تنمية زوجية
هذه المقالة تأتيكم من قسم المنوعات في زاكي
زمان كان لينا جار دائم الضرب لزوجته وأطفاله , وكانت حجته دائما لما يهدى
” أصلي راجع من الشغل متنرفز وكان عندي مشاكل”
لما كبرت شوية ومع انتشار الفئة الأكثر تعليما بين الأزواج , لاقيت الأمر ده بيحصل بس بشكل تاني
الزوج يرجع من الشغل متنرفز , فيدور على أي حاجة يعكنن بيها على زوجته وأطفاله
يلاقيهم بيتفرجوا على التليفزيون , فيقفله
يتلكك لزوجته على تأخر تقديم الأكل , أو المطبخ مش نضيف ليه
يجيب ابنه علشان يسمعله أصعب درس موجود , فياخدها حجه ويضربه
.
الرجال إللي بتعمل كدة عندها خلل في مفهوم الزواج
ربنا سبحانه وتعالى لما ذكر الحكمة من خلقنا كأزواج قال إيه ؟
” ومن آياته أن خلق لكم من أنفسكم أزواجا … ”
طيب ليه يارب ؟
” لتسكنوا إليها … ”
وإيه كمان تاني يارب ؟
” وجعل بينكم مودة ورحمة … ”
وبعدها سبحانه قال
” إن في ذلك لآيات لقوم يتفكرون ”
.
لو ربنا كرمك وفتحت المعجم ودورت على معنى كلمة “سكن” , هتلاقي معناها
الطُمَأْنِينة و الراحة
ربنا سبحانه خلقك علشان لما زوجتك تحس بخوف أو قلق , ترجعلك تحسسها بالحماية والحنان
تخاف من المستقبل فتقولها
“ما تخافيش يا حبيبتي , طول ما أنا جنبك مش هاسمح لحد يقرب منك”
.
ربنا سبحانه خلقلك زوجتك علشان لما بتقابل مشاكل وصعاب طول يومك , ترجع تقعد معاها وتتكلم , فتحس براحة وطمأنينة
تلاقي إللي يطبطب عليك وتقولك
” ولا يهمك يا حبيبي , ده انت عندي بالدنيا”
” وإيه يعني حصلتلك مشكلة يا حبيبي , انت تقدر تعديها وتبقى أحسن واحد في الدنيا”
.
حد ممكن يسأل مستغرب
” يعني هى لما تقولي معلش أنا هابقى كويس !”
أيوه هاتبقى كويس , لما زوجتك تقولك “معلش يا حبيبي” هاتحس إن في حد بيحبك ومهتم بيك , هاتحس إنه بالرغم من المشاكل إللي بتقابلها في شخص في حياتك شايفك أحسن واحد في الدنيا
المعلش بتاعة مراتك حلوة , بترجعلك ثقتك في نفسك والله
.
قال بعض السلف
” الرجل هو الذي يحمل الهم ولا يدخله على أهله.”
عندك مشاكل في شغلك أو في حياتك
يا تشاركها مع زوجتك وتسمع منها وتسكن إليها
يا إما ماتنقلش همك عليهم وتستضعفهم