قصة خسارة عمر ننتظر تعليقاتكم

قصة خسارة عمر ننتظر تعليقاتكم
#خسارة_عمر_بقلم_حنين_طه
لقراء زاكي من قسم المنوعات

الجزء الاول 

زواجي تم بطريقة سريعة وتقليدية جدا
كنت بعرس لوحدة قريبتي شافتني امه للشب عجبتها اخدت رقم تلفون اهلي من امي وبعد بيومين رنت علينا اخدت موعد منا واجت هي واسامة ابنها 
اسامة كان شب بيشتغل تاجر طويل كتير اسمراني
اصلع وعيونه سود مبدئيا ما عجبني كشكل خاصة اني بنت بعيون خضر واسعة بشرة حنطية وشعر اسود طويل كنت بشوف حالي حلوة ايه حلوة كتير

داليا : امي قلتلك ما بدي ما بدي ما عجبني حرام عليكي
انا بنتك حبيبتك ليش بدك ترميني هالرمية

امي: لك يا بنتي افهمي علي الرجال بعمره ما عابه شكله
الشي الوحيد الي بعيب الزلمة هو جيبته
معك قرش بتسوى قرش ليكني انا اطلعي فيني وشوفي حالتي شوفي قديه انا تعبت مع ابوكي كنت دايما شوف خالاتك وهم باحسن حال كانو من بلد لبلد وانا شو اطلع عليهم واتحسر لا تعيشي متلي يا داليا برضاي عليكي
لا تدوقي الي انا دقته

داليا: بس يا امي ليش ما عم تفهمي علي
خلص لا تزعلي انا موافقة على اسامة

بس اعطيت الموافقة لامي قامت وصارت تزغرد ومسكت تلفونها ودقت عكل خالاتي وبناتهم لتخبرهم اني رح انخطب عن قريب
كنت مستغربة من كمية الفرح الي امي عايشة فيها لاني وافقت على اسامة مع انه انا ما كنت مرتاحة في شي داخلي جواتي كان مو مرتاح بس مع هيك حاولت اتجاهل احساسي وامشي ورا سعادة امي
والي خلاني ارتاح اكتر معاملة اسامة لالي كان طيب بشكل مو طبيعي شو ما قله يلبي
انخطبت انا واسامة وتفاجئت يوم الخطبة بعقد الماس لبسني اياه قدام الكل كان شي خيالي كل شي عم يقدمه كان عم يبهرني فيه ،،،، وطوال فترة الخطبة والهدايا ما وقفت
لحتى اجا يوم العرس وتزوجنا
فندق فخم اكل من احسن ما يكون معازيم من الطبقة المخملية كل شي كان متل الحلم (((( متل الحلم )

اسامة: دلول حبيبتي يلا قومي بكفي نوم

داليا: خليني نايمة والله ما شبعت نوم انا

اسامة: يا كسولة الساعة صارت 11 الظهر هلا بيوصلو اهلك واهلي يلا قومي شو ناسية انه اليوم صباحيتنا

قمت بسرعة عن التخت ركضت للعند المراية لحتى شوف مكياجي وشعري كان كله ملخبط والكحلة سايحة والمسكارة مخربطة عيوني واسامة وراي مكتف ايديه وبيضحك

داليا: يا الله منك طيب احكيلي انه وجهي ملخبط ومكياجي مو زابط
لفني بين ايديه
( انا مرتي حلوة كيف ما كانت
هلا المهم خلصي البسي وجهزي حالك بلا ما امي تشوفك هيك وتزوجني مرة تانية )

داليا: هلا هيك يا اسامة بتشوف اعطيني خمس دقايق ورح كون احلى من الحلا انطرني
بسرعة طالعته من الغرفة وفتحت خزانتي وصرت قلب بالخزانة لبست فستان اخضر يعكس علون عيوني
رفعت شعري بطريقة ناعمة ونزلت لعند اسامة كان عم يحكي تلفون مع حدا كلمات مو مفهومة
ما اعطيت الموضوع اي اهتمام لانه حسيت انه هي امور تجارة وشغل انا ما الي فيها

اسامة: حسنة

حسنة: نعم استاذ اسامة

اسامة: المدام هلا فاقت روحي حضريلها الفطور

حسنة: حاضر

راحت حسنة تحضر الفطور

داليا: ممممم اسامة ما في داعي هي تحضرلي الفطور انا كنت بروح بحضره خاصة انه الخالة حسنة مو صغيرة

اسامة: انتي ما تدخلي لما انا بقول تحضر الفطور يعني تحضر الفطور

داليا: بس اسامة انت اساسا ما سالتني اذا جوعانة اولا اذا حابة افطر او لا وكمان ما سالتني شو حابة افطر

اسامة: مممممم كانه ما سمعتيها طيب مع اني ما برجع بعيد الي بقوله بس لانه بعدك ما بتعرفيني رح ارجع عيد
لما انا بقول يتحضر الفطور يعني يتحضر

سكتت وما حبيت جادله كتير بس كنت مستغربة من ردة فعله ومن الطريقة الي حاكاني فيها
اجت الخالة حسنة معها صينية وفيها اكل ما بعرف ليش حسيت نفسي سدت عن كل شي
قعد اسامة عالكرسي الي جنبي وناطرني لخلص فطور
حمدت الله انه رن جرس البيت بهالوقت وقمنا لنرجب باهلي واهله
طول القعدة كان لطيف معي ما حاكاني بشي دايقني بس انا كنت نافرة منه وكل ما يحاول يحط ايديه علي اسحبها
اول ما روحو الناس من عنا قرب لعندي لمس شعري بايده
اسامة: الدرس التاني لما انا بحط ايدي عليكي لا تشيلها ابدا
يلا انتي تعبتي كتير اليوم قومي ارتاحي

بقدر قول اني صرت بعرف شخصية اسامة شخص ما بحب حدا يقله لا بحب رأيه يمشي بكل صغيرة وكبيرة
وانا ما من النوع العنيد كنت سايره بكل شي لهيك ما كان ابدا يزعلني ولا يدايقني

داليا: مممم اسامة وينك
وين معقول يروح هلا بنص الليل

قمت من مكاني ورحت لاشوفه وين احيانا كنت حس حالي بخاف نام بغرفتي لحالي اذا ما شفت اسامة جنبي
لانه البيت كان كبير كتير
صرت دور بالغرف غرفة غرفة
لحتى وصلت لعند باب مكتبه سمعت صوت ضحكه جوا المكتب مع صوت وحدة صوت عالي كتير
حطيت ايدي على ذاني ما كان بدي اسمع ابدا اي شي
معقول يخوني لحق يعمل هيك طيب مين هي الي عنده
وحتى لوبده يخوني ليش بنص بيتي وقدام عيوني
تخبيت عند طرف الدرج لحتى تطلع من عنده البنت اول ما انفتح الباب طلعت وحدة طويلة وشقرا بنت حلوة بس هيئتها مو هيئة وحدة مزبوطة
وصلها اسامة لباب البيت وانا قبل ما يرجع لغرفة النوم كنت نايمة فيها
فات هو لجوا عندي غير تيابه ولبس بيجامته وتسطح جنبي كنت حاسة عليه قاعد عم يدخن ويطلع بالسقف
كان بدي ابكي وانفجر بكى فيه ليش ليعمل هيك
بس خفت منه حاولت كون هادية لطلع الصبح وانا ما غمضتلي عين

اسامة: دلول فقتي شو ليه هيك عيونك منفخين

داليا: ما فيني شي تعبانة شوي ما عرفت نام الليلة منيح

اسامة: شو مقلقك حبيبتي

داليا: ما بعرف ما اجاني نوم وبس

اسامة: ممممم ليكي داليا حبيبتي بالتجارة وبشغلتي تحديدا رح تضطري تشوفي كتير شغلات وتسمعي كمان كتير شغلات
ليكي شو المطلوب منك يا مرتي الحلوة
تكوني ( لا تسمعي ولا تشوفي ولا تحكي )

داليا: ليش خنتني

اسامة: مو كل شي بتشوفيه بالظاهر بكون نفسه هو الحقيقي وانا قلتلك اياها لا تسالي عن اي شي بتشوفيه او بتسمعيه

داليا: بس انت زوجي يا اسامة ومن حقي اعرف عنك كل شي

اسامة: يلا حبيبتي عندي شغل
صحيح لا تنسي اليوم تعمليلي فاصوليا ورز كتير مشتهيها

قرب لعندي باسني عجبيني وراح

انكمشت على حالي بالغرفة وصرت ابكي كتير الخالة حسنة دقت علي الباب لافتحه وما قبلت
بعدها قمت غيرت تبابي وطلعت عند اهلي

امي: داليا امي قليلي شو مالك ليش لحتى جاية ومعك شنتة تيابك

داليا: انا بدي اطلق

صارت امي تضرب عراسها
امي: لك انتي جنيتي انهبلتي شي بدك تطلقي وترتمي بوجهي يا ويلك اذا ابوكي بيسمع هيك حكي والله ليدفنك مكانك

داليا: امي افهمي علي منشان الله انا ما بدي اطلق لانه جاي عبالي اتسمى مطلقة بدي اطلق لانه اسامة خاني
شفته مع وحدة

امي: شو خانك
ايه واذا يعني كل الزلام الهم هفواتهم وغلطاتهم بس الست الشاطرة هي الي بتجيب زوجها ليدها وما بتخليه يطلع لبرا
اما حلوة هي لسا كل ما بده يصير بينك وبين زوجك شي بدك تيجي تقليلي بدي اطلق

داليا: امي انتو ليش هيك ليش ما عم تفهمي علي ليش مو حاسة بالنار الي شاعلة جوا صدري لو نو شافني عم خونه بيرضى بهالشي

امي: اخرسي وليه البنت غير الشب
الشب شو ما عم ما حدا بيقدر يحكي عليه شي
ولا ناوية تتركيه لزوجك لبنات خالتك وعماتك وانتي تصفي عالرف ما ظل حدا بالدنيا ما حسدنا على زواجك من اسامة وانتي جاية بكل بساطة تقليلي بدي اطلق
زوجك بيعرف انك عندي

داليا: لا ما بيعرف ولا بدي اياه يعرف

تركت امي وفتت على الغرفة بمسح بدموعي سمعت امي من برا عم تحاكي اسامة وتقله اني جيت زيارة لعندها حتى نام كم يوم

المسا بعد ما روح ابي من شغله واحنا قاعدين بنتعشى اندق باب بيتنا وكان اسامة انا لما شفته ما عاد عرفت ابلع

اسامة: مسا الخير يا جماعة كملو اكلكم
دلول حبيبتي خبرتني انها جاية اليوم تنام عندكم بس انا ما فيني نام واقعد بلاها

ابي: يا عمي الله يديم المحبة شو بدنا احنا احسن من هيك

قعد اسامة شوي مع اهلي وجبت شنتة تيابي لحتى اطلع معهواحنا طالعين حط اسامة بايد ابي مبلغ مالي وكانه عم يدعس عليهم بهالفلوس
طول الطريق اسامة ما حكى شي ولا فتح تمه بحرف
حتى لما نزلنا انا ركضت لغرفتي لبست بيجامتي وقعدت على تختي ناطرته ليجي ناطرة مصيري
فات لعندي لحتى يلبس بيجامته

اسامة: ليش رحتي اليوم عند اهلك بدون ما تخبريني

داليا: نسيت

اسامة: طيب كونك كمان لسا جديدة وما بتعرفي القوانين مزبوط رح مرقها هالمرة
طلعة من البيت بدون اذني ما في
روحة عند اهلك من غيري كمان ما في
واه قبل ما انسى النسيان عندي كمان ما في

حاولت كتير اتجنبه واتجنب احكي معه لما حسيت انه اسامة هو سجني وقبري وحياتي ومماتي قررت انسى

اسامة:داليا قومي اعمليلي كاسة نسكافيه

داليا: خلي حسنة تعملك

اسامة: انا قلت داليا اعمليلي كاسة نسكافيه
ولمعلوماتك الست الي شفتيها المرة الماضية جاية عندي الليلة بس بدي فهمك شغلة
لانك مرتي ولاني بحبك كتير هي الست انا ما بيني وبينها شي هي الست كل الي بيني وبينها شغل
انا لو ما بدي اياكي ولو بدي غيرك صدقيني بلاقي مليون بس انا بحبك الك بحب داليا

مع انه كان احساسي بقلي انه الموضوع مو هيك
وانه الي بين اسامة وهالست شي تاني بس مشيت مع التيار وعملت حالي مصدقته

داليا: اسامة انا بكرة بدها امي تمر علي ونروح لعند الدكتورة في مجال

اسامة: ليش حبيبتي حاسة بشي تعبانة شي
موجوعة

داليا: بصراحة مو قصة تعب بس بدي اتاكد من شي

اسامة: ما فهمت

داليا: حاسة حالي رح صير ماما

اسامة: يا عمري يا داليا اذا هاد الكلام صحيح هاداحلى خبر رح اسمعه بحياتي
ليكي خلي والدتك مرتاحة انا رح روح معك واخدك عالدكتورة براسي

داليا: بس

اسامة: لا بس ولا شي يلا قومي بدي روح اطمن عالبيبي و اطمن عليكي

طلعنا انا واسامة عالمشفى لقابل الدكتورة
احلى كلمة بسمعها اني حامل مبروك فرحت من قلبي للخبر حتى اسامة كانت الفرحة مو واسعته ابدا طلعنا من المشفى واخدني على محل اكسسوارات لانقي عقد هدية الي بمناسبة حملي
احساس الامومة احساس حلو بس كل هالشغلات الحلوة الي كانت عم تصير معي ما قدرت تنسيني صوت ضحكت الست هديك هي واياه بالغرفة ما قدرت تنسيني وداعهم سوا

اسامة: هي الشوربة خليت حسنة تعملها مخصوص لالك وهي كمان شوية لحمة حتى تتغذي انتي والبيبي

داليا: يييي اسامة هلا بتعود عالدلال ما بتعود بتقدر علي

اسامة: انا كم داليا عندي

من اول لحظة حملت فيها واسامة رايح جاي يعبرلي عن سعادته بهالحمل بيطلع من البيت فاضي وبيرجع ايديه معباية

داليا: يعني الغرفة صارت كلها هدايا وعرابايات والعاب ولسا البيبي ما شرف حاج

اسامة: لسا ما شفتي اي شي بدي دللك قد ما فيني

داليا: انت شو حابب يجينا

اسامة: ممممم بدي بنوتة وتكون بتشبهك بتشبه امها بكل شي عيونها متل عيونك ،،، ضحتكها متل ضحكتك
بدي اياها تكون انتي
وانتي شو حابة

داليا: انا بدي كمان بنوتة خليني اعملها لعبة صغيرة الي لبسها ولعبها

هز براسه وهو مبسوط ما طلعت مني قله حابة يجيني ولد ويكون بيشبهك لانه بدي الي ببطني ما يشبه اسامة

اسامة: داليا انا رايح عشغلي بدك شي
ديري بالك عالبيبي ولا تنسي تشربي الشوربة

طلع اسامة عشغله وبعدها بشوية اجت حسنة ومعها صحن شوربة
قعدت اشرب فيه وحسنة عم بتضب بالغرفة عندي
بعد اقل من نص ساعة صار بطني يضرب علي ضرب
ووجعه ما عاد محتمل

داليا: حسنة بطني كتير عم يوجعني اتصلي باسامة خليه يجي مو قادرة

راحت حسنة وغابت عني مدة وانا اصرخ واتلوى من الوجع وقعت عالارض وانا حاسة عحالي عم اخسر ابني

داليا: منشان الله انقذوني ،،،، حدا ياخدني عالمشفى والله ما عم اقدر تعبااانة
غبت عن الوعي وما فقت الا وانا بالمشفى وامي قاعدة جنبي عم تمسح على راسي وتقلي معلش يا امي لسا الحياة قدامكم بعدكم صغار بكرة ربنا بعوضك باحسن

داليا: امي ابني انقتل قتل انا متاكدة انه حسنة حطتلي شي بالشوربة لحتى نزل الولد

اسامة: داليا الظاهر انتي نفسيتك هلا تعبانة حرام عليكي تظلمي الناس ،،،، من شوي اجا الدكتور وقلي انه سبب نزول الجنين حركة زايدة

داليا: لك انا مستحيل اظلم حدا مستحيل استقوي على الي اضعف مني انا متأكدة انه هي حطتلي شي بالشوربة لحتى خسرت ابني

اسامة: دلول انتي هلا تعبانة وما رح نتعبك اكتر
خلص ارتاحي

داليا: الله يلعنكم اتركوني بدك تترك دم ابنك يروح هيك ما بدك تحاسب الي قتله عم تقلي حركة زايدة اي حركة لك اي حركة فهمني انا ما شتغلت شي ولا تعبت بشي

كل محاولاتهم ليهدوني فشلو فيها وصارو ابرة مهدىء داخلة ووحدة طالعة
بس انا انطفت الدنيا بعيوني ما بعرف ليش اجاني احساس انه اسامة وحسنة ورا نزول الولد
بس ليش في حدا بيقتل ضناه ،،، صرت خاف بزيادة من اسامة وكل ما احكي لامي عنه تقلي تحملي
الوحدة ما الها الا بيت زوجها يعني تنقبر تموت مو مشكلة المهم تبقى ببيت زوجها
طلعت من المشفى وبقيت فترة طويلة تعبانة نفسيا ومو متقبلة اسامة نهائيا اما حسنة صرفها اسامة وجاب وحدة تانية مكانها

اسامة: داليا قومي تلفونك عم يرن

داليا: الو ( اهلين جوانا)

جوانا: قبل شوي حكيت مع خالتي وقالتلي انك نزلتي الي ببطنك يا عمري والله زعلت عليكي

داليا: ما تزعلي على غالي حبيبتي مو مشكلة هيك ربنا رايد

جوانا: اسمعي شو حابة اجي زورك اذا ما فيها مانع

داليا: لا ولو اهلا وسهلا بتشرفي

سكرت الخط معها والتفت على اسامة ( هي بنت خالتي بدها تيجي تزورني)

اسامة: ايه يلا منيح مو غلط بتتسلي معها وبتغيري جو
رح وصي الحارس يجبلك ضيافة كاملة واذا احتجتي اي شي تاني خبريه بجيبو بسرعة

ما كان بدي بنت خالتي تشوف انكساري ووضعي قمت على حيلي غيرت وحطيت شوية مكياج ونزلت استقبلها اول ما دخلت انبهرت ببيتي وكانها بعمرها مو شايفة بيوت ما بتعرف انه كله هاد ما بجيب سعادة

جوانا: حبيبتي ما شاء الله بيتك بجنن تتهني

داليا: تسلمي يا رب

جوانا: لا تزعلي حبيبتي داليا بكرة ربنا بعوضك وبتملي بيتك ولاد وبنات ما عليه هلا عيشي حياتك انسي كل شي

داليا: اي اكيد ان شاء الله

جوانا: انتي قديه الك متزوجة

داليا: مممم بعد بكرة رح يصيرلي سنة

جوانا: ها هي فرصتك اعملي حفلة صغيرة الك ولزوجك وغيري جو الرجال بحبو هيك اشيا اسأليني انا

بصراحة لعبت فكرة جوانا براسي وقررت اني بلش من اول وجديد واخدت حسن الظن وانه ممكن كون ظالمته لاسامة لهيك حبيت اسمع كلام جوانا واعمل حفلة صغيرة لالي انا واسامة
ما كنت بعرف انه بهاد اليوم رح تكون الضربة القاضية لالي )
سكتت وما بينت لاسامة اني عاملتله مفاجأة لاجا يوم الحفلة وصيت الحارس على شوية بلالين وورد
وصرت اعمل شغلات زاكية وحلويات لحضر حالي للحفلة
ومع اني وصيت الحارس ما يخبر اسامة بشي بس بعد ساعة لقيت اسامة مزروع قدامي ،،، لفني من خاصرتي وضمني لصدره

اسامة: ايوا هيك مرتي الحلوة هيك بدي اياكي والله الزعل ما بيلبقلك

داليا: هلا انا ما فيني اعملك مفاجأة صارو مخبرينك

اسامة: انتي بتعرفي ما في شي بيمرق بدون علمي

داليا: طيب يلا اطلع من البيت بدي حضر حالي وجهز كل شي للليلة وانت لما تيجي بالليل اعمل حالك متفاجىءاتفقنا

الساعة 11 بالليل
ناطرة كمان ساعة لتصير 12 بالزبط حتى نحتفل انا وزوجي بعيد زاوجنا
عم نفخ بلالين وحط ورود بالمزهريات عم رتب كل القعدة لاعمل جو رومانسي
رن موبايلي فجأة ركضت لافتح خط

( كيفك داليا
ان شاء الله عيد زواج سعيد العمر كله محضرلك هدية صغيرة ظرف عباب البيت فيه شوية صور بتمنى الهدية تعجبك )

( الو الو مين عالخط )

( توت توت توت)

مشيت لعند الباب برجلين تقال خايفة رايحة ومو قادرة وصل للباب
ندالي زوجي ( داليا مالك في شي لوين رايحة )

مسحت جبيني الي عم يتصبب عرق
داليا : بدي روح شوف مين عالباب سمعت حدا بدق

اسامة: خليكي انا بفتح حبيبتي

فتح اسامة الباب ورجع بظرف بني مسكر باحكام فتحه وبلش يطول منه صور لالي وانا بحالات ووضعيات غريبة
حطيت ايدي عتمي وشهقت
داليا: لا اسامة اكيد في غلط مستحيل اكيد حدا عم يلعب معي
او يمكن الصور فتشوب اي اي اكيد فتشوب

قعد عالكرسي قبالي مو قادر ينطق بحرف وعم يفرك جبينه بايديه
مسك موبايله ورن على رفيقه بيشتغل مهندس كومبيوتر

اجا عماد وفات هو واسامة عالمكتب يحكو
وانا اشرب مي واخد نفس بس نفسي بيطلع بصعوبة من ناح بعرف عقل اسامة صعب ومن ناح تانية عقل اهلي اصعب
ومن ناح انا هي الصور متذكرة اني مريت فيهم يعني بتذكر اني تصورتهم بس وين وكيف ما عم اتذكر شي ما عم اتذكر

قربت لعند باب المكتب وسمعت عماد بيقول لاسامة
( لا يا اسامة هدول الصور مو فوتشوب ولا ملعوب فيهم هدول حقيقات مية بالمية )

هالكلمة كانت كفيلة اني اوقع من طولي وما عاد حس على شي

ما فقت الا على اسامة بيضرب فيني برجليه

داليا: والله يا اسامة انت فهمان غلط والله انا ما دخلني والله ما عملت شي

اسامة: اخرسي وحدة حيوانة جبتك من ورا الزبايل جبتك من عند القرف وعملتك بني ادمة طلعتي حقيرة

داليا: اسامة ببوس ايدك انت اكتر واحد بتعرفني بتعرف مين انا ربي شاهد علي اني بعمري ما غدرتك ولا بحياتي خنت ثقتك

كل توسلاتي باءت بالفشل ،،،، سكر تمي وكان يتلذذ بتعذيبي ولما يحي عباله يستمتع بوجعي يسخن سكينة عالنار ويجي يحرق جسمي فيها واهم شي عنده يشيل اللاصق عن تمي حتى ينبسط وقت يسمع صوتي عم اصرخ

وبعدها يتركني ساعات بالمخزن لوحدي وهو يطلع

اسامة: قومي وليه تسممي جبتلك اكل

داليا: ما بدي اكل اطلع من عندي مو طايقة شوف وجهك

اسامة: ايه ما حزرتي يا حلوة بدي اياكي تظلي عايشة بدي تظلي تتوجعي ما بدي اياكي تموتي وترتاحي بدي تطلبي الموت وما تلاقيه

مسك راسي بايديه وصار يطعمي فيني غصب وبعدها يدفشني برجليه ويطلع

لحظات مرة متل العلقم تمر علي وما في بايدي شي ولا حيلة اعملها ولو بدي صرخ من هون لسنة ما حدا رح يسمع صوتي بهالمخزن

اسامة: شو دلول ان شاء الله نمتي منيح عالكرسي

فتحت عيوني بصعوبة ( شو هاد )

اسامة( هاد جوازك السفر بدنا نسافر الليلة انا واياكي لبرا شمة هوا يعني
اسمعي وليه رح تمشي معي وما تبيني شي قدام حدا رح تضحكي بوجه الجميع وكانه الوضع طبيعي )

داليا: انا ما بدي روح معك لمكان

اسامة: عم اخد رأيك لانه انا
انا هلا طالع وايه خليكي بالجوع بس نوصل عالبلد الي مسافرين عليها رح طعميكي شغلات بعمرك ما دقتيها بوعدك يا داليا
انا هلا طالع وبرجع المسا

طلع اسامة من عندي وانا صرخ ونادي ما حدا سامعني غيرحيطان هالمخزن حاولت فكفك ايدي ما عرفت
قديشه طلع اسامة انسان ما بخاف الله قديه طلع انسان مريض انا كنت متاكدة انه الي ايد بهاي الصور بس كيف وليش ما كنت عرفانة
صرت ادعي ربي بقلبي يبعتلي معجزة تطلعني من الي انا فيه

ومن كتر التفكير غفيت ،،، فقت على صوت حدا على باب المخزن

مجهول: لك انا متاكد ما في حركة بالبيت الخدامة الي هون قالتلي انه ست البيت زايرة عند بيت اهلها

مجهول2 : طيب ما خبرتك وين بنلاقي المصاري والذهب

مجهول: قالتلي بغرفة النوم ما في شي بس قالتلي يمكن يكون في خزنة سرية او بالمخزن ما بعرف بس هي متاكدة بغرفة النوم ما في شي ينسرق

داليا: مين هون لو سمحتو لا تهربو لا تخافو انقذوني انا محبوسة هون انا ما عم كذب منشان الله ساعدوني فكوني ساعدوني اهرب الله يخليكم

اختفى صوتهم شوي وانا رجعت اتراجهم
#خسارة_عمر_بقلم_حنين_طه

الجزء التاني

بقيت ربع ساعة اترجاهم وهم عالباب واقفين من برا
لحتى فتح واحد منهم الباب علي كان ملثم ولابس اسود باسود

دايا : لو سمحت تفكني منشان الله

مجهول: انتي مين وشو جابك لهون

داليا: انا بكون مرته لاسامة صاحب البيت هاد
هو مجنون حابسني هون

مجهول: طيب واذا انا فكيتك وهربتك شو بستفيد

داليا: رح بدلك على كل اماكن الذهب والمجهورات بس خليني اطلع

صفن شوي

داليا: الله يخليك والله ما في وقت لتفكر خليني روح

مجهول : طيب طيب دليني وين بحط الذهب والمصاري ورح فكك

دليته على اماكن مصاري اسامة وبعدها فكني وتركني اروح بحمد الله انه اسامة ما سكرلي تمي حتى قدرت صرخ ويسمعوني
كنت عم امشي بالشوارع تايهة ما عندي مكان روح عليه لو رحت عند اهلي اكيد رح يرجعوني لاسامة متأكدة انه واحد متله عنده قدرة يضحك عليهم ويدفعلهم كم قرش لارجعله
كنت عم امشي وما بعرف رجلي وين عم ياخدوني
ميتة جوع وعطش اخر شي اخدوني رجلي على مطعم اله حديقة خارجية ،،، ارتميت فيها بدي اي حدا يحن علي ولو بلقمة اكل قعدت اكتر من ساعة ما حدا التكش فيني لحتى طلعت صبية من جوا لابسة مريول مبينة عم تشتغل جوا بالمطعم شافتني قاعدة عطرف المطعم

وئام: مرحبا

داليا: اهلين ،،، انا بعتذر على قعدتي هون بعتذر اذا بدايقك

وئام: لا نا بتدايقني انا مو صاحبة المطعم بس انتي عم تشحدي يعني

داليا: انا ايه انا شحادة الله يسعدك اعطيني شربة مي والله مو قادرة اخد نفس من كتر العطش

وئام: طيب رح جبلك كاسة مي وسندويشة تاكليها

غابت الصبية وبعد خمس دقايق طلعت معها سندويشة وكاسة مي وقعدت جنبي

وئام: انا اسمي وئام

داليا: اهلين وئام تشرفنا

وئام: برغم التعب الي مبين عوجهك بس انتي كتير حلوة

كنت عم اكل بسرعة حتى رد مو قادرة رد عليها

وئام: صحيح انتي شو اسمك

داليا: اسمي اسمي

وئام: لا تخافي مني انا مو هبلة بعرف انك مو شحادة مو هيئتك هيئة وحدة شحادة انتي من مين هربانة

نزلت السندويشة من ايدي

داليا: هربانة من الموت هربت من عزرائيل
هربت من زوجي كان وحش حكم علي بالموت بدون ما يسمعني

وئام: طيب اهدي روقي اسمعي انا بدي ساعة وبخلص دوامي انطريني هون وبنروح سوا

ركضت عليها وضميتها

داليا: عن جد رح تخليني اجي عندك

هزت راسها بحب وراحت كنت فرحانة كتير كيف ربنا بيسر للانسان ولاد حلال وامورك ومشاكلك بلحظة وبدون ما تحس عحالك ،،، نطرت وئام ساعة لحتى طلعت وخلصت دوامها ورحت معها على بيتها كان غرفة صغيرة فيها تخت واحد وسجادة صغيرة ولجوا حمام صغير

داليا: وئام انتي ما حدا عايش معك هون

وئام: لا عايشة لحالي

داليا: ما بتخافي

وئام: القرب من الناس هو الي بخوف مو البعد عنهم

داليا: معك حق طيب ليش

وئام : شي يوم رح احكيلك قصتي

داليا: احكيلي اياها هلا امانة

وئام: مو لاعرف اسمك بالاول

داليا: اسمي داليا

وئام: طيب يا ستي انا امي وابي اتطلقو من لما كان عمري خمس سنين لانه امي مرضت مرض مزمن وستي امه لابي اصرت تزوجه بعد ما اطلقو امي وابي بشي شهرين ماتت امي وانا ربيت عند ابي ومرته اللئيمة بس صارت كل يوم والتاني تعملي مشاكل تفسد ابي علي تحكيله عني حكي مو مزبوط وكل مرة اكل قتلة شكل لحتى مات ابي كان عمري 13 سنة قررت وقتها اترك البيت لمرت ابي واطلع من عندها واعتمد عحالي
تعبت كتير لقدرت وصل للي انا فيه شفت بحياتي كتير اشيا وهلا انا هون

داليا : طيب ما عندك اخواة اخوات اقرايب

وئام: لما تركت البيت من عشر سنين كان عندي تنين واحد خمس سنين وواحد تلت سنين يعني هلا بكونو صارو بعمر المراهقة

داليا: وكل هالمدة ما شفتيهم

وئام ولا بدي شوفهم ولا اعرف حدا من طرف امهم وانتي

خفت بالبداية صارح وئام بوضعي بس شي جواتي خلاني ارتاحلها واحكيلها كل شي عني بكيت بحرقة وحكيت كل شي جواتي وجوا قلبي قربت مني وئام وحطت ايدها على كتفي
( لا تزعلي ربنا ما بنسى حدا كل شي رح يكون منيح )

نمنا انا ووئام على تخت واحد وتقاسمنا نفس المخدة بقينا للفجر سهرانين نحكي ونضحك ونبكي عحالنا وعالوضع البائس الي احنا فيه
تاني نهار انا ما فقت الا متأخرة كانت وئام طالعة عشغلها حست شوي بالبيت ورتبته مع رجعتها فاتت ومعها اكل الي والها بس وجهها ما بيتفسر مبين عليها في شي زاعجها

داليا: وئام فيكي شي

وئام: لا ابدا كلي ما عم تاكلي شي

بالبداية ما حبيت اضغط عليها بس لما شفتها قديش مبين عليها ملخبطة اصريت اعرف شو في

وئام:مو حابك تزعلي بس لازم تعرفي
خدي كاتبين عنك بالجريدة

صرت ارجف وانا عم اخد منها الجريدة

داليا: شو كاتبين عني

وئام: زوجك متهمك انك سرقتيه وهربتي وانه انه

داليا: احكي انه ايش

وئام: متهمك بشرفك

داليا: الحقير الله يلعنه ربي بيشهد علي يا وئام اني ما عملت شي غلط ربي بيعرف اني مظلومة

وئام: والله بعرف يا عمري خلص اهدي كرمالي تروقي

داليا: كيف بدك اياني اروق اكيد فرجا الكل الصور الي وصلو كدليل ضدي

وئام: طيب يا داليا حاولي تتذكري انتي قلتلي انك مريتي بهي الصور كيف حاولي تتذكري كيف وصلتي بهاي الصور

مسكت راسي بايدي

داليا: مو قادرة اتذكر مو عارفة ليش ما عم تصدقيني

وئام: والله مصدقتك خلص اهدي

وئام ما كانت رفيقة ربي بعتلي اياها كانت اختي ورفيقتي صاحبتي كل شي بالدنيا هي وئام
قعدت عندها عشر ايام ما شفت منها الا الحب والضحك

داليا: وئام رجعتي تعالي بدي احكي معك بشغلة

وئام: ايه حبيبتي قليلي

داليا: انا بدي اشتغل

وئام: كيف بدك تشتغلي وبدك تطلعي من البيت وانتي عارفة انه زوجك بدور عليكي ويمكن باي وقت يلاقيكي

داليا: لمتى رح اظل متخبية يعني طول عمري بدي ظل هيك اكيد ما بيزبط ما بكفي حاملتيني معك بهالغرفة كمان بدي تقلها عليكي تصرفي علي اكل وشرب

وئام: يا عيب الشوم عليكي شو هالحكي

داليا: اذا بدك اياني ابقى عندك بتساعديني لاقي شغل

وئام: طيب اسمعي شو رح حاكي صاحب المطعم عنا بلاكي بدبرك بشي شغلة

داليا: ايه الله يخليكي

بالفعل بعد يومين خبرتني وئام انها حاكت صاحب المطعم وما اعترض عالفكرة بشرط انه يشوفني ولانه بملك وجه حلو وظفني بسرعة
كل الي بشتغلو معنا كانو حبابين وطيبين ما عدا بنت اسمها اية كانت تحاول تخرب شغلي علي وكل ما بعمل شي غلط تنط لعند صاحب الشغل لتفسد عني

وئام: انتي شو بدك من داليا ليش لاحقتيها عالدعسة
كل هالقد الغيرة ماكلتك

اية: انا غار من وحدة شرشوحة مو معروف مين اهلها

وئام: ايه عاساس انتي صاحبة النسب الرفيع

داليا: خلص وئام اتركيها هي وحدة مريضة

بالشغل كان معنا شب اسمه يزن كنت حس عليه بكنلها مشاعر لوئام وبحاول يتقرب منها بس هي كانت تصده دايما

داليا: شو ياااا كأنه في ريحة حلوة طالعة هون

وئام: ريحة شو

داليا: ريحة حب

وئام: ايه بلا خفة دمك هلا مو ناقصتك انا

داليا: بالله ماله العاشق الولهان الي برا
اي ما شفتي نظراته وتسبيلة عيونه

وئام: يييي حلي عني داليا

داليا: بالله تنتبهي شوفي كيف لما احنا نعطيه اي صينية او اكل بقلنا شكرا اختي اما لما انتي تعطيه شي بقلك تسلمي ست وئام كلك زوق مع خنة خفيفة

وئام: شلون يعني مع خنة

داليا: يعني هيك تسنمي ست وئام كنك ذوق

وئام: تضربي ايه

كل يوم عن يوم كنت حب الشغل والموظفين كتير حتى يزن العاشق كنت حب اقعد معه وشوفه كنت اضحك كتير على نهافته وخفة دمه و وئام كنت عم حسها بلشت تميل لاله

وئام: والله حاسة بشي اتجاهه بس يعني بدي حب واحد معتر متلي تعبت انا بدي شوف الدنيا وعيش فيها

داليا: وئام يا روحي رح قلك عن خبرة بعمرها الفلوس ما كانت سبب سعادة
المصاري بتشتريلك مخدة بس ما بتشتري النوم
بتشتري الدوا بس ما بتشتري راحة البال
بتجبلك اكل بس ما بتجبلك نفس لتاكلي
فكري بكلامي

فرحت كتير لوئام لماشوفها هي ويزن عم يحكو مع بعض بالنظرات تمنيت لو عشت قصة حب متلها

اية: داليا خدي هي الصينية طالعيها عالطاولة رقم 3

داليا : طيب هلا باخدها

مسكت الصينية وطلعت فيها وقبل ما اوصل للطاولة رجعت فيها
داليا: وئام لك وئام تعي ودي الصينية هي عالطاولة رقم 3

وئام: طيب وديها انتي

داليا: خلصيني وئام وديها هلا وانا بقلك بعدين ليش ما اخدتها

وئام: طيب ماشي

راحت وئام ورجعت لعندي كنت متوترة كتير

ايك: شو ست داليا وديتي الصينية

داليا : ايه اخدتها

راحت اية وصارت وئام تستجوب فيني

داليا: لك ابن خالتي كان قاعد برا عالطاولة الله ستر ما شافني كان اليوم نهايتي

وئام: طيب شو بدك تعملي هلا

داليا: ما بعرف بدي اهرب من المطعم من المكان كله قبل ما حدا يحس علي

نزعت المريول عني وتوجهت للباب الخلفي ورحت للبيت قعدت على اعصابي لرجعت وئام

داليا: ايه خبري شو صارحدا حس علي

وئام: لك لا مرقت عخير بس مدير المطعم فصلك وبقلك لا عاد تفرجيني وجهك

داليا: ايه احسن بالناقص

وئام : وفصلني انا وقلي كمان لا عاد فرجيه وجهي

داليا: يا حبيبي صرنا تنتين عاطلات عن العمل
طيب واخرتها شو نعمل

وئام: انتي ما لازم تشتغلي بمكان عام ممكن حدا من اهلك او قرايبينك يشوفك

داليا: ايه ووين يعني بدي اشتغل مثلا

وئام : اسكتي شوي خليني فكر رح اسألك يزن هو شب واكيد بيعرف مطارح توظفك
مسكت موبايلها ودقت على يزن حاكته شوي وقالتله اني تركت الشغل لاني ما ارتحت فيه وبدي مطرح داوم فيه ويكون مو مكان عام وخبرها انه رح يدور وبعدها بخبرنا

قعد يومين ما وصلنا منه رد وباليوم التالت رن وخبر وئام انه لقيلي شغل مربية اطفال
غصيت بس سمعت كلمة اطفال وتزكرت ابني الي كنت حامل فيه ومات قبل ما ينولد

داليا: يييي انا شو بعرفني بهيك شغلة

وئام: شو بدها هي كل القصة تديري بالك عبنت وولد اعمارهم اقل من خمس سنين بتلعبي معهم وبتاكلو وبتشربو وبتروحي سهلة

داليا : طيب بكرة بروح بقابل وبشوف

تاني نهار اخدت العنوان من يزن ورحت لقابل فيه حتى يوظفوني مربية اطفال
استقبلتني ست كبيرة بالعمر بيطلع عمرها بالستينات دخلتني لبيت انيق مرتب مبين انه اصحابه متوسطين الحال

داليا: خالة انا المربية او قصدي انا الصبية الي جيت قابل لحتى توظفوني مربية

ام انور: اهلا يا بنتي الصراحة انا طلبت مربية لولاد ابني
قيس ولمار هم عايشين عندي وبتعرفي بحكم كبر سني وعجزي ما عم اقدر قوم فيهم

داليا: لا خالتو لا تقولي هيك الله يعطيكي الصحة والعافية

ام انور: ابني ومرته متطلقين ومرته ما قبلت تاخد ولادها معها اما ابني بيشتغل دكتور واكتر وقته برا البيت ما بيجي الا اخر الليل

داليا: ان شاء الله خالتو رح كون عند حسن ظنك ولا يهمك

ام انور: بدي تعرفي يا بنتي انه ولاد ابني بسيطين كتير بس مشكلتهم ما بيتقبلو اي حدا بسرعة
واحيانا ممكن تضطري تنامي عنا بالبيت اذا احتاج الامر اذا بتحبي تخبري اهلك

داليا: انا بحاجة كتير لهاي الوظيفة خالة ورح اعمل جهدي لاقدر كون متل ما بدك
فيني شوف الاطفال

اخدتني الست ام انور على غرفة الاولاد كانو قاعدين عالارض بيلعبو اول ما فتت عالغرفة لازقو التنين عالحيط

ام انور: حبايب تيتا هي الدادا الجديدة بدي اياكم تردو عليها وما تغلبوها

صفنو التنين ببعض ورجعو كملو لعب ولا كانو ستهم حكت شي غمزتها بعيني وطلبت منها تطلع برا ورحت قعدت جنب الاولاد عالارض

داليا: ممكن العب معكم

قيس: انتي ليش جاي تلعبي معنا روح العبي مع ولادك احنا بدنا ماما تلعب معنا

هالكلمة ضربت عالوتر الحساس

داليا: انا ما عندي ولاد لانه

قيس: واذا اانا بدي امي بعدين انتي ليش ما عندك ولاد

داليا: كان رح يصير عندي واحد بس مات

لمار: حتى احنا كان عنا ام وراحت

داليا: معناتو تعو نتفق اتفاق انتو بتعتبروني بدال ماما الي راحت لحتى ترجع امكم وانا بعتبركم بدل ابني الي مات لحتى جيب غيره

قيس ولمار : اتفقنا

ملكت الدنيا لما قدرت احصل على قلب وثقة هالاطفال من اول يوم واول لقاء الي فيهم
لعبت معهم كتير لحتى اجا الليل بعدها تعشينا انا وهم والخالة ام انوروطلعت نيمتهم وجيت لحتى اروح

ام انور: شكرا بنتي

داليا: هاد واجبي خالة بكرة رح اجي هون اول ما يطلع الضو

تركتها ورجعت عالبيت عند وئام دوشتلها راسها وانا احكيلها عن وظيفتي الجديدة وعن الاطفال الي معي وهي تضحك وفرحانة على فرحي
داومت تقريبا اسبوعين كل يوم اتقرب اكتر واكتر من قيس ولمار صارو هم كل حياتي وقتي كله رايح الهم وبهالفترة هي كلهاما شفت الدكتور انور ابدا

قيس: خالة داليا خالة داليا تعي شوفي تيتا شو عم تقول
بتحكي انه اليوم انا رح اكبر سنة من عمري

داليا: يا روح خالة داليا العمر كله
اذا بهالمناسبة لازم نعمل كيكة حلوة شو قلتو

قيس : موافقين

فتت عالمطبخ انا ولمار وقيس نحضر الكيكة وكل ما اعمل خطوة بالكيكة يسالوني ليش عملت هيك ومع كترت اسئلتهم وغلبتهم ما زعلت ولا تدايقت منهم بالعكس كنت فرحانة كتير فيهم
واحنا عم نعمل كيك فات علينا شب بالسر طويل عيونه عسليات شعره ممشطه بطريقة مرتبة وحنطي البشرة

انور: انا اسف ما توقعت لاقي حدا هون

ركضو قيس ولمار ناحه وهم عم يضموه ويبوسوه ( هي بابا)

قدرت اعرف انه هاد انور

طلع هو وولاده يقعدو بالصالة وانا كملت شغل بالكيكة
خلصتها وحطيتها بالفرن وطلعت لشوف قيس ولمار
سمعت انور عم يحكي مع والدته

انور: امي طيب غير انه اسمها داليا شو بتعرفي عنها يعني اسم عيلتها
متزوجة او لا ،،، عندها ولاد اولا
شو ظروفها لحتى عم تشتغل عنا ما تنسي امي انا مسلمها ولادي لازم اتاكد انها امينة وخرج هيك شغلة

ام انور: والله يا ابني ما عرفت عنها غير اسمها والبنت ما شفت منها الا كل خير والحمد لله ولادك حبوها وتعودو عليها

تلخبط كياني لخبطة ورجلي صارو يرجفو خفت كتير يعرفو قصتي ويعرفو وضعي
رجعت هالمطبخ وقعدت عالطاولة وصرت فكر وادعي يا ربي اعمي عيونه عني يا رب لا تقطع برزقتي وسرحت

داليا: بسم الله في شي

انور: صرلي ساعة عم نادي عليكي وين سارحة

داليا: اه ولا شي سرحت شوي بس خير ليش عم تناديلي

انور: ابدا سلامة خيرك انحرقت الكيكة وطلعت ريحتها

داليا: ييي وعدت قيس قدمله الكيكة انا واعمله اياها بالشكولا متل ما بحب
انا بعتذر والله ما الي بالعادة اسرح وانسى شي من شغلي الله يخليك لا تواخذني

انور: مو مشكلة ما صار شي هلا بنطلع احنا والاولاد وبنروح نشتري كيكة
يا ولاد تعو بدنا نطلع مشوار بدنا نروح نشتري كيكة جديدة لانه خالتو داليا طلعت ما بتعرف تعمل كيك

داليا( بنفسي) يا ربي على هالخجلة

تجهزو الاولاد ووقفو لابوهم عالباب ،،، اطلع انور فيني

انور: يلا داليا قومي البسي لحتى تروحي معنا

داليا: انا والله ما في داعي خلص روحو انتو

قيس : امانة خالة داليا تعالي معنا

ام انور: روحي بنتي يلا

داليا: والله خالة ما في داعي لروحتي

انور: ايه قومي قومي بدك تضحكي عالولد هي الكيكة لازم تكون منك اساسا

قمت لبست جاكيتي عحالي وطلعت معهم ركبت مع الاولاد ورا وكل ما انتبه على انور قدام لاقيه عم يطلع علينا بالمراية ،،، وصلنا لمحل الكيك واختار قيس ولمار وحدة وانا رحت لعند المحاسب لادفع حقها لقيت انور ماسك ايدي وعم برجعها لورا

داليا: لا والله استاذ انور انا لازم ادفع حقها

انور: مو عيب وانا موجود ما حبيتها منك

اخدنا الكيكة واحتفلنا وكان قيس مبسوط كتير ونمت هديك الليلة عند الاولاد قد ما نقو على راسي لنام عندهم
دقيت لوئام وخبرتها اني رح نام برا البيت
بعد ساعتين وصلني مسج من وئام

( والله البيت مو حلو بدونك )
ضحكت وسكرت تلفوني لحتى نام سمعت برا صوت خفيف
قمت من مكاني وطلعت لبرا ما كان في حدا فتت عالمطبخ شعلت الضو كان انور جوا اول ما شافني وقعت الكاسة من ايده

داليا: هادانت

انور: رعبتيني قمت لاشرب مي

داليا: في حدا بيشرب مي عالعتمة

انور: ايه بسرعة شو بعرفني انك رح تطبي علي هيك فجأة انت شو مصحيكي هلا

داليا: ايه جيت اشرب مي

انور: تمام

صبيت كاسة مي وشربتها وانا عم اطلع على انور
خلصت وجليت الكاسة وحطيتها
انور : شو

داليا: شو
اه ايه خلصت شرب مي

انور: طيب روحي نامي

داليا: مزبوط بس انت حاطط ايدك عباب المطبخ كيف بدي امرق

سحب ايده وبقي واقف على باب المطبخ اضطريت امرق من جنبه شم ريحته واسمع صوت دقات قلبه
رجعت عالغرفة عند الاولاد فكر بانور وبطليقته معقول شخص متله بينترك
طيب ليش مطلق مين في وحدة براسها عقل بتنفصل عن هيك رجال
ييي وانا شو دخلني شو بدي فيه خليني بهمي انا احسن شي
صارت الايام تمرق وانا اتعلق بقيس ولمار لقيت فيهم روحي شفت فيهم حلمي باني كون ام حتى خالتو ام انور كانت متل امي واحن كانت الانسانة الي طوال عمري بحلم امي تكون متلها
لما احتاجها توقف جنبي ولما ابكي لاقيها حدي
اما انور كترت زيارته عالبيت وصرت شوفه اذا مو كل يوم نهار بعد نهار لحتى اجت فترة غاب تقريبا اسبوع وما اجا كنت حاول اخر وقت ترويحتي لعل وعسى شوفه بس ما صدف ولا مرة شفته
حسيت حالي اشتقتله او افتقدته بس ما كنت بقدر قول او عبر حتى لرفيقتي وئام كان صعب علي خبرها اواحكيلها شي شو رح تحكي عني
تاركة المصيبة الي هي فيها وجاية تحب وتعشق

داليا: خالة ام انور

ام انور: ايه يا بنتي تعالي عالغرفة هون عم طرز

داليا: شو حلو نيالك عندك هيك موهبة يا ريت فيني اتعلم

ام انور: اذا عندك نية تتعلمي بعلمك

داليا: خلص معناتو من بكرة بنبلش
خالة انا صار لازم روح نيمت قيس ولمار ولازم روح حتى الحق لاقي تكسي بهالوقت

ام انور : طيب بنتي ديري بالك عحالك

وانا طالعة من البيت التقيت بانور عند الباب صار قلبي من جوا يرقص لما شفته

انور:داليا انتي لهلا مو مروحة

داليا: مممم لا لحتى نامو الاولاد

انور: ايه بس الوقت تاخر هلا كيف بدك تروحي

داليا: مو مشكلة باخد تكسي

انور: لا تعالي انا رح وصلك

داليا:…..

ركبنا بالسيارة وتنيناتا عم نحكي بعيونا كلام كتير

داليا: طولت هالمرة كتير

انور: كان عندي مؤتمرات وعمليات برا البلد

داليا: ايه الله يوفقك

انور: داليا صحيح احكيلي عن حالك شوي قديه عمرك شو هوايتك
من اي عيلة انتي
متزوجة ولا لا

صرت افرك بايدي تكركبت مو عارفة شو جاوبه بالزبط
اخترعتله اسم عيلة وقلتله عمري 24
هوايتي كانت النوم بس هلا بطلت
ومو متزوجة

انور: غريب بنت حلوة متلك لهلا مو متزوجة

داليا: انت بتشوفني حلوة

انور: مممممم مبدئيا بتجنني

داليا: خلص هون وصلنا

انور: هي قريبة يا ريت الطريق كانت اطول انتبهي على حالك وحاولي بكرة لا تطولي بدنا نطلع رحلة صغيرة

ودعته ورحت عالبيت بحكي مع حالي
قلي حلوة قلي بجنن يعني هو شايفني حلوة

عايشه حالة حب معاك واخداني
وصعب انها تتكرر تاني
وبعيشها لو انت بعيد او قدامي
واخيرا الايام رضيو عليا
اخيرا جه يا حبيبي يوم ليا
ارتاح من قسوة ايامي

من كتر الفرحة الي كانت مو واسعتني ما نمت بالليل وقبل الشحادة وبنتها فقت وغيرت وطلعت حتى انور لما فتحلي الصبح انصدم

انور: لا واضح من هواياتك النوم جاي من الصبح لو بعرف بدك تبكري هالقد كنت خليتك تنامي عندي

داليا: عفوا

انور: قصدي تنامي عنا

متل الطلق رحت صحيت الاولاد وغيرتلهم وانا قلهم بدنا نطلع رحلة ،،، كنت فرحانة اكتر منهم
اخدتهم ورحنا عالمطبخ نحضر فطور لنفطر قبل ما نطلع

انور: يا عمي عالنشاط كل يوم بدي قلكم في رحلة لحتى تفيقو بكير والله يا داليا لو وراكي كوم ولاد ما بتفيقي هالقد بكير

قيس: بابا لا تحكي هيك مع دادا داليا لانه هي قالتلنا انا ولمار انه احنا ولادها بدال ابنها الي مات

اطلع فيني انور بطرف عينه وانا وجهي قلب متل البندورة

انور: دايمة

ام انور: كمل امي ما اكلت شي

انور: داليا الحقيني شوي لبرا

تركت الاكل وطلعت معه كان قاعد بالسيارة وحاطط راسه عالستيرنغ

داليا: نعم استاذ
مسك ايدي بقوة

انور: ليش كذبتي علي ليش قلتيلي انك مو متزوجة
شو الي حكاه قيس هلا

داليا: عم بتوجعني اترك ايدي

انور: كلكم كذابات كلكم خاينات
فتح ردة السيارة
انتي متلها لطليقتي كذابة متلها لهي
رمى علي صورة مرته وانا من شفتها ما عادت طلعت الحروف ولا الكلمات ولا حتى النفس معي هاي هي نفسها مستحيل انساها نفس الست الي كانت مع اسامة بالمكتب

…… يتبع