الأقارب عقارب من قصص الأعضاء شاركنا برأيك

نقدم لكم هذه القصة الحقيقية من قسم المنوعات في زاكي, لنتابع أعزاءنا القراء, وننتظر رأيكم بالتعليقات.

#الاقارب_عقارب

وهيك صارت اغراض الرحلة كلها جاهزة
سماح( امي مين رح يروح معنا عالرحلة )
امي( ما حدا حبيبتي احنا ودار اخوكي )
سماح ( ااايه حلو بنبسط فيها انا لمرت اخي )
اني( ااايه حبيبتي الله يخليكي هي لسا جديدة عنا واكيد بتخجل منا مو ماخدة علينا كتير بدي منك انتي واختك هنادي تديروبالكم عليها وتصاحبوها حرام )
سماح ( يييييي الف طلب متل هالطلب ولا يهمك
بعدين بكفي انها مرت حازم اغلى واحلى اخ بالدنيا )

هي كانت عيلتنا وهاد هو جو العيلة عنا
دايما مبسوطين ما بنزعل من حدا ولا حدا بيزعل منا
متفاهمين بكل شي عيلتنا ما بسودها الا المودة والرحمة والحب عيلة ملتزمة الحمد لله

طلعنا احنا والعيلة بالرحلة وكنا كتير مبسوطين
غنينا ولعبنا وضحكنا وابي وامي بيطلعو علينا مبسوطين كل شوي بسمع ابي بقول الله يديم السعادة عليكم
وما يحرمني من جمعتكم سوا
رجعنا من الرحلة تعبانين ما صدقت شوف السرير قدامي وارتمي فيه وما فقت الا تاني يوم عصوت امي بتحاكي وحدة بدها تروح تشوف بنتها لاخي سامر
سماح ( يسعدلي صباحك ام حازم )
امي( يسعدلي صباحك سموحة )
سماح( شربتي قهوتك ولا بنشربها سوا )
امي( يلا حطي الغلاية وتعي احكيلك عن مواصفات العروس الي رايحين نشوفها اليوم )
سماح( يا رب تزبط معه هالمرة مو معقول قديه صار شايف عرايس وما تزبط معه )
امي( ااايه والله صرت شايفتله اكتر من عشرين بنت ولا وحدة تيسرت لك حتى انتي واختك طريقكم معركسة
والله حابة افرح فيكم قبل مماتي)
سماح( بعيد الشر عنك امي الله يعطيكي طولة العمر وتفرحي فينا كلنا لما النصيب بيجي ما حدا بيوقف بوجهه
بعدين انا واختي لسا ما النا شي مخلصين جامعة اصبري شوي وما رح تلحقي عرسان رح يكونو مصفوفين طوابير )
كنت لسا عم حاكي امي لما فات اخي سامر لعنا وجهه ما عم يتفسر والشرار بيقدح من عيونه قدح

امي( شو في لك امي ليش هيك مدايق )
سامر( والله خايف على ابي وعلى صحته)
امي( ليش ماله ابوك )
سامر ( ااااخ يا امي هاي خامس صفقة بتطير من ايدنا
ما عم بزبط الشغل ابدا ما عم بعرف ليش
عم بنقدم احسن الاسعار واجود الانواع وما حدا بقرب علينا ولا حدا بيشتري منا طيب ليش ما عم افهم
والله كان اسمنا متل العلم بالسوق شو صار ما بعرف
المشكلة مو هون المشكلة اذا بقي الحال هيك رح نضطر نبيع المحل ما عم يجيب همه لانه )
امي( يييييي بعيد الشر هاد المحل هو الي مطعمينا ومشربنا
يا ربي شو صرلنا )

كنت عم اسمع كلام امي واخي وغص بدمعتي واسكت
يا الله كيف صرنا هيك بس كنت ارجع قول المصاري وسخ الدنيا المهم احنا العيلة بخير وصحة وما بدنا شي تاني

بعدشوي رجع ابي عالبيت ومعه اخي حازم
ابي( قلتلك انت الي خربت الصفقة لك ما عم تعرف تتعامل مع الزباين اتركهم لا تحكي معهم )
حازم ( ابي شو صرلك انا دايما بحكي مع الزابين بس ما حدا عم يقبل يشتري منا تقول عين وصابتنا)
عليت اصوات ابي واخي ووصلت بينهم للشيطان الرجيم
حتى انه ابي مد ايده على اخي
حازم عزت عليه نفسه وترك البيت وظل طالع
اطلعت بالسقف معقول لسا من شوي كنت قول المهم احنا العيلة مع بعض كويسين ليه هيك كل شي عم ينقلب وعم يتغير
بس مع كل الظروف الصعبة الي كانت محاوطتنا
كنا نحاول نخفف على امي وابي
خاصة بابا لما شاف شقا عمره وتعبه عم يروحو من بين ايديهم صحته كانت عم تتراجع ووضعه من سيء لاسوء

اقترحت على امي تروح تشوف العروس الجديدة لسامر بلكي لما بتفوت على بيتنا هالبنت بيفوت معها الفرح وبتتحسن احوالنا شوي
ووالله امي ما كذبت خبر اخدت موعد من الجماعة وراحت شافت البنت بس مسكينة رجعت مدايقة وزعلانة لانه اهل البنت قالولها ما الكم عنا نصيب
وكالعادة حطيت ايدي على امي واسيها وهديها وما عندي غير كلمة ( وكلي امرك لربنا الا ما يفرجها )

المسا عملت كاسة شاي وقعدت عالبرندة مع اختي هنادي
على ضو القمر
سماح ( هنادي فكرك كل شي بصير معنا طبيعي )
هنادي( والله ما بعرف يا سماح شو بدي اقلك بس انا شاكة انه في حدا عامللنا عمل مو معقول اوضاعنا المادية كل مالها للاسوء صحة ابوكي وامك عم تتراجع بشكل ملحوظ
اخوكي سامر صار شايف نص بنات البلد ولا وحدة قابلة فيه مع انه مهندس وجمال وكامل مكمل
وانا وانتي ادب واخلاق وعلم ولهلا ما حدا دق بابنا طيب ليش منشان الله ليش
لك حتى حازم مسكين شوفتي هالمشكلة الي صارت بينه وبين بابا )
سماح( والله كلامك مزبوط بس مين بده يعمللنا شي احنا مالنا اعداء مع حدا وعلاقتنا مع الكل طيبة )
هنادي( ما انا هاد الي مجنني احسن شي قومي ننام )

قمت توضيت وصليت قيام ليل ونمت
لعله بكره يكون افضل
تاني يوم اجت لعنا جميلة مرت اختي هي وحازم لحتى يصالح بابا
كل الليل جميلة وهي تزن على راس حازم لحتى يجي يصالح بابا
هالجميلة ما في منها قلبها طيب وخدومة كتير
معانا عالحلوة والمرة ولا بتزعل حدا منا ،،،،، كتير اوقات بدايق وبلجألها ودايما بتخفف عني وبتوقف جنبي

هنادي( تعالي تعالي)
سماح( يييييي مالك جاريتني هيك من ايدي شو في)
هنادي( هاد عنوان شيخ دلتني عليه وحدة رفيقتي وقالتلي انه بعرف اذا معمولك عمل وبقدر باذن الله يفكه بالقران )
سماح( يا عليكي ما اقواكي مو خايفة تروحيله (
هنادي( يييييي شو جبانة احنا شو بدنا نعمل يعني بعدين ما بنطول ساعة زمن وبنرجع )

صحيح انا كنت خايفة من الروحة عالشيخ بس في شي جواتي كان عم يقلي روحي لتعرفي شو عم يصير حولك
لبست ورحت انا وهنادي عند الشيخ
كان مبين عليه ملتزم وما بيحكي الا بالقران
واول ما صار يقرا علينا حسيت بخوف ورعشة رهيبة
بعد ما انتهى كان قاعد ومبين في بتمه حكي
لكن اكتفى بقول ( انتو التنتين معموللكم سحر ربط عن الزواج
بدي منكم تواظبو على قراءة سورة البقرة ولمدة اربعين يوم وان شاء الله بعدها اموركم بتنحل )

واظبت على قراءة سورة البقرة انا واختي وبالفعل اختي انخطبت بعد مدة وتزوجت وانا لحقتها
هنادي كان زوجها بسيط ومحترم
اما انا متل ما بقولو كان كامل مكمل علم ومال وعز وتعامل حسن
حبيته قد ما في بالدنيا حب وهو بادلني هالحب بحب اكبر منه
شو ما اطلب منه يجبلي وما كنت اسمع منه الا الكلام الحلو والطيب
بس هالحالة ما دامت الا لبعد شهر واحد من الزواج
ورجعت الغيمة السودة فوق روسنا
حاولت كتير اتعامل معه وافهم منه سبب هالتغيير بس ما كان يجاوبني غير بالسب والبهادل
تطورت المشاكل بيني وبينه وزوجي الي كنت شايفته بالدنيا صار بخوني وقدام عيني ما تفرق معه
يكون قاعد معي وبيحاكي وحدة تانية عالتقلون قدامي
وكل شوي يقلي هاد الي عندي عجبك اهلا وسهلا ما عجبك الباب بفوت جمل بس كنت اصبر واتحمل كرمال ابني الي ببطني الي لسا ما انولد ولا شاف شي بالحياة

كان عم يبعد عني اكتر واكتر وكل ما حاول قرب منه يبعدني اكتر لحتى صرنا متل الاخوان بالبيت
وتفاصيل علاقتنا الاقيه ناشرها بين الناس
حاولت اصلحه كتير بس كان كل ماله عم يخرب اكتر
لحتى تخانقنا بيوم ومد ايده علي
جرحني بكرامتي كتير تحملت معه كتير بس ما عاد اقدر اكتر من هيك
لملمت تيابي ورحت عند بيت اهلي وانا بالطريق شفت جارتنا مروحة من بيت اخي حازم بالبداية استغربت بس بعدين قلت عادي جمول مرت اخي حبابة والكل بحبها

اول ما وصلت بيت اهلي لقيت اختي هنادي حردانة عند اهلي لانها متخانقة هي وزوجها كمان
امي اول ما شافتني صارت تضرب على وجهها وتبكي
ضربتين عالراس بوجعو
حكيت لبابا ولاخواني كل شي كان زوجي يعمله معي وقديه صبرت عليه وقديه تحملت ذل ومسبات واهانة

ضمتني جميلة مرت حازم ومسحتلي دموعي وقالتلي ( لا تخافي حبيبتي سماح ابوكي واخوانك وراكي )
مسحت دموعي واطلعت فيها ( حبيبتي جمول والله انتي اختي الي ما ولدتها امي ) بعدين انتبهت لشغلة
لك جميلة مالك لابسة تيابك بالعكس )
جميلة ( هههههههههه اي شو بعرفني قلي حازم انك جيتي حردانة ما حسيت عحالي الا ولابسة ملابسي بالشقلوب وجيت
يلا قومي هلا عالغدا انا طبخت اليوم للجميع بعرف مرت عمي تعبانة ومو قادرة تطبخ )
سماح( الله يخليلنا اياكي يا جميلة وما يحرمنا منك )

كانت جميلة محضرة سفرة طويلة عريضة وما مقصرة
بس واحنا عم ناكل تعب اخي اخي حازم فجأة وصار يستفزغ
الا استغربته ولاول مرة بشوف حدا بيستفرغ دم
خفت كتير عليه بس هو بعد نص ساعة تقريبا ارتاح وهدي
ما كنت وقتها قادرة فكر بشي غير بمصيبتي
خاصة لما كترت جيات اهل زوجي لعنا حتى يرجعوني ولما رفضت بالبداية ارجع
ما تركو علي كلمة عاطلة وما قالوها اتهموني باتهامات ما بترضاها لعدوك
زاد همي جوا قلبي كتير بس دايما كنت صبر حالي بالصلاة وبالقرأن واتحصن فيهم
بس تعبت تعبت ما عدت قادرة اتحمل
ظلم ،،،،، فقر ،،،،،، وضع البيت متوتر ،،،،، واخر شي كنت حس حدا بيلاحقني دايما وبينادي باسمي بيقعد معي بياكل معي واكتر شي بيتمكن مني لما كون معذورة قربت جن وجنن العيلة كلها معي
وجهي صار اصفر كتير ونفسيتي محطمة عالاخر

صحيح كنت غرقانة بهمومي بس في شي لفت انتباهي كتير
هو لبس جميلة لتيابها بالعكس
دايما لابستهم بالشقلوب وكل ما قلها تتحجج بشي شكل
نغزني قلبي حسيت في شي مو طبيعي بالموضوع
قرات عن النت عن الموضوع
للاسف اكتشفت انه لبس التياب بالعكس بدل على افعال شيطانية وافعال غلط بيرتكبها صاحبها
حكيت لامي واختي هنادي وقفو ضدي وعارضوني
قالولي مستحيل هي جميلة الي دايما واقفة معنا
بعمرها ما اذتنا ولا بحياتها دايقتنا وعيب عليكي انتي يا سماح تحكي هيك ولا بدك تخربي بيت اخوكي متل ما بيتك انخرب
جرحني كلامهم كتير بس في شي جواتي خلاني حس انه امي واختي مسيرات وما عم يتصرفو من عقلهم
ما بعرف ليش شكيت بجميلة
يمكن لانه كلنا بالعيلة عم ننأذى الا هي
ويمكن لانه كل الناس اصحابنا واحبابنا عم ينفرو منا ويتقربلوها ،،،،،، نفسي اشوفها التقت بحدا وما بحبها
طريقة مكياجها والاهم لبسها لتيابها بالعكس )

خطرلي فكرة اشتري كاميرا وحطها بالخفية بالبيت
لاشوف اذا بصير شي من ورانا
اول ايام ما شفت شي ولا قدرت اكتشف اي شي حتى صرت حس اني ظلمتها لجميلة
بس بعد كم يوم كنا طالعين كلنا من البيت ولما رجعت خطرلي افتح وشوف اذا صار شي بغيابي
شفت جميلة داخلة عالبيت بغيابنا وقلبت الكنابية على راسها وعمالة بالكنابية فتحة
فتحتها وحطت جواها كيس اسود
لما شفت هالشوفة رحت ما انجلط احترت بحالي شو اعمل
ناديت على امي وابي واخواتي وفرجيتهم الي شفته
لهلا ما بنسى شهقة امي لما شافت الفيديو
معقول الي اعتبرناها منا وفينا هيك تعمل
معقول اقرب الناس النا يأذينا
قام اخي سامر وفتح الكنابية وطلع الكيس
سامر( ما رح نفتحه ولا نعمل شي بكرة رح نروح عند رفيق الي بيعرف شيخ وبنساله شو هاد )
ابي( اهم شي حازم وهالملعونة جميلة ما يعرفو بشي لحتى نعرف شو هاد )
بالفعل تاني نهار رحنا عالشيخ
طلع سحر من اشد انواع السحر بيسموه ( السحر الاسود ) وجميلة عاملتو بايدها لانه مرت اخي شيطانة من الطراز الاول وبتتعامل بالسحر بايدها
عاملة لبابا يفلس وينأذى بصحته
عاملة لامي ما تشوف العافية
ولالي ولاختي ولسامر وقف حال ووقف عن الزواج
ووعاملة الها كل الناس يحبوها ويشوفها ملاك
بس كل هاد مقدور عليه بالمواظبة عالقران والصلاة والعلاج
المشكلة باخي حازم زوجها بده علاج طويل لانه عاملتله سحر بكميات كبيرة ومشربته اشياء كتيرة
واهم خطوة بطريق علاجنا هي ما تعرف حتى ما تفركش علينا العلاج لانه كل ما تحس انا كشفناها كانت ترجع تعمل سحر اقوى منه

قال تعالى

وَاتَّبَعُواْ مَا تَتْلُواْ الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَـكِنَّ الشَّيْاطِينَ كَفَرُواْ يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّى يَقُولاَ إِنَّمَا نَحْنُ فِتْنَةٌ فَلاَ تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ وَمَا هُم بِضَآرِّينَ بِهِ مِنْ أَحَدٍ إِلاَّ بِإِذْنِ اللّهِ وَيَتَعَلَّمُونَ مَا يَضُرُّهُمْ وَلاَ يَنفَعُهُمْ وَلَقَدْ عَلِمُواْ لَمَنِ اشْتَرَاهُ مَا لَهُ فِي الآخِرَةِ مِنْ خَلاَقٍ وَلَبِئْسَ مَا شَرَوْاْ بِهِ أَنفُسَهُمْ لَوْ كَانُواْ يَعْلَمُونَ

صدق الله العظيم

بس السحر موجود بكل زمان ومكان لكن طول ما احنا مع ربنا رح ننتصر على جميلة وامثالها والسحر رح ينقلب عليها لانه بعمره الظلم ما انتصر عالحق
هي ما عادت قوية متل قبل لانه صارت كل ما تحطلنا سحر نشوفه ونكشفه
ما تركت شي ما حطته ( شعر محروق ،،،،خيطان مربطة ،،،، مسامير )
حسبي الله ونعم الوكيل فيها قلبت حياتنا فوقاني تحتاني
هي واهلها وال هم بالاساس بكونو دار عمي وهاد كان اكتر شي مفجع بالقصة
انا هلا اطلقت من زوجي لانه الي بيحكي على مرته بيوم بالعاطل ما بيتأمنله ابدا بس لسا المحاكم ما خلصت بينا ولو انه قلبي محروق على ابني الصغير يعيش بلا اب بس هاد حال الدنيا

اسرة قصص من الواقع انا لجأت الكم وطلبت تنكتب قصتي بقصص الاعضاء لسببين الاول تدعولي ربنا يفرجها علي وعلى اهلي والله ذاقو الويل بهالكم سنة ليلهم مو ليل ونهارهم ما بتطلع عليه الشمس
والسبب التاني حتى تديرو بالكم وبعمركم ما تأمنو لحدا قد ما كان قريب عليكم لانه في كتير ناس ما بخافو الله ومتل ما بقول المثل ( خاف من عدوك مرة ومن صديق الف مرة)
وربي يبعد عنكم اولاد وبنات الحرام

#انتهت