#فاعلة_خير_بقلم_مال_الشام 

الجزء السادس + السابع + الثامن + التاسع + العاشر + الحادي عشر #تمت

جاد : اسف بس 

مدتلو ايدها وهي مخبيه وشها وعم تطلع عالجهة التانيه

غزل : اعطيني ياها

جاد : خدي

مسكت غزل الملاية بايد .. وبالأيد التانيه لملمت شعرها وضبتو

جاد : طيب ليش ما تورجيني وشك ؟

غزل ما جاوبتو وحطت الغطا على راسها ونزلت على وشها

جاد : ردي علي طيب

غزل : ما فيني

جاد : ليش ؟

غزل : لأنو انا مشوهة .. يعني ازا بتشوفني بترتعب

جاد : مشوهة !!!!!!

غزل : ايه ..

التفتت عليه وهي مغطيه بالكامل : ممكن توصلني عالبيت ؟ انا تاخرت كتير

جاد : طيب

طلعو بالسيارة وبالأول ضلو ساكتين بعدين جاد حكى

جاد : طيب ليش ما شفتي طبيب مختص يساعدك ؟

غزل : ما مشي الحال

جاد : ماشي ما تدايئي عادي .. تطلعي اديه في صبايا حلوين وجمالهن ما بيتقوام بس الانسان بيقرف منهن بعد ما يشوف شو في داخلهن

غزل : اها

جاد : والله ما عم جاملك او واسيكي .. ليكي انا مثلاً

غزل : شبك انته ؟

جاد : انا اول بنت حبيتها كانت اقل من عاديه ومع هيك حبيتها من كل قلبي .. كنت مستعد موت كرمالها .. بس هي حبت واحد غيري وتركتني

غزل : خانتك !!

انزعج جاد شوي وطلع سيجارة وصار يدخن

غزل : طيب ليش لتخونك ؟ وانت في مية بنت بيركضو وراك

جاد : هاد هلأ .. بس زمان انا ما كنت هيك .. كنت شب بسيط كتير وما اهتم بمظهري الخارجي ولا حتى بالأمور الماديه
ما سبق وفكرت خبر حدا ابي مين بيكون او اتفاخر اديه عندي سلطة .. كنت شب فيكي تقولي اجدب شوي
حبيتها لمها و تعلقت فيا كتير .. و مرت علينا ايام صعبه كتير ونحنا مع بعض .. تحملت ظلم ما في مخلوق بيتخيلو وهي كانت جنبي
مجرد ما تحط ايدها على كتفي حس هموم الدنيا كلها ولا شي

غزل : معقول ؟ معقول في وحده بتقدر تترك شب حبها كل هالقد ؟

جاد : ما بعرف والله .. يمكن انا فيني شي غلط بس ما عم اقدر اعرف شو هو
هيك بيوم من الايام شفتها طالعه مع واحد بسيارتو..ضليت ساكت وناطرها تحكيلي

غزل : وحكتلك ؟

جاد : ايه حكتلي .. حكتلي انو نحنا مو لبعض وهي كتير زعلانه وصارت تبكي وانا ما جاوبت بشي .. وراحت .. وبعد اسبوع تجوزتو للشب الي شفتها طالعه معو

غزل : ما فهمت .. يعني انت لليوم ما واجهتا انك بتعرف خيانتها ؟

جاد : ههه لأ

غزل : شووووووووو ؟

جاد : وين بدك نزلك ؟

غزل : هون منيح .. انا باخد تكسي للبيت

وقف جاد السيارة ونطرها لتنزل وهي ضلت مكانها

غزل : لهيك انت بتتسلى بالبنات ؟

جاد : لا مو لهيك .. انا ما بعمري عرضت حالي على بنت .. بس وقت وحده تعرض حالها علي ما بقلها لأ
دخلك في شب بقول لأ ؟

غزل : هاد مو مبرر

جاد : يمكن .. بس انا بعد مها ما قدرت حب مع انو كل الي عرفتهن بعدا احلى منها .. لهيك بدي قلك ما تفكري كل شي جمال المظهر وما تخجلي وتخبي وشك

غزل : ايوه .. شكراً عالنصيحة

نزلت من السيارة وكانت بدها تسكر الباب

جاد : مو احتمال بيوم من الأيام حبك الك؟ .. كل شي بيصير ههههههه

و مشي وتركها وهي عم تطلع عالسيارة وقلبها عم بدق بسرعه ورن موبايلها

غزل : الو ؟ ايه قانتة انا جايه .. يلا جايه حاضر .. لك حاج تنقي بس اوصل بفهمك صار معي انا ورفقاتي شغله .. رح اوصل بس ثواني

اخدت سيارة و راحت عالبيت مستعجلة كتير و وصلت وبلشت تبرر لاهلها لتحاول تغطي على غيابها لهل وقت هاد …

فاتت على غرفتها و صورة جاد لسه بين عيونها .. حكيو .. ريحة عطرو .. ضحكتو

قانتة : طفي الضو

غزل : اه ؟

قانتة : الضووووووووووووووو

قامت غزل و طفت الضو .. نامت بفرشتها وهي عم تفكر بجاد ..

وتاني نهار .. ما قدرت الا تروح لعندو .. لقت حالها الصبح قدام بنايتو .. وعم تدق عليه باب الشقة ..

بعد عشر دقايق فتح جاد الباب وهو عم يفرك عيونو

جاد : هلأ بشرفك هاد انتي ؟

و لف ضهرو وفات لجوا

تطلعت غزل حواليها وترددت كتير تفوت .. بعدين لحقتو وكان قاعد عالكنباية ومغمض عيونو

غزل : صباح الخير

جاد : يا صباح الحشرية .. يا صباح المشاكل .. يا صباح السواد .. يا صباح فاعلين الخير

غزل : خلص طول بالك ازا هالئد مو طايئني رح روح

تجلس وفتح عيونو واشرلها بايدو لتقعد : خليكي

غزل : كيفك اليوم ؟

جاد : هههه ممتاز

غزل : انا جايه اعتزر مشان امبارح

جاد : مو مشكلة .. فايت اعمل قهوة احسب حسابك معي ؟

غزل : ياريت

قام جاد وفات عالمطبخ وحط الركوة عالغاز وهو عم يحكي

جاد : ما بعرف امبارح ليش كترت حكي .. بتعرفي مع انو ما بعرف عنك شي ولا حتى اسمك بس انتي صرتي تعرفي عني شغلات ما حدا بيعرفهن
بس ان شاء الله تكوني عنجد فاعلة خير وما تسببيلي وجع راس .. هلأ انا حاسك طيبة كتير .. برتاح بالحديث معك يمكن لان باخد حريتي وما بحس بأي قيود

ضل يحكي وما كان يسمع صوت غزل بنوب

جاد : انتي بعدك هون يا فاعلة الخير ؟

كمان ما جاوبتو ..

صب فنجانين القهوة وحمل الصينية و طلع عالصالة : شو اختفيتي ؟ اجاكي عمل خير بمكان تاني هههههههههه

كان عم يضحك لما وصل عالصالة .. و شاف شي خلاه يوقف حكي .. ويفتح عيونو على وسعهن ويجمد بأرضو

جاد : مين انتي !!

#فاعلة_خير_بقلم_مال_الشام

الجزء السابع

غزل : هي انا

جاد : انتي نفسك هديك ؟

غزل : لك مين هديك ؟ انا وهديك واحد .. يعني ما في تنين

جاد : يعني ما في الي كلها بتلبس اسود ؟

غزل : هئة .. هي انا

قرب جاد و حط الصينية من ايدو ..

غزل صبيه ناعمة كتير .. بياضها صافي وجذاب و خدودها مفتح عليهن ورد جوري .. عيونا وساع كتير و رموشها طوال ومتشابكين بطريقه فاتنة

غزل بخجل : لك شبك ؟ ليه هيك عم تطلع علي ؟

جاد : هلأ .. انتي ..

غزل : لك ايه انا

جاد : وانا امبارح عم اعطيكي محاضرة دعم نفسي انو الجمال مو كل شي بالحياة .. طلعتي ماخده جمال الحياة كلو وحاطيتو بجيبتك الصغيرة

غزل : مو لهل درجة

قعد جاد ولسه عيونو معلقة فيها

غزل : انا حبيت انهي هالمسرحية هي .. انت عنجد طلعت اد كلمتك وتركت دارين .. وعرفت عنك شغلات كتيرة خلتني غير رأيي فيك
هلأ ما بدي منك شي .. ولا انت الك شي عندي ..

مسكت غزل الملاية والكفات السود و حطتهن بأيد جاد

غزل : وهدول خليهن ذكرى مني الك مشان ما تنسى انو دايماً شو ما تعمل رح يطلعلك بحياتك فاعل خير يمنعك تئذي حدا .. يلا سلام

مشيت غزل وهي مبتسمة ومبسوطة برد فعل جاد الي لهلأ مصدوم فيها ..

جاد : لحظة استني

غزل بصوت واطي مع ابتسامة : يااااي ..

غيرت ملامحها بشكل جدي والتفتت عليه : نعم ؟

جاد : انا .. يعني

غزل : شو ؟

جاد : بصراحة .. انا حابب نتواصل .. ما بدي تفلي هيك

غزل عم تتمئلس : ( يا صباح المشاكل .. يا صباح السواد .. يا صباح فاعلين الخير ) عفواً استاز جاد ؟ حدد موقفك

جاد : لا .. انا .. هههه

قام من مطرحو و حط ايدو على شعراتو : هلأ الوضع اختلف تماماً

غزل : شو الي اختلف ؟ عجبتك وبدك تتسلى ؟

جاد : خليني ئلك شغلة .. انا ما كزبت عليكي بأي حرف .. امبارح التلك انا بعمري ما عرضت حالي على بنت .. بس الي بتعرض حالها علي ما بوفرها

غزل : شو يعني ؟

جاد : يعني صدقاً ما بدي منك اي شي سيء .. انا اديه مرق علي بنات .. بس متلك ما مرق علي .. كنير كتير حابب نضل على تواصل

غزل : طيب .. رح فكر

جاد : ماشي ..

قام جاب ورقه وكتب عليها رقمو واعطاها ياها

جاد : رقمي عندك .. بانتظار اتصالك انا ..

طلعت غزل و سكر جاد الباب وراها

وقفت عالباب وتنهدت وصارت تضحك : يس يس يس … عجبتوووووووووووو

ففجأة انفتح الباب وراها

جاد : عجبتيني كتير والله لدرجة عم اتطلع عليكي من العين الساحرة

غزل احمرو خدودها و دابت من الخجل ورجعت حكيت بنعومة :سوري .. بي باي

ونزلت عالدرج كرفته وجاد عم يضحك

هداك اليوم كان بداية جديدة لحياة غزل .. و جاد

بلشت تتواصل معو عالموبايل ويحكو بكل شي ويتناقشو .. حكتلو انو اسمها غزل بس ما عرفتو هي بنت مين او وين ساكنة
يسهرو لوش الصبح عم يحكو عن طريق الرسائل عالجوال .. والصبح يمرق يشوفها ويشربو قهوة سوا قبل ما يروح كل واحد على دوامو

بلش جاد يحكيلها اكتر واكتر عن حياتو .. علاقة جاد وغزل كانت شي بيشبه السحر .. علاقة بين الحب و الصداقة
بين الأخوة و الأبوة والأمومة .. شي ضايع بين كل هالمفاهيم .. كل واحد يشوف بعيون التاني نظرة ما يعرف يفسرها بنوب
بس غزل كانت خايفه كتير يتطور الموضوع لحب علني و جاد كان ملتزم بحكيو انو ما رح يزعجها ابداً

جاد : هلأ عنجد ما بدي شي نهار تجي معي عرفك على اختي ريم ؟

غزل : لا مستحيل .. شو مروحني .. بس ليش حصراً على اختك ريم ؟

جاد : ريم هي الغالية .. حبيبتي و روح البي .. انا عندي اخين تنين واخت من مرت ابي
اخواني الشباب انا وياهن مو صحبه بنوب .. بس ريم هي احلى شي بحياتي

غزل : الله يخليكن لبعض

رن موبايل جاد .. اتطلع عالرقم ورجع حطو عالطاولة

غزل رفعت حواجبها : ليش ما رديت ؟

جاد : هي مها

غزل : مهااااااا مها ؟؟

جاد وهو عم يشرب قهوتو : ايه مها مها

غزل : لك مو تجوزت ؟

جاد : هههه ما الزك انتي .. ليش مين قلك كل وحده بتتجوز بتكون مخلصة بالكامل لزوجها ؟ في صبايا بس تجوزو بكرسو مشاعرهم للزوج وبس
وفي صبايا مشاعرهم متاحة للجميع .. عندك مها مثال

غزل : ياااخ مو معقول .. طيب وانت عم تحكي معا ؟ما قلتلي انو لسه بتحبا ؟

جاد : لا لا عفواً تاني مره انتبهي انا شو بحكي .. انا قلت انو لليوم ما قدرت حب غيرها بس ما قلت انو لليوم بحبها

غزل : طيب يمكن كرمال تقدر تحب غيرها لازم تواجها بخيانتها وتحط على عينها .. و وقتا بتتحرر من هالعلاقة .. مو ؟

ابتسم جاد ابتسام صافية واتطلع بغزل وعيونو لمعو : يا بنت انتي كيف هيك عمرك 18 ؟ اوقات بحسك بنت 8 سنين و اوقات شي 48 قليل عليكي

غزل بدلع : المهم تحافظ عال8 لو سمحت

ضلت علاقتهم يوم عن يوم عم تتطور .. وحب جاد بقلب غزل عم يكبر بشكل فظيع .. صار جزء مهم من حياتها لوقت ما بيوم من الأيام كالعاده
كانت عم تحاول تجرجر قانتة بالحكي لتعرف اخبار عن جاد وازا عم يلعب بديلو من وراها

غزل : دخيلك هاد الي اسمو جاد بعد تعرض لبنات الشركة ؟

قانتة : يوووووه منيح زكرتيني كنت رح انسى قلك .. كأنو هو ومنى رجعو لبعض

بس سمعت غزل هالحكي قلب وشها الوان و حست قلبها وقف للحظة

غزلة : كيف ؟ شو ؟

قانتة : شو ؟

غزل : منى ؟

قانتة : لك ايه .. اتصلت علي امبارح و قالتلي انو امورها عم تتحسن و قالتلي خبر دارين انو هي و جاد رجعو لبعض

غزل : لك مستحيل

قانتة : ليش ؟

غزل تعبو عيونا دموع وما قدرت تحكي لان ازا حكت كمان كلمة رح ينزلو دموعا
لفت وشها وقامت من الغرفة

غزل : بدي فوت عالحمام

فاتت عالحمام و وقفت قدام المراية و صارت تحكي وتبكي : طيب هو طول الوقت معي .. هو مانو سيء .. هو حدا كتير منيح
ليش هيك .. ليش طيب انا شو عملت .. معقول ما عندو اي مشاعر تجاهي ؟

غسلت وشها ورفعت شعرها .. وطلعت اخدت موبايلها وبعتت لجاد رسالة وينك

جاد : قاعد عم بشرب قهوة تفضلي

غزل : بدي احكي معك

جاد : يلا رح دئلك

طلعت غزل عالبرندة وسكرت الباب وراها و ردت على جاد وهي عم تبكي

غزل : ليش هيك عملت ؟

جاد : شو عملت شبك ؟

غزل : انت رجعت لمنى مو ؟

جاد : اه .. ايه صح.. شو المشكلة ؟

غزل : طيب وانا ؟

جاد : انتي شو ؟

غزل : انا .. انا

جاد : لك انتي شو ؟

غزل : لك انا حمارة الي علقت حالي بواحد متلك .. انا بستاهل كل شي

جاد : غزل اهدي شوي .. نحنا ما في بيناتنا اي علاقة .. مجرد صداقة ما في داعي تزعلي

غزل : صداقة ؟؟

جاد : ليكي هلأ بعد شوي جاية رفيقتي لعندي عالبيت .. ما معي وقت كتير راضيكي

غزل : عالبيت ؟

جاد : انتي روقي وما تزعلي حالك بكرا بشوفك ومنحكي

غزل : جاد !! شو صرلك

جاد : لك شبك ؟

غزل : انت ما بتحبني ؟

جاد : بحبببببببببك ؟؟؟؟؟؟؟؟؟؟ انا حبك انتي ؟؟؟؟؟؟؟؟؟؟؟؟؟؟؟؟؟؟؟؟؟ههههههههههههههههههههه ..عم تمزحي ؟

يتبع

#فاعلة_خير_بقلم_مال_الشام

الجزء الثامن

سكرت غزل الخط و حست في شي متل السكاكين عم يقطعو جسمها .. حطت ايدها على قلبها .. وحاولت تتنفس لان رح تختنئ

غزل : انا شو عملت بحالي …

قعدت عالأرض و هي عم تحاول تلقط نفسها و دقات قلبها عم تتسارع .. و فجأة فتحت قانتة باب البرندة

قانتة بخوف : غزل !!!!! غزل شبك شبك

ركضت قانتة على اختها و هي مرعوبة

غزل تخبت بحضن قانتة : تعبانة يا اختي تعبانة

قانتة : شو عم يوجعك ؟ بشو حاسة ؟

غزل : البي .. البي عم يوجعني كتير

حست قانتة انو فهمت على اختها شو قصدها .. قعدت عالارض معا و ضمتها لصدرها

قانتة : البك ؟

غزل : حبيتو كتير .. كتير كتير .. بتعرفي ؟ اليوم الي ما بشوفو فيه ما بحسبو من عمري صرت شوف وشو بكل مكان
هو بالنسبة الي كل الناس .. وكل الناس بدونو ما بيعنولي شي

قانتة : ليش ما حكيتيلي ؟

غزل : ليش انا حدا حكالي ؟ .. ههه .. هيك .. فجأة شي متل السحر خلاني امشي وراه بدون ادراك او احساس
شي بخليني اتطلع بعيونو وجن .. وانسى حالي واهلي والعالم كلو

قانتة : صار شي بيناتكن ؟

غزل : لأ

قانتة : طيب اهدي .. عادي بروح شب بيجي ألف

غزل غمضت عيونها وتنهدت : ما بدي غيرو

ضلت قانتة عم تلعبلها بشعراتها وحاضنتها لوقت ما حست انها نامت .. صحت عالهدا واخدتها على تختها .. حطتها بالفرشة وغطتها منيحه وبعدتلها شعراتها عن وشها

قانتة : ما تخافي يا البي طول ما انا جنبك ما في حدا رح يئذيكي .. وباستها وطلعت من الغرفة واخدت موبايلها معها

اتصلت على رقم … وكانت عم تحكي بصوت واطي

قانتة : ايه جاد .. لا غزل منيحه شو رح يكون فيها .. هلأ تعشينا ونامت

جاد : ايه .. تمام .. هيك بتكوني حميتي اختك مني ؟

قانتة : ايه هيك حميتها وارتاح بالي ..وانت بتعرف انو معي حق 100% انسى كل اخلاقك وسمعتك بين الناس .. بس انت مدمن مخدرات
يعني اختي رح تكون بقمة تعاستها معك

جاد : بس انا قلتلك انو مستعد اتعالج وبعد هيك بتقدم لخطبتها وهي الفترة بقلها اني مسافر

قانتة : جاد .. اختي بتعرف انك مدمن مخدرات

جاد : كيف ؟؟؟

قانتة : هي مره فاتت على حمامات الشباب بالغلط وكانت جوا وسمعتك وانت عم تطلب مخدرات .. بعدين ليك هي مو لعبة لتقلي بتتعالج وما بتتعالج
الي فيه سوسة ما بيتغير .. واختي صغيرة وطايشة وانا واجبي احميها

جاد : حقك .. حقك .. وانا رح ابعد عن حياتها .. متل ما بدك

قانتة : شكراً كتير وعزبتك معي .. مع السلامة

سكرت الخط وفاتت عالمطبخ وقفت بالعتمة وهي عم تتزكر كيف كانت طالعه على دوامها بكير و لمحت غزل و جاد سوا عم يضحكو ويشربو قهوة سوا
وكيف صارت كل يوم تراقب اختها وتلحقها وتشوفا مع جاد ، بعدين واجهتو بالشغل انو غزل بتكون اختها و هو لازم يبعد عنا
وجاد حس معها حق لأن هو ما عم يقدر يتخلص من ادمانو .. و عمل الي بدها ياه

تاني نهار فتحت غزل عيونا وهي حاسة بوجع راس قوي وبتعب

غزل : اوووف اديش الساعه ؟

قانتة وهي عم تلبس : رح تصير 8 اختي

بلحظة تزكرت غزل كل شي صار معها امبارح .. وعبو الدموع عيونها .. شدت الغطا لحضنها وخبت وشها بالوسادة

غزل : انا ما رح روح عالجامعة

قانتة : لا بدك تروحي .. قومي بلا جدبة

غزل : اتركيني بحالي

ما حبت قانتة تضغط عليها .. خلصت وجهزت حالها وطلعت .. وغزل ضلت عم تبكي وتتزكر كل شي صار .. بعدين حست بحقد قوي على جاد
حستو تسلى فيها متل ما كان يعمل بكل البنات ..

غزل : طيب .. مو انا الي بينعمل فيني هيك يا جاد .. ما رح خليك تتهنى وتشوفني ضعيفه

رمت الغطا عالأرض وقامت .. طلعت تياب انيقه كتير و وقفت قدام المرايه وهي عم تحاول تحط مكياج يغطي انتفاخ عيونها ..
و كريم يغطي اللون الباهت الي طغى
على بشرتها ..
و حطت اخر لمسة لون وردي فاتح على شفايفها لعطيها مظهر حيوي ونشيط

غزل وهي طالعة من البيت : ماما انا رايحه لعند قانتة عالشغل .. ما عندي محاضرات بالجامعة اليوم … باي

نزلت وهي مستعجلة و راحت على شركة قانتة .. طلعت بالمصعد الكهربائي وهي متوترة كتير وعم تحاول تهدي حالها .. وطلع معها شب تاني
وصار يتطلع فيها بطريقه غريبه وهي خافت منو

غزل : عفواً في شي ؟

الشب : مو انتي سكرة ؟

غزل : سكرة ؟

استغربت شوي بعدين تزكرت انو هاد الشب الي صدمت فيه وهي طالعه من الحمام وقالتلو انو اسمها سكرة و انفجرت من الضحك وفت تزكرت عمايلها وانو هو مسدئ اسمها سكرة

وهي عم تضحك والشب عم يضحك مو عرفان ليش.. انفتح باب المصعد ..
وكان جاد واقف عم يستنى ويتطلع بساعتو وقت سمع ضحكة غزل .. رفع عيونو وشافها قدامو

غزل بس شافتو بدون شعور فاض الدمع لعيونها ليبلل ضحكتها البريئة

ابتسم جاد ابتسامة خيبة امل و وجع ..

جاد : عفواً .. ما رح ازعجكن

ضغط على زر المصعد ليسكر الباب وعيونو بعيون غزل

جاد : انا رح انزل عالدرج

ضل الباب عم يغلق شوي شوي .. و الدمعة بعين غزل و بسمة الانهيار على شفاف جاد ..

وبس سكر الباب وغابت صورتو من بين عيونا .. حطت ايديها على باب المصعد وبصوت ضعيف : جــــــاد ..

الشب : عفواً في مشكلة ؟

وصلو على الطابق الرابع .. وطلعت غزل وهي مو قادرة تحكي شي ومشيت على مكتب قانتة وعيونها لونهن احمر

والشب لاحقها وعم يقلها : انسة سكرة .. انسة سكرة لو سمحتي

فاتت لعند قانتة ورمت الشنته عالمكتب

قانتة : غزل ؟

الشب : انسة سكرة ؟

غزل : لك شوووووووو بدكنننننننننننننننننننن

يتبع

#فاعلة_خير_بقلم_مال_الشام

الجزء التاسع

سكتو الكل ونزلت دمعة غزل .. مسحتها بطرف ايدها و اخدت نفس ..

غزل : طيب ،، شوي بس … شوي

قانتة : استاز زهير ؟

زهير : يعطيكي العافية قانتة .. انتو كملو شغلكن .. انسة سكرة لو سمحتي بدي احكي معك

قانتة : مين سكرة .. هي اختي غزل

زهير : غزل ؟

اتطلعت غزل عليه : ايه اسمي غزل .. و وقتا كنت عم امزح معك وما تخيلت انك تسدئ انو اسمي سكرة .. وهلأ شو بدك ؟

قانتة : غزل الله لا يوفئك

غزل : لك شوووو

قانتة : هاد مدير القسم يعدمني ياكي

غزل فتحت عيونا مصدومة : اه ؟ شو ؟ … ولــــــــــي ..

قامت قانتة لعند زهير وصارت تعتزر منو وهو عم يطلع على غزل

قانتة : تعي اعتزري من الاستاز وليه

غزل قربت وهي خجلانة : انا .. اسفه .. كتير ..

زهير : حصل خير .. يلا كملو شغلكن يعطيكون العافية …

طلع من المكتب وهو عم يضحك و قانتة صارت تخانق غزل

جاد طلع من الشركة و ركب بالسيارة وهو عم يسوق بسرعه

جاد : من سبع سنين ما بكتني بنت .. من سبع سنين دمعتي ما نزلت ,, من سبع سنين وجاد القديم مــــــات ودفنتو بايدي هدول لاخلص من كل الذكريات البشعه الي عشتها
وهلأ بس صحي كل شي فيني .. بس رجعت نزلت دمعتي بسببها هي .. بتحرقني هيك !! بتحرقني بضحكة لهلأ عم ترن بأدني مع زهير .. من وين هي بتعرفو اصلاً
معقول ما بكيت ولا دمعة على فراقي ؟ معقول ما كانت حاسة بشي وهي معي ؟ كيف هيك .. كيييييييييف هيييييييييييييك ما عم افهم

وصل على بيتو وفات بسرعه وسكر الباب … قعد كأنو الهموم الدنيا كلها فوق راسو

جاد : بكفـــــــي .. اطلعي من راسي .. اطلعي من قلبي .. اطلعي مني …

تغيب جاد عن الشغل لأسبوع كامل .. لاحظت قانتة غيابو وحاولت تتصل فيه بس ما كان عم يرد على حدا .. اجت لعندا سكرتيرة المدير
وطلبت منا تروح على مكتبو لان بدو ياها بموضوع ضروري ..

وهنيك خبرها انو هو معجب كتير بغزل وحابب يتقدم لخطبتها ..

قانتة : اه ؟ .. غزل اختي ؟

زهير : ايه .. فيه مشكلة ؟

قانتة : ما .. ما .. ما ..ما ماما في مشكلة

زهير : لا حول ولا قوة الا بالله هههههه .. طيب تفضلي على شغلك وناطر منك خبر باسرع وقت لو سمحتي

قانتة : ايه .. اييييييييييييييي .. اي حاضر

طلعت وهي عم تحاكي حالها ..

فاتت عالمكتب والبنات لاحظو انها مصدومة وما عم تحكي شي

دارين : شبك وليه ؟ شو كان بدو منك المدير ؟

قانتة بصدمة : بدو يخطب اختي الفصعونة غزل !!

الكل بصوت واحد : شووووووووووو غززززززززززززززززل ؟؟؟؟؟

قانتة قعدت عالمكتب : لك ايه غزل ..

دارين : وغزل شو رأيها ؟

قانتة : غزل هلأ نفسيتا تعبانـــــــــــــــ … كان بدها تكمل ولمحت جاد واقف على طرف الباب ..

قانتة : يعني هلأ هي رح تدلل شوي بس انا لاحظت انها كتير معجبة بزهير وعلاقته كتير حلوة مع بعض وهن متفاهمين
ف اكيد رح تنبسط وتوافق ..

بس سمع هي الجملة انسحب ومشي لبعيد

دارين باستغراب : علاقتهن ؟ متفاهمين ؟ تنبسط ؟ .. ليش هن في بيناتهن شي ؟

قانتة اتطلعت لتتاكد انو جاد راح وبعدين كملت : هههههههههههه عم امزح معكون

خلص الدوام وطلعت قانتة عالبيت وهي عم تفكر كيف بدها تقنع غزل توافق على زهير وهي بتعرف انو غزل ما بتطيقو بنوب

فاتت تغدت وغسلت و قعدت جنب غزل الي كانت عم تلعب بالجوال ..

قانتة : غزولتي

غزل تركت الموبايل من ايدها : الله يجعلو خير . نعم حياتي قنوتي ؟

قانتة : اجاكي عريس

غزل : هههههههههه يا عيني .. موافئة

قانتة : بحكي جد

غزل : مين ؟

قانتة : الاستاز زهير .. طلب ايدك مني وبدو خبر باسرع وقت

غزل : زهير ما غيرو ابو صلعه ؟

قانتة : تضرسي هلأ هاد الي طلع معك ؟

غزل : لا اختي ما بدي قليلو الله يبعتلك الاحسن منها

قانتة : ليش ؟

غزل : هيك وبس

قانتة بعصبية : كيف يعني هيك وبس ؟

غزل : لك هيك وبس شو الشغلة بالغصب ؟

قانتة : ايه بالغصب .. ما رح اسمحلك تضيعي حياتك متل ما انا عملت وضليت ارفض عرسان لانو حبيت شب ما بيستاهل وضليت ناطرتو يرجعلي
ما رح خليكي تعلقي حياتك كلها بجاد الغبي الي ما عندو اي احساس بالمسؤولية .. ما رح خليكي تعيشي اليأس والألم الي انا عم عيشو فهمانة ؟ ما رح اسمحلك

غزل : جاد ؟

قانتة والعصبية عامية عيونها : ايه جاد المدمن الحقير الي بيتسلى بمشاعر الناس .. شيلي من راسك احسنلك لان مستحيل اسمح لهل علاقة تستمر

غزل : بس انا ما التلك انو الشب الي كنت حبو هو نفسو جاد ..

قانتة : _ _ _

غزل : انتي شو عرفك ؟

قانتة : _ _ _

غزل : احكي !!

قانتة : شو ؟ .. مو .. مو مهم

غزل : قانتة فهميني شو الي عم يصير ؟

قانتة : ما في شي لتفهميه .. انا عرفت بعلاقتك بجاد

غزل : وانتي الي بعدتيه عني ؟

قانتة : لا انا بس حميتك منو

غزل : ليش هيك عملتي فيني

قامت مستعجلة وتركت الموبايل من ايدها وطلعت من الغرفة وبعدين من البيت

قانتة : غــــــزززل .. غــــــــــزل وين رايـــــــــــحة يا غزل

نزلت غزل مستعجلة وضربت بجارتهن و ضلت ماشيه بدون ما تعتزر

الجارة : يا عيب الشوم .. شو هالمنظر الي نازله فيه

غزل : تكـــــــــسي .. وقف وقف الله يوفئك .. خدني لهل عنوان ازا بتريد

مشيت السيارة وغزل عم تبكي و تتزكر كيف كان جاد معها واديشو متعزب بحياتو وما في اي حدا يوقف جنبو .. وحتى هي بعد ما فتحلها قلبو وحكالها كل شي
ما قدرت توثق فيه وتوقف جنبو

وصلت عالبناية وطلعت على شقو جاد و صارت تدق الباب .. كان مفتوح ومو مسكر .. دفشتو لورا .. وفاتت

غزل عم تبكي : جاد .. جاد

ضلت عم تدور عليه بالبيت .. فاتت على غرفتو و وقفت عالباب من بعيد وهي خايفه

غزل : جاد هون انته ؟

كانت بدها تطلع بس سمعت صوت حدا عم يأن و يتوجع

وقفت شوي .. وحاولت تركز بالصوت ..

يتبع

#فاعلة_خير_بقلم_مال_الشام

الجزء العاشر

غزل : جاد وينك ؟

فاتت عالغرفة و شافت جاد حاطط ضهرو عالخزانة و حاطط ايدو على صدرو وعم يتوجع

غزل ركضت عليه وهي مرعوبة : جاد شبك ؟ شبك ؟

تطلع عليها بنظرة غريبة و ضحك : لك اهلين بالعروووس … كيفك يا عروس ؟

غزل : شبك شو صايرلك ؟

جاد كان عم يتوجع ويحكي كأنو غايب عن الوعي ويضحك

غزل تطلعت بالغرفة وشافت علبة مشروب فاضية : شربان ؟
لك شو عم تعمل حالك ؟ شو عم تعمل بحالك ؟ مو خجلان وانت بهل منظر هاد ؟

جاد : امسكيها امسكيها .. في قطة عم تطير فوق راسك

حطت غزل ايدها على تمها .. قلبها عم يتقطع وهي عم تشوف الشب الي بتحبو بهل منظر وبنفس الوقت حاسة بقرف وخوف

قعدت على ركبتها وحطت ايدو على كتفها

غزل : قوم معي

جاد : وين ؟ بدنا نروح على الملاهي ؟

ما جاوبتو و حاولت تساعدو ليقوم .. فاتت عالحمام وشغلت المي وعبت البانيو كلو ..

جاد : شو هاد بدنا نسبح ؟

غزل : ايه رح نسبح .. يلا انزل انت بالاول

جاد : لا انتي بالاول

غزل : جاد خلصني

حط جاد رجلو بالمي وبعدين صار يضحك : بارد بارد بارد

غزل : لك يلاااااااا

ساعدتو لينزل ويتمدد بالبانيو … و جابت مي فاترة وصارت تنزلها على راسو شوي شوي وتبللو وشو وشعراتو

مسك جاد ايدها واتطلع فيها : امي كانت هيك تحممني

غزل : ومرت ابوك ؟

جاد : هي شيطانة

غزل : و انا ؟

حط ايدها على خدو وغمض عيونو : انتي كمان شيطانة .. بس بهيئة ملاكـ

غزل : انا ابداً ما كان بدي ااذيكي .. بس كنت عم تئذي حالك .. بتعرف ؟ انا مستعده اتحمل كل شي منك كل حياتي
بس مو مستعده شوفك عم تئذي حالك هيك

كان جاد غفيان وما عاد جاوبها بنوب ..

غزل : نمت ؟ قوم كيف هلأ بدي طلعك من هون ؟ .. جاد اصحى قوم .. لك جاد .. شو بدي اعمل هلأ !!

قامت اول شي على سدادة البانيو و سحبتو وبلشت المي تتسرب ونشف البانيو .. وجابت المناشف وحطت شي تحت راسو وشي سحبتو تحت جسمو

غزل : لك كيف هيك ؟ تيابو كلهن مي

راحت عالمطبخ ودورت عالبصل وقسمت البصلة نصين و رجعت لعندو وصارت تحطها بأنفو

غزل : يلا قوووووووم رح تمرض هيك .. قوم

صار يحرك راسو ويعقد حواجبو وهو متدايئ .. وفجأة صحي و صار يستفرغ

غزل : يبعتلي حمى شبك ؟ صرلك شي ؟ جاد شبك ؟

جاد : تعبان

غزل : قوم على تختك يلا

استند عالحيط وقام و غزل وراه .. وفات على غرفتو .. فتحت الخزانة وطلعتلو تياب

غزل : البس هدول .. رح اعملك كاسة زهورات تدفي جسمك

طلعت وسكرت الباب .. وراحت عالمطبخ وهي مخنوقة من حالتو وكيف جاد القوي الي كل الناس بتشوفو بيلعب بالمشاعر وبلا احساس
ضعيف كتير .. متل الطفل

وهي عم تحط السكر للابريق .. سمعت صوت جاد واقف على باب المطبخ

جاد : انتي شو جابك لهون ؟

غزل : جيت مشانك

جاد : زهير بيعرف انك عندي بالبيت ؟

غزل : بلا هالحكي الفاضي .. انا بحبك الك وانت بتعرف .. ليش عم تعمل هيك فينا ؟

جاد : انا ؟

التفتت عليه وقربت لعندو ..: انا تعبت من هاللعبة هي

جاد : طيب ؟

غزل : ما انت قلت انو ما بتعرض حالك على بنت .. بس الي بتعرض حالها عليك ما بتوفرها ؟

جاد : مزبوط

غزل : انا هلأ .. رح اعرض حالي عليكـ .. وما بدي توفرني بنوب ..

#فاعلة_خير_بقلم_مال_الشام

الجزء الحادي عشر

حط جاد ايدو على تمها : اوعي تحكي هيك .. مجنونة

رفعت عيوها واتطلعت فيه .. كان وشو اصفر .. باهت بدون معالم او ملامح .. وعيونو لونهن احمر ودبلانين كتير

غزل : بس انا بدي كون معك

جاد : بتقبلي بواحد متلي ؟ .. انا الي سنتين بشرب كحول .. و احياناً لما يوصل فيني التعب لدرجة كبيرة ممكن اخد مخدرات !!

غزل : ايه بقبل فيك .. انت ما مستعد تتعالج كرمالي ؟

حط ضهرو عالحيط وهو تعبان كتير وعم يحكي بصعوبة : مستعد

غزل : خلص انت هلأ نام وارتاح و منبئى منحكي .. اعطيني رقم حدا من اهلك احكي معو ليضل جنبك ما فيني اتركك بهل حالة

جاد ضحك : ما في حدا

غزل : و ريم ؟

جاد : لا مستحيل .. ما بتحمل تشوفني بهل حالة هي ابداً

غزل : لك ليش ؟ لازم حدا يضل معك !!

جاد : لا مستحيل

غزل : طيب خليني صبلك كاسة الزهورات و ارتاح شوي

قعد جاد بالصالة و جابتلو الزهورات وكان عم يشرب بهدوء .. فاتت على غرفتو ودورت على موبايلو بكل مكان ولقتو تحت الشرشف
اخدتو وفاتت عالحمام و صارت تدور على اسم ريم وما لقتو بنوب

غزل : شو بدو يكون مسميها ؟ ايه ايه هي اسمها

اتصلت عليها فوراً وردت عليها ريم

ريم : اهليييييييين جادو

غزل : مرحبا

ريم : مين معي ؟

غزل : انتي ريم اخت جاد ما ؟

ريم : ايه انا

غزل : طيب .. انا عند جاد بالشقه وهو تعبان كتير .. ممكن تجي تهتمي فيه وما تقليلو انو انا خبرتك ؟

ريم : شبو اخي ؟

غزل : تعب عادي .. لو سمحتي تعي

و سكرت الخط وحزفت المكالمة وطلعت رمت الموبايل بمكانو وطلعت لعند جاد

غزل : حاسس حالك احسن ؟

جاد : ايه الحمدلله

غزل : قانتة قالتلي انو هي السبب بكل شي صار

جاد : ايه

غزل : انا مزعوجه منا كتير

جاد : ليش ؟ مو انتي بيوم من الايام عملتي متلها

غزل : كيف ؟

جاد : ههه لما كنت فاعلة خير وقررتي تبعديني عن دارين

غزل : لا الوضع بختلف

جاد : ما بيختلف .. كل واحد بفكر رأيو وتصرفو هو الصح … اختك بس كانت عم تحميكي ما في داعي تقسي عليها

كل الوقت كان باب الشقه مفتوح .. وقفت ريم عالباب وندهت على جاد

جاد : ريم ؟ شو جابها هلأ ؟

فاتت ريم : جاد اخي

جاد : ايه حبيبتي تعي

فاتت ريم وركضت على حضن جاد وهي عم تبكي

جاد : لك شبك ليش عم تبكي ؟

ريم : ولا شي بس خايفه عليك

جاد : خايفة علي ليش ؟

اتطلعت ريم بغزل و غزل اشرتلها انو ما تحكي

ريم : اه ؟ لا ولاشي بس ما بعرف البي كان نائزني

جاي شدها من خدودها : هههه قولي انو بدك تهربي من المدرسة

ريم مسحت دموعها : هههه ايه

طلعت غزل من عند جاد بعد ما اطمنت انو ريح جنبو ورجعت عالبيت .. حاولت تتجنب قانتة وما تحكي معا
بعد يومين تقدم جاد لخطبة غزل بشكل رسمي وجاب اهلو
وبس طلعو قالت غزل لاهلها انها موافقة

ابو غزل : لازم نسأل عنو بالأول

ام غزل : ما في داعي هو زميل قانتة بالشركة وهي اكيد بتعرف كل شي عنو .. شو قانتة ؟

تطلعت غزل بقانتة وهي متوترة كتير

ابو غزل : شو بنتي احكي ؟ الشب مو منيح ؟

قانتة : هو

ام غزل : ايه ؟

قانتة : هو .. هو كتير منيح امي

ام غزل : خلص .. لكن على بركة الله

ابو غزل : ازا هيك شايفين انا ما عندي مانع .. على بركة الله ..

تمت الخطوبة و علاقة جاد وغزل عم تقوى وتصير احلى واكبر و كانت هي عم تتابع علاج جاد
بعد ما حجزلو ابوه بأكبر مشافي البلد لعلاج الادمان .. و مشيت معو خطوة بخطوة ليتحسن
ترك الشركة الي كان يشتغل فيها وفتح شغلو الخاص مكتب بنص البلد وسماه ( فــــــــــــاعل خير للمقاولات ) كان كل شي ماشي تمام والأمور مستقرة ليوم عرسهن

قربت منها قانتة وباستها وباركتلها

غزل : شكراً اختي

قانتة : لو تعرفي شو فرحانة يا اختي .. لليوم في غصة بقلبي انو ما اخدت الرجال الي بحبو .. الحمدلله حظك احسن من حظي
بس يارب يعرف يحافظ عليكي ويصونك

اتطلعت غزل على جاد من بعيد وهو عم يسلم عالعالم : ان شاء الله يارب ..

حسب ما كانت غزل تتابع علاج جاد هو شفي تماماً من الأدمان .. واخدت توصيات من المشرفين على علاجو وكانت تلتزم فيهن تماماً
وتبعدو عن كل المشروبات الي فيها كحول و تتابع تمارينو الرياضيه كل يوم وتمنعو عن الدخان بكل طاقتها
لوقت ما طلعت حامل ..

جابت بنت ماخده من جاد وغزل كل جمالهن والكل يخاف عليها من نسمة الهوا كتر ما كانت ناعمة و بربيئة
سموها لمى على اسم ام جاد الله يرحمها ..

قانتة تقدملها شب متزوج ومطلق .. و وافقت عليه وسافرو برا البلد وطلع كتير ابن حلال وكانت مبسوطة كتير معو

لمى اخدت كل اهتمام ومحبة جاد لدرجة بلشت غزل تغار من بنتها الصغيرة ..
كان جاد راجع من الدوام ولقي ورقة على باب البيت ..

جاد : من مين هي !!

نزل ومسك الورقة وفتحها

( ما تهمل مرتك وتعطي كل اهتمامك لبنتك احسن ما تتركلك مرتك البيت وتحرد .. المرسل فاعلة خير )

جاد : هههههههههههههههههه لا مستحيل .. لك غزززززززززززززل

فتح باب البيت وهو عم يضحك .. ولقي لمى الصغيره عم تضحك وتلعب بالعابها وبس شافت ابوها عالباب تركت كل شي وقامت تركض لعندو

مسكها جاد وصار يبوسها ويلاعبها ..

تطلعت غزل من طرف باب المطبخ و ملعقة الطبخ الكبيرة بايدها : ولا كأني حكيت شي صح ؟

جاد : لك شو اعملك بنتك بتتاكل اكل دخيل الي خلئها

غزل : ايه مو مشكلة .. اخرتي اطبخك انت وياها

جاد : فاعلة خير مو بايدك

غزل : بعجبك 😉

#تمت