هذه خاطرة كتبتها لإلك يا أهل زاكي اقرؤها واحكولي رأيكم
هذه خاطرة كتبتها لإلك يا أهل زاكي اقرؤها واحكولي رأيكم
هذه المقالة تأتيكم من قسم المنوعات من زاكي, تقدمها لنا الصديقة الغالية ” جلكسي والدنيا عكسي” هذه خاطرة كتبتها وحبيت أشاركم فيها وتحكولي رأيكم في التعليقات
قد ما نحكي عن الام ما بنوفيها حقها الله يحفظ أمي وامهاتنا جميعا يااااارب
زمان اول ما تزوجت كان يوم
الجمعة عندي شي مقدس و عائلي لازم اقضيه انا و زوجي بالبيت و اعمله طبخة مميزة و حلويات غير شكل، كانت جارتي تقلي انا يوم الجمعة ما بطبخ لازم نطلع ناكل بره، بعقلي استغرب، استهجن، اقول اما نسوان اخر زمن، يعني جوزك هاليوم معطل اطبخيله اعمليله، 
🥙
🌯
زمان لما كنا يجي حد متغرب عالصيف ما يجيب هدايا او يجيب شغلة صغيرة لكل عيلة كنت اسمع كلام من الكبار انو يقولو عنجد انهم مش زوق و بخيلين 
زمان كنت بس اشوف ام بالمول جارة عالعرباي و ابنها قاعد بالعرباي بنوح و هي مش سائلة و ماشية اقول ، ول شو الداعي يختي ابنك سكتيه
.
زمان بس كنت اشوف امي اربعة و عشرين ساعة بالبيت تحرك و تمسح و تنضف اقول يعني ليش هيك بتعمل ما تقعد تحضر معنا المسلسل ولا ما بصير يعني تقعد فاضية يابي شو بتحب الشغل و الغلبة، 👩🍳👩🏼🔧
زمان كانت تيجي عنا مرت اخوي عالغدا اقول لامي خليها هي تجلي مش انا، امي تقلي بكفيها بيتها ما كنت افهم
هلأ مع اربع اولاد صرت يوم الجمعة اذا بلحق احط فطور و كاسة شاي منيح و صار واجب وطني بالنسبة الي الطلعة يوم الجمعة، صار هروب تكتيكي من عجقة البيت و الطبيخ🏃♀️🏃♀️🏃♀️قال ادلل جوزي و و اعمله طبخة، على مين انا بدي مين يدللني🙄🙄
صرت اشوف اديش صعب تجيبي هدايا للناس 
لما تيجي عالصيف، ازواق و احجام و كمية بدها تنحمل بشناتي غير عن شناتيكي الي مش واسعين حالهم ، اخر همي التكلفة.
صارت نزلة المول مع الصغار عندي مهمة مستحيلة ، القعدة بالعرباي مش خيار، الزام ، و الحركة السريعة صارت فن بتخليكي تخلصي المول اسرع و الناس ما تلحق تشوفك و تركز مع ابنك المحبوس بالعرباي، ،
صرت متل امي اربعة و عشرين ساعة دايرة ألم و أضب و ارتب مش لاني بحب الشغل لانو لازم حد يعمل و صرت كمان بس اقعد انادي
حد يجيبلي كاسة المي 
صرت احس بمرت اخوي كيف كانت تيجي عالعزومة منضفة بيتها و محممة ولادها و مهدودة و مرتبة حالها لانها بدها تقعد و ما مصدقة حدا عازمها و يريحها شوي .
الانسان مع الوقت و العمر والظروف بتغير ، ممارساته ، سلوكه، افكاره و نظرته لكتير اشياء بتتغير، مافي شي ثابت، عشان هيك اكبر غلط نحكم عانسان مش عايشين حياته ولا يومه، يوم بيوم. كتير اشياء ما بنفهمها الا بس نجرب، بس الافضل نوصل لاعلى مستوى من الاحساس لما نفهم من دون ما نجرب .
صديقتكم هزوره