قصة سيلا الجزء الثاني والثالث بقلم حنين طه

قصة سيلا الجزء الثاني والثالث بقلم حنين طه
هذه القصة تأتيكم من قسم المنوعات في زاكي
#سيلا_بقلم_حنين_طه

قصة سيلا الجزء الثاني بقلم حنين طه

الجزء التاني

راشد

كنت متخوف كتير من فكرة اني اتزوج وارتبط بنور وانا على علاقة مع شغالتها بس ريم كان فيها سحر كانت بتجذب اي شب بيتطلع عليها ،،، قويت قلبي ووافقت كون زوج لنور وعاشق لريم

ام راشد: امي راشد تعا حبيبي لهون اليوم اتصلو علينا الجماعة اهلها لنور وعم يقولو انه هني موافقين عالخطبة وقالولي حدد اي وقت لنروح نتمم كل شي رسمي

راشد: امي يعني انتو ادرى مني خلص شوفو المناسب واعملوه

ام راشد: شو صارلك كنت متحمس كتير من كم يوم متزاعل شي انت ونور

راشد: لا امي شو بده يكون فيه وبعدين ليه بدنا نتزاعل انا ونور بس ضغط الشغل هو الي متعبني

ام راشد: اذا هيك الله يعطيك الف عافية

المسا رحت انا واهلي عند نور واهلها قعدت انا ونور لحالنا بغرفة لحتى نتعرف عبعض اكتر كانت انسانة كتير فهمانة ما بتحكي الا بالمنطق بتبتسم بحدود وبتضحك بحدود وبتحكي كمان بحدود

انفتح علينا الباب فجأة

نور: ريم في شي

ريم: لا ولا شي بس فتت لاسالكم اذا محتاجين شي او بتحبو ضيفلكم شي

نور: لا حبيبتي ريم اذا احتجتك اكيد رح ناديلك

ريم: ماشي بعتذر

طلعت ريم من عنا وعالسريع بعتتلي مسج
( ماخد راحتك عالاخر معها لنور وانا ولا كأني موجودة )

قرأت المسج ونزلت تلفوني وحطيته بجيبتي

نور: شكلها رسالة شغل

راشد: ليش يعني

نور: ما بعرف هيك حسيت من تغيير ملامحك

راشد: بتقري الملامح يعني

نور: انه مو كتير بس بقدر اعرف الشخص الي قبالي زعلان او مبسوط او مدايق يعني هيك

راشد: وانا هلا شو مبين علي يا ترى

نور: مممممم مبين عليك مبسوط بس خايف

راشد: من شو بدي خاف يعني

نور: هلا مو خايف بمعنى خايف بس حاسة انه في شي محيرك

راشد: انه حدا بكون قاعد مع انسانة حلوة متلك وما بده يكون متحير ومتوتر

نور: بعتبره غزل هاد

راشد: يا ستي اعتبريه بداية للغزل لسا الي جاي اكبر

خطبتي على نور ما قعدت كتير ما حبينا نطولها كتير
خاصة انا متفقين تقريبا عكل التفاصيل من مكان السكن لمكان الحفل وكل شي كان عم يتم بسرعة

راشد: مسا الورد

نور: مسا النور شو هالوردات الحلوات

راشد: الورد للورد قلت لحالي بحي بسهر عندكم شوي

نور: ايه اهلا وسهلا فيك باي وقت تفضل

فتت لجوا كانت قاعدة امها وابوها وريم تلبكت شوي لما شفتها ،،، سلمت عليهم وقعدت ومتل ما توقعت صار بعتتلي ريم مسج

( اطلع لبرا عالحديقة بدي شوفك هلا هلا واذا ما بتطلع رح اخرب الدنيا

راشد: احم ايه نور بدي اطلع لبرا شوي عسيارتي لازم جيب ورقة من السيارة واعطي المعلومات الي فيها لرفيقي

نور: ايه طبعا خد راحتك ولو

طلعت بسرعة من عندنورورحت على مكان مزوي بالحديقة

راشد: انتي جنيتي صح

ريم: والله انت اذا بقيت هيك اكيد رح تجنني

راشد: شو عم بعمل انا ولا بتحبي اتعامل مع نور وكأني موطايقها لحتى خليها تحس علي

ريم: ما عم اقدر افهم علي ما عم اقدر لك كل ما بشوفك معها بجن بطق

راشد: مو انتي الي اقترحتي نلعب هاللعبة من البداية

ريم: ما توقعت الغيرة الي جواتي تحرق ضلوعي هيك

راشد:يا حبيبتي يا ريم كبري عقلك علاقتي مع نور كلها تمثيل بتمثيل

ريم: اضحك علي بتعرفني بحبك ورح صدق

قربت لعندها ضميتها لصدري

راشد: حاجتك جنان انا بحبك الك وبس مضطرين نضحك على نور لنبقى دايما جنب بعض

ريم: طيب خلص صدقت بس لا بقى تجبلها ورد

راشد: يا ستي تكرمي من عيوني

احساس حزن كبير كان جواتي على ريم وحالتها من جهة حاسس حالي بعدني بحبها واكترمن اول كمان ومن جهة بعيدة حاسس اني عم حب شخصية نور بحب توازنها
بشتاقلها وبشتاق حاكيها

مرقت فترة الخطبة بحلوها ومرها ليوم العرس
كان كل شي منظم حفلة فخمة نور بفستان بسيط كتير ومع هيك طالعة حلوة كتير اما ريم كانت لابسة فستان احمر قصير مظهر انوثتها بشكل مبالغ فيه كل انظار رفقاتي كانت عليها كانت حلوة ،،، وما قعدت ابدا وهي ترقص من غنية لغنية

نور: راشد ما قلتيلي كيف طالعة انا

راشد: بصراحة بتفلجي حلوة كتير ايه بس بدي قلك شغلة يعني خدامتكم هي ريم مو ملاحظة انه لبسها مبالغ فيه يعني بالنسبة لخدامة ما بصير تلبس هيك

نور: ايه واذا خدامة يعني تدفن حالها بالحياة ما هي بنت ومن حقها تلبس وتعيش بصراحة ما توقعت عندك هالنظرة الفوقية هاي

راشد: مو هيك كان قصدي انا

نور: فاهمة مزبوط شو قصدك

راشد: طيب انا اسف خلص قلنالك اسف

نور: خلص ما صار شي

راشد: ( بعقله) ( وبتدافع عنها كمان اااخ يا ربي )

صار وقت كل المعازيم يجو يسلمو علينا ويباركولنا بعرسنا ومن ضمنهم ريم الي قربت لعندي وحطت بايدي ورقة مكتوب فيها ( عرس مبارك يا عريس)

رجعنا عالبيت معي اهلي واهلها لنور اطمنو علينا

ام راشد: يلا يا جماعة خلونا نروح ونترك العرسان لحالهم
مو هيك عروستنا الحلوة

نور: لا عادي خالتو ولو اهلا فيكي

ريم: اي يلا عاد نور تلاقيكي مومصدقة متى نروح لتقعدي مع عريسك لوحدك

كلنا اطلعنا بريم لانه كلمتها كانت واقفة كتير وما حدا عرفان شو في ورا هالكلمة الا انا

ام نور: مزبوط يا جماعة العرسان بدهم يرتاحو واحنا كمان بدنا نرتاح

ريم : مدام شو رأيك انا ابقى عند نوراكيد في غرف كتير بالفيلا هون احسن ببقى هون اذا احتاجت شي ما بتركها لوحدها

ام نور : بس

نور: والله يا ريت يا ريم اساسا انا هون لسا جديدة واكيد رح بحتاج حدا يساعدني بشغل البيت والضب وهيك
يعني ببداية زواجي عالاقل

من جواتي ما كان بدي ريم تبقى عنا بالبيت لاني بعرف رح يجيني وجعة راس

حاولت اتدخل بس متل ما بقولها بدل ما كحلها عميتها

راشد: بس انا ببيتي بحب مرتي يكون الها لمستها الخاصة وما بحب الخدم ابدا

اطلعت فيني ريم بطرف عينها

نور: خلص ييييي بتبقى ريم هالكم يوم لركز حالي وبعدين بترجعي لعند اهلي

ريم: لا بلاها ست نور بلا ما يدايق الاستاذ راشد

نور: لا اكيد راشد ما بيقصد

ايو نور: طيب يلا بالاذن

طلعو اهلها لنور وطلع ابي بس امي وهي طالعة قربت لعندي وسحبتني على جنب

راشد: خير امي في شي

ام راشد: بصراحة امي هالخدامة ما ارتحتلها ابدا ديرو بالكم انت ومرتك منها

راشد: اتوكلي عالله امي

بعد ما طلع الجميع انا رحت لغرفة النوم وكنت سامع نور عم بتدل ريم عغرفة النوم تبعها بعدها لحقتني

نور: راشد عم بتدخن بليلة عرسنا

راشد: راسي واجعني شوي من صوت الحفل والازعاج الي فيها

نور: زعلت لاني خليت ريم هون

راشد: انتي حرة ليش لازعل

نور: والله مو هيك بس ريم مسكينة ربيت عنا من لما كنا صغار بحبها وبعتبرها متل اختي لا تزعل

راشد: طيب هلا خلينا بحالنا واتركينا من اي حدا تاني

مرقت اول ليلة عخير ولو اني كنت متخوف كتير من ريم وعمايلها وفقت تاني يوم من الساعة 7 الصبح تسحبت شوي شوي وتركت نور نايمة وطلعت لشوف ريم

ريم: اهلا اهلا بالعريس

راشد: اشتقتلك

ريم: لك مو مستحي من حالك بعدين شو جايبك لهون هلا بتحس عليك نور

راشد : نور نايمة وما رح تصحى قبل الظهر

ريم: ايه روح انطرها لتفيق ليش جاي لعندي ما انا خدامة

راشد: لازم يا حبيبتي يا ريم احكي هيك حتى ما حدا يفكر اني قاتل حالي عليكي

ريم: موبايلك عم يرن

راشد: هيدا مسج مين بده يبعتلي من هالصبح

( بررررافو راشد طلع بايدك تنيم ريم عند نور عصفورين بحجر واحد برافو …. سيلا)

مسج راشد: ( مين معي )

مسج سيلا( وحدة معجبة )

مسج(؟؟؟؟)

مسج سيلا( من زمان كتير من ايام ما كنت تدرس بجامعة النصر وتقعد بالكفتيريا وتطلب عصير جوافة ودايما تقعد عطاولة رقم 10 بتحب اعطيك معلومات تانية ولا بكفي )

مسج راشد( شو بدك مني )

مسج سيلا( حاليا ما بدي منك شي بس خليك متذكر اسم سيلا )

ريم: راشد شو في ليش هيك تغير لونك

راشد: ولا شي مشكلة عندي بالشغل انا لازم روح بلا ما هلا تفيق نور

ريم: روح مين ماسكك

راشد: سلام

رجعت عالغرفة بحاول اتذكر كل بنات دفعتي بالجامعة
لقيت نور نايمة قعدت جنبها حاول اتذكر مين هي وشو بدها مني وكيف عرفت عن ريم
مسحت كل المسجات بلا ما نور تشوفهم وفيقتها لننزل نفطر

راشد: يسعدلي جمالك

نور: صباحو

راشد: صباح الورد يلا قومي لنفطر

نور: لسا بكير خليني نايمة كمان شوي

راشد: يا كسولة يلا قومي غسلي وجهك ويلا

فتحت البرادي كلهم لشوف الشمس واشعتها بتلامس بشرة نور

ونزلت لتحت حتى حظر الفطور الي ولنور

ريم: شو فاقت ست الحسن

راشد: ايه فاقت

ريم: سمعت بدكم تطلعو سوا على ماليزيا شهر عسل

راشد: ايه مزبوط

ريم: على جثتي يا اما رجلي على رجلك

راشد: لك شلون يعني رجلي على رجلك شو بدي قول لنور

ريم: والله دبرها متل ما امبارح قلت ما بدي شغالة بالبيت اليوم ارجع قول ما بسافر بلا شغالة

راشد: ايه بلاها الطلعة احسن

بالفعل لما اجت نور حاولت خبرها انه ما رح اقدر اطلع شهر عسللانه عندي عمليات كتير ورح عوضها لبعدين

نور: مو مشكلة حبيبي شغلك اهم من كل شي

بقيت ريم عنا فترة منيحة حوالي اسبوعين عكل شي تقعدلي عكل شي تسالني انه وين رحت وين جيت شو عملت مع نور لاوقات صرت حاسس حالي مالل من علاقتي من ريم نفسي ارتاح بحياتي الزوجية بس كمان مو قادر اترك ريم

السكرتيرة : دكتور راشد رفيقك كريم ناطرك برا شو بدخله

راشد: ايه طبعا دخليه

كريم: شو يا لسا ما خلصت شغل

راشد: تعال من شوي طلع من عندي اخر مريض

كريم: والله واشتقنالك لو بنعرف الزواج رح يبعدك هيك عنا ما كنا زوجناك

راشد: ههههههههههه طبعا هلا انت اسد بكرة بتتزوج وبنشوفك بتقلب ارنب

مسج من سيلا ( عم اشتاقلك انا كتير )

راشد( انا ما رح اخلص منك )

سيلا( يا ريت اقدر اخلص من حبك ولا بقا اتعذب فيك وانا كل مرة بشوفك مع نور وريم بس بوعدك اخلص منهم التنتين باقرب وقت )

راشد ( حلي عني )

سيلا( هلا بتحكي هيك بكرة لتعرفني منيح رح تتمنى ابقى العمر جنبك …. سيلا )

راشد: الله يلعنك

كريم: شو في راشد

حسيت وقتها اني بحاجة لاحكي عن الي جوا قلبي لحدا اخدت نفس عميق سحبت فيه كل الهوا من حولي ورجعت نفخت بقوة

كريم : اف لهدرجة طيرتني يا زلمة

قلت لكريم كل شي عندي من بداية علاقتي بريم لحتى علاقتي بسيلا

كريم: العما بقلبك هالتخبيص الي عايش فيه
مجنون انت والله لو تعرف مرتك لتقلب الدنيا عراسك

راشد : هلا انت جاي تخفف عني ولا تزودها علي

كريم: اسمع يا رفيقي هي ريم ما غيرها الي عم تلعب فيك او حدا من طرفها لا تكون اهبل
خلصت البنات لتحب هي اتغدا فيها قبل لتتعشى فيك
فكرت بكلامه ولقيت انه الي بتخون نور وبتعض بيوم الايد الي انمدت العا مو بعيدة عنها تلعب فيني

راشد : هو هيك

————–

راشد: ريم وينك انتي

ريم: جيت اليوم عند الخانوم الكبيرة

راشد: طيب بدي شوفك

ريم: ما عم صدق لسا اليوم الصبح كنت معك لحقت تشتاقلي

راشد: انا وانا معك بشتاقلك شو رأيك نلتقى بالمطعم الي كنا نلتقي فيه دايما

ريم: طيب اعطيني ساعة لاقدر اطلع من البيت

راشد: تمام ناطرك

رحت عالمطعم ونطرت ريم لتيجي كان بدي واجهها وحط على عينها

راشد: اوووووووه ( مع تصفير ) شو هالشياكة

ريم: مو جاية شوفك لازم كون بكامل اناقتي

مسكت ريم من ايدها بقوة

ريم: شو صرلك عم توجعني كتير
بعدين شوف العالم كيف عم تطلع علينا

راشد: مين سيلا

ريم: ما عم بفهم عليك

راشد: وحدة عم تبعتلي مسجات ليل مع نهار بتعرف عني كل شي
ايامي بالجامعة ،،، حياتي هلا ،،،، علاقتي فيكي
كل شي

ريم: العما مين هي

راشد: يعني مو انتي

ريم: بحلفلك الف يمين مو انا وحياة رحمة امي وابي مو انا

كانت ريم عم تبكي بقهر وغزارة دموعها خلوني اصدقها

ريم: ليش لاعمل هيك عمايل معك وعيشك وعيش حالي بخوف تخاف تقرب مني وانا بعشق تراب رجلك فهمني

راشد: خلص انسي ساعة شيطان محتار كتير وراسي رح يطق من التفكير من هي سيلا وشلون بتعرف عني كل شي وحتى تفاصيل حياتي بالجامعة

ريم: معناتو هي وحدة معجبة كانت تحبك بايام الجامعة ومتبعتلك وجاي تتهمني الي لانه انا مداس للكل ما فيك تشك الا فيني اما تشك بنور لا لانه نور منزلة
دخلك شو بتعرف انت عن نور بتعرف عن فوتاتها وطلعاتها وحياتها قبلك روح شوف مين انتو وبعدها تعال اتهمني

راشد: شو قصدك وين فوتاتها وطلعاتها لنور

ريم : شو غرت

راشد: عم اسأل جاوبي

تن تن تن

مسج سيلا( لا تتخانقو بالمطعم هيك عيب العالم عم تطلع عليكم ،،، بالمناسبة سواق اهلها لمرتك ابو محي كان بالمطعم من شوي مكان ما انتو قاعدين ما بعرف يمكن شافكم ويمكن لا ….. سيلا )

ريم: مين

راشد: سيلا

الجزء التالت

ريم

ريم: شويعني هيك

راسد: يعني في حدا عم يراقب فينا

ريم: بالزبط يعني في حدا شايفنا

وقفت وصرت اطلع حولي وبكل الاتجاهات

مسج سيلا( ييييي كيف عم بتدورووتطلعو شمال ويمين متت ضحك على منظرك لك مو هيك الواحد بتفقد المكان
يا امي شو ضحكت انه رح فرجيكم حالي وقلكم شوفوني انا هون عم راقبكم ايه وقلها للجدبة الي معك تقعد فضحتنا وهي عم تدور)

حط راشد ايديه على وجهه وصار يضحك

ريم: شو في

مديلي ايده
راشد: خدي اقرأي

ريم: بالله هلا انا جدبة اخ لو طولها بس لاكلها بسناني

راشد: هلا هاد الي هامك انتي التانية لاقيلنا حل مع هالمصيبة الي وقعنا فيها اذا ابو محي بكون شافنا سوا

ريم: من وين طلعلي ابو محي هاد هلا طيب اسمع شو نور عيد ميلادها كمان كم يوم شو رأيك قله انه كنا عم نحضر لعيد ميلاد نور وبقترح عليك شوتجيبلها هدية كوني قريبة كتيرمن نور وبعرفها وبعرف شخصيتها

راشد: يا امي عليكي شو قوية دايما بتعرفي تطالعي حالك من المشاكل متل الشعرة من العجيبنة

ريم: كان حضرتك لقيت حل قبل مني

راشد: عم امزح شوصرلك

ريم : مو ملاحظ عحالك قديه انت متغير معي

راشد: يا ستي حقك علي بس هي سيلا شغلت مخي عالاخر

ريم: كل بعقلي حلاوة

راشد: اليوم المسا قبل ما نورترجع من شغلها بشوفك بالبيت ضروري

ريم: بأمر الحلوين انا

رجعت لعند الخانوم الكبيرة خبرتها اني رح ارجع عالبيت عند نور

ام نور: بنتي لسا اليوم جيتي من بيت نور

ريم: مزبوط مدام بس بصراحة بدي قلك سر بس امانة ها بيظل بيني وبينك

ام نور : شغلتي بالي احكي لشوف

ريم: كمان يومين بكون عيد ميلادها لنور ولازم حضر البيت للحفلة لازم جهز كل شي ليكون من احسنه

ام نور: ما بتعرفيها يعني لنور ما بتحب هي الحفلات والمناسبات ابدا

ريم: الاستاذ راشد هو الي طلب مني حضر لحفلة عيد ميلادها

ام نور : والله هالراشد ما في منه ابدا

ريم: الله يخليهم لبعض
(بعقلي) الله لا يخليني اذا بخليهم يتهنو

ضبضت البيت عالسريع ونزلت لخلي ابو محي يوصلني

ريم: شو ابو محي شايف في بتمك حكي

ابو محي: لا حكي شو شوبده بكون في يعني

ريم: فاهمتلك انا احكي لشوف احكي او قلك انا بختصر عليك الموضوع انت شفتني اليوم مع الاستاذ راشد بالمطعم صح

ابو محي : مزبوط

ريم: ايه احنا التقينا لانه عيد ميلاد الست نور كمان كم يوم والاستاذ راشد عامل مفاجئة لالها وبتعرف يعني بحكم اني اقرب وحدة على نور عم حاول ساعده بخصوص الحفلة والتجهيزات والهدية

ابو محي: والله اصيلة يا ريم بس على حد علمي الست نورما بتحب قصص اعياد الميلاد وهالقصص

ريم: شو عكيفها زوجها حابب يحتفل فيها

ابو محي: الله يهدي البال

وصلت عبيت نور قبل موعد ترويحة راشد بساعتين تقريبا لاني كنت بعرف ومتاكدة راشد شو بده ما بده يلتقى فيي كرمال سواد عيوني بده يشوفني ليعرف اكتر عن الفتيشة الي رمتيله اياها بالمطعم

اول ما وصلت البيت كتبت كم رسالة وغيرت بخطي شوي وجعلكتهم شوي مع كم وردة مجففة كنت دايما احتفظ فيهم وحطيتهم بقلب مغلف صغير ورميتهم فوق الخزانة بغرفة نور

ورجعت على غرفتي لبست وتغندرت وتعطرت

ريم: ها ليكو وصل
ركضت لعنده حاوطته بايدي التنتين

ريم: عاش مين شافك

راشد: والله مشتاقلك بس الشغل والعجقة والضغط بتعرفي انتي

ريم : طبعا طبعا انا الي بعرف تعا خلينا نقعدنشربلنا فنجان قهوة عرواق

راشد : يلا

ايه ريم شو كنت بدي قلك انتي اليوم قلتيلي جملة لهلا ما فهمتهتا

ريم: اي جملة

راشد: قولتيلي روح تبع لطلعات مرتك وفوتاتها وحياتها من قبلك

عملت حالي متلبكة وعم اشرب القهوة بسرعة

ريم: انسى كلام بينحكى بساعة عصبية

راشد: انا بعرفك منيح انتي ما بتحكي كلام بالهوا
قولي

ريم: قلتلك خلص راشد

دفش راشد صينية القهوة برجله وقرب لعندي ومسكني من رقبتي ولرفعني لفوق

راشد : لا تطلعيني عن طوري عم قلك احكي

ريم: بحك بح

حسيت نفسي كله راح وما عاد قادرة اتنفس ابدا اشرتله بايدي ليبعد ايديه عني

راشد: معك دقيقة اذا ما بتحكي كل شي عندك رح ارجع علقك من شعرك

ريم: بحكي بحكي
نور قبل ما تتزوج انت واياها بشي سنة كانت تعرف شب اسمه وسيم
كانو يحبو بعض كتير بس وسيم كانت حالته المادية قليلة نور كانت تحبه بس وقت الجد والخطبة زتته وما عاد بدها اياها و و و و

راشد: كملي و شو

ريم: كانت دايما تطلع معه وتروح وتيجي معه

راشد: بتعرفي اذا كنتي عم تكذبي شو رح اعمل فيكي

ريم: بعرف والله بعرف واذا مو مصدقني دور منيح بالبيت اكيد بتلاقيه هون

راشد: شو هو الي بدي لاقيه هون

ريم: مغلف كانت نور تحتفظ فيه لكل شي بينها وبين وسيم انا شفتها اما جهزت جهازها اخدت هاد المغلف معها

رماني راشد وراح يركض لغرفتهم النور نكتها نكت ما ترك شي بمطرحه كل الخزانة صارت بالارض حتى اجا بباله يدور من فوقها مسك المغلف بايديه وصار يقرأ

(( نور ،،، من انارت حياتي اعترف اني ضعيف جدا اماما الجميلات فأنا حين اكون معك لا اشعر باني رجل
اقصد لا اشعر باني قوي امام جمالك لا اشعر باني قادر امام نظراتك اشعر فقط برجولتي وقوتي عندما اشعر برغبة لحمايتك ))

(( اشتاق لرؤياتك والهمس باذنك احبك ))

كنت قاعدة بالمطبخ وسامعة كل شي بالبيت عم يتكسر كل شي عم ينهار وراشد دخل بحالة هستيرية عصبية وصراخ وجنان لحتى روحت نور

نور: شو في ليش هيك الصوت واصل لبرا شو ماله راشد شو في

ريم: ما بعرف والله يا نور انا متلك جيت لقيته جانن هيك

طلعت نور لعنده واول ما شافها مسكها من شعرها وصار يضرب فيها حاولت فكها من ايده ما قدرت اول مرة بشوفه هيك متل ثور وهايج

نور: انا شو عملت فهمني شوعملتلك ليش هيك عم تعمل فيني

راشد: انتي وحدة كلبة بعدك محتفظة برسائله وذكرياته لهلا ليش لانه لسا بعنيلك

نور: مين هو والله ما عم افهم عليك

بقيت نور تاكل قتل لمدة ساعة وانا اكل قتل معها وانا حاول دافع عنها لحتى مسكني من شعري ورماني برا الغرفة وسكر الباب على نور وراح

كانت نور مكسورة كتير قدامي ،،، حزنت عليها وعلى الي عملته فيها بس انا كنت مستعدة احرق الاخضر واليابس ولا اتخلى عن راشد

رتبت البيت من بعد هالتكسير الي صار وعملت صحن شوربة لنور لحتى رجع راشد

ريم: راشد افتحلي الباب عملت الشوربة هي لنور

قعد مقابيلي وضحك وصار يصفق بايديه

راشد: ههههههههههههه برافو قلتيلي لنور ما بتستاهل

ريم: ما بدا كل هالقد يعني هي علاقة قديمة بحياتها وانتهت ونور الله اعلم بحالتها هلا وبعدها على لحم بطنها اطلع افتحلي الباب

وصله مسج بهالوقت
( ريم عم تلعب فيك …سيلا)

ريم: شو في مين

اطلع علي بنظرات حادة فرك ايديه ببعضهم ومسح وجهه وقام

راشد: ما حدا هاد رفيقي بالشغل ،،، يلا مش كان بدك تودي اكل لنور تعي معي

اول ما انفتح الباب كانت نور مرتبة الغرفة من بقايا التكسير ومنكمشة على حالها بالزواية وقدامها الرسائل والورق الي شافهم راشد

ريم: نور انتي منيحة ردي علي جاوبيني انتي منيحة

دفنت راسها بصدري وصارت تبكي

راشد: ريم اتركينا لوحدنا

ريم : بس

راشد: لا تخافي ما رح أأذيها لنور ابدا

ريم: متل ما بدك استاذ

طلعت من عندهم من الغرفة وحطيت داني جنب الباب لاسمع شوعم يحكو

راشد: انا اسف

نور: شو هدول الوراق

راشد: ما بعرف لقيتهم بالغرفة هون انتي الي لازم تقوليلي شوهدول الاوراق

نور: انت من اي عصر عايش بتضربني كل هالضرب بس لانك قرأت شغلات ما بعرف من وين اجو لغرفتي
انا ما عاد بدي اياك بدي اطلق

راشد: نور اسمعيني انا ما بقدر عيش بلاكي انا ندمان عكل شي والله بغار عليكي من الهوا جن عقلي لما شفتك محتفظة بهيك رسائل عندك

نور: لازم تيجي تسألني مو تيجي وتهيني

راشد: شو عم تعملي عم بتضبي اغراضك بالشنتة عاساس رح اتركك تروحي من هون انا روحي معلقة فيك

نور : راشد ابعد من وجهي

انفتح الباب فجأة وانا تلبكت ما عرفت شو اعمل

نور: يلاريم رح نمشي بدنا نروح عبيت اهلي

راشد: اعطيني بس فرصة اخيرة
نور بترجاكي انا

اكتر شي صدمني زعل راشد على نور كنت مفكرته بحبني الي طلعت انا بس مجرد تسلاية ومو معيرني ولا اي اهمية كان عم يترجاها متل ولد صغير عم يبكي عليها وهو زعلان ونور ماشية مو سائلة عنه
فجأة تركت الشنتة من ايدها

نور: برجع بس بشرط ما بدي شوف وجهك بالبيت هون

راشد: ما بقدر يمر يوم وما شوفك

نور: عالاقل هالفترة لاقدر مرق الي عملته معي

راشد: ماشي متل ما بدك

قبل ما يطلع راشد من البيت قرب لعند نور وباسها من جبينها

راشد: لا تطولي علي ناطرك انا

هزت راسها والدموع معبية عيونها

طلع من البيت راشد وبقيت انا ونور لوحدنا كانت بردانة كتير وتعبانة كتير وطولت لغفيت وبس غمضت عيونها تركتها وطلعت وقفت عالبلكونة

ريم: يا ربي معقول شكو فيني اني ورا هالقصة انا لازم اعمل شي غيبهم عن هالموضوع لازم

————————

مسج سيلا( هي اول ليلة برتاح فيها لانك بعيد عن التنتين عن نور وريم )

مسك راشد تلفونه ودق على رفيق لاله بالبحث الجنائي

راشد: قيس كيفك

قيس : اهلا راشد زمان عنك

راشد: بدي منك خدمة اذا ما بغلبك

قيس: لا ولو احنا بالخدمة

راشد: بدي اعطيك هالرقم لوحدة بس ما بعرفها بدي تشوفلي مين صاحب هالرقم

قيس: شو يا باشا معجبات وانت متزوج

راشد: والله ما بعرف هي ملزقة الله وكيلك

قيس: طيب نقلني الرقم

اعطى راشد الرقم لقيس وعمل حظر لسيلا من تلفونه

وراح قعد على مكان بعيد عن الناس عقمة جبل يتذكر كل شي مرق فيه
اول مرة شاف ريم وعجبته
لما عرف نور وعرف طيبتها وحبها

لما تورط بعلاقتين بعاد عن بعض

رن تلفونه كانت ريم ،،، فصل عليها اكتر من مرة
وقام ركب بسيارته ليروح ينام بشي فندق بس رجليه اخدوه عاول ملهى ليلي شافه بوجهه وقضى الليلة هناك

تاني نهار ولسا الدنيا هدوء كتير والجو بارد شوي
بتوصل جريدة على باب البيت عند نور وبيندق الباب
فتحت ريم الباب ما لقيت حدا قبالها

ريم: مين هون
انتبهت عالارض شافت جريدة كانت رح تمشي وتتركها بس لفت نظرها صورة راشد عالجريدة

((الدكتورالكبير راشد يقضي ليلته باحدى الملاهي الليلة
اذا كان الطبيب والقذوة كذلك لا اسف على اولاد الشوارع )))

وصور كتير لراشد وهو بالملهى

نور: شو هي الي بايدك ريم

ريم: آه هي جريدة

نور: وليه هيك واقفة قدامك فيها شي الجريدة

ريم: بصراحة في خدي شوفي

قرأت نور الخبر ونزلت كل دمعة من عينها لتحرقها اكتر

————-
راشد: نور اسمعيني والله بحلفلك اني ما رحت هناك الا لانسى الي عملته فيكي امبارح وبحلف الف يمين كمان اني ما عملت شي غير سهرت هي الصور اكيد مفركة في حدا عم يحاول يهدمني

نور:……..
راشد: طيب احكي ولو كلمة

نور: خلص راشد مو قادرة اسمع منك هلا اي شي

راشد : انا رح حاسب هالجريدة بطريقتي بوعدك

سكر راشد مع نور وطالع رقم الجريدة الي نشرت الخبر ودق عليها

راشد: انتو كيف بتدخلو بحياتي الشخصية هيك وبتنشرو متل هيك خبر

الجريدة: استاذ راشد الخبر وصلنا واحنا كجريدة علينا ننشر كل الاخبار

راشد : بوعدك حاسبكم بالمحاكم وبهدلكم وسكرلكم الجريدة كمان
ممكن اعرف اي صحفي غبي هو الي جاب الصور والاخبار

الجريدة: موصحفي من عنا الصور وصلتنا عالفجر بمغلف من وحدة اسمها
سيلااااا

…… يتبع الجزء الاخير بكرة

طولت عليكم بس هي قدرتي بنات ما بقدر انزل اكترمن جزء باليوم اعذورني
بكرة اخر جزء ان شاء الله