الششبرك اكله طيبه بامتياز الله يديم النعم عالجميع

الششبرك اكله طيبه بامتياز الله يديم النعم عالجميع
معكم صديقة زاكي الشيف الموهوبة  Fatmah Abu Diab

طريقه عمل الششبرك 
العجينه بتحطي 4 كاسات طحين بتحطي عليهم معلقه ملح تاعت الاكل وبتحطي فنجان قهوه زيت نباتي وبتعجنيها بماء دافي شويه وبتكون العجينه جامده طبعا الميه بديري شويه شويه لحد ما تتماسك معك ما في مقدار للماء بس بنعجن لحد ما تتماسك معنا وبنريحها ساعه زمن بعدها ببلش اشتغل فيها

الحشوه نص كيلو لحمه عجل بلدي خشنه بسبك اللحمه جيدا على نار هادئه ولما تقرب تستوي بفرم راسين بصل كبار وبحطهم علي اللحمه وبضل احرك كل شوي لحد ما يستوي جيدا بتركهم يبردوا

بعدها بفرم شويه بقدونس ناعم وبخلطهم مع اللحمه وببدى احشي دوائر الششبرك وبسكرهم وبلفهم وبتركهم على جنب لحد ما اخلص الكميه اذا ضل عندك من العجينه بتقدري تحشيهم جبنه زي السمبوسك أو بتقدري تعملى منها كم حبه مطبق أو اصابع الجوز إلى بتحبيه وصحتين وعافيه

لعمل اللبن انا بحط نص راس لبن جميد كركي وبحط علبه لبن أم الكيلو أي نوع لبن زبادي عندك وبحط معلقه صغيره نشا ومع كاستين ميه وبخفقهم على الخلاط لحد ما يتجانسوا سوى وبصفيهم في طنجره وبحطها على النار مع التحريك المستمر لحد ما يغلى بعدين بسقط عليه حبات الششبرك وبتركهم لحد ما تستوي حبات الششبرك مع التحريك كل شوي وآخر شي بقليلها ثومه وبحطها عالوجه
ملاحظه في ناس بحبوا يقلولها بالاخر ثومه وكزبره خضرا وهاد برجع حسب الرغبه وشو بتحب ست البيت من نكهه