عزومة ملفوف ومحشي كوسا وورق عنب وشوربة شعيرية

أولا/الملفوف

– بسلق الملفوف وبقطعه عشان يكون جاهز للف.
– وبحضر الحشوة المكونة من رز مصري ولحمة مفرومة وبضيف فلفل أسود وبهار حلو وكمون ورشة قرفة صغيييرة وملح وزيت نباتي.
– وبلف الملفوف وبرتبه في الطنجرة مع توزيع كمية منيحة من سنان التوم بين طبقات الملفوف.
– وعند الطبخ برش رشة ملح على وجه الملفوف وبضيف ماء غمر الملفوف وعلى نار عالية بخليهم يغلو, ثم اهدي النار واتركيه حوالي ساعة إلا ربع.
– وبقسم قطعة وبشوف إذا الرز والملفوف استوى بضيف عصير حامض حسب كمية الملفوف وحسب كيف بتحبوا حموضته.
– وبضيف رشة زيت نباتي وبتركه يغلي كمان ربع ساعة وبعدين بكشفه عشان إذا ضايل كتير سوائل فيه تنشف شوي، وأحيانا بخليه يلزق في الطنجرة عشان عيلتي بحبوا الملفوف الملزق وصحتييين.

ثانياً/محشي كوسا وورق عنب بالحامض

– بسلق لحمة ظهر الخروف اللي بعضمها اسمها (تي بون) مع المطيبات المعروفة (فلفل أسود حب، بهار حلو حب، هيل حب ، عودين قرفة، وورق غار، وبصلة مقطعة أرباع) بسلقها بس نص ساعة وبشيلها من المرقة وبرتبها في قاع الطنجرة اللي بدي أطبخ فيها ورق العنب.
– وبسلق ورق العنب وبحضره للف، وبحفر الكوسا رقيقة.
– وبحضر حشوة مكونة من رز مصري ولحمة مفرومة وبضيف فلفل أسود وبهار حلو ورشة قرفة صغيييرة وملح وزيت نباتي.
– وبحشي الكوسا بحيث يضل منها فاضي عقلتين ونص من الأصبع الصغير وإذا الكوساية صغيرة بحشي نصها بس وبسكرها إما ببندورة أو أول قطعة بشيلها من لب الكوسا.
– وبرتب الكوسايات فوق اللحمة في الطنجرة وبلف ورق العنب وبرتبه فوق الكوسا، وعند الطبخ برش رشة ملح وبضيف جزء من مرقة اللحمة والباقي ماء عادي لإنه المرقة بتكون دسمة كتير وبحاول أخفف شوي الدسم.
– وبغمر الورقات يادوب غمرهم مي وعلى نار عالية لحد ما يغلو بعدين بوطي النار وبتركهم يستووا على راحتهم شي ساعتين
– وقبل آخر نص ساعة بضيف الحامض ورشة زيت نباتي وإذا لاحظت ميتهم كتيرة بعلي النار عليهم لتنشف المي شوي وبكون جاهز وصحتييين.

ثالثاً/ شوربة الشعيرية

– بتسلقي جاج مع المطيبات المعروفة (فلفل أسود حب، بهار حلو حب، عيدان قرفة، هيل حب، ورق غار، وإذا بتحبي ٣حبات قرنفل، وبصلة مقطعة أرباع).
– بعدين بتقلبي الشعيرية بشوية زيت ولما تاخد لون حلو بتضيفي مرقة الجاج وملح وبتتركيها تغلي لحد ما تستوي الشعيرية وصحتين.

تابعونا على جروب “زاكي” لفن الطهي أضخم تجمع لأمهر شيفات وربات بيوت محترفين في فن الطهي:
 عزومة ملفوف ومحشي كوسا وورق عنب وشوربة شعيرية