طريقة الجبنة البلدية بالخطوات المصورة وبالتفصيل الممل

طريقة الجبنة البلدية بالخطوات المصورة وبالتفصيل الممل
معكم صديقة زاكي الشيف الموهوبة  Silva Aydogan

يسعد مساكم
بعيد عن الطبخ اليوم راح أشارككم بطريقة الجبنة البلدية من طق طق الى السلام عليكم
واليكم الطريقة : 
الجبنة البلدية وبامتياز من مطبخي 
الخطوة الاولى : 
نسخن الحليب الكامل الدسم ( يفضّل حليب المزرعة ) ونقيس درجة الحرارة اللي لازم ماتكون اقل من ٣٧ درجة يعني اصبعتك الصغيرة مالازم تحترق لما تحطيها بالحليب
الخطوة التانية :
لكل ١٠ ليتر حليب بنحط ٣ ملاعق خميرة الجبنة ( تباع عندنا بالصيدليات )
بنحط الخميرة ونحركها ونغطيها بغطاء ونحط فوقها بطانية مشان تضل ساخنة تقريبا ٣ ساعات
الخطوة الثالثة : 
بعد فترة ٣ ساعات تقريبا يتخمر الحليب وبيصير متل ماموضح بالصور
حسب الرغبة وطبعا انا بعشق هي النكهة ملعقة كبيرة حبة البركة وملعقة صغيرة محلب بنخلطها مع الجبنة ونحركها قبل مانحطها بكيس القماش
الخطوة الرابعة : 
انا سبق وحضرت اكياس قماش ويفضل اللي بيكون فيها نايلون مشان لايلصق فيها
بنحط الحليب اللي سبق وحطينالو المحلب وحبة البركة ونحطها على مصفاية مشان نصفي منها المي
بعدين بعصرها شوي شوي لحتى تطلع منها كمية كبيرة من الماء وبحطها بمصفاية كبيرة مربعة او دائرية مو مهم كتير
وبعدين بحط فوقها صينية وتقل ( سطل ماء كبير 😬) مشان ينشف المي تماما
الخطوة الخامسة : 
بعد مانشف الماء تماما من الجبنة مدة ٦ ساعات تقريبا او اكتر نشيلها من الكيس ونقطعها على حسب مابدكم
الخطوة السادسة 😅
بنحط الطقع بالملح بشكل انو تكون كل القطعة بالملح ونحطها بسطل وهكذا لحتى تخلص كل القطع
نغطيها بغطاء ونتركها يومين على الأقل ( مافي داعي تكون بالبراد هي الفترة )
الخطوة السابعة : 
بعد يومين يصفى من الجبنة ماء مالح
بنأخذ كمية من الماء وضعف الكمية ماء عادي ساخن ونحطها على النار وبس تغلي نحط فيها وجبة جبنة ونتركها تغلي تقريبا ٥ دقائق ونطالعها من المي ونحطها بمصفاية لحتى تبرد شوي وهكذا لحتى نخلص كل الجبنة
الخطوة الثامنة 😬
نحط الجبنة بعلب للتخزين ونترك الماء اللي غلينا فيها الجبنة تبرد وبعدين نضيفها على الجبنة ونحتفظ فيها بالبراد
الخطوة التاسعة 
وقت ماتحبي تأكليها قطعيها قطع صغيرة وضيفي فوقها ماء عادية واتركيها تغلي كم دقيقة وتكون جاهزة
الخطوة العاشرة والاخيرة 😅😅
تأكليها مع البطيخ والجبس والخيار والبندورة وصحتين وهنا
الخطوة ١١ مافي والحمد لله