قصة الليلة الحماية والكنة بقلم هلا غرابلي
قصة الليلة الحماية والكنة بقلم هلا غرابلي
هذه القصة تأتيكم من قسم المنوعات في زاكي, خبروني رأيكم في القصة في التعليقات.
#الحماية_والكنة_بقلم_هلاغر
يا حماتي ما تقولي عني شرنة ما انت كنتي قبلي كنة ….
كنت مبسوطة و متوترة كتير…. اليوم جاين اهلو يطلبوني اله بعد حب دام سنتين كل شوي اطلع عالساعة ايمت رح تصير الساعة 5 و اتعرف على اهل زوجي المستقبلي يلي كان بنظري شخص مثالي كان دائما يحكيلي عنن و عن كل وحدة فين كيف بتفكر و شو بتحب و يقلي ما مصدق ايمت تصيري بيناتنا و وحدة مننا و انا كنت مستعجلة اكتر منه لصير ببيته و على اسمه ….
صارت الساعة خمسة و رن الجرس و فتحت اختي الباب و انا قاعدة بغرفتي و قلبي عم يدق بين الخوف و الفرح الفضول قتلني ما نطرت لاطلع ولشوف لهيك قلت بطلع من بخش الباب و بشوف كيف اشكالن….. 7نسوان و معن خطيبي صراحة ما توقعت تجي امه و معها بناتها الستة كلن جاين يشوفو عروسة اخون الوحيد ….فاتت اختي لعندي و قلتلي يلا اطلعي سلمي اخدت نظرة عالسريع على شكلي على المراية و طلعت سلم المفاجاة او الشي الغريب انو كلن لابسين اسود و كانو فايتين على عزا ما على طليبة منظر مرعب جدا و قاعدين و ساكتين و عيونن عالباب ناطرين البنت يلي اخون صرع راسن بجمالها و ادبها ورشاقتها و ذكائها فتت سلمت و قعدت و بلشت نظرات من فوق لتحت و الاسئلة يلي بطعمة و بلا طعمة حسيت حالي على كرسي الاعتراف و التحقيق فتت لجيب القهوة لحقتني امي قلتلي شو هيدا هدول جاين يطلبوكي الا يعزوكي انا ما ارتحتلن ابدا قلتلا ماما شو بدنا فيهن انا الي بالشب يلي قاعد برا قلتلي منحكي ليروحو ضيفت القهوة و حطيت بالفنجان يلي بدي ضيفو لخطيبي المستقبلي شوية ملح هاي العادة سمعتها بتركيا و حبيت طبقها عليه و شوف اذا بشربها كلها الا لا اذا شربها معناتا رح يضل يحبني شو ما شاف مني و دخيل عينه شربها و كل شفة بغصة و اول ما طلع بعتله مسج انشالله عجبتك القهوة قلي اطيب قهوة بشربا بحياتي…
صار نقاش بيني و بين اهلي انو امي ما مرتاحة الن و حستن كانو جاين يطلبوني بالغصب ما بارادتن بس انا قدرت اقنعها لانو مواصفات الشب كانت ممتازة و شب لا يرفض تمت الخطبة بسرعة بدون اي مظاهر احتفال او شي لانو العرس قريب جدا و حددنا موعد العرس بعد شهرين لانو وضعه كان جاهز و انا اتجهزت بسرعة شي انزل عالسوق و شي اطلبه من النت المهم اجت ليلة العرس و فتتت عالصالة بتفاجا ببنات حماي الستة لابسين فساتين سهرة ابيض و اوف وايت طالعين متل جماعة الرداء الابيض لك حتى ابيض من فستاني يعني يلي بفوت عالصالة بسال وين العروس؟ اي وحدة العروس؟العريس متجوز وحدة الا ستة!!!! لانو حتى عالبرزة تطلع وحدة تنزل وحدة و على تك صور 3افلام تصوير فيلمين كاملين بس لاخواته حتى الطرحة وباقة الورد شلحوني اياها و تصورو فيها انا حاولت ما انزعج من يلي شفته هاي الليلة ليلتي بس حبيت رد شي بسيط بس لقلن انو الحرب الباردة بلشت من اليوم بعتت لاختي و قلتلا بتردي خبر لكل بنات حماي يجو على ساحة رقص بدي ارقص معن و بعدا بوشك بتروحي عند الدي جا و بتقليلا تحطلي حصرا اغنية يا احلى منهم يا فرق عنهم لايهاب توفيق و اوعا تخليها تحطها قبل ما تشوفين اجتمعو بساحة الرقص حتى ما يصير انسحاب تكتيكي لاي وحدة منن و عملت متل ما قلتلها و هي بلشت الغنية و انا بلشت هز و هنا عم يرقصو و يطلعو ببعض و مصدومينمشيت الليلة على خير و فتت انا و زوجي على عش الزوجية يلي كان فوق بيت حماي و صبحية العرس الساعة 9كانو عم يرنو الجرس علينا متل الشرطة يلي جاي تشحط مجرم مرتكب 20جريمة قتل و الو هربان عشر سنين من العدالة وهلا لقوه …. جامعين حالن مع انو ال5متزوجين و كل وحدة بيتها بمطرح ما في الا وحدة بعدها بنت عند اهلها بس ب ليلة العرس نامو تحت عند امن حتى يطلعو الصبح لعندي يستفقدوني و طلعو و شربنا القهوة سوا و حكينا شوي عن العرس و نزلو ….
زوجي كان شايفني و ما مصدق و ما شفت منه ابدا شي زعجني لحد تالت اسبوع بعد عرسي وقت طلب مني انو بس خلص شغلي ببيتي انزل ساعد امه و اخته بشغلن انا انصدمت فيه قلتلو بعدني عروس لسا و انا ما مجبورة بهالشي انا الي ببيتي و بس انت تزوجتني الك الا خدامة لاهلك ….الشخص الحنون و المثالي طلع غير هيك تماما بعد الزواج عصب و جن وقلي هيدا الموجود و اهلي خط احمر انا بخدمن بعيوني و مرتي كمان مجبورة تخدمن و تعتبرن متل اهلها حتى كون انا مبسوط منها عجبك اهلا و سهلا ما عجبك الله معك انا تفاجات شو عم يحكي و مع مين عم يحكي هالحكي و بهالبساطة مستعد يتخلى عني و عن حبنا على اول مشكلة بتمر علينا فتت و بكيت كتير و فكرت لم اغراضي وروح احرد عند اهلي بلكي بغير رايه بس لا هيك بتكبر المشكلة و بشمت الناس يلي ناطرة تشمت فيني انا يلي غيرت رايي و رجعت قلتلو تكرم عيونك حبيبي و دلعت عليه و قعدت بحضنه وخلص ما رح زعلك (بس طول بالك نويالك على نية بس انت اصبر شوية)و حسيت حالي قدام مشوار طويل من الصبر و التعب وحطيت قواعد اساسية امشي عليها لاقدر اتعامل مع هالمشكلة و ليصير زوجي وبيت حمايي متل ما بدي …..
ما احكي ابدا كلمة عاطلة عن اهله حتى لو كانو ما كويسين شفت منهم العجب و دائما امدح فين و بينلو انو بحبن و بعتبرن متل اهلي .. اشتغل و انا راضية و ما بين انو هالشي عم اعمله غصب عني حتى ما يقوو علي و يتحكمو اكتر … لساني لازم ينقط عسل معن و امدحن بوجهن .. ابدا ما عاند زوجي لانو ممكن تكبر المشكلة و يعند اكتر مني …. لازم اتصرف معه بطريقة خبيثة و اشتغل شغلي بالمخفي على كل الجبهات جبهة زوجي و جبهة بيت حماي…..يتبع
نقوطة متابعة ما حدا يسال عن الجزء التاني ايمت رح نزله وقت نزله بعمل تعديل منشور و الكل رح يشوفه
ملاحظة :ما بنصحك تعمل تاك او منشن لبيت حماكي او لسلفتك العقربة
……………………..
الجزء التاني:
استعنا بالله و نزلت تاني يوم عالشغل الاضافي بعد شغل بيتي كنت ساعد حماتي بالطبخة و ساعد بنت حمايي بشغل البيت ما كنت اطلع على بيتي الا قبل بساعة من جية سي السيد غير تيابي و اتمكيج مكياج ناعم والبس احلى لبس طبعا كنت اتغدى عند بيت حماي وبس يجي كان كمان يفوت يتغدى عند اهله قبل ما يطلع لفوق و تعطيه امه نشرة الاخبار اليومية و وقت يجي بدو يسهر معي انا روح عالتخت و اتسطح و اعمل حالي تعبانة يجي يقلي قومي اسهري معي قلو يا روحي تعبانة لغير مرة حتى وقت بدو يجي ينام معي قلو مشتاقتلك كتير بس اعذرني تعبانة كتير عم اشتغل ببيتين قعدت اسبوع عهالحالة بلش يعصب و يضوج لمرة دقلي بالنهار قلي شو عم تعملي قلتلو ع البس بدي انزل عند اهلك قلي معلش اليوم ما تنزلي خليكي فوق بالبيت و حضريلنا جو للسهرة قلتلو اي تكرم عيونك بس خطي حماتي كيف بدها تطبخ بدوني و بخاف تزعل مني و انا ما بهون زعلها(حماتي يا وجعي )قلي خلص ولو اعملي متل ما عم قلك قلتلو اوك صار كل 3ايام يدقلي و يقلي اليوم ما تنزلي و انا اليوم يلي ما انزل اشتغل فيه كنت دللو كتير اخر دلال و انبساط لهيك صرت 3ايام بالاسبوع قضين ببيتي اشتغل و اطبخ ببيتي بس لسا بقيان 4ايام هدول كيف بدي اخلص منن ….
وقت انزل ساعد حماتي بالطبخة كانت تلبسني الطبخة كلها و هي توقف فوق راسي اعملي و سوي هيك بس انا خليتها تقلي دخيل الله ما بقا تطبخي كنت استقبل عمي و رحب فيه كتير اول ما يجي عالبيت و قله اليوم طابختلك الاكلة الفلانية و قلي شو رايك فيها رح تاكل اصابعك وراها بضحك و مزح و عمي كان انسان طيب و مساير غير حماتي تماما و وقت نقعد ناكل اسكبله انا بصحنه و قلو شو رايك عمي بطبخي مو طيب كتير كان يقلي امم تسلم ايديكي يا عمي شي بشهي قلو طبعا الله يخليلي حماتي عم تعلمني الطبخ بس خايفة اسبقها و صير اشطر منها ههههه و كنت اسالو على طول عمي شو الاكلات يلي بتحبها حتى اطبخلك اياها يقلي كل شي بتعمليه عمي طيب حماتي ضاجت من هالقصة و من غزل عمي باكلي على طول حست حالها رح تفقد سيطرتا و معلميتها بالطبخ و انو الكنة رح تتفوق عالحماية
لهيك بعد شهر قلتلي بنتي شو رايك تصيري تطبخي ببيتك على طول ما اريحلك قلتلها ليش حماتي وللله انا مبسوطة هون و بتسلى معك و عم اطبخ لزوجي كل كام يوم قلتلي معلش الرجال بحب يستقل ببيته و هيك خلصت من الطبخ و الاكل عند بيت حماي و انفصلت عنن بهالموضوع ….
بنت حماي الصغيرة بالعمر و الكبيرة بالمفعول كانت تركن علي بشغل البيت كتير و حماتي ما تقصر تنكشلي الشغل نكش اليوم بدنا نزل البرادي و اليوم بدنا نعزل المطبخ و بنتا كانت نص نهارها عالواتس و الفيس قلت لاندار عليها و طبعا هي العميلة السرية لاخواتها الكبار كانت تطلع عندي فجاة لتشوف شو عم اعمل و شو لابسة و كيف نظافة بيتي و كله بالتفصيل ينقل عالواتس لانو عرفت بعدين انو عاملين كروب مسمينه كنتنا الشرنة و هالشي شفته صدفة و قت كانت جنبي و اجاها مسج و طلع فورا على السكرين الرئيسي انو رسالة من كروب كنتنا الشرنة يلي هي انا مع انو ما شافو مني شي ما حلو لحد الان …..
كانت تطلع و كنت رحب و سهل فيها و كانت تتفتل بالبيت كله لانو بيت اخوها يا بعدي و من حقها لمرة شافتني لابسة اسوارة ناعمة لون برونز قلتلي كتير حلوة هالاسوراة قلتلا عجبتك قال ايه شلحتا و قلتلا خديها ما في شي بغلا عليكي رفضت ظاهريا كتير و بعدين اخدتها و انبسطت صارت اي غرض تستحلاه عندي من قطعة مكياج للاكسسوار ما كنت ابخل عليها بشي لانو براسي موال و بدي غنيه (اه يااااا لييل )طبعا كنت روح قول لزوجي انو اليوم اختك عجبا هالغرض و ما حبيت اكسر بخاطرها و اعطيتا اياه لانو بحسها متل اختي الصغيرة كان يقلي يا حياتي انت شو حنونة لك ما في منك معناتا هات يلا يا حلو حقه لاشتري بداله لانو نفسي فيه لسا و كان يعطيني دغري يلي بدي اياه و اكتر كمان اخته الصغيرة بلشت تقلي على اسرارها و قصصها مع رفقاتها و انو بتحب شب و بتحكي معه انا شو كنت اعمل فوت عندا عالواتس و اسالها شو صار معك مع وليد(الشب يلي بتحبه و بتحكي معه)اعطيها طرف الحبل بس و هي تحطلي بقا كل قصصها و مغامراتها يلي صارت معا خلال النهار انا اعمل سكرين شات للمحادثة و خبين عندي لانو احتمال يلزموني لقدام كوسيلة دفاع لا هجوم صار معي سلاح قوي و صرت مون عليها و قلها هالفترة انا ما خرج انزل اشتغل لانو تعبانة كتير اشتغلي انت و موصيتلك على نفس الكريم يلي شفتيه عندي و و صرت كل فترة جبلها شي قطعة تياب او مكياج او اكسسوار لاكسبها لصفي ….
طبعا بنات حماي التانين ما كانو هينين ابدا وقت نجتمع ببلشو يلطشوني بالحكي بس انا اعمل حالي غبية و ما فهمانة شي بانو وحدة تزوجت و ما حبلت لهلا زوجها تزوج عليها و انو معه حق ليش لينطر عليها و هالشي كلو لانو الي 3شهور متزوجة و ما حبلت لهلا و مرة بنت حماي طلعت لعندي فجاة زيارة و فاتت شافتني بتنورة قصيرة و بلوزة قطع قالتلي هيك بضلي ببيتك ارحميه لاخوي شوي ولله يا قلبي عدمانة صحته قلتلها هو ما راحم حاله ما بيرضى الا البسله هيك بقلي بيلبق لعودك النحيل هيك شي (هيدا الحكي ما فيه منه بس كان وليد اللحظة )قلتلي لنشوفك بكرا بعد الحبل و الولادة كيف بدك تصيري …..
……………………..
آخر جزء (بيوجع القلب 
🙁 )
الجزء التالت:
كروب كنتنا الشرنة بعدو ببالي و ضليت فكر بانو هالعقارب الستة شو عم يحكو و يخططو فيه بس كيف بدي فوت عليه و موبايل بنت حماي عليه باسورد لهيك اجتني خطة جهنمية و بعتلها لبنت حماي الصغيرة تطلع لعندي تشوف جهاز الليزر يلي اشترالي اياه زوجي و فعلا طلعت و هي قاعدة جنبي عم تشوفه قلتلا يئبش قلبي حسونة ما بقلو على غرض الا بجبلي اياه فورا عم فكر طبقله فيديو اغاني و صور رومانسية و ابعتله اياه ابعتيلي من عندك شوفي شي خرج هيك شي و انا طبعا كنت ماسكة موبايلي و عاملة حالي عم افتح بلوتوث بس انا طبعا كنت فاتحة فيديو لصورها و هي عم تحط الباسورد على موبايلها و بعدين عيد الفيديو و احفظه على راحتي لارجع افتح موبايلا و شوف شو عم ينحكي بالكروب و عملت حالي عم اطلع بعيد حتى تاخد راحتها وهي عم تكتبه و فعلا متل ما بدي صار و صارت كلمة المرور معي يلي كانت حاطتا باسما و اسم حبيبها وليد و انتظرت وقت لافتحه تكون مشغولة فيه عم تتحمم او عم تشطف ارض الديار برا و فتحته و دخلت عالواتس سر البلاوي و المصايب كان حكين اختي رح دقلو لاخوكي اليوم ليجي عندي و بدي ارجع افتح معه الموضوع نفسه هاي الها 6شهور متزوجة لايمت بدنا نضل صابرين عليها و انت بعد يومين بس يجي عندك كمان ارجعي عيديه عليه الحكي نفسه …..ترد التانية تقلها بقلكن عاملتله سحر و حجاب حتى اخدتله عقله وساكت عليها لهلا…… لك اختي خديلنا موعد عند شي واحد من معارفك لنروح نعرف اذا مكتبله لاخوكي الا لا …..وينها سمر ام لسان(بنت حماي البنت) وين عم بتغط ما عاد جبتلنا اخبارها متل الخلق شكلها اشترتها بهل اكام قطعة يلي جبتلها اياهن ……قال اشترالها جهاز ليزر يا بعدي مطيرتله مصاريه على مكياجات و قمصان النوم ماهي بضلها دايرة باللانجري بقلب البيت …و قرات حكي كتير بشبه بعضه و سكرت و طلعت على بيتي لاعرف شو اعمل عم ينقو على زوجي يتزوج علي بدن يخربولي بيتي هالحياية (طولو بالكن علي لخليكن تحمدو ربكن اني بقيانة معه)القصة ما بدها نطرة بدها هز اكتاف دقيت لامي و قلتلها خديلنا موعد نروح بكرا عند دكتورة نسائية بدي افحص حالي ليش لهلا ما حبلت و تاني يوم رحت بس بدون ما خبر زوجي او حدا من بيت حمايي الكل بيعرف انو انا عند اهلي و رحت عند الدكتورة و خايفة فعلا انو يكون عندي مشكلة ماخرتني عن الانجاب ولحمدلله فحصتني و قلتلي ما فيكي شي كل امورك تمام بس مسالة وقت او زوجك عنده مشكلة ولازم ينفحص قلتلها طيب دكتورة بدي اطلب طلب منك قلتلي تفضلي قلتلا بكرا او بعده بدي اجي لعندك انا و وحدة من بنات حمايي و بدي تقليلها هالحكي و ما تقليلا انو كنت عندك اليوم يعني كانو اول مرة بتفحصيني و ركزيلي الله يخليكي على انه المشكلة يمكن تكون من زوجي لانو هدول بيت حمايي عم يفكرو يطلقوني ويزوجوه طبعا الدكتورة تعاطفت معي و قبلت فورا (حتى لو كانت المشكلة مني كنت رح اتعالج عالسكت و اتفق مع الدكتورة على السيناريو نفسه لانو النسوان بتتعاطف مع بعضها بهيك قصص خاصة اذا فيها خراب بيوت)طبعا بعد ما رجعت تاني يوم دقيت لبنت حماي الكبيرة و قلتلها تروحي معي عند الدكتورة خجلانة روح لحالي و طبعا قلت لزوجي قبل بيوم و ما عارض ابدا بالعكس رحب بالفكرة ليرتاح من النق فوق راسه و رحنا و الدكتورة عملت متل ما اتفقنا و نحن راجعين عالطريق بلشت بقا انا بالحكي على يييي شو بدي قله لحسونة هلا العطل منك ولله ليجن و ما رح جيب سيرة لاهلي ابدا لانو كمان بدن احبل بسرعة شو بدنا نعمل هلا فورا قالتلي لا حبيبتي ما في مشكلة عند اخوي القصة كلها بدها شوية وقت بس (ايوا اكتر حاجة بحبها فيكي هو دا ااااااه هو دا طيييييبة قلبك)
ما تجيبي سيرة لاخوي كرمال ما ينزعج و يدايق ….. طبعا رجعت بنت حماي الكبيرة و اكيد تعمم الخبر بكروب كنتنا الشرنة يلي لازم يسموه كنتنا الداهية و انا رجعت خبرت حماتي و زوجي طبعا يلي عصب كتير و قلي انا ما فيني شي و قلتلو طبعا حبيبي ما فيك شي لا انت و لا انا بس بدها القصة صبر و وقت و هيك تسكر هالموضوع على خير و سلامة طبعا خلال هالست الشهور القادمين قبل ما احبل ما كانو هادين و عاقلين حماتي و بناتها كانو كل يومين دق وحدة منن لاخوها و تقلو اليوم فنجان القهوة عندي و ما بعرف شو كانو يحشو براسه بس احيانا حسه جاي مدايق و راسه اكبر من حجمه الطبيعي (طبعا انا من قرائتي لحكين عالواتس عرفت انو زوجي كل يومين بروح عند وحدة فين وما كان يقلي ابدا)انا صرت قله حبيبي لازم تروح صلة رحم عند اخواتك ….كل يومين رحلك عند وحدة اليوم سمعت الشيخ و هو عم يحكي على ثواب صلة الرحم مع الاخوات و على طول ذكرو بهالشي صار بس يرجع يقلي اليوم كنت عند اختي يعني صرت اعرف تحركاته ومين اكتر وحدة عم تحشي براسه و صار ياخد فكرة عني انو انا بحب اخواته كتير…. يعني قد ما حكوه عني بالعاطل صار يدافع عني و يقلن ولله هي بتحبكن و ما بتجيب سيرتكن الا بالخير و بتقلي على طول روح عند اخواتك…..
لحمدللله حبلت و بلش نق من نوع جديد على يلي ببطني شو صبي الا بنت و طبعا حماتي و بناتها بدن صبي ليحمل اسم ابون و كانو هالصبي بدو يكون ولي عهد بريطانيا انا رحت صورت انا و ماما و عرفت انو معي بنت شو بدي اعمل ….انا لحمدلله صبي الا بنت ما بتفرق معي المهم الخلقة التامة قررت ارجع قلن معي صبي …..ليش!!!اذا قلتلن معي بنت بدن يضلو ينقو و ينكدو على اخون و يمكن يرجعو يفتحو سيرة زواجه علي من وحدة تجيب الصبي و لسا في 5شهور لاولد قلت بدللوني فين و لوقت اولد بتقبلو الصدمة على راحتن وانا رح اعمل حالي متفاجئة متلي متلن بس ما رح كون زعلانة يعني بتصير انو وحدة مصورة بنت و تجيب صبي او العكس و اشتريت الديارة معظمها الوان محيرة تروح عالطرفين و اشتريت قطع زهر و ازرق و طبعا طول فترة حملي كنت دلوعة و غنوجة و مدللة كتير و اعمل حالي دوخ و اتعب حتى تطلع بنت حماي سمر تساعدني بشغل بيتي و حماتي تقلي على مهلك و ديري بالك على حالك و هي يلي تبعتلي الغدا جاهز لعندي بس اهم شي دير بالي على ابن ابنن يلي جاي
عالطريق و بقيت هيك لفتت بشهري الثامن و قامت الحرب بالشام بمنطقة الزملكا يلي كنت ساكنة فيها (الله يفرجها على سوريا و اهلها دعوة من القلب
❤ )لانو البلد كانت بحالة ازمة و بالسنة التالتة خرب الوضع بالشام و خاصة ريفها صارت تنزل صواريخ عالمنطقة ضبينا الشناتي و تركنا بيوتنا و طلعنا فورا نحن وكل اهل المنطقة و طلعنا متل كالناس و كانت وجهتنا عالسويد و تعبت كتير عالطريق خاصة اني كنت باخر شهرين حمل فين بالنسبة لبنات حمايي تفرقنا صارت كل وحدة فين بجهة شي بقي بالشام شي بالمانيا و شي بالدنمارك و ولدت بنتي بالسويد بعد ما فتت عليها بيومين و دقو بنات حمايي جميعا باركولي و هنا عم يبكو لانو ما قدرو يشوفو بنت اخون شام يلي كنت انا متوقعة هالبنت بس تجي تعمل مشاكل لانو انكتب عليها تجي بنت (بس الحرب و الغربة غيرت نفوسنا و طريقة تفكيرنا كتير ما بقا همنا صار هاي شو ولدت و هاي شو عملت هاي المشاكل صارت تافهة
بالنسبة النا و صار همنا واحد انو تخلص الحرب يلي دمرت و قتلت و سرقت فرحتنا و ترجع تتعمر بلدنا و نرجع على بيوتنا و لاهلنا و الشوارع و الحارات يلي فيها ربينا و فيها كل ذكرياتنا و نرجع نجتمع متل اول حتى لو كان بينا مشاكل ومشاحنات مخفية ) وهاي الي السنة التانية بالسويد لحد هلا ما شفت اهلي يلي بقيو بالشام او حدا من بنات حمايي الخمسة يلي ضموني بعد ولاتي بخمس شهور لكروبن عالواتس و سموه شام صح قضيت كتير مع بيت حماي بس كانت احلى ايام حياتي مقارنة بالغربة الكربة و بتمنى ترجع ……
انتهت .
اكتب كلمة #زاكي في التعليقات لتصلك مزيد من الوصفات المجربة والمميزة خصيصاً لك
هل تحب مشاهدة وصفات بالصوت والصورة؟ اعمل اشتراك لقناة زاكي على اليوتيوب من هنا لتصلك جديد وصفاتنا بالفيديو:
قناة زاكي على اليوتيوب
عندك جوال ذكي؟ ممتاز كتير تفضل أحلى هدية من زاكي لعيونك, حمل على جوالك تطبيق زاكي, أقوى مرجع عربي لفن الطهي, من هنا:
تطبيق زاكي للأجهزة الذكية
عندك حساب على الفيس بوك؟ طيب شو بتنستى استفيد من وقتك وتعلم كل يوم وصفة جديدة على يد أمهر شيفات في الوطن العربي, بالانضمام لمجموعة زاكي وصفحة زاكي على الفيس:
للانضمام على مجموعة زاكي من هنا
للاعجاب بصفحة زاكي من هنا ومتابعة كل جديد
احفظ موقع زاكي في المفضلة على جوالك, لتصلك دوماً جديد وصفاتنا مش هتلاقيها إلا في زاكي
موقع زاكي لفن الطهي