قصة الليلة بعنوان سلف ودين لحنين طه
هذه القصة تأتيكم من قسم المنوعات في زاكي
قصة الليلة بعنوان سلف ودين لحنين طه
#سلف_ودين
الجزء الاول
عمرك حسيت انه الدنيا متل ما بتعطيك بتاخد منك
طيب شعرت شي مرة انه الحياة عم بتحاسبك عغلط انت ما غلطته ………….او يمكن غلطت بس الحياة قسيت كتير بعقابها
الليل بهدوءه مغطي عالمكان كامل ما في صوت ولا حركة
ممرضة فايتة ووحدة تانية طالعة من عندي لحتى يطمنو علي فجأة ارتفعت الاصوات كتير بالمشفى وصرت سامعة صوت خبط قوي برا فاتت لعندي ممرضة وسحبت الخزانة وحطتها ورا الباب
الممرضة سهيل: دكتور جمال الحقنا اهل المريضة برا وقالبين الدنيا قلب عم بكسرو وبطبشو والله انا متت رعبة
الدكتور جمال: العما هدول مو حاسبين حساب لا لقانون ولا لغيره
ابعديلي هيك انا رح وقفهم عند حدهم
سهيل: شو بدك تعمل
جمال: بدي اتصل بالشرطة ما حدا رح يقدر يردعهم الا الشرطة
بعد عشر دقايق بالزبط كانت الشرطة محاوطة المشفى ولامة ابي واخواني وعمامي وولادهم كلهم
كنت قاعدة على سريري ومتكومة على حالي مو قادة احكي سامعتهم من برا بهددو بمدير المشفى الدكتور جمال ولما اجت الشرطة عليت اصواتهم اكتر لحتى اختفى الصوت تماما وما عاد حسيت بوجودهم
جمال: سهيل البنت هاي انا لازم اعرف قصتها كاملة بالنهاية هدول اهلها ممكن احميها اليوم وبكرة بس بعدين بدها ترجع لاهلها وحتى اقدر ساعدها لازم اعرف مشكلتها كاملة
سهيل : المشكلة يا دكتور من اول ما اجت لهون وهي ساكتة وما عم تنطق كل الممرضات والكادر الطبي هون حاولو يحكو معها ويتقربو منها بس هي رافضة تحكي مع الكل
جمال: طيب والحل
سهيل: لحظة في صباح عاملة النظافة الي هون
شفت سندس كل ما تفوت عليها صباح بتاخد وبتعطي معها
جمال: شو ناطرة ابعتيلي ورا صباح خليها تحاكيها وتفهم منها موضوعها كامل
سهيل: حاضر دكتور
سهيل: صباح فهمتي علي بدي اياكي تعرفي كل كبيرة وصغيرة عن هالبنت
صباح: والله هالبنت باين عليها مسكينة ومعترة
سهيل: هلا لا تبلشي احنا بدنا نعرف وضعها لنقدر نساعدها
صباح : طيب فهمت ليطلع الضو بحاكيها
صباح
( دخلت لعندها كانت نايمة منظرها بيقطع القلب وجهها اصفر كتير عيونها ذبلانة وفي اثار ضرب على كل مكان بوجهها كان مبين عليها انه الي ضاربها كان عم يضرب فيها بدون رحمة
حطيت ايدي على وجهها بحنية ارتعبت ونقزت وفاقت علي
صباح: بعتذر يا بنتي ما كان قصدي فيقك
سندس: خالة صباح هاد انتي
صباح: ان شاء الله تكوني نمتي
سندس: الي كم ليلة ما عم نام بس الليلة كونه كل اهلي بالمخفر نمت شوي
صباح: عم بتوجعك هي الكدمات الي بوجهك
سندس: الكدمات الي جواا قلبي هي الي عم توجعني
صباح: ما بدك تحكيلي قصتك
سندس: قصتي انا ليش بدي احكيها ناقصك وجع قلب يا خالة
صباح : معليه اعتبريني امك واحكيلي الي ببالك
سندس: لا الله يخليكي خليني اعتبرك اي شي الا امي لانه اذا بدي اعتبرك امي بحياتي ما رح احكيلك شي
صباح : مممممممم اعتبريني اي حدا بتحبيه لازم تحكي يا بنتي صدقيني ما رح تندمي لازم نعرف شو وجعك لنقدر نساعدك
سندس
( من فترة سنة تقريبا )
بعدما اجا كمال اخدني من دوامي بالجامعة ركبت جنبه سلمت عليه بلطف وشغل المسجلة
لما بسمع صوتك بنسى كل الي بدي قولو بدي قلك اني بحبك ويقولو شو ما يقولو
سندس: كمال حلوة هالغنية علي المسجلة شوي
كمال: وهي يا ستي عليت الصوت بتعرفي شغلة هي الغنية بتحكي عن اشياء كتير جواتي كانها بتحكي عني
سندس: هلا جد انت بتحبني
كمال: لو ما كنت بحبك ما كنت هلا معك
سندس: طيب متى بدنا نحدد موعد العرس والله ناطف قلبي البسلك الابيض
كمال: اول مرة بحياتي بشوف بنت مو حابة فترة الخطبة
سندس: هلا مو اني مو حابيتها بس بدي نتزوج ونعيش انا واياك
كمال: طيب بوعدك رتب اموري وحدد موعد العرس مباشرة
سندس: هيك انت عيني
شو لوين رايح هاد مو طريق البيت
كمال: ايه بعرف بدي نروح لعنا عالبيت بنتغدى ومنه بتسلمي على امي واخواتي
سندس: انا ما خبرت امي انا رح روح عند دار حمايي بلاها او قلك خليها لمرة تانية
كمال: لتكوني ما وااثقة فيي
سندس: شو هالحكي لو مو واثقة فيك ما بوافق انخطبلك اصلا
————–
وقف الحكي بحلقي وما عاد قدرت كمل وامتلت عيوني بالدموع
صباح: اهدي سندس حبيبتي
سندس: سهل كتير تقوليلي اهدي بس انا صعب طبق هالحكي
صباح : ………
سندس: انا كنت مخطوبة لكمال بس مو كاتبة الكتاب
فكتبنا كتاب على جنب بوجود امه واخوانه بدون وجود اهلي وبدون علمهم كمان
صباح: لا تقوليلي ضحك عليكي بعد هيك وما عاد ثبت الزواج
سندس: ما بعرف يمكن لانه اختفى
شهقت الخالة صباح بكل ما تحمل من قوة
صباح: شلووون اختفى يعني
—————–
سندس: كمال ببوس ايدك تستعجل بقا يعني احنا مخطوبين ومقرية فاتحتنا لازم نتزوج
كمال: مفكرة انه انا ما بدي اتزوجك مفكرة انه مو مستعجل عالزواج اكتر منك كل يوم بتخيلك عم تحوسي بالبيت حولي بس مو طالع بايدي شي
شغلي معركس ،،،، وشريكي بالشغل ما عم يعطيني شي من حقي شو اعمل اسرق مثلا
سندس: هلا مو هيك قصدي بس انا خايفة كتير خايفة يجي نهار وتمل مني وتتركني هيك
كمال: في حدا بمل من روحه
سندس هلا واحنا عم نحكي خطرت ببالي فكرة
سندس: شو هي
كمال: هلا امك ما شاء الله مكنزة ومعها مصاري كتير وذهب كوميات شو رأيك تاخدي منها رزمة مصاري بنأمن حالنا وبنتزوج سوا
سندس : بدك اياني اسرق امي
كمال: لك مو سرقة مو سرقة اعتبريهم دين ورح بنرجعهم بس نتزوج ويصير معي
سندس: والله بخاف ما بقدر
كمال: يا حبيبتي يا سندس هلا معقول انا اضحك عليكي ولا فكر مد ايدي للحرام بس والله مو طالع بايدي شي مشتهي ارتاح مشتهي نتزوج واخلص من خطيتك
لا تفكري انا تعبان
سندس : بس
كمال: طيب لا ترديلي خبر هلا فكري وبعدين بتخبريني
قفلت الخط معه وانا راجع بحالي انه معقول انا اسرق امي يييي لا لا مستحيل كيف بدي حط عيني بعينها بعد هيك والله ما بسترجي
طيب شو فيها اذا كلها كم شهر ورح برجعهم بعدين امي ما رح تشك فيني ابدا رح تشك بالكل الا انا
احسن شي اقبل
سندس: الو كمال
كمال: ايه حبيبتي
سندس: انا اخدت المبلغ الي اتفقنا عليه من امي
كمال: معقول بتحبيني لهدرجة
سندس:لوتطلب عيوني ما كنت رح ابخل عليك فيهم
ما طولت امي كتير وفقدت مصرياتها وقامت القيامة عنا بالبيت واهلي ما تركو مكان ما دورو فيه ،،، انا وقتها كنت مطمنة لانه معطية المصاري لكمال
وبعد تفتيش هون وهون وبعد ما لاقو شي شكو بحدا من الجيران دخل بيتنا بغيابنا وسرق البيت
نامت الشغلة شي اسبوعين وبعدها اجا كمال لعنا وفتح موضوع زواجنا مع اهلي
ابي: يعني ابني انت هلا وضعك منيح وخرج تتزوج انت وسندس
كمال: الحمد لله عمي فرجت شريكي اعطاني جزء من حقي
ابي: ايه الحمدلله معناتا بنحدد العرس بعد عشر ايام
نطرت كمال لروح وفتت دقيت عليه
سندس: كمال انا كتير مبسوطة انه رح نتزوج ما بقي على عرسنا الا عشر ايام
كمال: شفتي انا وعدتك ووفيت بوعدي
سندس: انت روحي ليك بتتذكر اول مرة التقيت انا واياك فيها
كمال: ههههههههههه لما كنتي بالملاهي وعم تدافشي على شباك التذاكر بدك تقطعي تذكرة
سندس: ايه وجيت انت حزنت علي وقطعتلي تذاكر
كمال: ايه لانك فطعة مو مبينة ما عرفتي تشتري تذاكر
سندس: هلا انا فطعة
كمال: وهبولة كمان
سندس: بالله جد
كمال: وقلبي وعيوني واغلى شي عندي اساسا اساسا انا حبيتك لانك فطعة دخلتي قلبي بسرعة طولك ساعدك ما اخدتي وقت لدخلتي جوا قلبي
سندس: عأساس انت هيك خفيف دم
كمال: بالله ما بتحبيني
سندس: هلا بحبك شي وانك خفيف دم شي تاني
كنت حاكيه فجر وصبح وظهر ومغرب وعشا
ما اتركه ولا لحظة
بعد يومين طلبت من امي اذن ورحت انا وهو لنقي فستان العرس
هاد الفستان او هاد اختار
طيب اختاره ابيض ناصع الا بيج والله محتارة
دخلك قلي كمال مين فيهم الاحلى
كمال: انا ما بهمني اي الاحلى
ما بهمني مين الاغلى
ما بهمني الا انه عليكي ايه عليكي وبس
سندس: ممممممم احرجتني
بتعرف ما عم صدق متى يمرقو هالكم يوم ونتزوج ونخلص والله الليل ما عم نامو وانا خايفة ينكشف امرنا
قرب ناحي ومسح على راسي
( انا جنبك لا تخافي هانت كلها كم يوم وبتصيري مرتي )
كمال: شو رأيك نمر عالبيت لتشوفي التحضيرات والتجهيزات وتشوفي الوان الغرف
سندس: مممممم اي شي انت بتختارع اكيد رح يعجبني بس هلا لازم ارجع عالبيت
بصراحة من كتر ما انا مستعجلة ومتخوفة حسيت هالعشر ايام عبارة عن عشر سنين ما كان بدي اشتري تياب ما بدي اشتري جهاز ما بدي شي بدي بس اتزوج من كمال واخلص
لحتى اجا يوم عرسي ونفس اليوم الي بدي اكتب فيه كتابي
الناس كلها عم تطلع علي وتصلي عالنبي
وامي عم تزغرد ومبسوطة قربت علي شوي ومالت لناحي
لك بنتي مو كأنه دار حماكي تأخرو وتأخرت الزفة دقي على كمال او على حدا من اهله شوفي وينهم
( يا ربي ليه كمال ما عم يرد علي رح رن على ياسمين اخته لشوف وينهم )
سندس: ياسمين كيفك شو وينكم كتير تأخرتو
ياسمين:……
سندس: عم دق على كمال ما عم يرد دخلك هو قريب منك
ياسمين ليش ساكتة احكي
ياسمين: ما عاد في كمال
خلص كمال بح
قلبي صار يخفق بسرعة ورجلي ما عادو حملوني
سندس:كيف يعني بح لك فهميني كيف يعني بح
ياسمين( تبكي) ما بعرف اختفى وبس
وقتها ما عرفت ابكي على حب عمري ولا ابكي على حالي ووضعي ولا ابكي عالمصايب الي رح توقع فوق راسي
انتهى كل شي بلحظة وكل شي خفت منه وحسبت حسابه الا هالشي
كيف بلحظة وحدة كل شي انتهى ما بعرف حاولو اهلي كتير يعرفو وينه وخبرنا عنه الشرطة الي عرفته وقتها انه مسافر برا البلد
كل الناس الي كانو جايين يباركولي صارو يجو ويواسوني ويقولو يا حرام معترة ما لحقت تفرح بحالها يلا بكرة بتنسي وبيجيكي غيره
لحتى مرق على اختفاء كمال 10 شهوروانا ارفض خطابين وعرسان تقولي ما صفي بنات بالبد غيري
وقت ما كنت عزبا ما اجاني عرسان هالقد وانا كل مرة اتحجج بكمال وقول لا ما بدي
امي: واخرتها يعني سندس خانم شو رأيك تبقي العمر كله حادة على الباشا بتبقى الوحدة متزوجة ووراها عر ولاد ومع هيك بتتزوج مرة ومرتين وتلاتة بقا الله يرضى عليكي لا تخليني شوف شغلي معك
—————
صباح: يا ربي شو هالمصيبة هي طيب شو عملتي
سندس: قررت احكي لامي كل شي صار معي
صباح: ايه وشو صار
سندس: شوفة عينك انا وين وشو صار فيني
بس بتعرفي خالة صباح كله بيمرق وكله هين الا دار حماي
صباح: ليش شو مالهم شو عملو
————
راحت امي عندهم من الصبح وشافت حماتي
ام كمال: اسمعي علي يا ام سندس انااحتراما للعيش والملح الي بينا ما بدي افضح المستور روحو ضبو بنتكم وحلو عنا هوابني مو خالص منها بكفي انه مختفي كمان بنتكم جاية تتبلى عليه
بنتكم كذابة لا بينها وبين ابني زواج سري ولاشهدنا عليه ولا وقعنا عليه
—————
صباح: انكرو زواجك من ابنهم لهدرجة
سندس: يا ريتك بتعطيني شي يموتني ويريحني لاني حاسة حياتي كل مالها عم تصعب
صباح : لهدرجة موجوعة
سندس: انتي ما بتعرفي شو عملو فيني اهلي
غمرتني خالة صباح وحضنتني كانت عم تلعب بشعراتي وتحكيلي قصص عن الصبر وانه مفتاح الفرج قالتلي عن صبر ايوب
لحتى غفيت على حضنها ،،، حسيت عليها لما شالت راسي عن حضنها بس كنت تعبانة كتير كملت نومتي وما عاد شعرت بشي
الساعة 5 صباحا
( حالة طوارىء بالمشفى والكل مو موجود مكانه )
صباح : خير يا سستر سهيل شو في ليش حالة الاستنفار هي
سهيل : سندس اختفت مو موجودة بغرفتها
صباح
تركتني الممرضة سهير وراحت تشوف اذا في اخبار عن سندس
سمعت صوتها من بعيد كيف ممكن انسى صوتها ونبرة صوتها
بهية : وينها بنتي وينها سندس
التفت عليها
بهية: هاااد انتي
صباح: بعد زماااان يا بهية
……
#الجزء التاني
اوقات بكون بدك تهرب من كل شي حولك وتخلص بس في قيود حولك بتكون رابطتك وما بتقدر تتعداها
بقيت يومين نام بالحواري اتفتل من مكان لمكان لحتى تعبت ويأست
دخلت على محل اتصالات وطلبت من الشغيل هناك احكي تلفون ودقيت عالمشفى لاطلب عنوان صباح ،،، كذبت وقلتلهم انه انا صاحبة مساعدات وبدي اعرف مكان بيتها لوصللها مساعدات ،، كان بيتها بعيد عن مكاني شوي وقفت تكسي واخدته لبيتها
سندس: اخي استنى هون شوي رح فوت اخد من خالتي فلوس وبرجع ادفعلك اياهم لانه والله ما معي
السواق: مو مشكلة اختي خدي وقتك
دقيت عباب البيت لحتى فتحتلي الباب
صباح: سندس
سندس: هربت كان بنفسي موت كنت حابة انتحر بس طلعت جبانة خفت انتحر وجيت لهون عندك عبر الامان
اطلعت فيني بنظرة كلها حزن وبنفس الوقت كانت جازمة بنظرتها
سندس: خالة بزعجك شي اذا قعدت عندك كم يوم
صباح: ما رح اقدر يا سندس عندي ابن شب بالبيت وما بيزبط تعيشي عندي
سندس: فهمت ولا يهمك
لفيت ظهري لامشي نادت علي
صباح: سندس استني فوتي لجوا
اطلعت عليها وهي فهمت علي
صباح: خلص فوتي انا رح حاسب التكسي
فتت عالبيت كان هادي كتير وبسيط بشكل رهيب بس دافي كتير حسيت فيه بحنية ما حسيتها من قبل ببيتنا بالرغم من انه بيتنا كبير وفيه اثاث اشكال الوان بس ولا مرة حسيت حالي مرتاحة فيه
صباح: هاد بيتي
سندس: حلو كتير
صباح: الدنيا قايمة قيامتها وهن عم يدورو عليكي
سندس: بدور علي يوم يومين عشرة بس بعدين بينسوني
صباح: جوعانة
سندس: ما بدي غلبك
صباح: رح قوم حطلك اكل
فاتت عالمطبخ وانا لحقتها
سندس: خالة صباح في شي ؟
انا مزعلتك بشي ؟؟
حاسة انك مو حابة تحكي معي ولا حابة تطلعي بوجهي
صباح: ابدا ما فيني شي يلا هي الاكل جاهز
اول ما حطت الاكل قدامي هجمت عليه متل الي كأني الي سنين مو ماكلة
سندس: صحيح خالة قلتلي عندك ابن شب وينه ما شفته من اول ما جيت
صباح: ابني بروح اخر الليل بيشتغل بفندق وما بيجي عالبيت الا بوقت متاخر كتير
سندس: اه فهمت الله يخليك اياه
بعد ما خلصت اكل كانت القهوة جاهزة كنت عم اشرب منها وغفي
صباح: بعد شوي رح تغفي بقلب الفنجان قومي معي لتنامي بغرفتي
سندس: الي يومين مو نايمة
صباح: ما رح اسئلك هلا عن شي فوتي نامي وارتاحي
ما قدرت جاملها كتير ولا قدرت لح عليها لاعرف مالها زعلانة مني
حطيت راسي ونمت وما فقت الا لتاني يوم الصبح
اول ما طلعت كانت الخالة عم تعمل فطور مديت راسي لعندها
سندس : ساعدك بشي
صباح: صحيتي
يلا تعي افطري
سندس: لا مو جوعانة تسلمي خالتي
حطت الاكل من ايدها واجت لعندي
صباح: شو مالك
سندس: وبعدين يا خالتي اول عاخراهلي رح يعرفو بمكاني شو اعمل رح يقتلوني بلا رحمة
صباح: وكلي امرك لالله يا بنتي
سندس: ونعم بالله بس انا جد مو عارفة شو اعمل حتى انتي يا خالة امبارح كنتي صادة عني كتير ما بعرف ليش
صباح: بتعرفي لما تحبي حدا بدون سبب لما ترتاحيله وتحبي تشوفيه بس بالاخر يطلع ابن عدوك
ركزت قعدتي شوي
سندس: ما فهمت
صباح : بهية امك
سندس: انتي بتعرفي امي
صباح : كانت تشتغل بالسحر والشعوذة اهلها كلهم هيك
حرمتني من زوجي لانه حماتي ما كانت قابلة فيني
كل يوم والتاني لاقي سحر شكل ببيتي
ببداية زواجنا كنا عيلة بنجنن كان يحبني كتير بس بعدين من كتير السحورات تغير وما عاد معي متل اول لحتى راقبت حماتي وشفتها وهي بتتردد على بيت امك وعرفت انها عم تعملي سحورات لتفرقنا عند امك
جبت صورة ابوكي ورحت عند امك
سندس: صورة ابي انا ما عاد فهمت شي
صباح
( هاد الشي من زمان كتير من حوالي 15 سنة )
دخلت لعندها وكاني زبونة بدي فرق زلمة عن مرته بالبداية رحبت فيني بس لما عرفت انه الي معي صورته هو زوجها تلبكت
كان بدي اياها تحس بوجعنا ووجع كل حدا بتعمل ضده سحر بس الله ينتقم منها قتلتني بسحوراتها وشعودتها
سندس: شو عرفك اني ببقى بنتها
صباح: بعد ما انتي غادرتي المشفى وطلعتي منه اجت امك تدور عليكي
شفتها مستحيل انسى تعاليم وجهها ولا انسى نبرة صوتها عرفتها من اول ما شفتها
تركت الخالة صباح ورحت ناح الشباك وقفت وراه مسحت علبه بايدي وصرت اطلع لبرا قديه الخالة صباح شايلة من امي وحاملة بقلبها
سندس: انا لازم غادر البيت هاد
صباح: وين بدك تروحي
سندس: بدبر حالي لا تخافي علي
صباح: ما بتطلعي من هون الا لأمن عليكي
سندس: بس
صباح: لا بس ولا غيره ولا تزر وازرة وزر اخرى انتي ما خصك بامك
تيم: صباحو
صباح : صباحو ابني تعا الفطور جاهز
تيم: شو عندك ضيفة
صباح الخير
سندس: صباح النور
صباح: شو امبارح ما حسيت عليك لما فتت عالبيت
تيم: ايه لاني تاخرت كتير لروحت
صباح: كنت معها مو هيك
كان عم يغمس بالاكل وحط اللقمة من ايده
تيم: رجعنا امي لنفس الموضوع
صباح: انه من متى خلصنا منه اساسا لنرجعله
تيم: انا لحد هلا ما بعرف ليش مو متقبلة اسراء مع انها بنت طيبة ومنيحة
صباح: وبتشتغل رقاصة
تيم: قلتلك الف مرة هي رح تترك الشغل اول ما بخطبها وبنتزوج
صباح: نجوم السما اقربلك يا تيم والله عجثتي ما بتفوت هالرقاصة لبيتي
تيم: ايه عراحتك امي اساسا انا شو بيجبني على هالبيت
بس عم خبرك انا ها هلا عم اخد رأيك بس لقدام شوي
رح اتزوجها لاسراء بموافقتك او بلاها ما بهمني
قام من مكانه بسرعة دفش الباب بايده وطلع ،،، انا بقيت ساكتة شوي ورحت مسحت على راس الخالة صباح
سندس: معلش لا تزعلي هي نزوة وبكرة بيهدا وبيرجع لعقله
صباح: رح يجنني هالولد والله مو شايفتيه ترك كل بنات الكرة الارضية وحب رقاصة
سندس: هن الشباب كلهم هيك عقلهم مو مريحهم صدقيني رح يرجع لطبيعته
صباح : واذا ما رجع
سندس:…….
صباح: انا بكل هالدنيا ما بقيلي حدا غيره يا سندس
سندس: كل مشكلة والها حل صدقيني
بعد ما خلصنا فطوروضبينا البيت شوي طلعت الخالة صباح عشغلها بالمشفى وانا بقيت قاعدة لوحدي
وصتني اكتر من عشر مرات ما افتح الباب لاي حدا وما طلع صوت حتى ما اي حدا من الجيران ينتبه علي او عوجودي
كان يوم ممل كتير ما في عندي شي اعمله بقعد بغرفة القعدة بزهق بروح عغرفة النوم بمل بروح عالمطبخ لحتى اخدوني رجلي على غرفة تيم
حطيت ايدي عمسكة الباب وبعد تردد كبير فتت
كانت غرفته مخربطة كتير تيابه عالارض تخته مجعلد باختصار ولا اي شي بمطرحه حاولت ضبها شوي ورتبها
رتبت طاولته لقيته حاطط صورة حبيبته بين وراقه
كانت حلوة كتير كتير عيونها سود ووساع شعرها اسود طويل وبيضة كتير متل بياض سنو وايت بس كانت لابسة بدلة رقص يعني شبه عارية
ضبيت الصورة بين وراقه وقعدت عالتخت تذكرت كمال لما كان دايما يحمل صوري بجزدانه
يا ترا هو عايش الا ميت
طيب حاسه قلبه شو صار فيني من بعده
تشوش تفكيري كتير خاصة لما تذكرت كلام الخالة صباح عن امي ما فيني كذبها او قلها لا كلامك عن امي مو صحيح انا بتذكر منيح الناس وهن رايحين راجعين من عندها وكل واحد جاييها بطلب شكل
قمت من مكاني وسكرت الغرفة بعد ما نظفتها ورحت قعدت بالصالة انطر الخالة صباح لتروح ما حسيت عالباب الا انقتح بعد شوي
سندس: هاد انت
تيم: وينها امي
سندس: طلعت عشغلها
تيم: اووووف منها ما رح تترك هالشغل بقا وترتاح
سندس:…..
تيم: طيب بالاذن
تركني وراح لغرفته وقفل عحاله الباب وانا فتت عالمطبخ لاعمل فنجان قهوة
تيم: احم احم
سندس: فوت تفضل
تيم: انتي الي ضبتيلي غرفتي
سندس: ايه انا بعتذر كنت عم اتفتل بالبيت وفتت عالغرفة ضبيتها وطلعت
تيم: شكرا الك
سندس: عفوا الك
بتشرب قهوة
تيم: بشرب طبعا قبل ما قوم جهز حالي لاطلع عشغلي
اعطيته فنجانه والي فنجاني وقعدنا على طاولة المطبخ
تيم: شفتي صورتها
هزيت راسي بخجل انه ايه
تيم: حلوة صح
سندس: ما مهم المهم تكون بتحبك
تيم : انا متأكد من حبها الي ومتأكدمن حبي الها كمان بس مو عارف كيف بدي اقنع امي
سندس: اصعب شي بالحب هو التخلي
تيم: انا مستحيل اتخلى عن اسراء
سندس: الله يهنيك
تيم: انتي بتعرفيها لامي من زمان
سندس: لا مو كتير فترة بسيطة
تيم: ساعديني حتى اقدر اقنعها
سندس: بوعدك حاول
تيم: طيب انا صار لازم روح على شغلي
سندس: الله معك
تاكدت انه تيم طلع وقفلت الباب وراه قفلتين ورجعت لمكاني
لرجعت الخالة صباح وصرت حاول اقنعها بموضوع زواج تيم من اسراء بس هي كانت رافضة بشدة وكانت عم تحكي عن اسراء حكي مو منيح ابدا وتنعتها بابشع الصفات
سندس: يا خالتي ان الله غفور رحيم ويمكن هداية هالبنت تكون على ايدك
صباح: قلبي مو مرتاح الها ابدا يا سندس والله مو مرتاحة
سندس: صدقيني كلها بس مجرد تهيؤات
صباح: بوافق عشرط
سندس: شو هو
صباح : لما يجي تيم بحكيلكم شو هو الشرط
ما كان الموضوع كتير مهم بالنسبة الي حتى اني ودعتها ورحت نمت وما صحيت بالليل الا عصوت صراخ تيم والخالة صباح
تيم: كيف يعني اتزوجها وانا ما بحبها
صباح: والله هاد هو شرطي يا اما بتتزوجهم التنين سوا يا اما والله لموت ببقى غضبانة عليك
تيم: وبعدين مع هالقصة يا امي يا حبيبتي افهمي علي
صباح: الي عندي قلته يا اما بتتزوج سندس مع اسراء يا اما بلا
ولعلمك بتكتب كتابك على سندس قبل اسراء كمان
نزلت حالي تحت حرامي وغطيت على وجهي
مين قصدها بسندس معقول عم تحكي عني انا كيف بدها تزوجني لابنها وانا اصلا متزوجة من كمال
……
#الجزء التالت
كان محتار كتير عم يحط ايده على راسه ويفرك عينيه بايده
تيم: طيب امي بس قليلي شورح تستفيدي
صباح: بدي اطمن عليك بحياتي
تيم: طيب اذا اسراء ما وافقت
صباح: والله حرة هي هاد العرض الوحيد الموجود عندي
ويكون بعلمك مهر اسراء ادفعه انت بس مهر سندس انا رح ادفعه مني
تيم: طيب ما بدي اعرف مين بتكون هي سندس من اي عيلة من اي بلد وضعها الاجتماعي
صباح : عأساس الرقاصة الي عشقانها بتعرف قرعة ابوها من وين
تيم: ااااامي
صباح: سكتت الشي الوحيد المهم تعرفه انه سندس كانت متزوجة قبلك واطلقت
تيم: طيب امي متل ما بدك
كنت واقفة ورا الباب وعم اسمع كل كلمة عم تنحكى نطرت تيم لحتى فات عغرفته وطلعت مباشرة لعند الخالة صباح
التفت علي بهدوء
سندس: سمعت كل شي قولتيه خالة انتي كيف بتطلبي من تيم يتزوجني وانتي بتعرفي اني عذمة كمال
صباح: ووينه كمال هلا بتعرفي عنه شي
بتعرفي عايش ولا ميت
سندس: قلبي عم يقلي انه عايش
صباح: لازم احميكي يا سندس وحافظ عليكي ما عندي غير هالحل
سندس: واذا رجع كمال شي نهار
صباح: لو بده يرجع كان رجع
ليش الكل كان يحكيلي هي الكلمة والجميع كانو واثقين انه كمال ما حيرجع الا انا كنت متاكدة انه رح يجي يوم وارجع شوف عيونه بس وقتها ما رح اقدر اطلع فيه ما رح اقدر عاتبه عالوجع والالم الي زرعهم جوا قلبي
بعد ما نامت الخالة صباح حملت حالي ورحت دقيت الباب عغرفة تيم
سندس: ممكن ادخل
تيم: فوتي
هلا انا بعتك لامي لحتى تقنعيها اتزوج اسراء مو لتقنعيها اتزوجك مع اسراء
سندس: انا بعمري ما فرضت حالي عحدا وتفاجأت بطلب الخالة صباح متلك واكتر شوي
تيم: المفروض صدقك انا هلا
سندس: هاد شي بيرجعلك انا جاية لحتى قدملك عرض انا ما بدي منك اي شي لا مهر ولا غيره وما رح تكون زوجي الا عالورق وانا ما رح ازعجك ولا ازعج مرتك
تيم: انا ما رح عيش مع اسراء هون بيناتكم
سندس:براحتك
تيم: دخلك انتي وين اهلك
تلبكت شوي من سؤاله
سندس: اهلي هم الخالة صباح وبس ما عندي غيرها اهل
جيت لاطلع من الغرفة
( صحيح مبروك تتهنى)
ابشع شي كنت بواجهه وقتها نظرات الشك اتجاهي من قبل تيم كان عم يعايرني بنظراته مع انه ما بيعرف الماضي تبعي ولا بيعرف انا شو بعمل عند امه بس كان واثق كتير منيح انه في من وراي قصة
انخطبت اسراء لتيم وكل مرة كانت الخالة صباح تشوف اسراء ترجع متنكدة ومو طايقة حالها ولا طايقة تحكي مع حدا من ورا قلة ادبها
سندس: رجعتي خالة شو وين كنتي
صباح: عند امك
فتحت عيوني على وسعهم ( عن ن د امي انا )
صباح: ايه جبت وراقك الرسمية وهويتك وبعض وراقك الثبوتية لنقدر نكتب كتابك على تيم
سندس: امي بتعرف اني هون
صباح: من اول يوم بتعرف انا برضه ام وبحس بوجعها كان لازم خبرها وطمنها انك رح تتزوجي ابني تيم
بتعرفي شو يا سندس
زمان كنت قول لما شوف بهية بدي دمرها تدمير بدي فش كل حقد الدنيا الي مزروع جوا قلبي فيها كتير سجدت بصلاتي ورفعت ايدي لربنا ياما شكيت همي لمالك السموات والارض لينتقملي من امك
سندس: للاسف انا الي دفعت الثمن
صباح: امك دفعت التمن اغلى منك ،،، الوحدة فينا اصعب اذى ممكن يصيبها واقوى جزا ممكن تناله باولادها
الحسرة الي شفتها بعيونها خلتني انسى حقدي لالها
سندس: همها الوحيد بهالحياة هي المصاري ما كانت تعرف كيف تجمع مصاري لهيك لما سرقت منها الفلوس ما رفتلي عين
بس انا اشتقتلها يا خالتي اشتقت لامي بالرغم من جبروتها بالرغم من قسوتها بالرغم من كل شي غلط عملته بحياتها انا اشتقتلها
صباح: حبيبتي سندس شو ما كانت امك ابدا ما ببررلك الي عملتيه انا هلا مو جاية اقسى عليكي وعاتبك بس لازم تعرفي انك غلطتي
كتبت كتابي على تيم بوجود اسراء الي كانت طول الوقت عم تاكل علكة وتطقع فيها وتطلع علي من فوق لتحت
سلسلة كتيرة وكبيرة من الاحداث صارت بحياتي خلال هالفترة
حبيبت وخطبت ويوم عرسي زوجي هرب
رجعت خطبت وتزوجت وزوجي هلا مع مرته التانية
وشو المخبالي لسا ما بعرف
تيم كان يغيب بالايام عني وحتى عن امه ما كان بسأل بس كنت ازعل على الخالة صباح قديه عم تشتاقله وتشتاق تحاكيه
صوت فتحة الباب ،،،، عرفت انه هاد تيم رحت عسريري تغطيت وعملت حالي نايمة ما بعرف ليش ما كنت حابة شوفه ،،، صفنت بالسقف انه وبعدين قمت من مكاني وطلعت لعنده كان قاعد عالبلكون وعم يدخن دخلت لعنده رفع راسه واطلع فيني
تيم: كيفك
سندس: منيحة وانت
تيم: يمكن منيح يمكن لا ما بعرف
سندس: هي اول مرة بشوفك عم تدخن
سحبت كرسي وقعدت جنبي
سندس: فيك شي
تيم: تعبان
سندس: كأنه متخانق انت واسراء
تنهد بقوة كبيرة ( ما عم تقبل تترك الشغل )
سندس: حاسس انه اختيارك غلط
تيم: لا مو لهدرجة بس هي عنيدة كتير والي ببالها بدها تعمله وفيت بوعدي الها وتزوجتها بس عم بتنح عابسط الامور ما بتقتنع بشي بقلها روحي يمين بتروح شمال
قربت لعنده اخدت السيجارة من ايديه وسحبت منها
سندس: اذا بتحبها بدك تتحمل
تيم: شو عملتي هي السيجارة بتضرك ما بتفيدك
سندس: وبتضرك الك كمان
تيم: انا مو مشكلة
سندس: وانا كمان مو مشكلة
تيم: سندس شو وجعك
سندس: انه انت زوجي وهيك وانا لازم اشكيلك همي
هههههههههههههههه ضحكتني
تيم: عم تتمسخري ويا ستي ايه انا زوجك شئتي ام ابيتي
سندس: شئت ام ابيت اخر مرة سمعت هي الكلمة وانا بالجامعة
تيم: انتي دارسة حامعة
سندس: ايه بس ما كملت
تيم: طيب احكيلي قصتك
سندس: اذا بدك احكيلك كصديق اوك بحكي اما كزوج انسى الموضوع
لمع الحزن بعيوني وبلشت احكي قصتي لتيم كانت ملامحه اوقات تكون هادية وانا عم احكي واوقات تقلب لغضب واضح بعيونه
تيم: بدك اتقبل الموضوع كصديق ولا كزوج
سندس: كصديق كصديق هلا بشرفك انت بتعتبر حالك زوجي ولو
قرب لعندي ضربني كف على وجهي حسيت ملامحي تغيرت مكانها من هالكف
تيم: كصديق بضربك هالكف ليصحكي ويوعيكي على حالك
اما كزوج كنت بطلقك وبزتك بالحواري تكملي حياتك
قعدت عالارض وصرت زقفله
سندس: برافو برافو حتى انت سقت الشرف علي مو ناقص الا بكرة تيجيني اسراء وتعطيني درس بالشرف كمان
كان معطيني ظهره
لف علي
تيم: عم تحكي عليها هلا لانك غيرانة كزوجة ولا عم تنتقمي من الكف كصديقة
طلع تيم وانا اضرب على راسي ووجهي انه ليش قلتله عن حالي وقلتله مشكلتي شو استفدت كنت ناطرة منه شفقة ولا بدي اياه ياخدني باحضانه ويمسح على راسي ويقلي معليه لا تزعلي لشو بدي اوصل
تاني نهار اتصل تيم بخالة صباح وخبرها انه جاي ليتغدى عنا كانت كتير مبسوطة بجيته وعم بتحضرله اكل اشكال الوان ساعدتها بكتير شغلات وقبل وصول تيم بشوي دخلت عغرفتي
سندس: خالة انا تعبانة بدي فوت ريح حالي شوي
صباح: ما بدك تشوفيه لتيم
سندس: مرة تانية
صباح: يا بنتي هيك مستحيل تكسبيه لتيم اذا بقيتي هيك رح يبقى طول عمره بحضن اسراء
سندس: ما بهمني انا تزوجته لاحمي حالي مو لاخده من اسراء
تجهلت نصائح الخالة صباح وفتت على غرفتي ما كنت قادرة اطلع بوجهه بعد الي صار ليلة امبارح
سمعته من جوا عم يسأل عني وخبرته امه اني تعبانة ولازمني راحة
تيم: طيب اذا تعبانة باخدها عالمشفى
صباح: لا امي شوية ارهاق وبس
بقيت حابسة حالي لوقت سمعت صوته عم يودع بامه عالباب قمت من مكاني وفتحت باب الغرفة ورحت عالمطبخ لاشرب مي لفيت ظهري كان تيم واقف عالباب ومكتف ايديه
بس شفته وقعت الكاسة من ايدي
سندس: بسم الله الرحمن الرحيم انت شو جابك لهون
تيم: مو عأساس مريضة
سندس: ايه مريضة وقمت اشرب شوي مي
عملت حالي مو مهتمة لوجوده وجيت اطلع من الباب
سندس: ممكن تبعد شوي بدي امرق
تيم: ايه امرقي انا مو مدايقك بوقفتي هون
مرقت من جنبه لاطلع كان قريب مني كتير حرارة نفسي وصلت لعنده اطلعت بعيونه كانو حلوين كتير بلون الرمل
طلعت من المطبخ وبسرعة على الغرفة ،،، حطيت ايدي على صدري وصرت الهث حسيت وقتها قلبي رح يطلع من مكانه
حاولت شيل كل الافكار هي من راسي بس ما قدرت كل شوي يمر طيفه قدامي وبنفس الوقت المح طيف كمال
والمشكلة الاكبر انه تنيناتهم مو الي
——————
سندس: خالتي ممكن اسألك سؤال
صباح: ايه بنتي
سندس: هلأ ما تفهميني غلط بس انه ما شاء الله وضع تيم المادي كتير منيح ليش عم تشتغلي بالمستشفيات وهالشقا وهالتعب
صباح: وبدك اياني عيش بفلوس حرام يا سندس ابني معه شهادة قد الدنيا بس مصر يشتغل بهالفندق لانه ست الحسن بترقص فيه بتعرفي مو قادر يتركها
بهالوقت الباب كان عم يندق بقوة رهيبة حسيت الباب رح يتكسر علينا ما لحقنا نفتح الباب كانو اهلي كاسرينه وداخلين سحبوني من شعري وطلعو
كنت بعرف انه رح يجي يوم وارجع لعندهم بعرف انه رح يرجعو يضربوني ويهنوني بس ما كنت بعرف انه تيم حاكي لاسراء كل شي عني وهي قدرت تعرف اهلي وخبرتهم عني وعن مكاني
انا شكيتله همي ليخفف عني قلتله عن حياتي ليوقف معي مو ليدمرني
بقيت عند اهلي اسبوع بس اكل ضرب وما ينادوي علي الا بابشع المسبات لحتى اجا اليوم السابع اندق باب بيت اهلي ودخل شرطي ومعه تيم
الشرطي: بدنا سندس زوجها طالبها لبيت الطاعة
اخي: ما فهمت اي زوج
الشرطي: الاستاذ تيم بكون زوجها لسندس
اخي: هاد واحد كذاب ومفتري
الشرطي: كلمة زايدة وبشحطك قدامي عالمخفر هي عقد الزواج وكل شي رسمي
اخي: لك كيف هيك كيف قدرت تتزوجه بدون وراق رسمية
امي: انا اعطيتهم كل وراق وهويات سندس ووافقت على زواجها منه
الكل بالبيت اطلع ببعضه بس ما حدا قدر يمنع الشرطي ياخدني من بيت اهلي
اطلعت فيهم نفر نفر كنت بدي قلهم اني زعلانة منهم ليش عملو فيني هيك وما صدقوني وكان نفسي خبرهم اني زعلانة من حالي لاني حطيتهم بهيك موقف
كنت حابة احضن امي وخبرها عن امتناني لالها
وبنفس الوقت ابعد عنها وخبرها انه كل شي سيء قدمته بحياتها دفعنا ثمنه غالي
كان لازم احكيلها انه الدنيا سلف ودين
رجعت عالبيت مع تيم وطول الطريق ما حكيت ولا كلمة معه ولا هو كمان حتى ما اطلع فيني
قبل ما انزل من السيارة لقيت الخالة صباح واقفة عالشباك وناطرتني اطلع لعندها
تيم: سندس انا اسف
سندس: مو مهم عادي
مرقت الايام واهلي ما بقربو مني ولا بيحاكوني
اشتقلهم واشتاق حاكيهم بس ما كانو عم يسمحولي قرب منهم
تيم كان يجي يقضي وقت كتير عنا نضحك ونحكي
ونشكي لبعض همومنا
تيم: الظاهر انا واسراء خلصنا
سندس : شلون يعني خلصتو
تيم: بعض البشر بعجبك كتير من برا بتحبيه وهو بعيد بتتمني القرب منه بس لما بتقربي عليه بتكتشفي انه شخص غير الي حبيته من بعيد
سندس: طيب شو بدك تقلها ليش بدك تتركها
تيم: ما بعرف
سندس: اوعى بحياتك تبعد عن حدا بدون سبب
القرب دايما بكون سببه الحب اما البعد اسبابه كتيرة
واصعب شي فيها يكون سبب البعد مجهول لهيك اذا بدك تبعد قدم اسبابك وابعد
تيم: مزبوط القرب دايما بكون سببه الحب لهيك انا قريب منك هالفترة
تلخبطت من هالكلمة ما عرفت رد عليه
قمت سندس لاجلي الجليات
سندس: انا من رأيي تعطي اسراء فرصة
ما بعرف ليش صديته هيك يمكن لاني حسيت حالي مو جاهزة لسا ،،، جية تيم لعنا كترت وكل مرة بكون متقاتل مع اسراء عشي شكل
صباح: بنتي سندس قومي افتحي الباب
سندس : حاضر يلا
هاد انتي
اسراء: بعدي هيك وينه زوجي
شو يا بلاقيك هون ولا ناسي انه عندك زوجة ولازم تشوفها
تيم: مو لتقعدي بالبيت بالاول ،،، بعدين هون كمان في الي زوجة
اسراء: برافو سندس صار يعتبرك مرته وبده يقعد عندك نسي ماضيكي المشرف وصرتي مرته
سندس: ما بتوقع الماضي تبعي يكون مشرف اكتر من ماضيكي
تيم: بس انتي واياها خير اسراء شو جابك لهون
اسراء: بعدين رح رد عليكي مو هلا
صباح: انتي ملاحظة انه لهلأ انا ساكتلك مع انك جوا بيتي
اسراء: حبيبي تيم انا جيت خبرك اني حامل
تيم: عن جد
اسراء: لك ايه وجد الجد كمان
اطلع فيني تيم بنظرة سريعة وكأنو حس عحاله انه رجع يجرحني مرة تانية
اخد اسراء من ايدها وطلعو سوا وانا قعدت عالكرسي ابكي بحرقة
نفس اللمسة ونفس الحنية الخالة صباح حطت ايدها عراسي وقالتلي لا تزعلي صدقيني رح تفرج
غاب تيم عني شهر كامل ما عاد شفته ولا سمعت صوته كنت اشتاقله كتير بس ما اقدر عبر عن هالشوق الي جواتي كتير اوقات كان يخطر ببالي انه اتصل عليه واسأل عنه بس اتراجع لان لو بده اياني كان اجا لعندي
————
امي: افتحي يا سندس يا سندس
معقول انا عم اسمع صح هي امي الي برا
فتحتلها الباب ورميت حالي بحضنها
سندس: لو تعرفي قديه اشتقتلك
امي: اااخ يا سندس يا روحي مو قدي دايما كنت بعيدة عنك ولا مرة سمعتلك ولا مرة التفتلك سامحيني انا يا قلبي
صباح: فوتي يا بهية تفضلي
بهية: تسلمي يا صباح
سندس بنتي انا جيت لعندك بالخفية عن ابوكي واخواتك جيت لخبرك انه كمال رجع امبارح واجا علينا يخبط ويصرخ ومعه ورقة زواجكم سوا وبحلف وبهدد وتقاتل مع اخوكي
واخواتك قالوله نحنا ما خصنا روح قلع شوكك بايدك
ما قدرت اتحمل الصدمة
سندس: كمال رجع انتي متاكدة
امي: اايه يا امي والله انا شفته بعيوني
صباح: شو بدنا نعمل هلا
سندس: لازم شوفه لازم احكي معه في حكي كتير بيناتنا لازم ينحكى
لسا عم كمل كلامي لقيت الشرطة بنص البيت لياخدوني لانه كمال عم يطالب بزوجته
المحزن المبكي انه التنين عم يطالبو فيني كزوجة بس ولا حدا منهم قادر يعطيني حقوقي كزوجة
بالمخفر اول مرة بشوف فيها كمال بعد غياب
تذكرت كلام الخالة صباح
زمان كنت قول لما شوف بهية بدي دمرها تدمير بدي فش كل حقد الدنيا الي مزروع جوا قلبي فيها كتير سجدت بصلاتي ورفعت ايدي لربنا ياما شكيت همي لمالك السموات والارض لينتقملي من امك
وانا كنت حاطة براسي حكي كتير احكيه بس ما بعرف ليش كله اختفى من راسي فجأة او يمكن ما عاد يهمني احكي معه كل الي قدرت افهمه من الشرطة وقتها انه كمال رافع دعوى ليردني لاله
سندس: بس هو تركني بيوم عرسي تخلى عني فضحني بين الناس
كمال: مزبوط بس انا كنت مجبور سدد ديوني وديون اهلي الشرطة كانت رح تحجز عالبيت ويصفو اهلي بالشارع ما كان قدامي الا هالحل
صرخت بوجهه بصوت عالي
سندس: ما اهتميت لامري ابدا ما اهتميت شو رح يصير فيني وانا هلا متزوجة وما بدي اياك
كمال: معقول يا سندس انا ربيتك عإيدي لحقتي تنسي انا كمال الي حبيته
سندس: وانا سندس الي تركتها
سيدي هاد عقد الزواج باطل طالما مو مثبت بالمحكمة وانا ما بدي ثبته ولا بدي كمال
المدعي العام: اخر كلام عندك
سندس: اكيد
صحيح تعرضت للخذلان من التنين من كمال ومن تيم بس كمال ما قدر يحميني تركني للدنيا والزمن
اما تيم مع انه ما وعدني بشي وانفرضت عليه فرض بس مع هيك حماني من ابي واخواني
مشيت عمبدأ
((وطن لا نحميه لا نستحق العيش فيه ))
((رجل لا يحميكي لا يستحق العيش معه ))
اول ما طلعت من المخفر وبعد ما كمال وقع عورقة تعهد بانه ما رح يتعرضلي بعد هيك لقيت تيم بوجهي جاي يركض عالمخفر
تيم: سندس سندس
سندس: تيم في شي
تيم: اخترتيه اله صح
سندس: مع انك اخترت اسراء بس انا اخترتك الك في اصعب من هيك
تيم: مو مزبوط كنت بعرف انها كذابة بس قلت لحالي سايرها قلتلها تترك الشغل لانها حامل وافقت بالبداية حتى ما تنكشف كذبتها بس لبعدين ما عاد قدرت تترك شغلها
اعترفتلي بكذبتها ورجعت للرقص
سندس: مو معقولة هالست الله يهديها
تيم: انا طلقتها
كمال: سندس استني
رجعني تيم وراه ووقف هو قدامي
تيم: تفضل في شي
كمال: انا كنت بدي اعطيكي فلوسك الي اخدتهم منك من قبل
مسكهم تيم اطلع فيهم ورد رجعوله اياهم
سندس: انا مو بحاجة فلوسك
تيم: سمعت بدانك هلا بالاذن
مسكني تيم من ايدي وسحبني لقدام
سندس: استنى وهلا شو
تيم: هلا انتي مرتي رسمي
سندس: عشرط بتترك شغلك وبتدور عشغل تاني
تيم: ممممممممم مبدأيا رح اترك الشغل واخد اجازة من كل الدنيا واقعد معك
بعدها بدور عشغل
سندس: موافقة
تيم: وانا موافق
# انتهت
ما هو رأيك بالقصة؟ اكتبه الان في التعليقات