رسالة لكل فتاة ولكل أم انشروها في كل مكان
كلام مية ميه ولاعليه هفوت غبار اقرووا وركزو منيح 👌🏼👌🏼👍🏻
“قصة فتاة عشرينية ” – مرام الزعبي :
بنت عمري 26، بشتغل في بنك، وعايشة .. مبسوطة بحياتي وعلاقتي طيبة مع كل اللي حولي، أهلي وصاحباتي وعيلتي، وبهضُم كل أصناف البشر إلا هالفئة الي مش راضية تتركني بحالي، فئة :
” صارت بأواخر العشرين ولسا ما تجوزت”
كنت أسمع حكي كتير بخصوص هالموضوع، وأتدايق كتير، وأحس اني مخنوقة ومضغوطة
، متل الي عُمره محسوب عليه، بعِد الأيام وبعد الساعات وأنا لسا Single وبنظر الناس قربت أصير عانس.. هاد إذا ما كنت عنست بالفعل!
ما هو هات فهمهم إنه لسا ما اجا الشخص المناسب الي بقدر أقضي معاه بقية حياتي، أنا ما بدي أتجوز بس مشان أعمل حفلة وألبس أبيض، ولا مشان أسافر ع مكان حلو بشهر العسل، ولا مشان أنزل صوري مع عريس الهنا وأحط صور خواتم وقلوب حب وأنا ما بعرف عنه إلا إسمة وراتبه وشو بيشتغل، أنا ما بدي أتجوز بس مشان أحط صورة خواتمنا profile picture ولا مشان أجاكر فلانة وعلانة اني هيني حلوة وانخطبت، أصلاً مين قلكُم الحلوة بتنخطب؟ خلينا ساكتين كلنا عارفين القالب.
الجارة بتحكيلي “تلحلحي وجيبيلنا عريس”
بتخيل جوابي هيك: اه يلا يلا .. هسا بنزل عالدكانة وبنقيلك واحد هيك كتافه عريضة وطويل .. على كيف كيفك!
بس جوابي بيكون: الله يجيب الي فيه الخير. ( مع ابتسامة صفرا)
**
والثانية كل ما تشوفني ما عندها إلا سؤال واحد، بدون مرحبا ولا سلام: متى بدنا نفرح فيكي؟
بتخيل جوابي : يا ستي افرحي مين ماسكك؟ لازم تفرحي فيي أنا بالذات؟ لهالدرجة أنا بعنيلك؟ 😮 أي أنا ما بشوف وجهك إلا بالمناسبات والاعراس وما بصادفك الا عند البوفيه ياللي بس بتيجي لما تسمعي انه الحفلة فيها بوفيه مفتوح! وهاي في بوفيه مفتوح ومشروح خصيصاً إلك ومتنازليتلك عن حصتي .. كُلي وافرحي مشان الله واعتقيني محنا كلنا عارفين ليش جاية! وبالمناسبة أنا ما بنجِّم ولا بعرف متى رح يجي نصيبي، كُلي هريسة وأسكتي ..
بس جوابي بيكون: لما الله يكتب خالتووووو .
**
وكله كوم وكلمة عقبالك هاي الي بتطلع بدون نفس كوم، اللي معناها الحقيقي:
( خليني أذكرِك بواقعك البائس وانك بينما عم بتصفقي فرحانة لصاحبتك، انتي سنجل -مع صدى كلمة سنجل جوا راسي- ) !
ارحموني، كل بنت آخرتها تتجوز بس المهم مين راح تتجوز، مين من ناحية أخلاقه، دينُه، طريقة تفكيره، احترامه الها ، طموحه .. أنا ما راح أتجوز صورة وخاتم، ولا طرحة وفستان، أنا رح ارتبط بـ “روح”، وهالروح لازم تتماشى مع روحي مشان أعرف أتنفس وأعيش وانا مبسوطة، ما تفكروا في بنت بتقطع بنصيبها هيك لأنها ما بدها تتجوز .. بس مش كل واحد بستاهل، ومش كل واحد بيتناسب مع طريقة تفكيرها أو طموحها!
لو بدي أتتجوز مشان أخلص من حكيكم كان زمان تجوزت، بس أنا الي راح اعيش بالنهاية مع هالإنسان مش انتو، وأنا الي راح أتعامل معه وأفطر وأتغدى معه وأطلع وآجي معه وهو رح يكون أب أولادي .. مش انتو!
اتركوني أحسِن الإختيار وأنا اللي آخد القرار.
منقول