طريقة عمل التارت بنصحكم تجربوه العجينة ناجحة الحمد لله ومقرمشة

طريقة عمل التارت بنصحكم تجربوه العجينة ناجحة الحمد لله ومقرمشة
تارت بالنوتيلا مقرمش من برا ومن جوا كله شكولاتة ممم
معكم صديقة زاكي الشيف الموهوبة سلام
#تارت_بالنوتيلا
#مقادير_العجينة

الطريقة:
250 غرام طحين
125 غرام زبدة باردة بس بنفس الوقت لينة
4 م ك سكر بودرة
4 م ك ماء بارد جدا ( مو مثلج)
بيضة
م ص فانيلا
رشة ملح

بحط الزبدة والسكر والطحين والملح سوا وببدا افرك فيهم بأطراف اصابعي ليصيروا عندي متل الرمل

بعدا بنزل عليهم البيضة المخفوقة منيح مع الماء البارد والفانيلا وبعجن الكل منيح لاحصل على عجينة ما بين طرية ومتماسكة وما بتلصق *ابدا* وازا شفتيها بعدها بتفتفت ضيفي ماء بارد لانه ممكن تختلف نوعية الطحين

وبعدين بكون مجهزة قوالب التارت ممكن تبطنيهم بالزيت والطحين انا ما دهنتهم شي لانه العجينة فيها زبدة بيمشي الحال وبرق العجينة بسمك متوسط لانه بيتضاعف حجمها شوي بالخبز وضروووري اثبت العجينة بالقاع اول بعدين بإصبع الابهام بثبت العجين وبعطيها شكل قالب التارت وبقص الاطراف الزايدة وبعمل ثقوب بالشوكة بقاع التارت وبحط فيها اي نوع حبوب متوفر لحتى ما تنفخ بالخبز

وبدخلها عفرن محمى مسبقا عدرجة حرارة 180 لما تتحمر الاطراف بفرغ الحبوب من التارت وبكمل خبزها وتاخد اللون الدهبي بتركها تبرد تماما ..وانا زينتها بالنوتيلا وحبوب السكر الملونة واللوز المحمص والمارشميلو .. والحجم الكبير عملت القاعدة سميكة عشان الايسكريم وصحتين وهنا

#ملاحظات
-ازا ما توفر ورق الزبدة عشان تحطيه تحت الحبوب ممكن تستخدمي القصدير .. والحبوب بس تبرد بشيلها بعلبة لاستعملها نفسها مرة تانية.
– ممكن تستخدمي حشوات مختلفة متل كريم باتسيير وتزينيها بالفواكه ..
– ممكن تحشيها بالمربى وتزينيها بالجوز مع رشة قرفة ..
-ممكن تحتفظي بالتارت سادة بالتلاجة لوقت ما بتحبي تستخدميه..
-بنصحكم تجربوه العجينة ناجحة الحمد لله ومقرمشة وحلو تعملوه بحفلات اعياد الميلاد والمباركات وضيافة بتبيض الوجه .