تكملة قصة محطات بقلم هلا الغرابلي
محتويات
1 مقدمة
2 قصة محطات بقلم هلا الغرابلي
2.1 الجزء السادس
2.2 الجزء السابع
2.3 الجزء الثامن
2.4 الجزء التاسع
2.5 الجزء العاشر
مقدمة:
نتابع الليلة تكملة قصة محطات بقلم هلا الغرابلي, هذه القصة تأتيكم من قسم المنوعات من زاكي, وكما عودناكم أعزاءنا القراء نتمنى لكم قراءة ممتعة وننتظر رأيكم في التعليقات.
قصة محطات بقلم هلا الغرابلي
الجزء السادس:
كانت اول مرة بحياتي بطلع على موتور ،كنت مبسوطة كتير و الطريق يلي كنا ماشين فيه كتير حلو ،بعد ساعة نزلنا على منطقة مرتفعة و كان قدامنا وادي اخضر و ضباب ،كان المكان كتير حلو و اول مرة بشوفو ،قعدنا على كراسي حجر قبال هالمنظر نحن و ساكتين حتى بادر عمر بالحكي
عمر:وين كنت كل هالسنين؟
حكتلو موجز مختصر عن كل شي مريت فيه من وقت هربت من بيت ام عبدو للحظة يلي تعرفت فيا على نهال
قمر:و انت؟
عمر:انا وقت رجعت هديك الليلة على بيت ام عبدو ،كان البيت مليان شرطة عم يصورو و يعاينو مكان الجريمة حسب ما سموا ،و اخدوني و اخدو ام عبدو على التحقيق ،بقيت شهر كامل بالحبس على ذمة التحقيق و اخدو مني مواصفات سامر يلي قتلو لمحمود و عممو مواصفاتو بكل المنطقة حتى انلقط بالاخير و انحبس و ام عبدو كمان انحبست بعد ما خبرت عنا شو كانت تعمل بالاولاد و كيف كانت تستغلن و انا حطوني بالاصلاحية بس بعد سنة هربت منا و دورت عليكي بكل الشوارع بس ما لقيت الك اثر و بعدا بلشت شغل عند معلمي بفرز بضايع و بالبيع حتى طلعت هوية مزورة و عملت شهادة سواقة عمومي و خاصة و صرت سافر و حمل بضاعة من محافظة للتانية و صار عندي بيت صغير و هالموتور
قمر:منيح ،ايمت رح تتزوج انت و نهال؟
عمر:ما بعرف ،كنت على اساس روح اتعرف على اهلا عن قريب بس هلأ ما بعرف،نهال ما بتعرف عني شي ؛ما بتعرف كيف عشت و شو مريت بحياتي،بتعرف انو عشت متل اي طفل عادي و كبرت ببيت مع اسرة و ماتو اهلي و تركوني لحالي ،يعني بتعرف فادي بس و ما بقدر قلا انا مين ما خوفا منا انو ما تتقبل او تتركني بس لانو انا ما عندي الشجاعة لاحكي لحدا بس انت بتعرفيني منيح و هلأ قاعد معك و حاسس حالي مرتاح كتير و على طبيعتي و بقدر احكي شو ما بدي ،انا هيك قعدة بفتقدا مع نهال ما بقدر كون انا ،عم تفهمي علي؟
قمر:ايه،نهال بتحبك كتير و انت بتحبا و مع الوقت فيك تخبرا بكل شي؟
عمر:انت الك اديش معا؟
قمر:بعد.شهرين بصير الي سنتين
عمر:و ليش بعدك عم تكذبي عليا بخصوص اهلك و حياتك الوهمية؟
قمر:….ما بعرف
عمر:لكن كيف بدك اياني صارحا و قلا انو انا ما معروف شو اصلي و ربيت بالشوارع
قمر:فيك تابع معا بدون ما تخبرا
عمر:بس ما رح كون مرتاح ،رح كون متل يلي عم يمثل طول الوقت ،هاليومين يلي مرو بعد ما شفتك او بالاحرى لقيتك ما وقف عقلي عن التفكير فيكي و بنهاال كمان ،و لاني بتهمني نهال ما رح اظلما ،هي بتستاهل احسن مني
قمر:اوعى يا عمر تكون عم تفكر تتركا بعد ما شفتني؟
عمر:…..
قمر:لا انا ما بقبل ،نهال ما رفيقتي نهال اختي و ما فيك تعمل فيا هيك ،نحن كنا نحب بعض … اصلا هيدا ما اسمو حب يلي كان بينا ايام الولدنة ،فيك تقول جوع و حرمان عاطفي و حبينا نعوض لبعض عن هالحرمان بس هلأ ما في شي عندي اتجاهك ،انت مشروع زوج لصديقتي
عمر:قمر انا و انت منشبه بعض و لابقين لبعض،عشنا نفس الظروف و ربينا بنفس البيئة و هلا بعد ما الدنيا جمعتنا بدك ايانا نرجع نفترق ،اتركي االشغل بالمطعم و خلينا نتزوج بدون ما تعرف نهال ،خلينا نختفي انا و اياكي من حياتا و ما بظن هي ادور علينا
قمت وقفت انا و مدايقة
قمر:ما توقعتك جايبني لهون لتقلي هيك حكي ،عم تطلب مني خون رفيقتي
عمر:يمكن هي لو عرفتك شو انت ،هي يلي رح تتركك و ما رح تقبل تنام معك بنفس الغرفة و رح تصير تنظرلك على انك ناقصة و مشردة ..
قمر:لا ،نهال ما هيك ابدا ،بنت مسكينة و طيبة و كل هما تشوف ضحكة اخواتا و تسمع رضا اما ،هي بنت كمان عم تعيش ظروف سيئة،مستحيل تنظرلي هيك ،اذا انت ما بتحبا عنجد ابعد من طريقا ،اكيد في حدا بيستاهلا اما انا مستحيل كون الك يا عمر ،يا بتابع مع نهال و بتتزوجا يا اما اطلع من حياتي و حياتا،و هلأ انا بدي ارجع على البيت ،قوم وصلني اذا بتريد
عمر: طولي بالك ،المشكلة انو كنت صريح معك و ما حبيت ماطل و لف و دورو اختصرت الطريق ،كان فيني انهي علاقتي مع نهال و حتى كمان افرط صحبتك معا و بعدين اتقربلك …
قمر:حتى لو عملت هيك ،النتيجة وحدة ،البنت فوتتني على بيتا و اعتبرتني فرد من عيلتا و انا مستحيل ردلا هالشي بهيك خيانة ،قوم رجعني على المطعم اذا بتريد
عمر:طيب بس فكري منيح ب يلي قلتلك اياه و ما تعتبريا خيانة ،بالعكس خدمة لرفيقتك
وصلني عمر على باب المطعم و فتت على غرفتي ،ما فكرت ولا ثانية بالاقتراح يلي اقترحو علي عمر بس فكرت بانو اذا هاالشخص بيستاهل نهاال اولا ،خفت عليا منو و انو تكون وثقت و سلمت قلبا للانسان الغلط
وقت رجعت من عند اهلا ،حاولت قدر الامكان كون طبيعية معا و حتى وقت كانت تحكيلي عن فادي كنت حاول اختصر الحكي معا بهالموضوع ،ما بعرف ليش بس حسيت حالي مذنبة كتير انو عم خبي عنا شغلات كتيرة ؛يمكن ضروري انو تعرفن ،يوم الاثنين فاتت لعندي على المطبخ
نهال: قمر اسمعي الاربعا بدك تروحي معي لانو فادي عازمنا على الغدا
قمر:انا ؟شو دخلني ما رح روح
نهال:لا بدك تروحي ما على كيفك؛قال عم يقلي في مطعم اكلو اطيب من مطعمنا ،قلتلو ما في اطيب من اكلا لقمر؛قلي معناها على شرط ،جيبيا معك و خليا دوق بنفسا ،بقا بدك تروحي
قمر: خلص روحي انت و قليلو اي اكلو اطيب من اكل قمر
نهال:فشر قلو هيك هههههههه،لهيك بدك تروحي معي
قمر:لا ما بدي روح لانو بدي حل محلك ،روحي لحالك
نهال:يالله منك
يوم الاربعاء راحت نهال لحالا تشوف عمر ،بعد ما رجعت قعدت تحكيلي المسا عنو
نهاال:حسيتو ما طبيعي؛سالتو صاير معك شي بالشغل ،قلي لا ،قلتلو لكن شبك هيك قاعد و عقلك ما معك ،قال راسو عم يجعو و شكلو بدو يمرض و يكرب لانو كان طول الليل عم يسوق و فاتح الشباك و سفقو الهوا بس انا ما اقتنعت بحكيو و حسيت في شي صاير معو و خاصة وقت قلتلو شو رايك السبت تسافر معي لتتعرف على اهلي ،تحجج بانو عندو سفرة ،شو بدو يكون صاير معو ،و صحي زعل كتير منك ليش ما لبيتي العزومة بس انا وعدتو جيبك معي المرة الجاية
قمر:نهال خلص ولو ،ما بحب احشر حالي بيناتكن ،خلص رحت مرا تعرفت عليه و خلص
نهال:هيدا رح يصير صهرك يا هبولة هههههه
السبت سافرت نهال لعند اهلا و انا بقيت لحااالي ما حبيت اطلع محل ابدا على الساعة 11 الصبح اندق الباب علي ،فتحتو و طلع بوجهي عمر
قمر:عمر!
عمر:ايه
فتح الباب بايدو و فات
قمر:نهال ما هون
عمر:انت بتعرفي انو ما جاي لشوفا ،ليش ما جيتي معا الاربعا؟
قمر:نحن حكينا بهالموضوع من قبل ،ارجع متل اول مع نهال و انسى انك شفتني
عمر:مجنونة انت ،كيف انسى و انت ما عم تغيبي عن بالي ولا دقيقة ،نفسي اخدك من هون و اهرب فيكي
قرب علي و حاوطني بايديه
قمر:عمر يلي عم تعملو ما منيح ابدا ،بعد عني
عمر:انا ما صدقت ايمت لقيتك و انت عم تطلبي مني اني بعد
فجاة سمعت صوت حركة من برا ،بعدتو عني بايدي و طلعت اتبع مصدر الصوت بس ما كان في حدا ،رجعت فتت لجوا و كان عمر قاعد على التخت
قمر:عمر الله يخليك روح من هون بقا
عمر:قمر اذا ما رح تروحي معي ،انا رح احكي كل شي لنهال ،رح احكيلا مين انت و شو كنت و اني انا و اياكي كنا منحب بعض و يبقي خليا هي تقرر اذا بعد بدا تكون رفيقتك الا لا
قمر:ليش هيك بدك تخرب حياتي و حياتك ؟،هاي البنت بحسا متل عيلتي و انت بتصرفك هيك بدك تحرمني من هالنعمة
عمر:انا عيلتك يا قمر ،ما هي
تركني عمر و طلع من المطعم هو و عم يخيرني بين اني روح معو و بين انو يخبر نهال عن هويتي ،و انا بقيت خايفة من انو ينفذ حكيو ،رجعت نهال من عند اهلا و فاتت متل العادة سلمت علي و وصلتلي سلام اما و اخواتا و هالشي ريحني كتير انو عمر ما مخبرة شي ،بس كانت الصدمة انو تاني يوم ،فاتت منال هي و عم تضحك و تجمع كل الطاقم حوليا
منال:تعو تعو محضرتلكن مفاجأة ،تجمعو
اجتمعو كل البنات حوليا و من بيناتن انا و نهال يلي كنا عم نطلع ببعض و نتغامز
منال:مبارح رجعت على المطعم لاخد موبايلي لانو كنت نسيانتو قبل بيوم و احذرو مين شفت ؟
دانية:مين؟
منال:شفت قمر
اطلعت فيني نهال متفاجئة
نهال:قمر كانت عند اهلا مبارح
منال:لا لا قمر كل عطلة عم تبقى هون و ما عم تروح عند اهلا لانو عم يكون عندا شغل تاني بس المفاجأة انو مع مين كانت ؟
محمد:مع مين؟
منال:مع فادي الشاب يلي بتحكي معو نهال
اطلعت فيني نهال و انا نزلت راسي
نهال:كذابة ،بدك تعملي فتنة بيني و بينا
منال:و لانو بعرف هيك بدك تقليلي لهيك صورتلك اياهن فيديو غير شكل و صور كمان هو و طالع من عندا ،بس ما وقفت على فادي و في غيرو كتير ،من اسبوعين شفتا عم تاخد ظرف مصاري من رجال غريب ،و كمان صورتلكن اياه حتى ما تقولو منال عم تلفق حكي من عندا ،بقا يا حذركن شو تفسير كل هالشي
قمر:اخرسي ،يلي عم تلمحي عليه انت فهمتيه غلط ،نهال انا رح اشرحلك شو يلي صار …
منال:بس ما قبل ما تشوف الفيديو يلي بيشرح كل شي
اعطت منال موبايلا لنهال و التمو الكل يتفرجو على الفيديو ،و منال متابعة حكي
منال:شو رأيكن؟هاي هي قمر يلي عاملة حالا مسكينة و القط بياكل عشاها ،طلعت يا لطيف ،بتوهمنا انو سافرت عند اهلا و بتستغل غيابنا و بدخل رجال عندا عالغرفة و بتاخد مصاري بالمقابل بس داقت عينك على حبيب رفيقتك
قمر:اخرسي
ما قدرت اضبط اعصابي و هجمت على منال لاضربا بس قاطعتني نهال و مسكت الموبايل و زتتو بوجهي هي و عم تبكي
نهال:تفو عليكي ،كنت معتبرتك متل اخت الي و طلعتي ..طلعتي ..وحدة ما بتسوي
قمر:نهال لحظة بس اعطيني فرصة لاحكي
تركت المطبخ و ركضت على الغرفة و انا ركضت وراها لفهما الموضوع بس كانت عم تصرخ علي و تبكي و تتهمني بالخيانة ، ضبت تيابا بالشنتة و طلعت من غير ما تسمعني ،و انا ركضت وراها بالشارع لوقفا ،بس دفشتني على الارض و ركضت ،قبل ما وقف على رجلي ،شفت سيارة عم تشحط بالنفس الاخير و نهال طارت بالهوا هي و شنتايتا و بعدين خبطت على الارض و نزلو تيابا على الارض بكل جهة
قمر:نهاااااااال
حسيت حالي بكابوس ،ما قدرت وقف على رجلي من الصدمة و من الشي يلي صار بثواني ،زحفت على رجلي لوصلت عندا وضربتا على وجهها لصحيا بس كانت متل يلي داخل بثبات عميق ،ما وعيت الا على صوت شاب عم يرجف
عمار:ولله هي طلعت بوجهي فجأة ،ما لحقت وقف السيارة
قمر:بسرعة خلينا ناخدا على المشفى
اسعفنا نهال على المشفى و فوتو على غرفة الاسعاف و نحن بقينا برا انا و الشاب يلي اتصل فورا بقرايبو و اجا فورا ليساندو ،كان طول الوقت عم يحاول يبرر انو الغلط ما غلطو و انو نهال طلعت فجأة قدامو بس اناا ما كنت سامعتو ابدا ،كان كل تركيزي مع نهال ،تذكرت كل ايامي الحلوة معا و اديش انا بحبا و فجأة تخيلت انو ماتت ،تخيلت حالي واقفة قدام اما و انا عم قلا نهال عملت حادث و ماتت و انا السبب ،حسيت بالندم عم يحرقني لانو خبيت عليا كل شي ، و تأخرت باني خبرا ،حسيت حالي خاينة فعلا ،بس كان الوقت عم يمر ببطئ كتير و انا واقفة بالممر و عم ادعي لربي انو ما يصرلا شي و انو القدر يعطيني فرصة تانية بس …
…..يتبع
الجزء السابع:
الدكتور :ما فيا شي ،شوية رضوض و كسر بالرجل وبالايد
ارتاح قلبي كتير ،نزلوا لنهال بغرفة منفردة لحالا ،فتت اطمن عليا انا و خايفة من ردة فعلا بس كانت من اثر الحادث نسيانة كل شي صار معا قبلو ،ساعدتا لتجلس قعدتا انا و عمار
نهال:راسي عم يجعني كتير
قمر:سلامتك موتيني قلق عليكي
نهال:يالله ما متذكرة كيف عملت الحادث..
قمر:المهم انو انت بخير و ما صرلك شي
انا و عم حكيا و حاول ضحكا ،فاتو محمد و دانية و منال
منال :انت هون ،لك كيف الك عين بعد ما عملتي فيا هيك ،العمى ما اوقحك
محمد:منال خلص
منال:لا ما خلص؛نهال هاي قمر هي يلي دفشتك على السيارة انا شفتا بعيني ..
قمر:منال الزمي حدودك ،للصبر حدود
منال :نهال شكلك نسيت شو عملت فيكي هالوسخة
راحت قعدت جنبا و بلشت توسوسلا متل الشيطانة حتى نهال رجعت تبكي و انا ما قدرت اضبط اعصابي اكتر من هيك و هجمت عليا لحط ايدي على تما و سكتا بس صارت تصرخ اكتر
منال:بدا تخنقني بدا تموتني،حاولت تقتل نهال و هلأ اجا دوري
صاروالموجودين يفكو بيناتنا و نهال قاعدة على التخت عم تبكي حتى طلعوني الشابين عمار و قرايبو وليد لبرا و بقيت منال و االباقي جوا
عمار:يعني ما حلوة هيك تعلقو بنص المشفى و قدام المريضة
قمر(تبكي):هي استفزتني كتير و طلعتني عن طوري ،عم تلفق علي حكي و تهم ما مزبوطة
وليد:شو القصة؟
قمر:االقصة طويلة
عمار:خلينا ننزل نشرب قهوة بكافتريا المشفى لبين ما تخلص زيارتن
نزلت انا و اياهن لتحت انا و جسمي عم يرجف
وليد:شو اسمك ؟
قمر:قمر
وليد:تشرفنا ،انا وليد و هيدا عمار
عمار:كيف قهوتك؟
قمر:سادة
وليد:وين اهلكن ؟
قمر:انا ما عندي اهل ،بس نهاال اهلا عايشين بالضيعة و ما بدي خبرن و ما عندي طريقة لخبرن كمان
وليد:بس انا وقت سالتك قلتي انو هي اختك
قمر:ايه هي رفيقتي بس متل اختي يعني
وليد:بسيطة ،و مين هاي يلي كانت عم تصرخ متل الرجال فوق؟
قمر:هاي وحدة بتشتغل معنا بالمطعم و بتكرهني كتير و حابة تخلص مني بأي طريقة
وليد:انت بتشتغلي بمطعم؟
قمر:ايه مساعدة شيف و نهاال نادلة
وليد:حلو
قمر:انتو اخوات؟
وليد:لا عمار بكون صديقي و وقت صار معو الحادثة تلبك و خاف يصرلا لرفيقتك شي و ينحط بالحبس لهيك اتصل فيني فورا ،الحادثة كيف صارت ؟
قمر:كنت عم اعلق انا و نهاال و ضبت تيابا و بدا تترك المطعم و انا لحقتا لاشرحلا سوء الفهم يلي صار و يلي سببو منال ،و هي ما كانت منتبهة على الطريق ابدا و لا حتى انا ،كان بدا بس تتركني و ما تشوف وجهي مرة تانية 0
وليد:اووووف ،كل هالقد
رجع عمار و هو جايب القهوة معو ،قعدنا شربنا قهوة و عمار و وليد عم يحكو مع بعضن احاديث جانبية ما اعطيت داني الها ابدا ،كان كل تفكيري شو عم يصير فوق و منال شو عم تحشي راسا لنهال من افكار بشعة عني ،بعد نص ساعة قمت وقفت ،اطلع فيني وليد و عمار
قمر:لازم يكونو راحو هلأ،انا رح اطلع
وليد:منطلع معك
قمر:انتو ما بدكن ترجعو على بيوتكن؟
اطلع وليد بعمار
وليد:عمار انت اذا بدك ارجع انا ببقى عنك ،انت بكرا عندك فيقة الصبح بكير اما انا فيني ما روح على شغلي
عمار:طيب بس لاطمن على نهال بالاول
طلعنا نحن التلاتة ،نحن و فايتين بالممر ،كانو منال و االباقي طالع من غرفة نهال ،مسكني وليد و سحبني من ايدي لارجع ،اطلعت فيه ،انتبه على تصرفو المتسرع
وليد:عفوا ،انا كان بدي ما ترجعو تلتقو مع بعض كرمال ما تعلقو
نطرنا لطلعو بالاسنسير و نحن تابعنا طريقنا على غرفة نهال ،اول ما فتت ،حسيتا لنهال متل البركان و بدا تنفجر بوجهي
نهال:اطلعي لبرا ،شو بدك تعملي فيني لسا اكتر من هيك
قمر:نهال ولله انت فاهمة الموضوع غلط ،لحقتك لفهمك و انت ما كنت شايفة قدامك من عصبيتك و طلعت السيارة بوجهك
نهال:كذابة انت دفشتيني لتخلصي مني و يفضالك الجو معو
قمر:انا!هاي منال فهمتك هيك
عمار:طولي بالك نهال ما حدا دفشك ،انت كنت حاملة شنتايتك و عم تركضي بدون ما تنتبهي و قمر كانت على الارض ،انا شفتا بعيني و شو الي مصلحة لكذب
نهال:انت ما بتعرف شي …
جاب كرسي وليد و حطو جنب تخت نهاال
وليد:انا برأيي تهدو هلأ ،الجو ما مناسب للمشاحنات و المشاكل و انت انسة نهال بدك راحة و ما بيسوى تعصبي ،في سوء فهم و هلأ منحلو بارضو ،خلينا اول االشي نسمع قمر شو بدا تقلك و اسمعيا للاخر بدون ما تقاطعيا و بعدين بيجي دورك انسة نهال؛تفضلي احكي انسة قمر
قمر:انا بعرفو لفادي قبل ما انت تعرفيه ، و هو اسمو عمر ما فادي،ربينا سوا بالشارع ،انا كنت بيع بسكوت و ورد و هو كان يغسل سيارات ، وقف جنبي بشغلات كتير ما رح اذكرا هلأ لانو بدا وقت طويل و ذاكرة حديد ،حبينا بعض من نحن وصغار لانو كان معظم وقتنا نقضيه سوا بالشارع و الحدايق حتى صار ظرف و افترقنا و ما عاد التقينا حتى اليوم يلي اخدتيني فيه و عرفتيني عليه على انو فادي و طلع هو نفسو عمر ،انا عرفتو من الحرق يلي بايدو و هو عرفني وقت سألتو عن الحرق،و بعدا رجع يتواصل معي لنتزوج انا و اياه بس انا ما قبلت ،انا ما بحبو و ما ممكن انو خونك و خبرتو هالشي؛اجا لعندي و هددني اذا ما بروح معو رح يخبرك مين انا ،اني وحدة ما معروف مين اهلي و اني كذبت عليكي بهالموضوع و قلتلك اني كل سبت بسافر لعند اهلي و انا ببقى لحالي
نهال:انتو الاتنين لابقين لبعض
قمر:امممم ،و هو هيك قلي و قلي كمان انو نهال اذا عرفت حقيقتك هي يلي رح تتركك و تبطل تعترف فيكي كصديقة ،بس انا كذبتو و قلتلو انا و نهال متل الاخوات و حتى لو عرفت هالشي ما رح تتغير معي ،بس ليكك اثبتيلي انو كلامو صح
نهال:انت كذبتي علي بكل شي،الي سنتين معك و انا بقلك عرفيني على اهلك و انت بتتحججي كل مرة بحجة شكل
قمر(تبكي):لانو بخجل قلك ما بعرف مين اهلي ،اذا انا ضعت عنن او انا نتيجة علاقة حرام او باعوني ،انا بخجل بحالي و اعتبرتك انت اهلي و اجت منال و استغلت الموقف لتخرب بيناتنا و انت بتعرفي منال اديش بتكرهني
نهال:مين الرجال يلي اعطاكي ظرف المصاري ؟
قمر:هيدا عماد ؛يلي كنت اشتغل عندو بمعرض السيارات ،بعد ما تقلعت من الجامع يلي كنت نايمة فيه ،هو حواني عندو بس كان مفكرني صبي لانو كنت حالقة شعري و بعد ما عرف اني بنت عملي هوية و شغلني بالمطعم و كل فترة بيطمن عني و بيعطيني مصاري صدقة بس النفوس المريضة يلي متل منال ما بتعرف انو لسا في ناس قلبا ابيض ،بتفكر كل الناس متلا ،انا حكتلك كل شي و انت اسالي قلبك و شوفي مين الصادق فينا و لو انا بدي اياه لعمر ما كنت شفتيني هون و يا ريت هو يلي خبرك كانت الامور راحت بمجرى تاني و ما كنا وصلنا لهون
وليد:قصتك ما بتتصدق ولله ،كانو فيلم
عمار:،طب ما حاولتي تعرفي مين اهلك ؟
قمر:لا،كيف بدي اعرف و انا ما بعرف اذا قمر اسمي الحقيقي او لا ،ما بعرف كنيتي ما بعرف شي عن هويتي ابدا
نهال:انا راسي عم يجعني و بدي نام
عمار:طيب رح نتركك ترتاحي و نحن منرجع بكرا انشالله
طلعنا و سكرنا الباب على نهال
عمار:انا بدي امشي ،بكرا برجع فترة الضهر و انت وليد اتصل باهلك طمنن اذا بدك تتاخر ؟
وليد:طيب بس انت ما تخبر اهلك و اهلي بالحادثة ما بدنا كترة حكي
عمار:لا يا زلمة ،بخبر ال cnnو ما بخبرن ،ما توصي حريص
قمر:وليد انت ارجع مع رفيقك،وجودك هون ما في الو داعي ،انا رح ابقى هون
وليد:ما في مشكلة هي هالليلة وبكرا بخرجوا لنهال ،روح انت عمار اتيسر
بقي وليد عندي نزلنا على الكافتريا و طلبنا سندويش جبنة نتعشى و نحن عم ندردش و عم يسالني كيف عشت حياتي كل هالفترة لصارت الساعة 1 بالليل طلبت منو يرجع على بيتو
وليد:لا معقول اتركك لحالك
قمر:لا عادي ،بدي اطلع شوف نهاال و رح نام على الصوفاية و انت روح نام ببيتك
وليد:انت ما بتعرفيني انا بقدر حطم الرقم القياسي بالسهر ،بعد نص الليل ببلش نهار جديد عندي الا اذا انت مليتي مني و بدك تقلعيني
قمر:لا ما هيك قصدي
وليد:معناها اطلعي شوفي نهال و انزلي انا ناطرك تحت برا ،الهوا حلو و بينعش لنكمل حديثنا
طلعت اتفقد نهال ،شفت غاطة بالنوم ،غطيتا و رجعت نزلت ،شفت وليد قاعد على كرسي بالحديقة ،اعطاني كاسة نسكافيه
قمر:انت شو بتشتغل؟
وليد:انا بشتغل بشركة اعلانات
قمر:منيح ،المهم انك بتحب شغلك
وليد:ماشي الحال
قمر:حكيت اهلك؟
وليد:اي حكيتن و قلتلن بدي نام عند رفيقي
قمر:و شغلك بكرا؟
وليد:ما تاكلي همو ،الشركة لرفيقي و ايمت ما بدي بداوم
قمر:نيالو فيك
وليد:ههههههه ولله عايف حالو مني و لو ما شغلي منيح و عاجبو كان قلعني من زمان
بقينا عم نحكي طول الليل انا و وليد يلي ما كان يسكت ابدا و هو عم يحكي عن افكارو و طموحو و انا احكيلو شو ناوية اعمل بالمستقبل
وليد:انا فيني ساعدك كتير و فيني اعملك اعلانات للمطعم او الكافتريا يلي بدك تعمليا ،شو رايك؟
قمر:هههههه هي مجرد افكار بس ،ما بظن اقدر طبقا قبل 5 سنين
وليد:شو المانع ؟
قمر:التمويل المادي
وليد:الا هاي ما بقدر ساعدك فيا لاني ولله منتوف ههههه بس بعرف حدا بساعدك ،اذا حكينا عمار بيقدر يدبرلك قرض ،عمار موظف بالبنك
قمر:كيف يعني قرض؟
وليد:يعني متل الدين ،بس بدك تسدي مبلغ منو كل شهر من عائدات ربح المشروع بس طبعا فيه فائدة
قمر:ما فهمانة شي عليك هههههه هيك مصطلحات كبيرة شوي علي
وليد:يعني على اساس انا الفهمان ههههه على كل حال بتقعدي مع عمار و هو بشرحلك كل شي بس انت من فئة المشاريع الصغييرة
وليد كان انسان بسيط ب ليلة وحدة رسملي طريق قدامي و و سهلي كل الامور لدرجة حسيت الحلم سهل كتير انو يتحقق و خاصة مع كمية الحماس و التفاؤل يلي شفتن عندو لوليد ،تاني يوم الصبح كان بدنا نخرجا لنهال ،اجا عمار على الساعة 12 الضهر و دفع فاتورة االمشفى وسكرنا ضبط الشرطة و طلعنا ،كانت نهال ما عم تحكي معي و لا حتى عم تطلع فيني ،طلعنا بيسيارة عمار
نهال:انا بدي روح لعند اهلي فورا
قمر:كيف بدك تروحي و انت هيك ايدك و جسمك عم يجعك،في مسافة منيحة لهنيك
عمار:ما في مشكلة انا بوصلا
قمر:بس في مسافة 3 ساعات على الطريق
عمار:انا اخدت اجازة اليوم
قمر:طيب ،انا رح روح معك
نهال:لا ،بدي روح لحالي ،انا بدي وقت كون فيه لحالي،انت ارجعي على المطعم
قمر:طيب،رح اتركك على راحتك ،ما رح اضغط عليكي
نزلنا عمارعلى الطريق انا و وليد ،وليد تابع على بيتو لينام و انا تابعت على المطعم و فتت بوجهي على غرفتي و نمت،على الساعة 6 المسا فقت و لبست تيابي و طلعت عند ابوسليم و خبرتو انو بدي اترك الشغل هون
ابو سليم : ليش؟شو يلي صار بينك و بين نهال؟
قمر:سوء فهم بسيط و انحل بس انا حابة اترك الشغل هون و افتح شغل لحالي
ابو سليم :اذا هيك شي تاني و الله يوفقك بس لازم عماد يعرف
قمر:اكيد رح خبرو بس بدي ابقى بالغرفة كام يوم لزبط وضعي و انتقل من هون
ابو سليم:ما في مشكلة خدي راحتك
نزلت على الغرفة ،ما كنت عارفة وين بدي روح و شو بدي اشتغل بس كان لازم اترك الشغل و ابعد عن منال لانو ما رح تتركني بحالي ،بلشت بنفس اليوم دور على شغل تاني مع منامة ،رجعت الساعة 8 انا و تعبانة و فاقدة الامل ،قبل ما وصل شفت عمر واقف قبال المطعم ،ركضت بالاتجاه المعاكس و تخبيت بشارع فرعي ،و بقيت واقفة ساعة انا و كل شوي اطلع عليه حتى ركب الموتور و راح و انا رجعت على المطعم ،كان بدي اطلع من هون بسرعة و اختفي عن عينو لعمر حتى ما بقا يلاحقني ،تاني يوم انا و عم غير تيابي ،فاتت لعندي دانية
دانية:ابو سليم بدو اياكي
قمر:يلا طالعة
خلصت لبس و طلعت لعندو ،شفت عماد قاعد معو و مخبرو اني رح اترك الشغل
عماد:ليش بدك تتركيه ،بعلمي كنت مبسوطة و مرتاحة هون
قمر:ايه بس اخر فترة صار فيه ضغط كتير و انا تعبت كتير
عماد:طيب ملاقية شغل تاني؟
قمر:لا بعدني عم دور
عماد:طيب ضبي تيابك و خلينا نمشي
قمر:طيب
طلعت انا و عماد بالسيارة ،ما كنت عارفة لوين بدو ياخدني و انا بقيت ساكتة حتى حكى
عماد:رح تنامي عند امي…
قمر:عند امك ؟انا ما بدي احرجك ،بدبر حالي
عماد:امي مرة كبيرة بالعمر و انا الي فترة عم دور على وحدة تقعد معا بالليل و النهار و انت جيتي بالوقت المناسب،شو رايك؟
قمر:ايه اكيد بوافق
فتح الباب و فات هو حامل شنتايتي
عماد:تفضلي
فتت انا و متلبكة شوي،صار عماد ينادي على امو،حتى طلت امو ،ما كانت متل ما تخيلتا ،كانت اقوى و انهض من الصورة يلي رسمتا براسي ،عرفني عليا عماد و رحبت فيني بابتسامة هادية
عماد:و قمر شاطرة بالطبخ حسب ما سمعت ،لهيك رح تنبسطي فيا
ام عماد:اهلا و سهلا فيا
عماد:انا نازل على شغلي امي بس انت فرجيا الغرفة يلي بدا تنام فيا و اعتبريا متل بنتك ،شو بدك اطلبي منا ،يلا سلام
ام عماد:الله يرضى عليك ابني ،الله معك
وصلت ام عماد ابنا على الباب و رجعت قعدت معي
ام عماد:ما تخجلي مني،قومي لفرجيكي على غرفتك
ما كنت مرتاحة كتير عند ام عماد بالاول ،بس يوم عن يوم كنت عم اخد وجه عليا و على االبيت؛و هي كانت تثني علي داىما بترتيبي و على طبخي و عماد كان يمر على امو المسا يتعشى و يشرب فنجان قهوة و يروح ،حتى اجا مرة و هو عم يتعشى
عماد:االيوم اجا شاب سأل عنك
قمر:عني انا؟مين؟
عماد:اسمو …ولله نسيت اسمو
قمر:عمر؟
عماد:لا …اه تذكرت اسمو وليد ،لحظة شوي
قام ورقة من ايدو و اعطاني اياها
عماد:اعطاني كرتو وقلي كرمال تتصلي فيه ضروري و شدد كتير على كلمة ضروري
قمر:معقول صاير شي مع نهال ،كيف بدي اتصل فيه
عماد:خدي موبايلي
اخدت موبايلو و فتت على غرفتي ،و اتصلت بوليد
وليد:لك وينك ،معقول انت ،نسيتي كل شي حكيناه و اختفيتي
قمر:مضطرة كنت اترك ااشغل
وليد:المهم وصلتلك ،ايمت بقدر شوفك كرمال نروح انا و اياكي لعند عمار كرمال القرض
قمر:انا غيرت رأيي و حاليا عم اشتغل شغل منيح و المنامة مأمنة فيه
وليد:بالله !قمر هاي فرصة دهبية قدامك؛ما اي حدا بيقدر يحقق حلمو و يكسب من موهبتو ،انا ما معك ابدا ،خلينا نقعد مع عمار و نسمع منو و بعدين قرري
قمر:ما بعرف،كيفا نهال؟
وليد:منيحة احسن ،عمار كل عطلة بيطلع لعندا و بيطمن عنا
قمر:ما سألت عني؟
وليد:ما بعرف ولله لانو ما عم اقعد منيح انا و عمار نحكي ،كنا نلتقي بالعطلة و هلأ بعد ما صار يطلع لعند نهال ما بقا قعدنا مع بعض متل اول
قمر:اممم طيب انا بدي ابعت مبلغ لنهال ،بياخدلا اياه عمار مو هيك ؟
وليد:ايه بطريقو
قمر:معناها بكرا بشوفك و منروح لعندو
سكرت الخط مع وليد بعد ما اتفقنا نلتقي بكرا و طلعت لاعطي الموبايل لعماد بس سمعتو عم يتناقر هو و امو ،وقفت شوي قبل ما فوت لانو خفت كون انا االسبب
ام عماد:ما عم قلك طلقا،تزوج عليا،انت من حقك يكون عندك اولاد من صلبك
عماد:يا اولاد منا يا اما ما بدي ،ما كتير قاتل حالي ،عادي عايشين و مبسوطين مع سوا
ام عماد:بس انا مامبسوطة انا بدي شوف خلفتك قبل ما موت
عماد:الله يطول بعمرك بس امي حاج تعبي حالك ،انا بحبا لسوزي و مستحيل اجرحا فوق انو ما بتجيب اولاد كمان روح اتزوج عليا ،شو شايفتيني بلا ضمير
ام عماد:هاد حلال و شرع ربنا
عماد:بس الله ما جبرنا نعملو ،دايما على الاكل و انت امي ديري بالك على صحتك و ما تشغلي بالك بهيك قصص
ام عماد:اكيد عاملتلك عمل حتى متشردق فيا هالقد ،حسبي الله
فتت اعطيتو الموبايل لعماد و خبرتو انو عندي نزلة من البيت بكرا ،تاني يوم التقيت بوليد و رحنا عند عمار ،هاي اول مرة بفوت على بنك ،كان عمار قاعد ورا لابتوب و عم يمشي زبون ،قعدنا على كراسي الانتظار و بعد ربع ساعة اجا لعنا
عمار:هلأ هيدا الطلب عبيه و خلي وليد يساعدك و اكتبي تحت المبلغ يلي بدك اياه و هلأ بعد ربع ساعة بتقدمي الطلب بهديك الغرفة للمدير و بتحكيلو عن مشروعك و يا اما بوافق و وقتا منكمل باقي الاجراءات يا اما بيرفض و وقتا انا ما بقدر ساعدك بشي
قمر:شكرا الك بس انا جيت لاعطيك هالمبلغ تعطيه لنهال وقت تروح لعندا ،هي بلا شغل هلأ و بدا مصاري لتصرف
اخد مني ظرف و عد المصاري
عمار:ماشي رح اعطيا اياه بلكي بكون بادرة صلح منك و بترجعو متل اول
قمر:انشالله يا رب
وليد:قوم يلا اعطينا الطلب
قمر:انا ما جاهزة هلأ
وليد:لا جاهزة
اطلعت فيه و ابتسمت ،عبيت الطلب انا و اياه ،كان عبارة عن معلومات شخصية عني استعنت فيا من الهوية ،و موجز مختصر عن المشروع و بعدا قعد وليد يفهمني شو احكي قدام المدير ابو رأفت حتى يقتنع بالمشروع ،بعد نص ساعة فتت انا و وليد لعندو ،كان رجال بعمر الستين سنة ، شعرو ابيض و عيونو كبار عسليات و ابتسامتو جذابة ؛استقبلنا بوجه بشوش وانا كنت متوترة و متلبكة بس وجود وليد جنبي خفف شوي عني
ابو رافت:مطعم او كافتريا ؟
قمر:انا حابة اعملو كافتريا بالبداية ،قدم فيه مشروبات ساخنة و حلويات و اذا نجح و صار عليه قبول ،رح اتوسع فيه و بلش بالمقبلات السناك و بعدين بكبرو اكتر
وليد:يعني مشوار المية ميل ببلش بخطوة ،و انا هون رح ادعما باعلانات بالطرق و دعايات على قنوات محلية و قمر بنت موهوبة رغم صغر سنا
ابو رافت:لحظة قمر او مروى؟
اطلعت بوليد
وليد:اسما مروى بس نحن رفقاتا مناديلا قمر
ابو رافت:يعني حسب ما فهمت منك انو رح تستاجري المحل و القرض رح يمول التجهيزات بس
قمر:ايه
ابو رافت:بحال خسر المشروع و ما قدرتي تدفعي القرض ،كيف بدنا نستردو منك ،لهيك بدنا كفيل او بدنا عقار باسمك لنحجز عليه بحال تخلفتي بالدفع او ما وفيتيه
انا بقيت ساكتة و ما عرفت شو بدي رد لانو ما عندي ملكية لعقار ابدا و لا عندي كفيل
وليد:بصير انا اكفلا ؟
ابو رافت:بصير اي حدا يكفلا بس كمان الكفيل لازم يكون عندو مدخول شهري ثابت او عقار باسمو ،يعني بيترتب عليه مسؤولية كبيرة بحال ما وفت القرض نحن منستردو من الكفيل
اطلعت بوليد و رفعتلو حواجبي لينسحب بس بقي قاعد مرتاح
وليد:شو الاوراق المطلوبة من الكفيل ؟
اخد ورقة صغيرة ابو رأفت و كتب عليا و اعطاها لوليد
ابو رافت :هيدا المطلوب
وليد:طيب،يعني في قبول على المشروع
ابو رأفت:بأذن الله
طلعنا من غرفة المدير انا و متفاجىة بوليد
قمر:انت ما بتعرفني حتى تكفلني
وليد:صح ما بعرفك بس انا شاب بيمشي ورا احساس قلبو و لحمدلله متبهدل على طول هههههه
قمر:ههههه
وليد:المهم انا حاسسني قلبي انو مشروعك رح ينجح انشالله و الاهم انو تكوني انت واثقة بحالك بانو رح تنجحي
رجعت على بيت ام عماد بعد ما اتفقنا انا و وليد انو يعمل الاوراق المطلوبة و يقدما للمدير كرمال القرض ،المسا انا و قاعدة عم احكيلو لعماد عن المشروع هو و عم يتعشى ،انرن جرس البيت و رحت فتحتو انا و عم قول مين ،كان صبية بعمر ال 35 سنة واقفة و عيونا حمر و عم تبكي ،و اول ما شافتني ،دفشت الباب بايدا و فاتت هي و عم تنادي عماد بصوت مخنوق؛اول ما شافا عماد ترك المعلقة من ايدو و قام وقف
عماد:سوزي
سوزي:اخر شي توقعتو منك انو تعمل فيني هيك
…. يتبع
الجزء التامن:
عماد:شو عملت فيكي
سوزي:عم تغشم حالك ،ما بقا في مجال لتلف و دور اكتر ،انا ما رح ابقى عليك ولا ثانية بعد ما تزوجت علي ،طلقني و هلأ
رجع قعد عماد هو و عم يتنهد و حس باالارتياح و امو قاعدة و حاطة رجل على رجل و هادية كتير ،كانو عم تحضر شي مسرحية او فيلم ممتع
سوزي:عماد طلقني عم قلك
عماد:اقعدي و اهدي ،الموضوع ما متل ما انت فاهمة ،ما متزوج و لاشي و قمر قاعدة هون كرمال امي
سوزي:كذاب انا حاسستك متغير من جهتي حتى عالعشا ما بقا تعشيت معي و انا كل يوم بنطرك و انت قاعد هون معا و عم تاكل من اكلا
مسك الملعقة و كمل اكل ببرود اعصاب
قمر:تفضلي ارتاحي رح اعمل قهوة
سوزي:اخرسي انت،انا ما عم احكي معك
عماد:سوزي ما تغلطي و التزمي حدودك ؛قمر ما مرتي و لا في شي بيناتنا ،و كل يلي عمرا 18 سنة
سوزي:لكن ما انت بدك تاخدا صغيرة كرمال تجبلك اولاد ،كلو منك انت
اطلعت بحماتا و صارت تصرخ
سوزي:انت بقيتي تحشي براسو حتى اتزوج ،حسبي الله و نعم الوكيل فيكي ما بتخافي ربك
ام عماد:يا ريتو سمع كلامي و تزوج ؛لكان صار عندو دزينة اولاد هلأ ،سمعت امي مرتك ،هاي هي يلي بتحبا و ما بدك تجرحا
عماد:ارجعي على البيت و هنيك منحكي حتى ما تغلطي اكتر
سوزي:ما راجعة قبل ما اطلقني
قلب سفرة الاكل بالجو و كلنا صرخنا صوت من الخوف،و قام و مسكا من ايدا و طلعو من البيت هن و عم يعلقو ،قامت ام عماد و سكرت الباب بعصبية
ام عماد:بقلعة ،ابني تشتوش ،بس هي بنت الحرام ساحرتو و عاملتلو عمل و انا بعرف كيف فكلو اياه ، نفضتلي بدني الله ياخدا ،قمر تعي نظفي محل هالقرف
نظفت الغرفة و ام عماد قاعدة عم تعمل اتصالاتا و تسأل عن شيوخ كرمال تروح لعندن و يفكو السحر عن ابنا ،تاني يوم ما اجا عماد لعنا ابدا بس اتصلت فيه امو
ام عماد:شو مدامتك ما سمحتلك تجي اليوم …لكن يا بعدي ليش ما جيت ….اي خليك جنبا روقا و هديا احسن ما تغضب عليك بتعرف غضبا صعب …الله ياخدا اذا بدي خليا عندك لهل المصروعة ،مجنونة و مجننتك معا …يبقى مر علي بكرا لازمني كام غرض يا عيون مرتك …سلام
طبشت السماعة بوجه ابنا هي و عم تهز رجلا و تحبك خطط تودي فيا كنتا لما وراء الشمس،انا كنت متعاطفة مع سوزي كتير بالرغم من انو عصبت علي بس عذرتا ،بعد يومين اتصلو فيني من البنك على تلفون ام عماد الارضي يلي كنت حاطتو بطلب التقديم و استدعوني فورا لانو في مشكلة بالاوراق ،رحت لهنيك و التقيت بعمار
قمر:شو المشكلة ؟
عمار:ولله ما بعرف متلي متلك ،فوتي لعند المدير و هو بخبرك و بس تطلعي خبريني ،انا ما قلتلو شي لوليد حتى ما يترك شغلو و يقلق عالفاضي
قمر:طيب
فتت عند المدير و اول ما شافني عبس وجهو
ابو رافت:تفضلي
قعدت انا و متوترة
قمر:خير استاذ في شي؟
ابو رافت:انت اسمك مروى ؟
قمر:…ايه
ابو رأفت:بعد ما جبلي وليد الاوراق يلي طلبتن منو و كنت عم كمل الاجراءات بنفسي ،عرفت انو انت منتحلة شخصية وحدة ميتة من سنة
قمر:انا ؟؟
ابو رافت:ايه،يعني حضرتك عم تحاولي تعملي عملية احتيال على البنك و بدك تاخدي القرض بهوية مزورة ،يعني تزوير و انتحال شخصية و محاولة احتيال و هاي التهم بتتحاسبي علين لهيك رح اطلبلك السكيورتي فورا ليفتحو ضبط و يحققو معك و يتخذو الاجراء اللازم
قمر:لا لا ما هيك القصة ابدا
ابو رأفت:شو اسمك الحقيقي؟
قمر:قمر
ابو رأفت:بدي تعطيني اسمك الثلاثي كامل لانو بدي ينفتح سجلك و اعرف اذا الك اسباقيات من قبل
قمر(تبكي): ممكن يفوت عمار و هو بيشرحلك االقصة كاملة ،هو و وليد صديقوو بيعرفو بوضعي
ابو رأفت:طيب
قام وقف و فتح الباب و اشر لعمار ليجي لعندو بس بقي واقف بمحلو وكانو شاف شي غريب ،بعدين ابتسم و تغيرت ملامح وجهو
ابو رأفت:اهلين سيد كمال تفضل
فات رجال لابس قميص ابيض و بنطلون كحلي قعد على كنباية قبالي و حط رجل على رجل
كمال : مريت اشرب فنجان قهوة عندك و شوف كيف الشغل ماشي
ابو رافت:نورتنا ،يلا ثواني و منشرب القهوة
كمال: لاا كمل شغلك و لتخلص منشررب القهوة؛ما مستعجل
اندق الباب دقتين ،و فات عمار
عمار: ايه استاذ
ابو رافت:شو قصتا لهل البنت ،بدا تسحب قرض بهوية مزورة؟
اطلع فيني عمار و بعدين ركز مع ابو رافت و خبرو قصتي بالمختصر
ابو رافت:و هيدا الشخص يلي عملك اياها فيكي تحكيه هلأ و تستدعيه لهون لنتأكد اكتر ؟
قمر:ايه ،بس بدي التلفون شي
اتصلت بامو لعماد و خبرتا تحكيه عماد.كرمال يلحقني على البنك لانو واقعة بمشكلة،بعد نص ساعة و ابو رأفت عم يستجوبني ،وصل عماد ،فات عرف على حالو و قعد جنبي ،كان عمار مفهمو القصة قبل ما يفوت
عماد:فيك تسأل عني ،انا عندي معرض سيارات على طريق الصناعة القديمة و ما بحاجة مصاري و لا قروض و البنت هون حبيت ساعدا و ما توقعت الامور تصل لهون و تنحط بهيك تهمة ،البنت مسكينة كتير و ما الها حدا ،و ما بتعرف بابواب الاحتيال و النصب
اطلع ابو رأفت بالسيد كمال
ابو رأفت:سيد كمال شو رايك بما انك سمعت القصة من الاول للاخير ،اقتنعت شي؟
كمال: شو اسمك؟
اطلع فيني ابو رافت و اشرلي بعيونو لرد على السيد كمال
قمر:انا ..انا اسمي قمر
كمال:اسمك الحقيقي قمر؟
قمر:لا ..يمكن…ما بعرف
كمال:ما ببتذكري شي عن طفولتك ابدا ،انك ربيتي مثلا بميتم او ببيت مع عيلة ؟
قمر:لا ما بتذكر شي غير ام عبدو
كمال:شو عمرك؟
قمر:18 سنة
كمال:طيب انا اقتنعت بقصتك و انا رح اعطيكي القرض يلي بدك اياه
ابو رافت:سيد كمال ..
كمال:طبعا بعد اذنك ابو رأفت ،بس بدي منك عينة دم للتحليل ،يعني اجراء روتيني لاتأكد انك ما حاملة اي مرض او..
عماد:عفوا شو دخل القرض بتحليل الدم و الامراض،ناس كتير بتسحب قروض و ما بينطلب منا تحليل دم ،بقا انت شو قصدك من هالحكي ولا على شو عم ترسم
قام وقف عماد بعصبية
عماد:البنت صح مسكينة بس ما سلكت هيك طريق ابدا و ما ممكن تمشيه ابدا و يلي عم يدور ببالك ما بينطبق على قمر
اطلع فيني عماد
عماد:يلا نمشي و بالنسبة للقرض ما بقا بدا اياه و الهوية المزورة ما بيطلع من امرا شي و اعلى ما بخيلكن اركبوه
كمال:سيد عماد..انا ماقصدي هيك . انت فهمتني غلط انا ما فكرت هيك بالبنت
قمت وقف و مشيت لعند عماد يلي فتح الباب و بدو يطلع من المكتب
كمال:ممكن تقعد لفهمك وجهة نظري
عماد:وجهة نظرك احتفظ فيها لحالك ،عم تشكك باخلاقا للبنت ،لو هي هيك ما كنت اجت لعنكن على البنك لتاخد قرض و تفتح مشروع تعيش منو بتعبا ،عن اذنكن
طلع عماد و انا مشيت وراه بسرعة و نحن طالعين من باب البنك التقيت بوليد و خبرتو شو صار معي،وعدني يلاقيلي حل بس انا خبرتو انو لغيت الفكرة ،و بعدين انا رجعت لعند ام عماد لتابع حياتي محل ما وقفتا و نسيت فكرة المشروع بعد ما تأملت و تماديت باحلامي ،بعد يومين كنا نازلين على السوق انا و ام عماد و فاتت تشتري حجاب الا و التفتت علي
ام عماد:قمر بنتي انت ما بتفكري تتحجبي ؟
قمر:انا ولا مرة فكرت يعني اني اتحجب
ام عماد:بالعكس صار عمرك منيح و بتتحاسبي و الحجاب فرض على كل مسلم
قربت علي و لفت علي حجاب لونو ابيض و فتلت ضهري على المرية
ام عماد :شوفي ما احلاه عليكي ،زادك جمال ،فكري بالموضوع و بس تقتنعي بالحجاب ،خبريني و بنزل فورا بشتريلك حجاب و تياب مناسبة الو و بكسب فيكي ثواب
رجعت صلي بتشجيع من ام عماد يلي كانت بالنسبة شخصية متناقضة رغم انو متدينة و بتصلي و هيك بتعامل مرة ابنا ،بعد يومين اتصل فيني عماد من المعرض على بيت امو
عماد:البسي و تعالي لعندي على المعرض
قمر:في شي؟
عماد:هون السيد كمال
قمر:مين كمال ؟
عماد:يلي التقينا فيه بالبنك
قمر:يلا جاي
لبست و نزلت على المعرض وانا طول الطريق عم خمن سبب زيارتو لكمال بعد اخر لقاء النا معو و المشكلة يلي صارت
عماد:السيد كمال رح يعطيني القرض الي و انا رح اعطيكي اياه الك لتفتحي المشروع و انت يلي رح تسديه
قمر:انا خلص لغيت الفكرة و ما بدي دخل حدا و عذبو معي ،بحال ما نجح المشروع ما بدي ضرك
كمال:ما رح ضريه لعماد بشي لانو انا يلي رح اكفلو ؛يعني بحال ما سدو عماد انا بسدو عنو
قمر:اممم
كمال:معناها بكرا منكمل الاجراءات بالبنك عند ابو رافت ،ما تاكل همو لابو رأفت بكون صديق قديم الي و لللعيلة يعني ما رح يكون فيه اي مشكلة
عماد:طيب اتكلنا على الله
ما بعرف ليش هيك تصرف السيد كمال معي و حتى سالتو لعماد
عماد:ما تشغلي بالك بهالقصة ،بجوز حس بغلطو و حب يقدم الاعتذار بهالطريقة ،المهم رح تاخدي القرض
بعد ما سحبت القرض بلشت رحلة البحث عن مطعم ،كان اهم شي بالنسبة الي الموقع و المساحة ،و وليد ساعدني كتير و نزلي طلبي على الجرايد المحلية حتى لقيت طلبي و بلشت جهزو متل ما بدي بمساعدة وليد من الصيانة و الدهان و اختيار طاولات و كراسي و برادي و ادوات المطبخ و التقديم ،بعد 3 شهور خلصت وانا ما مصدقة حالي انو هالمكان الي ،ما كنت مصدقة اني وصلت لهون لافتح مطعم باسمي بعد ما كنت بنت مشردة و عم تبيع بسكوت بالطرقات ،يوم الافتتاح عزمت كل الناس يلي بعرفن عماد و امو و مرتو و وليد و عمار و ابو سليم و الطاقم يلي كنت اشتغل معو بمطعم ابو سليم باستثناء منال ،و حتى بعتت دعوة لنهال بس كنت متأكدة انو ما رح تجي ،يوم الافتتاح كنت متوترة كتير و فرحانة بس وليد كان يكسر جو التوتر بنكتو الخفيفة و يرفعلي معنوياتي ،اول ضيف كنت متوقعتو يكون عماد بس كان السيد.كمال و معو اخوه،اول ما فات استقبلتو بابتسامة ممتنة لكل شي عملو معي و اخدت منو بوكيه الورد و تركتو يتفرج على المطعم و يختار محل الو و لضيفو،عملتلن قهوة و رحت قعدت معن انا و ليد
كمال:هيدا اخي جماال ،كان عندي وقت تلقيت دعوة الافتتاح و حب يجي معي
قمر:اهلا و سهلا فيكن
جمال:شو عمرك انت؟
قمر:انا رح صير 19 سنة بعد 3 شهور
جمال:العمر كلو بس برافو عليكي بنت بعمرك و قدرت تعمل هالشي …
وليد:اجا عمار و نهال
تشتت انتباهي عن حديث جمال وعم اطلع على الباب؛تركت القعدة و رحت فورا لاستقبل نهال ،كانت صحتا منيحة و ملامح وجها مرتاحة ،اول ما اطلعت فيني ابتسمت و اعطتني بوكيه ورد ابيض
نهال:مبروك قمر تشوفي على وجهو الخير
قمر:انبسطت انك جيتي
عمار :معقول يعني ما تجي،اول ما خبرتا طار عقلا من الفرحة و اصرت تكون اول وحدة بتباركلك
نكشتو لعمار بايدا
قمر:تفضلو
عمار:ها وليد هون ،ولا نحن اذا منضيعك صرنا منلاقيك هون
وليد:و نحن ما منضيعك ابدا لانو صرنا منعرف وينك
كانت ليلة الافتتاح متل الحلم ،حسيت حالي اسعد وحدة بالعالم و لاول مرة ما بحس حالي اني وحيدة او اني بلا عيلة ،لاول مرة بحس انو في عالم كتير بتحبني و بتردلي الخير ،و انو رغم اني انحرمت من اب و ام بس الله عوضني و حط بطريقي اولاد حلال كتار و كلما ما اوقع يجي حدا يشيلني،بقيت السهرة ل 11 المسا و راح الكل باستثناء وليد و عماد يلي كان ناطرني لسكر و يوصلني على بيت اهلو
قمر:انا اليوم رح روح معك و نام عند خالتي ام عماد بس هاي رح تكون اخر ليلة و بعدا رح نام هون ببيتي الجديد
عماد:وين بدك تنامي ،ما في محل
قمر:عملت غرفة صغيرة الي حطيت فيا تختين و خزانة ..
عماد: بس ما امان تنامي بنت لحالك هون
قمر:ما رح نام لحاالي ؛رح تجي نهال تنام معي و انا برتاح هون اكتر و منقفل الابواب بالمفتاح ما في شي بخوف ،يعني متل ما كنا بمطعم ابو سليم
وليد:بحي بنام عندك اذا بدك ههههههه
اطلع عماد بوليد و عبس،بلع ريقو و سكت وليد
وليد:عم امزح ولله
سكرت الكافتريا و رحت مع عماد لعند امو و نحن على الطريق ،حسيت عماد بدو يحكي شي و متردد حتى قبل ما انزل من السيارة
عماد:قمر انت صرتي بنت صبية و حلوة كمان ،بدي منك تديري بالك على حالك و تحطي حد لاي حدا ممكن يتقرب منك ليستغلك سواء ماديا او من اي ناحية تانية …
قمر:قصدك على وليد؟
عماد:وليد او غيرو ..
قمر:وليد.شاب مؤدب كتير و وقف جنبي كتير و فعلا لولاه انا ما فتحت هالكافتريا بس هو شجعني كتير و لحد الان ما حسيت انو بدو مقابل هالشي
عماد:انشالله بس الحرص واجب
قمر:اكيد
عماد:و ارجعي فكري بقرار نومتك بالكافتريا ،اذا كرمال سوزي ؛متل ما شفتي اليوم اجت لعندك و باركتلك و تفهمت الوضع
قمر:لا ما كرمالا ،بس انا حابة استقل بحياتي
عماد:متل ما بدك
تاني يوم الصبح التقيت بنهال واقفة على باب الكافتريا و حاملة شنتة تيابا بايدا و ناطرتني ،كان احلى شي بكل يلي صار انو رجعت علاقتنا قوية انا و نهال مع بعض متل اول و احسن ، فتنا رتبنا تيابنا بالغرفة نحن و عم نحكي و نضحك متل اول ،سمعنا صوت وليد من برا عم ينادي
وليد:وينكن
قمر:هون جوا
فات لعنا على الغرفة و القى نظرة على التياب المرمية على التخت
وليد:يا لطيف شو عنكن تياب ،ولله بتفتحو محل فين ،ليش كل هالقد
قمر:هيك كل البنات
وليد:بتذكر اختي غيداء كانت وقت تفتح خزانتا توقع عليا ،والشي يلي بقهر تجي تتبكبك و تقلا لامي ما عندا تياب اما انا كنت عالعمياني مد ايدي بالخزانة و شو طلع بايدي البسو
قمر:ههههه ايه نيالك
وليد:ولله هو نيالي نيالي بس نياالي فيكي لازم اتشكر نهال يلي شلحت حالا قدام سيارتو لعمار
ابتسمت و اطلعت بنهال ،كان وليد ما يفوت اي فرصة ليعبر فيا عن مدى سعادتو بانو التقى فيني و انا كنت من جوا مرتاحتلو بشكل غريب كتير ،كنت حسو متل الاخ والصديق يلي اي بنت بالدنيا بتحلم يكون عندا ، تعودت عليه كتير كل يوم كنت شوفو بعد ما يخلص شغل ،يمر على الكافتريا لعنا هو و عمار ؛نشرب قهوة سوا و نضيفن قطعة حلو
وليد:رفقاتي بالشغل عم يقلولي اني نصحان كتير ،بقا الله يرضى عليكن ما بقا تحشو فينا حلو ،خلص ضيفونا بس قهوة
قمر:اي وفرت علي ههههههه
عمار:احكي عن حالك بس
وليد:ليك ما صدقت تخلص مني ؛ما ابخلك ولو ،يحكو يلي بدن اياه ،المهم انا جايكن بفكرة حلوة كتير
نهال:قول لنشوف
وليد:عم فكر اطبعلكن كروت للكافتريا و نكتب فيا شو بتقدمو من حلويات و نكتب العنوان و الفكرة الاهم ان نذكر بالكرت انو مستعدين لتلبية جميع الطلبات الخارجية ،شو رايكن؟
نهال:فكرة بتجنن هيك مننشهر اكتر و بيتوسع شغلنا
قمر:فعلا فكرة حلوة بس يمكن مكلفة طبع و هيك شي
وليد:لا لا هاي رح تكون هديتي الكن بمناسبة الافتتاح
قمر:ما بدنا نكلفك
وليد:تكلفتا بسيطة معناها رح بلش اشتغل على الفكرة
نحن و قاعدين اجا السيد.كمال و اخوه جمال ؛سلمت علين و رجعت قعدت مع وليد و قامت نهال تلبي طلباتن
وليد:كانو السيد كمال اخدي رجلو و رجل اخوه لهون كتير
قمر:ايه بس انو بدفعو حق طلباتن ما متل بعض عالم ههههه
عمار:هاي عم اتلطش علينا ولا وليد
وليد:طنش،اتركا تحكي ،هادا كمال شو بشتغل ؟
عمار:هادا يا حبيب عندن محلات الصاغة بالسوق ،محلات الخوري
وليد:اه عرفتن يعني بس انا ما مرتحلو ابدا لا الو و لا لاخوه
قمر:بالعكس كتير منيح هو يلي كفل القرض لعماد
وليد:ما هو لهيك انا ما مرتحلو ،يعني شو سبب هالمبادرة منو
قمر:وليد خلص شيل راسك من الموضوع ،ما شفت منن شي مزعج لحد الان
وليد:طيب
كان الشغل بالبداية قليل كتير و مقتصر على الناس يلي منعرفن او الناس يلي بتمر صدفة من منطقة الكافتريا وبعدين بفضل اقتراح وليد زادو الزباين شوي و صار عنا خدمة التيك اواي و الدليفري ،و صرنا نقدر ندفع القرض كل شهر بشهرو بعد ما كنا نتاخر اول فترة بس كان عماد يسد عننا ،حتى اجا اليوم يلي كنت فيه بالمطبخ عم اشتغل و فاتت نهال لعندي هي و مزعوجة
قمر:شبك ؟
نهال:فادي برا
قمر:مين فادي…قصدك عمر؟
نهاال:ايه ،برا قاعد على الطاولة يلي بالزاوية ،شفتو و بالغصب مسكت اعصابي ،كنت بدي روح اعلق معو بس ما بدي الناس تتفرج علينا و نخرب سمعة المحل لهيك اطلعي اتصرفي معو
قمر:طيب رح اطلع اصرفو بطريقتي
غسلت ايدي و نشفتن و طلعت ،شفتو قاعد عم يدخن ،سحبت الكرسي و قعدت قبالو
قمر:عمر انت …
عمر:قمر انا بعرف شو رح تحكي ،على كل حال انا ما جاي كرمال نحكي بالماضي،انا خلص فهمت انو ما بدك اياني بس انا حابب قلك على شغلة ،لازم كنت قلك اياها وقت شفتك بس ما بعرف ليش ما خبرتك ،لا بعرف ليش ما خبرتك لانو رح تقولي عني ندل و حقير و رح تكرهيني و رح اخسرك للابد بس بدي تعرفي اني انا كذبت لانو كنت بحبك و ما كان بدي اياكي تروحي مني و كنت متوقع لاقيكي بعد ما هربتي هديك الليلة
قمر:احكي عمر شوفي؟
عمر:بعد ما مات محمود و انا فتت على الحبس وحققو معي و عرفو مني انو في اولاد كانت عم تستغلن ام عبدو و تشغلن و ما معروف اصلن،اجو ناس كتير على المركز يلي كنت متوقف فيه و معن صور كتير ،صور لاولاد صغار شي باللفة و شي اعمارن 4 سنين و شي 5 سنين و سألوني كتير اذا انا شايفن او بعرفن
قمر:ايه
عمر:و انا فعلا ما قدرت ميز اي حدا من كل هالصور غير صورتك انت ..
قمر:صورتي انا ؟
عمر :اي ،لاني بتذكر شكلك منيح وقت جابك صياد الاولاد ابو جاسم لعند ام عبدو ،كنت لابسة فستان ابيض معرق و عاملة شعرك جدايل و لهلأ صورتك براسي ، كانت امك ماسكة صورتك بنفس الفستان و تسريحة الشعر و عم تبكي كتير هي و عم تفرجيني الصورة و تقلي بتعرفا لهل البنت ؛شايفة من قبل ،خفت قول بعرفك و خبرن عنك و تروحي معن و ما بقا ارجع شوفك لانو ما رح يسمحولك تشوفي واحد متلي مشرد بلا نسب ،لهيك كذبت و قلتلا للمرة اني ما شايف صاحبة الصورة من قبل
قمر:ما فهمت ،شفت صورتي انا مع مين ؟
عمر:قمر انت عندك اهل ،عندك ام و عندك اب و انا شفتن بعيوني
قمر:انت كذاب جاي تتسلى فيني و تلعب بمشاعري
عمر:انا ما عندي شي لاخسرو و ما بدي منك شي ،انا حبيت خبرك و بس ،انت عندك اهل دوري علين
قمر:طيب شو بتعرف عنن؟
عمر:ما بعرف عنن شي لا اسمائن و لا كنياتن ،شفت اشكالن بس
طفى السيجارة بالمكتة و قام وقف
عمر:صح وضعك ما بتنحسدي عليه بس انك تعرفي انو عندك اهل و عم يدورو عليكي ومهتمين فيكي هاي نعمة انا و كتير غيري محرومين منا لانو منعرف انو نحن ما جينا بطريقة شرعية على هالدنيا ،جينا من شهوة انانية و انرمينا بالشارع لنربى متل الكلاب
اختنق صوتو لعمر باخر كلمتين و حمل جاكيتو و طلع من الباب و ما بقا رجعت شفتو ابدا بس تركني بحالة سيئة كتير ،غصت بهموم و بحالة ضياع ،صوت نهال نشلني من القاع يلي وقعت فيه
نهال:شبك ،شو قلك ؟
قمر:ولاشي،ما قلي شي،انا فايتة كمل شغلي بالمطبخ
بقيت بقية النهار عقلي مشتت و ضايعة بين اني صدق كلامو لعمر او لا ،حتى هالشي اثر على شغلي و ما عرفت اشتغل منيح بالاضافة لنظرات نهال الي و تعليقاتا على حالة الشرود يلي كنت فيا ،بقيت اسبوع على صراع انا و افكاري بدون ما خبر حدا بالشي يلي عرفتو حتى حسمت امري و انو انسى كل الكلام يلي قلي اياه عمر و كانو ما سمعتو ابدا بحياتي و رجعت ركزت على شغلي ،بعد اسبوع اجا السيد كمال عنا و طلب مني طلبية كتير كبيرة
كمال: بكرا حفلة تخرج ابن اخي جمال و بدي تعمليلي من كل االاصناف يلي كاتبلك اياهن على هاي الورقة و بنفس الكميات
اخدت منو الورقة و قراتا انا و متلبكة؛هاي اول مرة بتجيني هيك طلبية بهالعدد
قمر:سيد كمال انت بتعرف انا ما فيني ارفضلك طلب بس الحفلة بكرا و انت طالب كتير ،بخاف ما لحقلك اياهن
كمال:لا بتلحقي اذا سكرتي الكافتريا هاليومين و انشغلتي فين و صراحة العيلة بدا حصرا من عندك لانو عجبن كتير شغلك
اطلعت بنهال يلي كانت واقفة بابتسامتا المعتادة و المتفائلة ،غمزتني و هي عم تبتسم
قمر:طيب ،رح اعمل كل جهدي
كمال:ماشي بكرا بجي باخدن الساعة 4 و انتو بتجو مع عماد
نهال:نحن معزومين؟
كمال:اكيد
نهال:يعني معزومين ضيوف؟.
كمال:ايه ضيوف
طلع السيد كمال من الكافتريا و صارت تنط نهال من الفرحة اما انا كنت اكلة هم كتير
نهال:انا رح ساعدك ما تاكلي هم شي،هدول فين مصاري كتير
خلال يومين ما نمنا غير 5 ساعات و الباقي عمل متواصل لننهي الطلبية ،على الساعة 4 اجا السيد كمال و معو شابين ،حملن على السيارة و اعطاني ظرف مصاري و مشي فورا قبل ما اعطيه الفاتورة او اخصم قيمتا من المبلغ ،فتت انا و نهال على الغرفة و فتحنا الظرف و طالعنا المبلغ منو و صرنا نعدو ،كانت نهال عم تعد هي و عم تضحك ،و انا كنت مبسوطة كتير كانت فرحتي اكبر من اني عبرا
نهال:يااااا عنجد هاي اول مرة بحياتي بمسك هيك رقم بايدي
قمر:لحمدلله الله يديما رزقة علينا
نهال:قمر بما انو يعني معنا هيك مبلغ كبير ،خلينا ناخد منو شوي صغيرة و ننزل على السوق نشتري شي جديد لنروح فيه على الحفلة
قمر:ليش ناوية تروحي
نهال:ايه طبعا
قمر:بس انا تعبانة كتيررررر
رميت حالي على الفرشة
قمر:و بدي نام
نهال:بكرا بتنامي
مسكت نهال المصاري و صارت تزتن علي ،صرخت عليا انا و عم اضحك
قمر:بدك تلمين هلأ لحالك
نهال:اذا بدنا نروح على الحفلة بلمن لحالي اما اذا ما بدك تروحي ما رح لمن
قمر:ما اقواكي بروح بس ما في داعي نشتري كتير ،بدنا نسد دينا لعماد
نهال:ايه خلص منسدو
مسكت ايدي و صارت تشدني لقوم ،غيرت تيابي و نزلنا على السوق،كانت نهال تتفتل بالمحل و تنقي 5 /6ةقطع و تفوت تقيسن سوا ،انا اخترت فستان اسود طويل و بسيط ،اما نهال اختارت بعد ما يقارب ال 3 ساعات فستان اخضر قصير و رجعنا على الكافتريا بسرعة لانو صارت الساعة 7 ،على الساعة 8 سمعنا صوت سيارتو لعماد عم يزمر لنطلع ،انا كنت مخلصة و نهال واقفة عم تركب رموش على عيونا ،تركتا انا و عم تأفأف منا و طلعت ،سلمت على عماد و مرتو و طلعت من وراه
عماد:وينا نهال ما رح تروح ؟
قمر:هلأ بتجي بس عم ….ها ليكا اجت
طلعت نهال جنبي و انا حاطة ايدي على تمي و بالعة ضحكتي
قمر:انا برايي تشيلين انت و بالسيارة احسن ما يوقعو منك انت و عم تسلمي على شي حدا لانو ما عالقين منيح
نهال:يالله من حظي؛شو صار لو خلقت و رموشي اطوال اوف يا ..ما رح شيلن
كانت حفلة ابنو لسيد جمال بصالة خارجية فخمة كتير بطل على مسبح و بوفيه اكل على طول المسبح و طاولة كبيرة فيها حلويات يلي انا و نهال عملناهن
نهال:يا ريت لو كانو معنا عمار و وليد
قمر: ما الن بالطيب نصيب ههههه
قعدنا على طاولة مع عماد و مرتو و نحن عم نطلع بالمعازيم شو لابسين و شو عاملين و بالناس يلي عم ترقص و الالعاب النارية و باولادو للسيد جمال (الياس و جورج) ،كان كل شي جديد بالنسبة الي و ملفت للنظر ،بعد.شوي اجا االسيد كمال و مرتو رحبو فينا
كمال:و هيدي قمر يلي بجبلكن من عندا كل مرة الكلير و الكوفر
زوجة كمال:يا عمري انت ،فكرتك اكبر من هيك بس انت كتير صغيرة ،يعني يلي بشوف شغلك و بدوقو مستحيل يقول انت يلي عاملتيه
نهال:و انا كمان بساعدا
اطلعنا بنهال وضحكنا ،قاطع حديثنا اخوه السيد جمال يلي انقطعت زياراتو على الكافتريا فجأة
جمال: يسلم ايديكي ،الكل عم يسأل شغل مين هالحلوى
قمر:الله يسلمك و مبروك تخرج ابنك
جمال:الله يبارك فيكي
اجت مرتو لجمال و مسكتو من ايدو و سحبتو لبعيد عننا هي و عم تحكي معو ،رجعنا قعدنا على طاولتنا
نهال:قمر اطلعي لهنيك
قمر:لوين؟
نهال:على الشاشة يلي عالحيط ،عم يطلع عليا صور ،هدول صور اولادو لجمال هن و صغار
قمر:ايه هيك شكلو
كانت الشاشة عم تستعرض صور لابنو لجمال من هو و صغير لعمرو هلأ مع اخوه و ابوه و امو ،كانت واضح انو حياتو حلوة كتير ،حطيت ايدي على خدي و صفنت بالطفولة يلي انا عشتا و بين الطفولة يلي عاشا هالولد ،ما كان في ادنى مقارنة بين الاتنين ،قاطع شرودي مشهد غريب،لمحت مرتو لجمال عم تركض لبرا هي و عم تبكي و جمال لاحقا ،نكشتا لنهاا من ايدا و اشرتلا بعيوني لتطلع
نهال:شو عم يصير معن؟
قمر:ما بعرف كانو مناح من شوي
الجزء التاسع :
لحقن السيد كمال لبرا ،بغضون ثواني تكركب جو الحفلة و انطفت الشاشة فجاة حتى الكل صار يطلع ببعضو و يتهامس
سوزي:كانو صار شي
عماد:و انا هيك حسيت
سوزي:عماد قوم شوف شوفي
عماد:ما بدي ما بحب ادخل بلكي مشاكل عائلية و خاصة
بعد.شوي رجعو على الساحة سيد كمال و اخوه و مرتو ، كنت انا و نهال عم نلاحقن بعيونا لنعرف شو صار ؛انتبهنا على مرة جمال انو تغيرت ملامح وجها و كانو صار شي ما عجبا بالحفلة او حدا زعجا و قرب منا ابنا و صار يلفا و يبوسا و هي عم تمسح دموعا ،بعدين انضم لرفقاتو و بقيت الشاشة مطفية ،اصرت نهال قوم ارقص بس انا كنت تعبانة و بقيت بمحلي ،لهيك قامت هي و سوزي يرقصو سوا و بقيت انا و عماد على الطاولة
عماد:طالعة اليوم حلوة
قمر:بالله ،تسلم ،كيفا خالتي ام عماد؟
عماد: لحمدلله على طول بتسالني عنك
قمر:الله يسلما و يطول بعمرا
اشر بايدو عماد لسيد كمال ،التاني هز براسو و بعد.شوي اجا
عماد:في شي؟
كمال:لا لا قصة بسيطة و مرت على خير
عماد:طيب ولله انشغل بالنا على ام الياس ،فكرنا صاير معا شي
كمال:لا بس وقت شافت الصور تذكرت بنتا و انفتحت جروحا ،الله يصلحو لابن اخي كان لازم يدقق باالصور قبل ما ينزلن
عماد:اه اخوك عندو بنت ميتة؟
كمال:لا ما ميتة
عماد:لكن؟
سحب الكرسي و قعد جنب عماد
كمال:االقصة قديمة كتير،كان اخي راجع من زيارة هو و مرتو و بنتو و امي الله يرحما ،وقفو على الطريق و نزل اخي يشتري شوية اغراض للبيت و امي تعبت بهالاثناء و طلع ضغطا و نزلت مرة اخي من السيارة لتقلو لاخي انو يرجع عالسيارة كرمال يطلعو على المشفى يأسعفو الوالدة
عماد:ايه
كماال:و وقت رجعو كانت امي عاطيتك عمرا و البنت فاتحة الباب و نازلة من السيارة او حدا اخدا ،ما عرفنا شو يلي صار بالضبط
عماد:اوووف الله يرحما
كمال:تعيش
عماد:و البنت؟
كمال:ما عاد لاقوا من هداك اليوم لهل اليوم ،و هلأ مرت صورة بنتا مع ابنا باالصدفة و شافت االصورة و رجعت انقهرت و متل ما شفت
عماد: طب ما دورو عليا ما خبرو االشرطة
كمال:خربو الدنيا ،ما ضل شي ما عملوه حتى يلاقوا ،بس تقول الارض كانو انشقت و بلعتا ،ما عاد بين الها اثر
اطلع فيني عماد
عماد:سمعتي القصة ؟
قمر:ايه سمعت
عماد:منعيش و منسمع كتير بهالدنيا ،الله يصبر قلبا
رجعت سوزي و نهال على الطاولة و انسحب االسيد.كماال ،اطلعت بنهال و ضحكت
قمر: رمش عينك اليمين وقعان منك انت و ترقصي
نهال:بربك .
حطت ايدا على عينا هي و عم تلمسا
نهال:ما حسيت ،كيف طالع منظري
قمر:متل الاعور
قامت الرمش التاني و كبتو و رجعنا ركزنا بحديث عماد يلي رجع عاد القصة قدام مرتو و نهال
نهال:ايوا لهيك طفو الشاشة
سوزي:ام مهملة ،انا لو عندي ولد ما بخليه يغيب عن نظري ثانية
عماد:هيدا نصيبا و قدرا ،ما دخل الاهمال
سوزي:على الاقلية كانت قفلت باب السيارة قبل ما تنزل
عماد:شو عرفا هيك بدو يصير،تاركة البنت مع ستا ،عنجد.شي بحط العقل بالكف
سوزي:يا حرام على البنت بس،وين بتكون راحت ،يعني يمكن لو ماتت كان عرفو اكيد بس هي عايشة لهلأ و الله اعلم وين و كيف عم تعيش ،يا لطيف
اطلعت فيني سوزي و بعدين نزلت نظرا فورا و تلبكت انو اخد الحكي علي و اتحسس ،بس انا كنت عم فكر ببنتو لجمال اكيد ما عاشت حياة بتفرق كتير عن حياتي ،او يمكن تبنتا عيلة او يمكن مشيت بطريق بشع كتير ،بس بكل الاحوال هي ما عاشت سعيدة ،خلصت الحفلة و وصلنا عماد على المحل انا و نهال يلي بقينا لاخر الليل ندردش على الحفلة و المعازيم ،مرت الايام و شغلنا عم يتحسن للافضل و فكرة وليد جابت مفعول كبير على المدى البعيد ،وكبرنا طاقم الشغل بالمطبخ و بالخدمة الخارجية و وسعنا شغلنا ليشمل الكيك كمان بكل اشكالو حتى صرنا نعمل كاتو للافراح و المناسبات ، بعد سنة عرفني وليد على اهلو امو و اختو ،كانت عيلة بسيطة كتير و متواضعة و متدينة و محافظة و هالشي خلاني حس بارتياح بيناتن و خطى وليد اول خطوة جدية بعلاقتنا و خطبنا و لبسنا المحابس بحفلة عائلية ،بعد الخطبة بشهر ،طلب مني وليد طلب جدي
وليد:انا ما بقدر اجبرك ابدا و حابب الشي يطلع منك انت بعد قناعة ،فكري منيح و ما تحطيه لانو انا طلبتو منك
قمر(مبتسمة):طيب ،رح فكر بس ما بوعدك بشي
بعد يومين مر وليد عندي لنطلع مشوار انا و اياه ،نطرني برا لبين ما خلص لبس ،كنت عاملتلو مفاجأة ،قربت نهال و ساعدتني فيه ،كانت اول مرة رح اطلع بحجاب
نهال:قمر انت متأكدة من هيك خطوة
قمر:اكيد؛من زمان انا و عم فكر حطو يعني ما لانو وليد طلبو مني،بس فيكي تقولي اعطاني دفشة صغيرة
نهال:يا ستي مبروك
قمر:الله يبارك فيكي عقبالك
نهال:شكلي ما مطولة ،بعدك عالدعسة فورا
طلعت من المحل و شفت وليد واقف برا ،اول ما شافني تفاجئ و ابتسم
وليد:لابقلك كتير
قمر:لوين بدنا نروح هلأ؟
وليد:بدي اخدك عند امي بالاول ،رح تنبسط كتير وقت تشوفك فيه
كل يوم كنت عم احمد ربي على الحياة السعيدة و الاستقرار يلي عم عيشو بعد سنين كتير من التشتت و ارتحت اكتر وقت سديت القرض كامل ، بعد شهر اجا السيد كمال عندي و بأيدو ظرف ،فتحو قدامي و اعطاني الاوراق يلي فيه
كمال:كل ورقة عن الشهر يلي سديتي فيه القرض ،احتفظي فين بلكي رجعتي قدمتي على قرض ببنك تاني بيعتبرو متل حسن سلوك و بيسهلولك امورك و هيدي ورقة تحليل الدم
مسكت الورقة و قراتا
قمر:هاي الي ؟
كمال:ايه الك
قمر:بس انا ما عملت تحليل دم
اطلع فيني كمال متفاجئ
كمال:كيف يعني ما عملتي،لكن لمين هالتحليل
قمر:بوقتا اختلفت انت و عماد عالتحليل و بعد يومين وقت جيت انت على المعرض اعتذرت منو لانك طلبت مني التحليل و لغيت الفكرة
كمال:لحظة ..انا ما لغيت شي ،انا خبرتو لعماد انو ضروري بدي عينة دم منك و وعدني انو باقرب فرصة يجبلي العينة و نطرتو شهور كتير لقدر انو يطلبا منك و يعطيني اياها
قمر:في سوء فهم اكيد ،انا ما حدا سحب مني دم ابدا ،على كل حال الموضوع ما بقا مهم
كمال:لا مهم بالنسبة الي
قام كمال الموبايل من جيبتو و اتصل بعماد فورا و طلب منو انو يجي فورا عالمحل بدون ما يخبرو المشكلة؛قمت انا جبلو قهوة بعد ما حسيتو متوتر كتير و في بوادر لمشكلة كبيرة ؛انا و عم ضيفو اياها ،اجا عماد
كمال:انا طلبت منك تجبلي عينة دم من قمر ،و هلأ بتفاجئ انو البنت ما معا خبر بالموضوع ،لكن الدم يلي جبتلي اياه لمين ؟
اطلعت انا و كمال بعماد يلي سكت شوي و هو عم يمشط شعرو بايدو بتوتر بعدين تنهد
عماد:الي ..العينة يلي اعطيتم اياها الي
كمال:الك ،شايفني ولد صغير قدامك ،شو هالحركة المولدنة استاذ عماد كيف بتعمل فيني هيك ،انت اعطيتني كلمة رجال و انا وثقت فيك
عماد:ما حبيت ارجع افتح الموضوع معا مرة تانية و خاصة بعد ما صارت مشكلة كبيرة بمكتب البنك على هالقصة و لانو انا نفسي ما مقتنع بهالموضوع لهيك قلت بتصرف انا بطريقتي بدون ما نجرحا للبنت و تفكر انو انا شكيت فيا
كمال:انا قلتلك الموضوع ما متل ما انت مفكر و احتفظت بالسبب الحقيقي لنفسي
عماد:انت قلت بدك عينة دم لتكملو اجراءات االقرض و العينة مني او منا ما بتفرق،المهم كان انو تمشي المعاملة
كمال:بتفرق كتير
رجع شال موبايلو كمال من جيبة جاكيتو و صار يكبس فيه بتوتر و حطو على دانو هو و عم ينفخ
كمال:جمال وينك …اترك كل شي من ايدك و تعا لعندي…..مافي شي بس البنت يلي قلتلك عليا قمر تذكرتا يلي قلتلك انو ما الا اهل و ربيت بالشارع …ايه هي…لسا الموضوع ما خلص….بعرف عملنا بس طلع في خربطة و العينة ما الها طلعت لعماد…ما بعرف تعا و احكي كل شي …ما عم قلك تأمل بس خلينا نفضا لهل السيرة بقا و نقطع الشك باليقين …انا بمحلا ناطرك
عماد:شو القصة ؟شو دخل اخوك جمال بالموضوع؟
كمال:هلأ ليجي بفهمك هو
انا بقيت قاعدة ما فهمانة شي ،اجا السيد جمال بعد شوي ،كان عم يلهت و وجهو اصفر ،سحب الكرسي و قعد و هو يطلع فيني
جمال:شو يلي صار ؟
كمال:اقعد احكي انت للبنت كل شي و ليش كان بدنا عينة دم منا
شرب كاسة مي و اخد محرمة و مسح وجهو من العرق
جمال:انا عندي بنت ..كان ..كان عندي بنت و ضاعت مننا هي و صغيرة ،كان عمرا 4 سنين ، و دورنا عليا كتير بس ما لقيناها و صرنا اي بنت منشك فيا انو تكون هي ،منعملا تحليل DNA،و و قت شافا كمال لقمر شك فيا كمان لهيك طلب عينة دم منا
عماد:ايوا و ليش ما خبرتنا هالحكي من الاول ؟
كمال:حبيت اخد العينة بالاول و بعدين نتأكد قبل ما نعمل بلبلة بالقصة
اطلع فيني كمال
كمال: فهمتي قمر الموضوع
احمر وجهي و تسارعت دقات قلبي ،و داق نفسي و نشف ريقي ،انتبه علي عماد
عماد:فيكي شي؟
قمر:لا ابدا ،انا قايمة غسل وجهي
قمت عن الطاولة و اول ما مشيت خطوتين وقعت بالارض
نهال:قمر اصحي …اطلع فيني لهون ..سامعتيني
قمر:ايه…ايه
نهال: منيحة ما تخافو ،اكيد شوية تعب
عماد:معافاية
جمال:سلامتك
كمال:حقك علينا،نحن تسرعنا شوي،مشاعر الناس ما لعبة بايدينا
استأذن جمال و كمال و راحو و بقيت انا و نهال و عماد
عماد:انت منيحة؟
قمر:ايه انا منيحة
عماد:قمر كل شي وارد ،جمال بدو يعرف و اكيد انت حابة تعرفي،خلينا نروح عالمخبر بكرا و…
قمر:ما بدي …(تبكي)..ما بدي …انا عايشة مرتاحة هيك و تعودت على حياتي و انتو اهلي ….خلص ما بدي فوت بهيك قصة ،اصلا ما بدي اتأمل و على الفاضي
عماد:بجوز ما على الفاضي ،بجوز فعلا جمال يطلع ابوكي
قمر:و حتى لو ،انا ما بدي اياه…انا ما بدي اياهن لاهلي ،لانو اهل مهملين كيف غفلو عني ،كيف ضعت منن،ليش ما دور علي ،تابعو حياتن و ما سألو انا كيف عم عيش طفولتي و مع مين و كيف كبرت..
عماد:انا ما بقدر اغصبك على شي بس فكري ،هيدا قرار مصيري
قمر:انا مقررة من زمان و بعرف انو عندي اهل و ضايعة عنن،خبرني عمر وقت اجا لعندي اخر مرة ..
نهال:ها ..و ليش ما قلتيلي ؟
قمر:لانو حسيت الموضوع تافه و ما فكرت فيه اصلا و نسيتو
نهاال:عماد الموضوع علي ،شي يومين انا بحكيك و بقلك انو قمر جاهزة
قمر:نهال انت ما تدخلي بالموضوع
نهال:ولله ما على كيفك هالموضوع ،اذا انت ما حابة تعرفي ،انا حابة اعرف
بعد ما طلع عماد ،قمت على المطبخ تابع شغل ،بس نهال ما وقفت حكي بالموضوع حتى عصبت عليا و تركت المطبخ و فتت على الغرفة لاخلص من النق بس رجعت لحقتني
نهال:معناها رح خبر وليد احسن الشي و هو خليه يتصرف،بعرف ما فيه غيرو بيقدر يقنعك
قمر:لا اوعى يا نهال ،بزعل منك،ما بدي اياه يعرف بشي ابدا
نهال:حلو معناها ما رح خبرو ،منروح انا و اياكي و و ابو الياس بس
قمر:ما بعرف
نهال:صحي قمر هلأ عيلة ابو الياس مسيحية مو ؟
قمر:ايه
نهال:طب بحال فعلا كانو اهلك ،رح تغيري دينك؟
اطلعت فيا بعصبية
قمر:الا هالموضوع ما في مجال لنقاش فيه ،انا ما متل اي حدا ،انا مقتنعة بديني لانو انا يلي اخترتو بعد ما فهمتو منيح
بعد يومين كنت بالمطبخ عم اشتغل ،فاتت نهال لعندي
نهال:يلا غيري تيابك بدنا نروح
قمر:لوين؟
نهال:سيارة عمي ابو الياس ناطرتنا برا
قمر:نهال..
نهال:قمراذا ما رح تفوتي تغيري تيابك هلأ و نطلع سوا و نروح نخلص من الموضوع ولله لاترك الشغل عندك و بهاللحظة و عنجد عم احكي
قمر:هاي حياتي الخاصة و انا بقرر
نهال:لا ما بس انت بتقرري ،و انا كمان بقدر اخد قرار عنك وقت حسك عم تغلطي ،ما انت قلتي نحن اخوات و انا عم مارس دوري كأخت معك،يلا رح اسبقك و انطرك بالسيارة
بعد تردد ،شلحت المريول و فتت غيرت تيابي و رحت على المخبر و سحبت عينة دم انا و السيد جمال و سالنا عن موعد النتيجة و خبرونا انو بدا اسبوعين لتطلع ،مرو الاسبوعين انا و ايدي مربطين ،حتى شغل ما اعرف اشتغل حتى وليد انتبه علي و سالني عن حالي ،بس خبرتو انو تعب و ضغط شغل بس،حتى اجا موعد النتيجة و مر السيد جمال بسيارتو على المحل و طلعت انا و نهال و كان معو اولادو الاتنين الياس و جورج ،بقينا طول الطريق ساكتين باستثناء جملتين حكاهن السيد.جمال لاولادو
جمال:ما حدا فيكن بخبر امو بشي بكل الاحوال
الياس:اكيد بابا ،بدون ما تحكي
كنت متوترة و خايفة و نهال ماسكة بايدي و عم تشد عليا و تبتسم حتى وصلنا على المخبر و قعدنا بالممر و فات الياس يسأل عن النتيجة و طلع هو و شاب تاني لابس مريول ابيض
الشاب:التحليل باسم جمال خوري مو هيك؟
جمال:ايه ،خبرنا النتيجة بسرعة
فتح الظرف و طالع الورقة و نحن عيونا معلقة فيه
ااشاب:النتيجة… تطابق بنسبة 99،9 بالمية ….استاذ جمال هالمرة بدنا حلوان مرتب منك
سكتنا كلنا و نحن عم نطلع ببعض ،بعدين السيد جمال زت حالو على الكرسي ركضو عليه اولادو
الياس:بابا انت منيح ؟
حط ايديه على وجهو و صار يبكي و كل الناس يلي بالمخبر صارو يتفرجو علينا ،قعدو اولادو جنبو و صارو يهدوه و انا بقيت واقفة بمحلي متل قطعة التلج ،ايدي باردين و عم كز على اسناني،قام وقف بصعوبة و مشي باتجاهي و شدني لعندو هو و عم يبكي
جمال:كان حاسسني قلبي اني رح يجي يوم و لاقيكي ،انا وعدتا لامك و اليوم وفيت بوعدي
شفت نهاال عم تمسح دموعا هي و اولادو لابو الياس بس انا ما بكيت ،و لاحسيت بشي ،حسيت برودة جسمي وصلت لقلبي ،يمكن من الصدمة كانت اكبر من اني استوعبا ،طلعنا من المخبر بسيارة السيد جمال
جمال:ماريا ما بدك تشوفي امك؟
بقيت ساكتة كأنو ما عم يحكي معي،ردت نهال عني
نهال:اكيد عمي
نزلت من السيارة قدام بيت اهلي ،دفشتني نهال بايدا لاقرب اكتر ،اطلع فيني و ابتسم و حط ايدو على كتفي و مشينا ،سبقنا الياس و جورج و فتحو الباب و فاتو هن و عم ينادو امن
جمال:ماريا انت انطريني هون بس خبرا حتى تتهيئ نفسيتا بعدين انا بقلك ايمت تفوتي
فات ابي لجوا و بقيت انا و نهال واقفين برا ،قربت علي نهال
نهال:شبك ..لازم اطيري من الفرحة ،طلع اسمك ماريا
قمر:… (تبكي)بدي روح ..ما قادرة
مشيت خطوتين و ركضت وراي نهال ،مسكتني من ايدي ،سحبت ايدي منا
قمر:نهال خلص ،اتركيني ،الموقف صعب علي كتير
تركتا و مشيت بسرعة ،لحقتني هي و ساكتة و مستسلمة و انا عم ابكي ،قبل ما نطلع من باب حديقة البيت ،سمعنا صوت حدا عم يصرخ
_وينا ..وين راحت ..ليش تركتا تروح
فتحت الباب و طلعت و انا عم سكرو وراي،شفتا من بعيد عم تتلفت حوليا كأنو عم دور علي حتى لمحتني و ركضت باتجاهي ، انا ما عاد قدرت اتحرك خطوة ،حسيت رجلي انشلو و الزمن توقف او يمكن هلأ بلشت حياتي ،وقت لفتني هي و عم تبكي بصوت مخنوق ..وين كنت كل هاالسنين..ولله دورت عليكي واحترق قلبي ….
حسيت بحرارة عم تمشي بكل جسمي و احساس حلو مضاعف عن مشاعر الحب و فرحة النجاح و كل شي حلو مريت فيه قبل هاللحظة ما كان متلو،حسيت حالي كاني خطيت اول خطوة بالجنة
…يتبع
الجزء العاشر(الاخير):
الجزء العاشر:
التفتت على نهاال ما شفتا ابدا
ام الياس:يلا ماما خلينا نفوت لجوا ،في عنا حكي كتير بدنا نحكيه سوا،حكي عن عشرين سنة
خطيت اول خطوة ببيت اهلي و انا حاسة حاالي غريبة بيناتن ،شفت الياس و جورج واقفين جنب بعض و عم يطلعو فيني؛قرب الياس و لفني و بعدين بعد هو و عم يبتسم
الياس:انت ما بتتذكريني بس انا بتذكرك منيح ،كنت اكتر لعبة بتحبي لعبك فيا الغميضة
جورج: و كنت تعرفي تتخبي منيح احسن مني بكتير
لفني جورج و قرصني من خدي
جورج:و اخيرا اختي الدلوعة رجعت ،ما بدك تشوفي غرفتك ،بقيت متل ما هي ؛امك ما غيرت فيا شي
ام الياس:بس خلينا نقعد مع بعض و نعرف بالاول اختكن وين كانت كل هالسنين
فتت قعدت بغرفة القعدة انا و عم اطلع بالديكور و لفتلي نظري الصليب المعلق فوق الكنبة بس رجعت ركزت نظري بأمي يلي قعدت و حطت ايديا فوق بعض و ناطرة تسمعني هي و اخواتي و ابي ،كانو الكل عم يطلع فيني و ناطرني لاحكي عن حياة التشرد و الحرمان و الجوع يلي قضيتا و كان الحكي صعب علي كتير كأنو عم ارجع عيش بكل المحطات يلي مريت فيا ،خبرتن من اول لحظة انا وعيت فيا على الدنيا ؛كل اللحظات الحلوة و المرة يلي عشتا و عن كل الناس المناح و السيئين يلي التقيت فين بدربي حتى كانت امي تبكي و تمسح دموعا و انا صوتي يختنق بكل مرة اتذكر فيا اللحظات البشعة
ماريا:بس عماد و وليد و نهال الن فضل علي كتير ،كانو متل اهلي و عملو من حياتي جنة و عوضوني كتير
جمال:بس لو عماد ما تلاعب بعينة الدم ،كنا لاقيناك من سنة كاملة
ماريا:لو بيعرف الموضوع هيك ،اكيد ما كان تصرف بهالطريقة
ام الياس:المهم انو لقيناكي بالاخير ،صليت كتير للعدرا حتى ارجع اجتمع فيكي و ما ردتني خايبة ،من وقت ضعتي مني و انا ما غمضت عيني الا لاحلم فيكي ،دورنا عليكي كتير و نشرنا صورك بالجرايد و على الحيطان و حطينا مكافأة ل يلي بلاقيكي بس ما كان الك اثر
ابو الياس:و ام عبدو هلأ بالسجن؟
ماريا:ما بعرف اذا بعدا بالسجن لهلأ بس بتستاهل كتير
ام االياس:ما كنت بتخيل في عالم هيك الا بالافلام
ابو الياس:ايه ام الياس شو طابختيلنا على العشا ،اليوم يوم مميز
لفتني هي و عم تضحك و ينزلو دموعا
ام الياس:من فرحتي ايدي مربطين
طلعت انا و الياس و جورج على غرفتي على درج خشب ،فتت انا و عم اطلع بالتخت و الخزانة و الحيطان و الصور و الالعاب ،حسيت كل شي مألوف بالنسبة الي ،فتحت الخزانة و طالعت تيابي و تفرجت علين
الياس:ما كانت امك تغير فيا شي ،تفوت عليا و تسكر الباب على حالا و تقعد تبكي و تشم تيابك
راح جورج و جاب البوم الصور و قعد على التخت و قعدت انا و الياس جنبو من كل جهة
الياس :هاي صورتك بيوم تعميدك و هاي صورتك هون كان عمرك 6 شهور يمكن ،كنا نتقاتل انا و جورج مين بدو يحملك
ابتسمت انا و عم اطلع بجورج
جورج:هاي الصورة بتجمعنا نحن التلاتة هون ،هاي انا و هاي الياس و هاي انت ،كان عمرك 3 سنين و كنا وقتا طالعين على الضيعة لعند بيت جدك مع بيت عمك كمال
قعدو اخواتي يحكولي عن ذكريات كتير انا ما متذكرة منا شي ،بس كنت ابتسم على ضحكن حتى سمعت صوت امي من تحت عم تنادي ماريا ،ما اعطيت انتباهي للصوت ابدا
جورج:هاي امك عم تناديكي
ماريا:اه
اطلعو فيني و ضحكو
ماريا:ما متعودة على اسم ماريا لسا
الياس:بكرا منخليكي تتعودي و بسرعة
سبقوني اخواتي لتحت و انا بقيت قاعدة بغرفتي عم اتفرج على الصور ،بعدين شلحت حجابي و طويتو و حطيتو على التخت و نزلت لتحت ،شفتن قاعدين على الطاولة و ناطريني على العشا ،اطلعو فيني و ابتسمو
ام االياس:شعرك بعدو اسود متل الليل
ماريا:ايه مع انو كنت احلقو كتير
جورج:تغيرتي كتير وقت شلحتي الحجاب
سحبت الكرسي و قعدت
ماريا:كيف يعني تغيرت ؟
جورج:ما بعرف بس بينت ملامحك اكتر ،يعني صرتي حلوة اكتر
ابتسمت و بلشنا اكل
ام الياس:عجبك الاكل ماما ؟
ماريا:اممم طيب ،المرة الجاية رح دوقكن طبخي
ام الياس:الايامات الجاية كتيرة
ابو الياس:بس منخاف ما بقا يعجبنا اكلك يا ام الياس بعد ما ندوق اكل ماريا
ام الياس:ما الي زعلة
الياس:بس اليوم العشا اطيب من كل مرة ،ماما حاطة كل معلميتا فيه اليوم
ام الياس:حاطة كل شوقي فيه لبنتي حبيبة قلبي
الياس:خود بقا على دلال من يوم و رايح و نحن صرنا على الرف
ام الياس:ما حدا بحقلو يعترض ،بدي عوضا لماريا عن كل الدلال يلي فاتا
سهرنا للساعة 12 بالحديقة انا و اهلي و الياس و جورج عم ندردش سوا و امي قاعدة عم تطلع فينا و تبتسم كانو ما مصدقة جمعتنا ،فتت نمت على تختي و اول ما غفيت حسيت على ايدين امي عم تلعب بشعراتي و تغنيلي ،ابتسمت و لفيتا و نمت ،تاني يوم الصبح فيقني الياس لانزل افطر معن
جورج :شو مشاريعك اليوم ماريا ؟
ماريا:لازم ارجع على المحل ،شوف الشغل …
ام االياس:ايه ماما و جيبي تيابك كمان
ماريا:ايه انشالله و رح خبر وليد كمان و اعزمو على العشا لتتعرفو عليه
الياس:مين وليد؟
ماريا:خطيبي
ام الياس:انت مخطوبة؟
ماريا:ايه
ام االياس:يا عمري انا
قامت و بوستني هي و عم تحضن وجهي بأيديا
ابو الياس:اكيد لازم نتعرف عليه بس ماريا بكرا عنا مشوار لعند المحامي كرمال هويتك الجديدة
ماريا:ايه بروح طبعا
الياس:معناها بوصلك بطريقي ،و انا رايح على العيادة
جورج:و وصلوني على الجامعة بطريقكن و بعرفك على رفقاتي كمان
الياس:لا خليا ليوم تاني التعارف تبعك انت و رفقاتك
قمنا عن الاكل ،وقفت على المرية حط حجابي و اهلي واقفين وراي عم يطلعو فيني و ببعض و مية اشارة استفهام براسن ،ودعت امي هي و ماسكة فيني
ابو الياس:مريم شبك ،البنت راجعة
ام الياس:ما شبعت منا
الياس:لاحقة ماما
ماريا:ما رح طول ،رح شوف الشغل و جيب كام غرض من السوق و ارجع فورا ،اليوم رح تاكلو من اكلي
ام الياس:ناطرتك ما طولي و حكيني من الشغل و طمنيني عنك
وصلني الياس على محلي انا و بالسيارة ،شفت نهال عم تشطف قدام المحل و تسقي الوردات ،نزلت انا و الياس
ماريا_الياس:صباح الخير
انتبهت على وجودنا
نهال:قمر …
قربت علي و لفتني
نهال:توقعتك ما تجي اليوم ،قلت اكيد رح تبقي مع اهلك يومين ،تعارف يعني ههههه
ضحكت انا و اياها
ماريا:جاية شوي و راجعة ،تفضل الياس نشرب قهوة قبل ما تروح
الياس:ايه يلا
جابت نهال 3 فناجين قهوة و قعدنا سوا على طاولات برا المحل
ماريا:هيدا الياس اخي الكبير
نهال:ايه بعرفو ،صرت شايفتو اكتر من مرة ،ما انت يلي حضرنا حفلة تخرجك
الياس:ايه انا هو
نهال:ولله كانت حفلتك كتير حلوة ،انبسطنا كتير على طول اعمل هيك حفلة و اعزمنا
الياس:ههههه خلص تكرمي كل سنة رح اتخرج و اعملك حفلة
نهال:صحي من شو تخرجت؟
الياس:من الجامعة
نهال:اكيد من الجامعة ،بس قصدي شو كنت عم تدرس؟
الياس:انا دارس طب اسنان
نهال:ايييه حلو كتير
قربت علي نهال هي و عم تضحك
نهال:معناها رح صلح اسناني عندو و ببلاش
ماريا(بصوت عالي):ما احلاه ياخد منك و انت رفيقة اختو
اطلعت فيني و زورتني و انا ضحكت
الياس:لا اكيد ما معقول ،انت غالية على ماريا و كل حدا غالي عليا هو غالي علينا
نهال:تسلم خجلتني ولله ههههههه
ماريا:بس هي بالعادة ما بتخجل هههه
نهال:قمر ولو
الياس:دايما عالقهوة،انا بدي امشي على العيادة ،بشوفك المسا على العشا
ماريا:اكيد ،الله معك
فتت انا و نهال لجوا و حكتلا عن لقائي بأهلي و عن الوقت يلي قضيتو معن
نهال:و هلأ رح تصيري تنامي عندن مو؟
ماريا:اكيد بس اكلة همك كيف رح تنامي لحالك هون؟
نهال:ما تاكلي همي ،انا ما بخاف نام لحالي
سكتت نهال و دارت وجهها على الشباك
ماريا:في شي ؟
نهال:لا ابدا
ماريا:حاسة بتمك فيه حكي
نهال:ايه بس الموضوع تافه يعني
ماريا:احكي
نهال:مبارح اجا عمار و علقنا مع بعض
ماريا:ليش؟
نهال:لانو قلتلو ايمت رح تجيب اهلك و تخطبني ،اول الشي قال ما مستعد حاليا بعدين عصب و قلي انا فتحت الموضوع مع امي بس ما قبلت تاخدلي وحدة من الضيعة
ماريا:هيك قلك؟
نهال:ايه ،صدمني كتير و جرحني كتير ،تركتو و فتت على المطبخ و بعد ربع ساعة طلعت ما شفتو ،كان رايح و ما اتصل اعتذراو حتى برر
ماريا:ما بعرف شو بدي قلك
نهال:عادي انا تعودت على كل هالخيبات ،كل واحد بيعطيني جرح شكل بس هالمرة رح اتركو قبل ما يتركني و سكر قلبي
ماريا:طولي بالك بلكي بدو شوية وقت ليقنع اهلو
نهال:يا ريت قلي بدو وقت كنت تفهمت و نطرت بس حكى هيك و راح
فتت ضبيت تيابي بالشنتة و ساعدتني نهال
ماريا:اليوم رح شوف وليد و خبرو انو يجي عالعشا كرمال يتعرف على اهلي ،و من بعد بكرا برجع على الشغل نظامي
نهال:خدي وقتك ،ما عنا ضغط هلأ،بس الخميس عنا طلبية كاتو لحفلة خطبة
ماريا:لا ما تاكلي هم من هون للخميس بكون فضيت حالي و انت تروي بقصة عمار شوي
طلعت من المحل و رحت على شركة وليد ،فتت لعندو شفتو عم يشتغل عاللابتوب
وليد:وينك انت ،مبارح مريت عليكي ،قلتلي نهال انك عم تشتري شوية اغراض و نطرتك و ما رجعتي
ماريا:هلأ بحكيلك ،بس ضيفنا شي نشربو
وليد:ايه ما تكرمي
خبرتو كل شي لوليد هو و حاطط ايدو على خدو و رافع حواجبو
وليد:قمر عم تحكي جد الا عم تمزحي؟
ماريا:عنجد و اليوم ناطرينك عالعشا حتى يتعرفو عليك
وليد:ياللله عنجد ما بيتصدق،جمال خوري ابوكي !ما عم صدق ،قمر هدول مسيحية
ماريا:ايه
وليد:يعني انت كمان…
ماريا:لا انا رح ابقى متل ما انا
وليد:ها و ببالك رح يقبلو تبقي على دينك
ماريا:وليد هاي حياتي و انا حرة فيا و ما بعمل شي الا عن قناعة
وليد:انشالله
ماريا:انا رح امشي و ناطرتك المسا على العشا و بطريقك مر على المحل جبلي شنتاية تيابي
وليد:رح تنامي عندن !في شابين بالبيت
ماريا:ههههههه وليد هدول اهلي و الشابين اخواتي
وليد:طيب طيب بدي وقت لاستوعب القصة
مريت على السوق اشتريت اغراض للطبخ و رجعت على البيت ،استقبلتني امي بضمة و بوسة و فتت على المطبخ و لبست المريول و غسلت الخضرة و بلشت طبخ و امي قعدت على الطاولة ،المسا حطيت الاكل على الطاولة و ساعدتني امي و اخواتي الياس و جورج
جورج:الريحة بتاخد العقل
الياس:مطول وليد ليجي؛عصافير بطني عم تغرد و تزقزق
رن الجرس
ماريا:ها ..اجا
جورج:يلا انا بفتح
راح جورج فتح الباب بس طلع عمي كمال و مرتو ،فاتو سلم علي و قعدو ،بعدين رن الجرس و راح الياس فتح الباب ،بعدين اجا و معو وليد ،كان وليد متلبك كتير ،سلم على الكل و قعد مع عمي و ابي يلي حاصرو بأسئلة كتير عن شغلو و عيلتو و عن طموحو ،بعدين عزمتن على الاكل ،قام الكل على الطاولة و انا اخترت الكرسي يلي جنب وليد و خاصة انو حسيتو ما مرتاح
الياس:الاكل كتير طيب ،يسلم ايديكي ماريا
ماريا:صحة وهنا
كمال:بس ناقصا السفرة نبيت
ابو الياس:صح ،يلا رح جيب
قام بابا على المطبخ و رجع معو قنينة ،فتحا و صب كاسة لعمي كمال و بعدين قرب على وليد و صبلو كاسة و مد ايدو ليعطيه اياها ،تلبك وليد و احمر وجهو
وليد:انا بعتذر انا ما بشرب هيك شي
اطلع فيني و كمل كلامو
وليد: و لا حتى قمر بتشرب
الكل اطلع بوليد كانو حكى شي غلط و كانو بهاللحظة بين الشرخ الكبير بيناتنا ،سكت البابا بعدين اعطى الكاس لالياس ،حطيت ايدي على رجلو لوليد من تحت الطاولة و قربت لعندو و همست بأدنو
ماريا:عادي بتصير
وليد:اممم
بعد ما خلصت السهرة ،طلعت مع وليد لوصلو على الباب و قفت معو شوي
ماريا:شو رايك باهلي؟
وليد: ما رح قول غير انو انا بحبك الك و انا االي فيكي
ماريا:شو بفهم انا هيك
وليد:قمر انا بحترم كل الاديان بس كمان بحب يلي بيحترم ديني و ابوكي تصرفو غلط ،على الاقل كان فينو يأجل الشرب هو و العيلة لبعد ما انا اطلع من عنكن
ماريا:هن شافو الموضوع عادي ،يعني عندن المشروب ما محرم متل عنا
وليد:نحن شربو و حتى النظر الو حرام
ماريا:لا ما لهل الدرجة
وليد:انا برأيي نعجل شوي من زواجنا لتطلعي من هون بأسرع وقت
ماريا:وليد شبك محسسني كانو اهلي معن وباء خطير و خايف انعدي منن
وليد:انا فعلا خايف يأثرو فيكي و تبلش القصة بعادي متل ما هلأ حكيتي و بعدين تصيري متلن شوي شوي و اخسرك
ماريا:لا اله الا الله
وليد:محمد رسول الله
ماريا :قلتلك ديني كان عن قناعة و ما ممكن يتزعزع ابدا ،انا متفهمة دينن و هن متفهمين ..يعني هيك واضح لحد الان
وليد:لحد الان!طيب هلأ تصبحي على خير
ماريا:لحظة
وليد:ايه
ماريا:بدي اسالك سؤال
وليد:تفضلي
ماريا:لو انا صرت مسيحية انت رح تتركني و رح تخسرني متل ما هلأ حكيت
وليد:….
ماريا:سكتت
وليد:لا ما قصة سكتت ،بس لو بعرف انك مسيحية من الاول ما كنت تقربت منك وتورطت و حبيتك ،و حتى لو حبيتك و انت مسيحية كنت رح ابقى وراكي حتى اقنعك و تأسلمي ،انت بتعرفيني قمر منيح انا كل شي عرفتو عنك تقبلتو و حبيتك بكل الظروف يلي عشتيا و الاهم اني اقتنعت فيكي لانو القناعة اهم من الحب عندي ،الا هالموضوع اكبر مني و منك ،هاي عقيدة و ما بينلعب فيا ،انا بدي اولادي يربو متل ما انا ربيت على دين الاسلام و هلأ تصبحي على خير
ماريا:و انت من اهلو
سكرت الباب و فتت ،قعدت مع اهلي شوي و سألتن عن رأين بوليد ،اطلعو ببعض و ما حدا حكى غير امي
ام الياس:ماريا اذا انت بتحبيه و بدك اياه؛نحن ما مهم رأينا ،المهم انك مبسوطة و متفاهمة معو
تاني يوم الصبح رحت انا و ابي لعند المحامي و وقعت على اوراق كتير ليبلش يشتغل بهويتي الجديدة باسم ماريا خوري ،طلب مني صور و نزلت اتصور عند اقرب مصور ،وقفت زبط حالي على المرية و بابا واقف وراي
ابو الياس:بدك تتصوري بالحجاب؟
ماريا:ايه طبعا
قدمنا الصور و رجعت على البيت لعزل غرفتي و ضب تيابي ،فاتت ساعدتني امي هي و عم تحكيلي عن طفولتي حتى مسكت بايدا حجاباتي ،حطتن بحضنا و قعدت على التخت
ام الياس:ماريا بعرف الحكي ما وقتو هلأ و لسا بكير
ماريا:احكي ماما
ام الياس:انت رح تبقي هيك؟
ماريا:كيف يعني هيك ؟
ام الياس:رح تبقي مسلمة،انا خايفة هالشي يعمل شرخ بينك و بين اخواتك
ماريا:ماما انا بعرف هالموضوع رح نحكي فيه اول ولا عن اخر ،لهيك خلينا نحكي فيه هلأ و ننهيه ،انا رح ابقى مسلمة و ما رح غير ديانتي
ام الياس:بس الوحدة بتتبع اهلا و نحن اهلك ،لازم تكوني وحدة مننا تحتفلي باعيادنا و تشاركينا عاداتنا ،انا ما عم اطلب منك تصيري مسيحية فورا لانو الموضوع صعب و بدو وقت بس يعني اعطي حالك فرصة …
قمر: ليش ما انتو بتعطو حالكن فرصة و بتعتنقو الاسلام
ام الياس:لا طبعا ،مستحيل هالشي و لو حتى تفكير
قمر:نفس الشي بالنسبة الي ،شي من المستحيل و خلينا نتعايش مع بعض هيك و نحترم اختلافنا
هزت براسا
ام الياس:متل ما بدك ،انا ما فيني اجبرك على شي،المهم انك بيناتنا و الزمن كفيل بكل شي
رجعت على شغلي بحماس كبير ،و خلصنا طلبية الخميس كاملة و نطرنا شاب الدليفري رائد ليجي يوصلا
ماريا:انت وصلي الطلبية معو و انا رح رتب المحل و سكرو ،بدي روح عند اهلو لوليد شوي
نهال:ماشي
مريت عند اهلو لوليد ،حسيت استقبالا لحماتي كان بارد كتير على غير العادة ،استأذنت و راحت تصلي و تركتني لحالي ،بعد شوي اجا وليد و تفاجئ بوجودي
وليد:وين امي؟
ماريا:جوا عم تصلي ،انت مخبرة لامك عن اهلي
وليد:اي طبعا
ماريا:ايه شو قالت؟
وليد:ما حكت شي
ماريا:بالله!
وليد:حكت شوي يعني،خافت تتبعي اهلك بس انا طمنتا انو انت عقيدتك قوية
فاتت حماتي هي و عم تسبح بالمسبحة و تستغفر ربا و حسيتا عم تتجاهلني كتير بس وليد كسر الجو المتوتر شوي بحكيو
ماريا:ايمت مرة عمي رح تشرفينا بزيارة ،اهلي حابين يتعرفو عليكي
ام وليد: الله يقدم يلي فيه الخير .
وليد:انشالله عن قريب قمر
طلعت من عند بيت حمايي انا و مدايقة ،وصلني وليد على البيت نحن و عم نحكي
وليد:معلش ما تزعلي منا ،بدا شوية وقت كمان
ماريا:كل شي بدو وقت ،كل شي بدو وقت ،اووف
فتت على البيت و شفت عنا ضيوف ،بيت عمي كمال و اولادن ،بنت و شاب ،كانت تاني مرة بشوفن بعد الحفلة ،سلمو علي و قعدو معي
جوري:انبسطت كتير انو صار عندي بنت عم من عمري ،رح نتلسى كتير مع بعض
جوني: احكيلنا كيف لقوكي بيت عمي؟
ما كان الي جلادة كتير بالحكي لانو كنت متدايقة كتير من امو لوليد و كان بدي حدا ينقذني من القعدة حتى رن الجرس و قمت فتحت بسرعة و طلعت نهال بوجهي ،لفتني هي و عم تبكي
نهال:طلعت الطلبية لخطبتو لعمار
ماريا:شو …يالله …فوتي فوتي
طلعت انا و اياها على غرفتي و سكرت الباب
نهال:بعد ما فوتت الكاتو على مطبخ الصالة و طلعت ،وقفنا نتفرج على العرسان هن و عم ينزفو و شفتو ماسك ايدا للعروس و لابس تياب رسمية ،كنت رح اوقع بالارض من الصدمة ،قربت بين المعازيم حتى انتبه علي و تلبك و دار وجهو فورا ..
ماريا:بلكي كانت الخطبة لاختو و هو يلي زفا
نهال:لا انا سالت وحدة من المعازيم عن اسم العريس و قلتلي اسمو ..ليش هيك حظي(تبكي)
ماريا:نهال طولي بالك ،ما بيستاهلك
نهال:و انا بستاهل يصير فيني هيك ،بس انا ما سكتلو
ماريا:شو عملتي؟
نهال:نطرتن ليدخلو الكاتو على الصالة و فتت و هن عم يقطعوه و قلبتو عليه و على خطيبتو و هربت
ماريا:عم تمزحي!
نهال:لا ما عم امزح …(تبكي)كنت مقهورة كتير الله لا يسامحو و لا يوفقو و انشالله ما بيتهنى هالكذاب الندل
ماريا:يا حرام على قالب الكاتو ههههههه،ما ضيعانو ،اديش اشتغلنا فيه و تعبنا
نهال:ههههههه هيدا انت يلي زعلتي عليه ،على قالب الكاتو
ماريا: لا يوووه ،ولله قهرتيني كتير ،ما توقعتو هيك
اندق باب غرفتي و قمت افتح الباب ،شفت الياس بوجهي
الياس:ليش قاعدة لحالك ،عنا بيت عمك،انزلي
ماريا:عندي نهال
الياس:بالله
مد راسو و سلم عليا و هي تلبكت و مسحت دموعا ،غمزني الياس و انا اشرتلو بعيوني يروح هلأ ،بعد شوي طلع هو و حامل بايدو صحنين بوظة ،اخدتن منو و رجعت لعند نهال
ماريا:ابقي نامي عندي اليوم
نهال:لا ما بدي ،شو بدي قول لامي هلأ ،هاي تاني تجربة فاشلة الي ، وكل مرة بقول لقيت نصيبي بيرجع يهرب ،ليش عم يهربو مني !
ماريا:هههههه
نهال:ما ناقصتك ها ،ما تضحكي
ماريا:طيب ههههههه وللله ما بايدي ،بس غريب وليد ما جبلي سيرة ابدا انو عمار خطب
بقيت نهال نامت عندي ليلة الخميس و نزلنا سهرنا شوي مع اهلي لتتعرف علين نهال ،قرب علي الياس
الياس:ليش كانت عم تبكي نهال ؟
ماريا:لانو ….و انت شو دخلك صحي
الياس:فضول بس ،عنجد ليش كانت عم تبكي ،انقهرت عليا لا اراديا ،انا قلبي ضعيف كتير قدام الدموع
ماريا:هههههه دخيل قلبك ،طب سليا شوي لقوم صلي العشا و برجع
صليت و رجعت ،شفت الياس عم يدردش مع نهال ،قعدت جنب امي و بابا
ابو الياس:ماريا شو رايك باولاد عمك؟
ماريا:مناح
ام الياس:شو رأيك بجوني ؟
ماريا:من اي ناحية يعني؟
ابو الياس:يعني شاب مرتب و ناجح ،ابوه معتمد عليه بكل شي
ماريا:ايه منيح الله يوفقو و يحميه
اطلع البابا بأمي و بعدين وجه نظرو لعندي
ابو الياس:خبرتيا لامو لوليد انو حابين نتعرف عليا
ماريا:..ايه …خبرتا
ام الياس:ايه و ايمت رح تشرفتا بزيارتا؟
ماريا:عن قريب لنحدد موعد العرس
ابو الياس::العرس ؟بهاالسرعة
ماريا:النا سنة مخطوبين انا و وليد
ابو الياس:وين رح تسكنو؟
ماريا:وليد عندو بيت صغير الو فترة عم يعملو صيانة و خلص ،بقي العفش بس
ابو الياس:بس نحن ما تعرفنا عليه منيح لهلأ
ماريا:مع الوقت بابا بتتعرفو اكتر،شاب كتير منيح و مؤدب
ابو الياس:طيب انا قايم نام ،عندي شغل بكرا و انتو يا اولاد ما طولو بالسهرة
ماريا: نحن عنا عطلة بكرا …بكرا الجمعة
ابو الياس:اه …نسيت
بقيت سهرانة انا و نهال بالحديقة و عم نحكي
ماريا:حاسة حالي وقعانة بين الاتنين ،و ما بقدر كون مع هون و لا مع هون ،هدول اهلي و هيدا الشخص يلي انا بحبو و مرتاحة معو ،خايفة يصير حساسيات بكل مناسبة و بكل موقف ،ما توقعت الامور صعبة لهل الدرجة
نهال:انا شايفتا سهلة و خاصة انو انت و وليد نفس الديانة ،يعني ما في اختلاف حقيقي بيناتكن و الباقي هين و بحلو الوقت و بتتأقلمو
ماريا:انشالله ،عم تشوفي عماد صحي؟
نهال:لا ابدا
كل يوم عن يوم عم تكتر التفاصيل يلي بتبعد المسافة بيني و بين اهلي و عم يزيد تدخلن بحياتي و عم يحاولو يبعدوني عن وليد و يجمعوني مع ابن عمي جوني حتى اجت امو لوليد زيارة عند اهلي كرمال نحدد موعد العرس و قعدت ساعة عناو طلعت بدون ما تاخد منن كلمة و هن عم يماطلو بتحديد الموعد و كتب الكتاب عند الشيخ بس كل محاولاتن كان طريقا مسدود عندي ، كل ما يحاولو يبعدوني عن ديني انا اتمسك فيه اكتر بس الشي يلي زاد الطين بلة وفجر البركان يلي جواتي ، وقت كنا عم نتعشى و اعطاني البابا هويتي و قرات المعلومات الشخصية وشفت خانة الديانة
ماريا:انا ما مسيحية …انا ما مسيحية ..افهمو بقا
زتيت الهوية على الكنباية و طلعت على غرفتي انا و عم ابكي ،ضبيت تيابي بالشنتا و نزلت ،شافتني امي انا و عم اسحب شنتايتي لبرا ،قامت بسرعة و صارت تبكي
ام الياس:وين رايحة انا ما صدقت ايمت لقيتك
ماريا:انت لهلأ ما لقتيني ،و لا انا لقيت اهلي
الياس:ماريا لوين بدك تروحي ،طولي بالك خلينا نحكي
ماريا:حكيت كتير بس انتو ما عم تسمعوني ،صادفت كتير ناس بحياتي و تقبلوني متل ما انا ،اما انتو ما تقبلتوني و بدكن تخلقو مني انسانة جديدة ، وعم ترسمولي طريق و لازم امشيه ،ما عم تتركولي حرية الاختيار بشي
ابو الياس:نحن بدنا اياكي تصيري وحدة مننا
ماريا:انا وحدة منكن بس ما متلكن ،اختلافنا بسيط و انتو عم تكبروه كل يوم ،انا ما بدخل فيكن وقت بتروحو على الكنيسة كل يوم احد و بتصلو و لا وقت بتشربو و لا كيف بتطلعو ،انا فهمانة الفرق و متقبلتو لانو المشاعر و المعاملة اهم شي
سحب جورج من ايدي الشنتا
جورج:طيب خلص فوتي و ما بقا رح نزعجك بشي
ماريا:لا بدي ارجع للمحل يلي كنت فيه مرتاحة و حاسة حالي بين اهلي ،انا ما ارتحت بيناتكن ،عم تطلعو فيني كاني غريبة و دخيلة عليكن و عم المحكن عم تتهامسو من وراي و حتى عم تحبكو خطط كمان لتغيروني
ام الياس:ماريا ما تحكي هيك ،نحن اهلك و منحبك
ماريا:بالهوية و بالدم بس ،بس ما وقفتو جنبي بأي شي لهلأ ،يا ريت لو بقيت ضايعة
فتحت الباب و طلعت و امي عم تناديني ،بقيت عم اركض حتى اطلعت على الشارع وقفت تكسي و رحت على المحل ،فتحتلي الباب نهال
نهال:قمر ..شو جابك بهالوقت؟
ماريا:تعبانة و مخنوقة من كل شي،حابة نام و ما ارجع فيق حابة فوت بغيبوبة شي كام سنة
نهال:يا لطيف ،شو يلي صار؟
ماريا:ولاشي…ولاشي
قعدت عم القط نفسي و اشلح حجابي ،اندق الباب ،قامت نهال فتحت الباب و رجعت و وراها الياس ،اطلعت فيه و نفخت
ماريا:الواحد ما بيعرف يلاقي منفس منكن
الياس:لا ،لانو نحن متل الهوا يلي بتتنفسيه ، لك نحن متل جلدك ،شفتي حدا شلح جلدو
ماريا:بعتتك امك؟
الياس:ما حدا بعتني ،انا جيت لحالي لقلك انو انا معك و بصفك و انت بتعرفي انو انا ما ادخلت فيكي او مليت عليكي شو تعملي
ماريا:بالظاهر بس و بالباطن عم تتفق انت و الباقي علي
الياس:لا و العدرا و انا مستعد لاي شي لاثبتلك موقفي ،و اذا بدك هلأ بتفق انا و وليد على موعد العرس و بكتب كتابك عند الشيخ
ماريا:و اهلك ؟
الياس:منحطن تحت الامر الواقع
اطلعت نهال بالياس و هزت براسا
نهال:ولله ،بدك تحدد موعد العرس لحالك من غير علم اهلك !
الياس:ايه!
نهال:و تكتب كتابا كمان!
الياس:ايه!
نهال:سمعتي اخوكي شو بدو يعمل!
ماريا:سمعت نهال
نهال:و انت شو رايك؟
ماريا:موافقة
الياس:عندك حل تاني انسة نهال؟
نهال: طب اقنعن بهالحكي يلي عم تقولو ما ازبط من المشاكل
الياس:و مين قلك اني ما حاولت بس اهلي رافضينو تماما لوليد لانو من غير دينا و هن حاطين براسن انو ماريا رح تغير ديانتا بعد فترة
ماريا:ها سمعتي
نهال:ما بعرف
الياس:انت نامي هون االليلة و ما تقبلي ترجعي على البيت حتى يقبلو يحددو موعد العرس و انا بخبرك اول باول بشو عم يفكرو بس ما تحكي لحدا انو عم وصلك الحكي و الا ببطلو يحكو قدامي شي
نهال:ها يعني رح تشتغل جاسوس ههههه
الياس:هههههه هيك شي
بقيت نايمة بالمحل اسبوع ،كان الياس يمر عندي كل صبح نشرب القهوة سوا انا و اياه و وليد و نهال ،يخبرنا باخر المستجدات و يتابع على عيادتو
وليد:برأيك اهلك رح يرضخو و يقبلو ؟
ماريا:ما بعرف بس حكي الياس اليوم فائلني شوي
وليد:يا ريت تزوجنا من زمان و امي و اختي بلشو يضوجو من التاخير من طرفكن
ماريا:معلش وليد مننطر لسا شوي
وليد:متل ما بدك ،و انت بتعرفي انو ما حابب انو نتزوج من غير وجود اهلك
بقيت اسبوع تاني من غير ما شوفن و انا ناطرتن ليتنازلو و يصالحوني و هن ناطريني لارجع على البيت حتى اجت امي لعندي ،فاتت نهاال لعندي على المطبخ هي و عم تبتسم
نهال:قمر امك برا
ماريا:امي انا !يلا طالعة
شلحت المريول و طلعت ،استقبلتا ببرود كتير
ام الياس:ما توقعتك قاسية لهل الدرجة ،ما اشتقتيلنا ؟
ماريا:اشتقتلكن بس ….
قعدت انا و عم العب بمكعبات السكر
ام الياس:انا موافقة على زواجك من وليد بس ابوكي عم حاول اقنعو و ما عم يقتنع و ما بدي اياكي تتزوجي من غير موافقتو ،حابب يزفك بايدوويشوفك بالابيض و يفرح فيكي متل اي اب
ماريا:اكيد ماما ،مستحيل اتزوج من غير موافقتو
ام الياس:طب ارجعي على البيت
ماريا:ما رح ارجع الا لاطلع منو عروس لخطيبي ،هيك وعدتو لوليد ،امي ولله وليد منيح و وقف جنبي كتير و بدونو انا ما قدرت اعمل شي و لا قدرت افتح هالمحل و لا حتى التقيت فيكن ،هو يلي لفت نظري على القرض و ساعدني بتجهيز المحل و وسعلي شغلي و دعمني ،هو ايدي اليمين بكل شي
ام الياس:نحن ما اعتراضنا عليه كشخص …..المهم انا رح حاول اقنع ابوكي و انت حركي حالك كمان
ماريا:طيب
طلعت امي من عندي و غيرت تيابي و رحت على محل االبابا انا و حاطة برناطة و لابسة نظارات سودا ،فتت شفتو عم يبيع زبون و جورج واقف جنبو ،ركز فيني جورج هو و عم يميزني ،نزلت النظارات شوي و غمزتو ،ابتسم و سكت،قعدت على الكرسي و نطرتو لخلص و طلع الزبون من عندو ،بعدين قمت وقفت و قربت على الواجهة انا و عم اطلع بالقطع
ابو الياس:شو طلبك يا انسة؟
ماريا:بدي اخد قطعة دهب ،يعني هدية لرجال بس محتارة شو هي ؟
ابو الياس:شو عمرو؟
ماريا:بال 55 سنة
ابو الياس:فيكي تاخديلو ميدالية دهب بعلق فيا مفتاح السيارة
ماريا:فكرة حلوة بس حابة غير هيك ،بلاقي مشبك كرافيته من دهب
ابو الياس:ايه طبعا عنا هيك شي ،جورج فرجيا للصبية القطع الموجودة عنا
فتح جورج قدامي علبة هو و حابس ضحكتو ،حطيت اصبعتي على قطعة
ماريا:هاي احلى شي
ابو الياس:و اغلى شي
ماريا:انا بدي اياها اغلى شي لاني اخدتا لشخص غالي كتير ،وزنلي اياها و شفلي شو سعرا
حطا على الميزان و وقف يحسب سعرا على الالة الحاسبة
ابو الياس:هاي 500
ماريا:تمام ،بدي تحفرلي عليا اسمي و اسم الشخص يلي بدي اهديه القطعة
فتح الدرج و اعطاني ورقة و قلم
ابو الياس :اكتبي هون الاسماء و بترجعي بكرا بتاخدي القطعة
مسكت القلم و كتبت جماال خوري و رسمت قلب حب صغير و جنبو اسمي ماريا خوري و فتلت الورقة لجهتو
ماريا:هاي الاسماء
مسك الورقة و قرأ الاسم انا و عم اطلع بعيونو و ملامح وجهو ،حط الورقة على الطاولة و اطلع فيني و ابتسم ،شلحت نظاراتي
ابو الياس:يعني ما بس عنيدة و بتعرفي كمان كيف تضحكي على الواحد
ماريا_جورج:هههههه
ماريا: جورج انت احفر الاسماء على الميدالية
ابو الياس:لا غالية كتير عليكي
ماريا:بس ما غالية عليك ،رح اخدا
ابو الياس:و شو بدك مقابل هالهدية؟
ماريا:له يا بابا ،ما بدي مقابلا شي ابدا؛يعني ما بصير البنت تتذكر ابوا بهدية ممكن تلزمو لمناسبة بالايام الجاية
ابو الياس:اي ها اظهر و بان عليك الامان ،قدمتي الطلب فورا من تحت الطاولة
ماريا:هههههه ما طلبت شي ،انت حكيت لحالك،يلا انا بدي ارجع على المحل و بكرا بجي باخد القطعة
جيت لاطلع ،ناداني
ابو الياس:ماريا ،انت بنتي الوحيدة و لوعتي قلبنا عليكي ،جيبي وليد اليوم و تعشو عنا
ماريا(مبتسمة):ماشي
مر وليد علي المسا و رحنا لعند اهلي؛استقبلونا و رحبو فينا بحرارة ملحوظة ،و حددنا موعد العرس بنهاية الشهر و طرنا من الفرحة انا و وليد ،و بلشت حضر للعرس و اعزم المعارف ،رحت لعند عماد على المعرض لاعطيه كرت الدعوة لمرتو و لامو
ماريا:ليش ما عاد شفتك بعد اخر مرة
عماد:انشغلت بسوزي ،عملت عملية زراعة اجنة بس كنت عم تابع اخبارك من كمال و فرحت كتير وقت سمعت انو لقيتي اهلك
ماريا:ايه شو صار مع سوزي؟
عماد:ناطرين ،الحمل ضعيف و عم تاخد مثبتات
ماريا:الله يتمملا على خير
شغل سيجارة و صار يدخن بعصبية
عماد:هاي تالت مرة بتعملا ،لنشوف اذا رح يمشي الحال هالمرة
ماريا:عندي احساس كتير انو هالمرة رح تزبط انشالله
عماد:انشالله
ماريا:يعني ما رح تحضر عرسي ؟
عماد:لا ما رح تقدر بس اكيد امي بتجي
ماريا:اهلا و سهلا فيا ،اذا بيثبت حملا لسوزي ،الحلوان على حسابي من المحل
عماد:يا رب
طلعت من عندو انا و زعلانة عليه لانو كان مهموم كتير و رجعت لعند نهال على المحل ؛شفتا واقفة برا و حاملة سطل مي و قبالا عمار ،و سمعت صوتا عم تعلق معو
نهال:روح من هون و ما بقا بدي شوف وجهك
عمار:اعطيني فرصة لاحكي بس
نهال:ما بدي اسمع شي منك بعد االشي يلي شفتو ،انت جرحتني كتير
قربت و سلمت علين
ماريا:كيفك عمار؟
عمار:اهلين قمر ،سمعت رح تتزوجي انت و وليد اخر الشهر
ماريا:ايه انشالله
عمار:مبروك سلفا
ماريا:الله يبارك فيك ،تفضل اشرب فنجان قهوة
نهال:قمر بربك عم تعزميه بعد ما عمل فيني هيك
ماريا:انا عم اعزمو لنسمع منو ليش هيك عمل
فتت لجوا و لحقني عمار هو و عم يعلق مع نهال
ماريا:نهال جيبيلنا قهوة
نهال:رح جبلك قهوة الك و اما انت ما رح جبلك شي
ماريا:نهال خلص بلا ولدنة
فاتت نهال لجوا
عمار:مجنونة هالبنت،حكتلك شو عملت فيني يوم الخطبة و كيف قلبت الكاتو علي
ماريا:ايه حكتلي و زعلت كتير على الكاتو لانو تعبنا فيه كتير
عمار :هلأ هيك انت طلعي معك كمان
ماريا:بس ما متل يلي طلع معك انت ،فعلا انصدمنا فيك حتى وليد ما كان بيعرف بخطبتك
عمار:لانو انا ما بدي حدا يعرف و يوصل الخبر لنهال لانو القصة كلها كانت مسالة وقت ، سايرت امي بالخطبة و كارهت باللبنت حتى خليتا هي يلي تترك و تبطل بس ما كنت عارف انو بيت حمايي موصين على الكاتو من عنكن لسوء الحظ
ماريا:بكل الاحوال يلي عملتو ما كويس لا بحق نهال و لا بحق البنت يلي خليتا تكرهك
عمار:ما كان عندي حل تاني ،امي ما بدا نهال لانو بنت ضيعة بس انا بحبا و هي ما عم تستوعب هالموضوع ،لك ما اعطتني فرصة لاحكي ،كانت عم ترشني بالمي من شوي قبل ما تجي
ماريا:هههههههه
عمار:مجنونة ،ما فيا مخ
ماريا:ليكا اجت ،هس
ضيفتني القهوة و حطت الفنجان بعصبية قدام عمار و وقفت تكتفت و صارت تهز برجلا
ماريا:خلص اقعدي و اهدي
نهال:ما بدي
ماريا:المهم يا عمار اذا ما لقيت حل للمشكلة ليش جاي ؟
اطلع بنهال و شرب اول شفة بقهوتو و بزقا لا اراديا
عمار:شو حاطتيلي فيا ؟
نهال:سم
تركتنا و فاتت على المطبخ
عمار:العمى ولو شو سماوية ،هدول جماعة برج العقرب و العياذ بالله ،اذا بتغلط معن غلطة ،روح انتحر ازبطلك من انو يغفرولك
ماريا:هههههه طول بالك و انت ما غلطت اي غلطة كمان
عمار:توقعت كون هيك عم لاقي حل بس طلعت عم ابرم حولين حالي ،المهم اقعدي حكيا لهل المجنونة و هديا و فهميا اني انا بحبا و بدي اياها ….
ماريا:و امك ؟
عمار:انا تركت البيت من اسبوع
ماريا :اووف
عمار:ايه ،هاي الحركة قلي عليا وليد ،قال انت هيك عملتي و انا رح جرب كمان هههههه
ماريا :واذا ما مشي الحال ؟
عمار:وقتا رح نتزوج حتى لو اهلي ما وافقو بس ما بعرف اذا اما لنهال بترضى فيني من غير اهلي
ماريا:لا ما بظن
عمار:انا يلي علي رح اعملو و ما رح اترك شي الا اعملو بس انت حكيا لنهال و خليا تخف سما شوي،بهدلتني عالاخر و انا ولله ما بستاهل
فتت لعند نهال بعد ما راح عمار و حكيتا لهديت شوي
نهال :بس ما رح حكيه و اعطيه وجه الا لشوفو عمل خطوة جدية
ماريا:طيب ؛اتصرفي برياحتك
مرت الايام بسرعة انا وعم حضر لعرسي و نهال عم تكون معي بكل خطوة ،حتى وقت فتت لاشتري الفستان ،كانت معي و فتت قست انا و اياها كل وحدة مننا فستان ، رقصنا و ضحكنا سوا كتير بغرفة المقاس ،يوم عرسي قبل ما انزل من بيت اهلي ،لبسني البابا طقم دهب عليه اسمي و كنيتي و انا علقتلو المشبك على الكرافيته هو و عم يدمعو عيونو
ابو الياس:جيتي و رحتي بسرعة
ام الياس:ما لحقنا نشبع منك
ماريا:كأنو مسافرة او رايحة و ما بقا راجعة ،كل يومين بطل عليكن
ام الياس:الله يسعدك حبيبة قلبي
وصلنا على الصالة و مشينا انا و بابا بالممر حتى سلمني لوليد و فتنا على الصالة ،بس باخرة العرس فاتو اخواتي الياس و جورج لبسوني اسوارة كل واحد منن و رقصت معن شوي ،بعد زواجي بأشهر نزلت انا و وليد و بابا و ثبتت زواجي بالمحكمة بعد ما عدلت هويتي و حطيت خانة الديانة مسلمة ، بعد زواجي ب 3 شهور زارني عماد بالمحل و معو بوكيه ورد ،كان مرتاح كتير و وجهو مليان و ابتسامتو واضحة
ماريا:رح خمن لحالي؛سوزي بقيت حامل
عماد:ايه و على اول االشهر بتفوت بالخامس و وضعا تمام لحمدلله
ماريا :لحمدلله رح رتبلك علبة حلو على ذوقي و علبة مخصوص لامك هههههه
عماد:هههههه كنت حابب سوزي يثبت حملا بس كرمال يرتاح راسي من نق امي
ماريا :الله يقوما بالسلامة
عماد:عقبالك
ماريا:امين
نهال و عمار خطبو بعد زواجنا بفترة بسيطة و اول ما عرف اخي الياس حسيتو انزعج شوي
الياس:كانت بتحبو يعني ؟
ماريا:ايه
الياس:الله يسعدا
ماريا:كنت معجب فيا مو هيك
الياس:ايه هيك شي
ماريا :بس صدقني هيك افضل الك و الا ،اكيد بتعرف راي اهلك بالموضوع
الياس:اكيد بس كنت مستحضر لهل الشي،يلا الله يسعدا
تحسنت كتير علاقتي مع اهلي بعد الزواج ،انا صرت عايدن باعيادن و اخدلن هدايا ،احيانا روح لحالي و احيانا يجي وليد معي يلي تحسنت علاقتو معن بالتدريج و بالمقابل هن يعايدوني بأعيادنا و تفهمو عاداتنا ،بعد شهرين فاتت عندي نهال على المطبخ انا و علما للصبية الجديدة بالشغل كيف تعجن عجينة السينابون لانو كنت حامل بهديك الفترة و وقفت شغل
نهال:قمر في واحد برا ما عم افهم عليه شو بدو ؟
ماريا:مين هادا ؟
نهال:تعي شوفيه
طلعت ورا نهال حتى وصلنا على طاولتو
ماريا:شو طلبك ؟
_ببببببدي كككككككااتو بششششوكلا
التفتت على نهال
ماريا:بدو كاتو بالشوكلا ،بس الشاب بتأتئ
فتلت ضهري لارجع على المطبخ ،رجعت اطلعت بالشاب
ماريا:انت باسل المتأتئ؟
باسل:اااايه
ماريا:اكيد ما عرفتني
سحبت الكرسي و قعدت معو و هو عم يطلع متفاجئ فيني
ماريا:انا قمر
باسل:مممممين قمر….ااااه قمرررر ….كنت تبببيعي بسكككوت عندد ام عبدددو
ماريا:ايه انا هي
ابتسم ابتسامة طفولية خجولة
ماريا:شو اخبارك ؟
باسل:مممنيح ،بتششتغلي هووون؟
ماريا:ايه ،المحل الي
باسل:عععنجد ،مممبروك
ماريا:الله يبارك فيك ،شو عم تعمل هالايام؟؟
باسل:انااا عم اشششتغل مع عمممر،عرففتيه؟
ماريا:ايه
باسل:الللتقينا بالصددفة ،كنا عم ناااكل بالصدفة فلااافل من المحل يلي كنا ناااكل منو نحن و صغاار ،بتتذكري
ماريا:ايه معقول انسى
باسل :و شغلني عنندو
ماريا:شو اخبارو عمر؟
باسل:مممنيح ،تزووج مممن شهر
ماريا:عقبالك
باسل:اانششالله،وعدني عمرر يلاقيلي ععروس ههههههه
ماريا:انشالله بتلاقي بنت الحلال ،خلي الكاتو على حسابي هالمرة
باسل:لاااا ماا حلوة
ماريا: لا ما بقبل
فتت على المطبخ انا و شاردة بذكريات الماضي وعم ابتسم ،للحظة حسيتا ذكريات حلوة ،كيف كنا نجتمع اخر الاسبوع و ناكل فلافل و نضحك و ننكت على ام عبدو ،كيف كنا ننام جنب بعض لندفا ،كيف كنا نلعب مع بعض بالحدايق ، نكشتني نهال
نهال:شفتك قعدتي معو للشاب بتعرفيه ؟
ماريا:ايه بعرفو… من الماضي الجميل.
انتهت.
شو حابين نوع القصة الجاية ؟انا حاببتا تكون كتير غريبة و مغامرة
احكي ل 5 من أصدقائك بتحميل تطبيق #زاكي على جواله والاستمتاع بوصفات مجربة وسهلة طيلة الأسبوع
هل تحب مشاهدة وصفات بالصوت والصورة؟ اعمل اشتراك لقناة زاكي على اليوتيوب من هنا لتصلك جديد وصفاتنا بالفيديو:
قناة زاكي على اليوتيوب
عندك جوال ذكي؟ ممتاز كتير تفضل أحلى هدية من زاكي لعيونك, حمل على جوالك تطبيق زاكي, أقوى مرجع عربي لفن الطهي, من هنا:
تطبيق زاكي للأجهزة الذكية
عندك حساب على الفيس بوك؟ طيب شو بتنستى استفيد من وقتك وتعلم كل يوم وصفة جديدة على يد أمهر شيفات في الوطن العربي, بالانضمام لمجموعة زاكي وصفحة زاكي على الفيس:
للانضمام على مجموعة زاكي من هنا
للاعجاب بصفحة زاكي من هنا ومتابعة كل جديد
احفظ موقع زاكي في المفضلة على جوالك, لتصلك دوماً جديد وصفاتنا مش هتلاقيها إلا في زاكي
موقع زاكي لفن الطهي