رحلة مرض قصة حقيقة لتعطيك الارادة والقوة في الحياة استمتع بقراءتها
نقدم لكم هذه القصة المميزة من قسم المنوعات في زاكي
بداية بدي اوجه تحية لصاحبة القصة سهام عنبه
كل الحب والتقدير

رحلة مرض قصة حقيقة لتعطيك الارادة والقوة في الحياة استمتع بقراءتها

#رحلة_مرض

ما بعرف الدافع الي جواتي الي خلاني احكي قصتي حتى تنكتب الي بعرفه انه بدي شوف كل الناس الي عم بمرو بازمة يكونو قوايا ويخلو عندهم امل واحد انه ربنا ما بيصيبنا بمرض او بعجز الا لانه خير النا
سبحانه وتعالى كل امره خير والانسان المؤمن اذا صابه خير شكر واذا مسه سوء صبر

ام سهام ( يا عمري الله يحميكي رح تكوني احلى عروس بتشوفها عيوني )
سهام ( هالعيون انا ما بحب اشوفهم بيبكو بحب دايما اشوفهم قوايا متل ما علموني وكبروني صحيح لساتني صغنوطة وكل عمري 15 سنة بس بعجبك ها )
ام سهام( ربي يكتبلك الخير وين ما كان يا سهام )

يوم عرسي كان يوم مميز يوم هادي كل شي فيه منظم مرتب واهم ايشي انه انس جنبي
انس ابن عمي خطبني وانا بسن الطفولة كان خايف حدا يسرقني منه او يمكن هيك النصيب بده
حياتي مع انس كانت هادية متله بتشبه بكل شي كانت مستقرة لابعد حد
انا بطبعي كنت انسانة رايقة وانس بيملك نفس صفاتي
مع دار حما بيجننو ما بيزعلوني بكلمة
حماتي بتكون مرت عمي انسانة بتخاف الله ومحترمة كتير
كنت حسها امي التانية بعمري ما حسيت حالي كنة لا بالعكس كنت وحدة من بناتها
مرت الايام وحملت بابني الاول
لما بقولو فرحة البكر بتختلف عن اي فرحة ما كذبو
عيوني كانت تلمع كل ما بحط ايدي على بطني وبحاكي ابني
كنت كل ليلة حاكيه ولما يجي انس من شغله نقعد سوا وخليه يحكي مع ابنه بالاول كان انس يسايرني بس بعدين هو صار يجي ويحط ايده على بطني ويقول لابني
( يلا بابا تعا لا تطول كتير)

سهام( انس تعا امسكني مو قادرة اسند طولي )
ركض انس ناحي ومسكني ( سهام قوليلي فيكي شي)
سهام( والله ما بعرف حاسة الدنيا كلها عم تدور )
انس( خلص ارتاحي هاد اكيد من الحمل
الله يعينك ربنا سبحانه وتعالى قال وهن على وهن
لهيك ما بدي اياكي تتعبي حالك ابدا )
سمعت كلام انس وريحت حالي بس حالتي من سيء لاسوء حتى اخدني انس ورحنا عالمشفى واكتشفت انه معي ضغط حمل وضغطي عالي كتير وللاسف خسرت ابني
شعور كتير بشع وكتير صعب ابنك الي عم يكبر جوا احشائك فجأة ما عاد موجود
تحاملت على وجعي وودعت ابني الي ما نولد وحطيت عيوني بعين الله وقلتله يا رب ما خاب من رجاك
حملت للمرة التانية وهالمرة حاولت ما علق حالي باللي ببطني خفت ارجع اخسره مرة تانية والي خفت منه صار
نزلت للمرة التانية وودعت ابن تاني الي طير من طيور الجنة
بعدها عرفت انه انا صار معي ضغط ولازم استمر عالعلاج وتابعه
وبعد كم شهر كنت حامل
صليت كتير ودعيت كتير اشوف الي ببطني على ايدي
والحمد لله جبت بنتي ياسمين
كانت اول فرحتي ،،،، طفلة صغيرة ايديها صغار ناعمة متل الورد وكل الي حوليها مبسوطين الا اخي زيد
ما كان عطبيعته متل الي صاير معه شي او تعبان من شي
ما كان بيحكي وبيضحك متل ما بنعرفه
تجاهلت الموضوع وقلت ما بدي اضغطه لبعد كم يوم دقت علي امي بتبكي بحرقة تلبكت ما عرفت رد عليها من الرعبة
سهام( امي اهدي شوي خبريني شو في شو صاير )
امي( ززززز زي زيد يا سهام
اخوكي مريض طلع عنده فشل كلوي قبل شوي كنا عند الدكتور وخبرنا انه زيد معه فشل كلوي ولازم يصير يغسل كلى
متخيلة شب لسا ما كمل العشرين بده يغسل كلى )
ما عرفت وقتها كيف بدي واسيها ولا واسي حالي
حجم المصيبة كبير والله كبير صبرت امي بالي قدرت عليه
وصرنا نروح نشوف زيد وهو عم يغسل
نحاول نخفف عنه ونسنده بس كان وجهه مفشول خايف
ومتألم كتير
جسمه ما عاد تحمل غسيل لحتى امي واهلي قررو يزرعولوه كلى
وبالفعل عملو كل الفحوصات اللازمة لزراعة الكلى وطلعت امي الشخص الوحيد الي بتطابق معه
واجا يوم العملية
يا الله ما اصعبه من يوم خوف رهيب تملكني انا واخواتي
من ناح امي ومن ناحية تانية اخي
تمت العملية ونقلو اخي عالعناية المركزة وكان بكل دقيقة بتمر يتعب اكتر
وجهه اصفر ،،، عيونه ذبلانين ،،، ما بيحكي مع حدا
لحتى مرقو عشرين يوم وانفجعنا كلنا بموتو
انا جربت شعور كيف الوحدة بتحسر ابنها وضناها
هاد وابني ما كنت ولدنيته لسا كيف امي الي حملت فيه وربته وكبرته
عاشت معه تفاصيل حياته
يااااااه ايام كتيرة كانت تقلي شو بدها تعمل بعرسه ومن وين بدها تخطبله
راااح زيد لعند ربه وما بايدنا نحكي الا الله يرحمه
مرحلة قاسية مرقت علينا كلنا حاولنا نجتازها بصبر
بعد فترة حملت وجبت بنتي التانية وبعدها البنت التالتة
قررت احط مانع للحمل شوي ليكبرو بناتي
بعد تقريبا اربع سنين شلت المانع كنت حابة جيب اخ لبناتي
وبعد ما شلته بشهرين صارت تظهر علي اعراض الحمل
دوخة مستمرة استفراغ على طول وحاسة بظغط على صدري وكنت دايما اجل روحتي عالدكتورة
سهام( انس بكرة بدي روح عند خالتي عازميتني عالغدا انا وخالاتي التانيات )
انس( ايه ما في مشكلة طبعا روحي )
ما كنت بعرف بهداك اليوم شو مخبالي ولا شو رح يصيرلي
بالبداية قعدنا انا وخالاتي ضحكنا ومزحنا بس بعد شوي صرت حس الدنيا كلها عم تدور فيي وصرت استفرغ كل شي اكلته
كل خالاتي لاموني وقتها كيف صابرة عحالي وما رحت عدكتور لهلا وانه الحمل بده متابعة
رجعت عالبيت كان مبين علي التعبوالارهاق
قرب انس لعندي حطيت راسي عكتفه ودمعت عيني من كتر التعب
انس( حضري حالك بكرة رح اخدك عالدكتورة مو بكيفك غصب عنك
اساسا انا خبرت اهلك انك تعبانة ومو قابلة تروحي عالدكتور ،،،، لازم تروحي عالاقل بنطمن عالجنين )
الي كنت مستغربته شي واحد
بالليل اتعب كتير وبالنهار روق وما احلاني

تاني نهار رحت عند اهلي وطلعت من عندهم عالدكتورة
حطيت ايدي على بطني بدي اسال الدكتورة عن الجنين بس فاجئتني لما قالتلي ( سهام انتي مو حامل )
سهام (كيف مو حامل ااانا
العادة الها قاطعتني اكتر من شهر ودايما دوخة واستفراغ )
الدكتور ( اكيد في سبب للي عم يصير معك بس عالاكيد مو حمل )
طلعت من عند الدكتور ورحنا نعمل فحوصات لنشوف شو سبب التعب
كنت قاعدة انا وامي وزوجي ناطرين النتيجة
( سهام للاسف انتي معك فشل كلوي
ولازم تبدي بالغسيل)
هاد كان اصعب خبر بسمعه بحياتي اول شي اطلعت على امي الي اختنقت بدمعتها بعرف بوقتها انه تذكرت اخي زيد
قلبت نظري على زوجي الي كان قاعد وحاطط ايديه على وجهه
مرقت حياتي كلها قدامي مرق طيف بناتي
يا ترا شو رح يصير فيهم اذا انا صرلي شي
بلشت استعد لروحتي عالمشفى
كتبولي دخول واجا علي اول يوم بغسل فيه كلى كان مؤلم كتير وبوجع كتير
والي بوجع اكتر واكتر نظرات الكل الك
هي شفقة هي خوف ما قدرت احللها
خلصت غسيل وكنت متنشطة كتير حتى بتذكر وقتها اني خلصت جوعانة وبدي اكل
كنت مفكرة انه الموضوع انتهى هيك ياااااه طلع لسا هاد بداية المشوار
بعد يومين خبرني ابي انه طلعلي بمشفى خاص قريبة عشغله ورح يصير هو ياخدني ويجيبني
توكلت عربنا ورحت مع ابي
مشفى كبير وفخم اول ما وصلت عالباب شفت العم سيد
انسان كبير بيشتغل بالمشفى
اطلع فيي وقلي يا بنتي لا تخافي اولها صعبة بس بعدين بتهون وانا هون اعتبريني متل والدك
دخلنا لجوا وفتنا عمكتب المديرة كانت انسانة مقدرة ومحترمة كتير سلمت عليها ودموعي عم يهرو لوحدهم
مسكت ايدي وقالتلي لا تبكي يا سهام
تفاقيد الله كلها رحمة
هزيت براسي ( ونعم بالله )
اجت الممرضة واخدتني على غرفة الغسيل وصارت تعرفني عالممرضين الي هناك
ووقتها طلعت من نصيب الممرض حازم حتى يصير يشبكني عجهاز الغسيل والممرض حازم كان انسان عصبي شوي كل مرة كان يشبكني فيها ازعل ما بدي هو يشبكني بس كان طيب كتير
وتعرفت كمان على رفقاتي هناك ام وليد وسناء
ما بعرف كيف ونحنا بالمرض صرنا رفقة وحبايب
وجعي نفس وجعهم
المنا واحد
ومرضنا واحد
ببداية الغسيل كنت اتعب كتير لانه جسمي لسا مو متعود
عهيك جهاز
برباشين بينوصلو بجسمك واحد بياخد الدم الفاسد والتاني برجع لجسمك الدم النظيف
عدا انه مرضى غسيل الكلى ممنوع عنهم كتير اكلات
فكان الوضع صعب كتير بس دايما احكي يا رب
اكتر شي كان خانقني هو غربتي عن بناتي
انا موجودة بينهم بس مو قادرة قوم فيهم ولا قادرة اعتني فيهم هاي من اصعب انواع الغربة تكون موجود وما تكون بنفس الوقت
كل الي كانو يغسلو معي كانو رفقة مع بعض يفطرو سوا
ويقعدو سوا حتى انا مرة على مرة صرت اكل معهم واحكي معهم
كلهم كانو يغسلو وهم بيضحكو مبسوطين
صبية صغيرة لسا بالمدرسة
وحدة متزوجة وعندها ولاد
شب باول عمره
رجال كبير بالعمر
طيب وانا لمتى رح ابقى مكتئبة هيك لمتى بدي اهمل بناتي وزواجي لمتى بدي ظل ابكي وصرخ لازم اوقف على حيلي
ام وليد ( سوسو انتي ليش ما بتفكري تزرعي)
سهام ( مستحيل ولا يمكن فكر بالزراعة )
ام وليد( انا ان شاء الله ناوية ازرع ابني بده يتبرعلي)
سهام ( الله يكملها معك على خير وتقومي بالسلامة يا رب)
فرحة ام وليد كانت كبيرة كتير مسكينة كانت ناطرة بالساعة وبالدقيقة اليوم الي بتخلص فيه
بس عند اخر فحص ما زبط تاخد من ابنها كلية
يا الله شو حسيت بوجعها يومها حسيت قديه الانسان بيمشي طريق طووووووويل ليوصل لهدفه وبعدين بينتهي الطريق والهدف مختفي

سهام ( مرحبا يا خالة هي بنتك )
ام جوان ( اه بنتي عمرها 88 سنين تعرضنا لحادث سير وانصابت بكليتها وهيها متل ما انتي شايفة انحرمت كل شي وعم تغسل)

الي بشوف مصيبة غيره بتهون عليه مصيبته وبهون عليه وجعه
صاحبت ورود المشفى وكنت كل يوم احكي معهم واحكيلهم عن المي والمواقف الي مريت فيها
كتير من المواقف صارت معها وبكل مرة كنت امرض كتير
يوم وفاة جدي تعبت جدا ونقلوني عالمشفى محاملة
يوم ما انسة بنتي طلبتني عالمدرسة لانه بنتي كتير متراجعة بدروسها ولما عرفت عن وضعي اطلعت علي بنظرة شفقة ولا يمكن انسى هديك النظرة لهلا
يوم ما شفت معي صبية بتغسل وحامل استغربت كتير
وقررت روح عالدكتورة حتى اسالها ليش انا قاطعتني مع انه في بنات بيغسلو وحوامل ووبعد الفحوصات تبين اني حالة نادرة واحتمال كبير ما عاد تجيني بعد هيك
يوم لما غيرولي الوصلة الي كانو يشبكو منها
كنت اشبك من ايدي وصارو يشبكولي من رقبتي خوف من انه الوصلة تلتهب حسيت روحي بتطلع وهي مطرحها
بتذكر كل مرة كنت ازرع ظل ابكي وصرخ لحتى خلص
بتذكر وحدة زوجي وبناتي كل احد وثلاتا وخميس يوم ما بغيل
وبتذكر باليوم الي ما بكون فيه غسيل لما روح عمركز تحفيظ القران قديه بكون مبسوطة وبدي كل ايامي تظل راحة وروح عالمركز ما بدي اغسل ما بدي بس شو طالع بايدي

ووبتذكر موقف غير من حياتي يوم عرس اخي تعبت كتير كتير شكلي مكترة سوائل وطلعت عالرئة حملوني عالمشفى وانا حاطة بين عيوني اني مش راجعة خلص رح موت
تمنيت لو بقدر ازرع بس من مين امي اعطت اخي
وابي وزوجي دمهم مو متل دمي
ما في حدا او هيك كنت مفكرة
صحيت بعد اربع ساعات تعبانة لقيت اخي فوق راسي وهي كانت اول مرة بشوفه جنبي من اول مرضي
كان بيبكي ودموعه عم تنزل على جبيني
( سهام دمي طابق دمك رح اعطيكي كليتي)
خفت كتير من اني اخطي هيك خطوة
خفت عحالي وعلى اخي وخفت على امي هي مو حمل صدمة تفقد فيها حدا منا
حاولت امنع اخي من هيك خطوة لانه شب لسا 21 سنة والعمر لسا قدامه
بس اصر كتير عموقفه وقلي سهام الانسان لما بينوجع بيحكي ااااخ وانا لبيت ندائك رح اعطيكي كليتي

بلشنا بسلسلة الفحوصات
خوف رعب الفحوصات بدها تسع شهور تقريبا ووممكن على اخر فحص تفشل وومكن بالعملية يخرب كل شي
حتى بعد العملية ممكن الجسم ما يستقبل

خلصنا فحوصات وكان كل شي تمام ما بنسى قديه مجد اخي تحمل من غز ابر كرمالي
تحدد موعد العملية بعد يومين
حسيت الحامي عم بقرب ،،،، رحت عغرفة بناتي لضمهم وشمهم لقيت بنتي الصغيرة ساخنة كتير
اخدناها عالمشفى كان معها جدري وبهالحالة دخلت بمتاهة جديدة لازم يتاكدو اني مجدرة زمان حتى ما تفشل العملية
الحمد لله كل شي كان عم بتيسر

ليوم العملية
قبل ما نفوت لجوا شفت صبية قاعدة هي واخوها جاي لتتبرع لاخوها بكليتها
اطلع فيني اسامة وقلي ( ديري بالك عالكلية الي رح تاخديها مو كل يوم رح تلاقي حدا يتبرعلك انا امي تبرعتلي من عشر سنين وما حافظت عليها وهلا رجعت مرة تانية لهون )

كلامه بقي براسي عندي مشوار طويل بعد الزراعة لازم طل اشرب مي ودايما مواظبة عالدوا هاد عدا تلت شهور رح ابقى بالمشفى منعزلة لانه مناعتي بتكون ضعيفة

نمت عسرير ومجد عسرير ،،،، مسكت ايده
سهام( مجد خايف اذا خايف لسا في وقت بنلغي)
مجد( توكلي على الله اختي قولي يا رب )

تمت العملية ولله الحمد كانت ناجحة
بقيت بعدها فترة تلت شهور منعزلة عن كل شي شوف اهلي من بعيد واهم شي عندي كان اطمن على مجد
والحمد لله كان وضعه منيح
الدعاء ساعدني كتير لاتجاوز محنتي واقدر عليها
كتير حياتي تغيرت بعد الزراعة حسيت وكاني انخلقت من جديد
بحمد الله انه اعطاني اهل متل اهلي وقفو معي بكل شي
وزوج كان عون وسند الي دايما
واخ تحمل وجع والم العملية كرمالي
الحمد لله الحمد لله دائما وابدا
مجد ( سوسو كيفك هلا )
سهام ( بخير يا مجودة بتعرف انت هلا في شي منك جواتي رح حافظ مزبوط عكليتك )
مجد( ههههههههههه ايوا ديري بالك مزبوط عليها ها )
شو بدي قلك )
سهام( ايوا في بتمك حكي هات لشوف )
مجد( في صبية عاجبتني وحابب اتقدملها شو رايك تروحي معي تشوفيها )
قربت لعنده وحضنته ( انا بوثق باختياراتك اذا عاجبتك اتكل على الله)
مجد( رح خبر امي ونروح نشوفها
صحيح سهام بتتذكري اسامة الشب الي شفناه بده يزرع بالمشفى توفى يا حرام )
سهاااام( ااااخ الله يرحمه ويغفرله ويرحم اخي زيد يا رب)
رجائي من كل صبية قرات قصتي تدعي لاخي زيد بالرحمة وهاد طلب من امي كمان
حبيت قلكم قصتي لعل وعسى كون سبب بتحلى اي حدا فيكم بالصبر والقوة