قصة الليلة بعنوان عريس الغفلة

قصة الليلة بعنوان عريس الغفلة
تأتيكم هذه القصة من قسم المنوعات في زاكي

انا مروة من لما كنت بالمدرسة وانا احلم اصير عروس اصلا كل لعبي وانا صغيرة بنات لابسات بدلات كبرت وكبر هالحلم معي وكنت حاطة مواصفات قاسية لفارس احلامي وكنت احكي بدي اتزوج واحد بشبه رشدي اباظة لكن بعد ما صارو يجو العرسان ويطفشو صرت انقص صفة من الصفات لعل وعسى يجي هالعريس المنتظر وقلت مش مشكلة بتزوج واحد بشبه اي حدا نفسي ياجماعة اتجوز. ..نفسي البس الفستان الأبيض وتغنيلي ماجدة الرومي طلي بالأبيض طلي …اي ياجماعة بتعرفو والله راضية بلاش الأبيض. ..فوشي. .أزرق. . ان شاء الله بنفتحي المهم أطل والسلام …حتحكولي انجنيت. ..قربت تخافوش. .بس الخطية برقبتكو لو انجنيت اعرفو انه السبب سيدي وستي …بدكو تعرفو ليش تعالو ..مهو لازم احكي لحد …لازم فيه شهود والا بفقع ..تعالو ..
كل عريس كان يجي وما يرجع كنت احبه واحس بتلخبط بمشاعري وااهتزازقلبي وارتجاف بمعدتي واحتفظ بأي شي اله
محرمة تركها عنا او سيجارة شغالة نصها هيك اظل عايشة عذكرى العريس لحتى يجي الي بعده
كتير من العرسان فاتو بيتنا وما طلبوني وكتير منهم ما دخلوه اصلا وشو السبب ستي وسيدي بدهم يعملوني مخلل عندهم ما بدهم يزوجوني بس انا واياهم والزمن طويل بدي اتزوج يعني بدي اتزوج انا مش ححكي لحتى تعيشو معي كل يوم ..مع كل عريس يتقدملي …وتعرفو كيف بطفشوه. …لاني بحكو الناس بتكبر وبتعقل. .بس سيدي وستي ابدا …حالفين ما يعقلو

#عريس_الغفلة_بقلم_حنين_طه
الحلقة الاولى ( اول عريس)

رشرش حبك يا جميل

مروة ( اطفي هالمسجل خالتي الله يسعدك )
سناء ( ليش ان شاء الله بدي اطفيها والله حلوة اسمعي اسمعي )
مروة ( رح اطق والله رح اطق )
سناء( يا ساتر يا ساتر ليش ليش)
مروة ( طبعا انتي متزوجة ولا عبالك مو متلي انا مشتهية عريس او نص عريس ولا احكيلك شقفة عريس)
سناء( يييييي علينا مالك هيك مستجوزة ولك الي بشوفك بفكر الزواج ايش محرز هينا متزوجين شو طايلين غير تنظيف وتلييف يا حسرة )
مروة ( حتى لو بدي اتزوج صار عمري 25 سنة اي بكفي
وصار جاييني اكتر من الف عريس وكل واحد جدي بحط فيه الف علة حتى استقبال ما برضى يستقبلهم
اي شو هالقصة هاي )
سناء( طيب انا هلأ بحكي مع ستك بلكي قبلت
ابن اخوها لسلفتي بدور على عروس وحسب حكي حماتي محترم وابن حلال وبشتغل استاذ بالوكالة يعني بقبض ايشي وشويات )
مروة ( اه ومتى بدك تحكي مع ستي الله يخليكي استعجلي ترا هالنتفة عقل الي بقيانين براسي قربو يطقو )
سناء ( طيب طيب هيني رايحة احكي لستك وانتي اعملينا كاسة شاي بمرمية وطلعيلنا اياها عالبلكونة سلام )

في البلكونة
سناء( ها هي خالتي ام مصطفى هون كيفك يا خالتي )
ام مصطفى ( اهلا يا بنتي يا سناء كيفك وكيفها حماتك )
سناء( الحمد لله بتسلم عليكي
شو يما شو بتعملي)
ام جاسر( شوفة عينك بنشف نعنع وبسقي قواوير الزريعة)
سناء( اه الله يعطيكي العافية )
ام جاسر ( خير سناء مش عاجبني وضعك في بتمك حكي احكيه وخلصيني لاشوف )
سناء( بهمس ( دخلت عليكم بالف الف لا اله الا الله يعدمني اياكي يا مروة والله هلا لتنشفني بدل هالنعنعات)
ام جاسر( ولك احكي خلصيني )
سناء( طيب طيب يما انتو ليش ما بدكم تزوجوها لمروة وبعدين يعني حرام )
ام جاسر ( انتي لا تتدخلي سوسة الشر خليكي ساكتة )
سناء( ما هو ما بجوز من الله هيك كمان احكيلك كلمة يا خالتي ام مصطفى )
ام مصطفى ( والله بدكو الصراحة سناء معها حق يعني مش معقول تظل البنت طول عمرها هيك يعني يا ام جاسر انتي والحج مزودينها شوي )
ام جاسر ( افهمي علي يا ام مصطفى مروة بتكون بنت بنتي توفو امها وابوها وهي عمرها خمس سنين بحادث وانا وسيدها الي ربيناها بشوف فيها وجه بنتي الله يرحمها ازوجها قال ما في زواج ابدا )
سناء( طيب هي انا بنتك زوجتيني ليش يعني )
ام جاسر ( لاني بدي اخلص منك ومن لسانك هي كلمة ما في زواج )
سناء( بس مروة بدها وانا بصراحة قولتلها عن ابن اخوها لسلفتي نجاح الي بشتغل بالوكالة عرفتوه قلتله انه بدور على عروس وانا دليتهم عليها )
ام جاسر ( بعديلي هيك بعديلي يا ام مصطفى بدي امعطه شعرها )
سناء( ااخ اخ بوجهك انا يا خالتي ام مصطفى )
ام مصطفى ( خلص يختي شوفوه والبنت عمجلاها ما بتعرف مين بتوالها هو كل واحد شاف وحدة صار متزوجها خلص وحدو الله )
ام جاسر ( لا حول ولا قوة الا بالله طيب اليوم بحكي مع سيدها خليه يجي لكن ما تحلمي يصير نصيب )
سناء غمزت مروة من بعيد انه تمت العملية وراحت لعندها عالغرفة
سناء( ولك وين الشاي نشف ريقي بدي اشرب ايشي )
مروة ( بذمتك ستي وافقت )
سناء( اه اه وافقت وكنت رح اكل قتلة تخلخلي عظامي منها لولا وجود خالتي ام مصطفى )
مروة ( طيب خالتي يلا روحي احكي مع سلفتك شوفيها احكيلها انك لقيتي عروس لابن اخوها يلا )
سناء( ولك لا هسا بتفكرني قاتلة حالي خليني بس اروح لعندها احسن واوجه )
مروة ( لاااا شو من هلا لتروحي بكون تزوج الشب يلا يا خالتي )
سناء( ولك فتحتي براسي طاقة طيب هاتي هالتلفون
ها هيو برن )

مها ( الو اهلين سناء ولك انتي مش اليوم عند اهلك خير في ايشي)
سناء( لا ما في شي حبيت اطمن عليكي)
مها( ولك دريتي قال بشار سلفنا امبارح طالع عند ابو خالد الدكنجي يجيب ملبس عقضامة لمرته قال بتتوحم باخر الليل
شافتهم ام سالم جارتنا وخبرتني بس حكتلي ما اخبر حماتي حرام بلاش تحكي عنه طرطور)
سناء( والله ما هي قليلة مرته شفتي شفتي النسوان ما اقواهم
وك اخ اخ ليش بتقرصي فيي )
مروة ( ادخلي بالموضوع يا خالتي )
سناء( اي موضوع اه اه شو بدك احكيلك يا مها مش ابن اخوكي كان يدور على عروس من فترة انا لقيلتله وحدة شو وحدة طول وبياض وعلم وفهم وبنت ناس)
مها ( اه قصدك جلال ليش انا ما قولتلك انه لقينالو عروس من فترة بتشتغل كمان هي معلمة بالوكالة يعني قرشها على قرشه بساعدو بعض بتعرفي الايام هاي الدنيا غالية )
سناء( اه والله يلا مبروك )
مها ( مين العروس الي لقيتها )
سناء( وحدة ما بتعرفيها سلام سلام )

مروة ( خطب صح خطب انا هيك دايما حظي فش حظ )
سناء( يييييي خالتي روقي صدقي الا يجيكي واحد احسن منه كمان قومي البسي خلينا ننزل عالسوق نوكل بوظة ولا احكيلك بدنا نروح نوكل كنافة من عند حبيبة يلا امشي )
مروة ( خلص خالتي الله يخليكي ما بدي ما الي نفس )
سناء( مو عكيفك خلص عاد لسا قاعدة بتبكي وتنهقي قومي خلصيني)

لبست انا وخالتي ونزلنا عالسوق اشترينا كم شغلة ورحنا على حبيبة نوكل كنافة
سناء ( خلص افرديها خالتي نصيبك رح توخديه )
مروة ( ما بدي خالتي ما بدي )
سناء( الله يجيبك يا طولة البال بدك ناعمة ولا خشنة )
مروة ( ناعمة ناعمة بس خليه يكتر عليها فستق وقطر )

سناء( وليه مروة على مين عم تطلعي اه وليه )
مروة ( اي اي خالتي ليش هيك دعستي على اجري شو دخلني انا هو الي اكلني بعيونه مو انا )
سناء( وانتي ما صدقتي سحتي
العما العما ما اوقحه كيف بتطلع استني والله لامسح فيه الارض )

سناء( شو يا ما عندك زوق ليش هيك بتطلع ببنات العالم )
ايمن( عفوا خالتي انا بعتذر بس والله نيتي سليمة )
سناء( الي نيته سليمة بيجي للناس من الباب
شو بتشتغل انت)
ايمن ( انا بشتغل محاسب بالبنك وبتشرف اجي واطلب ايد بنتك منك )
سناء( هاي مو بنتي هاي بنت اختي سجل عندك رقم التلفون خلي امك تحكي مع ستها يلا سلام )

سناء( امشي امشي معي والله لاقصفها رقبتك )
مروة ( شو عملت انا )
سناء( يييييي لسا بتسبله بعيونها )

سناء( امي وينك احنا اجينا )
ابو جاسر ( امك جوا بتخيط بوجوه المخدات )
سناء( هي امي ما بتعرف ترتاح )
ابو جاسر( حكتلي امك عن ابن اخوها لسلفتك )
سناء) هو بصراحة انا غيرت رأيي عن ابن اخو سلفتي بخيل وراتبه عقده واحنا بدنا حدا يسعدها لمروة صح مروة
ظلك هزي براسك انتي
بس بصراحة يابا في واحد تاني هسا شافها لمروة وطلبها مني وانا اعطيته رقم تلفونكم صح مروة
بعدك بتهزي براسك )
مروة ( كأنه ستي بتكح فيها ايشي مريضة )
سناء( اطمني فش ايشي اكيد سمعت بالعريس غصت الله يستر ما تزتني من البلكونة الليلة

تاني نهار رنت امه لايمن على ستي واخدت منها موعد وستي ما قدرت تلغي لانه انا بعرف بالموضوع

مروة ( خالتي مو انتي خالتي بمثابة امي )
سناء( شو بدك بدون هالمقدمة )
مروة ( تعالي اعملي معي رز بحليب والله خايفة يفرط معي )
سناء( تعدلتي هلا ست الحسن
قومي قومي اشوف حتى كمان تلحقي تلبسي وتحطي عوجهك شوية احمر واصفر )
قمت انا وخالتي عالمطبخ عملنا رز بحليب ورحنا عالغرفة اغير والبس لجية ايمن واهله

ام جاسر ( هيهم فاتو عالغرفة تعال يا ابو جاسر يلا )
ابو جاسر ( خدي هي الصبرة المرة حطيها بصحون الشب واهله )
ام جاسر ( وانا كيف بدي اميزهم لما يجي الشب)
ابو جاسر ( بسيطة حطي تبعون الجماعة بزبادي جديدة حتى نميزهم )

في غرفة مروة
مروة ( خالتي شو البس بنطلون ولا بلوزة طيب الاخضر ولا الازرق )
سناء( صرعتيني مروة البسي هاد الفستان الازرق على هاي الشالة البيضة )
مروة ( خالتي بدك تلبسيني شالة بيضة متل الي رايحة عالمدرسة )
سناء( جننتيني مروة خلص البسي الي بدي اياه ها هي صوت الجرس برن انا رايحة استقبلهم مع اهلي )
مروة ( طيب طيب )

راحت خالتي تستقبل الجماعة وانا بقيت البس غابت شوي ورجعت
سناء( ولك شو هاد الي ملخبطتيه على وجهك هسا بحكو البنت مستزوجة قتلك حطي بس مش حمرة حمرا يعدمني اياكي
اطلعي اطلعي الشب هو واهله يسعده على هالشبوبية
بتقدمي الرز بحليب وبتقعدي شوي
صحيح قبل ما انسى الصحون الجديدة للناس مش تخربطي بعرفك ملخومة )
طلعت قدمت الرز بحليب وقعدت بجنب خالتي سناء وانا خجلانة

ام ايمن ( ما شاء الله تبارك الرحمن الله يحرسك من العين )
مسكو الصحون وصارو ياكلو وكلهم تشردقو مع بعض
سناء( خير خير يا جماعة تفضلو تفضلو مي )

مروة ( خالتي مالهم هيك شادين عحالهم )
سناء( والله ما بعرف متل الي كأنه بدهم يحكو شي ومو قادرين ( كملو كملو يا جماعة الرز بحليب هاد مروة عملتو مخصوص الكم )
وهم كل ما ياكلو لقمة يصير وجههم احمر اكتر
سناء( العما ولك مالهم هدول ليكون عندهم تحسس من الحلو )
مروة ( خالتي ليكونو بدهم حمام )
سناء( بتحبو تروحو عالحمام )
كلهم هزو راسهم انه لا
سناء( طيب كلو كلو )
كمان هزو راسهم انه لا
حطو الصحون من ايديهم وصارو يجحرو فيي
مروة ( طيب خليني اعمل قهوة )
لاااااااااااااا قهوتكم مشروبة يلا السلام عليكم )

مروة( خالتي خالتي هدول روحو وما طلبوني ولا حكو ايشي )
سناء( والله يا خالتي ما بعرف شو بدي احكييلك تعي تعي لحضني)
وسيدي وستي عم يضحكو كأنو حدا عم يزغزج فيهم وانا صابني ارتجاج بقلبي وتحطم براسي
ورحت اغير ملابسي وانا اندب حظي
وهي قصتي مع اول عريس