العنقاء قصة واقعية بقلم مال الشام الفصل الأول

العنقاء قصة واقعية بقلم مال الشام الفصل الأول
هذه القصة مقدمة لكم من قسم المنوعات في زاكي
#العَنْقَــاء_بقلم_مال_الشام
#واقعية

الجزء الأول + الثاني+ الثالث + الرابع

انا بعشقك انا كلي لك
يا من ملك روحي بهواه الامر لك طول الحياة
الماضي لك …..وبكرة لك….وبعده لك
انا في سهادي وبمنامي بندهك …وبسألك؟؟؟؟
بتحبني ولا الهوى عمرو ما زارك؟؟!!
بتحبني ولا انكتب على القلب نارك؟؟!!
قول يا حبيبي ..يا حبيبي..قول يا ملاك

جلال : يا عيني يا عيني .. شو هالجو الرومنسي هاد

التفتت وراي وابتسمت : انت جيت ؟

جلال : تأخرت عليكي ما حبيبي ؟

فادية : لا عادي .. نيمت ملوكة .. و عملت مته وطفيت ضو البرندة وشغلت مياده الحناوية وشوفت عينك عم صفي راسي

قرب جلال على المسجل و وطى الصوت .. و اجا قعد جنبي على المرجوحه : بس الجو بارد ما ؟

فادية : ايه شوي .. بس ليك القمر شو حلو

جلال : ايه عنجد كتير حلو بس انتي احلى منو

فادية : ههههه بالله ؟

حطيت راسي على صدرو : كيف كانت سهرتكن ؟

جلال : تمام منيحه اختي بكرا مسافرة على الكويت هي و جوزها

فادية : الله ييسرلها يارب وصلتلها سلامي ؟

جلال : ايه وقلتلها انو ملك مرضانه وما قدرتي تجي و عذرتك ..

سكتنا تنيناتنا …انا عم اتفرج على السما الواسعه وعم فكر بالموضوع الي شاغلني تماماً هالفترة .. وهو عم يتفرج على عيوني

فادية : ليه عم تطلع فيني اتطلع بالسما

جلال : .. ما في اي اختلاف
عيونك نفس زرقة السما .. وفيهن نفس لمعة النجوم .. ورموشك متل الشلال الغزير عم يرفو كل ثانية .. و برف قلبي معهن

كانت المرجوحه عم تتحرك فينا بهدوء .. و عم نسمع اغنية ميادة الحناوي وهي عم تحلف حبيبها يقلها ازا بيحبها او لأ !!
ضمن هاد الهدوء كلو وهالسهرة اللطيفة … صحي كائن صغير ..

فادية : جلال .. سامع صوت شي ؟

جلال : اي .. ملك ؟ عم تبكي ؟

قمنا نركض على غرفتا و فتحنا الباب .. كانت الغرفة عتمه .. وملك الطفلة الي بعمر الاربع سنين وعيانه وعم تبكي

حملها جلال بين ايدي و صار يهديها و جبتلها مي وشربتها .. بس سكتت اخدناها معنا على غرفتنا ونيمناها بالنص بيناتنا .. انا عاليمين و جلال عالشمال .. واحد عم يبوسا ويشما و واحد عم يلاعبا ويحكيلها حكاية لتنام ..

تاني يوم صحينا بشكل طبيعي كتير .. ملك كانت متعافيه الحمدلله و انا ودعت جلال طلع على شغلو بالمعمل وانا بلشت شغلي متل النحلة النشيطة

كانت حياتي مستقرة نوعاً ما .. عندي زوج بحبني … بكون ابن عمي .. وعندي بنت متل الوردة
تزوجنا زواج أهل بما انو اهلي و اهل جلال بيناتهن املاك ضخمة ومصانع وشركات ما حبو شي من هالأملاك يطلع لحدا غريب
وعلى هالأساس تم زواجنا وخلال فترة الخطبة تعلقنا ببعض كتير .. لقيت فيه كل شي بتمناه وهو صريح وجريئ بحبي قدام الكل
ما عندي مشاكل .. جوزي ما بخوني .. وحماتي ما بتنكد علي .. وما عندي بنات احمى غليظين بالعكس بنت حماي الصغيرة كتير رفيقتي
وما بدي انحف و ما بتابع سعر الدولار .. وما عندي جارة حشرية .. انو المفروض حياتي تكون مثالية !! بس لأ للاسف الواقع مو هيك !!

خلصت شغلي وانا تعبانه كتير وحاطه ملك تلعب بغرفة الألعاب وعم شق عليها لاتاكد من حرارتها كل شوي
وقعدت بالصالة جنب التليفون ودئيت على بنت حماي يارا وردت علي حماتي وبعدا اعطتني يارا

يارا : هلا فدو .. كيفك ؟

فادية : تمام ؟ مرت عمي جنبك ؟

يارا : لا انا فتحت الخط من عندي من غرفتي .. شو في ؟

فادية : لك رح جن

يارا : يوه .. خير شبك ؟

فادية : شو شبني .. ذات الموضوع ما عم يروح من بالي .. اخوكي ما بدو مني ولاد من بعد ملك
ناطف البي لجيبلها اخ …

يارا متلبكة : ييي على هالسيرة ما كانت تخلص

فادية : لا وما رح تخلص .. ليش هيك عم يعمل طيب ؟ لك المصيبه انو بقلي ياها بكل بساطه
انو ما بدو ولاد مني .. بالأول كان يقلي خلينا نأجل الموضوع هلأ بقلي ما بدو ولاد بنوب

يارا : ايه حبيبتي .. انتي لما رجعتي حبلتي بعد يارا بالتوأم وصار معك نزيف وكان ممكن تروحي فيا لا سمح الله
جلال خاف كتير كتير .. كان خايف عليكي بشكل كبير واكيد هو خايف يتكرر الموضوع

فادية : بس يا يارا هاد قضاء وقدر وانا كنت اكتر وحده متحطمة لما خسرت ولادي وماتو برحمي الي كبرو فيه تسع شهور
انا كنت حس فيهن وعايشين جواتي .. و انا الي شفت الموت بولادتي يعني انا اكتر حدا لازم يخاف
والدكتور قلي انو المشكلة مو مني .. الحبل السري التف عليهن وماتو يعني ما في شي يخوفنا من انو نعيد التجربة

يارا : يا الله منك يا فادية شو عنيدة .. خلص جوزك بحبك وعندك بنت بتاخود العئل .. ربيها وانتبهي عليها وشو بدك بكترت الأولاد
اصلاً ما بجيبو الا وجع الراس ..

سكتت شوي وانا مستغربة من حكيا !! لك معقول ما مشتهية تشوف ولاد لاخوها !

يارا : وين رحتي ؟

فادية : انا بلشت افهم عليكن .. بس انتو مكبرين الموضوع

يارا : ما فهمت شي؟

فادية : ليكي .. الي سنتين بحاول اقنع فيه وهو عم يتهرب ويمكن انا فهمت شو القصه .. بس لازم هو يصارحني ويشوف دكتور

يارا : مين اللي يشوف دكتور ؟ ما عم افهم شي شبك وليه ؟

فادية : جلال .. انا كنت شاكة اصلاً انو هو مريض او في شي يمنعو يجيب اولاد .. يمكن صاير معو شي بهل فترة
شي حادث او شي مرض وما بقى يقدر يجيب اولاد بعد ملك .. لهيك عم يتهرب صح ؟ وانتو عندكن علم لان الكل واقف بصفو وما بدكن يجينا ولاد

يارا : شوووووووووووووو ؟؟؟؟

فادية : كل شي صار واضح .. انا فكرت بكل الأسباب وما في غير هاد السبب .. المرض مو عيب بس العيب الواحد يظلم بنات الناس معو
وانا بدي ولاد .. بدي جيب اخوان لبنتي يكونو سند الها .. وما رح اسكوت عن الموضوع و رح قول لامي تتفاهم معو

يارا : لك يا مجنونة !!

كنت بدي رد عليها اكتر لفش خلئي بس سمعت صوت ملك عم تبكي

فادية : بدي شوف بنتي .. منحكي يلا سلام

يارا : لك الو .. الووو

سكرت الخط ورحت على غرفة الألعاب و لقيتها نازعه تلات العاب
كانت مقطعه دبدوب كبير و مفككة لعبة باربي و عم تبكي

فادية : لك امي شو هاد ؟

ملك: عم احكي معهن ما بيردو ما بيردووو .. ف دبحتهن

ضحكت و فتت حطيتها بحضني ولعبتلها بشعراتها

فادية : طيب بصير هيك ؟ هلأ بيزعل بابا مو هو جبلك هدول الألعاب ؟

ملك: ايه يزعل انا ما عاد بدي يجيبلي العاب بدي اخ .. ليش ريم و لموش عندهن اخوان وانا لأ
يلا جيبولي واحد

فادية : هههههه لك رح جيبلك مو تكرم عينك .. طلباتك اوامر ملك خانوم

ملك : بدي ياه بكرا .. يلا

فادية : يييي بكرا ؟؟

ملك : اييييييه

فادية : حبابة اعطينا وقت

ملك : اديش يعني ؟

فادية : شي تسع شهور

ملك : لااا كتير

عضيتها من خدها ونزلتا .. لميت الألعاب الي انتزعو وشلتهن

فادية : انا خلصت شغل رتبي الغرفة وضبي العابك وتعي مشان علمك حروف الانجليزي

ملك : مممم حاضر …

طلعت من الغرفة وسكرت الباب وانا مخنوقة .. اكيد ملك كانت تسمعني وانا اتخانق مع جلال مشان هالموضوع و هاد الشي اثر عليها

مرق الوقت وانا عم درسها لملك والعب انا وياها وبعدا قمت علقت الطبخه على النار وقعدنا نتفرج على مسلسل سوا
فجأة بلش يدق باب البيت بقوة كبيرة .. وركضت على الباب وفتحتو

فادية : ميييييين ؟؟ مييييين ؟؟

فتحت الباب ولقيت مرت عمي و مبين من وشها انها جاية و مو ناوية خير وفوراً بلشت تعيط علي

ام جلال : عم تقولي انا ابني مو رجااااااااال وليه ؟ لك انا ابني مو رجال ؟؟؟؟؟؟؟

فادية : ما .. ما .. ما قلت هيك .. شو في .. طولي بالك مرت عمي .. طولي بالك

ام جلال : لك والله لخبر اهلك يا مقصوفة الرقبة يا عيب الشوم يا ضيعان التربايه فيكي

اول مره بتحكي معي مرت عمي هيك .. طول عمرنا منحترم بعض بالعيلة وما سبق صار هيك موقف بيناتنا
كنت خجلانه كتير ومتوترة كتير و مقهورة لان يارا راحت حكت لأمها الحديث الي صار بيناتنا ..
كانت البهدلة عم تنزل علي متل زخ المطر وما عم اعرف رد على شي .. بلشت ابكي واترجاها تسامحني وانو ما هيك كان قصدي
وعلى وصلت جلال .. كملت معي

فات جلال ولقي الباب مفتوح وصوت امو واصل لآخر الشارع

جلال : شو في شووو في شبكن

ركضت عليه : جلال انا ما كان قصدي

ام جلال : اهلييييييين بابني التشتوش الي مو عارف يضب مرتو ويقص لسانها اهلين يا تئبرني اهلييييييييين

جلال : امي !! شبببك؟؟؟؟؟

ام جلال : اسأل مرتك حبيبي .. اسألها لست الحسن .. قال شووو .. انت مانك رجال
عم تحكي عن رجولتك للعالم وتقول انو العيب منك وانو الله اعلم شو صاير معك وما عاد يجيك ولاد

جلال : فادية ؟؟؟؟؟

صرخ فيني .. ورجعت بعدت عنو وحسيت لساني انربط

فادية : لك مو هيك والله مرت عمي فهمانه غلط مو هيك

ام جلال : لك هيك ونص .. انا كنت فاتحة التليفون الي بالصالة وسمعت كل شي حكيتيه انتي ويارا

جلال : طيب امي .. اهدي وصلي عالني

ام جلال : ولي ولي ولي لك لسه عم يقلي صلي عالنبي .. لك يا اجدب العالم رح يحكو عليك ويحطو العيب فيك وهي المعيوبة
ولك اصحى على حالك

فادية : مرت عمي انا ما بسمحلك

جلال : لك انتي اخرسي .. فوتي انقبري عالغرفة

مسحت دموعي وتطلعت فيه وانا معصبه كتير : ايه لأ ما بدي فوت .. انا ما قلت انك مو رجال انا قلت انو يمكن انت مريض او شي
ما كان اصدي عيبك ليش لتحكي امك عني انو انا العايبه وانا هلأ رح اتصل بأبي وخليه يجي ياخدني لنعرف ليش ما بدك
انت وامك واخوانك ولاد مني .. و وقتا انت اثبتلهن انو ما عندك مشكلة لشوف شو رح تحكيلهن

فتلت ضهري وبدي فوت على غرفتي ومسكني جلال من ايدي بقوة

جلال : لك تعي لهون جنيتي ؟

سحبت ايدي منو وصرت احكي بصوت عالي : اتركني ها انتو الحكي ما بيزبط معكن انا ما غلطت لاتشرشح بهل شكل

ام جلال : ولي عليكي شو قارحة وقوية لك استحي على حالك يخرب بيتك منيح ابني حاويكي لهلأ

فادية : نعمممممم ؟؟ حاوينييييييي ؟؟ لييييش شو شايفين علي ؟ انا هلأ بدي افهم شو القصة

ام جلال : هي يا تئبريني القصه وما فيها انو

جلال : اميييييييي …

ام جلال : بلا امي بلا بطيخ .. صار لازم تعرف شو هي وتلزم حدودها …

حسيت البي انقبض .. والدم ما عاد مشي بعروقي .. خفت كتير مع انو بعرف حالي مو عامله شي

فادية بصوت هادي : شو في ؟ .. شو القصة ؟

ام جلال : حبيبتي القصة انو انتي ..

جلال : خلاااااااااص … امي خلص

فادية : جلال انت ما تدخل .. انا هلأ بدي اعرف كل شي

التفتت على مرت عمي و انا عم ارجف: احكيلي .. شو في

#العَنْقَــاء_بقلم_مال_الشام
#واقعية

الــجــزء الثاني

ام جلال : حبيبتي انتي ما عندك رحم .. ما في مكان لتحبلي اصلاً .. وابني سيد الرجال
وانتي يعني ها يا دوبك نص مرا ..

سكتت شوي و جلال مشي وقعد وحط راسو بين ايديه وما تطلع فيني ..

فادية : شو ؟ ما فهمت ؟

ام جلال : لما كنتي عم تولدي وتعسرت عمليتك وماتو الاولاد كان ممكن تموتي انتي كمان .. بس وقعنا على اوراق انو يشيلو الرحم مشان تعيشي
وابني خبى عنك قال شو يا بعدي مشان مشاعرك .. تاني مره الزمي حدودك لان كلنا كنا نقول الله يعينها الي فيا مكفيها بس انتي تجاوزتي حدودك وكان لازم تعرفي حالك شو ..

سحبت حالها وطلعت من الباب !! لك طلعت ولا كأنو في شي .. ولا كأنو موتتني وتركتني بلا روح بلا احساس .. ولا كأنها حسستني اني ما بقى الي اي فائدة بالحياة
ولا كأنها حطمتلي كل احلامي بالحياة !!

مشيت لعند جلال و قعدت عالأرض عند رجليه و رفعتلو وشو بايدي : عنجد انا ما عندي رحم ؟ احكيلي عنجد هاد الحكي ؟

هرب بعيونو مني .. لف وشو للجهة التانية .. ورجعت لفيت وشو علي بايدي وصرخت فيه : ولك جاوبني بس قلي فهمني انا شوووووووووو
انا شو !!

جلال : انتي مرتي .. وام بنتي .. ونحنا عيلة بتجنن وما ناقصنا شي .. ليكي ما احلانا وكيف حياتنا هادية ومستقرة

بلشو دموعي يكتو وهو حط ايديه التنتين على وشي : اتطلعي فيني .. انا بحبك .. وما عندي اي مشكلة وما بدي ياكي تزعلي
بهديك الفترة كانت نفسيتك تعبانه كتير لهيك خبيت عليكي الموضوع .. حبيبتي اوثقي فيني انا مبسوط كتير وبنتنا ملك معبيه علينا حياتنا

شدني لحضنو ومسح على شعري .. وكنت حاسة روحي عم تطلع ببطئ .. بشكل مؤلم كتير ..كان بدي ولد !! كان بدي طفل
انا ما عدت بشبه اي ست بالدنيا .. انا هلأ ناقصه ! انا ما فيني جيب لجلال ولاد !!

ضليت خمس ايام ما احكي ابداً .. ولا حتى مع بنتي ملك ولا مع اهلي .. ولا مع جلال .. امي تجي تطعميني بالزور وتهديني وتزكرني انو في شي اسمو قضاء وقدر
وابتلاء و امتحان ولازم نصبر و نحتسب ! ..

اول كلمة حكيتها كانت ( طلقني ) ما بعرف ليش طلعت على شفافي .. كان عم يحاول يمزح معي مشان احكي معو
بس ما بعرف ليه هالكلمة طلعت من تمي ..
كانت ملك عم تلعب قدامنا وبس سمعت الكلمة تركت العابها والتفتت علينا وكانت عم تراقبنا باستغراب

جلال : مجنونة .. نطفتي قلبي لاسمع صوتك و هاد الي طلع معك ؟

فادية : انا تعبانه

جلال : انا ضهرك وسندك و قوتك .. ارمي حملك علي ..

و من هون بلشت حياتي الجديدة الي كنت فيها نص عايشه ونص بحس ونص بضحك ونص بحب ومتل ما قالت حماتي ( نص مرا ) ..

بعد شهر رجعنا طبيعين ( ظاهرياً ) و بسبب صدمتي صبيت كل اهتمامي ورعايتي لملك .. كأنها كنز و املي الوحيد بالحياة
كانت مدلله بشكل لا يوصف .. حب و اهتمام و الي بدها ياه بيحضر قبل ما تطلبو
جلال كان مقدر وضعي ويسايرني بكل شي ..

لوقت ما اجت مره يارا .. ولمحتلي انو حماتي عم تزن على موضوع الأولاد وبدها تجوز جلال !! يعني كيف تجوزو ؟ ما هو اصلاً بحبني
ما رفلي رمش لان بعرف شو مكانتي بقلبو و واثقه فيه ..

صارحتو وسألتو ازا بدو يتجوز بخبرني وما يلف ويدور واكدلي انو مافي هيك شي ومستحيل يتطلع بأي وحده غيري

وعلى هالأساس كنت حاول طفي نار الغيرة والخوف الي جواتي و اعمي عيوني عن مكالمات حماتي الطويلة مع جلال
وزياراتو اليوميه والمتكررة لهنيك ولما يرجع لعندي يرجع مكركب ومزعوج ..

اجتمعنا هنيك ببيت اهلو بعد 8 شهور من الموقف الي صار بيني وبين مرت عمي لما كانت اخت جلال ( نور ) جايه زيارة من الكويت .. كانت لمة عائلية وطبعاً اهلي واهلو عيلة وحده فــ كنا كلنا مجتمعين

و خبرتنا نور بهي القعده انها حامل ..

ام جلال : الف مبرووك بنتي .. كتر خيرك فرحتي البي حاكم كان ناطف قلبي على حفيد يفش القلب كتر خيرك

عملت حالي ما فهمت شي وقمت عالمطبخ .. تناولت كاسة وفتحت البراد لطلع منو ابريئ المي وكانت ايدي عم ترجف كتير
كان من البلور .. وانا عم طلعو وقع عالأرض و انكسر ..

من رعبتي رميت الكاسة الي بايدي كمان .. وطلعو الصوتين ورا بعض واجو يركضو لعندي ليشوفو شو صار .. التفتت وكانت يارا و جلال وامي على الباب

حطيت ايدي على تمي وانا عم ابكي : ما بقصدي هن لحالهن وقعو

قرب جلال لعندي : ديري بالك لا تجرحي حالك

نزل عالأرض وشال القطع الكبار وانا عم اتفرج عليه

امي : بسيطه حبيبتي انكسر الشر تعي

نزلت لعند جلال وهمستلو : بدك تتجوز علي ؟

ضل عم يلم البلور و رد : لا

قربت منو اكتر : ازا بدك تتجوز اتجوز ..

ضغط على البلور الي بايدو وجرح حالو وماني منتبهة عليه

جلال : قلتلك ما بدي اتجوز

فادية : اديه رح تنطر ؟ .. كمان شهرين ؟ كمان سنه ؟ سنتين ؟ ما بدي استنا وعيش بكزب .. تجوز من هلأ وريحني

جلال : لا .. رح انطر العمر كلو

فادية : كزاب ..

قمت من مكاني وبدي اطلع

يارا : اخييييييي ايدك عم تنزف ..

اتطلعت وراي وانتبهت على ايدو : لك شو عملت !!

قام من مكانو وترك كل شي من ايدو .. اجا لعندي ومسك ايدي وسحبني وطلعنا من البيت والكل ورانا عم يسألونا وين رايحين
حتى ملك ضلت عندهن

طلعني بالسيارة وانا عم اسألو شبو ووين رايحين وما رد

بس بعدنا شوي و وصلنا لطريق براني فاضي وقف السيارة والتفت علي ..

تطلعت بايدي كان عليها دمو .. وايدو كانت بعدا بتنزف

فادية : مبسوط هلأ ؟ هيك مرتاح يعني ؟

جلال : اسكتي اسكتيييييييي اسكتي .. ما بدي اتجوز ما بدي اتجووووز قلتلك ما بدي اتجوووز افهمي بئى افهممممي

رعبني صريخو وصوتو العالي وبذات الوقت ارضى غروري وشفى قلبي ..

جلال : انا عندي بنت .. و مبسوط فيها .. وبحبك ومبسوط فيكي .. بكفي بئى ولك بكفي .. نق نق نق نق .. انا ضجت وما عاد متحمل
بدك تطلئي روحي على بيت اهلك .. وخدي بنتك .. وحلي عني بئى .. ما بدي اتجوز افهميها وحطيها حلئ بادنيكي
فهمتي ؟؟؟؟؟

فادية : فهمت ..

جلال : ماشي ..

مد ايدو للكرسي الخلفي وسحب كنزة الو كانت بالسيارة .. مزعها بالنص و لف ايدو فيها .. وشغل السيارة ورجعنا على بيت عمي
اخدنا ملك ورحنا على بيتنا .. ما رضي يحكي معي وكان زعلان بس انا كنت مبسوطه اكتر مما حدا بيتخيل

تمسكو فيني واصرارو وحبو زادو ثقتي بحالي وخلوني اتجاوز شوي هالنقص الي فيني ..

تاني نهار صالحتو بطريقتي وفوراً تجاوب معي لاني بعرف شو بيحب وشو بيرضيه ..

حاولت زيد اهتمامي فيه ودللو اكتر وصرت اشتغل فوق طاقتي لاهتم ببيتي وكون زوجه ناجحه و مميزة .. شعوري بالنقص كان متل العقده
يعزبني كتير وحاول غطي عليه بجوانب تانيه .. كأني عم حاول غطي على عيون جوزي مشان نسيه !! ما بعرف شو كنت حس ..

مرقت سنه ونحنا على هالوضع وبنتي صار عمرها خمس سنين و سجلتا بروضة قريبه من البيت .. و بيوم من الأيام

بعد ما طلع جلال واخد معو ملك ليوصلها على الروضة .. بعد ثواني من طلعتهن .. رن جرس البيت

فادية : شو نسيتو يا حلوييييييييين ؟

فكرت جلال نسيان شي .. وركضت على الباب وفتحتو وانا عم اضحك .. ويا ريتني ما فتحتو .. بهديك اللحظة .. فتحت قبري بايدي ..

#العَنْقَــاء_بقلم_مال_الشام
#واقعية

الــجــزء الــثــالث

فادية : مرت عمي ؟ ..

بعدتني و فاتت بدون ما تحكي

فادية : خير في شي؟

ام جلال :ليش بدي سبب لزور بيت ابني ؟

فادية : لا بس ابنك مو هون .. قصدي جلال طلع

فتلت ضهرها عني وحطت الشنته من ايدها : انا ضليت واقفه برا لطلع جلال وفتت .. ليكي يا فادية .. انا بدي جوز ابني رضيتي ولا ما رضيتي
بقى كني واتركيني اعرف اتفاهم معو لان ما عم يتجاوب بنوب

عضيت على شفافي و بلعت الغصة : ايه انا ما قلت شي وما عم اعمل شي بس هو ما بدو يتجوز .. من ايمت الزواج بيصير بالغصب ؟

فتلت علي وهي عم تضحك : لا ياه ؟ ليش في رجال بصحلو يتجوز التانيه وبقول لأ ؟قال بالغصب قال .. ليكي جوزك ناطف قلبو و ناطر الفرصة المناسبه .. بس خايف على مشاعرك

تجاهلت حكيها : رح اعملك فطور لان وش الصبح اكيد ما افطرتي

ام جلال : فادية انا عم احكي معك بتوقفي وبتردي علي ..

فلتت من عيني دمعه ما قدرت خبيها

فادية : والله هو ما بدو يتجوز اسأليه انا ما قلتلو شي

ام جلال : ليكي انا بعرف انو بيحبك .. وانا ما عم قول انو يطلقك لا سمح الله .. كرامتك محفوظة و مكانتك متل ما هي
انتي فكري فيا .. ابني ما بعيبو شي ومادياتو فوق الممتاز .. لازمو ولد يحمل اسمو و يشيل الشغل من بعدو
طيب انسيني انا وابني و الشغل .. بنتك ؟ ما بدها اخ تسند ضهرها عليه بالأيام ويوقف جنبا وقت الحاجه ؟
حدا بيضمن عمرو ؟ مشان انانيتك بدك تخلي هالطفلة وحيده كل عمرها ؟

كنت عم اسمع وعيوني بالأرض وما عندي اي شي رد فيه لان ازا رديت رح صرخ بكل صوتي وقلها بكفيييي انتي ما دخلك .. ما دخلك
ما حدا دخلو

ام جلال : انا حكيت اللي عندي .. وابني رح جوزو لو كان اخر يوم بعمري .. بخاطرك ..

مرقت من جنبي و ضلت طالعه .. بعد ثواني اجت نسمة هوا قوية وطرقت باب البيت وضرب بقوة … نقزت .. قعدت بالأرض
مسحت على وشي .. وضليت كل النهار مكاني وعم اتطلع بالحيط على صورة معلقة .. تصورتا انا وجلال بعرسنا و كبرها وعلقها بالصالة
كان دايماً يقلي كل ما بشوفها بتزكر كل تفاصيل عرسنا وبنبسط .. لهيك خليناها هون ..

ما بعرف كيف مرق الوقت .. صارت الساعه 1 .. ورجع جلال وهو حامل ملك معو وكان الباب مفتوح .. لما فات شافني قاعده متل ما انا والبيت متل ما هو

نزل ملك من ايدو وركضت لعندي

ملك : ماما ماما .. اخدت عشرة

ضحكت .. رفعت شعري عن وشي : شطورة حبيبتي

ملك : والأنسه قالت عني اميرة

فادية : ايه

جلال : حبيبتي فوتي غيري تيابك وتعي مشان نتغدا

ملك : اييييييييييه جوعااانه

ركضت على غرفتها وهي عم تضحك ..

جلال : شو في ليش هيك قاعده ؟

وقفت على رجلي ورحت على المطبخ

فادية : رح حاول جهزلكن شي سريع تتغدو .. ما عملت اكل ..

لحقني عالمطبخ : لك شو في حدا صايرلو شي ؟ شبك ؟ فادية احكي معي .. لك ردي علي .. فاااااااااااادية عم احكي معك

فادية : اييييييييييييييييه خلص بئى روح من وشييييييييي

صرخت فيه هالصوت .. وتطلعنا ببعض .. انا ساكته وهو ساكت

صارو عيونو يطلعو شرار .. كنت متوقعه يضربني .. لان مع كل الحب والدلال الي عشتو معو بس الو هيبة ..

طلع من المطبخ .. ومن البيت كلو .. و الهيئة راح لعند اهلو وهنيك فهم من امو شو صار ورجع لعندي بعد ساعه فتح باب البيت .. كنت مطعميه ملك ومحممتا ونيمتا
وقمت عملت حوصه بالبيت وضبيتو

تحممت ولبست بيجامة زهر وحطيت بارفان و فردت شعري و عطرت البيت ..

فادية : ايه جلال انا هون بالغرفة

فات لعندي وكنت قاعده على المرايه

جلال : كيفك ؟

فادية : منيحه .. وين كنت ؟

جلال : زعلانه ؟

فادية : مممم هئة

قرب وقعد على طرف التخت

جلال : اكيد ؟

ضحكت وقمت من مكاني .. لفيت من الجهة التانيه للتخت و حطيت ايدي على كتافو : ايه اكيد ..

جلال : ما تهتمي بالشي الي سمعتيه

فادية : هسس .. خلص ما تحكي

جلال : بس

فادية : لك التلك ما تحكي خلص

بستو على خدو والتفت علي وقعدنا مواجه بعض

فادية : اشتئتلك

جلال : بدك تجنيني انتي ؟!

فادية : ههههه ايه لك بحبك ..

مرقو يومين بشكل عادي و برواق … و حستتو اني تجاوزت الحكي ونسيتو وهو جبلي اسوارة هدية واخدنا انا و ملك غدانا برا

باليوم التالت بعد ما طلع جلال من البيت .. لبست و نزلت انا من البيت .. ما كنت متوقعه اتأخر بس لما رجعت كان جلال بالبيت و جايب اكل الو ولملك

وحللها وظايفها و كانت قاعده على التلفيزون ..

فتت عالبيت وانا متلبكة كتير وما عرفانه شو بدي قلو .. حاولت دبر الموضوع وفتت بشكل طبيعي

فادية : تأخرت عليكن ما ؟ يبعتلي حمى .. فايته اعمل اكل بسرعه

جلال : وين كنتي ؟

فادية : ملوكتي تعي حبيبتي ساعديني بالمطبخ يلا

جلال : عم احكي معك ..

فادية : ايه منحكي بعدين عادي رحت مشوار بس سرقني الوقت .. رح اطبخ مجدرة عالسريع ازا بدك فوت خود غفوة

جلال : انا بعرف وين كنتي ..

وقفت مكاني وغمضت عيوني بقوة

جلال : بس ليكي ها .. انتي شعلتي نار ما رح تاكول حدا غيرك .. تزكري هالحكي يا فادية

بلعت ريقي وحسيت حكيو مشي بجسمي متل السم

نزلت راسي بالأرض : انا ما بدي اضحك على حالي .. وما بدي حدا يضحك علي .. لهيك رحت براسي و خطبتلك … كرامتي فوق كل شي يا جلال …
بس ليك ها .. عروستك حلوة ههههههه

جلال : يعني نقول مبروك ؟

فادية : ايه .. مبروك .. تهري وتجدد

رفعت عيوني فيه وكان قاعد على ايد الكنبايه و عم يتطلع فيني بشكل غريب

ملك : بابا .. على شو عم تباركلك امي ؟

جلال : امك راحت خطبتلي

فادية : لا حبيبتي .. بدي نجيبلك اخ

رجعنا تطلعنا ببعض و ملك كان واضح انها فهمانه شو عم يصير و هادية كتير وعم تتطلع فينا وتحاول تحكي معنا

مد ايدو على الطاوله تناول جزدانو و مفاتيح السيارة وطلع من البيت .. وبس سمعت صوت الباب تسكر .. بلشت بكي لان كان قلبي رح ينفجر من الوجع وركضت ملك لحضني وصارت تبكي معي ..
رحت مع حماتي وشفنا بنت لجلال .. وحكينالهن عن الوضع .. كنت جبارة .. ما بعرف اي قوة رب العالمين حطها فينا وانا عم احكي مع البنت
وفهمها الوضع وقلها انو انتي رح تسكني بالطابق الي فوقي .. وما رح يكون في اي علاقه بيني وبينك انتي ببيتك وانا ببيتي
وجوزي كريم و خلوق و اي بنت بتتمناه .. كانت من عيله فقيرة وبس سمعو باسم عيلة جوزي و مين بيكون لمعت عيونهن
و ابدو موافقه اوليه على اساس انو عم يتقلو بس كان واضح انهن موافقين بدون اي اعتراض .. ومرت عمي ما قصرت وهي توعدهن
وتحاول ترضيهن .. كأنو بدها تتم هالجوازة بسرعه بما اني وافقت واجيت برجلي قبل ما اصحى على حالي

الي بيعمل عملتي معقول يكون عااااااااااقل !! لك انا شو عملت بحالي !!

بعد هاد الحكي اختفى جلال أسبوعين !! ما حدا كان عرفان وينو لا اهلو ولا اهلي ولا انا وما حكي مع حدا منا .. سألنا بالمشافي و المغافر و بكل مكان و ما عرفنالو اثر

بالأسبوع التالت كنت قاعده ببيت اهلي انا وملك … اتصلت فيني يارا و كانت عم تحكي بشكل غريب و ما عم افهم عليها

يارا: جلال…. جلال… لك جلال جن

#العَنْقَــاء_بقلم_مال_الشام
#واقعية

الجزء الرابع

لبست تيابي بسرعه و وصلني ابي على بيت عمي و فات معي لهنيك .. و كانت قاعده مرت عمي وحاطه جلال بحضنها وعم تملس على شعرو

فادية : جلال ؟؟؟ لك وين كنت ؟؟

وقف وابتسم وسلم على ابي وسلم علي بهدوء

جلال : طلعت ريح راسي وحبيت بعد عن الكل

ابي : بس يا ابني انت رجال عندك عيله الي عملتو ما بجوز

جلال : حقك علي عمي كنت مضغوط كتير

طلعت يارا من غرفتا واجت وقفت جنبي .. قعدو الكل الا انا وياها

ام جلال : ابني الله يرضى عليه حط عقلو براسو و وافق على الجوازة الحمدلله الله هداه

ابي : _ _ _

تطلعت بيارا وهي مسكت ايدي لتسندني بس ما كان في شي بهي اللحظة ممكن يسندني .. ولا اي شي

فادية : اي .. الحمدلله ..

ام جلال : اليوم رايحه اتفق مع الجماعه على كتب الكتاب .. وبدنا نجهز الطابق التاني الي فوق بيتك يا فادية ونفرشو مشان ضرتك تسكن فيه
او ازا بتحبي انتي تاخديه وهي تنزل على الطابق الأول ما في مشكلة

فادية : لا .. بدي ضل ببيتي

تطلع فيني ابي وهو مستغرب مني كيف عم احكي وكيف متماسكه .. والكل بيعرف اديه انا بحب جلال وهو اديه بحبني
او أديه ( كان يحبني ) ..

رجعت على بيتي انا وجلال بدون ما نحكي ع بعض ابداً .. فات على غرفتنا ونام وانا بعد هاليوم عيوني ما عاد عرفو طعم النوم

كتب كتابو على ضرتي ( شذى ) و بلشو يفرشولها الطابق الي فوق بيتي … يمكن شي بعمرها ما شافتو من العز والجاه والمال ..
وانا اعمل حالي مو شايفه ولاعب بنتي وما ورجيت جلال ولا دمعه ويمكن هاد كان اكبر غلط لان كنت عم استفزو بطريقه غبيه

بليلة العرس رفضت روح وضليت لابسه البيجامه وعامله حالي نايمة و خليت ملك عند اختي لان كنت حسها فهمانه كل شي عم يصير
حبيت ابعدها وما خليها تشوف كيف ابوها عم يروح من بين ايدينا وعم يصير لمرا تانيه !!

حطيت الغطا فوق راسي و نزلو الدموعي و سكرت تمي بايدي لان جلال كان عم يلبس عندي بالغرفة !!
لبس بدلة سودا و سرح شعرو كنت حاسه عليه عم يتحرك حوالي .. وعم اتخيل كيف بعد شوي رح يكون بحضن وحده تانيه

ما عاد سمعت حركتو .. فكرتو طلع .. رفعت الغطا عن راسي شوي شوي .. وما لقيتو بالغرفة ..
طلعت من غرفتي .. وشفتو قاعد بالصالة .. وعم يبكي !! قربت لعندو وانا عم ابكي كمان بس هو كان يبكي ويشهق متل الطفل
وشو احمر كتير ودموعو متل المطر

فادية : عم تبكي يا جلال ؟

جلال : مخنوق .. حاسس روحي عم تطلع

فادية : سلامة عمرك .. دخيل اسمو لالله على هالامتحان شو صعب

حط ايدو على خدي ومسحلي دموعي و باسني على جبيني

فادية : تأخرت لازم تروح

جلال : بحبك ..

قام تركني وطلع من البيت …

بقيت قاعده على الشباك .. لوقت جابوه هو وعروستو بزفة وطنه ورنه .. .نزلو من السيارة وكان ماسك ايدها

عملولو عراضه .. ضلو تحت خمس دقايق وانا عم اتفرج عليهن من الشباك ..

وبعدا بلشو يطلعو عالدرج .. ركضت لورا الباب .. بعدا ركضت على شباك المطبخ .. بعدا ركضت على البرندة

وبعدا شفتهن طفو ضو غرفتهن !!!

كأنو حدا شال قلبي من صدري حسيت بوجع قوي كتير ما بعرف ازا هاد مجرد ألم ولا انا عنجد عم موت من جوا ما بعرف

ضليت ع راقب شبابيك بيتهن …

وبعد شوي اجت امي واخي وجايب معو ملك ..

وكانو مقررين ينامو عندي لانهن خايفين علي ..

كنت هادية كتير وساكته وملك عم تسأل عن ابوها .. اخدها اخي وفوتها على غرفتها و شرحلها انو هلأ الها مرت اب
وانو ابوها ما رح يكون بالبيت متل ايام زمان لانو صار عندو بيت تاني

بنتي ملك بتشبهني كتير … بكل شي … كنت المس فيها شجاعة واصرار … بحس رب العالمين وهبها صفات ما موجودين عند كل الناس
كتير كنت انبسط فيا … بس ما بعرف هلأ الأيام شو مخبيتلها ! وكيف بدي احميها ..

ضلينا كلنا صاحين ما حدا عينو غفيت .. وما حدا عم يحكي شي .. صمت فظيع وقاتل

كأنو كل واحد عم يتخيل شو مخبيه الأيام و شو رح يصير فيني انا وبنتي .. وكيف بدي بلش اتعود انو في الي شريكة بالرجال الي بحبو
ورح تجبلو ولاد .. رح تعطيه الي انا ما عم اقدر اعطيه ياه !

عملتلي امي كاسة يانسون وحطتلي شرشف على ضهري

وحاولت تحكي معي وتلعبلي بشعري بس انا كان عقلي بعالم تااااااانييييي … عالم بعيد كتير وبشع ..

أدن الفجر وقمت توضيت وصليت .. فتت لعند ملك قعدت فوق راسها وكنت عم احكي معا وابكي

فادية : ملوكه حبيبي .. انتي ما تزعلي .. وما تفكري بشي .. انا بوعدك انو امك رح تضل جنبك وتحميكي بكل الظروف
بعدين عادي بابا ما اول ولا اخر واحد بيتجوز .. واحزري شو .. رح يجيبلك اخ .. مشان ازا الأيام قسيت عليكي تلاقي جنبك رجال يحمكي
سدئيني ما في بعد الأخ .. شوفي كيف خالك واقف جنبي … ان شاء الله ربنا بيبعتلك اخ حنون متلو
بس انا كتير زعلانه من ابوكي .. زعلانه منو .. كتير …

نمت بتختا وحطيتا بحضني و غفيت من التعب .. ما بعتقد مرقو اكتر من عشر دقايق .. وصحيت على صوت جرس باب البيت

فكرت حالي عم اتوهم .. بس رجع رن ..

فادة : اللهم اجعلو خير شو في

قمت شوي شوي مشان ما تصحى ملك وفتحت باب الغرفة ..

واول ما طلعت كانت امي فاتحه الباب و جلال فايت على البيت ..

تطلعت على الساعه .. كانت سته الا ربع ..

تطلعت بأمي و ما حدا حكي شي ..

فات جلال على غرفتنا وسكر الباب وراه

امي : فوتي شوفي جوزك شبو

فادية : ماشي

حملت حالي ولحقتو على الغرفة .. فتت وسكرت الباب وراي ولما التفتت عليه لقيتو نايم بالتخت

فادية : لك شو عم تعمل !!

جلال : بدي نام تعي نامي جنبي

فادية : جلال !
#يتبع