قصة كناين ام لطفي 9 + 10

قصة كناين ام لطفي الحلقة  9 + 10
نتركم الليلة في متاابعة الأحداث الشيقة لهذه القصة والتي نقدمها لكم من قسم المنوعات في زاكي, متابعة ممتعة نتمناها لكم أعزاءنا القراء, لو انهيت القراءة اكتب تعليق بكلمة تم ورأيك بالقصة لتصلك قصص أخرى.

الحلقة التاسعة

يلا يا نجاح اطلعي شوفي السيارة الجديدة الي اشتروها
نجاح ( يلا هيني طالعة )
طلعت لبرا وكانو اخواني شارين سيارة لونها ابيض زعلت كان بدي اياها لون احمر بس مش مشكلة المهم توخدنا مشواير بعد شوي التمو الجارات وبناتهم ونسوانهم الكل يباركلنا بالسيارة الجديدة وطلبو الحلوان
روح الجميع وبقيت خالتي ام اسماعيل عنا
قعدت عالفرشة بالحوش وامي طلبت مني شرشف عشان يغطو اجريهم وهم قاعدات وبلشت خالتي ام اسماعيل تشكي عن راشد قال كل تصرفاته متغيرة ومتعلم عادات اهل برا ولساته مصر على البنت الالمانية الي بحبها
حاولنا نقنعها تخطبله اياها بلاش تخسره لقدام بس هي خلص مصرة
ام اسماعيل ( تعالي احكيلك يا نجاح )
نجاح ( نعم يا خالتي )
ام اسماعيل ( سمعت انه نسوان الحارة بحضرو بحالهم لرحلة وقال بده يوخدهم ابو يوسف بباصه شو رايك )
نجاح ( والله يا ريت نروح لاني شوفة عينك لا طلعة ولا نزلة )
ام لطفي( لوين بدنا نروح نسوان لحالنا اقعدو واهدو )
نجاح ( ااااخ شو بده بصير علينا يعني استني يا خالتي نتفق شو بدنا نجيب وشو بدنا نعمل والله بنطلع وبنتسلى )
ام اسماعيل ( هسا بنادي على ام بكر وعلى ام يونس وبنتفق )
نجاح ( تنسيش خالتي ام خضر )
ام اسماعيل ( طيب طيب مش ناسيها )
رحت ناديت عالجارات وكلهم التمو عنا يتفقو عالرحلة وامي مش عاجبها الحكي ولا بدها تروح مع ولادها بالسيارة الجديدة
بس انا بدكم الصراحة مش حابة اطلع مع اخواني لانه طول الرحلة بجننونا لا تطلعي لا تنزلي لا تروحي محسسني انهم ماخدين معهم سميرة سعيد 😂😂😂
وبالاخير بروحو بقعدونا جنب المسجد واي حدا بقرب علينا بصيرو بدهم يروحو
وطول الوقت يلعبو شدة واحنا نضيفهم يعني نفس وضع البيت بس بالخلاء انا بدي اروح مع الجارات
اتفقنا احنا وجاراتنا نقنع الزلام وبعدين بنتفق شو بدنا نجيب معنا
بالاول ابوي واخواني اعترضو بس بعدين وافقو قد ما ترجيتهم
ونمت هديك الليلة وانا احلم واخطط وارتب بهالرحلة
وتاني يوم اول ما طلع الضو صحيت وعملت لفة عالجارات واتفقنا نلتقي كلنا عند خالتي ام اسماعيل ونقرر
اول وحدة وصلت انا وامي وجبت معي ورقة وقلم وبلشنا نكتب
ام اسماعيل ( انا بدي اجيب معي قراص سبانخ )
ام بكر ( وانا بجيب الفطور معي بخلي بلال يجيلي حمص وفول الصبح من المطعم )
ام لطفي( خلص وانا بلف طنجرة دوالي ) دايما امي بتختار الشغل الصعب😂😂😂
ام يونس( وانا بعمل طنجرتين مقلوبة )
ام خضر( خلص وانا بظل علي االشيبس والشوكلاته وبعمل قالب كيك )
نجاح ( كتري يا خالتي ام خضر من شيبس رينغو وشيبس سالي ازكى ايشي )
رجعنا عالبيت وطلت من التلاجة صفطة دوالي وقعدنا بالحوش انا وامي وسوسو وهناء نلف ما خلصنا الا اخواني مروحين جايبن معهم صفط هريسة قال عشان نحلي تمنا بالرحلة بعد الاكل
وجايبن معاهم فلافل قسمنا بندورة وعملنا سندويشات واكلنا

يلا يا نجاح خلصي صرلك ساعة بتكوي بهالاشار
اي اجيت يا هناء اخدتو الطبلة معكم
هناء( اخدناها يا نجاح كل شي صار جاهز ونسوان الحارة بلشو يتجمعو ما ظل غيرنا )
نجاح ( يلا يلا )
ركبنا بالباص وخالتي ام اسماعيل اصرت تركب قدام عند السواق واحنا ركبنا ورا وهي كل شوي تلف علينا
قضينا الطريق واحنا نغني ( على الجزيرة على الجزيرة شدو الرحال اليوم على الجزيرة )
وهالام اسماعيل كل شوي تكمش كمشة بزر وتعطي للشوفير قال حرام بسوق وصبتله كاسة شاي عشان يظل مصحصح
وصلنا الشوفير على مكان بس ما عجب امي والجارات قال فش فيه مي
رحنا عمكان تاني قال هاد الحمامات بعيدة فيه
رجع اخدنا عمكان تالت لحتى عجبهم وقعدو فيه
حطينا هالفطور وافطرنا مع كاسة شاي بنعنع
وقامت ذهب وصبوحة يتمشو ولقطو كل الورد وجابوه وكان في شب بتحركش بذهب شافته ام اسماعيل واخدت عصا عن الارض وراحتله بهدلته وحكتله تخيلها اختك بترضى حدا يعلق عليها هالام اسماعيل عن مية زلمة
بعد شوي
قمت وصرت احزر بالنسوان حزازير
نجاح ( يلا جماعة الحزورة الاولى ايشي اله سنان وما بعض )
ام بكر ( اي هالحزيرة الصعبة يا نجاح )
نجاح ( اي فكري يا خالتي
صبوحة شايفك لا تغششي امك )
ام بكر ( عرفتها لحالي المشط )
نجاح ( طيب شاطرة يا خالتي ام بكر
الحزيرة التانية ( شو الايشي ال كل من نقص زاد)
هناء( سهلة هاي يا نجاح الحفرة )
نجاح ( والله طلعتي بتفكري يا هناء)
بعد هيك تغدينا ومقلوبة خالتي ام يونس زاكية بس مش مكترة زهرة لانه الدنيا بلشت تصيف وزهرة الصيف مش زاكية
وقراص خالتي ام اسماعيل حارقته من تحت يا اخي ازكى من اكل امي ما بشوف بس يلا كتر خيرهم
وبعدين قعدنا حكينا شوي وركبت ذهب عالحصان وانا وصبوحة ركبنا عالجمل
وبس اذن العصر امي حكت انه لازم نروح قبل ما تعتم الدنيا
واحنا مروحين اعطت ذهب شريط للسواق فيه اغنية الليلة دوب ولازم نرضى بالمكتوب الليلة ديا
مع انه كنا تعبانين بس رجعنا صحصحنا عهاي الاغنية
وبالطريق امي والجارات وقفوه لسواق الف مرة
ساعة بدهم يشترو فقوس عن الطريق وساعة بدهم يشترو لوز وكل مرة ينزلو ويرجعو وما يشترو ايشي😂😂
لما وصلنا لقينا ابوي وشباب الحارة بستنو فينا متل الي كنا مسافرين ورجعنا وكل واحد ركض على امه يسلم عليها
وورجعنا عالبيت مبسوطين كانت رحلة حلوة
ان شاء الله كل سنة بدنا نعيدها
…..يتبع في الحلقة القادمة

#كناين_ام_لطفي
الحلقة العاشرة

ييي جاي جاي مين عالباب
ها اهلين بصبوحة خير جاي من الصبح
صبوحة ( امي بعتتني يا نجاح عشان اسالكم بدكم خضرة لانه ابوي رايح هسا عالحسبة بده يجيب فول اخضر وبامية وبازيلا نجيبلكم معنا )
نجاح ( لا ما بدنا يا صبوحة كتر خيرك )
صبوحة ( عن جد غريبة دايما خالتي ام لطفي بتطلب نجبلها معنا )
نجاح ( لا هالمرة ما بدها مش جاي عبالنا )
صبوحة ( طيب يلا سلام يا نجاح بدي الحق اسال الجارات )
نجاح ( الله معك )
راحت صبوحة وحمدت الله اني خلصت منها قبل ما تشوفها امي ولا كان بلشتنا بشغل بدنا سنة لنخلصه
كانت امي قاعدة بالحوش بتسقي وبتقصف بالزريعة
جبت شوية بسكوت مع راحة وقعدت معها وناديت على سوسو وهناء اكلنا بسكوت وراحة

دخلت امي لجوا وانا ونسوان اخواني قعدنا نحكي بس بعد شوي رجعت امي مقلوب وجهها ومبين عليها زعلانة
نجاح ( خير يا ام لطفي مالك )
ام لطفي( ولك كم حكتلك اسمي يما )
نجاح ( طيب يما ام لطفي مالك )
ام لطفي( ما في ايشي الله يسامحها هالام بكر شو بتخسر اذا حكتلي انه زوجها بده يروح عالحسبة ووصيتها على كم غرض جايبة لكل الجارات الا انا ليكون طلع مني ايشي زعلها )
نطت هناء متل الزمبرك ( عمتي لا تزعلي صار عنا سيارة ما بدنا جميلة حدا بكرة لطفي بروح بشتريلك الي بدك اياه )
نجاح ( عيب هالحكي يا هناء)
هناء( اي شو حكيت)
نجاح ( يما شوفي بدي احكيلك سر بس احكي والله ما بتزعلي )
ام لطفي ( خلص والله ما بزعل )
نجاح ( لا لا مش مطمنلك طيب احكي والله ما بتعمليلي ايشي)
ام لطفي( ولك احكي يا نجاح قبل ما اخلي العصاي توكل من جنابك )
نجاح ( بدك الصراحة اجت صبوحة الصبح وسالتني اذا بدنا ايشي وانا حكتلها لا اي تعبانة مش قادرة اشتغل )
ام لطفي( ااااخ بس كان قلبي حاسسني انه الك ايد بالموضوع بس لو ما حلفت )
قامت امي وراحت عند خالتي ام بكر تطيب خاطرها بلاش تفكر امي زعلانة وبعتت صبوحة تناديني رحنا هناك وكانو الجارات ملتمات وخالتي ام بكر فاردة عالشراشف وايشي بنقب فول وايشي بعمل بامية وانا وصبوحة اشتغلنا بالبازيلا
نجاح ( وين كناينك يا خالتي ام بكر خليهم يجو يساعدونا
خلص يما لا تطلعي في فهمت اسكت )
ام لطفي( الله يصبرني عليكي وعلسانك اخ بس لو ما حلفت )
خلصنا شغل وخالتي ام بكر حلفت الا تعطي امي نص الاكلات واحنا مروحين سمعنا في صوت جاي من عند دار ابو يونس
كملنا انا وامي ورحنا لهناك كانت ام يونس بتبكي وبتصرخ
ام لطفي( شوفي يا ام يونس صوتك واصل لاخر الشارع)
ام يونس( هاد يونس قال مشتري بيت جديد بمنطقة هادية وبده اياني اطلع اسكن انا وابوه معاه )
نجاح ( وماله يا خالتي ام يونس في حدا بصحله يرتاح وبحكي لا)
ام يونس( لا يا نجاح في حدا بنسى جيرته واهله انا اذا رحت هناك بموت ما بعرف اقعد بدون امك والجارات )
نجاح ( ااااخ انا عارفة عنك تبدلي يا خالتي ام يونس)
ام لطفي( ولك اسكتي يا نجاح كلام ام يونس صحيح وين بدها تروح تقعد لحالها هناك ما في حدا يونسها
اااخ بس لو ما حلفت )
والله هالام يونس اصيلة ما رضيت تبيع جاراتها وتروح تسكن ببيت جديد وحلو الله معطيها وموطي نفسها
واحنا طالعين من دار ابو يونس شفنا خالتي ام اسماعيل
ام اسماعيل( بنات حلال كنت جاي لعندكم بدي اخدكم واروح عند دار ابو بكر بدي اياكم بموضوع )
نجاح ( شكلنا اليوم مش رح نفوت البيت )
وصلنا عند دار ابو بكر وقعدت ام اسماعيل بالصدر
وصارت تحكيلنا انه الحمد لله ابنها راشد اقتنع ما يتزوج المانية قال اخوي مصطفى اقنعه وحكاله بكرة الاجنبية بتجننك وما بتحترم امك واهلك وراشد صار بده وحدة من الحارة
والله عجبني هالمصطفى طول عمري بحكي عن عقله جوزتين بخرج طلع بفهم عن بلد
ام لطفيي( يلا بلشي دوريله من هسا يا ام اسماعيل )
ام اسماعيل ( ليش ادورله عروسته موجودة شايف صبوحة بنتك يا ام بكر وعاجبته وبده نطلبها اله )
ام بكر بس سمعت هيك رح ما يغمى عليها من وين كانت تحلم بعريس متل راشد بس صبوحة تركتنا وفاتت لجوا وانا لحقتها حطيت ايدي عكتفها كانت بتبكي وزعلانة
صبوحة ( انا مستحيل اوافق على راشد شو ناسية انه ذهب كانت بدها اياه )
نجاح ( شو هالحكي هاد اي ما صدقتي متى تنفقي صرتي بدك تتعززي لا تخافي على ذهب بكرة بتخطب وبتتزوج احسن منه ذهب شعراتها شقر وبتنفق بسرعة )
صبوحة (لا يا نجاح مش انا الي اغدر بذهب)
نجاح ( اسمعي علي ترا انا من الصبح بدور على حدا افش خلقي فيه بدك تتزوجي راشد يعني بدك تتزوجيه صدقتي حالك صرتي تتدلي واذا كان عذهب انا هسا بجبلك اياها وبتحكيلك انها موافقة )
بصراحة انا كمان كنت خايفة عذهب تزعل بس ذهب شعراتها شقر بتتزوج اما صبوحة مسكينة ربنا بعتلها راشد يمكن يريحها من نسوان اخوانها والحمد لله ذهب لما عرفت فرحت كتير لصبوحة كانه هي الي انخطبت وحكت لصبوحة ( انا شقراتي شقر بكرة بخطب وبتزوج )
كان نفسي امسكلها اياهم هالنحاستين الي براسها واحوسها منهم بس يلا بظل قلبها طيب
رجعنا انا وامي عالبيت واحنا بالطريق
ام لطفي( مالك يا نجاح ليش عيونك مدمعة وانتي ان شاء الله بكرة ربنا ببعت نصيبك وبتتزوجي )
نجاح ( مدمعة من الفرح كتير فرحانة لصبوحة بكرة بس تتزوج بتظل ملزقة عنا هي وخالتي ام اسماعيل )
ام لطفي( ام لسان شو بدي اعمل فيكي )
نجاح ( امشي امشي ام لطفي نميل عالدكان قبل ما نروح اشتريلك حبة كف احمر )
ام لطفي( ولك انا اسمي امك اخ بس)
نجاح ( لو ما حلفتي )
…… يتبع في الحلقة القادمة
#حنين_طه