البقلاوة التركية وأصابع الوزير حلويات تركية تعلمها بالخطوات المصورة
البقلاوة التركية وأصابع الوزير حلويات تركية تعلمها بالخطوات المصورة
معكم صديقتكم الشيف الموهوبة Silva Aydogan
شو رايكم بصحن بقلاوة تركية وعلى اصولها من تحت ديات الشيف انا 
😁
اسمها التركي عِش البلبل والنوع التاني اللي مبين بالصور بيسموها أصابع الوزير ( يقطع عمرو 
😬) بس انا قصيت أصابعه الى ٣ قطع صغار وحرقتهم كمان شوي ( اعتراف بالجريمة بالجرم المشهود ) بس أكيد ماحدى لا يشهد علي بعرفكم اصحاب قلوب طيبة ومابيهون عليكم انظلم 
😘😘😘
بس الصراحة طعمة أصابعه بتجنن 
☺️
طولتها عليكم وهي الطريقة :
المقادير :
علبة عجينة البقلاوة الجاهزة ( نصف كيلو وبتجي ١٨ قطعة مستطيلة )
نصف كوب فستق حلبي
كوب ونصف فستق حلبي مطحون ناعم ( هي الكمية مشان النوعين من البقلاوة بس اذا بدكم تعملو بس عِش البلبل بيكفي نصف كوب )
كوب زبدة وكوب سمنة
القطرة :
٣ كوب سكر
٤ كوب ماء
ملعقتين عصير الليمون
الطريقة :
اول مرحلة بنطحن الفستق منيح وبعدين نحط مواد القطرة على نار وسط ونتركها تغلي
نسيح السمنة والزبدة مع بعض ( وهاد اللي بيعطي البقلاوة نكهة خاصة )
متل ماواضح بالصورة بمساعدة فرشاية ندهن وجه اول عجينة بالسمنة وبعدين بواسطة عود رفيع وطويل بنلف طرف من العجينة ونحط فوقها قليل من الفستق المطحون وبعدها نلف العجينة كلها على العود .
خذي العجينة من الطرفين بإيدك وادفعيها نحو اتجاه واحد مشان تصغر العجينة لنصف الطول
والطريقة موضحة بالصور .
بعدها تسحبني العصا من العجينة وقطعيها بالنصف ( ملاحظة هام جدا هي المرحلة : افتحي شوي من العجينة الملفوفة تقريبا ٢سم ولفيها على شكل دائري بحيث انو هي العجينة اللي فتحناها بتكون بالنصف والسبب انو لما نحشيها فستق هي بتساعد انو الفستق مايقع من العجينة وقت التقديم )
وهكذا نعمل كل العجينة ونحطها بصينية مدهونة سمنة او زبدة .
ومشان أصابع الوزير 😬 ندهن وجه العجينة بالسمنة ونرش عليها الفستق الحلبي ونلفها وبعدين نسحب منها العصا من دون مانشكل العجينة ونقطعها حسب مابدكم ( أصابع او أصابع مقطعة 
😂)
ندهن البقلاوة بعد التشكيل بالسمنة الباقية ونحطها بالفرن ١٨٠ درجة حرارة وتقريبا ٤٥ الى ساعة حسب الفرن اللي بنستعملو يعني لحتى يصير لونها ذهبي مع الحفاظ على أصابع الوزير ماتحرقوها أمانة 
اخر الشي طولتها عليكم واهم الشي بس تطلع البقلاوة من الفرن بترشوا عليها القطرة الساخنة
يعني القطرة والبقلاوة بيكونو ساخنين مشان نتيجة افضل وصحتين وهنا
وأي استفسار من عيوني
الشيف سيلفا قطاعة الاصابع 😂😂😂
