انا سفرتك لانه هي رغبتك لكن الغلط عندي ممنوع انا رح كون مراقب كل تصرفاتك و)
قاطعته رزان ( بابا اتوقع انت بتعرف شو مربي ما في داعي لهلحكي
رح فوت اخد دش وغير تيابي حتى اجهز واطلع عالمطار
طلعت رزان اخدت دش سريع
لبست بنطلون جينز عبلوزة خضرا رفعت شعرها بمشبك بيج ونزلت غرتها باناقة رشت شوي عطر ونزلت
كملت وداعها لاهلها واحبابها وطلعت عالمطار)
تفتلت شوي بالمطار اشترت شوكلاه وشيبس لحتى تتسلى فيهم بالطيارة
( النداء الاخير لرحلة رقم 1060 والمتجهة الى لندن يرجى من الاخوة المسافرين التوجه الى بوابة رقم 66 )
رزان ( وولي هاي طيارتي )
توجهت رزان للطيارة بهمة وحيوية دخلت عالطيارة واخدت مقعدها جنب الشباك عم تطلع على كل شي حولها او يمكن عم تودع ذكريات ماضي وبدها تفتح مستقبلها الجديد بايدها
حطت حزام الامان سكرت تلفونها وطارت الطيارة
وقبل ما توصل الطيارة بربع ساعة طلع من غرفة الطيار شبين ملثمين وماسكين سلاح بايدهم
مجهول ( ولا كلمة كلكم التزمو بمكانكم انا ما رح أأذيكم اهم شي ترودو عالكلام وما تعزبوني انا بدي منكم حدا واحد بس سامر فتشلي جوازات سفر الجميع هون )
سامر( حاضر سيدي
يلا كل واحد يطلعلي جوازه حتى شوفه )
سامر( فرجيني جوازك )
رزان ( مين انت لفرجيك جوازي روح انقلع من هون بعدين انت مفكر الدنيا سايبة والله لاشتكي عليك والله لمرمطك يا كلب انت واياه )
مجهول ( هي انتي اخرسي ووطي صوتك )
رزان ( واحد متلك الي بيخرس )
ضربها هالمجهول كف بسببه انفك شعرها كله وانتثر على وجهها
رفعت شعهرها بايدها ( والله لخليك تدفع تمن هالكف غالي انت الظاهر ما بتعرف بنت مين انا )
مجهول (ايه فرجينا جوازك لنعرف بنت مين حضرتك
سامر تعا شوف جوازها )
سامر ( سيدي هاي هي رزان بنته للكلب )
رزان ( احترم حالك وما تحكي عن بابا كلب )
مجهول ( ربطلي اياها وسكرلي عيونها وتمها
احنا بنعتذر يا جماعة جد اسفين ما كنا حابين نرعبكم بس في حساب لازم نصفيه مع ابوها للحلوة
سامر احكي مع الجماعة يحضرو عند مدخل الطيارة بدنا نطلع من هون بدون مشاكل وقبل ما الشرطة تحس بشي )
حاولت رزان تتفلت من ايدين سامر لكن قدر يربطها وغطالها عيونها وتمها
واول ما نزلت الطيارة
اختفى سامر والمجهول ومعهم رزان
في السيارة
رزان عم تحاول تفك حالها
سامر ( سيدي فكلها تمها )
مجهول ( فكه بس اذا صارت تحكي اقفلي اياه عالاخر )
فك سامر تم رزان وبلشت تصرخ وتهدد )
مجهول( لك خليها تخرس مو طايق اسمع صوتها )
رجع سامر قفل تمها وطبعا عيونها مغطيبن حتى ما تشوف الطريق
وصلو لبيت بيشبه خرابة رموها بقلب غرفة وطلعو هم قعدو برا )
كانت قاعدة بالغرفة بس سامعة كلامهم كله
مجهول ( روح حطلها اكل تاكل بتكون جاعت هلا )
سامر ( هلا بحطلها بس ما رح ننفذ خطتنا )
مجهول ( انا ما رح اقدر اعملها مو شفقة فيها بس قرفان قرب ناحها فيك انت تاخد الي بدك اياه واهم شي تصور كل شي حتى نبعت الصور لابوها خلي عينه تنكسر )
سامر ( هي البنت حلوة ما بقدر انكر بس هاد تارك انت مو انا )
فهمت رزان شو عم يستناها
كانت اللحظات بتمر ببطىء رهيب لحتى دخل لعندها مجهول الهوية واخد كل شي منها ورماها وراه ومشي وطبعا مع توثيق كل شي بالصور
سافرت رزان لتحقق احلامها المسلوبة و المكسورة ببلدها
رح ترجع عبلدها مكسورة اكتر ومسلوب منها اشي اهم ما الاحلام
مسلوب منها الشرف الكرامة العزة
…… يتبع في الحلقة القادمة
#جريمة_مغفورة_بقلم_حنين_طه
الجزء التاني
(لك الله لا يوفقها فضحتني بين العالم والله لاذبحها واشرب من دمها )
ام رزان ( وحد الله يا زلمة هي بنتي الي تعبت عليها وعلى تربايتها مستحيل تكون هيك اكيد في غلط )
ابو رزان ( بكفي تقوليلي في غلط ما شفتي الصور بعينك الله يلعنها )
المجهول ( بعتت الصور لابوها )
سامر( ايه طبعا بعتلو اياهم واتس اب )
مجهول ( امسك الخط واكسره حتى ما يقدر بوصللنا )
سامر ( تمام )
فات المجهول لعند رزان كانت قاعدة عند حفة التخت بتبكي
مسك شرشف ورماه عليها
( قومي البسي عحالك )
رزان ( والله شو الفايدة من اني البس )
مجهول ( افهمي انتي ما الك دخل بس ابوكي غلط كتير ولازم يدفع تمن غلطه )
رزان ( بيدفعه عن طريقي انا لك انا انتهيت فاهم شو يعني )
مجهول (…..)
رزان( ليش ما عم تنطق ولا قلك خليك ساكت صوتك ريحتك بتخليني حس بالقرف ما بدي اسمع صوتك )
مجهول ( متل ما بدك جبتلك الاكل قومي كلي )
رزان( ما بدي اتسمم ) رمت صينية الاكل بقفا ايدها
قرب لعندها ومسكها من ايديها وحطهم ورا ظهرها
مجهول ( انا طولت بالي عليكي كتير ومقدر الي صار فيكي بس اياكي تتواقحي معي بمحيكي عن وجه الارض )
رزان ( يا ريت لو تقتلني وتريحني )
بعدها عنه وطلع من الغرفة
مجهول ( سامروينك )
سامر( ايه ليكني بدك شي )
مجهول ( حضر كل شي رح نمشي من هون )
هز سامر براسه ومشي
مجهول ( رزان احنا رح نمشي خدي هي شوية فلوس بتقدري تدبري حالك فيهم وتطلعي من هون للمدينة وبس توصلي هناك انتي حرة بلي بدك تعمليه تبقي هون اوترجعي عبلدك
الي بدي قلك اياه انه انا فعلا ما كان قصدي اأذيكي بس هيك الدنيا كل حدا بصفي حسابه من التاني بشي غالي عليه ولا تفكري تشتكي للشرطة لانك ما رح تستفيدي شي
او ارجعي للوالد هو بقلك شو تتصرفي
سلام )
راح وبقيت رزان تبكي وراه اربع ساعات لتنهنهت بكى وعيونها تورمو اخدت المصاري وطلعت من البيت
كانت الدنيا برد كتير والجو عم بمطر كانت بتمشي بين الشجر ومو حاسة ببرد الجو
برد روحها والالم الي بين ضلوعها اقوى من برد الجو
وقفت تكسي وطلعت معه حاكته بالانجليزي وفهم منها انه يوصلها عالمدينة
اخدها التكسي لفندق بالمدينة
حجزت غرفة ونزلت هناك
قعدت عالتخت وصفنت بالسقف ( ليش يا ربي هيك عم يصير معي بشو غلطت انا ليصير هيك وباول يوم لسا بوصل هون اااااخ شو ترا بكون ابي حكى لما شاف الصور اكيد فكرني سيئة ااااخ الله لايوفقه الي عمل هالعملة كسرني وين بدي روح بوجهي من ابي وامي ورفقاتي ااااخ يا ريت بقيت عند اهلي بلا اي نجاح ولا انكسر هيك يا رب صبرني يا رب قويني على كل شي ناطرني )
سرحت بافكارها وغفيت من كتر التعب ،،،، صحيت تاني نهار طلعت من الفندق وحجزت باقرب طيارة لبلدها
رجعت وجارة وراها الف خيبة امل دخلت عالفيلا شافت امها وابوها قاعدين اول ما دخلت هجم ابوها عليها ومسكها من شعرها ويضرب فيها من كل ناح ومن كل اتجاه
وامها تحاول تفكها من ايده
ابو رزان ( هيك لكن يا كلبة بدك تسافري لتعجبي عكيفك ما توقعتي يوصلني شي )
رزان ( لك ابي انا مو متل ما انت مفكر الي صار فيني بسببك )
نزل كلامها عليه متل الصاعقة ،،، مسحت دموعها
( ايه انا دفعت ثمن غلط حضرتك مرتكبه مع حدا انا ما وصلت لندن وانا بالطيارة اخدوني خطفوني
طبعا حضرتك ما فكرت تسال شو صار لانه كل همك شرفك الغالي
لكن انا بقلك شو صار قبل ما توصل الطيارة بشوي خطفوني شبين تحت تهديد السلاح قالولي بالحرف الواحد انتي بنته للكلب والي لازم نصفي حسابنا معه
والباقي بتعرفه ابي وصلك بالصور اعتقد )
مسك ايده براسه
ام رزان( العما شو مفكرين الدنيا سايبة لازم نشكي عليهم ونمرمطهم )
رزان ( ايه روحي اشكي شبين ملثمين مو معروفين مين هم )
ام رزان ( ما مهم الشرطة بتجيبهم بطريقتها )
رزان ( ايه وانا بنفضح وبتصير سيرتي عكل لسان
ورجل الاعمال الكبير بابا بينفضح كمان حاجة بقا اتركوني بحالي )
طلعت رزان عغرفتها تبكي وبعد شوي دقت عليها ام اماني الباب ودخلت لعندها حضنتها وصارت تلعبلها بشعراتها
رزان ( اااخ شو تعبانة يا خالة شو رح يصير فيني هلا )
ام اماني ( ما بعرف يا بنتي بس وكلي امرك لربنا الكل هون بيعرف انتي مين وشو )
هدتها ام اماني لحتى غفيت
وتحت ابو رزان ما عم يعرف يهدا ولا يقعد من القهر
وكل ما يفكر بالقصة بكون رح يجن مين يا ترا اله ثار معي مين عم بحاول ينتقم مني ببنتي مين
بعد مرور اسبوعين
الايام لما تكون مصحوبة بهم بتكون عم تمرق فوق راسك شوي شوي وكانها مو حابة تمشي متل الي عم توصلك رسالة انه لازم تحس بالتعب والهم بكل ساعة ودقيقة وثانية وحتى بكل جزء من الثانية
ام رزان ( بقدر فوت )
رزان ( فوتي امي)
ام رزان( لك شو هاد ليش هيك صايرة كل رسماتك معتة وبتجيب النكد )
رزان ( عم حاول طلع شوي من سواد قلبي على هالورق الابيض )
ام رزان( طيب شو بدي قلك البسي اليوم احلى شي عندك جايكي عريس )
رزان ( ههههههههههههههه ضحكتيني امي وحياة الله هههههههههههههه لك جد بتضحك هالخبرية)
ام رزان ( ايه بلا مسخرة عم احكي جد انا )
رزان ( ومين بالله سعيد الحظ الي بده يخطب صاحبة الحسن والاخلاق )
تلبكت ام رزان شوي ( احمد الشب الي كان رح يخطب اماني زمان )
وقعت فرشاة الرسم من ايد رزان ( كيف بدك اياني انخطب لحبيب رفقيتي امي انتي شو صرلك انا مو وسخة لهدرجة )
ام رزان ( ما في قدامنا الا هالحل ابوكي خايف الي بعتله الصور يبعتهم لمنافسينه واعدائه وتصير فضيحة الها اول ما الها اخر
هاد انسب حل )
رزان ( دايما ما بهمكم الا مصلحتكم اما انا شو بدي ووين مصحلتي مو مهم صح )
ام رزان ( صدقيني يا بنتي هالحل كرمالك قبل ما يكون كرمال حدا تاني )
رزان ( وبيعرف بحالتي وبلي صارلي )
ام رزان( بيعرف بكل شي ام اماني الله يسعدها فهمته كل شي)
رزان( تمام امي متل ما بدكم )
ام رزان ( ها ايوا هيك بدي اياكي )
طلعت امها من عندها وهي ظلت رايحة لعند ام اماني
رزان( خالتي ليش هيك عملتي هاد كان لازم يكون من نصيب اماني مو من نصيبي )
ام اماني( لازم احميكي وساعدك يا رزان ولا نسيتي انه انتي متل بنتي )
غمرت رزان وجهها بحضن ام اماني وفقعت بكا )
المسا اجا احمد معه امه وابوه
لبست رزان فستان اسود ناعم رمت شعرها ورا ظهرها
حطت شوية كحل وحمرة خفيفة
ونزلت تستقبل العريس واهله
اول ما فاتت نزلت راسها خجل يمكن لانه احمد بعرف بوضعها خجلت
سلمت على امه وابوه ووصلت لعنده
شب طويل ابيض وعيونه خضر شعره مرتب بطريقة انيقة لبسه مرتب
وملامح وجهه هادية ومريحة بس لما سلمت عليه رزان قلبها نغزها حست بوجع جوا قلبها وايدها صارت ترجف جوا ايده نزلت راسها وكملت طريقها قعدت مقابيله
اتفق ابوها وابوه عالخطبة وكتب الكتاب وحددو موعد العرس بعد اسبوع واحد
ابو رزان من كتر خوفه من الفضيحة كان بيتمنى لو يقدر يخلي العرس تاني نهار ولو انه احمد مو عاجبه كونه شب فقير وما بيملك الا شهادته الي من اول ما تخرج بحاول يشتغل فيها
مرقت القعدة بسلام وراح كل حدا عبيته
ام رزان ( عجبك العريس)
رزان( ما بعرف ما تطلعت عليه المهم عجبكم الكم )
ام رزان ( اسمعيني يا رزان هاد نصيبك ولازم تقبلي فيه
يمكن تستصعبي شوي الحياة مع احمد كونه في فرق بمستوى المعيشة بس لا تخافي ابوكي ما رح يتركك )
رزان ( ما بدي منكم شي الله يلعن كل المصاري الي عملت منا ناس بلا احساس )
كان الاسبوع عم يمرق ما بين تحضيرات البدلة والصالة وتجهيزات الحفلة
يوم العرس كان بارد وومنل جدا بالنسبة لرزان ولاحمد كمان مع انه صارتلهم حفلة كتير حلوة ومرتبة بس هالشي ما اخفى الحزن المحفور بقلب كل واحد منهم
ركبو بسيارة الزفة ليوصلوهم على بيتهم وسط الاغاني والزغاريد
وصلت السيارة واجت رزان تفتح الباب وتنزل ،،، مسكها احمد وشد على ايدها ( استني ما تنزلي انا بفتحلك الباب)
حطت رزان ايدها على راسها
احمد ( خير في شي )
رزان ( ما بعرف ما بعرف راسي عم يوجعني كتير )
احمد ( لنطلع للبيت بنحكي هلا حاولي تبيني طبيعية قدام الجميع )
طلعت رزان واحمد عالبيت وقفلو الباب وراهم
دخل احمد لجوا قعد عالكرسي مواجه رزان ،،، وطت رزان راسها بخجل ودخلت عالغرفة غيرت بدلتها ولبست بيجامة ستان ناعمة ومسترة
وطلعت لعند احمد
رزان( بقدر اقعد )
اشرلها بايده انه تفضلي)
رزان ( انااا انا ما بعرف شو بدي قلك بس )
احمد ( ما تحكي شي بعرف بكل شي
اطمني احنا رح نتزوج لمدة شهر واحد ورح طلقك بعدها لا انتي ولا انا رح نقدر نكمل مع بعض )
رزان ( انت بتقرف مني صح )
احمد( لا ما بقرف منك لانه انتي ما ذنبك بس انا لسا بحبها لاماني وانتي رفقيتها وهيك بكون انا خدمتك )
رزان( ماشي شكرا بتحب حضرلك عشا )
احمد ( هههههههه ليش بتعرفي تعملي شي بالبيت يعني لا تزعلي مني بس طول عمرك مرفهة عند البابا اكيد ما بتعرفي تعملي شي )
ضحكت لا مبالية ( يمكن ما بعرف اعمل شي بس عالاقل بعرف ما اجرح غيري)
وكملت طريقها عغرفتها
بعد نص ساعة دق عليها الباب
رزان ( ادخل )
احمد ( رزان انا جيت اعتذر عن الكلام الي صار من شوي وقومي يلا انا حضرت العشا )
رزان( ولا يهمك ما صار شي )
طلعت رزان مع احمد وقعدو ياكلو وطول الوقت ما حكو شي لحتى رزان فتحت الحكي
رزان( كنت تحبها لاماني )
احمد( …..)
رزان( دخلك حلو الحب ؟)
احمد( حلو وبوجع كمان )
رزان ( طول عمري بحلم جرب شعور الحب بس شكلي بحياتي ما رح جربه )
احمد( بكرة بس طلقك بتحبي وبتنحبي وبتتزوجي كمان )
قامت رزان عن الاكل ( دايمة )
شي ما جوات قلبها لرزان خلاها تحس انه مع كل معاملة احمد الها الا انه في جوا احمد شي حلو
كانو عايشين سوا لحتى تنتهي الفترة المحددة وهي شهر
ببداية زواجهم كانت الامور صعبة كتير لكن بعد هيك صارو يتعودو شوي عبعض يمكن بسبب الاحتكاك اليومي بين بعض
احمد ( رزان وينك شو عم تعملي)
رزان( احمد انا بالغرفة عم اكوي )
دخل احمد لعندها ( شو بدي قلك امي وابي جايين اليوم يتعشو عنا بتعرفي تعملي شي الا جيب جاهز )
رزان( لك لا بعرف شو تجيب جاهز )
احمد ( ايه طمنتيني )
رزان ( اي ايدي انحرقت )
ركض احمد لعندها مسك ايدها وحطلها عليها مي
احمد ( لك ما بتعرفي تكوي ليش لتكوي اه )
رزان ( ايه بدي اكويلك قميصك)
احمد ( ايه معدلة يخزي العين )
كانت عيونها قدام عيونه نفسه عم يختلط بنفسها
كل شي فيها عم يوتره عم يلخبط كيانه
بعدها عنه ( لك نسينا القميص )
رزان( يييييي هيك نزعتلي اياه )
احمد ( هلا انا الي نزعته الا انتي )
رزان ( ههههههههه انت )
ابتسم احمد لضحكة رزان
احمد ( عفكرة انتي كتير طيبة )
رزان ( ايه بعرف )
فات احمد ورزان عالمطبخ ليحضرو عشا لاهله
رزان ( احمد هلا البيض بس اقليه بحط عليه بس ملح )
احمد( ايه وفلفل اسود كمان )
رزان( احمد تعا قسملي البطاطا حتى اقليهم )
رزان( احمد السلطة شو حط فيها غير بندورة وخيارة وبقدونس)
رزان( احمد…)
احمد( لك رزان شو هاد ما بتعرفي تعملي شي بعدي هيك )
قربت لعنده كانت رزان عم تحاول تفهم احمد شغلة انه ارتاحتلو قربت اكتر تلبك احمد لف رزان من خاصرتها
( انتي شو عم تحاولي تعملي)
رزان( انا ولا شي
ها هي الباب بدق اكيد بكونو اهلك وصلو )
قضو اهل احمد السهرة عندهم واحمد ورزان عم يمثلو دور الزوجة والزوج السعيدين )
كل يوم من هالشهر كان عم يمر عليهم بمواقف حلوة وضحكات بابتسامة
واحيانا بحزن
اليوم 28 من الشهر
احمد ( بقي يومين انا رح ضب تيابي )
رزان ( لسا باقي يومين ليش بدك تضب اغراضك من هلأ)
احمد ( ولا شي بس يعني ما بقيلنا شي وابوكي بعد بكرة رح يجي ياخدك وانا رح سلم هاد البيت )
رزان ( شو بدك تقول للناس ولاهلك ليش تطلقنا )
احمد ( عادي متل ما كل الناس الي بتطلق ما عم تحكي ما اتفقنا )
رزان( بس احنا اتفقنا )
احمد ( رزان انا واياكي مستحيل نقدر نكمل سوا
احنا كنا باتفاق وانتهى )
رزان ( لسا بتحبها لاماني)
احمد( …..)
تجاهل احمد سؤالها ومشي
رزان( بس انا حبيتك والله )
احمد ( رح اتمنالك حياة سعيدة من بعدي )
احساسك وانت ماشي ليوم رح تفقد شخص حسيت معه بمشاعر حلوة كتير صعب شي عم يشدك لورا ما بدك الايام تمشي تسرق منك لحظاتك السعيدة الي عم تعيشها
كانت رزان بالغرفة عم تبكي وتمسح دموعها وتضب تيابها بالشنتة دخل عليها احمد كان نفسه يقلها رجعي كل اغراضك لمحلهم بس ما قدر ينطق
طلع من الغرفة وراح عالغرفة التانية
قعدت رزان والتياب بايدها ( ما راح استسلم رح قله اني بدي اياه ما بدي عيش بلاه )
مسحت وجهها اخدت نفس عميق وراحت لعند احمد عالغرفة كان الباب مردود شوي
وقفت عالباب مدهوشة من الي سمعته
احمد ( عمي البنت كتير صعبانة علي الي صار فيها مو قليل هي ما الها ذنب بعمايل ابوها
هي ضحية متل ما اماني كانت ضحية
يا عمي ابو اماني اسمعني بس
صحيح كنت بدي انتقم منها ،،، خطفتها وعملت الي ما بنعمل فيها بس هلا بعد ما عرفتها
انا بعتذر عمي ما رح اقدر اكمل باللعبة )
شهقت رزان بصوت عالي التفت عليها
( رزااااااااان انا انا
انتي شو بتعملي هون )
…… يتبع في الجزء الاخير غدا
بكرة رح يصير شي يقلب الموازين كلها استنوني