وائل:سحر بلا ولدنة و اهدي بقا ،ما رح اكل شقفة منك

سحر:طيب بس اقعد عاقل

وائل:هههههه ما بوعدك،يلي بشوف هيك جمال بيقدر يقاوم،اسمعي يا مجنونة انا بحبك و رح اتزوجك و تصيري مرتي ،بقا ليش خايفة و عم نأجل الموضوع ،هلأ ولا بعدين نفس الشي بس هلأ احلى ايامنا

سحر:لا كل شي بوقتو حلو

وائل:اوف شو انك وحدة مملة و بنت روتينية ،فعلا انا انغشيت فيكي ،كل هالاجواء يلي عاملك اياها و بعدك باردة متل لوح التلج ،سحر اذا ما مرتاحة خلص فيكي تروحي ،من هون الباب

سحر:شبك زعلت

وائل:اي ولله زعلت لانو ما عم تبين فيكي المنيحة ،تعي بقا

نزلت من بيت وائل انا و عم ابكي

وائل:سحر ما بدا كل هالقد،قلتلك رح اتزوجك ،ما بهون علي شوفك عم تبكي

وصلني قبل بيتي بشارعين و نزلت من السيارة و خبطت الباب بعصبية و مشيت و انا حاسة حالي رخيصة كتير ،وصلت على البيت و انا خايفة تجي عيني بعين سلوى يلي خنت ثقتا و خنت ترباية اهلي ،ما اتصل فيني وائل ابدا و لا شفتو ،بعد يومين اتصل فيني و قلي ناطرك على باب الجامعة بالسيارة ،طلعت معو انا و ساكتة

سحر:وائل انت رح تتنزوجني مو هيك؟

وائل:سحر معقول عم تسألي هيك سؤال،طبعا

شغل السيارة و مشي لوصلنا على بيتو

وائل:شبك يلا نزلي

سحر:ما بدي؛بدي ارجع على البيت

وائل:يالله شو انك نكدة و مقتة ،خلص رح وصلك على بيتك و بس تروقي حكيني

سحر:طيب

بعد يومين بعتلي مسج وائل انو ناطرني بالشقة ضروري كتير ،بعد ما خلصت جامعة ؛اخدت تكسي و رحت لعندو ،اول ما دقيت الباب و فتحلي ،سحبني من ايدي لجوا

سحر:شوفي؟

وائل:هههههه مافي شي؛مشتقلك بس

قبل ما انزل من عندو ،اعطاني علبة دواء

سحر:شو هيدا ؟

وائل:هيدا مانع حمل ،خدي منو حبة كل يوم و ضروري كمان )كرمالك يعني،لنخلص جامعة و نتزوج ،يبقى منجيب اولاد

سحر:وائل انا ما مرتاحة بكل هالقصة و ما بقا رح ارجع شوفك هون ،انا غلطت و ما بدي تابع بالغلط

وائل:هلأ شايفتيني رايق ،بدك تزعجيني يعني ،خلص منحكي بعدين بالموضوع

بعد ما نزلت من عندو كنت حاسمة امري انو ما بقا ارجع شوفو لوائل ابدا ،بس وقت اتصل فيني و ما رديت عليه و بعتلي مسج لروح لعندو و كمان ما رديت عليه ،طلع بوجهي تاني يوم و هو معصب و اشرلي بعيونو لالحقو ورا المبنى لنحكي ،و قبل ما احكي اي كلمة مسكني من ايدي و صار يبهدلني

وائل:انا وقت بدقلك بتردي علي فورا و وقت بقلك بدي شوفك بتنخلقي قدامي بنفس الساعة

سحر:قلتلك ما بقا بدي شوفك ببيتك ،يا منرجع متل ما كنا يا كل واحد يروح بطريقو

وائل:ولله هيك صار الحكي هلأ،ايه لا ما حذرتي،شو شكلك نسيتي انو صورك معي

فتحلي موبايلو و صار يقلب بالصور يلي بعتلو اياهن

وائل:ها شو رايك بهدول الصور هيك اعمل منن عشر نسخ و علقلك اياهن على كل حيطان الكلية ،وقتا شو بصير فيكي

سحر:وائل عم تهددني بدك تعمل فيني هيك

وائل:اي بعمل هيك و بعمل لسا اكتر من هيك اذا بدك اضلي متنحة و عاملة فيا راس…

سحر:عنجد انا مصدومة فيك

تركتو و مشيت؛رجع سحبني من ايدي

وائل:انطريني برا الجامعة

سحر:ما…

وائل:سحر ما تعصبيني اكتر ما انا معصب

سحر:طيب
صرت كل مرة برفض فيا انو شوفو ببيتو ،بيبهدلني و يهددني ،و انا كنت ارضخ لالو خوفا من الفضيحة، طلع وائل الكريم و الطيب انسان تاني انسان ندل و واطي و مبتز

______سلوى_____
بعد فترة زدلي الاستاذ اياد راتبي الي بس و هالشي حسسني انو عم يميزني بين كل البنات
اياد:ما تخبري حدا انو زودتلك الراتب حتى ما يتحسسو باقي البنات بس انت بتستاهلي لانو عم تتعبي اكتر حدا

سلوى:ايه يسلمو كتير

رجعت طاير عقلي و اشتريت سندويش شاورما لاخواتي احتفالا بهالمناسبة،و و انا عم اعطي كل وحدة سندويشة خبرتن انو صاحب الشغل زودلي راتبي

سندس:عنجد انت بتستاهلي ،هالمدير باينتو كريم كتير غير يلي كنت تشتغلي عندو من قبل

سلوى:لا بس الشغل احسن و اوسع عند هيدا ،المهم انو عم اشتغل و اقبض راتب نمشي حالنا فيه

اطلعت على سحر ؛كنت ماسكة سندويشتا وشاردة

سلوى:هااااي سحر ،وين رحتي

سحر:ايه ايه هون مبروك اختي

سلوى:الله يبارك فيكي بس شوقصتك صفناتك كترانة ،صاير معك شي

سحر:انا …لا ابدا ….بتعرفي الدنيا جاي على امتحان قلقانة من الدراسة بس

سلوى:طيب ،اذا ناقصك شي قليلي ماشي

سحر:ايه

بالليل اول ما حطيت راسي على المخدة ،حسيت على باب غرفتي عم ينفتح

سحر:نمتي الا لسا؟

سلوى:لا في شي

سحر:ولاشي حابة نام جنبك اليوم

رفعت الحرام و نزلت بالتخت وانا بعدني عم اطلع فيا و بلشت اقلق من جهتا لانو حسيتا مخبية شي و تصرفاتا ما عادية ابدا،تسطحت جنبا و انا عم العب بشعراتا

سلوى:سحر صاير معك شي حبيبتي

انفجرت بالبكا و قربت علي و لفتني

سلوى:يييي رعبتيني شو صاير معك ؟

سحر(تبكي): ولاشي مضغوطة من الدراسة بس

سلوى:اخ منك وقعتيلي قلبي ،انت قدها و قدود ،ادرسي و اتكلي على الله و من اتكل على الله ما خاب

بقيت عم اشتغل عند الاستاذ اياد يلي كان على طول يبدعي اعجابو بشغلي و اني كنت قد الثقة و المسؤولية وانا كنت سعيدة بالشغل عندو لليوم يلي تعبت فيه بالشغل ،كنت مرشحة قبل بيوم و كابرت على حالي و رحت على الشغل ؛بس خلال الشغل تعبت كتير ،اخدت اذن منو لروح على البيت

اياد:لو ما جيتي هالايسبوع ما في مشكلة؛بس تحسي حالك منيح ارجعي عالدوام و راتبك ماشي

بعد ما قلي هالكلمتين ،مشيت لاطلع من مكتبو بس انا و عم افتح الباب فتل راسي و نزل ضغطي و حطيت ايدي على الحيط استند قبل ما اوقع ،ركض لعندي اياد و لفني من خصري

اياد:تعي ارتاحي

كان عم يطلع بعيوني و انا ما قدرت قاوم الجاذبية و اللمعة يلي بعيونو ،حسيت بدقات قلبي مسموعة و نظراتو غرفت بقلبي لدرجة ما بقا حسيت على شي حولي و نسيت انا ليش كنت عندو ،هداني لوصلت على الكرسي

اياد:شكلك تعبانة على الاخر

سلوى:اي انا الحق علي هملت حالي ،استاذ اياد الله يخليك اطلبلي تكسي يوصلني على البيت …

اياد:خلص انا بوصلك هلأ بس لترتاحي شوي ،رح اطلبلك كاسة ليمون منيحة لحالتك

سلوى:لا ما في داعي ،هلأ بس ارجع على البيت بنام و بفيق منيحة

قمت وقفت انا و عم ارتكي على طاولة المكتب
اياد:وين رايحة ،طب لحظة

قام وقف و لبس جاكيتو

سلوى:ولله ما في داعي توصلني ؛خلص باخد تكسي من الشارع ،ما بدي احرجك

اياد:لا ولو ما في احراج و اي موظفة بمحلك كنت رح وصلا

طلعت بالسيارة معو و هاي اول مرة بطلع مع حدا غريب

سلوى:من هيدا الشارع

اياد:ولله بيتك بعيد عن المعمل

سلوى:اي بطلع بباصين حتى وصل بس تعودت …هون عندك استاذ اياد ،يعطيك العافية و انشالله ما بتأخر بالاجازة

اياد:ما في مشكلة خدي راحتك ،لتتحسني على الاخر ارجعي و رح خلي انتصار تسد محلك

نزلت من السيارة و انا شبه دايخة ،فتحت الباب و فتت فورا على غرفتي تسطحت انا و عم اشلح تيابي ،و بعدين قمت عملت كاسة زهورات و دورت على دوا الكريب يلي كانت عم تاخدو سحر من يومين وقت كانت مكربة ؛انا و عم دور عليه بخزانتا لقيت ظرف دواء تاني

سلوى:لشو هيدا الدوا ،شكلو غريب

فتحت الرشيتا المرفقة مع الدواء و كانت الصدمة

سلوى:مانع حمل ..لشو مانع الحمل …ليش عم تاخد سحر منو

حسيت راسي رح ينفجر من يلي شفتو و من الافكار يلي تزاحمت براسي،نطرتا لسحر لترجع و انا بدني عم يرجف ، ما صدقت ايمت فتحت الباب و فاتت ،شافتني قاعدة و عم هز برجلي

سلوى :و اخيرا شرفتي ،شو هيدا

تفاجأت و تغيرت ملامح وجها

سحر:هيدا دوا

سلوى:ايه بعرف دوا و بعرف لشو كمان ،ليش عم تاخديه،بشو بيلزم بنت متلك

سحر:لانو انا البريود مخربطة عندي و نصحتني فيه رفيقتي ماريا و اشتريتو من الصيدلية و عم داوم عليه و زبط وضعي عليه

ارتاح قلبي شوي و قعدت على الصوفاية انا و عم حس وجهي السخن

سحر: شبك شكلك انعديتي كريب مني

سلوى:ايه ،طب ليش ما قلتيلي هالشي من قبل

سحر:الموضوع تافه و نسيت خبرك ،يعني انت ملهية بشغلك و ما بدي اشغلك بالك فيني كمان

سلوى:طيب انا تعبانة و بدي فوت نام

سحر:طيب و انا هلأ بعصرلك ليمون و بلحقك فيه

حطيت راسي على المخدة انا و عم استغفر ربي على التفكير العاطل يلي فكرت فيه بسحر،بعد يومين رجعت على شغلي ،و اول ما وصلت اجت ام محمود و خبرتني اطلع لعند الاستاذ اياد

اياد:معقول ما معك موبايل !

نزلت راسي انا و منحرجة من سؤالو

سلوى:لا ولله ما معي

اياد:كنت بدي اطمن عليكي و نزلت طلبت رقمك من البنات بس قالولي ما معك موبايل ،فعلا استغربت كيف عايشة انت بلا موبايل

سلوى:عادي ،هالتقنية انا ما كتير حبيتا

اياد:بس ضرورية ،اشتري واحد هالشهر

سلوى:لا ما …

اياد:معلش خلي سعرو على حساب الشغل،يعني كرمال اعرف اتواصل معك اذا احتجت شي

سلوى:حاضر

اياد:كنت بدي اسالك كيف صرتي بس وقت شفت وجهك منور حسيت انو تحسنتي عن اخر مرة كنت هون

سلوى:ايه لحمدلله

بقي عم يطلع فيني و انا ساكتة

اياد:طيب ،ما ضل شي قولو ،حكيت كل شي؛فيكي ترجعي على شغلك

كان يوم عن يوم عم اكتشف فيه شغلات حلوة للاستاذ اياد؛كان كريم كتير و مذوق و لطيف و حسيت معي هالشي بالتحديد ،اشتريت موبايل و ما كان فيني خبي فرحتي فيه ،كان طول عمري نفسي امسك موبايل متل رفقاتي بس وضعي المادي ما كان بيسمح انو اترك مساحة الي ،كان البيت و اخواتي اولوية رقم واحد عندي و بعدين انا ،بعد يومين وصلتني اول مسج على موبايلي

_مبروك، تشوفي على وجهو الخير،سيفي رقمي عندك ،انا اياد

ضميت الموبايل لصدري انا و عم ابتسم ،كنت مبسوطة و عم حس شعور لاول مرة عم حسو ،اول مرة حدا بيهتم فيني هالقد،و انا عم احفظ رقمو لاياد،اتصل فيني

اياد:مسالخير

سلوى:مسالنور

اياد:دقتلك قلت بلكي ما وصلتك الرسالة

سلوى:لا وصلت

اياد:اممم ..شو عم تعملي؟

سلوى:…عم اتعلم على الجهاز

اياد:اذا صعب عليكي شي ،انا بعلمك عليه بكرا

سلوى:لاسهل

اياد:….طيب….ماشي بشوفك بكرا

سلوى:ايه انشالله

اياد:سلوى اذا بيلزمك اي شي ما تترددي واتصلي فيني اوك

سلوى:كلك ذوق استاذ اياد

اياد:طيب تصبحي على خير

سلوى:و انت من اهلو

سكرت الخط معو و فاتت اختي سحر لعندي و اول اطلعت فيني

سحر:شبو وجهك؟

سلوى:شبو وجهي؟

سحر:احمر كتير ،مع مين كنت عم تحكي اه؟!هههه

سلوى:روحي عني ولو انا ناقصتك

سحر:ايه الله يسمعنا الاخبار الطيبة

لاول مرة حسيت انو كان اياد متلبك و هو عم يحكي معي ،حسيت انو في عندو حكي و بدو يقولو بس في شي مانعو ،يمكن جديتي بالشغل منعتو من انو ياخد و يعطي معي، و انا حسيت بشعور جديد اتجاهو ،يمكن اسمو حب او اعجاب او ما معروفة هويتو ،بس ما قدرت امنع حالي من اني فكر فيه ، تاني يوم بعد ما خلصت شغل و طلعت من الورشة و انا راجعة على البيت ،كانت الدنيا عم تمطر ،سمعت صوت زمور سيارة بس ما التفتت حتى سمعت اسمي ،التفتت و كان اياد بالسيارة،نزلت عن الرصيف و حنيت راسي لاحكي معو من الشباك

اياد:اطلعي اطلعي

سلوى:ما في مشكلة موقف الباص لقدام شوي

شد جسمو و فتح الباب من جوا

اياد:اطلعي

انحرجت و طلعت معو

اياد:حدا قلك من قبل اني باكل بنات شي ؟

سلوى:لا هههههه
اياد:شبك لكن ،كل ما بعرض عليكي توصيلة بتخافي …

سلوى:لا ما خوف بس انا ما بحب عذبك

اياد:يا ستي عذابك راحة الي ،و هلأ على شو بدك تعزميني؟

سلوى:اعزمك!

اياد:شبك تغير لون وجهك ههههه خلص انا بعزمك و طالع ميت من الجوع و..

سلوى:انشالله غير مرة

اياد:لا هلأ و حابب احكي معك بموضوع بالشغل يعني بس بعيد شوي عن جو المكتب

سلوى:بس انا ما مخبرة اخواتي و بخاف ينشغل بالن علي لانو ما بالعادة بتأخر عن االبيت

اياد:ما رح اخرك ،ساعة بالكتير

سلوى:طيب

فتنا انا و اياد على مطعم كتير مرتب ،كنت متلبكة كتير و ما متعودة على هيك اجواء،سألني شو بحب اكل و قلتلو على ذوقك ،بدأ حكيو معي بأسئلة عن عيلتي و اكام اخت عندي

اياد:ابوكي و امك متوفايين يعني و انت المسؤولة عن اخواتك؟

سلوى:ايه

اياد:مسؤولية ما هينة ابدا يعني اختك طالبة جامعة و التانية مدرسة و ااكيد بدن مصروف بشكل يومي

سلوى:ايه بس لحمدلله امورنا تمام و انا قد هالحمل

اياد:اكيد ما في شك طيب ما عندك عموم او اخوال ؟

سلوى:لا عندي عم واحد بس بس متوفي و ما منحكي مع عيلتو

اياد:ليش؟عفوا اذا كنت عم ادخل بخصوصياتك

بقيت ساكتة و ما حبيت رد عليه بشي لانو فعلا السبب ما بينحكى لحدا لا الو و لا لغيرو و لا لاي مخلوق

سلوى:شو الموضوع يلي كنت بدك تحكي فيه معي؟

اياد:شبك مستعجلة،كل هالقد القعدة معي مملة

سلوى:لا ابدا ،ما قصدي هيك

اياد:بعرف شو قصدك و بفهمك منيح و حبيت هالشي فيكي ،كأنك بنت جاي من كوكب تاني او من زمن تاني ،فكرت هيك نوع من البنات انقرض من زمان

سلوى:اي نوع؟

اياد:البنت الملتزمة المحافظة يلي بتحس انو هيك قعدة بمكان عام و مع شاب ما من عيلتا غلط كبير

سلوى:صح انا هيك لهيك يمكن عم تحس انو انا قاعدة و ما مرتاحة

اياد:ايه حسيت ،المهم انا فكرت بالفكرة يلي اقترحتيا علي و قررت انو بلش اشتغل فيا و عم دور على صالة كبيرة لنعرض فيا البضاعة

سلوى:ايه منيح الله يوسع رزقك يا رب

اياد:و اذا نجحت رح يكون الفضل الك و ما بس هيك رح تستلمي الشغل انت فيا

سلوى:استاذ اياد…

اياد:نحن برا الشغل ،قليلي اياد بس

سلوى:طيب انا ما بدي اترك الخياطة لانو بلاقي فيا متعة و بحس حالي بقدر اعطي فيا للاخر

اياد:الخياطة تعب عليكي و الراتب ما كتير ،اما هيدا الشغل احسن بكل المقاييس ،على كل حال ما تعطي ردك هلأ ،بس نبلش و تروحي تشوفي على ارض الواقع ،رح تغيري رايك انا متاكد؛يلا تفضلي الاكل رح يبرد

ما كنت مصدقة ايملت يخلص الغدا مع اياد ،كان ياكل لقمة و يطلع فيني و انا اتوتر اكتر ،وصلني على البيت و نحن على الطريق بالسيارة وقف على اشارة المرور و انا عم التفت على اليمين حتى اتحاشى نظرات اياد،لمحت اختي سحر طالعة من مدخل بناية هي و شاب ،ما صدقت عيوني ،بعدين طلعت هي و شاب بسيارتو ،ضيقت عيوني اكتر و تأكدت انو هي ،كنت بدي افتح ا لباب و انزل لعندا بس مشيت سيارتن و فتحت اشارة المرور

سلوى:اياد الله يخليك شايف هديك السيارة البيضا

اياد:يلي فيها صبية و شاب

سلوى:اي اي اذا بتريد فيك تمشي وراها؟

اياد:طيب ،بس ليش؟

سلوى:…..بسرعة اذا بتريد

اياد:طيب ماشي
ــــــــــــــــــــــــــــــــــــــــــــــــ

مشي اياد ورا السيارة يلي كانت فيا سحر ،حتى وقفت قبل حارتنا بشارعين ،نزلت سحر منا و تابعت السيارة طريقا ،فتحت الباب لا اراديا و نزلت فورا و رحت لعند.سحر و لحقني اياد بدون ما انتبه عليه ،كانت ماشية و شكلا رايحة على البيت و انا مشيت وراها بخطوات سريعة ،مسكتا من ايدا و فتلتا لعندي

سلوى:مين هيدا يلي كنت معو ؟

سحر:سلوى …

سلوى:مين هيدا يلي كنت طالعة بسيارتو؟

سحر:هيدا اخوا لرفيقتي ،كنا بالجامعة و وصل اختو على البيت و بعدين وصلني

سلوى:كذابة ،انا شفتك بعيني كنت نازلة من بناية ما كنت طالعة من الجامعة

سحر:ايه ..صح….ما قلتلك وصل اختو على البيت قبل و عزمتني على فنجان قهوة و..

سلوى:سحر حاج تكذبي

وقع نظري على موبايل حاملتو بايدا ،سحبتو منا

سلوى:و شو هيدا ؟،من ايمت انت معك موبايل ؟

سكتت و نزلت راسا

سلوى:شبك جاوبي ،موبايل بايدك و طالعة مع شاب بسيارة و كنتو نازلين من بناية ،شو يعني هالحكي كلو
مسكت من ايدا و صرت هزا

سلوى:شبك جاوبي

اياد:طولي بالك شوي

سحر:ها و مين هيدا يلي معك ؟

سلوى:انا يلي عم اسالك ما تتهربي

سحر:انت بس يلي بحقلك تسالي و تحققي معنا و انا ما بحقلي يعني ليش ؟بس لانك عم تصرفي علينا و بدك تتحكمي فينا

سلوى:سحر !انا بدي اتحكم فيكي انا اختك الكبيرة و بحقلي حاسبك اذا غلطتي و…

سحر:ما حدا بحقلو يحاسبني بعد ابي و امي و انت مانك واحد منن ،هاي حياتي و انا حرة فيا و انت ما دخلك

ضربتا كف من قهري منا

سلوى:ما اوقحك و ما اقل ادبك

صارت تصرخ بالشارع وانا رد عليا و اياد وقف يهدي بيناتنا ،حتى تركتني و مشيت و انا عم ناديلا و هي ما ترد علي

اياد:خلص طولي بالك ،هلأ منفهم منا بس نوصل على االبيت

وصلني على باب البيت و نزلت بسرعة من السيارة بدون ما احكي شي لانو كنت مستعجلة لفوت و كمل حكي مع سحر،بس حسيت على خطواتو ماشي وراي،قبل ما افتح الباب و فوت ؛التفتت لعندو

سلوى:شكرا الك لا تواخذني على يلي صار امانة

اياد:ما في مشكلة سلوى،بس خليني فوت معك بلكي بقدر اعمل شي

سلوى:لا لا هاي اختي و انا بعرف كيف اتصرف معا

اياد:😙طيب ماشي ،اذا لزمك اي شي ما تترددي انو تتصلي فيني و تخبريني حتى و لو وقت متأخر و احكي معا برواق لانوهيدا جيل بدو مسايرة ،ما بيجي بالعناد و الصريخ

سلوى:ماشي شكرا

فتحت الباب و فتت ،زتيت جزداني على الصوفاية تابعت على غرفتا ،كانت عم تغير تيابا ،اخدت نفس انا و عم حاول هدي اعصابي

سلوى:فهميني وين كنت معو ؟

سحر:……

سلوى:سحر احكي لشوف ما ضلي ساكتة و تكبري المشكلة

سحر:ما الك دخل فيني و التهي بحياتك ،ليكو اجا وصلك على باب البيت بالسيارة و الله اعلم وين كنت معو و شو كنتو عم تعملو و ليش اصلا عم يزيدلك الراتب ،اكيد ما محبة بشغلك

سلوى:اخرسي اخرسي و ما بسمحلك تغلطي علي بحرف واحد و انت هون رح تبقي ما بقا الك طلعة من البيت

سحر:ايه احسن

طلعت من غرفتا و رحت على غرفتي ،طالعت موبايلا من جزداني و فتحتو لانو كان مقفل ،فتحت الرسائل و كانت الصدمة هون كل الرسائل من شاب اسمو وائل

وائل:وينك يا حلوة اشتقتلك ناطرك اليوم بالشقة

وائل:سوسو ما تتأخري انا سابقك و محضرلك مفاجأة

وائل: وينك لهلأ يا غبية ،الي ساعة قاعد و لهلأ حضرتك ما شرفتي ،مع مين عم تاكلي هوا

باقي الرسائل ما قدرت اقرأن انا و عم اضرب على وجهي و ابكي من المصيبة يلي عاملتا سحر ،رجعت فتت لعندا و بايدي الموبايل

سلوى(تبكي):شو هادا …بايعة حالك يا حيوانة كرمال مصاري

سحبت مني الموبايل بهمجية

سلوى:قرات كل شي ،هيك اهلك ربوكي ،هيك بتعملي لانو وثقت فيكي و قلت سحر اختي واعية و بشوف حالي فيا انو عم تدرس جامعة و رح تتخرج و تتوظف لتساعدني بمصروف البيت. ، هيك بتكافيني

حطت ايديا على وجها قعدت على التخت تبكي و تبرر مصيبتا

سحر:غصب عني

سلوى:كيف يعني غصب عنك ،هو مسكك من ايدك و اخدك على الشقة غصب عنك

سحر: هو ابتزني و صار يهددني بصوري انو ينشرن بجامعة اذا ما بعمل متل ما بدو،صار كل مرة ارفض يهددني بالفضيحة

سلوى:كل هيدا و انا ما معي خبر بشي؛من الاساس شو جاب صورو لعندك

سحر:رح احكيلك

قعدت سحر تحكيلي القصة كاملةةهي و عم تأتئ و تبكي و تنزل راسا من الخجل حتى قاطعتنا دخلة سندس على البيت

سلوى:قومي غسلي وجهك و ما تبيني شي لاختك و بكرا منكمل حديثنا ،انا ما رايحة على الشغل

المسا اتصل فيني اياد بس ما كنت قادرة رد عليه؛تاني يوم بعتت رسالة لاياد انو ما رح اقدر اجي على الشغل اليوم و بعد ما راحت سندس على المدرسة على الساعة 12،عملت فنجان قهوة و قعدت انا و سحر لنكمل حديثنا

سلوى:قلك بدو يتزوجك؟

سحر:اي هيك قلي ولله

سلوى:و انت صدقتيه ؟

سحر:ايه

سلوى:انا لو بمحلو ما بتزوجك ،ما بتزوج وحدة رخيصة سلمتني حالا مقابل كام ليرة كيف بدي امن عليا بيتي و اولادي و سمعتي

سحر(تبكي):لااا رح يتزوجني انا متأكدة

سلوى:اسمعي يا غبية هالفترة ما بتروحي على الجامعة ،و موبايلك رح يبقى معي و رح يبقى مقفل

سحر:و بلكي فكرني عم اتهرب منو و نفذ تهديدو و نشر صوري و بكل الجامعة ،وقتا انا خلص مستقبلي و حياتي بتدمر

سلوى:يا فالحة ليش ما فكرتي بمستقبلك قبل ما تعملي هالعملة،ما ضل في شي اسمو مستقبل الك ،خلص انت انتهى وضعك انت ادمرتي و رح يفضحك بكل الاحوال و تصير سيرتك على كل لسان و ما رح يتزوجك ،بتزوج وحدة عندا كرامة و اخلاق ما متلك بس شو ذنبي انا و شو ذنب اختك سندس لنروح بجملتك..

رن جرس البيت ؛تركتا عم تبكي و رحت فتحت الباب و طلع بوجهي اياد ،تلبكت و رجعت خطوتين و انا عم زبط شعري كنت لابسة بجامة و رابطة شعري كعكة ؛انتبه على الفوضى يلي صارت فيني من شوفتو

اياد:بعتذر جيت من غير ما خبرك بس انشغل بالي و دقتلك ما رديتي

سلوى:اه عفوا بعتذر ما انتبهت

اياد:رح تتركيني واقف هون و الا بتفوتيني بتشربيني قهوة؟

سلوى:تفضل

فات و لحقتو و انا محروجة من وضع بيتي و من المصيبة يلي انا فيا ،اول ما شافتو سحر ،قامت و راحت على غرفتا بسرعة و انا فتت حطيت على الركوة و رجعت قعدت

اياد:شكلي جيت بوقت غير مناسب بس ما قدرت ابقى بعيد ،شو صار معكن؟

سلوى:ولاشي ،ما رح خليا تروح على الجامعة بالوقت الحالي

اياد:بس هيدا ما حل ،كل بنت بتمر بهيك مرحلة مراهقة و …

سلوى:ما كل بنت بتعمل يلي عملتو سحر …على كل حال هاي اختي و انا ادرى بمصلحتا

انا و عم احكي مع اياد ،انفتح باب غرفة سحر و طلعت هي و وجها اصفر و قبل ما تخطي خطوة وقعت على الارض ،ركضت عليا انا و اياد

سلوى:سحررر سحرررر اصحي شوصرلك

شفت بايدا ظرف مانع الحمل شاربتو كلو

سلوى(تبكي):سحر شو عملتي بحالك يا مجنونة

حملا اياد و طلعنا فيا على المشفى،دخلو على قسم الاسعاف بسرعة و بقيت انا واقفة برا و عم لوم حالي اني انا السبب لانو قسيت بكلامي عليا و اياد كان عم يهديني حتى طلعت الدكتورة و طمنتنا عن صحتا و انو صار معا نزيف و قدرت توقفلا اياه

سلوى:خلص اياد فيك ترجع على شغلك ما بدي لبكك اكتر من هيك معي

اياد:لا شو عم تحكي رح ابقى معك ما رح اتركك و الشغل ملحوق عليه

نقلوا لسحر على غرفة منفردة و نحن لحقناها،كان وجهها اصفر كتير،بقيت بالمشفى بدون ما حس عالوقت حتى صار وقت رجعة سندس من المدرسة ،ما كنت عارفة شو اتصرف حتى اياد اقترح علي انو ارجع على البيت كرمال سندس و هو يبقى عند سحر لبين ما ارجع ،رجعت بعد ساعتين و معي سندس على المشفى و اصريت على اياد انو يرجع على بيتو ،تاني يوم الصبح انا و عم جهز سحر لنطلع من المشفى ،اجا اياد

اياد:يلا رح انطركن تحت بالسيارة

سبقنا و نزلنا انا و اخواتي ،سبقتني سندس وهي عم تهدي سحر عليا و انا جيت لادفع حساب المشفى بس خبرتني الكاشير انو الحساب واصل و مدفوع ،عرفت انو اياد دفعو ،خجلني كتير بكرمو و بوقفتو جنبي بهالمحنة ،وصلنا على االبيت وسبقوني اخواتي و انا وقفت معو اتشكرو

سلوى:عذبتك معي شكرا الك و فاتورة المشفى خصما من راتبي لقدام

اياد:رح بزعل منك هيك ،ما بقا بيناتنا هالشي من يوم و رايح ، انا اعتبرت سحر متل اختي؛على كل حال ما رح اخرك هلأ بس بدي منك ترفعي بمعنويات اختك و كل شي بيتصلح

سلوى:انشالله

اياد:و انا ما رح اتركك ابدا ،طول ما معك اياد ما تخافي من شي ابدا

ابتسمت نزلت راسي و انسحبت بهدوء انا و خجلانة مشيت للباب و التفتت براسي شوي و شفتو بعدو واقف و عم يطلع فيني؛ابتسم و اشرلي بايدو ،فتت على البيت و سكرت الباب و حطيت ايدي على قلبي

سلوى:يا رب سبحانك ما بتقطع بحدا و بتبعتلي اولاد الحلال بطريقي

فتت لعند سحر على غرفتا و اعتذرت منا على كلامي القاسي

سلوى:كل شي بتصلح ،كنت رح اخسرك بثواني ،وجودك بحياتي اهم من كل شي يا سحر ما بتعرفي اديش انا بحبك و بحب سندس انتو كل حياتي و مستعدة موت كرمالكن و ما حدا يأذيكن او يجيب سيرتكن بالعاطل

لفتني و هي عم تبكي

سندس:هلا انا متل الاطرش بالزفة ،ما رح تفهموني شو القصة

اطلعنا فيا لسندس

سلوى:قلتلك ما في شي ،سحر تعبت نفسيتا شوي من ضغط الدراسة و اخدناها عالمشفى هاي كل القصة

سندس:ها طيب رح اعمل حالي انو صدقتكن

سلوى:سندس!

سندس:طيب طيب

كان اياد كل ساعتين يتصل فيني و يطمن عن سحر و وضعا الصحي و يسالني اذا ناقصنا شي ،و انا كنت متلبكة من اهتمامو الزايد و بنفس الوقت مبسوطة كتير لانو حسيت في حدا واقف جنبي و في رجال خرج اعتمد عليه و اثق فيه لهيك خبرتو لاياد عن قصة سحر تاني يوم وقت اجا لعنا ،كان جاي و معو اكياس كتير ،خجلت كتير منو وشكرتو على ذوقو

اياد:يا لطيف بس من اولاد الحرام،اسلوبو كتير واطي

سلوى: اياد بس الحق على اختي ،من طول عمرن اولاد الحرام موجودين بس نحن يلي لازم نكون واعين و ما ندخل حالنا بهيك قصص

اياد:اختك حبتو و الانسان وقت يحب بيعطي للاخر ،ما عاد.بميز حدود حتى الغلط بشوفو صح او ببررلو باسباب بشوفا هو وحدو منطقية ،و نحن البشر منفكر كل الناس بتفكر متلنا لهيك اي تفكير او تصرف ما بمثلنا منستهجنو ،بس انا ما بدي تفهمي انو انا مع اختك سحر ،لا لا لا انا ما معا ابدا بس هي هيك فكرت انو ممكن تساعدك و تقيم حمل عنك بمصروفا ،هيك حدود تفكيرا ما فيكي تلوميا كتير لازم تفهمي السبب و الدافع قبل ما تقيمي تصرفا و الدافع كان بريء و شريف كتير بس الاسلوب و النتيجة غلط ،فهمتي علي ؟

كنت عم اطلع بعيون الاعجاب باياد،شاب ناضج و واعي و رايق و كل كلمة بيحكيا كانت بمحلا

سلوى:اي فهمت بس شو الحل و الخلاص من هل الفضيحة و انا متأكدة انو ما رح يتزوجا ؟

اياد:بسيطة بس تتحسن خليا تعطيني اسم االشاب كامل و عنوان سكنو يعني اي معلومات بتعرفا عنو و انا بتصرف

سلوى:كيف بدك تتصرف؟

اياد:هيدا يلي عملو اسمو ابتزاز و بيتحاسب عليه و بينحبس ما تخافي ابدا ،ما رح يأذي اختك او يسترجي يقرب عليا ابدا او ينفذ اي شي من تهديداتو ،اطمني و اوثقي فيني

سلوى:طيب اول ما تتحسن سحر رح اخد منا كل معلومات يلي طلبتا مني و بالنسبة للشغل انا رح حاول…

اياد:معك اجازة مفتوحة ،لنخلص من هالقصة بترجعي على الشغل،هلأ اختك اولى بوجودك جنبا

سلوى:انت عم تخجلني كتير بكرمك و ذوقك و وقفتك جنبنا ما رح انساللك هالموقف ابدا

اياد:اي حوشيلي اياه الا ما يلزم و ترديه هههههههه،يلا انا رح امشي مع انو ما حابب اتركك بس عندي شغل

سلوى:ماشي

طلع اياد من عندي و انا قلبي عم يرقص من فرحتي بوجود اياد بحياتي بس كنت خايفة كتير من هالفرحة انو تخلص او تنعكس ،بعد يومين خبرت اياد كل المعلومات عن الشاب

اياد:ايه عرفتو هيدا ابوه عندو مكتب صرافة بس ابوه منيح و سمعتو مسك ليش ابنو هيك طالع فاشل و ضايع

سلوى:شو رح تعمل هلأ؟

اياد:رح حكي ابوه لانو ابوه كان رفيق الوالد قبل ما يتوفى و هو بينبه ابنو و بيعاقبو بطريقتو و اذا رجع دايقا لسحر وقتا منبلغ الامن عنو بس ازبط نخبر ابوه كرمال الفضايح

سلوى:طيب ،خبرني شو بصير معك لانو سحر ما عم تنزل على الجامعة خايفة منو يرجع يهددا مرة تانية

اياد:خلص ما تاكلي هم؛انا حطيت الموضوع براسي

انا رجعت على شغلي و سحر بقيت هالفترة بالبيت لبين ما تخلص هالقصة ،بعد يومين بعت وراي اياد لاطلع لعندو على المكتب

اياد:تفاجئ اول ما سمع شو مخبص ابنو حتى الشقة ما كان بيعرف فيا ،المهم وعدني انو يعاقب ابنو و يضبو ،بقا خبريا لسحر ترتاح و تنزل داوم بالجامعة

سلوى:شكرا كتير الك ،طيب انا معناها لازم انزل كمل شغلي

اياد:ماشي …سلوى لحظة شوي

سلوى:ايه

قان وقف و اجا لعندي

اياد: انت بتهميني كتير ،و مانك بالنسبة الي متل اي بنت بتشتغل عندي ،انت صرتي الك مكانة بقلبي و مكانة غالية

احمر وجهي و سكتت و ما عرفت رد عليه ،ابتسم ابتسامة اقرب للضحكة

اياد:ما رح خجلك اكتر من هيك بس حبيت عبر عن جزء صغير بس من يلي عم حسو اتجاهك و انشالله تكوني عم تبادريني نفس الشعور،شو؟

سلوى:ايه

اياد:ايه يعني ايه….معناها لتخلص قصة سحر بدنا نلتفت لحالنا شوي .. على كل حال انا ما بستاهل انعزم على فنجان قهوة مكافئة الي يعني

سلوى:اي اكيد بس…

اياد:ماشي خدي وقتك بس اتذكري انو في عزومة عليكي

نزلت للطابق السفلي و لاقتلي بانتصار بابتسامة خبيثة

انتصار:شو القصة ؟شي طالعة و شي نازلة من عندو

سلوى:روحي ولو ما رايقتلك

انتصار:بالله!بدك تخبريني كل شي

سلوى:ما في شي لخبرك اياه و يلي بيني و بين للاستاذ اياد شغل بس

انتصار:الله يسمعنا الاخبار الطيبة عن قريب

رجعت قعدت على ماكينتي و عيون البنات كلن علي و عم يتهامسو بين بعضن ،تجاهلت كل شي حكي انحكي من ورا ضهري انو عم حاول طبق الاستاذ اياد لانو كنت عارفة حالي شو انا و اني ما من هالنوع ،بس كلام اياد طيرني لفوق كتير و حسيت بنشوة الحب يلي كنت اسمع فيا و كان نفسي قلو انا اديش بحبو و بكل مرة بتأكد انو هو الانسان يلي بدي اياه بحياتي و اني حسيت جنبو بالامان و الحب ،رجعت على البيت خبرت سحر يلي تحسنت صحتا انو بتقدر ترجع على جامعتا

____سحر_____

رجعت على جامعتي انا و قلقانة من اي ردة فعل لوائل ،اول يومين داومت فيان ما شفتو ابدا،كنت طول الوقت مع ماريا يلي انتبهت على تغيري و صارت تسألني عن سبب غيابي الفترة الماضية عن الجامعة و انا جاوبا باني كنت مرضانة و لهلأ اثار المرض مبين علي،بعد يومين اانا و طالعة من كليتي و راجعة على البيت ،طلعت ماريا بتكسي و انا اخدت الباص متل العادة،بعد ما نزلت منو و مشيت خطوتين ،حدا مسكني من ايدي و سحبني لشارع ضيق

سحر:وائل

وائل:ايه وائل ،شو متفاجئة؛توقعتي ما بقا تشوفيني بحياتك بعد يلي عملتيه

سحر:انا شو عملت ليش؟

وائل:وصلتي خبر لابي بكل شي بيناتنا ،ببالك انا بدي خاف ،بالعكس انت خربتي الوضع بيناتنا و ولله لفرجيكي وائل شو بيعمل وقت حدا يتعدى علىىطرفو

سحر:انا ما اذيتك بشي انت يلي عم تبتزني بصور لتاخد.يلي بدك اياه عاملتني متل اي وحدة رخيصة و عبدة عندك

وائل:علىىاساس انت غير هيك

سخر:ايه انا غير هيك و اضطريت كون هيك لانو كنت بحاحة مصاري

وائل؛و هلأ ما بقا بحاجة ،شكلك لقيتي واحد تاني تصاحبيه و عم يعطيكي اكتر

سحر:فشرت ،اترك ايدي هيك ،انا غلطت معك و ما مستعدة ارجع عيد الغلط مع غيرك ،بدي تطلع من حياتي

وائل:ايه ما على كيفك0،وقت تخلص مصلحتك بدك اياني اتركك

سحر(تبكي):انا بكرهك بكرهك كنت بدي موت حالي كرمال اخلص منك

وائل:و انا بكرهك بس ما تحلمي اتركك تابعي حياتك ،انت نزعتي علاقتي مع عيلتي و خليتي ابي يحرمني من المصروف و يسحب السيارة مني

سحر:ايه منيح بلكي بتعقل شوي

وائل:شايفتيني مجنون لانو حتى اعقل،ايه بس ما شفتي جنوني على اصولو ،ولله لخلي كل الشباب تتفرج على صورك و يبزقو عليكي ،ولله لخلي سمعتك و ممسحة الارض سوا

سحر:و انا رح بلغ الامن عنك و افضحك و خلي كل الناس تعرف شو انت و تجيب السمعة العاطلة لعيلتك و خلي ابوك يحبسك بالبيت

مسكني من ايدي و ضغط عليا بقوة

سحر:اخ اخ

وائل:وليه انا ما بتهدد ،ما استفزيني لاقتلك و اعتبر الله ما خلقك

سحر(تبكي):طيب طيب اترك ايدي ،شو بدك مني هلأ؟

ترك ايدي و اخد نفس و بعد شوي عني

وائل:وين موبايلك الي كام يوم بتصل فيكي،بيطلع مقفل

سحر:هو مع اختي سلوى،شافتو بايدي و اخدتو مني و قفلتو

وائل:ايوا ،و شو عرفكن باياد انت و اختك؟

سحر:اختي بتشتغل عندو و خبرتو

وائل:اها اها ليك ال….ليك و عامل حالو شريف و هو خاطب بنت و عم يتسلى مع بنت تانية

سحر:لا ،يلي بيناتن شي نظيف ما وسخ متل يلي بيني و بينك

وائل:ولله هلأ صار وسخ ،وقت كنت اعطيكي هدايا و مصاري ما كنت شوف كل هااشرف عندك

سحر:ندمانة ولله ندمانة اني عرفتك و لو كنت محتاجة ما كنت هنت حاالي كل هالقد الك ،بس انت بتعرف وضعنا منيح (تبكي) ،ما في معيل النا غير اختي و يا دوب اختي ملحقة بين مصروف البيت و مصاريفنا

ضمني لصدرو و مسحلي على شعراتي

وائل:…..سحر ما تبكي …بتعرفي اني انا بحبك بس انت ليش هيك عملتي فيني كنا مرتاحين و مبسوطين.. ..بس اسمعي هلأ ،ما بدي اسمع منك انو جبتي سيرة لاياد او اختك انو شفتيني اليوم و انو رح ترجعي تشوفيني ،ماشي ،و رح انسى شو عملتي فيني بس خلينا نرجع متل اول

سحر:طيب

بعد شعراتي عن وجهي ،قرصني من خدي هو و عم يبتسم

وائل:روحي هلأ و بكرا بشوفك

سحر:طيب باي

طلعت من الشارع ،و انا عم مسح دموعي على الطريق ، اول ما فتت على البيت شفت سلوى بالمطبخ

سحر:شو عم تعملي؟

سلوى:عم اقلي بطاطا ،يلا شوي و بخلص الاكل

بقيت واقفة و مستندة بكتفي على باب المطبخ و ساكتة ،انتبهت علي سلوى

سلوى:شبك سحر صاير معك شي

سحر(تبكي): وائل…

سلوى:رجع دايقك و هددك

سحر:ايه و صار بدو يقتلني كمان …شو اعمل يا ربي

لفتني من كتفي و طلعنا على الصالون

سلوى:هالحيوان ،خلص ما تخافي و تقلقي ،رح خبر اياد هلأ

سحر:لا لا دخيل الله بخاف يعصب اكتر و يأذيني

سلوى:حياتي بدو حدا يحطلو حد و الا بدو يضل يتمادى

سحر:سلوى وائل قلي كمان انو اياد خاطب بس حسيتو كذاب حتى يبين اياد انو واحد ندل متلو

سلوى:ما شفت انسان اندل من هيك واحد

اتصلت باياد و خبرتو

اياد:الله يلعنو ،حيوان نظامي هالبني ادم ،رح شوف كيف بدي حلا معو حل جذري ،بس انت ما تخلي سحر تروح بكرا على الجامعة

سلوى:ماشي و يا ريت …

سحر:سلوى ….المطبخ عم يحترق

….