زوجي بيضربني قصة واقعية بقلم هلا الغرابلي
هذه القصة تأتيكم من قسم المنوعات في زاكي, متابعة ممتعة لأعزائنا القراء.
#زوجي_بيضربني_بقلم_هلاغرابلي
#واقعية
الجزء الاول:
كل اسبوعين الي اتلة مرتبة من زوجي بسبب او حتى بدون سبب يعني ان عصب و بلش يسب و يبهدل انا كنت ردلو و بالاخير اكل اتلة و احيانا كنت اسكت و روح من وجهه يلحقني و يقلي ليش تاركتيني عوي متل الكلب لحالي يقوم يضربني و وقت قول لاهلي انو خلص ما بقا قادرة اتحمل اكتر من هيك يقلولي هيدا زوجك و ابو بنتك ادعيله الله يهديه ما تفكري ابدا بالحرد و الطلاق وزوجك منيح بس عنده هالخصلة بعصب و بضربك اتحمليه… بس لايمت بدي ضل هيك انضرب و انهان و ما اعمل شي غير انو ابكي فكرت كثيرا و كثيرا و اخدت شهيقا و زفيرا وقلت رح حط حد لهل الماساة بايدي انا بدون مساعدة حدا و بلش اتصرف بخبث و مكر و ما بخفي عليكن انو كروبات الفيس فادتني بشغلات كتيرررر رح احكي عنها لقدام …..
اجا من شغله و ضايج و معصب عم يقاتل دبان وجهه قلت الله يستر اليوم الي اتلة بس هالمرة رح بلش اتصرف بطريقة تانية طريقة شيطانية بلش ينكش مشاكل من تحت الارض على هيدا ليش هون و مين عمل هيك و انت ما خرج تكوني ست بيت و انت ما مرة و بلش يسب و يبهدل و بلش يضرب انا من اول كفين عملت حالي غبت عن الوعي بس انا صاحية مية بالمية طبعا خاف و ارتعب و بلش يفيق فيني لا بس ولايهمكن كلو هادا ادربت عليه مسبقا اتقنت الدور تماما و كنت حابة ضل غايبة عن الوعي شوي تانية بس قام ركض عالمطبخ قلت اكيد رايح يجيب بصلة او عطر لشمه و اصحى لا بس فاجئني بقنينة مي كبها على راسي وهادا ما كان بالحسبان المهم فقت و هداني لوصلت عالتخت وتسطحت ….طول بالك لسا الخير لقدام لخليك تندم عالساعة يلي فكرت تضربني فيا ….و بعد ما اطمن علي انو فقت و صحصحت و بدون ما يحكي اي تعليق او حتى لايك راح على غرفة القعدة يتفرج عالتلفزيون و يدخن و نادالي قومي اعمليلي شاي اي ما تكرم عيونك انا ناطرة هالفرصة قمت عملتلو ماك شاي و دوبتلو فين نص حبة اسهال الله يسامحني ويغفرلي والله لا يجعلنا من الشامتين كل ربع ساعة يفوت عالتواليت و ما يسترجي يحكي و يقول انو هيك عم يصير معه حتى ما اشمت فيه… انا كان بدي يفسر هالاسهال يلي صار معه نتيجة خوف من يلي صار معي واخدتها خطة دائمة كل مرة بضربني بغيب عن الوعي و هو بقضي بالاسهال حتى بلش يربط هالشي ببعضه بس انا ما اكتفيت بس بهالشي ….
الشي الغريب انو زوجي رغم هالشي هو حنون كتير و قلبه طيب لهيك بلشت استغل هالنقطة فيه …مرة اتعمدت فيق بنص الليل و ابكي بصوت عالي ليسمعني و يفيق ويسالني شبك ليش عم تبكي قمت طمرت راسي بصدره و انا عم ابكي قلتلو حلمت انك عم تضربني و وقعت على راسي ومتت حتى باحلامي ملاحقني انا عم بلش اكرهك انت رجال بتجنن بس لولا هالخصلة يلي فيك طبعا جوابه كان انو انا بعتذر و بس عصب مدري شو بصرلي و انا بحبك و حكي كتير ما بهمني الفعل هو يلي بهمني ….يتبع
الجزء التاني:
بعد يومين و نحن عم نتغدا عملت حالي ماسكة موبايلي و انو حدا عم يحكيني عالواتس و قلت بصوت عالي اوووف علينا هلا هاي شو بدو يجيبها هلا لعندي ما اغلظها…. قلي مين هاي يلي جاي لعندك؟؟؟قلتلو رفيقتي هبه بس بكره جيتا بضلها طول القعدة زوجي احمد و حبيبي احمد عمل هيك و اشترالي هيك مهووسة بجوزها طول القعدة بتزهقنا بسيرة زوجها و اديش منيح معها مجنونة ما بتخاف عليه من العين حدا يحسدلا اياه ..قلي انت شو بتقليلا وقت بتحكيلكن عن زوجا احمد قلتلو منقلها الله يهنيكي و نيالك فيه و بصيرو رفقاتي البنات يقلولا الله يبعتلنا نصيب و رجال متل احمد …..اصلا مين احمد ولا مين هبة ما بعرفن شخصيات وهمية بحياتي …طبعا سكت و واضح تماما انو عقله عم يفكر باحمد و بطولاته و انجازاته يلي هو حديث قعدتنا مع رفقاتي
3اسابيع مرو على اخر مرة ضربني فيها و غبت عن الوعي و انا اعتبرتا مدة زمنية منيحة بهالفترة انا فتحت عمو كوكل و قرات كتير عن الثقافة الجنسية ما ضل موضوع بكوكل بخص هالشي ما قراته و حفظته و اكتشفت اديش انا جاهلة كنت بهيك قصص شغلات كتير لاول مرة بسمع فيها و بخجل طبقها بحكم انو الي سنتين بس متزوجة و ماحدا ثقفني بهيك مواضيع بحكم الخجل و الحياء من الحكي بهالشي بس رغم هيك قويت قلبي وطبقتا وكسرت الخجل يلي فيني و هو تفاجأ كتير و سالني بعصبية من وين تعلمتي هالقصص قلتلو ولله من النت و فتحتله النت و فرجيته حتى يصدق لانو كان احتمال كبير اكل ضرب من هالموضوع بس كانت نتيجة مرضية جدا و قلي ثابري الى الامام و هالنقطة فادتني كتير واعتبرتا نقطة قوية لصالحي و رح احكيلكن لقدام كيف استغليتا….
طبعا ما رح نول يلي بدي اياه بسرعة البرق و الطريق بعده باوله يعني ما رح يبطل يضربني بين ليلة و ضحاها كان الشغلة بدها وقت و صبر طويل لانو هالخصلة اخدها وراثة من ابوه يلي كان يضرب امه حتى كل اخواته بيضربو نسوانن يعني نحن ساكنين بعمارة وحدة و كل شهر بسمع صوت سلفة من سلفاتي عم تاكل قتلة و موصل صوتها لقبرص وانا كان بهمني كتير خلصو من هالعادة قبل ما تكبر بنتي و يصير عندي اولاد غيرها و يشوفو امن عم تاكل قتلة قدامن اكيد رح يصير عندن عقد نفسية و اذا ما طلعو نسخة عن ابون لانو فرخ البط عوام…
الهدنة خلصت و حليمة بدها ترجع لعادتها القديمة رجع ضربني و رجعت عدت نفس التمثيلية غبت عن الوعي و صابو يا حرام اسهال وقضينا بعدها كام يوم ما منحكي مع بعض طبعا بالعادة انا ببتتعب نفسيتي و هالشي ببين على مظهري يعني ما بكون الي نفس وقف على مراية وحط حتى خط كحلة بعيني مظهري بصير كئيب جدا بس هالمرة غيرنا التقنية و الاهتمام بحالي ضاعفتو عن قبل كان بدي اياه يجي يصالحني و يطلب مني حقوقه الزوجية يلي بس هدول بيعرفن وانا ما رفضت اصلا ما بقدر ارفض لانو رح تكبر المشكلة و يمكن تصير بالغصب بس هالمرة انا بختلف عن يلي قبلها انا هالمرة رح كون تماما متل الجثة الهامدة يعني فرق كتير عن لما بكون انا المبادرة و انا المبدعة و المبتكرة ضروري فرجيه الفرق لما بتكون المرة سعيدة اديش بتقدر تقدم و كيف بتقدر تسعد زوجها و لما بتكون تعيسة ما بتقدر تقدمله شي والفكرة يلي بدي وصلو اياها وصلت بنجاح و كانت واضحة على ملامح وجهه…..يتبع
الجزء التالت:
مرة كنت عم اجلي و غني و عين الله علي فات على المطبخ و مبين عليه مدايق و معصب كل مشكلة بشغله او مع رفيقه او مع اي حدا انا بتحمل النتيجة وقت شفتو معصب تركت الجلي و ركضت على غرفتي و قفلت الغرفة قال عني اكيد هاي مجنونة شبها شو صرلا لحقني بدو يفوت عالغرفة لقاه الباب مسكر قلي افتحي شو عم تعملي ليش ركضتي و قفلتي على حالك طبعا انا كنت شارية قطرة للعيون كرمال قطر فيا بعيوني و بينن حمر كانو الي ساعة عم ابكي( طب شو اعمل دموعي خلصو من وين جيب دموع ) وكانت كلما ما تخلص عبيها مي تمشاية حال المهم قلتلو خايفة افتحلك تقوم تضربني و انا جسمي ما بقا عم يتحمل ضربك كفين ما بقا عم القى منك طبعا هالحكي ع احكيه و كانو عم ابكي و بدلع وفتحت االباب و شافني هيك و شاف عيوني الحمر حسيته شفق علي و مشيت على خير و لله الحمد …دائما وقت يفوت معصب مثل دور الخايفة و الضعيفة و انو انا ضلع قاصر لا حول و لا قوة الي وما الي سند و هو عيلتي لانو فعلا ما كان الي سند غير ربي …
كنت بفترة الصلح دلله كتير احلى حكي يسمع مني و شو بحبك انت و مروق و انا حاسة انو عصبيتك خفت كتير و مبسوطة منك يعني شوية افكار وكلام عيد و كرر فين ليصير هو مقتنع فين حتى لو ما الن اساس من الصحة
مرة سمعت سلفتي يلي ساكنة تحتي عم تتخانق مع زوجها و عم تاكل اتلة منه و كان زوجي موجود و سمع الاصوات كلها قلت هالقصة رح خليها لصالحي نطرت لتاني يوم و نحن عم نتغدا قلتلو جارتنا ام محمد اجت صبحية عندي اليوم شربت قهوة جاية و بتمها حكي وبلشت تحكي على اخوك انو الجيران كلن مبارح سمعوه كيف عم يضرب مرته و ما خلو عليه انو ما بخاف الله و انو عم يتقاوى على مرةو ضيعان هالمرة فيه و حكي كتيرر كان نفسي احكيه عنه حكيته عن اخوه و ام محمد فعلا اجت لانو انا دقتلا و قلتلا تعي اشربي قهوةوفتحت السيرة قدامها و اعطيتها طرف الحبل بس و هي حكت كل هالحكي حتى ما اطلع كذابة بحال انفتحت هالقصة كان ردة فعله شو بدنا ما دخلنا كل واحد حر ببيته و بعيلته بس بعرف ضمنيا انو عم يقول بينه و بين حاله انو هيك عم يقولو عنه الجيران كمان وقت بضربني…
مرة اتعمدت اترك حب مانع الحمل على طاولة المكياج مع انو زوجي ما بيعرف سلفا انو انا عم منع لانو ما كنت مفكرة احبل و جيب منه و نحن بهيك وضع كانت خطوة جريئة مني كتير وقت شافن طلع الدخان من اذنيه و هجم علي و مسكني من ايدي ما بدك تخلفي مني ليش انا بلشت ابكي و قلتلو خايفة احبل و انت هيك بعدك عم تعاملني بدك جيب اولاد و يشوفو امن عم تنضرب بدك طلع اولادك مريضين نفسيا و اذا حبلت انت بضربك هيدا رح تخلي الولد ببطني هدد فورا انو رح اتزوج عليكي و خلف من غيرك قلتلو الله يسرلك ما عندي مشكلة بتجي وحدة و بتاخد شوي من الاهانة و الضرب يلي عم شوفه منك و اذا بتبقى عندك 4شهور بوعدك روح اخطبلك التالتة بنفسي …
6شهور تماما خلصت من شي اسمو ضرب و عنف وقت بعصب صار بكسر و ما عندي مشكلة يكسر بس كف واحد ما يضربني انا الوحيدة بين سلفاتي يلي حصلت هالنتيجة بهالوقت السريع رغم اني اصغر وحدة فين و متزوجة حديثا سلفاتي سالوني كيف بطل زوجك يضربك انا ما قلتلن انا شو عملت لانو ما بثق باي حدا ممكن ب لحظة غضب يقرو كل شي عني لهيك احتفظت بهالشي بيني و بين نفسي فقط
بس حبيت شارك تجربتي و كتبت التفاصيل يلي بقيت بذاكرتي لهلا .
انتهت.