قصة كناين ام لطفي الحلقة 12+13+الأخيرة
نتابع معكم أحداث هذه القصة الممتعة جداً والتي نقدمها لكم من قسم المنوعاات في زاكي, اكتب لنا رأيك في القصة.
#كناين_ام_لطفي
الحلقة الثانية عشر
اكتبي يا نجاح عندك اكتبي
( بدنا عدس الشوربات بتكتر برمضان وبدي رز اكتر من طبخات الرز برمضان ما في
وكمان جيبلي معك شوية جوز خلينا ندقهم بالسهرة بدنا عشان القطايف
وجيبي معك عصير حلل مش كل يوم والتاني بده يجيب ابوكي تمر هندي)
نجاح ( ظل بدك ايشي تاني )
ام لطفي ( لا بكفي هدول روحي يلا )
وانا رايحة شفت زاهي ابن الجيران اعطيته الورقة والمصاري يشتري الاغراض وانا رحت ميلت على صبوحة قعدت معها وسالتهم شو طابخين اول يوم وحكولي بدهم يعملو منسف يا سلام علحمة بلدية بطلع غير شكل )
بعد شوي اجا زاهي جايبلي نص الاغراض غلط اخدت الكيس منه ورحت عند ابو فهيم عالدكانة لقيته قاعد بسجل بهالدفتر ديون عالناس حزين عمي ابو فهيم ليل نهاره يسجل وفش حدا بدفعله ايشي
😂😂😂
رجعت عالبيت لقيت صوت امي طالع
ام لطفي( ولك مش هيك يا هناء بنمسح الدرج شوفي كيف ما بلمع حطيلك نتفة كاز بالمي بصير يضوي)
هناء( انا بتحسس من ريحة الكاز خلي سوسو تطلع تمسحه)
وكلمة منها عكلمة من امي عليت اصواتهم مع وصلت لطفي من الشغل سمع الصوت وركض عالبيت
وحميت المشكلة والله طلع لطفي اخوي رجال صرخ بمرته وصار يبهدل فيها وامي تهدي فيه وهو ابدا ركب راسه قال بده يروحها عبيت اهلها بالاخير روح هناء عند اهلها واحنا قعدنا متل سعدا الحزينة ما هو ما بزبط تحرد باول يوم رمضان
ام لطفي( روحي يا نجاح ناديلي ام اسماعيل وام بكر
اشوف حل لهلمصيبة )
نجاح ( وخالتي ام يونس بدك اياها ولا لا )
ام اطفي( جيبها بطريقك )
رحت ناديت خالتي ام اسماعيل كالعادة سبقتني لبيتنا بتموت عالقصص والسواليف ورحت عند خالتي ام بكر اناديها
نجاح ( خلي صبوحة تيجي معك يا خالتي ترا ما برجع اجيبها انتي كل مرة بتعملي هيك والله رجلي طقو وانا رايحة جاي )
وصلو هم عالبيت ورحت انادي ام يونس بس كان عندهم ناس والله العليم والله العليم ان ما خاب طني خطابين لذهب
رجعت عالبيت واني بتبكي وتسوح وبتنوح
ام اسماعيل ( اي خليه يربيها شوي يا ام لطفي )
ام بكر ( وانا من رايك يا ام اسماعيل )
ام لطفي ( لا هسا بس يرجع اجري على اجره بدي اخليه يرجعها )
المسا اجا ابوي وجايب معه قرص جبنة بيضا عشان نتسحر عليها وجايب قمر دين ما هو رمضان والسحور ما بحلى الا بهالاكلات)
كنت بستنى بيوم رمضان على احر من الجمر بدي اشوف شو بدهم يجيبو مسلسلات جديدة بدكو الصراحة كنت بستنى بمسلسل حمام القيشاني مسلسل سوري وحلو
صحينا قبل الفجر انا وسوسو متل المكوك نحضر السفرة سلقنا بيض مع جبنة مع كاسة شاي وكلنا قعدنا نوكل الا امي
نجاح ( اذا مش عاجبك الاكل بعملك غيره )
ام لطفي( اقعدي بديش غيره انا بكرة مش صايمة )
لطفي( له ليش يا ام لطفي)
ام لطفي( اذا هناء ما رجعت الليلة انا مش صايمة )
ويهديكي يرضيكي يا بنت الحلال يا ام لطفي طيب يما ابدا بدها هناء تحضر اول يوم رمضان عنا وسوسو مش عاجبها اكلت البيض بقشره لما سمعت انه هناء راجعة
انا ما بحب اتنصت عحدا بس كأني سمعت مصطفى بحكيلها لا تفتحي تمك بكلمة احسن ما تلحقيها لهناء
صحينا الصبح وانا بس صارت الساعة 9 الصبح حسيت حالي جوعانة وصرت من مسلسل لمسلسل ولما خلصو المسلسلات حضرت الاعادة 😂😂لحتى امي صارت تصرخ
حضرنا السفرة كانت امي عاملة جاج عالقناني وسلطة وشوربة عدس وانا اطلع عالاكل حاسه ما بكفي سبحان الله قديش الصايم عينه فارغة
لطفي( السلطة دالعة وفش عليها ليمون)
ام لطفي( روحي يا هناء جيبي نص الليمونة الي بباب التلاجة واعصري لزوجك )
بعد شوي اجت صبوحة جايبة معها منسف واجت ذهب جابتلنا مقلوبة وامي اعطت لكل وحدة منهم حصتها
بعد الفطور اجو الجارات لعنا ورحنا كلنا عصلاة التراويح
والصغار بالمسجد اكتر من الكبار
واحنا مروحين ميلنا عالسوق اشترينا شوية قضامة ما احلى السوق برمضان الاولاد بتلعب فوتيش والبنات مروحات من المسجد مع انه ولا وحدة فيهم بتصلي بس صلاة التراويح ما بصير يفوتوها 😂😂
وحكتلنا ذهب انه جاييها عريس بشتغل مدرس حكومة وراتبه منيح وامه ميتة وما عنده خوات يعني عقولتها مواصفاته فل اوبشن وباركنالها الله يتمملها عخير
ذهب( حضرتي يا نجاح مسلسل حمام القيشاني الحلقة الاولى )
نجاح ( استنيته يجي ما شفته لا عقناة سوريا ولا على عمان )
ذهب ( ما هو بيجي عقنوات السطلايت هاد الي متل الصحن)
نجاح ( هاد الي بجيب شغلات مش منيحة استغفر الله امشي امشي)
بس للامانة كان نفسي يكون عنا سطلايت واتفرج عالمسلسلات متل ما بدي بس شو بده يقنع ام لطفي فيه
ظليت يومين اسق وانق لحتى امي استسلمت وقررنا نشتري واحد
واحنا بنركب فيه طلت علينا خالتي ام اسماعيل هالام اسماعيل ولا بيخفى عليها ايشي
ام اسماعيل وهي بتدق عصدرها( شو يا ام لطفي اشتريتو من هاد الصحن )
ام لطفي( ما هو شو بدنا نعمل متل ذهب وام يونس
جارك معلمك يا رب سلمك )
…….. يتبع في الحلقة القادمة
#حنين_طه
الحلقة ما قبل الاخيرة
سوسو( يباي ما ازكا ريحة الكعك خاصة لما يطلع من الفرن )
هناء( والله انا ما عدت اتحمل الله يسامحها عمتي لو خلتنا نعمل الكعك بعد الفطور نفسي اكل منهم )
نجاح ( اي خلصي انتي واياها لتسمعكم كلها كم ساعة وبنفطر وبتوكلو لتشعبو )
سمعت صوت امي وابوي بتقاتلو امي بدها تعزم عمتي وولادها برمضان وابوي مش قابل ماخد على خاطره لانه برمضان الماضي عزمت الكل الا احنا هيك الفقرا ما الهم حظ
بس امي ظلت وراه تحاول تقنعه ما هي رحمه وشهر ر مضان مرة بالسنة على الي بظل عايش
اقتنع ابوي والمسا بعد الفطور راح هو واخواني وعزمو عمتي لعنا
وانا وهناء وسوسو نازلات بهالكعكات بدكو الصراحة زاكيات خاصة انه امي عاملتهم طرايا
رجع ابوي وخبرنا انه عزم عمتي تاني يوم عنا وامي قررت تعمللها ملوخية وصينية بامية
تاني يوم صحينا بكير جهزنا الفطور مع جية ذهب وخالتي ام يونس بدها تعزم امي على جاهة ذهب وحكتلنا انه زوجها اليوم رح يعزم ابوي بصلاة التراويح
ام يونس( والله يا ام لطفي بده يسكنها ببيت لحالها ما شاء الله راتبه منيح كتير 200 ليرة )
ام لطفي( الله يهنيها يا ام يونس اهم ايشي يكون ابن حلال )
لوت تمها خالتي ام يونس ما عجبها الحكي
المسا اجت عمتي عنا هي وكناينها وصلت قبل الاذان بخمس دقايق وطول الوقت وهي قاعدة اجر على اجر مش عاجبها ايشي اااخ بس الله يرحم صدق الي قال الفلوس بتغير النفوس
بعد الفطور روحت عمتي واجت صبوحة رحنا عالسوق حتى تكمل جهازها
اكتره جابته من البسطات ما هي نفس المحلات وارخص كمان
وهيك خلص شهر الخير وقعدنا نستنى يوم الوقفة يعلنو انه عيد والمشكلة انا لسا اواعيي مش جاهزات رحت بدلتهم عشر مرات بالاخير استقرت عطقم اسود بجنن
صحيت يوم العيد قبل الكل رايحة جاي اطلع عطقمي بلشت صوت التكبيرات وصوت الاولاد برا وهم لابسين ومرتبين
رحنا صلينا صلاة العيد وروحنا قلينا لحمة وقعدنا نستنى بجية اقرايبنا
وانا فايتة طالعة اكل حلو وسلفانة امي عبت الصفط تلت مرات من تحت راسي 😂😂
اجا ابوي بعد ما لف عبنات العيلة وسلمت عليه وكل نص ساعة ارجع اسلم عليه مرة تانية يمكن سلمت عليه عشر مرات وكل مرة بعايدني
ونسوان اخواني تصفصفو قدامه حط بايد كل وحدة خمس ليرات
طليت من الشباك استنى قرايبنا وشفت زاهي قاعد بلعب بفرد الخرز كل الاولاد معهم فرودت طلق الا هو والي معه فرد خرز ابو زيد بكون خاله والله كان نفسي انزل العب معهم
وصلو قرايب امي وقرايب ابوي مع بعض واخدت الي فيه النصيب صحيح ما بجيبو ايشي بس مناح بشترولي طقم جديد على عرس صبوحة
خلص العيد عخير وانا وسوسو وهناء نترجى باخواني ياخدونا عالملاهي بالاخير اخدونا عمنتزه في مرجتين وسحسيلة يلا ولا البلاش
…………
نجاح ( اجيت اجيت مين عالباب
اهلا بام العريس فوتي يا خالتي شو هاد كرت عرس راشد
الف مبروك يا خالتي )
ام لطفي( فوتي يا ام اسماعيل تفضلي ليش واقفة عالباب)
ام اسماعيل( اجيت اعطيكم كرتكم طبعا انتو ما بدكم عزومة بتشرفونا )
بعدها سكتت شوي خالتي ام اسماعيل
ام لطفي( مالك يا ام اسماعيل مش عطبيعتك خير ان شاء الله )
ام اسماعيل ( ااااخ خليها لالله يا ام لطفي)
كنت انا بعمل شاي جوا بالمطبخ بس داني عندهم كانت ام اسماعيل بتشكي من اخوها المغترب كيف بده ياكل حق ولاد اخوها الميت وياخد حق ولاد اخوه
ول كيف الانسان بقدر يوخد مال حرام حاولت اسكت بس ما قدرت طلعت وقلتلها يا خالتي ام اسماعيل هاد اخوكي بده واحد يوقف بوجهه واذا لزم الامر اشكي عليه
بس امي اطلعت فيي نظرة انه حطي بتمك ملبسة وروحي
بعد شوي رن جرس البيت كانت خالتي ام بكر جايبتلنا كرت لعرس صبوحة ما احنا بنقرب للعريس والعروس
ولسا بدها تقعد ولا جاي ام يونس تعزمنا على عرس ذهب
الله يكتر الافراح
العصر فردت مصاريي وقلم ورقة بدي احسب حسبتي
للاعراس الجاي
والمسا نزلت عالسوق مع سوسو مرت مصطفى اشتريت طقم لعرس صبوحة وذهب بلبس على عرسها لبسة العيد
ما احلى الحارة كل الشباب بزينو فيها عشان راشد والنسوان عند دار ابو اسماعيل وصوت الاغاني واصل للحارة التانية
يوم العرس روحت انا مع صبوحة على الصالون طلعت حلوة كتير وابهجت عليها هيبة عروس
وصلنا عالصالة كانو حاجزين بصالة الرفقة حلوة ومنيحة وخالتي ام اسماعيل ما قعدت الله يبسطها
بعد بيومين كان عرس ذهب وكانت عاملته بصالة الوردة صالة بتجنن وحلوة كتير ما فيها عمدان عقولة امي
بس للامانة صبوحة طلعت احلى من ذهب مكياجها احلى والحومرة الحمرة بتبهج العروس اما ذهب حاطة هالحومرة البصلية متل الي امي بتحطها لما شفايفها بتشققوا 😂😂😂😂
يلا اهم ايشي تزوجت
رجعنا عالبيت حسيت بوحدة طيب كل البنات الي بعمري تزوجو وانا لسا الله يبعتلي نصيبي
و هوا يا هوا لا تغبرلي كمه
راشد العربس غالي على امه
هوا يا هوا لا تغبر بدلاته
راشد العريس غالي عخواته
ما احلى الفرح
………
يتبع في الحلقة الاخيرة
#حنين_طه
#كناين_ام_لطفي
الحلقة الرابعة عشر والاخيرة
صوت امي برقع بالحارة
ليش سوسو وهناء مش مدفيات ولادهم عقولتها الدفا عفا انداري عنها امي واحد حامل ذقنه والتاني تعبان فيها
نجاح ( اهلا وسهلا خالتي ام اسماعيل
هي صبوحة والله اشرقت الانورار )
ام اسماعيل بتحوس وبتلوس ياخي لما يكون في بتمها حكي ما بتعرف تقعد
ام اسماعيل( بدك الصراحة جايبلك عريس يا نجاح اسمر وطويل ومتكتك )
انا سمعت اسم عريس طبلة داني من جوا صارت توجعني
قعدت جنبها وامي تطلع علينا بطرف عينها
فهمت من ام اسماعيل انه العريس بشتغل موظف بشركة البيبسي وعنده بيت فوق اهله وامه عايشة وعنده اربع خوات واربع اخوان وماله هو في احلى من العزوة 😂😂
بس امي حكتلها اليوم بس يروح ابوي بتساله وبتشوف ردة فعله
المسا لما رجع ابوي خبرته امي عن العريس وحكالها خليهم يتفضلو ما البنت عمجلاها ما بتعرف مين بتولاها
والله هالمعررف ما رح انسالها اياه بحياتي لخالتي ام اسماعيل
تاني يوم اجت ام العريس وبنتها واعطت الموافقة الاولية وظل يجي ايمن هيك اسمه كله يمن وبركة
وبس اجا طول الوقت يطلع فيي ويضحك معقول عجبته ما هو يا احول يا اما بضحك علي بس تفاجأت انه ابوه طلب بنفس القعدة
شوية ولا هي ام اسماعيل جاي ما بتقدر تفوت عحالها ايشي 😂😂😂
ايمن كان وضعه على قده وابوي ما حب بتقل عليه كل شوي يحكيله احنا بنشتري زلام ولا بده يخلص مني
يلا المهم اتزوج واصير البس قمصان نوم بريش متل رحاء الجداوي واحط على وجهي احمر واخضر 😂😂
تزوجت بحفلة عالديق بصالة الاحبة وامي قضتها تبكي وتنوح يباي شو عزت علي طلعتي من بيت اهلي على قد ما كنت مستقتلة اتزوج على قد ما روحي طلعت بهديك اللحظة
رح اشتاق لامي وجارتها ورح اشتاق لصبوحة وذهب ام نحاستين ونص
وزاهي وسوسو وهناء
بيتي كان قريب من بيت اهلي بروحو مشي وكل يوم كنت اروح عند امي بتسلى معها
قعدت خمس شهور ما حملت وامي فزعت الدنيا من حدا لحدا خايفة يكون معي ايشي لانه بنت عم ابوها كانت ما بتجيب ولاد وامي خافت بالوراثة انا اطلع زيها وكانت بدها تبيع سنسالها الحلبي حتى تعالجني بس الحمد لله بالشهر الخامس طلعت حامل وصارو جارات امي يتحزرو
ام بكر ( والله شكلك حامل بولد يا نجاح من لما اجيتي وانتي توكلي كرز )
ام اسماعيل( شو هالحكي يا ام با بكر مش شايفتيها نافشة اكيد بنت )
وبعد تسع شهور ولدت وجبت فؤاد وكانت ايامي ماشية عالحلوة والمرة مع ايمن
ايمن( نجوحة وينك يا نجوحة تعالي شوفي شو جبتلك )
نجاح( شو هاد)’
ايمن( هاد بحكولو موبايل
بتقدري تحكي مع امك او اي حدا وانتي مش بالبيت وعادي برنو عليكي وانتي برا)
نجاح ( ليش جبته هسا هاد اكيد حقه مبلغ وقدره )
قعد ايمن يعلمني عليه وانا اعطيت رقمي لكل الجارات يباي الغيرة تاني يوم كلهم اشترو موبايلات الي باعت ذهبها والي اخدت جمعيتها المهم يشترو موبايل
هي نجاح بنت ام لطفي كاينة احسن منهم 
😆😆😆
ها هي وصلني رسالة من صبوحة
اخاف اهديك وردة وتذبل
اخاف اهديك كلمة وترحل
اخاف ( جزء من النص مفقود )
خليني ارد عليها
ان نمت احلم فيك
وان سرحت افكر فيك
ييييي هاي طلعت عرسالتين بدها تروح صحبتك مخسر يا صبوحة
كنا كل سبت نجتمع عند وحدة من جارات امي نعمل حلو ونعمل اكل ويكون البيت فش فيه محل تقعد وكنا مبسوطين مرقت الايام والله اعطاني امل وفؤاد
فؤاد هادي بس امل ام لسان طالعة لامها 😂😂😂
بلشت الحياة تتغير والقلوب والنفوس تتغير
نجاح( ولك تعالي يا امل تعالي صوريلي الطبخة قبل ما نوكلها ونزليها عالفيس
ها شوفيلي مين علق عليها )
امل( خالتي صبوحة علقت وبتحكيلك صحتين )
نجاح ( احكيلها احكيلها عقلبك تفضلي امانة )
امل ( اموت واعرف وين تتفضل المهم
وسوسو مرت خالي مصطفى عملتلك لايك
نجاح ( شوف ما اقواها عاساس مش مهتمة وهي بتموت عطبيخي )
اكلنا الطبخة انا والاولاد وبعد شوي فتحت الواتس كنا عاملات جروب عليه لبنات الحارة القديمة بس شفت ذهب غادرت قال ليش صبحت علينا وما ردينا
وين زمان وايام زمان كنا دايما مع بعض وقلوبنا عبعض
واذ وحدة زعلت بترضى غصب عنها
هسا اذا زعلنا من حدا بنعمله بلوك
واذا حدا ما رد علينا ما بنعمله لايك
فؤاد( شو يما ولدو نسوان اخوالي )
نجاح ( اه هناء جابت بنت وسوسو جابت ولد برضه اسمر لاخوانها )
فؤاد( شو سموهم )
نجاح ( سوسو سمته احمد
وهناء سمت بنتها الى اليسار )
امل( اليسار يما ول سهلة )
يمكن كل شي تغير الي كناين امي بعدهم بحملو وبولدو مع بعض 😂😂😂
وام لطفي الغالية وام اسماعيل وام بكر ما تغيرو هدول البركة صحيح امي بس اروح عندها بتسمعني الف كلمة من عمايل ولادي بس مش مشكلة بتظل ام لطفي الغالية
القصة هاي لازم يكون اسمها ساالله عايام زمان
انا جيت احكيلكم عن كناين ام لطفي بس حنيت لهديك الايام ونسيت حالي
حنيت لايام لما يكون بالحارة فرح نلتم كلنا وكانو الفرح موجود بكل دار هسا ما بتعرفي انه في عرس الا بعد ما يجيكي كرت هاد اذا عزموكي وبحطولك بنهاية الكرت
ممنوع اصطحاب الاطفال اي اروح اتبرع فيهم واجي على عرسكم يعني هو صحيح انا بنزل عالسوق وبروح عالجارات من دون ولادي بس بالاعراس لازم اخدهم 😂😂😂
حنيت لايام فتحي يا وردة وغمضي يا وردة
حنيت لايام عدنان ولينا وكابتن ماجد
ايام فرط الملوخية العيدان مش متل هسا كل شي موفر وسهل ويا ريت فالحات النسوان كمان
ااااخ سا الله عايام زمان
بس الكم وعد مني برمضان اكتبلكم عن كناين ام لطفي
وبنات حماي
ومبارك عليكم الشهر
#انتهت
يتبع غي الجزء التاني برمضان
#حنين_طه