صبحت اليوم اغلي جبنة للخزين تعالو شوفوا شو عملت

صبحت اليوم اغلي جبنة للخزين تعالو شوفوا شو عملت
معكم صديقة زاكي الشيف الموهوبة ‎Mariam Ramadan‎ 

صبحت اليوم اغلي جبنة للخزين
الاسبوع الماضي غليت كمية واليوم غليت الكمية التانية ،ورح اكتبلكم طريقة غلي الجبنة البيضة جبنة الغنم فقط لانه جبنة البقر لا تصلح للتخزين ابدا
الطريقة
لما تشتري جبنة بيضة جبنة غنم بتحطيها بمصافي وبترشيها ملح وبتتركيها 4 ايام وكل يوم بتقلبي الاقراص وبترشي شوية ملح لحتى تنزل كل المي اللي بالجبنة
هلا نيجي لمرحلة الغلي
بتجيبي طنجرة كبيرة بتحطي فيها مي من الحنفية اياكي تحطي مي مفلترة لانها ما فيها معادن ابدا
وبتضيفي الملح الخشن اللي هو الملح الصخري عشان ما فيه مواد كيماويه مثل الملح الابيض المكرر اللي بالاسواق
وبتجيبي كمية من المحلب وكمية من المستكة وبتجيبي قطعة قماش شاش ابيض وبتقصيها 4 قطع او حسب كمية الجبنة انا غليت 6 كيلو جبنة وبتعمليهم صرر صغيرة بتربطيها منيح حتى ما تتنفل بالطنجرة وبتجيبي بيضة من الثلاجة بتغسليها وبتحطيها بطنجرة الملح حتى تطيش ع الوجه ويبان جزء صغير منها ع شكل دائرة صغيرة
بتشعلي النار تحتها وبتقطعي الجبنة كل قرص قطعتين لبينما تغلي المي .وبس تغلي بتبلشي تضيفي كمية من الجبنة وتتركيها تغلي لحتى الجبنة تطيش ع الوجه بتكون مدة الغلي انتهت ،بتشيليهم وبتحطيهم بصينية او مصفاية لحتى يبردوا وبتحطي كمية ثانية وهكذا حتى نفاذ الكمية
بتتركي الجبنة تبرد وتتركي طنجرة المي تبع الجبنة تبرد واياكي تعبي الجبنة بالمرطبانات وهي سخنة لانها رح تنتزع
اتركيهم لحتى يبردوا تماما وبامكانك ترشي الجبنة حبة البركة وهي سخنة الجبنة ما في مشكلة
وبس يبردوا بتعبيهم بمرطبانات وبتخزنيهم لحين الحاجة
والف صحة وهنا .وانا عندي مرطبان من الاسبوع الماضي صورتلكم اياه لانه جبناتي اللي عملتهم اليوم لسا سخنين
و كل موسم وانتم بخير
#جبنة ام نضال