قصة العمارة بقلم الكاتبة حنين طه

هذه القصة تأتيكم من قسم المنوعات في زاكي, نتمنى أنها تنال على إعجابكم واكتبولنا رأيكم في التعليقات.

#قصة_العمارة ١

قصة العمارة الحلقة الاولى
يلا يا رؤى الفطور جاهز يلا رح تتأخري عمدرستك
هاد صوت امي كل يوم الصبح بسمعه لحتى تصحي اختي رؤى لانها نومها كتير تقيل وبدها واسطة لتصحى
انا ديمة الكبيرة بخواتي عندي ٣ خوات وانا الرابعة مخلصة ادارة اعمل ويوم بشتغل وعشرة لا
اختي التانية اسمها دانا بتدرس اعلام بالجامعة طموحها عالي كتير لدرجة انها بتحلم تصير ممثلة مشهورة شي يوم او مذيعة لشي قناة كبيرة
واختي داليا سنة تانية ادب انجليزي ملتزمة كتير كل شي عندها بمشي بنظام ودقة ويا ويله الي بمسك ايشي من اغراضها
ورؤى دلولة امها والصغيرة عنا لساتها صف عاشر بتعرفش ايش عن النظام والترتيب عادي جدا انك تلاقيلها كل غرض بمكان ما عنا اخوان شباب وعندي اب وام حناين كتير متفاهمين لابعد حدود وكلنا كنا ندعي ربنا انه يرزقنا ازواج متل بابا حنون طيب دايما متعاون مع امي ما بزعلها ابدا
كنا عايشين بحارة لا هي غالية وراقية ولا هي معدمة متوسطة والوضع المادي متوسط كمان هلا عمارتنا فيها ٦ ست شقق احنا وقبالنا الخالة نعمت مرة كبيرة بالعمر عندها بنت اسمها ريهام ووولد اسمه فادي بنتها بتدرس مع اختي داليا بالجامعة وصحبة كتير وابنها بكمل دراسات عليا برا
الطابق التاني ساكنين دار عمو ابو عزام هو زلمة محترم بس دايما صوته طالع ودايما بصرخ عالفاضي وعالمليان ومرته مسكينة متحملته وساكتة عنده ولدين عزام متزوج وقاعد بغرفة هو ومرته عن اهله وابنه التاني عمر ما بنعرفه معرفة شخصية بس متل ما بنسمع انه هامل وتبع بنات قبالهم في شقة الدكتور عصام هو رجل محترم بجتمع مع رجال الحارة لما يكون في شي مهم بخص العمارة وبس ما بجي على جمعات العمارة بحكم انه مشغول وعنده عيادة وحتى مرته طبيبة وما بنشوفها الا بالمناسبات الي جدا سعيدة اما بالطابق التالت كانو ساكنين دار عمو ابو رسمي انسان كويس بس منفتح شوي وعنده حرية زايدة عمو ابو رسمي عنده بنتين وولد بناته وحدة صف رابع ووحدة قد رؤى اختي وابنهم لسا عمره خمس سنين وقبالهم ساكنة بهية ما بعرف عنها كتير معلومات لانها اكتر وقتها برا البيت ما بتيجي عليه الا نادرا وبصراحة ما بعرف لا وين بتروح ولا شو بتشتغل وكنت دايما استغرب انها مش خايفة تعيش لحالها هيك
كل خميس كان يكون في جمعة بالعمارة يا اما بيبتنا او بيبت عمو ابو عزام او بيبت عمو ابو رسمي حتى يلعبو شدة وكانو يجيبو عزام يلعب معهم بغصب عنه لانه محتاجين لحدا رابع باللعبة يعني بتقدرو تحكو انه يوم الخميس بتكون ميمعة وقايمة
اما نسوان العمارة كل يوم الصبح بخلصو طبختهم وشغل البيت وبروحو بتجمعو عند الخالة نعمت بساعدوها بشغل البيت وبالطبيخ وبشربو قهوة وبروحو طبعا الي كان يجتمع امي وخالة ام عزام وخالة ام رسمي الدكتورة سوسن مش فاضية وبهية الله اعلم وين بتكون
هيك انا اعطتكم فكرة عن عمارتنا وعن حياتنا

#قصة_العمارة ٢

اليوم الخميس والسهرة عنا بالبيت صحي بابا الصبح ونادى ام ديمة يا ام ديمة الله يسعدك حضريلنا اليوم اكلات طيبة من تحت ايدك
بعد شوي رن تلفون بابا كان الدكتور عصام
– السلام عليكم ابو ديمة
– اهلا دكتور تفضل
– عرفت انه اليوم السهرة عندك واذا ما فيها ازعاج حابب اجي
– لا ولو بتشرف انت والدكتورة
– لا الدكتورة ما رح تيجي مشغولة شوي
وسكر التلفون بابا واحنا استغربنا ليش الدكتور عصام بده يجي يعني ما اله بالعادة
وصارت الساعة ٨ المسا وبلشو الجيران يتجمعو وحضرنا طاولة يلعبو عليها شدة وانا فتت اعمل قهوة دخلت اعطي بابا القهوة ولا هو الدكتور عصام بسال بابا هاي بنتك ديمة صح حكاله بابا اه والله يا دكتور هاي اكبر بناتي ضحك الدكتور عصام ضحكة ما عجبتني ودخلت جوا مستغربة من نظراته وضحكاته وكل شي بعد شوي سمعنا خالتو ام رسمي بتنادي على بنان بنتها ورؤى اختي وبتسألهم عن بنتها بيسان بس بنان ورؤى اكدو انهم ما شافوها وانهم كانو جوا بالغرفة وهون قامت القيامة والكل صار يدور عبيسان ما خلينا مكان الا ودورنا فيه وعبس عالفاضي وابو رسمي صار يتطلع فيها ويصرخ حكالها لولا اهمالك هاد ما كانت البنت راحت من ايدينا بعد شوي والكل قاعد ومهموم دخلت علينا بهية هون زاد الموضوع غرابة اكتر واكتر بهية شو جابها هي بعمرها ما دخلت بيتنا بعد صمت وخوف وبكا ونوح من خالتو ام رسمي حكت بنان احنا ما دورنا عالسطح خلينا نطلع نشوفها هناك وطلعنا كلنا لقينا بيسان مربوطة بطرف تنك المي ومغمض على عيونها وتمها اخدها ابوها وحاولو يهدو والدكتور عصام عمللها الاجراءت اللازمة تحسنت بيسان شوي والكل مستنيها تحكي مين عمل فيها هيك بس بيسان ما نطقت غير انه واحد مغطي وجهه بالكامل هو الي اخدها وربطها فوق وحكالي احكي لاختك بنان رح اوصللها يعني رح اوصللها ونظرات الجميع كلها توجهت لبنان اولا لانها هي الي اقترحت انه نطلع ندور هالسطح وتانيا ليش ليوصللها هالرسالة علسان اختها بس بنان صارت تبكي وتحلف انها ما بتعرف شي وما بتعرف مين هاد ووسط حلفان بنان والخوف الي كانت فيه دق الباب شب طول بعرض حليوة لما فات خالة نعمت صارت تصرخ اجيت يما يا حبيبي نورت عرفنا وقتها انه فادي ابن الخالة نعمت وبعد جيته حاولنا انه ما نجيب سيرة الي صار مع بيسان حتى ما نحرج اهلها وبعد نص ساعة زمن كل واحد روح عبيته ظليت طول الليل سهرانة افكر ليش نظرات الدكتور عصام كانت هيك ومين هاد الي خطف بيسان وشو علاقة بنان بالقصة طيب ليش اليوم صارت كل التغيرات اجت بهية واجا فادي ليش هالخميس غير عن اي خميس مضى

وبعد يومين رنت خالة نعمت على امي وطلبت تشوفها لانه ابنها جاي من السفر وبده يخطب ويتزوج وهي بدها تستشير امي بكم شي اطلعت على داليا لقيتها فرحانة كتير وانا فعليا كنت متوقعة انهم بدهم يخطبو داليا لفادي كونه هي واخته ريهام بتجمعهم علاقة قوية كتير راحت امي ورجعت بعد ساعة بتحكي لبابا الجماعة بدهم دانة لفادي قال شايفها وهي طالعة نازلة وعجبته وحابين يجو هون عالبيت ليطلوبها رسمي بابا حكالها انا ما بزوج الصغيرة قبل الكبيرة رحت لعنده وقلتله اهم شي سعادة اختي وانا بجيني نصيبي وكلنا نسينا او بالاحرى ما انتبهنا انه الي انجرحت هون هي داليا مو انا المسا اجت الخالة نعمت وابنها فادي رحت عالمطبخ بدي اعمل شاي لقيت المي قاطعة للست عحالي وطلعت عالسطح لحتى اشوف تنك المي لانه كان صعب انادي على بابا يشوفه وهو عنده ناس وبس اطلعت انصدمت لقيت بنان واقفة مع واحد لافف ظهره وبتحكيله الف مرة قلتلك ابعد عن اختي هي صغيرة ما الها ذنب انا ما بدي اياك افهم بقى بهاللحظات طلع صوت امي من تحت ولك ديمة شو صار معك شفتي المي ومن خوفي طلعت من السطح ونزلت ركض عالبيت وعرفت وقتها انه بنان والي كان معها عرفو اني كنت موجودة واني سمعت حكيهم بس ما كنت بعرف حجم المتاعب والصعوبات الي رح تواجهني بعدها بسبب هالقصة

#قصة_العمارة ٣

ارتبكت وقعدت افكر ليش ومين هاد الي مع بنان وشو بده منها وليش بنان لحتى تاقبله هون بالعمارة طيب مش خايفة اهلها يشوفوها وبعد تفكير كتير قدرت اوصل لشي انه اكيد الي قابلته بنان هو واحد من سكان العمارة بس مين عزام لالا عزام متزوج وبحب مرته طيب عمر اخوه كمان لا لانه ما بجي عبيت اهله كتير دايما عند اصحابه طيب مين فادي
ولك ديمة اصحي بلا هبل ما فادي كان قاعد مع بابا هون طيب معقول يكون الدكتور عصام ليش شو بده بوحدة اصغر منه بكتير وانا تتيهة ببحر الافكار هاي لمحت داليا اختي بتبكي رحت لعندها
– داليا حبيبتي فيكي شي
– لا اطلعي وسكري الباب
-داليا انا اختك وبتهمني مصلحتك اذا في عندك شي احكيلي يمكن اقدر اساعدك
– قولتلك ما فيني شي حلي عني يا
– طيب طيب براحتك
وطلعت وسكرت الباب رحت عالصالة اجيب تلفوني كان وصالني مسج محتواه ( وحياة اللي خلقك اذا بتحكي لحدا الي شفتيه وسمعتيه رح ادفنك وانتي عايشة وجربي يا حلوة احكي للشرطة ) بهاللحظة رجلي ما عادو حملوني وركبي صارو يرجفو شو اعمل احكي لامي ما هي امي لو عرفت رح تحكي لبابا ورح تكبر القصة واختي خطبتها عالباب ما بدي انكد عليها وفعلا سكتت وما حكيت لحدا شي وتاني يوم اجا بابا مبسوط وبنادي على امي تعالي يا ام ديمة تعالي شكله دانا فتحت الباب على خواتها الدكتور عصام طلب ايد ديمة مني اليوم
– ييييييي ما هو متزوج
– بعرف صرله اكتر من شهرين مطلق الدكتورة سوسن مش متفاهمين ابدا
– بس بالنهاية كان متزوج قبلها وبنتي مو ناقصها ايشي لتاخد واحد متزوج
-يا شيخة واحد كان متزوج وما تفاهم مع مرته وما عنده ولاد ودكتور قد الدنيا شو بدنا احسن من هيك
انا كنت رافضة مبدا اني اخد واحد كان متزوج قبلي صحيح هو دكتور وشخصية ومو ناقصه ايشي بس كمان انا بنت باخد العقل واجا يوم الخميس وكانت السهرة عند دار عمو ابو عزام دانا زبطت حالها وراحت وهي ماسكة بايد فادي ورؤى راحت وظلت ملزقة ببنان داليا ما قبلت تروح وانا رحت وظليت قاعدة لحالي اما بنان حاولت كتير عينها ما تيجي بعيني واحنا بنص السهرةاجت ببالي داليا اختي وقمت اطمن عليها لسا بدي اوصل للبيت وما شفت الا حدا ضربني عنص راسي وما صحيت الا وانا عسطح البيت ومربوطة بنفس الطريقة الي كانت مربوطة فيها بيسان وشوي وتجمعو كلهم حولي امي وخواتي ببكو وابوي وجهه ما بتفسر صارو رجال العمارة يحكو هاد اكيد واحد بده يخوفنا وعم بعمل هيك ببناتنا اخدوني اهلي عالبيت وطول الليل الدكتور عصام ما تركني واول ما طلع الصبح فات علي حكالي صباح الخير يا ديمة انا بعتذر اني صحيتك عبكير بس لازم نحكي سوا انا متأكد انه الي عمل عملته امبارح مش بالصدفة عشان يخوف العمارة انا متأكد انه هو كان قاصدك وعمل هالعملة حتى الشكوك الي حولين بنان تروح وتبين القصة شي عادي ديمة اوثقي فيي احكيلي الي عندك رح اساعدك وما رح اتخلى عنك انا بوعدك صحيو اهلي وعصام افطر معنا وبعدين حمل حاله وروح ما بعرف ليش ارتحت لكلام عصام واله بعد ما كنت خايفة منه قعدنا المسا انا ودانا وامي نشوف شوفي تساريح حلوة للشعر حتى تعملها دانة بحفلة خطبتها وبعدها انتبهت انه داليا ورؤى مش موجودات قمت اشوفهم شو بعملو هلا داليا شي عادي انها ما تكون موجود لانه هي بطبيعتها ما بتحب تختلط معنا وبقصصنا بس رؤى وين رؤى هي روح البيت وشعلة نشاط فوين مختفية وقبل ما اوصل عباب غرفتها سمعتها بتحكي عتلفون ( اذا بنان هبلة وسكتتلك على الي عملته مع اختها انا ما بسكت واذا بتقرب جهة اختي مرة تانية بدمرك وبفضحك ) وقتها عرفت انه رؤى وبنان متورطات مع نفس الشخص بس مين هو وليش التنتين خايفات منه وشو الي مخفيته عنا يا رؤى ويا ترى لوين واصلة المواضيع

#قصة_العمارة ٤

وبرضه سكتت وما رضيت احكي اي شي لحدا لحتى ما اخرب على دانا فرحتها واجا يوم الحفلة اليوم الي كلنا بنستناه انا كنت امورة لابسة فستان اسود خفيف ورؤى كانت لابسة فستان اخضر اما الي انصدمنا فيها هي داليا صدقا كانت احلى من العروس اول مرة بحياتي بشوفها حلوة هيك الحفلة كانت بمزرعة شب بقرب لفادي وعلى بركة المي طلت دانا باول فستان الها وكانت متل الاميرات وابتدت الحفلة والرقص وصار وقت الاكل اعتذرت دانا من الموجودين وطلبت تروح تغير فستانها وتلبس طقم لحتى تعرف تتحرك دانا اختي كانت محضرة طقم لونه ابيض لحتى تلبسه وبس وصلت عالغرفة صارت تصرخ وتنادي بصوت عالي كلنا ركضنا لعندها طقهما كان مكبوب عليه دم وملطخ كله بالدم بصراحة موقف لا تحسد عليه طيب ليش لحتى يعملو فيها هيك ومين الي عملها سرحت شوي وحكيت هاد اكيد الشب الي كان مع بنان عمل هيك باختي حتى يخوفني وينكد علي اتدايقت لاني فكرت حالي سبب بخراب حفلة دانا
دانا صار معها شبه انهيار عصبي وظلينا لنص الليل بالمستشفى معها وصراحة عصام ما قصر معها وقررت اني تاني يوم امسك رؤى وافهم كل شي منها وفعلا تاني يوم استنيت رؤى لحتى روحت من المدرسة وناديت عليها وحكتيلها اني بعرف كل شي بداية حاولت تنكر بس بعد ما هددتها ببابا خافت وحكتلي ديمة بحكيلك كل شي عندي بس اوعديني بابا وماما ما بعرفو طمنتها وقلتلها هاتي الي عندك قالتلي هاد بكون عمر ابن عمو ابو عزام بحبها لبنان كتير وهي ما بدها اياها وبالمقابل انا بحبه وهو ما بده اياني وعم بحاول يعمل اي شي ليتقرب من بنان بس هي رافظة
لفيت وجهي وقلتلها حسابنا ما خلص يا رؤى وطلعت برا الغرفة رنيت على عصام وقلتله بدي اشوفك ضروري فعلا التقينا وقلتله كل شي عندي حكالي لا تخافي الموضوع عندي
المسا طلع عصام عند عمو ابو عزام ونادى على عمو ابو رسمي وحكالهم القصة ١، ٢ ،٣
عمو ابو عزام صار يغضب على ابنه ويبهدل فيه وتقاتل هو وابو رسمي واجا بده يقلعه من البيت حكاله عمر انا بحبها ابنان وبدي اياها
حكاله ابوه الله لا يوفقك البنت صغيرة شو بدك فيها طيب وخلينا نحكي بتحب بنان ديمة ودانا شو دخلهم تعمل فيهم هيك حلف الف يمين انه مش هو الي عمل فيي وباختي هيك وحكى صحيح انا بعتت مسج لديمة اخوفها لكن والله ما عملتلها ايشي
لما روح عصام رن علي وحكالي ديمة انا كنت مفكر الموضوع سهل وانه الصعلوك عمر وراها لكن شكله في لغز جديد وعدو تاني لالك
طيب مين انا بحياتي كلها ما اذيت حدا ولا اجيت بحدا ليش ايصبر معي هيك طيب دانا مين وليش عملوها فيها هيك بيوم فرحتها كلها اسئلة تمنيت لو اعرف اجاباتها

#قصة_العمارة ٥

وتاني يوم قررت انسى كل شي وارجع لحياتي بشكل طبيعي بس اول ما صحيت نادت علي امي تعي يا ديمة اجتك هدية حاولت اعرف من مين الهدية ما كان مكتوب عليها ولا اسم ولا شي اخدتها عالغرفة وفتحتها من الصدمة ما نطقت ولا نص حرف كانت سكينة عليها نقط الدم ما فهمت شو الهدف من الهدية ولا حتى الي بعتها شو بده مني بهالوقت سمعت صوت دانا وداليا برا وصراخ طلعت عليهم لحتى اشوف شو في دانا بتبكي وداليا الشرار بقدح من عيونها سألتهم امي خير مالكم شو في حكتلها دانا ما في شي اسألي بنتك واجت عندي دانا عالغرفة وامي فعلا سألت داليا قالتلها ما في شي اخدت شي من اغراضي وانتي بتعرفني ما بحب حدا يقرب عشي الي دخلت لعند دانا وسألتها شو في يا دانا شو الي الايشي الي اخدتيه من داليا حتى هيك كانت اصواتكم
– اخدت منها فادي
– كيف يعني ما فهمت
– غصت دانا بدموعها وحكتلي قبل شوي دخلت عغرفة بدي اجيب المروحة الي عندها لانه مروحتي خربت داليا ما كانت بالغرفة ووصلها مسج اطلعت عالشاشة شفت انه المسج من فادي استغربت دخلت اشوف شو باعتلها لقيتها هي بالقبل باعتتيله وحياتك لادمر حياتك متل ما دمرت فرحة اختي يوم خطبتها وهو باعتلها فشرتي خلي عندك كرامة وحلي عني تخيلي يا ديمة تخيلي اختي الي من لحمي ودمي تعمل فيي هيك طيب ليش لو قالتلي من البداية انها بتحبه ما كنت وافقت عليه وصارت تبكي حاولت اهدي دانا وطلعت عند داليا عالغرفة سمعتها كم كلمة يسمو بدنها وهددتها اني رح احكي لبابا
– بدك تحكي لبابا احكي وانا كمان بقله عن خبايص رؤى مفكرتيني ما بعرف لا حبيبتي بعرف وبعرف انك انتي مغطية عليها سكتت وطلعت من عندها مستحيل تكون هاي اختي الي بعرفها وبهالخبصة نسيت الهدية والسكينة والخوف الي صابني قعدت شوي بالصالة افكر مع دخلة بابا عالبيت بحكيلي ديمة وين امك بدي اياها تحضرلي شنتتي السفر عنده سفرة شغل يومين وفعلا امي حضرتله الشنتة وودعنا وطلع ….
ترن ترن
– الو عصام
-شو شمستك عالية هلا صحيتي
– اه والله تعبانة شوي انت شو بتعمل
– عندي شوية شغل بمكان بعيد عن البيت والعيادة واستغربت قبل شوي شفت عمي بالشارع بالصدفة حاولت انادي عليه ما سمعني
– مين عمك
– مين يعني عمي ابوكي
سكرنا الخط وسكر قلبي معه طيب بابا ليش يكذب علينا ويحكلنا انه مسافر انا كل ما بحل لغز بطلعلي لغز جديد شو يا ترا بابا مخبي علينا او بالاحرى شو ظل في مصايب لسا ما نزلت عراسنا.

#قصة_العمارة ٦

وبعد يومنا وصل بابا من السفر وفات عالبيت وسلم علينا وتغدينا سوا سألته بابا انت ليش ما جبتلنا هدايا معك
– والله يا بابا ما صحلي انزل عالسوق ولا اشتري ايشي السفرة الجاي ان شاء الله
حكيت معقول يكون عصام مخربط وشايف حدا تاني معقول الي شافه مو بابا بس خلص سبحان الله الشك لما يدخل عراس الواحد ما بتركه بحاله قررت اني ادور ورا بابا فتت عفرفته وفتشت بشنتته ما لقيت شي فتشت بجيابه لقيت سنسال فيه خرزة زرقا حلو كتير وضحكت لانه شكوكي كانت رح تدمرني بابا اروع زلمة بالدنيا قلت اكيد جايب السنسال لامي وطلعت من الغرفة بهدوء رحت احكي مع دانا شوي لانها كانت مقررة تنفصل عن فادي
– يا دانا يا حبيبتي الشب اختارك من بين الكل لا تدمري حالك وتدمري الحب الي بينكم
– مستحيل يا ديمة اقدر انسى انه اختي كانت بدها اياها الشك ما رح يتركني بحالي ما رح اعرف اعيش سعيدة معه افهميني يا ديممة
بصراحة الي بتحكيه منطقي وكانت مخططه تحكي لبابا انها ما ارتاحت هي وفادي وما تفاهمو خاصة انه فادي كان بعرف انه داليا الي خربت حفلة الخطبة وخبى على دانا

ومرقو يومين وانا استنى بابا يعطي السنسال لامي يفاجئها فيه اي شي وبابا ما كان يتحرك قرأت بالجريدة عن شركة بدها موظفين وشاورت عصام وطلعت اشوف الشغل لانه عم بتطق روحي بالبيت وانا راجعة عالبيت عباب العمارة التقيت بالست بهية كيفك يا ديمة زمان ما شفناكي
– اهلا خالتو انا بخير والله مشتاقلك
– شو خالتو ما خالتو انا مو اكبر منك بكتير وصارت تضحك
اطلعت عليها وابتسمت لقيتها لابسة نفس السنسال الي كان بجيبة بابا مستحيل يكون واحد بشبه هو انا متأكدة حفظته بكل تفاصيله قربت لعندها وعملت حالي بدي اسلم عليها حتى اشوف السنسال اوضح بس لما شميت ريحتها نسيت حتى السنسال نفس الريحة الي كانت موجودة بالهدية الي وصلتني من كتر الخوف الي خوفته وقتها مستحيل انسى تفاصيل الكرتونة والريحة الي كانت عالقة فيه طلعت عبيتنا وانا حالتي ما بعلم فيها الا الله شو علاقة بهية بكل هاد ليش لحتى تعمل هيك انا شو عملتلها طيب بابا شو علاقته ببهية السنسال ليش مو برقبة امي ليش برقبة بهيه

#قصة_العمارة ٧

طول الليل ما نمت وانا قاعدة صافنة فكر يوخدني وفكر يجيبني تاني يوم قررت اروح عند بهية وافاتحها بكل شي عندي والي بده يصير يصير لبست وحكيت لامي انا طالعة مشوار صغير وراجعة دقيت عالباب فتحتلي
– اهلين ديمة في شي
– بدي احكي معك بشغلة
– منيح الي لحقتيني لاني كنت طالعة
ودخلت عندها عالبيت اول مرة بحياتي بدخل بيتها كنت خايفة ومرعوبة وكان واضح هاد الشي علي
– اه ديمة شو تشربي
– لا ولا شي اصلا انا مو مطولة
خالتو بهية انتي شوفي بينك وبين بابا
– ما فهمت شو قصدك
– انا بعرف انه في شي ما حدا بعرفه احكيلي ريحيني
– اسمعي يا بنت لا تتدخلي بحكي الكبار وارجعي على بيتكم
– انا مو صغيرة وبعرف انه في بينك وبين بابا ايشي وبعرف كمان انك انتي الي بعتلي الهدية الي فيها سكين بس ليش انا ما علطت بحياتي معك شو بدك فيني
وعليت اصواتنا كتير وجرحتها بالحكي حاولت استفزها لتحكي الي عندها وقلتلها انتي وحدة ما في حدا يضبك
ما حدا بعرف وين اراضيكي

– انا وابوكي متزوجين من تاني شهر سكنت فيه هون بالعمارة وابوكي بحبني وبتمنى رضاي ولو امك معبية عينه ما فكر فيني ترى حفي لحتى قبلت فيه واه انا الي بعتلك السكينة لحتى افرجي ابوكي اذا حاول يلف ويدور معي اني ممكن اوصل لنص بيته ولاغلى الناس عنده واذا عندك اثبات روحي اشكي علي استغليت انه عصام طلق مرته وقلت اكيد الشكوك كلها رح تكون عليها وانا مستحيل يشك فيني انا بتمنى تكوني ارتحتي يا ديمة ولا تنسي تسكري الباب وراكي وتحكي لامك عن كل شي بالتفصيل يلا انتهت الزيارة ودخلت عغرفتها كلامها نزل متل الزلزال عقلبي مسحت دموعي ونزلت عبيتنا مش عارفة شو ممكن اعمل اذا خبيت على امي بكون بضرها ما بفيدها مش قادرة اتصور انه بابا الزلمة الي طول عمرنا بنشوفه احسن اب بالدنيا كلها يطلع منه هيك
المسا اجا بابا عالبيت بتطلع بامي غرقانة بدموعها وكلنا صافنين فيه عرفت انه بهية قالتله شو صار امي طلبت منه الطلاق حاول بابا يصلح الامور بينهم بس امي رفضت رفض قطع حست انه كرامتها انهانت لما زوجها بيخونها مع جارتها وهي بقالها سنين عايشة مغفلة
اختي دانا فسخت الخطبة هي وفادي وطلعت لتشتغل بدبي وتحقق حلمها وعلاقتها انتهت بشكل كامل مع داليا
داليا ورؤى عاشو مع امي وداليا خطبت شب كان معها بالجامعة باعتقادها انه هيك عم تقهر بدانا وبفادي
اما انا تزوجت انا وعصام وصار عندي بنوتة صغيرة
صحيح نحنا ما لازم نأمن لحدا ولا نوثق بحدا بس الي خلاني اكتبلكم قصتي هو لحتى ناخد عبرة من غياب دور الرقابة من الاهل من الام والاب بابا دار ورا شهواته وتزوج وامي كانت طول وقتها مع الجارات بالاخر كانت النتيجة عيلة مفككة رؤى بتحب والها قصصها وهي بالمدرسة واختين ما بحكو مع بعض ابدا
وداليا ماليها الحقد
رسالة موجهة لكل اهل صاحبو اولادكم حاى بالنهاية ما تصحو على واقع. مؤلم متل الواقع الي صحيت عليه امي ❤️❤️❤️

#حنين_طه

اكتب كلمة #زاكي في التعليقات لتصلك مزيد من الوصفات المجربة والمميزة خصيصاً لك

هل تحب مشاهدة وصفات بالصوت والصورة؟ اعمل اشتراك لقناة زاكي على اليوتيوب من هنا لتصلك جديد وصفاتنا بالفيديو:
قناة زاكي على اليوتيوب

عندك جوال ذكي؟ ممتاز كتير تفضل أحلى هدية من زاكي لعيونك, حمل على جوالك تطبيق زاكي, أقوى مرجع عربي لفن الطهي, من هنا:
تطبيق زاكي للأجهزة الذكية

عندك حساب على الفيس بوك؟ طيب شو بتنستى استفيد من وقتك وتعلم كل يوم وصفة جديدة على يد أمهر شيفات في الوطن العربي, بالانضمام لمجموعة زاكي وصفحة زاكي على الفيس:
للانضمام على مجموعة زاكي من هنا 
للاعجاب بصفحة زاكي من هنا ومتابعة كل جديد

احفظ موقع زاكي في المفضلة على جوالك, لتصلك دوماً جديد وصفاتنا مش هتلاقيها إلا في زاكي
موقع زاكي لفن الطهي