هذه القصص مقدمة من قسم المنوعات في زاكي
ملاحظة: القصة واقعية
#نهاية_امرأة_بقلم_حنين_طه
الجزء الاول
الدنيا بشهر 12 والجو بارد كتير
كل العالم متخبية بيبتها وانا وامي وابي قاعدين جنب الصوبة وعم نتدفى
شفت من شباك البيت الدنيا عم تثلج ركضت لعند الباب
طلعت حتى بدون ما البس برجلي
سمعت امي بتنادي علي من جوا
( منال بنتي تعي اشربي كاسة مي عالاقل لا تطلعي من الدفا هيك برا عالبرد هلا بتلتفحي )
كملت طريقي لبرا وصرت العب بالثلج ونط وما دخلت عالبيت الا بعد ساعتين كنت منهنهة تعب
اخدت دوش سريع وعملتلي امي شي ساخن شربته وحطيت راسي ونمت
قمت بنص الليل بهذي وحرارتي وصلت 40 ركضت امي تفيق ابي اخدوني وركضو عالمشفى فيني
دخلنا عالطوارىء والممرضين عم يحطولي خافض حرارة وابر مع دخلة شب علينا سمعت الصبية من جنبي بتقله
( دكتور خالد هي المريضة )
مابعرف ليش حسيته عم يطلع فيني بنظرات كتيرة
نظرات ما قدرت فسرها
كنت بعرف او بالاحرى كل رفقاتي والعالم كانو يقولو اني بملك جمال فريد من نوعه قادر يجذب ويسحر اي حدا
بعد ما نزلت حرارتي وحسيت عحالي خفيت شوي
خالد: انتي شو اسمك
منال: اسمي منال
خالد: عاشت الاسامي انا خالد
منال: اهلين دكتور خالد
بقيت بالمشفى ساعتين وقبل ما يروحني
اعطانا الدكتور خالد كيس الدوا تبعي
لما رجعت عالبيت لقيته حاطط بقلب كيس الدوا كرته
بصراحة ابتسمت من جواتي لاني عرفت اني عجبته متل ما عجبني
مرقت القصة يومين وما دقيت عليه
( يا ربي اتصل الا ما اتصل
اتصل الا لا
اتصل الا لا
احسن شي اتصل ولا لا احسن شي ما اتصل يييييي بتصل شو بده ياكلني يعني
اتصلت عليه وبعد رنتين بالزبط رد علي
خالد: الووو
منال: الدكتور خالد
خالد: لو بلاها دكتور بكون احسن اهلا منال
منال: ممممممم بلاها بلاها كيف عرفت اني منال
خالد: قلبي قلي
منال: خالد: بصير قبل اي شي قلك انك فاتنة الجمال هي اول مرة بحياتي بستسلم لجمال انثى
منال: ههههههه بعرف الكل بحكيلي هيك
خالد: ما حبيتها هي الكل يا ريت من اليوم انا وبس
منال: والله انت وشطارتك
خالد: منال انتي كم عمرك شو دارسة
تلبكت شوي من سؤاله فركت اصابيعي ببعض
خالد: هلووو منال عم احكي معك
منال: انا عمري 20 بس مو دارسة
خالد: ما بتحبي الدراسة يعني
منال: لا مو هيك كتير كنت حبها بس الي اخ مسافر عصبي وما بينطاق بيجي لهون كل خمس او ست سنين مرة
اجا قبل تلت سنين وطلعني بالغصب من المدرسة حاولت كتير انا وامي نترجاه عالاقل لخلص توجيهي رفض
وحلف يمين اذا برجع عالمدرسة ليذبحني
خالد: العما شو هالاخ الي عندك
منال: ايه بس انا وامي وابي كمان مرتاحين منه لانه بغيب سنين بس كل يومين برن علينا وبحكي معنا عالنت
خالد: طيب وامك وابوكي كيف
منال: احسن من هيك ما في انا بنتهم المدللة شو ما بدي بيعطوني وانت
خالد: ممممممم يا ستي انا متل ما بتعرفي دكتور عمري 29 سنة اعزب او فيكي هلا تحكي عاشق
عندي اخت متزوجة
منال: حلو كتير الله يخليكم لبعض
خالد: تسلمي صحيح شو بدي قلك الدراسة والتعليم مو شي اساسي بالانسان
كتير ناس متعلمة وما بتعرف تحكي
ارتحت كتير لكلامه ولوجهة نظره كنت خايفة انه يكبر علي بيوم خاصة انه دكتور ومتعلم
كنت احكي معه باليوم خمس او ست مرات وهو كان كل اوقات فراغه معي التقيت فيه كم مرة بمكان عام
وكل مرة كنا نتخانق على لبسي ما بده البس ديق وقصير
وانا كل مرة كنت طنش وحاول استفزه اكتر وحاول خليه يغار اكتر
حتى هو صار يحاول يتبع معي هالاسلوب وقت بكون معه عالخط بيصير يتغزل بالممرضات ويمزح معهم
لمرة عملتله مشكلة طويلة عريضة وصار اكتر اوقاته بالدوام فاتح خط وحاطط الموبايل بجيبته حتى اسمع كل شي بينحكى بينه وبين الممرضات
خالد: لك منال سكري شوي كل اهلي بدقو علي بقلولي عم بنرن عليك خطك مشغول انت بتشتغل الا بتحكي تلفونات
منال: هئة ما حزرت
جيب تلفون مخصوص الي وهاد خليه لاهلك وانا بظل فاتحة خط عالتلفون الي الي
خالد: يعني بتغاري علي
منال: لك لا مو بغار بس هيك يعني
خالد : ايوا ايوا ما بتغاري رح تموتي غيرة
يسعده الي بغار
صحيح بكرة بدي اشوفك ومن هلا عم احكي البسي شي مستر
تاني نهار لبست وتغندرت وكنت عرفانة شو بده
كان عيد ميلادي وعملت حالي نسيانة كان جايبلي بلالين كتيرة ودبابيب ما بتنعد وقدامه عالطاولة شي خمس او ست علي مسكرة
خالد هاي الهدية لانك حبيبتي
وهاي لاني بموت فيكي
وهاي لانك عمري
وهاي لانه حتصيري كل شي بحياتي
شعوري وقتها متل الي طاير بالسما متل شي شخص عايش بالجنة
كل حرماني بسييني السابقة عوضني اياه خالد ما ترك مكان ما اخدني عليه
كانت امورنا ماشية على خير وما في اي شي بعكرها وخالدواعدني يفتح موضوعنا مع اهله
لحتى ننخطب خاصة اني فركشت خطاب وعرسان كتيرين كرماله
بس الي صار والي ما حسبت حسابه لما حكى معنا اخي ماجد وخبر امي انه اسبوع زمن حيكون عنا
من الرعبة والخوف رجلي ما عادو حملوني وفتت عغرفتي حاكيت خالد
خالد: شو في ليش صوتك هيك ليش عم تبكي احكي
منال:……
خالد: ابوكي صرله شي طب امك احكي
منال:……
هالد: طيب انتي صايرلك شي منيحة انتي حاكيني
منال: كلنا مناح بس اخي ماجد رح يجي من السفر
خالد: هلا كل هاد لانه ماجد جاي من السفر
منال: عارف جيته شو يعني
معناها ما حقدر شوفك ولا حاكيك والله يستر اذا ما بزوجني كمان
خالد: شو مفكرالشغلة عكيفه
منال اسمعي موبايلي بده يطفي شحن
هلا برن عليكي من ابن عمي قاسم اوك
بعد دقيقة رن علي من رقم ابن عمه
خالد: حبيبتي لا تخافي وحياتك الا اتقدملك ونتزوج غصب عنه لاخوكي هاد الي عاملتيلي اياه بطل زمانه
بس يا خوفي بعد كل هالوصف يطلع متل قاسم ابن عمي
منال: ليش ماله قاسم
خالد: ههههههه مسكين عالبركة
لا بكش ولا بنش الكل عنا بيتخوتو عليه بس انا بحبه وبحزن عليه
منال: هههههههه لا اطمن اخي مو متله
باليوم الي بعده نزلت شفت خالد بسيارته
تفتل فيني ولفينا الشوارع وحضني وقلي رح تكوني مرتي بوعدك بهالشي
كان جايبلي قنينة عطر معه هدية
فتحتها وكل شوي قرب لعنده ليشم ريحتي
حاول يقرب اكتر من المفروض صديته
منال: لنصير مع بعض بالحلال مو بس رح خليك تشم
رجعت عالبيت وانا عم اتخيل يوم رجعة ماجد وخالد كل يوم رن عليه لاساله شو صار معك بموضوعنا يقلي اصبري شوي
مرق اسبوع وكان يوم ترويحة ماجد
رن علي خالد وطلب يشوفني تحت بيتنا شوي
منال: ما بقدر شوفك اليوم اخي بيوصل
خالد: ضروري نحكي انزلي لتحت شوي خلينا نلتقي
منال:طيب بس ما بطول
نزلت لعنده وانا حاطة ببالي انه رح يخبرني شي خبر حلو
ركبت جنبه بالسيارة وكانت ملامح وجهه كلها ما بتتفسر
خالد: انا اسف يا منال
منال: اسف على شو
خالد: حاولت كتير مع اهلي حاولت اقنعهم بس ما عم يقبلو
اخدت نفس ( قصدك ما عم يقبلو فيني انا )
خالد: والله ما تركت طريقة لحتى اقنعهم فيها بس مع هيك ما وافقو
امي غضبت علي وابي حلف يمين اذا ببقى مصر عليكي
الا يدمرني ويخللني بالسجون
ابي وبعرفه بيعملها ممكن يبعت اي بنت عندي عالمشفى عاساس مريضة وتشتكي علي لاني اعتديت عليها
منال انا والله حبيتك وبحبك بس انسيني
حاولت استوعب الحكي شوي حتى من صدمتي نسيت اخي وجيته ونسيت كل شي
نزلت من السيارة ورجعت عالبيت ما وقفت بكي
مستحيل خالد يعملها
انا بعرف انه بحبني ولا يمكن يتركني ويروح
وصل ماجد وبلشت المشاكل على اصغر واتفه الامور يعملي قصة واذا فكرت رد عليه يضربني
ما بيعرف انه مو ناقصني هم مو حمل ضربه واهانته
الي جوا قلبي من هم وحرقة دم كافية
كنت كل يوم رن على خالد بالبداية كان يرد علي ويقلي انه اهله ما غيرو رايهم وبعد هيك ما عاد رد علي ابدا
صرت حسه عم يتجاهلني او عم يطنشني
اكتر الاوقات الي حس فيها براحة وحس فيها بحزن وشوق لما يجي الليل
كنت برتاح من اخي وصوته وبنفس الوقت بحن لخالد كتير
بشتاق لايامي معه لصوته لذكرياتنا سوا
فتحت على اسمه عالواتس اب كان مغير الصورة وحاطط صور دبل انجنيت كان في براسي عقل وطار
رنيت عليه مرة ومرتين وعشرة لحتى بالاخير رد
منال: مبروك يا عريس
خالد: منال بكفي خلصنا
منال: وحياتك ما خلصنا هلا ابتدينا عارف ليه لاني حبيت واحد مو رجال حبيت واحد مو قادر يمون على حاله
خالد: منال كم مرة قلك اياها مو طالع بايدي شي
امي بدها تزوجني دكتورة خاصة اني وحيدها ما قدرت خليها توافق اتزوج وحدة مو متعلمة ما بقدر اغضب اهلي كرمال وحدة
منال: طالما بتعرف حالك طرطور ليش لتعلق بنات العالم فيك
روح يا خالد تزوج ما عادت فارقة معي
بس بوعدك ما خليك تنساني بوعدك تشوف وجهي بوجه مرتك ،،،، بوعدك تخربط باسمها وتناديلها باسمي
صحيح انت ما ممكن تغضب اهلك كرمال وحدة وانا مو اي وحدة انا وحدة استثنائية
سكرت الخط معه غمرت مخدتي وبكيت
ووقتها اجتني الفكرة الشيطانية
( رقم ابن عمه قاسم معي وحياتك يا خالد لبكيك دم بدل الدموع )
دقيت على قاسم وعملت حالي مخربطة بالنمرة وحكيت معه بصوت نااااعم كتير ويا دوب طالع ولانه قاسم اهبل وعالبركة ما اخد معي غلوة
رجعت دقيت عليه وقلتله انه صوته عجبني وهو صدق حاله
طلبت منه يجي يطلبني ويخليها عائلية لانه عنا حالة وفاة
اخترعتله اياها انه بنت عم ابي متوفية لهيك ما بدنا ناس كتير بالخطبة
وحتى بدون ما يشوفني وافق يجيب اهله ويجي
بالفعل بعد بومين اتصلو الجماعة بامي واخدو موعد منا
ماجد: حطي ببالك اذا الشب عجبني رح وافق عليه لا بقى تتدلي وتعمليلي فيها المقطوع وصفها
منال:……
اجو الجماعة عنا هلا مبدأئيا كشكل قاسم ما بيشكي من شي بس هو عيبه اذا حكيت معه ما بيعرف يركب كلمتين عبعض
حكى ابوه مع اهلي وقلهم انه وضع قاسم خاص شوي
بس قلنا عن وضعهم المادي انه مرتاح ورح يخليني سعيدة طول عمري ومن هالكلمة اجت الموافقة
طالما في مصاري في موافقة
وحددنا يوم الخطبة كمان
قاسم كان انسان بسيط طيب ما بيحمل بقلبه اي كره
شو ما بقله يقلي حاضر
طلبت منه نلغي فترة الخطبة ونتزوج مباشرة وهو ما رفض ابدا حتى اهله كانو شايفني ومو مصدقين انه ابنهم قاسم اخد صبية حلوة هالقد
منال: شو قاسم مع مين عم تحكي ليش معصب
قاسم: هاد ابن اب ععععمي بده اياني افسخ الخطبة
قال مستحيييل وحدة تقبل فيني
ما بعرف ليش هيك حكى معي م م مع اننه كاااان دايما يحكيلي الف وووحدة بتتمناني
منال: شفت لهيك عم قلك استعجل بالعرس
يوم العرس
لبست اجمل بدلة موجودة بالمحل وعملت شعري ومكياجي عند افخم صالون
مين ما شافني يوم العرس انبهر بجمالي ما بقي حدا وما صلى عالنبي
واجت اللحظة الي عم استناها الي كتير لما بدي التقى بخالد
صحيح خالد كان بيعرف اسم خطيبة قاسم وعيلتها
وحاول كتير يفركشها وما طلع بايده بس هلا المواجهة غير
دخل خالد وابوه وولاد عمماهم والكل حتى ينقطو قاسم
اول ما فات خالد ركضت لعنده مرته وشنكلت ايدها بايده
مقارنة مع خالد هي مو حلوة ابدا
ومقارنة مع جمالي كانت بشعة كتير
قربو علينا سلمو وحط النقوط بايد قاسم واجا سلم علي
كانو عيونه عم يقدحو شرار
بس انا كنت متجاهلته عالاخر وكل وقتي اضحك مع قاسم واغمره
مسكين كان مفكر انه دخل الجنة بس ما عرف انه باب الجنة انقفل وانفتح باب جهنم لما دخلنا انا واياه على شقتنا
والي كانت بالطابق الي تحت بيت خالد
ما قدرت خليه يقرب مني صرت ابكي بطريقة هستيرية هو تفهمني وحاول يبعد عني بادب وبدون ما يجرح كرامته اكتر
ومع كل كلام اهله ومعاملتهم الطيبة ما قدرت حب قاسم
ولا حتى اتعامل معه منيح كنت عامله متل كأنه عامل او اجير بيشتغل عندي
واكتر شي كنت استناه بفارغ الصبر هو جمعة العيلة كل اسبوع
البس احلى واغلى شي عندي واكتر شي مشلح ومبين مفاتني بدي احرق خالد حرق
بده دمره متل ما دمرني واكتر
كانو كلهم مجموعين عند دار اهله لخالد دخلت عليهم بفستان ابيض قصير نزلت شعري الاشقر الطويل عظهري مع مكياج ملفت يبين لون عيوني الي متل لون الشمس
وعطر فيك تشمه من تاني بلد
دخلت وقعدت جنب قاسم بكل حب
ما كان بس خالد عم يسرق النظر علي
كل ولاد عمامه وحتى ابوه وعمه ونسوانهم يطلعو فيني بنظرات
شي غيرة وشي حب وشي بيتمنى لو انه مكان قاسم
شفت مرت خالد دخلت عالمطبخ وعملت حالي بدي اشرب مي وفتت وراها
ام خالد: خليكي لك بنتي هي البنات هلا بجيبولك مي اقعدي
منال: لا والله خالتو انا بقوم والا انتي مو معتبرتيني من اهل البيت
بكل حركة كنت اعملها او تصرف عيون خالد ملاحقيتني
دخلت عالمطبخ كانت مرت خالد وجدان
قاعدة مع اخته وبتشكيلها منه وكيف انه بارد وجاف معها
فرحت من قلبي كتير
دخلت لجوا وصبيت كاسة مي
وجدان: وانتي منال كيفه قاسم معك
منال: اووووه احسن من هيك ما في يا ريت كل الدنيا متل قاسم
وجدان : ايه الله يهنيكي دخلك منال شو اسم العطر الي حاطيته كتير حلوة ريحته
منال: مممممم اسألي خالد هو بجاوبك هي هدية منه
تركتها عم تحكي مع حالها بالمطبخ وطلعت لبرا
رجع كل واحدعلى بيته وانا ناطرة يا ترا شو رح يصير بين خالد ومرته
استفزني كتير سكوتها حتى ما رجعت سألتني شو بقصد
لو انا كنت مكانها قمت الدنيا وما قعدتها
بقيت يومين ما شفت حدا من قرايب قاسم وباليوم التالت نزلت عالسوق اشتري شوية تياب وانا مروحة شفت خالد عالمدخل
خالد:اهلا بالعروس
منال: اهلا فيك يا عريس
خالد: انتي ليش لمحتي لوجدان شو استفدتي
منال: خليها تعرف شو يعني
خالد: ايه وخلي قاسم يعرف
منال: ليكو جوا عندك فوت خبره
خالد: بتعرفيه مو رجال ما رح يعمل شي لهيك مو فارقة معك
منال: هئة بس بعرف انه بحبني كتير
وانت شو صار مع مرتك تركتلك البيت
خالد: لا مرتي اوعى من هيك فهمتها انك كنتي نزوة بحياتي وانتهت
منال: ايه يلا منيح الله يوفقك
خالد: كونه مرتي عرفت حاولي تتجنبيها
منال: هي الي تتجنبني مو انا هي الي بتخاف مني مو انا
باااااي
بعد ما عرفت وجدان وبعد ما ضحك خالد عليها بكلمتين
صرت حاول استفزها بكل لقاء وبكل مكان بنلتقى فيه
ومع انها بكل مرة كانت تهزمني بقوتها وجبروتها وثباتها
كنت ارجع حاول اكسرها
كنت بعرف مزبوط انه هي موعد ترويحته
فتحت خزانة تيابي اخدت فستان قصير احمر لبسته
رفعت شعري بمشبك ناعم
مع شوية مكياج ورشة عطر من قنينة اسكادا بلو كان هو مهديني اياها قبل ما نفترق باسبوع
اخدت ممسحة وطلعت برا عالدرج لامسحه وقت جيته
سمعت صوته من برا
بعرف كتير نحنحته وهو عالدرج
كان عم يقول ( يا ساتر
يا ساتر
يا ساتر )
وصل لعندي وفتح عيونه على وسعهم وبلحق فيني
( انا كم مرة قلت يا ساتر )
منال : ما سمعتك ابقى علي صوتك وقت تفوت
قرب لعندي مسك ايدي التنتين وحطهم ورا ظهري
خالد: كل العمارة سمعت صوتي لا بقى تجذبيها علي
مسكت طرف قميصه بحب : وانا قلتلك اني ما سمعت
شو بكذب يعني
خالد: لا تجنيني منال بعدين شو هاللبس الي عم تمسحي الدرج فيه افرضي حتى فات عالعمارة غيري
منال: انت وغيرك واحد ما بتفرق كتير
كز على سنانه بقوة ( منال من الاخر شو بدك
دخلتي لنص العيلة وسكنتي بنفس العمارة وتزوجتي ابن عمي شو ظل بدك مني )
منال: لسا وحياتك ما حرقتلك قلبك بحجم حرق قلبي لسا الراس الكبير
خالد: شو بتقصدي
لزقني بالحيط ورفع راسي بايديه ( اوعي ثم اوعي تقربي ناح ابي عم نبهك انا )
بهاد الوقت كمان وقت ترويحة مرته من الشغل
فاتت علينا وكانت حامل كم كيس بايديها
وقعو من ايدها وحطت كفها على تمها
بعد عني خالد بسرعة تركتنا وفاتت على بيتها وهو لحقها بسرعة
ضحكت ضحكة خفيفة وقلت بصوت واطي ( لسا ما شفت شي )
سمعت اصواتهم طالعة لبرا قفلت باب بيتي وفتت
اكتر شي عجبني انه خالد عارف اني بقدر عالكل
وعارف انه ما الي حدود
حتى خاف على ابوه مني
بعدها بتلت ايام كنت واقفة عالبرندة بنتف بوردة لما فاتت لعندي وجدان
وجدان: هههههههه شو عم تقوليلها بحبني او ما بحبني
رفعت شعري عن وجهي
( انا مو متل بقية العشاق بقلها بحبني او ما بحبني
انا بسال الوردة نسيني او لسا بذكرني )
حسيت انه لهون وبكفي لازم زود العيار شوي
والشخص نفسه الي كان ممانع زواجي من خالد رح خليه يركض وراي
استغليت فرصة انه قاسم بالشغل وغيرت تيابي ولبست وتزبطت وتصورت عدة صور باكتر من شكل
وبعتهم لرقم ابوه لخالد
نطرت خمس دقايق لتأكدت انه شاف الصور
وبعتله رسالة
( اووووه اسفة اسفة كتير كنت بدي ابعتهم لقاسم بالغلط وصلوك )
……
#نهاية_امرأة_بقلم_حنين_طه
الجزء التاني
كنت عم اشتغل بلا عقل بدون تفكير
الانتقام عمى على قلبي
بدل ما كنت البس وانطر خالد ليروح من شغله صرت البس واتجهز وانطر ابوه لخالد
البس اشكال الوان وحط العباية عحالي وخليها مفتوحة
هو يصفن فيني وما يقدر يحكي
كان عم يحاول يصمد قدامي بس انا كنت مستعدة زلزل الدنياا لا حصل على الي بدي اياه
اخر مرة التقت العيلة كلها قبل ما اخد الي بدي اياه
كنت مزبطة حالي عالاخر وعم قدملهم العصير
عملت حالي كبيت العصير على تياب ابوه لخالد وانا كمان وقعت على اجريه
غمزته وبعدت عنه
الكل ركض علي ليمسكوني ويشوفو اذا تأذيت الا خالد
كان قلبه حاسه شو عم العب من وراه
الساعة 12 ليلا رن تلفوني
رديت بصوت ناعم على ابوه لخالد
ابو خالد: كيفك منال
بعتذر على اتصالي بهيك وقت متأخر
منال: ما تهتم اصلا انا قلقانة مو عارفة نام
ابو خالد: يا لطيف شو مسهر صبية حلوة متلك
منال: قاسم نام على بكير وانا سهرانة بتعرف انت الوحدة منا بتكون نفسها تسهر مع زوجها تقعد معه تدلله
بس للاسف قاسم كل حياته شغل ونوم
ابو خالد: لك صحيح انتي كيف تزوجتيه لقاسم يعني انتي بتاخدي سيد سيده
منال: شو بعمل اذا سيد سيده متزوج وعند غيري
انا ما بحب الشب الصغير بالعمر الي لسا ما بيعرف شي بالحياة
بحب الزلمة الواعي الكبير الي فعلا الوحدة تحس حالها عايشة مع زلمة
ابو خالد: احم يعني لو انتي متزوجة واحد كبير شو ممكن يتغير عحياتك
منال: قال شو يتغير قال رح عيشه بالسما كل يوم البسله شي شكل
اول ما يرجع من دوامه حطله اجريه بمي وملح
افركله اياهم
اطبخله شغلات زاكية
اعمله كل شي بنفسه
ابو خالد : نياله معناها سعيد الحظ
منال: طيب انا رح سكر في شي
ابو خالد: اااه لا كنت بدي اسألك اذا انتي منيحة لانك وقعتي اليوم
منال: طول ما انت عم تطمن علي اكيد انا منيحة
طبعا كان عامل فيها الرجال الثقيل قعد كم يوم لا يدقلي ولا يحاكيني
لكن صبره نفذ رن علي بحجة بده يسأل عني
وانا استغل الفرصة بالدلع والضحك وانه ارسمله حياة وردية ما صارت اذا بتزوج واحد كبير بالعمر
الغريب كان لما صار يحاول يقنعني اطلق من قاسم واني اختلق المشاكل مع قاسم لننفصل وهيك بيخلالي الجو وبتزوج واحد كبير بالعمر يقدر جمالي وانوثتي
منال: يعني لو اتطلقت من قاسم بتتزوجني
ابو خالد : انا بس بس
منال: لسا هلا كنت احكي عنك رجال والوحدة فيها تسند حالها فيك
انا بوقتها كان كل همي العب فيه شوي صور محادثته وفرجيها لخالد ما كان بخيالي اكتر من هيك بس لما سمعت بخبر حمل وجدان مرته لخالد نار وشعلت جوا صدري ،،،، حزنت على حالي وعلى نفسي كتير
قديش انا تعبت وتحملت كرماله وهو عايش حياته ولا سائل
وكملت على راسي لما اجا حاضن وجدان وخبرنا انه رح يسافر هو واياها سياحة على تركيا
وقتها قلبت الفكرة جد براسي وقررت فعلا اطلق من قاسم واتزوج ابوه لخالد
منال: هالة قومي البسي عحالك وتعي لعندي بدي احكي معك شوي
هالة: خير شغلتي بالي
منال: هلا تعي وبس تيجي بتعرفي
وصلت عندي هالة وكنت باسوء حالتي
طالعت سيجارة من باكيت الدخان وصرت دخن
هالة: لك وصايرة تدخني كمان
منال: انا رح اتزوج
هالة: تتزوجي اسم الله عليكي انتي اصلا متزوجة
منال: هالة افهمي علي بدي اطلق من قاسم مو قدرانة حبه ولا عيش معه
هالة: الناس مو بالمناظر يا منال وقاسم الف بنت بتتمناه على طيبة قلبه واخلاقه
انتي مو قادرة تحبيه لانه كل تفكيرك بخالد وحاطة مساحة عقلك وقلبك بس اله
منال: مو قادرة اتحمل يا هالة مرته طلعت حامل
لك بتعرفي شو يعني يعني عايش معها حياة طبيعية متل اي زوجين وانا وين انا طالعني من حياته
هالة : معناتو ارضي انتي كمان بنصيبك وطالعيه من حياتك
منال: مستحيل بدي اطلق من قاسم واتزوج ابوه اخالد
هالة: انتي اكيد جنيتي لك انتي عم تلعبي بالنار بتعرفي انك تتزوجي ابو خالد
يعني انتي وخالد صرتو بخطين متوازيين مستحيل تلتقو بيوم انتي هيك بتصيري مرت ابوه يعني تحرمتي عليه
منال: بعرف هو الي رسم هالخطين وانا رح كمل الرسمة
وانتي لولا ما انتي رفيقتي المقربة ما خبرك بمخطاطاتي
روحت هالة من عندي وابتديت بخطة تطفيش قاسم
ما احكي معه
ما اضحك بوجهه
صرخ فيه وبامه
اغلط عليه
وامه كل شوي تفوت لعندي وتحاول تهديني
(( يا بنتي برضاي عليكي تكسري الشر وتخزي الشيطان وتقعدي وتكني بقا ببيتك ))
منال: بدي اتطلق
هالكلمة ما صدمتها لحماتي حسيتها متل وكأنها كانت متوقعتها ،،،، حاولو اهله كتير يصلحو بينا وقابلت الجميع بالرفض
والي سندني وساعدني اخي ماجد مسافر وما في حدا يقلي لا
قاسم: منال اذا انتي حابة تتطلقي انا ما رح اوقف ضد سعادتك بس بدي اياكي تعرفي اني حبيتك وبحبك
ما بعرف ليش حبيتك مع اني ما شفت منك حتى ريق حلو
بس خلص حبيتك من قلبي
كانت بايدي كاسة شديت عليها لحتى انكسرت بايدي
منال: قاسم انت شب كتير منيح انا ما بستاهلك انت بتستاهل احسن مني
بتستاهل تعيش مع وحدة افضل مني بس انا ما بقدر ما بقدر
حاول يفهم مني شو عم احكي ولشو عم لمح بس كنت كتير دقيقة باجوبتي وحريصة وبعد هاليوم قاسم طلقني بناءا على طلبي ودفعلي كل حقوقي
ضبيت تيابي واخدت اغراضي وطلعت وانا طالعة شفت خالد ومرته عباب العمارة لما شافني قرب لعندها حضنها ومسك ايدها
خالد: شو ما طولت قعدتك هون
تجاهلت كلامه ومشيت لبيت اهلي لحتى كمل العدة عندهم وظليت على تواصل بابو خالد
علقه فيني اكتر واكتر حتى صار متل الخاتم باصبعي ووتاني نهار من ما خلصت عدتي اجا تقدملي
امي: لك منال امي شو جابرك على هالشي بدك تتزوجي واحد قد ابوكي
منال: معلش امي بيظل زلمة واله كلمته واله سمعته
امي: ولا تنسي انه بكون عمه لطليقك
منال: كل شي لحال امي
بالبداية كانت امي وابي معترضين على زواجي من ابو خالد
بس قد ما حاولت اقنعهم وتمارضتلي شوي وافقو
وكان الشرط انه ببداية زواجنا يكون الموضوع سري
نزلنا عالمحكمة كتبت كتابي ورحنا انا وابو خالد على فندق قضينا ليلتنا الاولى هناك
ما قدرت ابعده عني لانه كان رح يشك فيني تجاوبت معه وانا قرفانة منه ومن وجوده
بيشبه خالد كتير نفس الحقارة ونفس النجاسة
خالدانجر ورا العلم ومركز مرته
وابوه خان ام ولاده وانجر ورا الجمال
بقي زواجي من ابو خالد ما يقارب الشهرين سري وكل ما يتركني ويروح عند مرته وولاده ظل اتصل فيه ليجي عندي
كنت بدي يتعلق فيني حتى لو شو ما اعمل بعد هيك ما يتركني حتى اعترفلي انه كان مفكر حاله بيعرف نسوان بس بعد ما تزوجني اكتشف انه ما في غيري نسوان بهالدنيا
في عمارة اهل خالد
غيرت تيابي واخدت تكسي ورحت لعند بيت اهله لهالد ومعي ورقة من المحكمة بتثبت زواجي من ابو خالد
ونزلت عندهم
وجدان : شو منال بشوفك عنا لتكوني بدك ترجعي لقاسم
منال: وينا حماتك
دخلت لعند ام خالد كانت قاعدة هي وخالد ووجدان وابن خالد الصغير
خالد: انتي شو جابك لهون
منال: جاي على بيتي
خالد: …….
منال:خد اقرا
مسك الورقة وبلش يقرا فيها وعرقه بينزل من كل مكان بوجهه
خالد: تزوجتيه لابي
امه من سمعت هالكلمة وقعت من طولها
وجدان: الله يلعنك يا خطافة الرجال لك انتي شو
ربنا من شو خلقك ما بتحسي ما عندك دم
الله يقرفك
اخدت ورقة زواجي وسلمت عليهم وطلعت
المسا اجا ابو خالد لعندي وكان معصب كتير صار يصرخ فيني ويضربني على وجهي ويسب علي بابشع المسبات
ورمى علي يمين الطلاق وطلع
ما توقعت ابدا يتنازل عني بهالسهولة ما توقعت هون عليه
انهرت تماما وقعدت عالارض ابكي
الي فهمته بعدين انه خالد ووجدان حكو لابوه كل شي عن علاقتي بخالد وحتى انهم مخبرين قاسم بكل شي
وابو خالد لما حس انه انضحك عليه اجا وطلقني
رجعت لبيت اهلي مطلقة للمرة التانية
حاولت رن على ابو خالد كتير لفهمه واحكي معه ما كان يرد علي
والي صعب الامور علي ترويحة اخي ماجد اجا ليشوف اخته الي اطلقت مرتين شو عملت لحتى عم تتزوج وتتطلق
وبدل ما يمسكني ويحضني كمل علي
اكلت قتل بعمري ما بنساه انضربت لدرجة اغمى علي
نقلوني اهلي عالمشفى وهناك تبين اني حامل
ما بعرف شو شعوري وقتها حامل بولد رح يصير اخوه لخالد
ما حسبت الامور ممكن توصل لهون ولا فكرت اني ممكن اخسر كل شي بلحظة
ماحد: اسمعي وليه هاد الي ببطنك يا اما بتنزليه او اول ما ينولدبتروحي بتسلميه لابوه اوعي تفكري انه رح يبقى معك
منال:……
ايام حملي ايام صعبة وحام ولعية نفس صعب كتير بس احلى شي فيه اني عم حس ابني جوا بطني
حاولت اتواصل مع ابو خالد لخبره اني حامل ما رد
لحتى راح ماجد اخي لعنده وخبره وكان جوابه تحمله هلا واول ما تولده انا بجي باخد الولد وبربيه
معقول قسي علي لهدرجة معقول قدرو يلعبو بعقله ويخلوه يكرهني هيك
المشكلة اني فكرت بحملي رح اقضي على الشيطان الي جواتي طلع انتقامي اكبر مني
رنيت على خالد
خالد: شو الاب ما عاد يرد عليكي قلتي بنرن على ابنه
منال: بدي شوفك
خالد: بصفتك شو
مرت ابي
الا طليقة ابن عمي
الا حبيبتي
منال: شو ما بدك المهم شوفك
اتفقت انه واياه نلتقي بالشقة الي كان ابوه متأجرها لالي قبل ما نتطلق
نطرت الكل لينامو وبالليل تسحبت شوي شوي من غرفتي وطلعت من البيت
دخلت عالبيت ضويته وقعدت عالكنابة ناطرة خالد
وصل بعدي بربع ساعة ،،،، اول ما فات ضميته وصرت ابكي
حط ايديه على راسي ليهديني بس هو ما كان جاي يهديني ولا كان جاي يسمعني كان جاي لياخد حاجته ويتركني ويروح
ما بعرف ياخد حاجته من مين
من مرت ابوه
الا من طليقة ابن عمه
الا من حبيبته السابقة
بلحظة تذكرت كل حياتي تذكرت كل شي مرق بعمري
منال: خالد اطلع لبرا
خالد: لك مالك معقول ما اشتقتيلي متل ما اشتقتلك
منال: قلتلك انقلع لبرا
خالد: رح تندمي على هالعملة جبتي لهون لتعملي حالك محترمة وتقلعيني
صرت اضرب فيه على صدره لحتى طلعته لبرا
لاول مرة بحياتي بخاف منه ،،،، بخاف قرب ناحه
قرفت منه
بسرعة طفيت الاضوية كلها سكرت الباب ورجعت عالبيت
بس اول ما دخلت كان اخي ماجد قاعد بالصالة وناطرني
ما بعرف شو فيقه وخلاه يعرف اني مو بالبيت
بعد هيك ما وعيت على شي ولا صحيت على اي شي
صرت شوف خيالات والضرب يجيني من كل مكان بجسمي وبسبب هالضرب كله نزلت الي ببطني
في المشفى
وضعي خطر وامي فوق راسي عم تبكي وتقرا علي قران
منال: انا وين
امي: بالمشفى يا روحي
منال: امي جسمي كله بوجعني تعبانة
امي: ااااخ الله يهديك يا ماجد
منال: الله يكسر ايديه لنرتاح منه
امي: ليكو محبوس اخدته الشرطة
منال: ان شاء الله بظل كل عمره بالحبوس
امي بدي اطلب منك طلب
هاد رقم بنت اسمها وجدان بدي تتصلي عليها وتطلبي منها تيجي لعندي واذا رفضت ترجيها تيجي لازم تيجي
اني: ما خلصنا من هالعيلة
منال: رح نخلص صدقيني
بعد ساعة اجت لعندي وجدان وهي مترددة رجل عم تقدم ورجل بتأخر
منال: فوتي وجدان انا الي طلبت شوفك (كان بدي احكيلها كل شي وريح ضميري )
خبرتها عن كل شي كان بيني وبين خالد
كيف تعرفت عليه ،،،، كيف خلاني حبه
كيف ضحك علي ،،،،، وقديه حبيته وقديه كان نسيانه صعب
نسيانه كان متل رشة عطر على جرح عم ينزف بوجع كتير وصعب يلتئم
خبرتها عن اخرليلة شفت فيها خالد وحلفتلها انه ما صار بيني وبينه شي
قامت عن كرستيها وقالتلي ( مشافية )
منال: وجدان اخر طلب بدي اطلبه منك قولي لقاسم يسامحني
ابتسمتلي وهزت راسها وطلعت
بصراحة ما استغربت ردة فعلها لاني متعودة على هدوئها بكل شي
………………
بعد مرور شهرين
سمعت انه وجدان وخالد اطلقو بس لهلا ما بعرف السبب
انا من كتر الضرب الي اكلته على راسي صار عندي مشكلة بالنظر ما بشوف منيح او يمكن يا دوب بشوف
اخي ماجد طلع من السجن واخدني انا واهلي ورحنا عشنا عنده
على ذل واهانة وخدمة لاله
وكل بسبب شو بسبب انانيتي وحقدي
انا غلطت بعرف اني غلطت كان معمي على قلبي
كنت بدي احرق قلبه متل ما عمل فيني ،،،، كنت متصورة يترك كل شي بيوم ويرجعلي
كان عندي امل المي ترجع لمجاريها بيوم بس ما كانت بعرف انه المي بترجع لمجاريها بس ما بتعود بتنشرب
الي صار مو ذنب خالد مع انه ضحك علي
لكن لا الذنب ذنبه
بلا كانت حمااااقاتي
ملاحظة: القصة واقعية لصبية معنا بالجروب بتمنى ما تجرحوها بالتعليقات