المقادير:
مفتول جاهز
رشة ملح
دجاج مسلوق مع المطيبات (فلفل أسود حب، بهار حلو حب، هيل حب، عيدان قرفة، وورق غار، وكم حبة قرنفل، وبصلة كبييييرة مقطعة أرباع)
بصلة مفرومة ناعم
بهار حلو
كمون
شوية بهارات مشكل
فلفل أخضر حار
عين جرادة ( شبت ناشف)
زيت زيتون
نصف كوب حمص مسلوق
الطريقة:
– حسب نوع المفتول اللي بقدر ألاقيه مرات بكون طازة ومهبل نص تهبيلة ومرات بكون متلج ومرات بكون ناشف، هالمرة كان ناشف لكن نوعية ممتازة، برش عليه رشة ملح وبغمره بمي دافية يادوب غمره بس بعدين تركته لحد ما تشرب كل الماء.
– في هاي المرحلة بتعامل معه متله متل اللي
بجيبه طازة، أول شي بستخدم الطنجرة الخاصة بالمفتول والمكونة من طبقتين اللي تحت بتكون طنجرة عادية واللي فوق بتكون مخزقة عشان يفوت البخار منها.– وبسلق الدجاج مع المطيبات (فلفل أسود حب، بهار حلو حب، هيل حب، عيدان قرفة، وورق غار، وكم حبة قرنفل، وبصلة كبييييرة مقطعة أرباع) في الطنجرة اللي تحت يادوب الدجاج بده نص ساعة بس وبنشيله من المرقة وبخليه في صحن على جنب.
– وفي الطنجرة اللي فوق بحط نص كمية المفتول وبكون محضرة بصلة مفرومة ناعم وبمرطها بإيدي مع ملح وفلفل أسود وبهار حلو وكمون وشوية بهارات مشكلة وفي ناس بحطوا دقة فلفل أخضر حار مع عين جرادة مع البصلة بس أنا بخلي الدقة لحالها برة عشان عندي أطفال ما بياكلوا فلفل وبحط البصلة فوق المفتول وبرجع بحط باقي المفتولات فوقها وبغطيها وبحط الطنجرة المخزقة فوق الطنجرة اللي فيها مرقة الجاج وبتركها نص ساعة.
– بعدين برش عالمفتول زيت زيتون وبقلبهم شوي عشان يتوزع الزيت وبرجع بغطيهم ربع ساعة بعدين بصفي مرقة الجاج من البهارات الصحيحة وبشيل البصل اللي بالمصفاية وبمرطه لإنه بكون طري كتييير وبرجعه على مرقة المفتول فما بكون ظاهر للي عندها أطفال.
– وبكون سالقة حمص بضيفه للمرقة وبرجع الدجاج عالمرقة عشان يرجع يسخن وبرجع طنجرة المفتول فوق المرقة كمان شي ١٠ دقايق وبقدمه وصحة وهنا يارب.
يشرفنا انضمامك لنا على جروب “زاكي” لفن الطهي, على الفيس بوك:
مفتول على الطريقة الفلسطينية