كناين ام لطفي الحلقة 11

كناين ام لطفي الحلقة 11
نكمل معكم أعزاءنا القراء في زاكي, أحداث هذه القصة المشوقة, والتي نقدمها لكم من قسم المنوعات في زاكي, ننتظر رأيكم وتعليقاتكم على القصة.

#كناين_ام_لطفي
الحلقة الحادية عشر

ولك مش هيك يا نجاح بنضب حامل الفراش في حدا بحط الحرامات الصغيرة تحت الكبيرة هسا كله بنهد
نجاح ( يما صرت هاددته ونافلته عشر مرات ومش عاجبك
هسا المهم اي حرامات الي بدك اياهم بالوجه )
ام لطفي( الي كل سنة بنتغطى فيهم يا نجاح
وخلي هدول الحرامات الي عطبقتين بدي اعطي واحد لمصطفى وواحد للطفي حرام ولادهم صغار وبدهم ايشي يدفيهم )
نجاح ( ها وهي خلصت
شكلها الشتويةجاي على بكير السنة مسكينة صبوحة عرسها بكون بالشتا لا رح تلبس ولا رح تتزبط )
ام لطفي ( مش مهم المهم السترة
سمعت ام اسماعيل بتحكي انه العرس بعد رمضان )
نجاح ( من هسا بحكيلك بدي اصير اروح اجهز مع صبوحة كل يوم بعد الفطور
اااخ بتحلى الطلعات عالاسواق بعد الفطور )
ام لطفي ( طيب روحي هسا من وجهي ناديلي نسوان اخوانك الجو بلش يبرد والبلاط برد بدنا نفرش الموكيت )
نجاح ( اخ يما انقطم ظهري هاي السجادة كل سنة بتحكي ما بدك اياها وبترجعي تفرديها )
ام لطفي( منيحة يا نجاح بتسلكنا السنة والسنة الجاي بنشتري غيرها )
المسا كنت قاعدة انا وامي بالحوش بنودع قعدات الصيف بهالحوش لما اجا ابوي واخواني وكانو جايبين معهم تمرية
التمينا كلنا ولطفي حكى لامي بده يحوش هو ومصطفى ويشترولها صوبة غاز بس امي اعترضت وما قبلت قال بتصرف غاز الدنيا ومالها صوبة الكاز بتدفي وبنعمل عليها كاسة شاي وبنشوي كستنا وحتى سخان المي لما بدنا نتحمم بنحطه عليها

تاني يوم صحيت عصوت المطر بضرب بالزينكو تبع السطح
ام لطفي( الحمد لله الله يبعث الخير كمان وكمان
تعالي يا سوسو هدول الخبزات يابسات ادهنيهم زعتر وزيت وحطيهم بالفرن خلينا نوكلهم )
نجاح ( مين بدق علينا الباب
ها اهلين خالتي ام اسماعيل كيف طلعتي بهالمطر )
ام اسماعيل ( انا يا نجاح اذا بقعد ساعتين بالبيت رجلي بنملو وبتعب شو هاد ريحة زعتر روحي يا نجاح احسبي حسابي واعمليلي كاسة شاي بميرمية ترا ميرمة الشتا ما في ازكى منها )
تعالي يا نجاح افتحي هاي اكيد ام بكر وصبوحة شافوني اجيت واجو وراي
نجاح ( اهلا وسهلا تفضلو فوتو جوا )
ام بكر ( والله انك شاطرة يا ام لطفي صرتي فارشة الموكيت والله انا لهسا ما فردت ايشي الله يسامحهم كنايني من لما عرفو انه صبوحة خطبت وهم مش مهديتلي بال )
نجاح( ول ليش ما هيهم تزوجو وجابو ولاد ولا حلال الهم حرام عغيرهم )
ام بكر ( اااخ يا نجاح خليها بالقلب تجرح ولا تطلع لبرا وتفضح )
نجاح ( والله ما انتي عاجبتيني يا خالتي ام بكر الي بشوفك بحكي عنك ما شاء الله قادرة بعرفش انك ما بطلع بايدك ايشي)
ام بكر ( قصدك لا بهش ولا بنش )
نجاح ( بيييي هسا انا هيك حكيت خلص اشربي شاي اشربي)
قعدنا كلنا بالصالة افطرنا وصبوحة بتحسب شو بدها تجيب بالمهر ومن وين بدها تشتري وتكمل جهازها
واام اسماعيل بتحسب معنا
ام لطفي( بتعرفي يا صبوحة انتي لو تنزلي قبل رمضان عالسوق احسنلك بتخلصي وبترتاحي )
نجاح ( وال ما هو كله يومين الي ظايلات لرمضان بعدين برمضان بعد الفطور السوق احلى
خلص لا تطلعي سكتت اشربي شاي اشربي)
ومن سيرة لسيرة وقد ما حكينا عن عرس صبوحة
صارت خالتي ام بكر تغني لبنتها وتبكي

ارفعي راسك يا مرفوعة الراس
: لا فيك عيب ولا قالت الناس
: ارفعي راسك لخيك وقوليلو
: إحنا شقاقين الحرير والناس لباس
: مشمش لوى مشمش لوى
: حامض على إمو ما استوى
: ياناس صلوا عالنبي
مش كل العرايس سوا
اخ وانا دمعتي سخية ما تحملت بدكو الصراحة الله يعين خالتي ام بكر عفراق صبوحة ويعيني انا كمان 😭😭

بعد شوي الدنيا بطلت تمطر والشمس طلعت ولا كانه في ايشي عقولة امي الجو بنحزرش عليه هالايام )
روحو الجارات من عنا وما شفنا الا سوسو وهناء جايات علينا ومبسوطات
سوسو( عمتي اشرف طلع سن)
هناء( عمتي ليلى طلعت سن )
ركضت انا وامي عليهم
نجاح ( يا حبيبي ما احلا هالسن الصغير )
ام لطفي( روحي يا نجاح عند ابو فهيم جيبي من عنده حب قريش بدي اعمل سنونية واوزع عالحارة )
نجاح ( طيب هسا بنادي على زاهي يروح يشتريلنا )
ناديت على زاهي اشترالنا حب قريش واعطيته اله عشر قروش حلوان السن مناح بشتري فيهم شوكلاته سفاري وهو مروح 😂😂😂
عملت امي سنونية ورحت اوزع عالجارات وخالتي ام اسماعيل لما عرفت حلفت الا تيجي عنا وتجيب معها قالب دحدح فيها الخير والله

لما رجعت عالبيت كانت عنا خالتي ام يونس وذهب جايبات معهم كيلو خبز
ام يونس( هدول الخبزات عشان سنوية حماتي حبينا نوزع ايشي عن روحها الله يرحمها كانت متل امي منيحة وطيبة وحنونة )
نجاح (طيب لانها كانت منيحة الواحد بوزع لحمة مش خبز )
ام يونس( الله يهديكي يا نجاح بدك اياني اوزع لحمة على روحها هي صحيح كانت منيحة وحنونة بس يعني الها هفواتها
عكل حال لو معي ما كنت قصرت )
ول هالام يونس عقد ما هي كريمة قد ما ايدها ماسكة لسا من يوم كانت بدها ترحل عبيت ملك وغالي بس يلا ماله الخيز نعمة كريم

روحت خالتي ام يونس وانا قاعدة عالباب بستقبل وبودع برحب وبسهل متل الموظفة بالاخير اجا ابوي واخواني وحطينا على قناة عمان كانو عم بتحرو الهلال بدهم يشوفو اذا بكرة رمضان او لا بس الشيخ اعلن انه بعدبكرة رمضان وهيك بظل قدامنا يوم كمان نجهز لرمضان
الله يعيده علينا وعليكم بالخير
ام لطفي ( الحمد لله مبروك الشهر علينا وعليكم
بتعرفي يا نجاح هاد رمضان بدي اعملك من هاي العجينة الي بتنلف شو كان اسمها شو كان اسمها )
نجاح ( الله يبارك فيكي يا ام لطفي سنبوسك اسمها كم مرة بدي احكيلك اياها )
سوسو( سمبوسك يا نجاح سمبوسك )
عملت حالي مش سامعة ورحت سلمت على ابو لطفي وام لطفي وبست ايديهم
…. يتبع في الحلقة القادمة
#حنين_طه