قصة ندى بقلم هلا الغرابلي

هذه الوصفة مقدمة من قسم المنوعات في زاكي, ننتظر رأيكم في التعليقات.

#ندى_بقلم_هلاغرابلي
الجزء الاول
كانت الساعة 3 بعد الظهر وقت رن تلفون البيت و رديت ….الو …اهلين …اي انا مدام الطريفي ….شوووو…زوجي انا لا… لا لا ….متاكد …و سكرت و ركضت لعند بيت حماي يلي ساكنين تحتي بدون حتى ما البس تيابي …..مرة عمي احمد مات يا مرة عمي …..زوجي مات ….
زوجي تركني و تركلي 4اولاد و مات ……تركني وحيدة بين غابة مليانة ذئاب و ضباع ….الخبر نزل علي متل القنبلة حرق كل شي حلو حرق قلبي و الماضي و الحاضر و حتى المستقبل يلي انا راسمته معه ….كيف بدي عيش 4اولاد ….كيف بدي اتحمل مسؤوليتن من وين بدي طعمين و لبسن و درسن ….حمل كبير و بهد الجبال…
بعد 4شهور و عشرة ايام طلعت من العدة ….طلعت باللقب الجديد ارملة احمد الطريفي ….طلعت لشوف الحياة بعيون تانية و لصارع فيها بكل قوتي و احمي حالي قبل ما احمي اولادي …
كنت حزينة كتير …ملامح زوجي وقت شفته اول ما طالعوه من التلاجة ما راحت من بالي و ضلت بذاكرتي محفورة لهلا …موته كان فجاة اثر صعقة كهربائية و هو عم يشتغل بشغله و انهرت و انهارت كل احلامي …
بعد ما خلصت العدة بلش الحكي ببيت حمايي انو انا شو بدي اعمل بدي اترك البيت و الاولاد على اول فرصة زواج بتجيني و خاصة بعدني بريعان شبابي ما تجاوزت ال 26سنة او رح ابقى ببيتي و احضن اولادي و حطن تحت جناحي بس كيف بدي اصرف علين و من وين اذا زوجي هو يلي كان يعطي اهله و يساعدن …..
اسئلة كتير كنت اسمع صداها و اتجاهلها لانو انا نفسي ما بعرف شو بدي اعمل بس كل هالشي كان اهون علي من اقتراح عمي بانو اتزوج سلفي و انزل ضرة على سلفتي رفيقتي و صديقتي قبل ما تكون سلفتي
سلفي شو يعني سلفي يعني اخ زوجي و اخي بعهد الله يعني مستحيل اتخيل حالي معه حتى لو بالحلال لانو كنت رح اعتبر هالشي خيانة لزوجي و خيانة لسلفي يلي ما رح اقدر حبه و اتقبله لاني قلبي لشخص اخدته الدنيا مني و خيانة لسلفتي يلي كانت متل اخت الي و بحياتها ما زعجتني و وقفت جنبي و انا كافيها بهيك شي بسرق زوجها و بخرب حياتها…..
تجرا عمي بعد شهر ليفتح الموضوع معي بالاتفاقية مع سلفي يلي كان مرحب بالفكرة جدا و سلفتي يلي كانت ساكنة فوقي صارت وقت تشوفني تتجاهلني و ما بقا تسلم علي و تبعتلي حكي و كلام ….قلتله لعمي مستحيل رامي متل اخي ما بقدر مابقدر اتخيله زوجي قلي يعني ما بدك تتزوجي سلفك بدك تتزوجي واحد تاني قلتله لا هو ولا واحد تاني انا شايلة فكرة الزواج من راسي و زوجي من 5شهور مات ما نشفت دمعتي عليه لسا قلي اسمعي يا عمي ما عندك غير خيارين يا بتكتبي كتابك على سلفك و بتبقي ببيتك و سلفك هو يلي رح يشيل بمصروفك و مصروف اولادك يا اما بتتركي اولادك و هو سلفك متكفل فين و بتطلعي من البيت و بترجعي على بيت ابوكي و مرة ابوكي و انت بتعرفي شو يعني مرة ابوكي ما في داعي ذكرك كيف كنت عايشة عندها
………………………………………..
الجزء الثاني
خيارين ما بيفرقو عن بعض موت و ذل و اهانة …..بعد اسبوع من التفكير رديت خبر لعمي باني موافقة اكتب كتابي على سلفي و انحط على ذمته بس بشرط ما يقرب علي ابدا يعني متل الاخوات انا و اياه وكان جواب عمي بانو هالشي بيرجع الك و اله بتتفقه عليه المهم انا ضل على اسم بيت الطريفي و ما اتزوج حدا تاني و طالب بحضانة اولادي ….
كتبت كتابي على سلفي …ما تخيلت ابدا اسمي ينزل بخانة زوجة تانية لشخص تاني و كيف اذا كان هالشخص التاني هو اخ زوجي كمان …كان هالشي متل الحبل لافف على رقبتي و خانقني و خاصة بعد ما قطعت سلفتي علاقتها فيني عالاخير و صرت عدوتها
كنت شوف سلفي عند بيت حمايي بما انو منقضي نص نهارنا عندن و هو كان محترم معي و انا كنت معتبرته اخي يعني احكي معه بادب و المزح بادب علاقتي معه بقيت متل ما هي قبل و بعد وفاة زوجي بس للاسف هالحال ما دام ابدا…..
كنت قاعدة انا و اولادي المسا وقت رن علي الباب و مديت راسي من ورا الباب و قلتله اهلين رامي خير في شي قلي بدي فوت قلتلو نعم قلي بدي فوت شبك ما سمعتي شو نسيتي انك مرتي و على اسمي قلتله شبك قام اجا يدفش الباب بايده هو يفتح و انا سكر لحتى فات و سكر الباب وراه قلتلو عيب عليك انا معتبرتك متل اخي قلي شووو اخوكي انا زوجك و الي حق عليكي قلتله اطلع برا ما الك شي عندي نحن متزوجين على الورق بس قلي لا يا روحي عم اعطيكي مبلغ كل اسبوع يعيشك و يعيش اولادك هيدا شو ما بتحسبيه انا عم اقوم بواجبي اتجاهك و هلا دورك و قرب علي ….
للحظة حسيت بالقرف و الاشمئزاز و بدي استفرغ وكمان خفت اولادي ينتبهو و يشوفو عمن و امن بمنظر ما حلو لهيك تصرفت فورا و قلتله طيب ماشي بس مو هلا لينامو الاولاد تعا ناطرتك عال12 و غمزته قلي اها هيك بدي اياكي دخيل جمالك و صارت 12و اجا عم يركض ركض و دق الباب كتير و يناديلي ندى شبك افتحي الباب و يدقلي عالموبايل بس لا فتحتله و لا رديت عليه بلاخير مل و طلع على بيته …..
خففت نزلاتي عند بيت حماي حتى ما التقي فيه و كل ما يجي عندي اطلع من العين الساحرة و ما افتحله ضل اسبوعين عهالحالة قبل ما يبعتلي مسج و يقلي خليكي مكبرة راس بس ما تحلمي تشوفي فرنك مني لشوف كيف بدك تعيشي انت و الاولاد….حتى بيت حماي بلشو يتلائمو معي و يضغطو علي لانصاع لطلبات سلفي …..
اسودت الدنيا بوجهي حسيت كل ما بقوم من مصيبة برجع بوقع بمصيبة تانية و اقوى من يلي قبلها ….تعبت و بكيت و ترجيت ربي ما يتركني بهالمحنة يلي عم مر فيها
طلعت تاني يوم من بيتي لدور على شغل باي محل او اي شغل انا قبلانة باي راتب لعيش و ما احتاج حدا بقيت 5ساعات و انا عم افتل بالشوارع و كل ما فوت على محل يقلي معك شهادة او عندك خبرة او ما في شواغر وفي محلات يطلعو علي صاحبينها بطريقة وسخة و يقلولي ليش الحلو بدو يشتغل… 5ساعات من التعب و على الفاضي …..
يئست و قلت الموت اهون علي من هالعيشة يلي عايشتها شو اعمل اوقف على ابواب الجامع و اشحد ولا بقتل حالي انا و اولادي و بخلص و لما رجعت على البيت رجعت و انا حاطة براسي انو الموت هو الحل الانسب نموت لنلحق زوجي يلي بعد ما تركنا انهنا و انزلينا لانو اذا ما متنا هلا رح نموت من الجوع بعد اسبوع … رجعت عالبيت و انا عم حط عشا لاولادي وابكي خطر على بالي حط سم فيران بالاكل يلي كان زوجي يحطه بالحديقة للفيران قلت هيك منتعشى و منام و ما بقا منفيق و وقت ناديتن يتعشو و قبل ما يبلشو ياكلو فورا قمت الاكل و كبيته و استغفرت ربي و حضنت اولادي و بكيت و قلتلن معلش اليوم رح تنامو بلا عشا(حادثة واقعية)
..
نزلت تاني يوم لبيع موبايلي و بيع كل شي عندي خرج ينباع بس قبل ما بيع موبايلي دقيت لرفيقتي و قلت بجرب حظي و حكتلها عن يلي صار فيني و قلتلها بدي شغل حتى لو اشتغلت خدامة بالبيوت انا قبلانة قلتلي بعرف مرة كبيرة بالعمر بدها مين يقعد عندها و يدير باله عليها لانو وحيدة و اولادها كلن متغربين بدول الخليج و امريكا بس ما بعرف اذا لقت وحدة الا لسا قلتلا الله يخليكي شوفيلي اياها اذا لسا بدها وحدة و ليكني ناطرتك رديلي خبر فورا….
دقتلي بعد نص ساعة وقلتلي بعتذر لاقت وحدة بس في جارتي عم تقلي انو جيرانها بدن وحدة تعزلن بيوتن كل فترة قلتلها اي بجي ما عندي مشكلة و هاي رقمي حكيني و فتت بعت موبايلي و استبدلته بموبايل مستعمل و رخيص كرمال شغلي الجديد و اشتريت بالمبلغ يلي معي لوازم للبيت…..
و بعد يومين بلشت شغل و قلت لبيت حمايي انو توظفت سكرتيرة عند دكتور و بقيت اشتغل و عزل و نظف بيوت 7شهور و زاد الطلب علي كتير لانو انعرفت بين الناس بالنظافة و الامانة و قدرت فين انو طعمي اولادي و اكسين و ما احتاج لحدا …..
بعد 7شهور بدقلي رفيقتي لتقلي عن المرة الكبيرة يلي حكتلي عنها اول مرة و انو رجعت بدها وحدة لانو القديمة ما عجبتها قلتلا ماشي بروح و اخدت العنوان و رحت على بيتها يلي كان متل القصور يلي منشوفها بالاحلام او حتى بالاحلام ما منشوفها نحن الفقراء دقيت الجرس و فتحتلي وحدة فلبينية و استغربت انو عندها خدامة معناتها انا شو شغلي رح يكون عندها فتت قعدت بالصالون و بعد نص ساعة نزلت المرة من الطابق التاني المرة يلي غيرتلي حياتي المرة يلي كانت حنونة علي و على اولادي متل امي المتوفية و المرة يلي الها الفضل الكبير بالشي يلي انا وصلتله هلا
الجزء التالت:
ام الوليد….هيك كان اسمها ….اصلا ما بقدر انساه و انا كل اسبوع بروح على قبرها بقرالها الفاتحة و بدعيلها بالرحمة …..
عرفتها عن اسمي و وضعي الاجتماعي و اكام ولد عندي و وين ساكنة يعني جاوبتها على كل الاسئلة يلي سالتني اياها و انا بدوري سالتها انا شو رح تكون طبيعة شغلي عندها قالتلي ولاشي قلتلها شو ما فهمت عليكي شو ولاشي قلتلي ما في شغل عندي لتشتغليه متل ما شايفة عندي طباخة و عندي شوفير و عندي خدامة و عندي …… قلتلها عفوا لكن انا شو بدي سوي هون قلتلي انا مرة وحيدة و بمل لحالي و اولادي كلهن مغتربين بقا بدي مين يقعد يسليني و يآنس وحدتي انا فتلت الدنيا فيني معقووووول انا يلي قضيت 7شهور امسح و اجلي و اشطف ادراج و نظف حمامات بيوت الناس هلا اقعد بهالقصر و ما اشتغل شي تابعت حكيها انا رح اعطيك راتب مغري و بتصيري تجي عندي من 11الصبح ل8المسا قلتلها دوام طويل انا عندي اولاد 3كبار بقدرو يدبرو حالن بس عندي بنت صغيرة عمرها 4سنين ما بقدر اتركها كل هالوقت الطويل قالتلي جيبيها معك الطفل بيعطي طاقة ايجابية للبيت …..
نادت الشوفير ليوصلني لبيتي لارجع تاني نهار بلش شغلي عندها او بالاحرى قعدتي عندها و طلعت و حاسة حالي بحلم و انا على الطريق سالت الشوفير ابو موفق قلتلو انو ام الوليد كيف بتفكر قلي ام الوليد اذا حبتك رح تعيشي ملكة و اذا ما حبتك ب 4شهور بتقلك الله معك قلتله و كيف بدي خليها تحبني قلي شو بعرفني هاي ما شغلتي
رجعت تاني يوم متل ما اتفقنا و كانت ناطرتني لنفطر سوا الفطور الملوكي شو كنت مشتهية اولادي يفطروه معي و بعد ما فطرنا و حكينا شوي عن بنتي ديما يلي كنت جايبتها معي و حبتها كتير و عن الجو و البلد بشكل عام قلتلي قومي ساعديني لالبس بدنا نروح على اسبوعية رفقاتي اليوم الجمعة رح تكون عند ام يزن …..
ام يزن و ام فؤاد و ام الحسن وغيرن كتيرررر….
مجتمع مخملي و راقي و حياة ترف و بزخ …جو اول مرة بفوت عليه ابتداء من فخامة المكان و التحف يلي كانت حق تحفة وحدة منن بكل شي دخلته مصاري خلال ال7شهور حتى اصناف و اشكال الحلويات يلي اتقدمت على الطاولة و لا صنف منن عرفته……
بعد اسبوع قلتلي بدنا نروح عالمول لازمني تياب قلتله اي منروح و اي قطعة كانت تختارها تاخد رايي فيها و تقلي انت مذوقة و بعد ما خلصت قلتلي يلا دورك هلا قلتلا انا قلتلي ايه فوتي اشتري الك و لديما قلتلها شكرا ما لازمني شي بس اخد راتبي بشتري منه قلتلي انا ما عم اطلب منك طلب انا عم اامرك امر و فتت و اشتريت الي و لبنتي ديما يلي طار عقلها بالفستانين يلي اشترتلا اياهن و اشترتلا كمان العاب الها و للاولاد بناء على طلب ام الوليد ….
بعد فترة كنا قاعدين بالتراس قلتلي ام الوليد شو قصتك ليش ما تزوجتي بعد زوجك و حكتلها قصتي بكل تفاصيلها قلتلي معقول في قصص بشعة لهل درجة و بعدك على اسم سلفك قلتلها بعدني لهلاو لو ما بعدني لهلا كنت شفتيني انزتيت بالشارع للاسف… هزت براسها و شردت…..
صرت كل نهار جمعة بعطلة اولادي نقضي نهارنا عند ام الوليد و الاولاد كانو ينبسطو كتير لانو كانو يقضو اول النهار بالمسبح و اخره بحديقة الفيلا و ام الوليد حبتن كتير و تقلي كان هالبيت بلا روح و اولادك اجو عبوه و رجعوله روحه …..
اما سلفي بلش يشك بشغلي لانو العز بين علي و على اولادي فورا من لبسن و العابن و مصروفن وحتى صحتن لهيك لحقني ليعرف وين عم روح و اجي و نطرني لرجعت على بيت حمايي ليواجهني بانو انت كذابة و شو فتي تعملي بهديك الفيلا بس انا كنت اشطر منه لانو كنت مخصصة راتب شهري بسيط لبيت حمايي اقسمه من راتبي لهيك وقت عصب و حكا بيت حمايي وقفو لجنبي و خاصة بعد ما خبرتن بالحقيقة باني عم اشتغل عند وحدة غنية و هي يلي عم تعطيني كل هالشي حتى راتبن منها و هالشي سكتن عالاخر و سكت سلفي يلي كان يعطي اهله بالقطارة
مرت خمس سنين على علاقتي مع ام الوليد ….كانت من احلى ايام حياتي انا و اولادي عاملتني متل بنتها و ما بيوم حسستني انو انا اقل منها بالعكس كانت تقويني و تمدحني كتير …
رحلت عن الدنيا عن عمر 75سنة الله يرحمها و يغفرلها…..بقيت ببيتي بعد وفاتها اسبوعين قضيتن بالدموع و الحزن و الانعزال و ما طلعت منه الا بعد ما دقلي المحامي و قلي لازم شوفك ضروري اسمك مذكور بوصية ام الوليد قلتلو انا متاكد قلي اي مو انت ندى صادق قلتله اي اانا هي قلي معناتا رح اعطيكي عنوان المكتب و ناطرك عالساعة 5قلتله اي بجي انشالله …..
رحت عند المحامي و انا طول الطريق فكر بشو ممكن ام الوليد تكون ذاكرتني بالوصية و فتت عالمكتب و استقبلني المحامي و عزاني بالمرحومة و قلي هاي الوصية اعطتني اياها ام الوليد من سنة و عملتلي وكالة بكل املاكها و هلا فتحتها و قراتها و في بالرسالة نص مكتوب الك قلتلو تفضل عم اسمع مسك الورقة و بلش يقرا
………………………………………………
الجزء الرابع والاخير
و بلش يقرا :
ندى بنتي و انيستي بوحدتي …..انشادركون الحضن الدافي الك و لاولادك الايتام ايمن و محمد و ايناس و ديما يلي حسيتن متل احفادي بغلاوتن و محبتي الن انا مستحيل كنت ارتاح انا و تحت التراب بدون ما امن عليكي و على احفادي لانو بعرف الدنيا اديش ظلمتك و اديش حاولتي تكوني مثال للام القوية يلي حطت اولادها تحت جناحها و ضحت براحتها كرمال تعيشن عيشة كريمة باختصار كنتي الام و الاب لهيك انا كتبتلك الفيلا باسمك و حطتلك رصيد بالبنك باسمك لتقدري تبلشي حياة جديدة و تفتحي مشروعك الخاص و بالنسبة لزواجك من سلفك المحامي رجب رح يباشر فورا بدعوة الطلاق و اتعابه مدفوعة سلفا بدي منك بس ضلي قوية متل ما عرفتك و تربي الاولاد تربية صالحة تمنيات الك حياة سعيدة التاتا ام الوليد

كنت عم ابكي و ما مصدقة حتى بعد ما ماتت ما نسيتني و كانت اكلة همي من بعدها كيف بدي عيش انا و اولادي شو كان نفسي تكون قدامي لاحضنها و بوسها و قلها انت الشخص يلي الله عوضني و عوض اولادي عن كل شي شفناه بس راحت لعند خالقها ….

بلش المحامي فورا بمعاملات التنازل عن الفيلا لاسمي و حصلت على الطلاق من سلفي بعد اسبوعين بس من الدعوة لانو المحامي اعطاه مبلغ و طلق بسرعة بدون اي مماطلة و انتقلت انا واولادي على فيلا ام الوليد يلي تبرعت بباقي املاكها للجمعيات الخيرية اما الراتب يلي كنت اعطيه لبيت حمايي ما وقفته ابدا و زدته و خصصت رواتب شهرية لعائلات كتير فقيرة و محتاجة كانت بنية الصدقة الجارية عن روح ام الوليد……

عمري هلا خمسين سنة و انا هلا صاحبة سلسلة مطاعم كروز اما اولادي الدكتور الجراح ايمن الطريفي و محمد رابع سنة هندسة معمارية و ايناس سنة تالتة صيدلة و ديما سنة اول طب اسنان …..

بعد 18سنة على فراق ام الوليد لهلا بروح على قبرها و بقرالها الفاتحة و بحكيلها عني وعن اولادي و قصصن بالجامعة و طموحن …….
انتهت.