تكملة سلسة مذكرات امراة كاملة
نتابع في قسم المنوعات في زاكي, أحداث هذه القصة الواقعية الشيقة, نتابعة ممتعة لأعزاءنا القراءة, وبعد تكملة القصة نرجو إضافة رأيك بالقصة, أو اكتب تعليق بكلمة “تم” لتصلك مزيد من المنشورات.
ملاحظة ( هاي القصة التانية من سلسلة مذكرات امراة)
تنويه ( القصة واقعية )
#سلسة_مذكرات_امرأة_بقلم_حنين_طه
الحرمان
الحرمان
كلمة بتحمل معاني كتير بين حروفاها ،،،، بحس كل قصتي تتمثل بكلمة الحرمان
حرمانك من اهلك من امك حرمانك من الدفا بليلة باردة وحرمانك من الحب بدنيا قاسية كل هدول اسمهم حرمان
( ديري بالك عحالك يا بنتي الله يوفقك ويهنيكي ويعطيكي على قد نيتك يا امي انتي هلا رايحة على بيت زوجك ما بدي وصيكي حطي زوجك واهلو فوق راسك واحترمي الصغير قبل الكبير )
طفلة بعمر انعام ما كانت الا عم تهز راسها
انعام صبية عمرها 14 سنة انخطبت لمؤيد شب عمره 30 سنة من عيلة متشددة ما عندهم شي مسموح
حتى خياره بانه يخطب بنت بعمر 144 حتى يقدر يربيها على ايديه وتكون متل ما بده هو واهله
تزوجت انعام وكانت متل اللعبة بين ايدين مؤيد بيحركها كيف ما بده وعلى كيفه وما كانت تحكي كلمة لا
بس هو ما كان عم يرحمها لا هو ولا اهله
كأنه كانو محتاجين خدامة وزوجو مؤيد فضربو عصفورين بحجر بزواج مؤيد من انعام
منه خدامة ومنه زوجة تنجبله الاولاد مرقت الايام والحمل عم يزيد على انعام كل يوم اكتر من قبل حتى بعد ما حملت ما كان في حدا يرحمها
تصحى من الفجر لحتى تنزل عالمزراع تحصد وتزرع بعدها ترجع عالبيت يكون كل شغل البيت مكوم فوق راسها وبس يجي الليل لازم تكون الزوجة المرتبة والحلوة حتى مؤيد ما يطلع على غيرها
كانت تحس بالم وتعب بس كانت تكابر على ثقلها وتقول يلا معلش عمره الشغل ما بموت حدا لحتى خلفت وجابت ( سهاد )
انعام ( دخيل هالضحكة يا امي عم تضحكيلي )
مؤيد ( انعام قومي نظفي حوش البيت كانو جيران ابي عنا والبيت عايم )
انعام ( بس انا نفاس يا مؤيد مو قادرة اتحرك )
مسكها مؤيد من شعرها ( شو امرتي شو ما حدا حمل وجاب غيرك ما بكفي جبتلي بنت اتصبح واتمسى بخلقتها
زلمة غيري كان زتك قال مبسوطة عحالها ومصدقة نفسك نفاس عشقفة بنت قومي انقلعي )
انعام ( طيب حاضر خلص اترك شعري ببوس ايدك )
كانت انعام تقوم تشتغل وتسكت حتى ما تاكل قتلة
وتترك بنتها بالساعات تبكي بالجوع ما تقدر تمسكها
كانت تستنى الليل يجي لحتى تقدر تمسك طفلتها تلاعبها وتكاغيلها
لكن الصبر اله حدود حاولت تتمرد عصمتها وتطلع من سكوتها اكلت قتلة لحتى تنهنه جسمها
انعام ( انا مو خدامة هون يا مؤيد بكفي بقا بشتاق لبنتي بشتاق لاعبها لك عم تموت وتبقى طول اليوم بلا اكل تبكي حرام عليكم بقا
بدك تضربني اضربني ما عاد اسال بس انا ما عاد بقدر اتحمل واذا شايفني مقصرة كل هالقد فيك لاني جبتلك بنت روح تزوج
والله ما بمانع )
مؤيد ( عم بتردي بوجهي يا كلبة والله لربيكي )
وبعد القتلة الي اكلتها طلقها مؤيد ورجعت لبيت اهلها مكسورة مطلقة معها بنت صغيرة
وصلت بيت اهلها ودخلت عالغرفة قفلت عحالها الباب ضمت بنتها على صدرها
وصارت الطفلة وطفلتها يبكو سوا
حياتها ببيت اهلها ما كانت احسن بكتير من حياتها عند مؤيد خاصة بعد وفاة ابوها ما عاد بقيلها حدا وصفيت عند الاخوة ونسوانهم
مرقت خمس سنين عطلاق انعام ومؤيد ومؤيد ما بادر حتى يرجع انعام راح تزوج وحدة بتقرب لامه وبعد بسنتين توفت امه وبعد بكم شهر ابوه
واخوان انعام صارو يضغطو عليها لحتى تتزوج كل مرة كانت ترفض كرمال بنتها لكن اخوها غصبها عالزواج
وصار لازم تترك سهاد
لهلا بتزكر امي انعام وهي تبوس بايدين خالي وتترجاه ما بدها تتزوج
كانت امي انعام عم تبكي بنص الليل
الكل نايم وهي عم تشمني وتبكي
( سهاد يا امي بكرة رح وديكي لعند بابا حابة تروحي تشوفيه )
سهاد ( ماما ليش بدك توديني عند بابا خليني عندك انا كتير بحبك )
انعام ( لا يا امي انا ما رح اخليكي عنده عطول رح جيبك لعندي بس لحتى اقدر اقنع زوجي وجيبك لعندي )
سهاد ( يعني رح يصير عندي اب تاني )
غصت امي بدمعتها ما قدرت تجاوبني مسكتني من تيابي وشدتني لصدرها وصارت تبكي
تاني نهار كان يوم تسليمي لابي راحت امي وخالي عالمحكمة حتى يسلموني لابي بهداك النهار ما بقي حدا بالمحكمة ما بكي على فراقي انا وامي لو الحيطان بشر كان بكيت معنا كل ما لف وجهي لروح مع ابي ارجع اركض ناح امي وضمها وابكي
بس بالنهاية خلص لازم امي تروح لزوجها وانا روح مع ابي
لعيش مع مرت ابي وابدا بمعركة البقاء
مؤيد( فوتي ابي فوتي هاد بيت ابوكي
يا خلود وينك )
خلود ( ها ها ليكني حبيبي شو وصلت
ايه خدي هي بنتي سهاد
وخدي شنتتة تيابها كمان )
خلود ( تعي تعي فوتي ،،، فضيتلها الغرفة الي ورا الدار حتى تنام فيها وتعيش فيها )
مؤيد ( لك مو هي غرفة الكراكيب )
خلود ( ايه ايه هي منيحة ما بها شي لكان وين بدي نيمها معي بالغرفة )
سهاد ( خالتو انا بخاف نام لحالي خليني نام عندك )
خلود ( روح روح انت مؤيد عغرفتك انا بحكي معها )
اطلع فينا ابي ببرود ومشي ناح غرفته
مسكتني خلود من ايدي وشدت عليها ( اسمعي وليه لا تجنني انا عندي ما حدا بنام يا دوب هالغرفة الي كم متر تكفيني وتكفي ابوكي جاية تتمسكني قدام ابوكي )
صرت ابكي ودموعي تنزل متل حبات المطر ( خلص متل ما بدك خالتو )
فتت انا وخلود عالغرفة الي اشبه بخرابة ما فيها الا فرشة مخزقة وحيطان الغرفة مرطبة وباردة كتير بس بوردة هالغرفة كانت بالنسبة الي ادفى من قلب ابي وخلود
الي تركوني بهالغرفة بلا اكل بلا غطا
وراحو بنامو بغرفتهم ،،،، بالبداية كنت خايفة كتير
بس بعدين صرت اتعود واتأقلم او بالاصح صرت ما حب اقعد الا بهالغرفة الصغيرة
صرت حسها بيتي وملجأي افضل من قعدتي مع مرت ابي الي ما بترحم
كنت عم اكبر كل يوم بلا ام بلا اب بلا حنان صاحبت صراصير وديدان غرفتي وصرت اشكيلهم همي ومعناتي
خلود ( وليه سهاد تعي لهون )
سهاد ( نعم خالتي
خلود ( ليش لهلا المطبخ مو مشطوف والحمامات مو ملايفة )
سهاد( خالتي عندي دراسة وامتحانات وانا من الصبح ما قعدت شطفت البيت ومسحت الغبرة وغسلت الغسيلات )
خلود ( عم تصرخي بوجهي يا كلبة ما بكون اسمي خلود اذا ما خليته لابوكي يبطلك من المدرسة )
سهاد ( خلص خالتي بترجاكي لا تخلي ابي يبطلني من المدرسة بعمل الي بدك اياه )
خلود ( ايه معناتو روحي انقلعي كملي المطبخ والحمامات
وبعدها روحي انقلعي حممي اختك الصغيرة وغيري لاخوكي الصغير بسرعة )
هزت براسي وبسرعة صرت اشتغل
كنت موافقة اشتغل اي شي بس ما بطل من المدرسة هي المنفس الوحيد لالي الي كنت اهرب الها من واقعي الصعب
كنت شوف رفقاتي واحسدهم على حياتهم عندهم ام واب وعيلة
كلهم بحبو وبينحبو وانا صرت صبية ما بعرف عن شي
بتذكر لما معلمة الدين خبرتنا متى لازم نلبس حجاب ونصوم ونصلي يعني متى بنصير مسؤولين قدام ربنا
انا لما كبرت وبلغت خفت كتير تخبيت تحت شرشفي العتيق وصرت ابكي وابكي كانت انفاسي عم تخنقني تحت الشرشف بدي احكي لامي شو عم يصير معي
كيف بدي قول لمرت ابي والله خايفة منها والله بخاف تتسببلي بقتلة لسا من يومين اكلت قتلة بالقشاط وحديدته معلمة عكل مكان بجسمي
لانه اخي الصغير عملها عحاله وما انتبهتله
طلعت لعند مرت ابي بخطوات مهزوزة
سهاد ( خالتي ممكن اقعد عندك شوي )
خلود ( خير اللهم اجعله خير شو بدك )
سهاد ( ممممم خالتي بصراحة انا انا مو عارفة شو بدي قلك)
خلود ( ااحكي وليه شو المصيبة الي عاملتيها بسرعة )
نزلت راسي بخجل وقلت لمرت ابي شو عم بصير معي
خلود ( يييييييي وعملتيلي حالك خجلانة ايه عادي كل البنات هيك منيح بنخلص منك هيك صرتي بسن زواج )
سهاد( خالتي انا ما بدي اتزوج منشان الله يا خالتي ليكني عم اخدمك انا بدي كمل دراستي )
خلود ( ايه ايه طيب ما بخليكي تتزوجي عشرط روحي اشطفيلي سطح البيت مع الدرجات يلا )
سهاد ( طيب حاضر بس خالتي بدي اسالك عادي انه هيك بطني عم يوجعني )
خلود ( ايه عادي روحي من وجهي خلصيني )
قمت من مكاني عم حس وجع بكل ضلوعي بس مو قادرة احكي خايفة من مرت ابي كاسرة بطلع بايدها تعمل كل شي يضرني طلعت شطفت سطح البيت والدرج
ونزلت بسرعة عغرفتي تخبيت فيها انا ووجعي والمي
بقيت فيها ساعتين وطلعت لما اجا ابي اطلب منه يخليني روح عند امي اقعد كم يوم بالبداية اعترض لكن بعدين وافق
انا فرحت من جواتي محتاجة لحضن امي محتاجة ارمي راسي عصدرها وابكي
رحت عند امي كان الي اكتر من ست شهور مو شايفتها
فتت قعدت انا واياها وحكينا كتير وضحكنا لحتى اجا زوجها
موفق ( هو شخص غير مريح نظراته ما بتحسسك بالامان ابدا
كنت دايما اسال امي اذا مرتاحة معه كانت تهزلي راسها بانه هي مبسوطة معه ولو انه كنت شوف الحزن جوا عيونها
كنت شوف وجهها الاصفر وايديها المجعدين بس ما كنت احكي لانه اصلا ما في بايدي شي اعمله انا مو قادرة احمي حالي لحتى احمي امي
انعام ( لك امي ما نعستي ما بدك تنامي )
سهاد ( والله ما عم اشبع من هالوجه الحلو )
انعام ( يا عمري ربي يفرحني فيكي )
حطت امي ايدها على وجهي ومسحت على شعري وضميتها بقوة
رحت على غرفة فاضية ببيت امي نام فيها وامي وزوجها راحو ينامو بغرفتهم
اما اولاد امي نامو بغرفة لحالهم ،،،
اول مرة بنام عتخت من 15 سنة حسيت براحة كبيرة وغفيت بدون ما حس عحالي
لكن بنص الليل حسيت بحركة حدا جنبي فكرت انه هي امي عم تتفقدني فتحت عيوني عحدا حاطط ايده على تمي وعم يتلمسني حاولت صرخ بس ما قدرت كان شخص مقرف ،،،، متل الحيوانات كل ما يقرب اكتر حس بقرف اكتر
سمعنا صوت حركشة برا خاف موفق زوج امي واجا يطلع من عندي
رجع خطوتين لورا مسكني من ايدي ( اسمعي وليه اليوم مزطتي مني لكن غدا لنا لقاء اذا بعرف انه امك عرفت بشي والله والله بطلقها وبرميها للكلاب هي وولادها )
طلع من عندي وانا صرت ارجف وابكي خفت كتير يأذيني خفت عحالي وخفت عمستقبلي وخفت على امي وولادها
لازم اطلع تاني يوم من الصبح من عند امي ما بقدر ابقى عندها ما بقدر اخرب بيت امي وطلقها من زوجها وخلي ولادها يعيشو نفس الي انا عشته
ما بحدا بقدر يحس بالوجع الا الي عاشو والي شافه ما حدا بيعرف شو الحرمان الا الي داق من كاسه
بالفعل استنيت لطلع الضو وضبيت اغراضي لحتى اطلع من بيت اهلي
انعام ( طيب يا امي فهميني ليش بدك تروحي مو كنتي بدك تنامي عندي كم يوم )
سهاد ( خلص امي تزكرت عندي دراسة كتير ما بقدر اتركها )
انعام ( طيب بتوعديني ترجعي )
سهاد ( ايه ايه اكيد )
اطلعت بزوج امي بقرف ورجعت لبيت ابي صحيح انا ببيت ابي خدامة عايشة بلا كرامة صحيح قاعدة بخرابة بغرفة متر بمتر وكلها رطوبة بس عالاقل عايشة بشرفي
خلود( يا هلا ما لحقتي تغيبي شو جابك )
سهاد ( ولا شي الواحد ما برتاح الا ببيته )
خلود ( ها قلتيلي بترتاحي ببيتك ايه فوتي فوتي الجلي ناطرك جوا )
سهاد( حاضر خالتي )
بلشت الايام تمرق علي وكل يوم بمشي بضربني اكتر وبصفعني اكتر واكتر
صرت بكلوريا ودخلت الفرع العلمي كنت شاطرة كتير بدراستي وكل عقلي بدراستي وبس وكنت روح كل كم يوم عند رفقاتي لادرس معهم واخد منهم الحصص الي عم ياخدوها بالمراكز لانه انا ما كان ابي قبلان اني سجل بمركز
كان عندي رفيقة اسمها مرام روح ادرس عندها العصر بعد ما خلص شغل لمرت ابي
كانت شاطرة وماخدة مراكز بكل المواد وكنت استفيد كتير منها ومن دفاترها
سهاد ( مرحبا مرومة )
مرام ( اهلا اهلا شو ليه هيك تاخرتي )
سهاد ( لك هلا لحتى خلصت شغل البيت ما انتي بتعرفي كله فوق راسي )
مرام ( سهاد يا عمري بدي اعتذر منك اليوم ما رح نقدر ندرس لانه بدي روح مع امي عند دار خالتي وانتي تاخرتي لجيتي )
سهاد ( لا لا تعتذري خلص ولا يهمك بندرس بكرة )
طلعت من عند مرام مو جاي عبالي روح عالبيت لانه هلا رح تستلمني مرت ابي فكرت اتفتل شوي
او روح عند امي بشوفها كونه بهالوقت بكون زوجها بشغله
كملت طريقي ورحت عند امي قعدت معها وحكينا شوي بخصوص دراستي بست ايدها ورضيت علي ورجعت عالبيت بلاقي الدنيا قايمة قاعدة لانه كاينة مرت ابي باعتة اخي الصغير يناديني من عند مرام وانا مو هناك
واهلي مفكرين اني عند مرام
مؤيد ( سهااااااد)
وقف الدم بعروقي لما سمعت ابي بصرخ وبنادي علي رجف قلبي قبل جسمي
سهاد ( ابي خليني اشرحلك والله مو متل ما انت مفكر انا كنت كنت عند امي وحياة الله )
خلود( لا تصدقها هي وحدة كذابة ابصر وين كاينة دايرة اصلا انا الي فترة منيحة ملاحظة انه تصرفاتها مو مزبوطة )
سهاد ( حرام عليكي خافي الله والله ما بعمل شي غلط )
خلود ( شفت شفت كيف عم بتجاوبني )
مسك ابي ايدي وربطهم وحطهم قدامه وصار يضربني بعصاي خميلة على كفة ايدي من فوق اكلت شي 100 عصاي على نفس المكان حتى ما عاد حسيت بايدي بنوب
بعدها راح عالمطبخ جاب سكينة بده يذبحني
تمنيت لو فعلا غز هالسكينة بقلبي وريحني
خلود ( شو عم تعمل بدك تروح حالك كرمالها وحد الله )
مؤيد ( اتركيني بدي خلص عليها )
خلود( يا فهيم بدل ما تقتلها وتختخ بالحبوس زوجها وارتاح منها )
مؤيد ( ولمين بدي زوجها )
خلود( لرفعت ابن جيرانا ابو قاسم )
مؤيد ( رفعت بس هاد واحد عالبركة واهبل )
خلود( ايه ومين متوقع يتزوجها لست الحسن والجمال لتكون حاطط ببالك تعطيها لشي ابن وزير ولا سفير
امه حكت معي من كم يوم وقالتلي خليني نلم الشمل ونزوج هالشب لهلبنت فشو قلت )
مؤيد( بكرة بتحكي معهم خليهم يجو يشيلوها من وجهي
تركني ابي وراح على غرفته مع مرته وانا بقيت صارع وجعي لوحدي لك كيف بدي اتزوج رفعت الاجدب لك هاد كل الحارة عاملته مسخرة بيتأتأ وما بجمع كلمتين عبعض انا الي طول عمري صابرة وعم كافح لحتى اتزوج واحد معدول واطلع من هالهم روح اتزوج رفعت
طلعت من تحت الدلف لتحت المزراب
حتى عدم اختياري لزوج بناسبني كان بالنسبة الي حرمان
……. يتبع
#سلسة_مذكرات_امرأة_بقلم_حنين_طه
#الحرمان
الجزء التاني
غمضت عيوني بلكي بلاقي جوا احلامي الشي الي بتمناه بلكي بلاقي الدفا الي عم دور عليه
خلود ( شووو بعدك ما لبستي ترا شوي والجماعة رح يوصلو )
سهاد ( اتركيني لوحدي واطلعي من عندي )
خلود( له له مو فرحانة انك رح تكوني عروس
هلا صحيح رفعت اهبل والكل بيتمسخر عليه انه بتأتأ وما بيعرف يحكي
وصحيح انه مو دارس الا للصف السادس بس منيح احمدي الله انه قبل يتزوجك يا بنت المطلقة
وحياتك بكرة لتشوفي بنتي مين رح تتزوج هيك الدنيا )
سهاد ( ما بقول الا حسبي الله ونعم الوكيل )
قمت غسلت وجهي ولبست شي من هالتياب الي عندي وطلعت شوف رفعت واهله لما اجو
كنت حاسة بقرف مو طبيعي من اني شوف رفعت واحكي معه ،،، هلا هو كشكل ما بشكي من شي
طويل وابيض وعيونه وساع بس مسكين كتير ما بيعرف يحكي كلمتين عبعض والحارة عنا عاملته مسخرة عندها والشاطر الي بينادي عليه وبخليه يشتغل عنده على تعا يا رفعت جيب وروح يا رفعت ودي
رفعت راسي واطلعت فيه كان عم يطلع فيني وعيونه مدمعين مبسوط كتير انه رح يتزوج لفيت نظري عمرت ابي الي كانت مبسوطة وعم تضحك كانه طالعة من معركة وانتصرت فيها
كنت سرحانة بافكاري وما وعيت الا عصوت ابي بيقول على بركة الله خلونا نقرا الفاتحة
صدقا بوقتها ما كنت بعرف قديه كان مهري ولا شو طلب ابي منهم مصاري حتى لما نزلت اشتري جهاز
اشترتلي مرت ابي كم قطعة وسنسال خفيف والباقي ما شفت منه شي
كمان بدلة العرس جابتلي وحدة مستعملة وقديمة ويوم عرسي نادت على بنت جيرانا تسشورلي شعري وتمكيجني عالخفيف على قولتها ما في داعي للصالونات
وبعد كل هالعجقة تزوجت وصرت عروس وامي مو معي
ايه صرت عروس وما بعرف شي عن الزواج
صرت عروس وانقفل علي الباب انا ورفعت
كنت عم اتنفس بقوة لدرجة حسيت فيها انه صدري رح يطلع من بين طلوعي
رفعت ( اااااهلا وووسهلا فيكي ببيتك )
غمضت عيوني كزيت عسناني اخدت نفس
سهاد( اسمع علي رفعت بدي تعرف شغلة وحدة انا تزوجت لاني مجبورة لانه هيك ابي بده لكن اوعى تفكر انه انا بدي اياك او ممكن اتقبلك لهيك حاول تبعد عني قد ما بتقدر واوعى اوعى يلعب الشيطان براسك وتفكر تقرب مني والله بقتل حالي وبقتلك ترا ما ظل عندي شي اخسره )
ابتسملي بحب وكان عم يمشي ناحي وانا صرت ارجف بزيادة مسك ايدي ( ااااانا بببعرف انه انتي ما بدك اياني
ااااساسا انا ما حدا بقبل فيني بس وانا بوعدك ما عمري داااايقك ااااساسا انا بكفيني ريحتك تكون بالبيت بكفيني شوفك بخير )
ترك ايدي وراح على الغرفة وانا بعد كلامه هاد حسيت براحة كبيرة
دخلت على غرفتي غيرت تيابي ولبست بيجامة فضفاضة ارتاح فيها ورحت شوف شي ناكله لقيت رفعت بالمطبخ عم يحضر عشا
رفعت ( انا مااااا بعرف شو بتحبي بس قلت لحالي جرب وحضرلك عشا )
سهاد ( شكرااا )
قعدت عالطاولة وصرت اكل ( عفكرة من اليوم وطالع ما تدخل المطبخ لانك خابصه كله انا بصير حضر الاكل )
رفعت ( بدي ساعدك لانه انتي عندك دراسة وما رح تفضي كتير لشغل البيت )
رميت الخبزة من ايدي ( شلون دراسة )
رفعت ( ايه مو حابة تكملي دراسة مو انتي السنة بكلوريا )
سهاد ( يعني انت ما عندك مانع لا انت ولا اهلك كمل دراسة )
رفعت ( لااا ابدا اساسا امي دايما بتقلي انه دير بالي عليكي وبتوصيني فيكي
هلا انا بشتغل بمحل ورااااتبي مو كل هالقد بس رح حاول وفرلك تاخدي مراكز وتنجحي )
سهاد ( وابي رح يوافق )
رفعت ( اااامي قااالتلي انه انتي هلا متزوجة وابوكي مااا دخله )
سهاد ( شكرا رررفعت انت شخص طيب فعلا )
هالفرحة الصغيرة كانت كفيلة تنقلني من الحزن والهم الي جوا قلبي لتخليني اسعد انسانة بهداك الوقت يا الله شو فرحت اني رح حقق حلمي وادرس
صرت داوم كل يوم الصبح بالمدرسة وتعليقات رفقاتي ما كانت تخلص لاني متزوجة رفعت الاهبل بس كنت اكتم دموعي وما حاول فرجي ضعفي لحدا
وبعد مدة من دوامي عرفت مرت ابي بخبر رجعتي لدراستي وخبرت ابي واجا لعندي يصرخ ويتوعد لكن حماتي الله يجزيها الخير وقفت بوجهه وقالتله بنتك ما عادت الك وزوجها بده تكمل دراسة انت ما الك شي عنا يلا مع السلامة
رجع الي على بيته مو طالع بايده شي
شو حلو احساس وشعور انك يكون في الك سند يوقف بظهرك ويوقف معك
حياتي مع رفعت ما كانت حياة ترف لكن كانت حياة مريحة بسيطة ما بحاول يدايقني بشي وحماتي ساعدتني كتير ووقفت معي
لقيت فيها امي واختي وصاحبتي كانت حنونة لدرجة خلتني بكتير اوقات ارتمي بحضنها وابكي
كنت قضي اغلب وقتي بدراستي وشوف رفعت عوجبات الاكل كنت حب ابتسامته البريئة وطيبة قلبه وحب امزح معه بس ما كنت حبه بالمعنى الحقيقي للحب او بنقدر نقول كنت حبه كرفيق مو كزوج
ام رفعت ( لك يا بنتي ليش هيك عم ترجفي )
سهاد ( يا خالتي قالو انه اليوم الصبح رح تطلع نتيجة التوجيهي والله خايفة اذا برسب بنجن )
ام رفعت ( انتي عملتي الي عليكي قومي البسي عحالك حتى تروحي عمدرستك وتعرفي نتيجتك
لبست وطلعت عمدرستي لحتى اعرف نتيجتي
ما صدقت وقتها اني نجحت وبمعدل 85 صرت نط ونط وغني
مسحت دموعي ورحت اركض لخبر رفعت وحماتي عن نجاحي
اول ما وصلت لقيت رفعت جايب امي لعندي عالبيت حتى تشاركني بفرحتي
ركضت على امي وحضنتها حضنت الجميع بما فيهم رفعت وانا قلهن انا نجحت نجحت والله نجحت
موقف رفعت هاد خلاني اعرف شغلة وحدة بس انه الرجال مو بطولو ولا بعرضه الرجال بموقفه
راح رفعت جاب كنافة وتحلينا وقعدت معي امي للمسا وبعدها روحت على بيتها
حسيت انه لازم قدم شي لرفعت وانه علاقتي فيه ما بتصير هيك وما بيرضاها لا الشرع ولا العرف بهديك الليلة صرت انا ورفعت متزوجين رسمي بس مع ذلك ما قدرت حبه
مو هاد الشخص الي بحلم فيه يكون زوجي ولا هاد الانسان الي بتمنى كمل معه طريقي لكن استسلمت لنصيبي
بعد بفترة طلعت قبولات الجامعة وطلعلي خيار من تنين
يا اما بدرس صيدلة عحسابي او بدرس لغة انجليزية ببلاش ،،، حاولو رفعت وحماتي يقنعوني بالصيدلة
بس انا بعرف انه مصاريفها عالية ومستحيل حمل رفعت فوق طاقته لهيك اصريت اني ادرس ادب انجليزي
وطبعا خبرت رفعت اني رح استخدم مانع للحمل طول فترة دراستي لانه مستحيل اقدر يكون عندي ولاد ودراسة بذات الوقت
داومت بالجامعة حياة تانية عالم بعمري ما شفته
انفتاح وضحك ومزح
شفت الدنيا كيف وشفت البنات شو بيلبسو وكيف بيحكو وبيتصرفو
وشفت شباب كتيرة تمنيت لو انه زوجي متل اي واحد منهم
هيبة وجمال وفهم وحكي بس دايما كنت استغفر وشيل هالافكار من راسي
مرة من المرات بعد ما خلصت محاضرتي كنت عم لملم وراقي لاطلع وقفني شب طول بعرض حلو كتير كان بده يتعرف علي للحظة حسيت حالي ممكن اضعف لكن خوفي من ربنا منعني تجاهلته وكملت طريقي
ايامي بالجامعة كانت بتمشي ركض وكل سنة خلصها بتخلص بامتياز وبتفوق وصرت على وجه اخر سنة من دراستي
سهاد ( ها رفعت انت جيت شو جاي بكير اليوم )
رفعت ( ااااه ججيت شو عم تعملي انتي )
سهاد ( كنت عم ادرس شو في مالك ليش مدايق )
رفعت ( قلعوني من الشغل اليوم )
سهاد ( شو ليش ليعملو هيك )
رفعت ( قال انا اهبل عم خرب عليهم بدل ما فيدهم )
سهاد ( يخرب بيتهم على هالعملة
خلص لا تزعل ربنا الرزاق انا بترك جامعتي وبشتغل لحتى الله يفرجها )
رفعت ( شوووو مستحيل وافق طبعا انتي هاي اخر سنة وهيك بتروح عليكي المنحة لو بدددي اااشتغل عتال ما بخليكي تتركي )
سهاد ( طيب خلص روق صدقني ربنا رح يفرجها )
رفعت كان جاد بكلامه واشتغل عامل كان مستعد يشتغل اي شي بس ما يخلينا انا وحماتي نحتاج شي انا
بالنسبة لاهلي علاقتي فيهم كانت سطحية جدا ما بشوفهم الا بالمناسبات وكنت مرتاحة ببعدهم عني
مرقت السنة الاخيرة الي وصرت عوجه الفحوصات والضغط زاد علي كتير ما بنام منيح ولا باكل منيح تخربطت حياتي بدي انجح واثبت نفسي وبس
سهاد ( الو ايه رفعت شو صحيت لتروح عشغلك )
رفعت ( اااه صحيت انتي طلعتي عفحصك )
سهاد( اها طلعت ادعيلي بس تعبانة كتير حاسة باي لحظة ممكن اوقع من طولي )
رفعت ( سهاد لا تخوفيني عليكي انتي منيحة )
سهاد ( منيحة منيحة بخلص فحصي وبرجع عالبيت بسرعة )
دخلت عالفحص وصرت اكتب كل شي بعرفه وانهيت الفحص سلمت ورقتي وطلعت ووقتها اجاني مسج عتلفوني من رفعت ( سهاااد انا جيت عالجامعة رووحك خفت عليكي لهيك جيت )
انتفضت من المسج خفت كيف بدي فرجي رفعت لرفقاتي حاولت اتهرب من رفقاتي بس طلو ملزقين فيني ما في مهرب
مشيت معهم ورحت عالمكان الي ناطرني فيه رفعت
كان لابس ومتعطر حتى يشوفوه رفقاتي باحسن حال بس للاسف رفعت ما بيعرف ينسق الالوان ويرتب حاله متل شباب هالايام
نجوى( لك لا سهاد لا تقولي هاد زوجك )
سهاد( امشي وانتي ساكتة )
رفعت ( مممممرحبا سهاد كيف عملتي )
جيهان ( ههههههه وبتأتأ كمان )
قربت نجوى لعندي ( لك شو صايرلك لتتزوجي هاد لما شفتك كيف بترفضي تحكي مع الشباب هون توقعتك متزوجة حدا محرز مو هاد )
اطلعت عوجه رفعت كانه فهم على رفقاتي شو عم يتهامسو
رفعت ( طيييب انا رررح روح سهاااد )
بثواني تزكرت كل الماضي تزكرت كل شي مرقت فيه وكأنه شريط حياتي مرق قدام عيوني متل البرق بعد كل شي قدملي اياه رفعت معقول استحي فيه
سهاد( استنى حبيبي انا جاي معك
ايه يا بنات هاد زوجي وحبيبي وعمري رفعت الي مو عاجبكم هاد هو الي كان سندي وهاد الي حماني من غدر الايام بتعرفو انا لولاه ما وصلت لهون
وبلا الدعم الي اعطاني اياه كان انا ولا شي انا بشكر الله انه اعطاني واحد متله حنون طيب ما بيعرف الكره ولا الحقد
)
مسكت بايد رفعت ومشيت بس صدقا انا بهديك اللحظة ما كنت عم مثل كل الكلام الي قلته كان طالع من قلبي
اكتشفت انه الحب ببين بموقف وانا قلبي حبه لرفعت من هالموقف
الي ما توقعته او الي انصدمت فيه انه بعد هالموقف ثقة رفعت زادت بنفسه كتير وكانه كان محتاج وناطر هيك كلمات تدعمه وتحفزه
تخرجت من الجامعة بمعدل عالي وفرحتي وفرحت رفعت ما بتنوصف حتى انه عملي حفلة خلاني اعزم كل رفقاتي واحبابي عليها
ونجاحي هاد فتحلي باب نجاحات تانية توظفت مباشرة بعد ما تخرجت وبراتب عالي كمان وصار وضعنا المادي يتحسن اكتر واكتر وتعلقي برفعت يزاداد اكتر خاصة بعد ما رحنا عطبيب نفسي وصار يتعالج عنده وتحسن كتير الحمد لله
ولهلا بعده عم يتعالج
توفى ابي بعد ما تخرجت بسنة زعلت كتير وقتها بس ما زعلت لانه ابي زعلت عكوم اللحم الي تركه
وراه زعلت على اخواني وكنت حاول ودهم وادعمهم دايما لحتى ما يجي يوم ويحسو بنفس الحرمان الي حسيته انا زمان
حاليا انا بكمل ماستر وبشتغل وعم احكي لحنين قصتي حتى تكتبلكم اياها لحتى قلكم انه ربنا سبحانه وتعالى بيااااخد منا اشياء كتيرة ليعطينا بعدها اشياء اكتر
ربي عوضني عوض جميل برفعت حبيت قدملكم قصتي لحتى كل صبية فقدت الامل تاخد من قصتي جرعة امل
و كن مع الله ولا تبالي