قصة جريمة غير تامة الحلقة الثالثة
هذه القصة مقدمة لكم من قسم المنوعات في زاكي, متابعة ممتعة نرجوها لكم, وننتظرر رأيكم في التعليقات.
#قصص_من_الواقع
#جريمة_غير_تامة الحلقة الثالثة
#بقلم_حلا_الشويكي
هيثم بالمكتب وقرب عالباب مشان يفتحو ويطلع من المكتب بس سمع هند عم تحكي عالموبايل
هند : لك هيثم بيكون خطيبا .. لا تأذوه كتير بحبو .. ليك خلص لازم سكر هلأ بخاف حد يسمعني لا تخاف ما رح جيب سيرتك هاد يلي مهتملو انت تضرب بهالشكل يلا سلام
( هيثم عم يسمع بس ما عم يفهم شي .. بس عم ينطر يحققو معا على احر من الجمر )
هيثم : مرحبا سيادة المحقق .. ممكن ازورك بالمكتب عندي معلومات يمكن تفيدك
– تفضل عالمكتب الساعة 3 العصر .. بنطرك
هيثم : شكرا
=======================================
في بيت نهال ..
رن موبايل نهال وكان المتصل هيثم
هيثم : الو مرت عمي كيفك؟
نهال : تمام الحمد لله
هيثم : في جنبك حد ؟
نهال : لأ
هيثم : انا رح خبر المحقق بكلشي
نهال : بس …
هيثم : مشان ما نتحاسب كلنا بس ياخد اقوال الدكتور
نهال : اللي بتشوفو مناسب اعملو
======================================
زملاء رغد بالشغل …
احمد : بعد رغد الشركة ما عادت تنطاق .. صحيح كانت تجي عأساس بتشتغل وكانت تبقى عند الأستاذ هيثم بالمكتب .. بس كانت عطول تتذكرنا وتسلم علينا .. الله يرحمها
بكر : اه والله يا زلمة .. كانت كل ما تشوفني تحكيلي الله محيي فلسطين واهلها .. وكل ما تشوفني تحكيلي نفسي اتعلم لهجتكم .. وتضل تمزح معي وتدعي لفلسطين وسوريا كأنهم توأم .. اسمائهم تذكرها ورا بعض زي كأنهم توأم من رحم واحد
احمد : لك اكيد اخوان من رحم واحد .. من رحم العروبة والإنسانية من رحم المحبة والجمال
بكر : تسلم يا احمد والله كلكم ذوق .. بس شو بدنا بالحكي كانت وردة مفتحة .. بنت بتجنن الله يرحمها .. ما مسكوش القاتل؟
احمد : لسا بيحققو بالجريمة .. جايينا الدور بالتحقيق اصبر شوي ههههههه
بكر : لا احنا مش مشتبه فينا كنا كتير صحاب معها
احمد : والله انا سمعت انه التحقيق مع الكل هيك طلب الأستاذ هيثم من المحقق لأنه ما عم يقدرو يشكو بحدا الكل كان يحبا وما يريدلا الا الخير
=======================================
هيثم في مكتب المحقق ..
هيثم : وهاي هي كل القصة
– ليش ما خبرتني هالشي من الأول ؟
هيثم : والله انا ما فكرت الا بشي واحد بدي ينكشف الفاعل عن طريق القانون ويتحاسب لأني ازا مسكتو ما رح ارحمو ابدا
– بمين بتشك ؟
هيثم : الكل بالشركة كان يحبا حتى عيلتا الكل كان يحبا ما في حد ببالي
حط هيثم ايدو على جبينو
هيثم : بس يا سيدي في سكرتيرة مكتبي هي بنت عمرا بحيطان ال40 وما تزوجت .. وعندا عقدة من هالشي وكتير حكتلي انها بتحبني وحاولت قلعا من مكتبي بس كانت رغد دايما تتواسطلا لأخليا بالشغل مشان امها ست كبيرة وما حد بيصرف عليها الا هند
– كمان هالحكي جديد .. شبك استاذ هيثم !! ما عطيتنا بالبداية كل هالمعلومات ليش ؟ على كل حال التحقيق رح يكون مع كل موظفين الشركة لهيك خبرني هي مع مين كانت تتخانق اكتر شي منهن ؟ شي مرة حدا هددها بالقتل ؟ اي معلومة بسيطة ممكن توصلنا للفاعل
هيثم : والله يا سيادة المحقق رغد كانت تطيب الجرح .. كتير البنت رقيقة وناعمة ومسالمة والكل بيحبا
=======================================
في بيت ام سعيد …
نور : سعيد حبيبي .. انا حامل
سعيد : ح .. ح .. حامل ؟
نور : اي انا بجيب ولاد مو متل نج….
وقبل ما تكمل اسم نجوى حط سعيد ايدو على تم نور وشد وحكالها اخرسي بقا اخرسييييي
نجوى فاتت عليهن وهنن عم يحكو …
نجوى : تركا تحكي .. تركا تكمل عادي في الله سامع وعارف انها عم تجرحني بشي مو بإيدي .. دخيل اسمك ياربي انت ابتليتني وعبدك عايرني .. ربنا بينصف المظلوم ورح ياخدلي حقي منها
نور : …….
نجوى : ما بتخافي الله يبعتلك طفل معاق بسبب جرحك الي ؟؟ ما بتخافي من عدالة القدر !!
سعيد : مرت اخي نحنا بنعتذر لا تزعلي حقك علي .. وانتي يا نور ازا بسمع انك زعلتي نجوى ما رح يصيرلك خير ابدا
نجوى : مبروك الحمل .. بستاذن انا رح فوت ساعد مرت عمي بالمطبخ
=======================================
رجع هيثم عالمكتب ..
عم يروح ويجي بالمكتب ومتوتر .. ( مين ممكن يكوووون لك ميييين ؟؟؟ ) ضرب ايدو بالمكتب بعصبية
دق باب مكتبو وفاتت هيفا
هيفا : سووووربرااااايز هااااي هيثم
هيثم : هيفاااااا متى جيتي من السفر ؟
هيفا : مبارح جيت حاولت كتير دق لرغد بس موبايلها مغلق
هيثم : ر .. ر .. رغد !!!
هيفا : اي وينا ليش موبايلها مقفول ؟
هيثم : شو تشربي ؟
هيفا : على ذوقك
هيثم : كيف قهوتك ؟
هيفا : سادة
هيثم : تكرمي
هيفا : دقلي لرغد بدي شوفا اشتقتلا
هيثم : هيفا .. رغد ………
هيفا : شبها رغد ؟ زعلانه مني ما هيك ؟ والله قصرت معا بالفترة الأخيرة
هيثم : رغد انقتلت
هيفا : شووووو هههه عم تمزح ما ؟
هيثم : ……….
هيفا : (تبكي) كيف كيف ليش مين يلي بيقدر يقتل بنت متل رغد مين بيقدر يحقد على بنت بطيبتا ورقتا وحنانا !!!
=======================================
في التحقيق …
بكر : يا سيد المحقق والله رغد بتجنن .. بأذيهاش اصلا رغد كانت تحب تتعامل معي
– تتعامل معك بشو ؟
بكر : قصدي كانت تحب تحكي معي وطلبت مني تتعرف على اهلي لأنها بتحب اهل فلسطين
– وكم مرة طردك هيثم من الشركة ؟
بكر : ( حك راسو وتلبك ) بتذكرش كتير
– ليش ؟
بكر : …….
– لانك تعرضت لرغد !!
بكر : ما تعرضتلهاش ولا بعمري قربت عليها
– حبيتها
بكر : رغد بنت حلوة كتير وقلبها طيب .. حنونة ومرحة وطفولية وسرقت عقول وقلوب كل شباب الشركة بس مش معنى هيك اني تعرضتلها .. خطيبها حس اني بحبها وغار مني وطردني اكتر من مرة على أسباب ما بتستحق الطرد وكان يتحجج بشغلات بسيطة وكل مرة كانت تتواسطلي الآنسة رغد وترجعني .. اخر اشي الآنسة رغد صارت تتجنب تحكيلي صباح الخير وازا شافتني تسبق خطوتي بعشر خطوات عشان ما تتسبب بطردي من الشغل
– وين كنت بالوقت يلي صار فيه الحادث ؟
بكر : عند صديقي
– متأكد ؟
بكر : طبعا متأكد
وبعد التحقيق والتحري .. بالفعل طلع بكر ما الو دخل بجريمة قتل رغد
=======================================
في المشفى ….
هيثم : دكتور طمني عن حالة هيفا
الدكتور : انهيار عصبي اثر صدمة
هيثم : يعني فاقت فيني شوفها ؟؟
الدكتور : اعطيناها ابرة مهدئ وما رح تفيق لبعد 7 ساعات عالأقل
هيثم : شكرا دكتور
رفع الموبايل وعمل اتصال سريع
هيثم : اي .. هلا هي نايمة بس تفيق رح خبرا بس انتي متأكدة انها بتحفظ السر ؟ يعني بتوثقي فيها كل هالقد ؟ خلص ماشي برجع لعندها بس خلص شغلي ازا فاقت رح خبرا انا هلأ رايح عند مرت عمي (نهال) بدي شوف ازا لازما شي وكيف وضعها
=======================================
في بيت نهال …
نهال : هيثم .. انا اسفة عكل مرة جرحتك فيها .. ما كنت اعرف انك هالقد بتحب رغد بس انا …. ( تبكي ) مو بإيدي بس والله حبيتك وصرت متل ابني ما قصرت معي وعلى طول بتسأل عني .. انت كتير قلبك طيب وحنون
هيثم : طيب لو تحكيلي السبب يلي بكاكي هلأ
نهال : ………..