تكملة حكايا زاهي مع الكاتبة حنين طه

تكملة حكايا زاهي مع الكاتبة حنين طه
هذه القصة تأتيكم من قسم المنوعات في زاكي

#حكايا_زاهي
الحلقة الخامسة

وهاي هيك صارت الاغراض جاهزة
امي بتحضر فطور لانه تاني يوم في عند جيرانا ابو فوزي صبة من الصبح ما شاء الله ربنا معطيهم ومنعم عليهم
واحلى ايشي لما يكون في صبة بنا عند حدا
كل الجيران والجارات بلتمو عنده وبيوخدو فطورهم معهم
والله واجت الايام وراحت الايام وخلصو دار ابو فوزي بنا
واجا استاجر عندهم ناس بيحكولهم دار ابو مصطفى رحنا انا وامي وصفاء نبارلكهم بالسكنة الجديدة واخدنا معنا كيلو ونص كنافة من عند حبيبة
وقعدنا اكتر من نص ساعة ما قدمو ايشي لساني وريقي حطب وانا استنى وقضيت الوقت وانا اعز بامي اي عليم الله صارت معها الزايدة على قد ما غزيتها
ام مصطفى ( خير خالتو حبيبي بدك ايشي بتغز امك )
زاهي( خالتو طعمينا من الكنافة الي جبناها بس عشان اشوفها زاكية او لا )
ومن وقتها ام مصطفى ما بطيقني بس
عندهم بنت صبية بتجنن كنت مفكر اتزوجها هو انا للامانة ما في بنت شفتها بحياتي وما فكرت اتزوجها بس المشكلة اني كل يوم الصبح وانا رايح عالمدرسة بشوفها واقفة مع واحد
حاولت اكذب عيني كوني بشوف نص نص بس يا اخي والله واقفة مع واحد يا الله شو حقدت عليها يومها وتمنيت لو اروح واحكي لابوها بس انا خلص حالف يمين ما اتدخل بحدا

صفاء( ها زاهي افندي روحت من المدرسة تعال شوف شو اجاك هدية
هاي المسطرة الي فيها مي الي نفسك فيها من زمان )
زاهي( ياي شكرا الك يا صفاء يا مرت اخوي يا حنونة يا طيبة يا)
صفاء( ولك مش انا الي جبتلك اياها هاي سارة بنت جيرانا جابتلك اياها )
زاهي( خديها واحكي لسارة الفارة اني ما بدي ايشي منها )
صفاء( من متى عندك عزة نفس )
زاهي( عندك للسر مطرح )
صفاء( ولك انا اصلا بير ما الي قرار )
زاهي( كل يوم كل يوم بشوف سارة الفارة مع واحد واقفة الصبح بدك الصراحة كرهتها ما عاد الي نفس اشوفها ولا احكي معها ول عليها انا بس اكبر واتزوج ما بدي اخلف بنات بدي اجيب كلهم ولاد
عشان البنات بوطو الراس )
صفاء( عيرني بسكوتك ابو بنطلون )
ويعدمني اياها صفاء ام بقة طلع بيرها مخزوق لو اني ناشر الخبر بالجريدة ما انتشر متل هيك كنت احكي عن حالي ابو لسان طلعت صفاء ام بقة وام لسان كمان
وبلش الخبر ينتشر لحتى وصل لابوها لسارة واجانا مش شايف الفضا
انا بسرعة عملت حالي ميت
وصفاء تتبهدل وتهز براسها وامي تهز فيي ولك قوم فتح عيونك
زاهي( اتركيني انا ميت لا تحكي معي )
امي( الزلمة بحكي معك قوم قبل ما توكل قتلة منه )
زاهي( يعني كيف بدي اقوم وانا ميت عمرك شفتي ميت بقوم )
جعفر ( هسا بدي افرجيك كيف الواحد بموت عن جد )
اي يومها اكلت قتلة لهسا كل ما اتذكرها بدني بحكني
ما هي يعدمني اياها سارة الفارة طلع هالشب اخوها بس متخانق مع ابوها ومانعه يجي عالبيت وكل يوم بشوف سارة لحتى يطمن على امه واخواته
اي انا شو بعرفني انه اخوها بس جد الواحد مش لازم يحكم عالايشي بدون ما يدخل فيه ومن يومها تمنيت بس اتزوج اظل اخلف بنات 😂
المهم الله يسهل عليكي يا سارة اخر مرة شفتها يوم حفلة نجاحي بالتوجيهي
ولا بنساه هداك اليوم لما طلعت نتيجتي وجبت معدلي 55،2 وعملتلي امي حفلة غير شكل كاني عريس
يومها سارة اجت وجابتلي معها قميص اخضر وام مروان حطت بايدي خمس ليرات
اما خالتي ام محمود جابتلي طقم فناجين اجاها هدية قبل اربع سنين من بنت اخته لعمي ابو محمود
وامي ضبته تحت التخت قال لما تتزوج بتلاقيه
وبلشت اطارد من جامعة لجامعة حتى ادخل اي تخصص ما هو عقولة ام بقة معدلك يا دوبه يدخلك السجن
ومن واسطة لواسطة دخلت كلية تخصص علوم ارض
وكل يوم انام واصحى وانا استنى يوم الدوام يا اخي بيحكو الكلية فيها اشكال الوان وانا بدي اتزوج اي انا مو مصدق متى اتزوج ومرتي تلبس من هداك الفستان
انا هاد طموحي من الطفولة وكل ما اكبر بكبر معي هالطموح
وبعد طول انتظار بكرة اول يوم دوام عندي الله يسترها معي

…..يتبع في الحلقة القادمة
#حنين_طه

#حكايا_زاهي
الحلقةالسادسة

يا عيني عالكلية والي جوا الكلية ايشي بفتح نفسك عالاخر
الله وكيلكم كل ما اشوف بنت احاول ازبطها يعني بلكي شبكت السنارة وتزوجنا بس كل بنات الكلية على دوري طلعو مرتبطات لحتى بالاخير التميت عبنت اسمها نوال 
يعني هي البنت مش متل ما كنت اتمنى بس ماشي حالها
تعرفنا على بعض وخبرت امي عنها وحكتلي امي وعد مني انجح السنة ورح ازوجك اياها
يعني امي لو طلبت مني احرر فلسطين اهون علي من اني انجح بالكلية بس سبحان الله كل تاخيرة وفيها خيرة لما حكيت لنوال عن حالي وعن حياتي انطمزت وحكتلي انا عند امك ما بسكن ولك مالك يا بنت الحلال الله يهديكي
هو الي عنده ام بيرميها بالشارع بس تنحت وركبت راسها
وكل يوم احاول معها بس خلص صحباتها وقرايبها بلعبو براسها وانا بصراحة عندي امي بالدنيا
هاد لسا لا فتينا ولا غمسنا وصارت ما بدها امي كيف لو تبهدلها امي بهدلة من الي بتعطيهم لام بقة
بس خلص ظلت بقلبي غصة وبدي انتقم منها لهاي نوال
استنيتها مرة وهي مروحة وبتتشعبط عالباصات عشان تركب متل الشعشبونة
ومسكت بكندرتها وسحلتها من اجرها بدون ما تحس ولا طبعا ما هي مستعجلة بدها تركب
حطيت بالكندرة دبوسين ورميتها عالارض وهي صارت تدور وتلطش لحتى لقيت كندرتها
ما لبست من هون وصارت تصرخ من هون
بدكو الصراحة فرفح قلبي عغزة الدبوس بس للامانة ما انشفى غليلي منها
لتاني يوم شفتها بالكلية لابسة عباية وبتعرج اجيت من وراها ودعست عطرف عبايتها وظلت قالبة بوجهها بنص صحن بطاطا كان بايد شب عم يوكل فيه
نوال ( الله يلعنك يا زاهي يا ابو بنطلون )
اما شو ضحكو عليها ضحك يومها الكلية وانا قربت لعندها وصرت اعتذر وكانه ما الي دخل
بس الله يعدمني اياها تاني يوم جابتلي تنين طعموني قتلة فتلو عيوني فيها لورا
ما هو انا مش اسكت لنوال شوال وخلص لا لازم اكل قتلة حتى اسكت
ما اترك البنت بحالها بدون انتقام لا لما انضرب بيرتاح بالي
روحت لامي ماسك بنطلوني بايدي ونظاراتي بالايد التانية
كانت امي قاعدة بتنقي عدس هي وجاراتها
ام زاهي( ولك انت مش ناوي تعقل فضحتنا عمايلك متل عمايل النسوان )
ام مروان ( اي خلص اتركيه هو شب وبيعرف مصلحته )
ام محمود( المهم كمليلنا يا ام جعفر كيف سلقتي الجبنات )
ام زاهي( حطيت هالجبنة بالطنجرة وبعتت زاهي جبلي وقية محلب ووقية مستكة وحطيتهم عالجبنات شو صار طعمهم بجنن )
عزا متى انا جبت وقية مسكته كل الي جبتهم نتفة
لا ونازلة امي تعرط والجارات بهزو بروسهم
زاهي( انا زاهي الي جبتلك ولا زاهي تاني)
اطلعت فيي من فوق لتحت وما عجبها كلامي سكتت احسن ما اكل قتلة تانية منها تعميني فيها
استنيت لحتى الجارات روحو ورحت اراضيها يا اخي ما بهون علي زعلها
زاهي(
ام زهزهز
صبحية
صبوحة
يما )
ام زاهي( انا مش ام حدا )
زاهي( طيب ام جعفر )
ام زاهي( قلتلك انا مش ام حدا )
وعلى قد ما حاولت احكي معها ما قبلت قال ماخدة عخاطرها لاني مش عاقل بس والله زعلت من امي كم مرة كسفتني قدام ام بقة وهي تضحك )

#حكايا_زاهي
الحلقة السابعة والاخيرة

والله وما كذبت خبر
اتصلت امي بخالتي واخدت منها موعد الساعة ستة المسا
وااااخ ما اطول هداك النهار
الساعة خمسة
خمسة ودقيقة
خمسة ودقيقتين
ها واخير خمسة وربع
لحتى صارت الساعة ستة ،،،، هسا انا متعود عدار خالتي والروحة عندهم بس هالمرة رايح عريس ولازم اكون محترم
قعدنا حوالي نص ساعة وبعدين اجت عبير العروس هي للامانة منيحة بس كانها زوج خالتي ومتحجب يلا مو مهم احسن ايشي الاخلاق ،،،،، قعدت معها فترة وما نطقت بحرف وانا لساني ما فات لتمي
احكي احكي واسال فيها وهي بس بتهزلي براسها
زاهي( بتتذكري يا عبير لما مرة حكيتلك انه جيرانا دار عمي ابو مروان مش بالبيت رني الجرس واهربي وانتي صدقتيني ورحتي رنيتي الجرس وفجأة طلع ابو مروان واكلتي بهدلة غير شكل )
رجعت تهزلي براسها
زاهي( طيب بلاش هاي بتتذكري لما كنا نوقف تكاسي عاساس لامهاتنا ونهرب ويظل التكسي واقف ساعة بستنى وما حدا يجي لحتى انمسكنا مرة وعلقنا جعفر اخوي عالشجرة )
طبعا ما في جواب بعدها بتهزلي براسها
زاهي( خالتي انا بطلت اتزوج شكلها عبير ما بتحكي )
عبير( لا لا انا بحكي بس مستحية شوي )
واخيرا سمعت صوتها ولا خافت يطير العريس
امي( الحمد لله انها ساكتة بلكي انعديت منها وسكتت يا رب )
المهم اتفق جعفر مع زوج خالتي عالمهر والسكنة
وقررنا نعمل حفلة عالديق ،،، يعني الواحد يحكي الي اله والي عليه دار خالتي ما كلفوني باشي زيادة عن طاقتي
باعتلي امي زوج هالانجاصات الي كانو معها وكملنا العرس ،،،،
عبير كانت متل ما بدها امي وزيادة قصيرة لسان صحيح لما كانت تجتمع مع ام بقة تقلب وتتغير بس يعني عبير وصفاء كانو مش خبيثات وضعهم مسيطر عليه

…….
ام محمود( وينك يا ام جعفر)
كانت امي وصفاء وعبير بغسلو بوجوه الفرشات وامي حارثة مزبوط على كناينها )
ام محمود( هاتو لاساعدكم )
ام زاهي( انتي جاي تشتغلي اقعدي هاي البنات بكملوه )
ام محمود( اااخ والله وصال اختك يا صفاء ما بتمسك ايشي بالبيت كل شغل البيت علي)
صفاء( يعني الله يعينها حامل وتعبانة وكمان بدك اياها تشتغل يا خالتي)
بصراحة ردها على ام محمود ما عجبني وظليتني استني جعفر لحتى روح من شغله وحكيتله كيف ام بقة كان جوابها اطول من بنطلوني المرفوع )
يومها اتقاتل جعفر مع صفاء واكلت بهدلة بتسوى عمرها اي بتستاهل اذا الواحد ما بده يحترم الكبير ما ظل خير بالدنيا
ام زاهي( ليش يا حبيبي هيك عملت مش ناوي تقصه للسانك
روح روح جبلي كاسة مي)
كلمة يا حبيبي هاي خوفتني كتير يعني مش متعود على امي تحكيلي يا حبيبي
رحت جبت كاسة المي ورجعت لقيت امي بتتنفس اخر نفس الها بالحياة ،،،،، يما يا ام زاهي
يا غالية يا طيبة انا مش زاهي حبيبك انا الي دايما بتحكيلي ولك زاهي
انا ابو لسان وابو بنطلون مرفوع بس ردي علي يما 😔😔😔
كتير مريت بمواقف صعبة بس اصعب من هاد الموقف ما مرق علي ابدا،،،، بحياتي ما كنت اتوقع وفاة امي تكسرني هيك
بقيت اكتر من شهر ما اطلع من غرفتي وعبير وجعفر حولي ما تركوني ابدا لحتى اتجاوزت هالمرحلة وبلشت ارجع شوي لحياتي الطبيعية
الاحلى من هاد كله انه انا وجعفر ظلينا عايشين مع بعض بنفس العمارة بس اتفقنا اني ارفع فوق بيت امي غرفتين ومنافعهم واسكن فيهم وكل هاد وانا مفكر عبير وصفاء مبسوطات لحتى اجت عبير وفاتحتني بموضوع بيع البيت ونقسم الورثة انا طبعا كنت عارف انه هالكلام من ام بقة
لانه عبير هبلة ما بيخطر ببالها هيك فكرة
زاهي ( لساتراب امي ما نشفت ،،،،، هاي انتي الي امي كانت تحكي عنك الك تم يوكل ما الك تم يحكي
قسما بالله اذا بتعيدي الحكي غير احكي لامك يا عبير)
عبير( خلص سكتت اصلا انت بعد وفاة خالتي حلفت يمين ما ترجع تحكي لحدا اي موضوع )
زاهي( صحيح انا تبت بس لا ترجعي تفتحي هالموضوع انا عن اخوي ما بتتزحزح
وهسا قومي البسيلي الفستان الاخضر )
طبعا انا خليتها تشتري كل الالوان من هالفستان
ما انا تبت عن كل شي بعد وفاة امي الا عن هالفستان
والله يرحم ترابك يا ام زاهي

#انتهت
#حنين_طه