قصة كناين ام لطفي حلقة 5 + 6
نقدم لكم في قسم المنوعاات في زاكي, هذه القصة الاجتماعية الهادفة, نتمنى أن تنال على إعجابكم, من يُنهي قراءتهاا يكتب كلمة “تم” في التعليقات, ويخبرنا رأيه في القصة, ليصلك باقي الحلقات.
ملاحظة ( صبايا القصة هي صحيح اسمها كناين ام لطفي
لكن انا ما رح اركز عالكناين وعاميلهم قد ما رح اركز على حياة الناس وبساطتهم زمان
وكتبتها بناءا على طلبكم لانه بدكم قصة عن حياة زمان )
#كناين_ام_لطفي
الحلقة الخامسة
نجاح وين يا نجاح تعالي هون
نجاح ( ها هيني اجيت)
ام لطفي( روحي افتحي الباب وشوفي مين)
ها اهلين خالتي ام اسماعيل فوتي فوتي هي امي جوا بالمطبخ تفضلي تفضلي يا خالتي ام بكر اهلا وسهلا )
ام اسماعيل( روحي يا نجاح جيبلي كاسة مي باردة من التلاجة والله نشف ريقي )
نجاح ( ابشري يا خالتي هسا بشربك مي وبنادي على زاهي ابن ابو ناصر من الشباك بخليه يروح يشتريلنا كولا )
ام بكر ( لشو المصاريف الزايدة يا نجاح جيبلك باكيت عصير وحليه بشوية مي وصلى الله وبارك )
ام لطفي ( اهلا اهلا يا حبيباتي
والله زمان عنكم من الصبح ما سمعتلكم حس قلبي نقزني)
ام اسماعيل( تظلي بخير يا ام لطفي
يا نجاح جيبي معك مفرمة خليني اقطع عليها عاللوبية جيبتهم اليوم من السوق وقلت بمر عليكم وبعملهم عندكم )
نجاح ( يا سلام لوبيا والله من زمان جاي عبالي
امي ما بتطبخها قال اخواني ما بحبوها شباب وما بشبعهم الا الرز )
ام اسماعيل( ولا يهمك يا نجاح بس اطبخهم الك صحن )
نجاح ( بس مش تبعتيلي صحن بلاستيك صغير وتحكيلي هي حصتك بدي صحن قزاز كبير )
ام اسماعيل ( اخ منه لسانك
شو بدي احكي يا ام لطفي وينهم كناينك مرت لطفي ومرت مصطفى ليش ما يطلعو يقعدو معنا )
ام لطفي ( اليوم كل وحدة فيهم زايرة عند اهلها )
ام اسماعيل ( يلا منيح )
ام بكر ( انا مش عارف يا ام لطفي شو جبرك توخدي تنتين اسمهم قريب على بعض هيك اي والله بخربطو بفتلو العقل خلص من اليوم انا مش رح انادي مرت مصطفى الا سوسو )
ام اسماعيل ( ليش نجاح وصباح احسن
وانا كمان عشان ما اتخربط فيهم من اليوم رح نصير ننادي على صباح صبوحة)
روحو الجارات من عنا وانا فتت اتفرج عالتلفزيون كان جاي حلقة جديدة من بنك المعلومات لعمر الخطيب مع فوتت اخواني وكل واحد ماسك مرته من ايدها وضحكتهم من الدان للدان حسني قلبي انه في ايشي بدهم يحكو ايشي وفجأة نطقو الاتنين مع بعض ( مرتي حامل)
والله لو انهم منسقينها مش هيك هو من غير حمل ومش قادرة عليهم كيف هسا
مسكينة امي من فرحتها صارت تزغرد بنص الليل ولولا ما ابوي حط ايده على تمها كان لمت علينا الجارات
قعدنا نسهر شوي مع بعض وبعدها كل واحد راح ينام بغرفته
بسم الله شو هالصوت هاد الي بالمطبخ
سوسو هاد انتي
سناء( يا حبيبتي يا نجاح بتناديني سوسو )
نجاح ( اه اليوم خالتي ام بكر قررت تناديكي سوسو عشان نبطل نخربط بينك وبين هناء وقررنا نصير ننادي صباح صبوحة حتى ما يخربطو بيني وبينها
هسا احكيلي شو بدك بتحوسي بالمطبخ بنص الليل)
سوسو( بدور على ايشي حلو اكله بدي اعمل سندويشة زيت وسكر وبروح انام )
نجاح ( طيب لا تنسي تطفي المطبخ وراكي )
تاني يوم كنت قاعدة انا وامي وهناء وحكتلهم انه سوسو كانت بالمطبخ امبارح بتدور على ايشي حلو وامي بس سمعت ايشي حلو انجنت وعقلها طق
قال هاي رح تجيب بنت اكيد وهون ضحكت هناء وتربعت قال الحمد لله انها بتتوحم على حصرم كانت خايفة يكون بنت
وصارت امي تحسب وحالتها حالة من وين بدها تجيب حصرم لهناء وحقه اغلى من كيلو لحمة
تركت امي بتفكر وبتحسب ونزلت ناديت على صبوحة وذهب بنت خالتي ام يونس
صبوحة ( لوين ماخديتنا يا نجاح )
نجاح ( بدنا نروح على حوش ابو خضر بدي القط حصرم منه لهناء بتتوحم )
صبوحة ( يييييي ولك هاد من لما سكن بالحارة ما بحكي مع حدا ودايما لحاله )
نجاح ( ما هو عشان هيك بدي اجيب من عنده حصرم بسرعة بتحطولي انتي وذهب ايديكم بطلع عليها وبقطف حصرم من الداليا )
صبوحة ( واذا انمسكنا احنا من غير ايشي مش نافقين كيف لو يطلع علينا سيط انا سارقات )
ذهب ( احكو عن حالكم انا بيجيني عرسان )
نجاح ( وك تركيني عليها ياصبوحة اتركيني قال عشان شعرها اشقر امها سمتها ذهب انتي لازم يكون اسمك نحاس
امشي معي لارجعك هسا عالبيت )
وصلنا على حوش عمي ابو خضر وشلبكت صبوحة وذهب ايدهم ببعض وطلعت اقطف حصرم
بس ذهب الله يهديها عطست بهديك اللحظة ووقعتني انا وقطف الحصرم فوقي مش عارفة على شو اسمها ذهب والله لازم تكون تنك مش نحاس لسا
وطلع عمي ابو خضر ومرته علينا ومسكنا واحنا بنسرق حصرم وهاي صبوحة وجهها صار بالاوان
ابو خضر ( مش عيب يا عمي بنات متلكم صبايا بيسرقو حصرم )
نجاح ( يا عمي احنا ما سرقنا بس انا مرت اخوي حامل وبتتوحم على حصرم )
ابو خضر ( لو حكيتلي كنت اعطيتكم بطيب خاطر )
نجاح ( بصراحة خفنا منك لانك ما بتحكي مع حدا من الحارة )
ضحك عمي ابو خضر ونادت علينا مرته وقعدنا عندها وضيفتنا حصرم ولوز اخضر كمان وحكتلنا قصتها وامنتنا ما نحكي لحدا
يا حرام كاين عندها ابن وحيد وتوفى بحادث سير قبل ما يجو يسكنو بالحارة لهيك هي دايما لحالها وما بتحكي مع حدا
حزنت عليها كتير ورحت ضميتها
اعطتني قطف حصرم تشكرناها وطلعنا
نجاح ( اسمعي يا صبوحة وانتي يا تنك قصدي يا ذهب السر الي قالته خالتي ام خضر جوا بظل سر بينا مش اعرف وحدة منكم حكت لامها
انتي يا صبوحة بعرف لسانك طويل )
صبوحة ( لا انا مش رح احكي ايشي )
ذهب( ولا انا )
وصلنا عباب البيت ( ها متل ما وصيتكم مش تحكو لحدا هاي امانة )
صبوحة وذهب ( خلص يا نجاح فهمنا)
دخلت لجوا عند امي واعطيت هناء الحصرم
نجاح ( شفتو كيف جبتلكم حصرم
خدي يا هناء ظلي كلي لتشبعي
بتعرفو من وين جبتو من عند خالتي ام خضر الي ساكنين باخر الحارة يا حرام فوتتنا عندها وضيفتنا حصرم ولوز وحكتلنا قصتها طلع ابنها متوفي قبل ما يسكنو هون عشان هيك هي ما بتحكي مع الجيران )
وبعد ساعة امي جمعت نسوان الحارة وخبرتهم بالقصة وكل وحدة فيهم راحت عالبيت حتى توخد ايشي بايدها
خالتي ام اسماعيل اخدت طقم كاسات شاي
وخالتي ام بكر اخدتلها نص دذينة فناجين
وخالتي ام يونس اخدتلها بايدها كيلو موز وكيلو تفاح من عند صبحي الخضرجي
اما امي اخدتلها قميص نوم قطن منقط بجنن وبارد تلبسه بالصيف
وراحو عند خالتي ام خضر قعدو معها وواسوها وحسسوها انها بين اهلها واحبابها
حتى ابوي ورجال الحارة المسا راحو عند عمي ابو خضر واخدوه معهم عالقهوة
وهيك خالتي ام خضر التمت عالرابعي المرح
امي وخالتي ام اسماعيل وخالتي ام بكر وام يونس
……..
نجاح ( صباح الخير يا غالية
شو بتعملي بتغسلي بقمصان لطفي ومصطفى ووين نسوانهم
ولك يا هناء يا سوسو والله ما هي زابطة معي ادلعها بس يلا
تعالو جاي مش معناتو انكو حملتو تقعدو وتتكتفو وتحطو كل شي على امي ترا البسس بالشوارع بيحملو وبخلفو
وهاد اخر انذار الكم فهمتو )
ولفيت ظهري اروح اجلي الجليات وسمعت امي من وراي بتحكي
وهي بتضحك ( اخ منك ربنا ماخد من طولك وحاطط بلسانك )
…….يتبع في الحلقة القادمة
#حنين_طه
#كناين_ام_لطفي
الحلقة السادسة
صحيت من النوم سمعت امي بتحكي مع وداد الكوفيرة بدها تبعتني انا وسوسو وهناء لعندها حتى نقص شعرنا لانه هلا وقت طلعة الدوالي وهيك الشعر بنمو بسرعة حاولت اقنع امي بلاش وداد بنروح عند سوسن بس ابدا اصرت على وداد قال وداد صرلنا بنتعامل معها عشر سنين مش حلوة نغيرها
رحت انا ونسوان اخواني متل صف العسكر لعند وداد
وبلشت فيي وانا انبه فيها واحكيلها ديري بالك يا وداد تقصي كتير بس الله يهديها خرطتلي اياه خرط وكملت على سوسو وهناء
حتى هناء اجت قصتها عوجة
روحنا بنواسي بحالنا وبنحكي يلا اخرته بطول ومع هالشوب طول الوقت لابسات عروسنا اشارات مع جية صبوحة قال جايبتلنا معها قراص بسبانخ وطول الوقت تتخوت علينا هاد كيف لو ما كانو شعراتها شعرتين ونص ومقصفات كمان
نجاح ( وين رايحة با صبوحة خليكي هون هسا بنعمل كاسة شاي مع هالقراص وبنوكل )
صبوحة ( غير مرة يا نجاح لسا امي بدها تعمل فطير بزعتر بدي اساعدها وخالتي ام لطفي ونسوان الحارة عندها بساعدو فيها بس بعتوني اجبلكم هالصحن وهم سخنات )
نجاح ( طيب بترجعي العصر بتتسلي معنا )
روحت صبوحة وانا قسمت شغل البيت علي وعلى سوسو وهناء بعد ما اكلنا القراص وصارت كل وحدة تجر بحالها جر وحاطات ايدهم على ظهرهم وماشيات بس ما حليت عنهم لخلصو شغل وكل وحدة راحت عغرفتها
وانا جبت اكمل شغل التطريز تبع امي قال بدها تخيط اواعي لبنت مصطفى وابن لطفي بايدها وانا كالعادة خربتلها كل الخياطة ورجعتهم عالكيس ولا كانه الي دخل 
😂😂😂
بعد شوي رجعت امي من عند خالتي ام بكر وسمعنا ابو رجب بنادي عالزريعة عالبيكب
طلعت امي لعنده وووقفته بدها تشتري منه سجادة ومدادة وريحان وقعدت ساعة الا ربع وهي بتفاصله على عشر قروش قال هي بتحب تعطي مصاري عن طيب خاطر بس ما بتحب حدا يستغلها
لمحتها خالتي ام اسماعيل كانت مروحة من عند دار ابو بكر وبدل ما تكمل على بيتها اجت عنا يعبو تراب هي وامي ويزرعو بهالشجرات
ام اسماعيل ( هاي السجادة يا ام لطفي ما بتعيش الا جوا البيت بس بدك مكان تضربه الشمس منيح حتى تكبر. )
وساعة وهم يزيحو ويرتبو حتى بالاخير حطوها على شباك المطبخ الي بطل عالحوش وقعدت عنا للمغرب وروحت الحمد لله خالتي ام اسماعيل ما بتروح على بيتها الا زيارات بس بدكو الصراحة هالحارة بلاها ما بتسوى ايشي
وبعد ما وسخولي الحوش رجعت شطفته وفردت حصيرة وفرشة وقعدت انا وامي مع جية اخواني
كان مصطفى جايبلنا كيس كامل بوظة اسكيمو وميمو ونعنوع
وكل واحد فينا اختار البوظة الي بحبها ورجعنا الباقي عالتلاجةً قبل ما يدوبو
تاني يوم الصبح كان يوم جمعة صحت امي لطفي واعطته شوية زعتر وزيت عشان يروح عالمخبز يعمللنا مناقيش وحكتله كترهم لانها بدها تودي للجيران كل واحد رغيف عالداير
حظرنا انا وسوسو الشاي وبندورة وخيار وافطرنا وشبعنا
وبعد ما طلعو اخواني عصلاة الجمعة امي حطت على عمان عشان تسمع خطبة الجمعة وبنفس الوقت خلتني اوطي صوت التلفزيون عشان تسمع الخطبة الي بالمسجد الي جنبنا من كتر الايمان بدها تركز بالخطبتين سوا 😂😂😂
بعد ما روحو اخواني تغدينا كانت امي لافة ملفوف من قبل بيوم ومكترة عليه تومة مع عصرة ليمون اشي بشهي
وبعد الغدا راحو اخواني ينامو شوي وانا وسوسو وهناء قعدنا بحوش البيت نطق حنك وامي مدت حالها عنا
وانا اقترحت عليهم نلعب حيوان جماد
جبنا ورق وقعدنا نلعب
نجاح ( يلا دوري بالاول بدي حرف الهاء
خلص خلص وقفو خلصت )
هناء( ما بصير هيك يا نجاح انتي محضرة الحرف من قبل )
نجاح ( ولك هناء انا احترمتك وكتبت حيوان بحرف الهاء هدهد بلاش اغيره وانتي اسمك بنفس الحرف
تضحكيش انتي سوسو جايكي الدور )
وكل ما نختار حرف هناء تعترض قال احنا بنغش ومحضرين الاحرف من قبل
مع جية صبوحة وتنك قصدي ذهب عنا
نجاح ( ها خلص كونه صرنا خمسة تعالو نلعب حاكم جلاد )
هناء( بس احنا هيك خمسة واللعبة بدها اربعة )
نجاح ( خلص بنحط ذهب زبال )
ذهب( هسا هاد الي طلع معك يا نجاح الله يسامحك )
نجاح ( خلص تزعليش يا ذهب بدي احطك حاكم بس يلا )
وبلشنا نلعب وكل مرة تطلع هناء حاكم وسوسو لص وتحكم هناء على سوسو عشر عصي حاميات متل صفية المشتفية
كان نفسي اكسر العصاي عجنابها
نجاح ( خلص خلص قررت نغير اللعبة بدنا نلعب فواكه )
سوسو( انا بدي موز )
هناء( انا كنت حاطة ببالي اختار موز )
سوسو( بس انا الي اخترت بالاول )
نجاح ( الحق مش عليكم الحق على الي بده يلاعبكم كل وحدة تقوم من وجهي عند زوجها وانتي يا حبيبتي يا صبوحة ويا ذهب تعالو نتفرج عالتلفزيون هسا في حلقة جديدة من عليوه تعالو )
قامت سوسو وهناء وحزينة سوسو شكلها من كتر ما اكلت عصي اجاها الطلق وصارت تصرخ وهديك هناء بس شافتها من الخوف صارت تطلق معها
صحيت امي بسرعة وخبرت مصطفى يحضر السيارة حتى نوخدهم عالمستشفى بس لطفي اعترض قال بغار على مرته وما رح يخليها تولد بمستشفى
وهديك هناء ضحك سنها مبسوطة عشان زوجها بغار عليها حتى وهي بتطلق عقربة بس يلا الله يقومها بالسلامة
حطت امي كل وحدة فيهم بغرفة وبعتت صبوحة تنادي امها وذهب تنادي امها وانا اروح انادي خالتي ام اسماعيل
والله يستر من الي جاي احسن ايشي الله يقيمهم سالمات
….. يتبع في الحلقة القادمة
#حنين_طه