قصة الليلة غبار الذهب بقلم هلا غرابلي

هذه القصة تأتيكم من قسم المنوعات في زاكي, خبروني رأيكم في القصة في التعليقات.

#غبار_الذهب_بقلم_هلاغرابلي
الجزء الاول : انتهت القصة

الرجل الذي يطلب من المرأة ان تكون ملاكا عليه ان ينشئ لها جنة فالملائكة لا تعيش في الجحيم….(مقتبس)
مسالخير …
مسالخير ..لك قول صباح الخير ..يسعد صباحك زوجي اهلا و سهلا فيك بفندق 6نجوم يلي بقدملك سويت مريح و اشهى الماكولات الشرقية و الغربية و اطلالة حلوة و في كمان جاكوزي اذا بتحب …..
خلص خلص انت ما بتملي من هالقصة بتعيد و بتزيدي الحكي نفسه كل يوم ….
و انت ما بتمل من سهراتك اليومية مع رفقاتك لك ما بيخلص الحكي لك شو عم تحلو قضايا الشرق الاوسط ، طيب ما بتقول لاسهر مع مرتي اليوم، لك ما بدي تسهر معي كل يوم لك عالقليلة خصصلي 3ايام بالاسبوع الي و 3ايام لضرايري ….
نامو الاولاد …

 
لا ناطرينك ،طبعا نامو شو بدو يسهرن لهل الوقت…
قومي نامي نزعتيلي مساي الله ينزع مساكي ،ولي انتو النسوان شو بتحكو
الملل و الروتين و الوحدة هن طابع حياتي الزوجية ،كل يوم زوجي بيرجع من شغله بياكل و بنام ساعتين و بفيق بيلبس و بروح بيسهر مع رفقاته و ما بيرجع لنص ليل اما انا بعشي اولادي و بحممن و بنيمن و بسهر لحالي بتفرج على التلفزيون او بقلب بالفيسبوك او على الواتس و الي سنين على هالحالة احيانا بقضي السهرة انا و عم ابكي عم ابكي من الوحدة و الملل لاني مرة متزوجة بحاجة لحدا يقعد معي و يحدثني و يهتم فيني بحاجة لرجال اسمع كلمة حلوة منه ،حاولت كتير فهم زوجي انو تكوينة المرة غير الرجال المرة قد ما كان عندا رفقات و اولاد و مشاغل بالاخير بدا رجال تسند راسا عليه و تحكي معه و تشكيلو هموما بس ما في فايدة معه من كل هالحكي …..

 
و متل كل ليلة شغلت التلفزيون و حطيت على اغاني ام كلثوم و قعدت و فتحت الواتس للاقي حدا حكيه بسهرتي الطويلة و بعتت رسالة لرفيقتي سلمى شو سهرانة لهلأ، قلتلي اي ولله شو عم تعملي انت؟؟ قلتلا قاعدة سهرانة لحالي كالعادة قلتلا و انت؟ قلتلي نزلت برنامج الويتشات مبارح و شو هالبرنامج يا فرح غير شكل ،قلتلا لشو هيدا البرنامج هاي اول مرة بسمع فيه قلتلي هيدا البرنامج بخليكي تتعرفي على الناس يلي ساكنين جنبك او حتى بغير دولة و تحكي معن، بسلي كتير نزليه عندك قلتلا لا ما بقدر نزلو بتعرفي حسام ما بحب هيك شغلات ابدا ولله بدبحني قلتلي شو بدو يعرفو؟؟؟ قلتلا انا كمان ما بحب هيك قصص ما بتقطع براسي ، قلتلي تصطفلي روحي اسهري مع الحيطان انا بدي سكر و كفي سهرتي على الويتشات بيباي ….
بعد يومين فتحت الموبايل ماركت و حملت التطبيق لانو فضولي غلب على خوفي و سجلت اسمي و رقم موبايلي و فتحته عملت جولة سريعة فيه و فجاة حدا باسم ملك الليل بعتلي مسج مسالخير فتحت الرسالة و شفت صورة شاب على البروفايل خفت فورا و سكرته و حذفت التطبيق …..

 
بعد يومين بالسهرة رجعت نزلته مرة تانية و فتت عليه و رجع الشب نفسه بعتلي مسالخير ردي علينا رديت عليه بمسالنور و بلش يسالني عن اسمي و عمري و انا جاوبه بمعلومات وهمية عني ،بعد شوي بعتلي شب تاني باسم اسمر يا اسمراني مسج بمسالخير و انا ما عرفت احكي مع ملك الليل الا اسمر يا اسمراني ،صرت احكي معن الاتنين و حديث بجر حديث لدرجة صارت الساعة 1بدون ما حس على الوقت و ما حسيت الا على زوجي فايت علي تلبكت كتير و سكرت التطبيق فورا و فات قلي مسالخير قلتله مسالنور و عملت حالي عم اتفرج على التلفزيون و ما حكيته ابدا ليش تاخر بالسهرة او اي شي فتت حطيت راسي و نمت …..

 
صرت كل يوم بالسهرة افتح هالبرنامج و اقعد بالساعات احكي فيه و كل يوم اتعرف على شب شكل و ما بس اكتفيت بالسهرة حتى بالنهار احيانا وقت افضى افتحه و دردش مع الاصدقاء يلي ضفتن على حسابي …..

 
بقيت اسبوعين على هالحالة قبل ما اتعرف على مراد الشب يلي رجع الضحكة لوجهي و رجعلي مشاعر و احاسيس ما بقا حسيت فيها من وقت كنت مخطوبة لحسام، شاب دمه خفيف كتير و مثقف و حكيو بفوت على القلب فورا حتى شكله وقت بعتلي صورته جذاب و مألوف كتير و مريح، بس الشي يلي كان قالقني انو ساكن بنفس محافظتي لهيك كنت حذرة معه كتير لانو خفت يعرفني و خاصة اني خبرته انو متزوجة و عندي ولدين ،بس جذبني كتير لدرجة صرت احكي معه ليل و نهار حتى باقي الاصدقاء عندي يبعتولي مسجات و انا طنشن لانو كنت مركزة مع مراد يلي طلب رقمي و رفضت اعطيه اياه بالاول لانو خفت بس بعدين اقنعني انو ما رح يدقلي و يزعجني ابدا الا اذا انا اعطيته ميسد كول قبل لهيك اعطيتو رقمي و صرنا نحكي على الموبايل بالساعات و نادرا جدا لنحكي على الويتشات و صار يعرف تفاصيل كتير عن حياتي و عيلتي و شكلي ،و مرة طلب يشوفني بس انا قلتله مستحيل و ما بقا ترجع تطلب تشوفني ابدا لانو انا متزوجة و بخاف يشوفني حدا بيعرفني و يخبر زوجي ولله زوجي بطلقني بنفس النهار…

ــــــــــــــــــــــــــــــــــــــــــــــــــــــــــــــــــــــ
الجزء التاني:

بقيت احكي مع مراد خمس شهور قبل ما شوفه اول مرة على ارض الواقع ،وقت كنت نازلة على السوق و دقلي قلي وينك يا قطة كانو ما بالبيت ،قلتلو لا انا بالسوق عم اشتري تياب لكرم قلي معناتا بدي شوفك قلتلو لااا حكينا بهالموضوع من قبل، قلي ولله من بعيد ما بقرب ابدا عليكي ،نظرة وحدة بس قلتلو طيب ماشي ، و وقت وصل على الشارع يلي انا فيه دقلي و قلي ما توقعتك حلوة هالقد ما نصفتي حالك وقت وصفتي شكلك قلتلو ليش شفتني؟ اصلا كيف عرفتني من بين كل هالناس قلي قلبي دليلي ،ليكي انا واقف عند الزاوية تماما اذا بتفتلي راسك شوي بتشوفيني ، فتلت راسي و شفته و قلتله انت احلى من الصورة ،قلي سكري هلأ رح ارجع دقلك بعد شوي ،رجع دقلي و قلي ليكي فرح في محل قبالك عطورات فوتي لعندو تركتلك امانة هنيك بس قليلو للشب انا من طرف مراد و هو رح يعطيكي اياها ، قلتلو شو هالامانة ؟ و ايمت لحقت تتركلي اياها ؟؟! قلي ولو نحن بعصر السرعة يلا ما تعذبيني شايفك ها ،فتت لعند الشب و قلتلو انا من طرف مراد قلي اهلا و سهلا فيكي مراد صديق عزيز علينا و اعطاني كيس طلعت بقلبه لقيت علبة مغلفة شكرته للشب و طلعت دقتله لمراد قلتلو هيدا عطر ،قلي ايه هيدا عطر غبار الذهب المفضل عندي بس تستخدميه تزكريني و انا اشتريت الي علبة كمان حتى كل ما شما اتذكرك و ليكي فروحتي كل ما بتخلص علبة البارفان من عندك قليلي لوصيلك على وحدة تانية من نفس المحل ……

 
قضيت ايام حلوة كتير مع مراد يلي كان يهتم كتير فيني و بكل تفصيلة بتخصني و صرت كل ما انزل على السوق شوفو من بعيد و بكل نزلة كان يفاجئني بشي ،ومرة قلي في محل ايس كريم لقدام شوي انا رح اسبقك عليه و اطلبلك شي على ذوقي و رح اقعد على الطاولة يلي قبالك قلتلو عنجد انك مجنون قلي انا صرت مجنون فيكي بس لو بتردي علي و بطلقيه لهل الطبل يلي عندك لعيشك متل الملكة قلتلو ما تقول عنو هيك بضل زوجي و ابو اولادي يلا سبقني و انا لاحقتك و وقت كنا قاعدين عم ناكل ايس كريم راح لعند الشب و حكاه كلمتين و رجع لطاولته و بعدا بعتلي مسج قلي بهديكي هالغنية يلي بدو يحطا الشب هلأ (انا بعشقك ) و على فكرة اللون الزهر احلى لون عليكي …

 
مع مراد حسيت باني مرة حلوة و مهمة ،مع مراد حسيت حالي متل الفراشة الطايرة بالعالي ، حتى خفت كتير من ايام تجي بلا ما يكون مراد فيها يلي عوضني عن اهمال زوجي و بعده عني ،بعد 10شهور من معرفتي فيه طلعت لشوفه و اقعد معه لاول مرة و هالشي كان بعد ما ترجاني كتير انو بس قعدي معي مرة وحدة بس لشم ريحتك و اطلع بعيونك و حس بنفسك و انا قبلت لانو كنت حابة جرب شعور جديد ،شعور جنون الحب ،و طلعت شفته لحالي و حطيت اولادي عند بنت حمايي بحجة انو رايحة عند الكوافيرة ،قعدت معه ساعتين و حسيتن كانو دقيقتين ،من زمان كتير ما قعدت مع رجال حسسني بانو انا موجود هون لاسمعك بس ،لاسمع قصصك و حكياتك و همومك و شو بتحبي و شو بتكرهي …..
تعلقي بمراد و حبي اله باعد المسافة اكتر بيني و بين زوجي يلي انتبه انو انا تغيرت كتير و ما بقا عم اسال عليه ابدا او عم دقق على سهراته و حتى وقت بقعد معه بضل ساكتة و شاردة ،كان مفكرني اني اتاقلمت و تعودت على بعده عني و انا كنت مرتاحة انو عم يفكر هيك ما كنت حابة يعرف انو مرته خلص فتحت القفص و طارت لمطرح تاني من غير رجعة ..

ــــــــــــــــــــــــــــــــــــــــــــــــــــــ
الجزء التالت:

مافي شي بضل على حاله ،الفرح ما بدوم و الحزن ما بدوم و يلي بينبنى على الغلط بينتهي نهاية تراجيدية ، قصتي مع مراد كان لازم يكون الها نهاية بس كنت متوقعة انا يلي انهيها او هو بس كانت الصدفة اكبر مننا و الها دور كبير بقصتنا ….
بعد يومين كان عندي مناسبة زواج بنت حماي لهيك نزلت على السوق انا و زوجي لحضر للعرس ،اشتريت فستان سهرة الي و بعدين رحنا لنشتري الو تياب و بعد ما خلصنا قلي حسام ييي نسيت اشتري عطر ،رح لف و ارجع في محل قريب من هون و معروف ،لف بالسيارة و صف جنب المحل يلي كان مراد يوصيلي منه على عطر غبار الذهب ،قلي مشي نزلي معي قلتلو لا خلص روح انت لحالك ،قلي ماشي، نزل حسام من السيارة و فات على المحل و بعد ربع ساعة طلع من المحل و اشرلي بايدو تعي و رجع فات ،انا تلبكت و ما ضل عندي خيار الا اني انزل من السيارة و روح لعندو،نزلت من السيارة و انا خايفة و قلبي عم يدق بسرعة و ادعى لربي انو الشب ما يحكي انو بيعرفني ، فتت و سلمت على الشب و اول ما شافني قلي اهلا و سهلا فرح نورتي المحل كيفو صديقنا مراد ،انخطف لوني و حسيت حالي رح اوقع بارضي من الصدمة ،

اطلع فيني زوجي و هو متفاجا قلي مين مراد؟ قلتلو ما بعرف و فتلت وجهي للشب و قلتلو عفوا مين مراد ؟انت اكيد مخربط ؟ قلي االشب لا مو انت فرح قلتلو ايه ،قلي مو انت يلي كنت تجي تاخدي من عنا عطر غبار الذهب من طرف مراد قلتلو لا انا هاي اول مرة بفوت محلكن ، انتبه الشب علي اني عم انكر و متلبكة، قلي فورا بجوز مخربط بعتذر قلتلو ولا يهمك بتصير كتير ، قلي زوجي تعي اختاريلي عطر من هالاتنين محتار بين ال Hugo boss و one million ،قلتلو خود ال Hugo boss ما عندك منه ،

اشترينا العطر و طلعنا بالسيارة و نحن على الطريق التفت حسام علي و قلي شي غريب انو يخربط الشب بالشكل و يطلع نفس الاسم قلتلو عادي بتصير كتير ،رجعنا على البيت و فتت لغير تيابي و لحقني فورا قلتلو ليش ما نزلت تجيب الاولاد من عند اختك قلي نازل بس بدي شوف شغلة، قلتلو شو بدك تشوف؟ ،فتل وجهو علي و هو ماسك بايدو علبة البارفان ،قلي شي غريب كمان انو لاقي عندك بارفان غبار الذهب شو هالصدفة يا فرح ،تعي لشوف بئا احكيلي مين هيدا مراد ؟ ،قلتلو حسام شبك شو جنيت ؟ ،مسك العلبة و ضربا بالحيط و انكسرت و نزلت مية شقفة على الارض،

قلي ايه جنيت حملني و زتني على التخت و فك قشاط بنطلونه و ضربني فيه اول ضربة و قلي يلا احكي لشوف عم اسمعك مين مراد؟و من وين بتعرفيه ؟و اكام مرة شفتيه و طلعتي معه؟ ،انا بلشت ابكي و قلو ما بعرفو … الشب مخربط …و بعدين هالعطر مشهور كتير و كل النسوان عندن منه ،رجع ضربني مرة تانية و قلي كذاابة انا شايف كيس هالمحل عنا بالبيت من قبل يعني انت شارية منه و كذبتي و قلتي انا اول مرة بفوت على هالمحل ، هاتي موبايلك لشوف ،قلتلو شو بدك فيه لموبايلي ،هجم علي و اخدو مني ،قلي شو الباسورد ؟ ، قلتلو هات انا بفتحه ،قلي لا معلش ارتاحي انا بفتحه بس قليلي الباسورد ،

سكتت شوي و قلتلو مراد ،قلي شوووو حاطة الباسورد باسمه كمان و بتقليلي ما بعرفو لمراد ولله لاقبرك بارضك وين حاطه صورو ؟، قلتلو ما عندي صور الو لاني بس بحكي معه على برنامج دردشة يعني مجرد حكي بس ما شفته و لا شافني، قلي كذابة شو اسم البرنامج يلي بتحكي معه ؟ ،قلتلو ويتشات ،فتح حسام التطبيق و فتح محادثتي معه لمراد و قبل ما يقرأ اي كلمة ،فتح على صورته يلي كان حاططا على بروفايله ،و قلي يا سلام مراد الشامي بتعرفي مين هيدا ؟ هيدا اخوه لرفيقي و بتعرفي كمان انو هيدا خاطب و عرسه بعد شهر ،انا انصدمت كتير لانو طلع زوجي بيعرفه و تانيا لانو طلع مراد خاطب و عرسه بعد شهر و هو ابدا ما قلي هالشي ،قلتلو انا بحكي معه حكي عادي لعبي وقتي بس ما في اي شي بيناتنا ،

رجع زوجي على المحادثة الطويلة بيني و بين مراد و يلي كلها كلام حب و غزل و من ضمنا فيها حكي وقت قلي ايمت بدي ارجع شوفك مرة تانية ؟،قرب حسام الموبايل على عيوني و قلي اقرأي لشوف بصوت عالي هون شو كاتبلك ؟ ايمت بدي شوفك مرة تانية ؟معناها يا مدام يا متزوجة هو شايفك من قبل ،قلتلو حسام طول بالك انت فهمان الموضوع غلط ،قلي اي صح فهمان غلط رحتو شفتو بعض و قعدتو مع بعض و تناقشتو بقضايا مهمة ،اكيد كان كل نقاشكن عن المجاعة و تلوث البيئة ولله حرام علي انا جد فهمان الموضوع غلط و رجع يضربني و انا صرخ و قلو خلص حسام ولله مو متل ما انت مفكر ..خليني فهمك بس و بعد نص ساعة من الضرب المتواصل اخد موبايلي و طلع برا الغرفة و قفل الباب علي و قلي هون بدك ضلي محبوسة بهالغرفة لتموتي فيا من الجوع و العطش و هلا بدي صور كل محادثاتك الغرامية و ابعتا لاهلك خلين يشوفو بنتن المحترمة شو عم تعمل من ورا ضهري؟….

 
خفت كتير انو حسام يصور المحادثات و يبعتا لاهلي لانو وقتا بكون ادمرت على الاخير ، كيف رح يكون الي عين قابل اهلي بعد هالفضيحة ،اكيد ما رح يسامحوني و يقلولي انت وطيتي راسنا قدام زوجك و الناس ،و يا ضيعان تربايتنا فيكي و ما رح يفهمو اي مبررات مني لانو بيعرفو انو حسام رجال ممتاز بكل المقاييس و بحياتو ما قصر علي او على اولاده ،دعيت لربي كتير يغفرلي و يقيمني من هالمصيبة باقل اضرار ممكنة و وعدت حالي انو اذا طلعت منا على خير ما بقا عيد هالتجربة ابدا و على قد ما بكيت هديك الليلة نمت فورا و فقت تاني يوم الصبح و حاولت افتح الباب بس كان مقفل و خبطت كتير على الباب يا حسام افتحلي لك خلينا نحكي شوي و نتفاهم بس ما حدا رد علي ،

رجعت تسطحت على تختي و انا جسمي كلو مكسر من اتلة مبارح بس عقلي ما وقف عن التفكير ابدا بانو حسام وينو و وين الاولاد و لايمت بدو يضل حابسني هون و معقول يكون صور المحادثات و بعتا لاهلي !! افكار كتير كانت عم تخنقني و تموتني لصارت الساعة 12الضهر ،سمعت صوت تسكيرة باب البيت ،قمت فورا على الباب و خبطت على باب غرفة النوم و قلتلو حسام افتح شوي خلينا نحكي ،بعد ربع ساعة قلي ما رح افتحلك الباب لحتى تطلع روحك على الاخير وقتا بفتحلك الباب و باخدك بوجهي على المقبرة يا خاينة ،انا ولا مرة خنتك و لا فكرت خونك ،لك كل الناس بتشهد باخلاقي و مين انا و ما بحياتي قصرت معك بشي و بالاخير هيك بتكافيني،بتروحي بتعشقيلي شاب و بتطلعي و بتفوتي معه و بتوسخيلي سمعتي، لك ما عملتي حساب سمعة اولادك ، يقولو امن وحدة ما بتسوا ،

اكام مرة نمتي معه؟ قلتلو ولا مرة، شو شايفني ليش قدامك وحدة ما بتسوا، ما كان في شي بيني و بينه الا حكي عادي و كل يلي قعدت معه 4مرات بس ،قلي لك كيف اجا من قلبك تعملي هيك معي ؟،قلتلو انت السبب ،انا مرة بالاخير و بدي حس حالي اني متزوجة و عندي رجال يهتم فيني ،كنت كل يوم تروح تسهر مع رفقاتك و تزتني لحالي و الي سنين على هالحالة ،ملل و وحدة كل ليلة و انت ما تسال علي ابدا حاولت كتيرر فهمك اني بحاجتك بس انت كنت عايش متل الشاب الاعزب يلي ما عندو مرة و بيت و اولاد الن حق عليه ،انا ما عم اعطي مبرر للشي يلي عملتو لانو بعرف حالي غلطانة و غلطي الاكبر انو انا ما طلبت الطلاق منك من زمان و قبلت عيش معك على هالوضع لحتى انجريت للغلط ،

ما انا المسؤولة الوحيدة عن هالشي انت كمان الك ايد بهالشي،سكتنا شوي و قلتلو بعدين كرمال العشرة يلي بيناتنا طلقني على الساكت و ما في داعي تحكي للناس او لاهلي عن هالشي يلي صار مو كرمالي انا بس كرمال اولادي ،قلي انشالله مفكرة مراد رح يترك خطيبته و يجي يتزوجك فورا بعد ما تطلقي مني،هيدا مراد شب صايع كتير من بنت لبنت و اهلو خطبولو كرمال يركز و يعقل بس فعلا انتو الاتنين لابقين لبعض كتير ،

قلتلو انا ما عم قلك طلقني كرمال روح اتزوجو لانو انا ما فكرت بحياتي انو ااطلق كرمال اتزوجه لانو انا ما بحبه لمراد ،انا بس كنت عبي وقتي معه وقت كنت ابقى لحالي و مل ، قلي رح طلقك بس ما قبل ما دفعك التمن غالي ،ما انا يلي مرتي بتلعب من ورا ضهري و بسكتلا، انا لحمي مر كتير ،بعدين فتح الباب و فات و قفله فورا و بلش يطول تيابه من الخزانة ،قلتلو شو عم تعمل ؟قلي بدي طلع تيابي من هالغرفة لانو رح تصير هالغرفة سجنك و قبرك ،و شايفة هالباب ما رح ينفتح الامرتين باليوم لزتلك صحن اكل و يرجع يتقفل عليكي لانو مرة متلك ما بتستحق تعيش و تطلع و تفوت لانو ما قد الثقة يلي اعطيتك اياها ،صرت ابكي و قلتلو ما من حقك تحبسني هون خلص طلقني بالمعروف و بعدين لو انت خنتني انا كنت عملت هيك فيك كنت رح سامحك فورا ،ضل ساكت و ما رد علي اخد اغراضه و طلع و قفل الباب ،صرت خبط على الباب و قلو حسام افتحلي الباب لك بدي شوف اولادي اشتقتلن ،ما من حقك تعمل هيك فيني …..

 
تاني يوم فتحلي الباب و حطلي سندويشة جبنة و خيارة بصحن و دفشو برجله على الارض و كان لابس تيابه الجديدة ،قلتلو لوين ؟، قلي لعرس اختي شكلك نسيتي انو الليلة عرس اختي ،ولا مراد اخدلك عقلك ، بتمنالك سهرة سعيدة افتحي التلفزيون حتى تعبي وقتك و ما تملي و بالنسبة للناس يلي بدن يسالوني عنك رح قلن مرتي مرضانة لهيك ما اجت ، قلتلو يبقا باركلا لاختك عني و قلها جوازة الدهر انشالله و قلو لصهرك يدير بالو عليا منيح و يعاملا بما يرضي الله ،قلي بدون ما قلو هالحكي ،اختي تربايتنا وبتعرف انو المرة المتزوجة لازم تصون اسم زوجا بغيابه و سكر الباب و راح …..

ــــــــــــــــــــــــــــــــــــــــــــــــــــــــــــــــــــ
الجزء الرابع

بقيت عشرين يوم كاملين بنهارن و ليلن بغرفة 4امتار ب5امتار و فيا حمام مترين بمتر ،ما كان ينفتح باب الغرفة الا مرتين باليوم لوجبة الفطور و الغدا ، كنت بسجن رسمي ،بكيت كتير بهالايام و نحفت كتير حتى اذا وقفت على مراية كنت خاف من شكلي يلي تغير كتير و كل اسبوع كان يعطيني الموبايل و هو ماسكو بايدو لحكي اهلي عشر دقايق و طمنن عني، حتى اولادي ما كنت شوفن ابدا مع انو ترجيته كتير ليجبلي اياهن بس ما قبل ابدا….

 
اخر 3ايام من العشرين يوم ،ما بقا قبلت اكل شي ، كان يفتح الباب ياخد الصحن متل ما هو لانو كنت مقررة يا بموت يا بطلع من هون و قضيت هال 3ايام نايمة و كانو غايبة عن الوعي و بالاخير فتح الباب و شافني نايمة بالتخت ،قرب علي و قلي فرح ….فيكي شي …..فرح …..ردي علي ….فتحت عيوني و قلتلو بعد عني ما طايقة شوف وجهك او اسمع صوتك ،اتركني بحالي انا عم موت و رجعت غمضت عيوني ،قلي فرح قومي خلص ،قومي جبتلك اكل، الك 3ايام ما اكلتي شي، قلتلو روح جبلي اولادي لودعن قبل ما موت، قلي بجبلك اياهن بس قومي كلي شي ما رح خلين يشوفوكي بهالمنظر ،

قلتلو بتعرف المتزوجة اذا زنت عقابها رجم لحتى الموت و من شروط الزنا يكون متواجد 4شهود حتى يطبق العقاب عليها و انا ما زنيت لحتى انحبس للموت ،انت اكتر شي فيك تعملو انك طلقني، انا غلطت صح و انت غلطك اكبر مني بحبسي هون متل الحيوانة، يمكن الله غفرلي و سامحني وانت ما غفرتلي انت واحد مجرم و لئيم بمعاملتك معي حتى بمشاعرك و اهتمامك كنت لئيم و بخيل ،انا بدي تحجزلي لعند اهلي ،و انا يلي رح روح بنفسي و احكيلن كل شي و بعدا كل واحد يروح بطريقه و الله يبعتلك بنت الحلال يلي تصونك و تقدرر تتحمل الشي يلي انا ما تحملته و انا الله يبعتلي الرجال يلي ما يخليني اضطر اطلع لبرا ،قلي انا بحبك يا فرح و مستحيل فكر اني طلقك و لو بدي طلقك كنت من وقتا طلقتك و ما حبستك هون لربيكي و خليكي تندمي على الشي يلي عملتيه ،قلتله حتى لو انت ما بدك طلقني انا ما بقا بدي اياك انا كرهتك و انا كان لازم من زمان اطلب الطلاق،قلي قومي كلي هلا و رح ابعتك لعند اهلك انت و الاولاد اسبوعين تغيري جو و انا ما خبرتن ابدا عن الشي يلي صار بيناتنا و بعدين منتفق شو بدنا نعمل و خدي موبايلك حطيت فيه شريحة جديدة و عملتله سوفت وير ..

 
نزلت عند بيت اهلي يلي كانو بغير محافظة و وقت شافوني انصدمو بشكلي و قلتلن اني مرضانة كتير و صاير معي فقر دم لهيك نحفانة كتير و ما خبرتن ابدا و خلال فترة زيارتي عند اهلي، كان حسام يدقلي كل يومين ليطمن علي كيف صرت و يحكي مع اولادو و بعد اسبوعين لحقني حسام لعند اهلي و رحبو فيه كتير لانو كان بحبوه كتير و كالعادة فضولنا غرفة لنام فيها متل كل مرة و بعد شهر و نص تقريبا لاول مرة بيجمعنا تخت واحد انا وزوجي حسام ، سهرنا مع بعض لطلع الضو ،و انا حكيت كل شي بقلبي و قلتلو انا بحبك و انت رجال ما في منك، يمكن اي وحدة محلي بتتمنى تكون مرتك بس انا ما كنت سعيدة معك و انت على ما يبدو كنت غير سعيد معي ، انا اي حل بتقترحو انا موافقة عليه ،قلي خلينا نبلش صفحة جديدة ،

قلتلو منبلش بس بشرط نطوي الصفحة القديمة على الاخر و لا كانو كانت موجودة من قبل ،انا غلطت و ما بدي ضل تهتني بغلطي و ضلك مربحني جميلة انك بقيت علي و ما طلقتني ،انا عم قلك من هلأ اذا بدك خود وقتك اكتر لتفكر و تقرر على راحتك و اذا حسيت حالك قادر تنسالي هالشي و تسامحني و ترجع تحط ثقتك فيني ،منرجع منبلش من جديد اما اذا ما رح تنسى هالشي و ضلك تشك فيني لا مننفصل هلأ احسن، قلي الطلاق ما سهل ابدا ما بس لانو نحن منحب بعض و لانو عنا اولاد،اذا تطلقنا رح يضيعو بيناتنا لهيك منحاول من جديد كرمال كرم و امجد…

 
رجعت تاني يوم ضبيت تيابي و رجعت على بيتي انا و زوجي و اولادي ،رجعنا عيلة وحدة ،زوجي بقلي اني سامحتك بس انا متاكدة انو هو ما نسي و انا ما بنكر انو زوجي تغير و اداارك غلطو معي و صار يسهر مع رفقاته يومين بالاسبوع ، بس هالخوف و القلق و التجربة البشعة يلي مريت فيها اثرت فيني كتير و اعطتني درس انو العيلة هي رقم واحد بحياتنا و بتستاهل انو نضحي كرمالا .
انتهت.

اكتب كلمة #زاكي في التعليقات لتصلك مزيد من الوصفات المجربة والمميزة خصيصاً لك

هل تحب مشاهدة وصفات بالصوت والصورة؟ اعمل اشتراك لقناة زاكي على اليوتيوب من هنا لتصلك جديد وصفاتنا بالفيديو:
قناة زاكي على اليوتيوب

عندك جوال ذكي؟ ممتاز كتير تفضل أحلى هدية من زاكي لعيونك, حمل على جوالك تطبيق زاكي, أقوى مرجع عربي لفن الطهي, من هنا:
تطبيق زاكي للأجهزة الذكية

عندك حساب على الفيس بوك؟ طيب شو بتنستى استفيد من وقتك وتعلم كل يوم وصفة جديدة على يد أمهر شيفات في الوطن العربي, بالانضمام لمجموعة زاكي وصفحة زاكي على الفيس:
للانضمام على مجموعة زاكي من هنا 
للاعجاب بصفحة زاكي من هنا ومتابعة كل جديد

احفظ موقع زاكي في المفضلة على جوالك, لتصلك دوماً جديد وصفاتنا مش هتلاقيها إلا في زاكي
موقع زاكي لفن الطهي