قصة كناين ام لطفي حلقة 2

قصة كناين ام لطفي حلقة 2
نقدم لكم في قسم المنوعاات في زاكي, هذه القصة الاجتماعية الهادفة, نتمنى أن تنال على إعجابكم, من يُنهي قراءتهاا يكتب كلمة “تم” في التعليقات, ويخبرنا رأيه في القصة, ليصلك باقي الحلقات.

#كناين_ام_لطفي

الحلقة التانية

يلا فوتي يما فوتي انتي ام عريس
دخلنا عالبيت عند اهل سناء وبلش ابوي يتفاوض مع ابوها عالمهر قد ما قدر ينزل عصره عصر للزلمة بالاخير اتفقو على الف ومتين ليرة مهر
وقرا ابوي الفاتحة مع الزلام واعطى الاشارة لامي انها تهاهي

ام لطفي ( اييها ارفع راسك يا مصطفى واقشعها
ايييها وكل ما حكتلك كلمة اسمعها
اييها وكل المال الي حطيتو
ايييها ما بيسوى راس اصبعها )

وامي ما شاء الله عليها صوت بيرن رن وصل صوتها لكل الحارات الي جنبنا
بعد شوي ما شفنا الا سناء قامت من مكانها واجت سلمت على امي وباست ايدها هو صحيح انا احترمتها بالهحركة بس مش عارفة ليش قلبي مش مرتحلها
وخلصت الجاهة وكل واحد روح عبيته تعبانين الا مصطفى روح بضحك مع حاله

تاني نهار صبحو الجارات جايات عند امي يباركولها ويعرفو الاخبار منها
ام اسماعيل ( الف مبروك يا ام لطفي والله فرحتله كانه واحد من ولادي)
صباح ( بس ان شاء الله تكون بنت حلال مش تطلع متل نسوان اخواني بلال وطلال)
نجاح ( اي اخوانك طراطير شو دخلهم بنات الناس
خلص يما لا تطلعي فيي حطيت حبة ملبس بتمي وسكتت )
ام لطفي ( روحي يا نجاح جيبي هالعدسات من جوا انقيهم خليني اعملهم عالغدا)
ام بكر( ليش يا ام لطفي ما تعملي عرس لطفي ومصطفى مع بعض )
ام لطفي ( والله هي فكرة بس من وين بدي اجيب ازوج التنين مع بعض انتي عارفة المصاريف يا درب الواحد يلحق )
ام اسماعيل ( له يا ام لطفي هكلانة هم المصاري واحنا هون بعدين انا كنت بدي افتح معك الموضوع بدي اعمل جمعية وانتي يا ام لطفي بدخلك باسمين وبتوخديها اول وحدة كمان )
ام لطفي ( اذا هيك كتر خيرك يا ام اسماعيل )
نجاح ( بس مش يصير فينا زي دايما يا خالتي ام اسماعيل كل مرة بتعملي فيها جمعية ما حدا بدفععلك ايشي)
ام اسماعيل( لا لا هالمرة انا مرتبة الفكرة منيح براسي )
ام بكر ( شو بدي احكيلك يا ام لطفي كمان ما في داعي تشتري دشداشة جديدة لعرس ولادك بتتزكري دشداشتي الي الي بعتتلي اياها اخته لابو بكر من الضفة قبل سنتين
الي مطرزة من تحت ومن عند الصدر عليها شك خرز
بتوخديها وبتلبيسها )
ام لطفي ( ييييي بخاف يصيرلها ايشي يا ام بكر )
ام بكر ( عحسابك ول الجيران لبعض )
ام لطفي ( خلص معناتو اليوم بحكي مع ابو لطفي وبشوف )

بس روح ابوي خبرته امي انه الجارات اقترحو عليها انه يكون العرس مشترك وعملت حالها هي ملهاش دخل بالفكرة
والله وابوي رحب بالفكرة كتيرة هيك بيضرب عصفورين بحجر وبوفر عحاله مصاريف
ابو لطفي ( خلص معناتو على بركة الله اصلا علي المستأجر الي فوق حكى معي من يومين وحكالي انه بده يطلع )

ول عليه هالعلي قديش ظليت رايحة جاي قدامه تكسرت اجري وانا طالعة نازلة عالسطح كل درجة من الدرجات بتشهد قديش قعدت بتنظيفها وانا احكي لحالي هسا بخطبني وهسا بيحكي مع ابوي بس عبس الي ما اله حظ لا يتعب ولا يشقى

خبرت امي اخواني بالفكرة وكل واحد فيهم راح يخبر خطيبته بطريقته وانا جبت حصالتي وقعدت اعد قديش فيها مصاري
تمن ليرات
تمن ليرات وربع
تمن ليرات ونص
تمن ليرات وخمس وسبعين
ها وهي صارو تسعة
تسع ليرات وعشرة
تسع ليرات وعشرين

ام لطفي ( ولك شو بتعملي يا نجاح )
نجاح ( بعد بتحويشة عمري )
كانت امي بتعبي بوجوه الفرشات تركت من ايدها وصفنت فيي
ام لطفي ( شو بدك بالمصاري )
نجاح ( بدي اشتري فستان لعرس اخواني بصراحة ما بدي اخد من حدا بدي اشتري والبس انا ايشي جديد)
ام لطفي ( وك ما هو هاللبسة وبعدين رح يرتمى بالخزانة )
نجاح ( مش مشكلة يما المهم البس ايشي جديد بلكي حدا في على عينه قشة وانخطبت )
ام لطفي ( اخ منك انتي قومي شوفي مين بدق عالباب )

نجاح ( ها لطفي هاد انت اجيت شو مالك هيك وجهك ما بتفسر )
ام لطفي( بصراحة هناء ما عجبتها فكرة انا نتزوج مع مصطفى بنفس اليوم )
نجاح ( خلص يا حبيبي يا لطفي لا تزعل انا هسا برن عليها وبحكي معها وبقنعها لا تخاف علي )
مسكت هالتلفون وبلشت ادور بالعجل تبع التلفون واضرب الرقم ردت علي هناء وفهمتها انه هيك احسن الها بدال ما تظلها سنة تستنى لطفي ليزبط وضعه وكلها هالليلة وبتمرق وبالنهاية هو بوفر الها والحمد لله اقتنعت بالاخير

بشرت لطفي انه هناء اقتنعت وهو انبسط كتير يا ويلي عليه اذا من هلا مش قادر يقنعها بحفلة العرس والله بكرة لتحطه تحت ايدها
المسا اجا ابوي وخبرنا انه رح يحجز لاخواني بصالة الحياة الي عطريق الاتستراد
والسهرة تبعة النسوان رح تكون عسطح البيت والشباب بالشارع
كلنا كنا مبسوطين الا امي قاعدة على جنب وبتفكر
نجاح ( يما مالك سرحانة خايفة من الكناين وكيدهم صح )
ام لطفي ( وك لا بس انا قررت ابيع سنسالي الحلبي خلص اخر قرار )
نجاح ( يييييي علينا رجعنا لهسنسال اخرتني سارقته وبايعته ووانتي بتطلعي
احكيلي ليش بدك تبيعيه )
ام لطفي( وك ناسية خالتك نزيهة وعمتك نبيهة لازم نبعتلهم قطعتين قماش لكل وحدة على عرس اخوانك
وانا فلست حطيت الي فوقي والي تحتي )
نجاح ( طيب خلص يما عندي الحل خدي حصالتي والمصاري الي حوشتهم واشتري لخالتي وعمتي كل وحدة قطعة عشان يلحقو يخيطوهم )
ام لطفي( ييييي مش كنتي بدك تشتري فيهم فستان لعرس اخوانك )
نجاح ( خلص بهمش باخد من صباح مش محرزة اشتري واحد جديد وازته بالخزانة بعدها )
ام لطفي( بس هيني بحكيلك بتجيبيه بكمام مش تجيبلي حفر ابوكي واخوانك ما بهون عليهم)

طيب طيب حاظر

صحيت تاني يوم ورحت عند صباح نقيت طقم من عندها واخدتها وطلعنا عالبيت الي فضي عشان ننظفه )

نجاح ( يا صباح يا صباح جيبي معك شوية كاز نمسح فيهم الشبابيك والحيطان ترا البيت ما بنظف الا بكاز )

طلعنا انا وصباح عالبيت وهي حطت هالكاز بالمي وصارت تفرك وتنظف
صباح ( وك قومي معي يا نجاح هو انا جاي انظف لحالي )
نجاح ( يييي هيني بنظف بس قاعدة بفكر بنسوان اخواني اذا بطلعو قويات متل نسوان اخوانك شو بدي اعمل فيهم )
صباح ( اااخ الله يجبرهم عليكي ويعينهم )
خلصنا انا وصباح شغل وعزمت علي وحلفت الف يمين افوت اتغدى عندهم
ما في شوي الا وسمعنا صوت صباح بالمطبخ بتصرخ اتاريها ناسية انها كانت تتمردغ بالكاز واول ما اجت تحط الاكل ولعت فيها النار
طفيناها بسرعة والحمد لله النار ما مسكت الا يانس الصلاة تبعها وهالكم شعرة الي براسها

المسا كنت منهنة تعب رجعت عالبيت لقيت مصطفى جايب صحن فول وصحن حمص وشوية فلافل من مطعم عمي ابو اسماعيل مع كم رغيف شراك سخنين بشهو

قطعت جنبهم حبة بندورة وخيار مع كاسة شاي وما قمت عن الاكل الا وانا ماسحة الصحون كلهم

ورحت حطيت راسي ونمت وما فقت الا عصوت امي وخالتي ام اسماعيل جاي توخد امي وتروح هي واياها عالبلد حتى يشوفو الاثاث المستعمل ويجيبو منه كم شغلة لبيت لطفي فوق
اما مصطفى كانو مو هاكلين همو لانه رح يسكن عنا بنفس البيت
طلعت امي واناا جبت كيس الفول اقمعه وانظفه عشان اطبخه عجية امي وناديت على صباح تطلع عندي نتسلى سوا وقلتلها تجيب معها شريط اغاني ما هو عنا فرح ما بزبط هيك نظل عالسكيت
اجت صباح لعندي جايبة معها حبتين راس العبد وباكتين عصير
قعدنا نوكل ونفكر بالعرس شو بدنا نعمل فيه وكيف بدنا نرقص واتفقنا هي الي تمكيجني وتلبسني
صباح ( بدك الصراحة يا نجاح خطيبة اخوكي مصطفى احلى من هديك التانية هديك شايفة حالها عالفاضي رافعة راسها بالسما مش لو اخدتوني انا لاخوكي لطفي احسن )
نجاح ( وحياتك لاكسرلها اياه راسها اليابس هاد بعدين امي ما حبت توخدك لواحد من اخواني خافت يصير مشاكل بينك وبين لطفي لقدام وتخسر امك وعلاقتهم تخرب
ان شاء الله بجيكي واحد احسن من الاتنين مصطفى ولطفي وبتخلصي من هالعقربتين نسوان طلال وبلال )

صباح ( وك صحيح انا جاي عشان نشغل اغاني قومي شغليلنا الشريط يلا )

لا كان على الخاطر ولا كان بالنية اعشق وانا الشاطر
تسهر كده عنيا

نجاح ( لا لا اقلبي الشريط عالوجه التاني )

لا انا قد شوقه ولا انا قد جرحه ولا قد ناره الله يسامحه
والسود عيونه

ايوا هاي

…… يتبع في الحلقة القادمة

#حنين_طه