السماقيه الغزاويه بطريقه الصور مرتبه بالتفصيل

يسعد مساكم اليوم عملت سماقيه وهي اكله غزاويه ببشتهروا فيها الغزازوه هي كتير زاكيه وطريقه تحضيرها طويله وبدها عنايه خاصه, و هي بدها تحضير مسبق من قبل.

المقادير:
كيلو سماق ( 4 أكواب من السماق)

5 كيلو سلق مغسول ومفروم ومنقى ( 20 كوب من السلق / أو السبانخ لو لم يتوفر)

2 كيلو بصل مقطع مربعات (8 كوب من البصل المقطع)

ربع كيلو حمص ( 1 كوب من الحمص)

ربع كيلو طحينيه (1 كوب من الطحينية)

الفلفل والتوم حسب رغبتك كيف بتحبي يكون حرقانها, عين جراده( بذور الشبت) ملعقتين كبار

لحمه 2 كيلو ونص

كاسة زيت زيتون

ملعقه كمون

الطريقه:
– اول شي بتنعقي حمص قبل بيوم وتاني يوم بتسلقيه بطنجره الضغط.

– تاني شي بتجيبي لحمه من غير عضم قد عقده الاصبع او اكبر شويه.

– تالت شي بتسلقي السماق الحب مش ناعم مع ملعقه ملح وبس يبرد بتصفيه وبتاخدي السماق وبتضربيه بالخلاط مع كاس ماء وبتضلك تعصري فيه حتى تنزل كل الحموضه.

– الان اهم خطوه انك تصفي ماء السماق بمنخل ناعم جدا وبنحط عليه كل كاسه من ماء السماق ملعقه طحين
تقريبا كل كيلو سماق بياخد 5 كيلو سلق مغسول ومفروم ومنقى.

– وبياخد 2 كيلو بصل مقطع مربعات, الان بطنجره كبيره بتسفحي البصل حتى يدبل منيح بنحط عليه السلق وبنضل نقلب حتى يدبل.

– وبنعمل الدقة من عين جراده ناشفه وفلفل احمر حراق وثوم وبنحطهم على السلق وبنحط الحمص واللحمه وشوربه اللحمه وملعقه كمون وكاسه زيت زيتون وبنخليها على النار حتي يستوي السلق.

– الان بنحط الملح وماء السماق وبنحركه منيح بنضل نحرك باستمرار حتى ما يلزق و عندما يغلي بنعدل الملح والحموضه والحرقان (يعني قدي بتحبيها بتحرق من الفلفل) واخر شي بنحط طحينيه حمرا مع الاستمرار بالتحريك وبعدين بنسكبها بصحون وبتتقدم مع المقبلات والدقه الغزاويه الحاره.

– هاي الاكله تعتبر تراث لاهل غزه وغالبا بتنعمل بالافراح او ليله الحنا الاكله هاي اذا انطبخت لازم كل الحاره والجيران ياكلو منها فبنعملها بكميات كبيرررره, صحتين وعافيه.

ملاحظة/
العين جرادة هي عشبة عطرية وليس عين جرادة حقيقي 🙂 للذين لا يعرفوه, وهي عبارة عن  بذور الشبت, ويمكن استعمال الشبت الأخضر لو لم تتوفر.

– اللي بستخدم هي مية السماق مش السماق نفسو وبنخلطو حتى ناخد كل طعم الحموضة اللي فيه ونصفيه وناخد المية فقط, السماق بخلطه وبصفيه منيح بمنخل ناعم وباخد الماء الاحمر الناتج عن غليان السماق وبعيره بكاسه وبحط له الطحين وكل كاسه الها ملعقه طحين.

– الطحينية الحمراء لو لم تتوفر, بإمكانكم استخدام الطحينية البيضاء, وصحتين وألف هنا.

نسعد بمتابعتكم لنا على جروب زاكي لفن الطهي:
السماقيه الغزاويه بطريقه الصور مرتبه بالتفصيل