دلال رمت الموبايل و صارت تنفخ و تعيط : اوووف ياه كل شي دلال كل شي دلال الله ياخود دلال الله يريحكن من دلال…. جااااايه جااااايه

قامت نشرت الغسيل و جهزت الغدا و فاتت على غرفتها سكرت الباب و رجعت مسكت الموبايل… لقت مازن باعتلها كتير رسائل.. . فوراً ردت عليه.. و بعتتلو

دلال: حبيبي… مازن حياتي وينك… كنت عم انشر الغسيل…
يا الله رحت؟؟ …

مازن: لا هون ناطرك… يعطيكي الف عافية

دلال: يعافي البك…تعبت كتير الله يريحني من هالحياة

مازن: له ليش وين اختك سمر؟

دلال: بالجامعة ما بتجي للعصر… اوقات بندم انو ما كملت دراسه متلها

مازن: حبيبتي لا تزعلي حالك… بوعدك ما رح خلي شي بنفسك بس نتجوز ازا الله راد رح ريحك و هنيكي و شجعك لتكملي دراسه

دلال: عنجد بتحكي؟ بس بقولو صعب الوحده تفتح بيت و تدرس بنفس الوقت

مازن: لا مو صعب منرتب حياتنا و منتشارك بشغل البيت… انا رح ساعدك، انا دارس و بدي مرتي يكون معا شهادة و متعلمه كمان

دلال: على فكرة انا الله عوضني فيك من هالحياة كلها… يارب بتتخرج و بفرح فيك

مازن: انا اللي بدي افرح فيكي… اشتقتلك يا فارة

دلال: ههههههه انا اكتر والله

مازن: طيب حياتي اسمحيلي سكر لأني بالدوام هلأ منحكي عالسهرة

دلال: لا تتأخر علي ها… سمر بتفوت تنام عالعشرة و بتطفي الضو

مازن: ايه بتحكيني من تحت الحرام، حتى الحكي بيطلع أدفى
#مال_الشام

دلال: ههههههه يلا انتبه لشغلك موفق..

سكرت دلال النت و صارت تفكر بمازن و تتخيلو.. الهن سنتين بحبو بعض..
صدفة جمعتهن على الفيس بوك و تعلقت فيه كتير… صار جزء من يوما… او لا… صار يومها كلو… و تفاصيلها كلها.. و سر سعادتها…
ضلت على هالحالة حاضنة دبدوبها و عم تفكر فيه… فتحت سمر الباب و فاتت

سمر: مرحبا دلولة…

دلال سرحانة عم تلعب بشعرها..
( مال_الشام)
سمر: يا عيني عالحب يا عيييينيييي..
شلحت المانطو علقتو و شلحت الحجاب… صارت تسرح شعرها و تحكي: اما اليوم علقتلك مع مرام علقة!! العمى هالبنت بلا اخلاق ما عم تشيلني من راسها.. دائ خلئي منها..شو بدي اعمل معها.. دلال… لك دلاااااال

دلال ارتعبت : شو شو… شو في

قامت سمر وقعدت جنبها عالتخت : لاااا وضعك مو عاجبني، لك اختي انا بيت اسرارك احكيلي شو قصتك

دلال: ييييي علينا شبك بئى والله مافي شي… ليكي انا نشرت الغسيل انتي روحي لميه و اكوي الي بدو كوي

سمر قامت بدا تطلع من الغرفه : ايه على عيني دلال خانوم… لشوف اخرتها معك..

دلال: لك تعي ما قلتيلي صار شي مع مرام اليوم؟

سمر: بالله؟ شو الي ساعه بحكي
#مال_الشام

دلال: لك نعسانه ما ركزت معك

قعدت سمر و صارت تحكيلها كيف تخانقو و شو صار بيناتهن

دلال: العمى بقلبها… انتي شو دخلك ازا ركان راكض وراكي و بحبك!! .. تروح تضبو عنك

سمر: لك اااخ… الله يريحني منهن الجوز..

هيك لصارت الساعه 10… تاكدت دلال انو اختها نامت و فتحت تحكي مع مازن و بعتتلو فوراً..

دلال: مزووونه… جيت حبيبي

مازن: هلا هلا نورت الحياة… تاخرتي علي

دلال: هلا نامت الدبه…

مازن: اشتئتلك وليه… كنت عم اتفرج على صورة عيونك الي بعتيلي ياها.. سبحان الي خلئك ما اجملك

دلال: خلص يوه بستحي

مازن: دلولة حبيبي

دلال: عيونا لدلولتك

مازن: ما رح تحني علي و تبعتيلي صورتك بئى؟ يعني ما معقوله لهلا ما بعرف ملامحك

دلال: يا الله يا مازن ما خلصنا من هالقصة؟

مازن: طيب… على راحتك… بدي نام بتوصي شي؟

دلال: هلأ هيك؟

مازن: مو هيك و لا شي بس نعست.. سلام

دلال: لك تعا تعا لقلك

مازن: شو بدك؟

دلال: ازا بعتلك ياها بتوعدني تحافظ عليها؟

مازن: لك مجنونة انتي عرضي شو هالحكي

دلال: طيب

مازن: طيب شو؟ رح تبعتي؟

#يتبع#مال_الشام

#حب_إلكتروني_بقلم_مال_الشام
#حب_إلكتروني

الجزء الثاني (2(

دلال: طيب يلا شوي رح ابعت..

مازن: دخييييييل روحك شو بعشئك.. ناطرك على نار..

بعتتلو دلال صورتها و عجبتو كتير لمازن و ضلو سهرانين لوش الصبح…زاد حبهن و علاقتهن ببعض صارت أقوى و أكبر… و قررو يحولو هالحب لواقع ملموس…بعيد ميلاد دلال اتفقت هي وياه انو تنزل عالسوق مع اختها و تشوفو من بعيد..
ضلت يومين تجهز حالها و الدني كلها مو واسعيتها من الفرحة.. و بلشت تقنع اختها انو ينزلو عالسوق يتفتلو و تعزمها على بوظا بمناسبة عيد ميلادها..
#مال_الشام
اقتنعت سمر و اخدو موافقة امهن الي وصتهن يشترو تياب جديدة و كل حاجاتهن لان جايهن خطابة و بدا يبيضو وشها… رتبو حالهن و نزلو عالسوق و دلال خايفه و مبسوطة بذات الوقت… تركت اختها عم تقيس تياب بالمحل و طلعت لتشوف مازن محل ما كانو متفقين يشوفو بعض عالسريع…
ضلت ماشية و عم تدور بعيونها على مازن..لمحتو قدام محل الملابس الي حددوه علامه ليلتقو عندو و بس شافتو صار قلبها يخفق بسررررعه و ارتفعت حرارتها…

دلال: ياربي لك احلى من الصور بكتير ولي على البي…

صارت تمشي باتجاهو و رجليها عم يرجفو…
شافا مازن جايه باتجاهو و ابتسملها…
بس التقو عيونهن ببعض ارتعبت و وقفت بنص الطريق بين العالم الرايحة و الجايه…
قرب لعندا مازن.. و بس صارو التنين مواجه بعض
مازن: كيفك؟
دلال: ههه انا منيحة
مازن: ليه هيك خجلانه؟
دلال: مابعرف كتير خايفه ، وقت احكيك عالنت ما بكون هيك مابعرف ليش..
ضحك مازن و مدلها كيس احمر: كل عام و انتي بخير ام اشرف..
مسكتو وهي عم ترجف و بلحظة مرق ولد صغير سحب شنتتها و ركض فيا..
دلال جمدت بارضها و ارتعبت كتيررر و صرخت صوت عالي… #مال_الشام

ركض مازن وراه ومسكو و علق هو وياه و صار يضربو..
التمت العالم عليهن و حاولو يبعدوه عن الولد وما كان يتركو و دلال عم تبكي و ترجف عالمنظر الي قدامها…
بهاد الوقت سمر كانت عم تدور على اختها و تتصل عليها وما ترد
شافت العالم متجمعين و قربت من بعيد لتشوف شبهن و لمحت دلال عم تبكي… ركضت عليها وهي مرعوبه

سمر: لك دلاااااال شببببك

دلال: سرق… سرق… هداك الولد سرق الشنته

خلصو العالم الولد من ايدين مازن… كان مكسر و وشو دم…
ركضت سمر عالولد وهي مرعوبه و صارت تحكيه: يييي لك شو هاااد ولي على البي عليك اخدوه العالم و اسعفوه

مازن بصوت عالي : حرامي والله لربيك…

اتطلعت عليه سمر بقرف و راحت سحبت الشنته منو و حكيتو بعصبيه: لك شو انت شو هالهمجية هي الله لا يعطيك عافية فوق تعبك يكسر ايديك

و راحت لعند دلال الي كانت عم تبكي…

سمر: لا تبكي لا تبكي مافي شي امشي معي يلا..
كان الكيس الي اهداها ياه مازن وقع بالارض… شالتو سمر و قالتلها يلا امشي يا عمري.. #مال_الشام

غابت دلال وضلت كل النهار ما ترد على مازن لوقت ما صارت الساعه 1 بالليل… فتحت النت و بعتتلو..

مازن: وينك لهلأ؟

دلال: شو هاد الي عملتو؟

مازن: و بعمل اكتر… بدو تربايه هاد الولد

دلال: لك مازن انت شب مثقف و هلا عم تعمل رسالة دكتوراه كيف ضربتو كأنك عم تضرب حيوان!! لو تعرف اختي اديش دعت عليك و قالت انك ابن شوارع

مازن: لا حبيبتي اسمحيلي هي الي بنت شوارع

دلال: شووووو

مازن: ايه ايه… بنت شوارع و مكترة… كيف هيك بتحكيني قدام الخلئ لو مانها بنت كان عرفت رد عليها…ما توقعتا نوريه بهل شكل… على فكرة ازا تجوزنا بدي تقعطي علاقتك فيها بشكل كلي، اهلك كلهن ما بدي ياهن

دلال: انا ما بسمحلك تحكي هيك

مازن: و انا ما بناسبني تكون وحده بهل اخلاق خالة ولادي!!

دلال: ايه الله معك دربك خضرا مازن بيك

مازن: دلال احترمي حالك و احكي بأدب معي انا ماني ولد صغير روح روح تعا تعا

دلال: انا حكيت باحترام انت الي تجاوزت حدودك…

مازن: بسيطة احسبي حسابك ما ترجعي تترجيني لسامحك لان واضح انك متل اختك بس مخبايه بتيابك

دلال: لك مازن انا حبيبتك بكفي شو صرلك وين حكيك عن التربية و الاهتمام بالطفل و الاحترام المتبادل

مازن: ما تغير حكيي و يا ( حبيبتي) ناطر اعتزارك لشوف ازا بسامحك او لأ… سلام

#يتبع#مال_الشام

#حب_إلكتروني_بقلم_مال_الشام
#حب_إلكتروني

الجزء الثالث (3(

ضلت دلال اسبوع دمعتا ما عم تنشف… و اكلها كتير خفيف و عطول معصبه و ما الها خلق تحكي مع حدا، كل الوقت ناطرة مازن يبعتلها شي بس ما التكشها بنوب..
ما بئى تحملت و اشتائتلو كتير..
كتبتلو رسالة و بعتتا ( انا كتير اشتئتلك ما كنت متخيله هون عليك بهاد الشكل، ما عم اقدر طلعك من راسي… معقول هيك كل شي بيناتنا خلص؟ ) ..
ضلت ناطرتو يرد لوقت ما تعبت و نامت و الموبايل بايدها… صحيت بنص الليل على رسالة منو ( انتي الي تخليتي عني ما بعرف شو صارلك)

ردت عليه فوراً و صارو يحكو و يتفاهمو و مازن ما تنازل بنوب وهي كانت كتير مشتاقتلو حاولت تسكر الموضوع و تعتزرلو…
#مال_الشام
مازن: طيب خلص هالمرة رح سكر عالقصه بس اوعي تتكرر… انا بحب البنت الي شو ما قلها زوجها بتعمل… اتركي اهلك بتترك اهلها… اقعدي بالبيت بتقعد بالبيت

دلال: يا الله شو عم تتغير انته… اول ما تعرفنا على بعض حبيتك تفكيرك بالمساواة بين الرجل والمرأة… و هدوئك و ثقافتك بس انت

مازن: رجعنا لنفس السيرة؟

دلال: لا لا خلص انسى

مازن: المهم… ابعتيلي كم صورة اشتقتلك اكتر مما بتتخيلي

دلال: لو اشتقتلي كنت بعتلي و صالحتني..

سكت مازن و ما عاد رد بنوب…

دلال خافت يرجع يزعل: طيب يلا رح ابعتلك…

استمرت علاقة مازن بدلال و كل يوم تتعزب معو اكتر بس قلبها تعلق فيه و على سيرة ( بس نتجوز بيتغير… و بس نتجوز انا بعمل الي بدي ياه) ….
اجت ام سامح و فاتت على غرفة دلال و سمر و قالتلهن بدها ياهن بموضوع…

ام سامح: سامح و مرتو و ولادو راجعين الشهر الجاي يا بنات

سمر: يييي نطف البي على الاولاد

ام سامح: و مرت اخوكن نسرين الله يحن عليها رايدة وحده منكن لاخوها غسان…حكيت معي بالموضوع و فرحت كتير والله… غسان شب أبضاي و سمعتو متل الفلة و بيشتغل بالخليج الله فاتحها عليه

دلال صارت تبوس اختها : يا عيني يلا مبروك سمورة

ام سامح: هههههه لا حبيبتي انتي العروس مو اختك..

توترت دلال و غلي قلبها: بس سمر اكبر مني هي الي لازم تتجوز

ام سامح: ايه بس اختك عم تدرس و انتي قاعده بالبيت

دلال: يا امي انا مابدي هلأ

ام سامح: ليش انا ماخدة رأيك دلال خانوم؟ والله شي حلو الي بعمرك صار عندن ولاد صرتي 21 سنة حاجتك…
#مال_الشام
و طلعت من الغرفة و دلال معصبه كتير

دلال: ليش ما حكيتي شي كلمة شو هاد!!

سمر: قلك شغله؟ انا بصراحة بدي اتجوز… مرعوبة كتير من راكان… عم يلاحقني بالجامعه وين ما رحت و وين ما جيت… و مرام ما عاد تعرضتلي بنووووب بس تشوفني بمكان بتهرب مني.. سألت رفيقتنا و قالتلي انو راكان مهددها يوصل لاهلها و يفضح علاقتهن… كتير مرعوبه منو

مسكت دلال ايدها: يعلي عليكي الله لا يوفقو ابن الحرام… ليكي بس اجا سامح خديه معك عالجامعه يتفاهم معو

سمر: يييي مجنونة انتي هاد راكان ما بخاف الله وسامح كتير مسالم مو وش زعرنة

دلال: لكن بس يجي العريس منقنع امي تكوني انتي العروس

سمر: ايه انا موافقة… بس انتي ليه مابدك تتجوزي؟

دلال: اه؟ لا والله ولا شي بس بكير كتير علي…

قامت دلال و فوراً بعتت لمازن…

دلال: مازن

مازن: بما انك ما قلتيلي حبيبي معناها في مصيبه.. خير؟

دلال: في عالم بدهن يجو يطلبوني و امي موافقة

مازن: ايه طلعولها سمر المجنونة

دلال: مازن خلص

مازن: ههههه طيب… هلا شو مطلوب مني يعني؟ اترك رسالة الدكتوراه و لا اترك شغلي و اجي اطلبك؟
و وين بتحبي سكنك؟ مع امي و لا مع اختي ناخد عندا غرفه؟

دلال: اي ما عاد بدي بيت لحالي… منسكن عند امك لتخلص دراستك و تشتغل بشهادتك منعمر بيتنا

مازن: يعني انتي هلأ عم تضغطي علي و تجبريني اجي اخطبك؟

دلال: اجبررررك؟ لك رح يجوزوني لغيرك
مال_الشام

مازن: اي تصرفي بمعرفتك انا حالياً غير جاهز للزواج

دلال: يعني عادي اطلع عالعريس شوفو ماعندك مشكلة؟

مازن: بيني وبينك بشك انو في عريس هههههه بس اطلعي ايه

دلال: انت عم تتسلى فيني؟

مازن: له الله يسامحك حبيبتي انا وعدتك بالزواج ( بس يفرجها الله) و لهلأ الله ما فرجها شو بعملك..

دلال عصبت و استفزها كتيرررر: لكن يكون بعلمك ازا عجبني العريس رح وافق عليه الا ازا غيرت رأيك و لقيت انو الله فرجها..

مازن: طولان لسانك… شبك قاتلة حالك عالزواج

دلال: ياااااخ مستحيل تكون انت الشب الي حبيتو… ضليتك تكزب علي و تمثل لوقت ما خليتني حبك وشوفك و اتعلق فيك وصرت تنكشف على حقيقتك

مازن: هلأ بطلت اعجبك؟ شكلو العريس محرز…

دلال: ايه محرز… و من اليوم بتنسى دلال و بتحزف رقمي و حسابي عالفيس من عندك و صوري كلهن بتحزفهن لان رح وافق عالعريس

مازن: لك ليش احزف كل شي؟ يعني ازا تجوزتي ما بيصير نضل حبايب؟

دلال: نعممممم؟؟؟؟؟!!!!

مازن: يعني تجوزي على راحتك ازا مستعجلة بس انا مافيني اتركك هيك مبسوط معك و مروق

#يتبع#مال_الشام

#حب_إلكتروني_بقلم_مال_الشام
#حب_إلكتروني

الجزء الرابع (4(

رجفت ايدها لدلال و وقع الموبايل منها… لملمت حالها وقعدت بالزاوية و صارت تتعرق كتير و ترجف… و تأن بصوت مسموع…

كانت سمر فايته عالغرفة و عم تنشف شعرها: دلال وين المرطب؟ … دلال.. د ل ا ل…
و ركضت عليها و صارت تحكي معا…: دلال شبك… حبيبتي شبك… لك عليكي سخونه شو في و لي على آمتي… يامووو
امييييي… اميييي
اجت ام سامح و مددوها لدلال عالتخت و غطوها… عملوها كمادات وهي ترجف و تأن و حرارتها مرتفعه…
شافت سمر موبايل دلال عالارض… مسكتو… و طلعت بوشها محادثة مازن و دلال… كان باعتلها اخر شي ( ما رح خليكي تتهني حطيها ببالك، وبس انا قرر اتركك بتركك… و بس يجي عبالي بطل احكيكي وقتا ببطل احكيكي… مو ايمت مابدك بتجي و ايمت مابدك تروحي…)
طلعت سمر من الغرفة و تركت امها تعتني بدلال…
راحت ع المطبخ و صارت تقرأ المحادثة… كل شي بيناتهن و صورها الي بعتتن لمازن و حكي مازن عليها لآخر حرف كان باعتو… حطت ايدها على راسها و صارت تحاكي حالها: شو هالمصيبه.. شو هالمصيبه… شو عملتي فينا يا دلال… شو عملتي بحاااالك… #مال_الشام
هدت حالها و سكرت الحساب و شالت خط اختها و خبتو… و حزفت المحادثات و الرسائل كلهن و رجعت عالغرفة و حطت الموبايل جنب تخت دلال..

سمر:ماما نزلت حرارتها؟

ام سامح: ايه الحمدلله.. رعبتني كتير شو صايرلها!!

سمر: امبارح تركت الشباك مفتوح و نامت بدون غطا، انا ضليت غطيها و هي تتكشف بجوز اخدت برد..

ام سامح: انا رح روح ارتاح لان تعبت و انتي ضلي جنبها و انتبهي على حرارتها ازا رجعت ارتفعت مشان ناخدها عالمستشفى..

سمر: ايه ما تعتلي هم رح ضل جنبها لوش الصبح…

راحت ام سامح و تركتهن… و قعدت سمر تفكر انو كيف اختها عملت هيك! و صارت تحس بالذنب لانها ما كانت تفتش بموبايلها و تراقبها، بس من ايمت هن بفتشو ورا بعض! بعمرهن ما كانو هيك…
ضلت جنبها لطلوع الضو… و وش الصبح صحيت دلال..

دلال: عطشانه..
#مال_الشام
كانت سمر غفيانه بس حست عليها: حكيتي شي؟

دلال تجلست و فركت عيونا: بدي مي… اديش الساعه؟

سمر صبتلها كاسة مي: مممم الساعه سته الصبح… صرتي احسن؟

دلال اخدت الكاسة شربت و حطتها على جنب بعدين سكتت شوي و فجأة صارت تدور حواليها وهي مرعوبة : وين موبايلي؟ …

سمر تطلعت عليها تطليعة قهر و زعل : ليكو جنبك…

مسكت دلال الموبايل و صارت تنبش فيه: وين خطي؟ شو هاد مين ماسك موبايلي.. سمر انتي.. انتي… انتي شو عملتي

سمر: الله يسامحك يا دلال… كيف بتعلقي حالك بهيك واحد حقيررر لك وين كان عقلك… لك انا كم مره قلتلك انا سترك و بيرك و بيت اسرارك… كم مره ترجيتك تحكيلي ازا في شي بحياتك!! شووو عملتي بحاااالك شو عملتي بحالك..

صارت دلال تبكي و تضرب حالها: بكفي بكفي خلص اسسسكتتتيييييي… اسكتيييي

خافت عليها اختها و قربت و ضمتها: خلص اهدي اهدي لا تبكي يا روحي… لا تخافي ياعمري… انا جنبك انا معك
مال_الشام

دلال: حبيتو كتيييييرررر… كان قطعه من روحي… كنت بحلم نتزوج و نعيش سووواااا…. هو ضل وراي حتى خلاني حبووو
سمعني حكي ما بتحلم فيه بنت بالكون.. وعدني نعيش بجنة… كان كأنو ملاك ما انخلق متلوووو… لك حبيتووووو حبيتووو من جوات قلببببي ليش هيك عمل فيني ليش لييييششششش مشان الله…

ضلت سمررر تسمعها و تهديها… و تحاول تطمنها… و قالتلها انو رح تجبلها رقم جديد و تعمل حساب فيس بوك تاني.. و انو رح توافق عالعريس الي جايها و تتزوج

دلال: لا لا مابدي اتزوج الله يوفقك كرهت كل الشباب، كلهن كزابين كلهن بلعبو بمشاعر البنات ما بخافو الله مابدي عيش مع رجال مابدي

سمر: دلال.. حبيبتي، نحنا ما النا الا سمعتنا… و الوحدة عالعشرة بتحب زوجا و بيفوت لقلبها… لازم تتزوجي ليشيلك من راسو نهائي… #مال_الشام

دلال: بس انا ماااااابددددي

سمر: لكن شو بددددك… بدك يضل وراكي ليفضحك… بكفيييي لهوووون بكفي…

سكتت دلال و ما ضل عندا شي تحكيه… حطت راسها بحضن سمر و صارت تحكيلها كيف تعرفو على بعض و اديش حلفلها انو بحبها و وعدها يحافظ عليها… و سمر عم يتقطع قلبها على اختها الي وقعت ضحية شب ما عندو شرف ولا اخلاق.. و كانت خايفه من اخر كم سطر بعتهن مازن و ما قالت لدلال عنهن…

مرقو تلات ايام و التنتين مكركبين كتير… و قربت زيارة غسان و اهلو ليطلبو دلال بشكل رسمي…

كانت دلال طالعه عالبرندة تنشر الغسيل… وهي عم تنشر وقعت بلوزة امها… نزلت من البناية لتجيبها… مسكتها من الارض… و رفعت راسها ضربت الشمس بعينها.. كان في شخص واقف قدامها.. حطت ايديها على عيونها لتبعد الشمس و تشوف مين قدامها…
وهون كانت الصدمة… مااااازززن!!!

وقعت الكنزة من ايد دلال… و فاتت عالبناية تركض بدون ما تحكي ولا حرف معو…

فاتت عالبيت و صارت تقفل الباب منيح… ركضت على غرفتها و سكرت الباب…

سمر: شبك شبك شو في؟؟

دلال: مازن…. مازن

سمر: شبو بطيخ؟

دلال: مازن تحت… مازن تحت البناية

#يتبع#مال_الشام

#حب_إلكتروني_بقلم_مال_الشام
#حب_إلكتروني

الجزء الخامس (5(

سمر: شوووووووو

دلال: شفتو شفتو بعيووووونييييي

سمر: حبيبتي دلال انتي عم تتوهمي لانك خايفه منووو

دلال: لك لاااا انا شفتوووو

سمر: لك شو يعني شفتيه كيف بدو يعرف بيتنا مجنونه انتي

دلال: انا… انا

سمر: اتتي شو؟

دلال: انا كنت معطيتو عنوان البيت…لك كان على اساس يجي يخطبننننني لهيك قلتلو وين البيت..

قعدت سمر عالتخت و ما نطقت ولا حرف..
#مال_الشام
دلال: سمر شوووو اعمل شو اعمل

ضربتها سمر كف على وشها: وين كان عقلك؟ … تحملي نتيجة تصرفاتك… انا تعبت…
و حملت حالها و طلعت من الغرفة… ضلو اسبوعين ما يحكو مع بعض و دلال تنام بالليل و تشوف كوابيس عن مازن..

رجع سامح من السفر و شافو بعضن و انبسطو و نسيو البنات خوفهن شوي…
بس ركنو بيت سامح و ارتاحو فاتحتهن سمر بموضوع اخوها و انو مستعجل كتير عالخطبة… و اخدو موعد مشان يجي غسان يشوف دلال… و دلال و سمر بس يتطلعو ببعضهن و عيونهن تحكي الي مخبى…

جهزو حالهن لاستقبال غسان… و دلال على اعصابها و خايفه كتير لانها هالجوازة بدها تتم يعني بدها تتم…
اجو الجماعه و جهزت دلال القهوة و فاتت لتشوف زوجها الي ما اختارتو بارادتها…كل الوقت ما اتطلعت فيه بعد العقدة و الالم الي تسببلها فيه مازن..
كانت تبتسم ببرود و ترد باختصار… و غسان سالها شوية اسئلة عن صلاتها و احلامها و طموحاتها… كان مرح شوي بس كل الوقت يجيه اتصالات من الشغل و يرد عليهن! ..

خلصت الزيارة و قامت دلال جلت الجلي و فاتت على غرفتها… فاتت وراها سمر و اخيراً حكيت معا..

سمر: شو رأيك بالشب؟

تمددت دلال على تختها و لفت وشها عالحيط و غطت راسها بالغطا… : الي بتشوفوه اختي ما بتفرق معي..

قربت منا سمر و شالت الغظا عنها: كيف حسيتيه؟ مثقف؟ عاقل؟ واعي؟

قامت دلال و صارت تضحك متل المجنونة: ههههههههههههههههههههههه ههههههههههههههههههههه.. فظيعه انتي… لك ازا مازن كنت شوفو شب خلوق و محترم
ههههههههه ضحكتيني و ما الي نفس اضحك… لك هدول الشباب كلهن كزابين… اول شي برمولك السنارة… على حب و حكي كبير و صعب تفهميه عن الديموقراطية و تحرر المرأة و ضرورة مساعدة المسلمين في بورما و افريقيا و المحافظة على التراث و ضرورة التمسك بال

سمر: خلص خلص سكتي وجعني راسي

دلال رجعت غطت راسها و لفت وشها عالحيط: سمورة… قولك مازن شالني من راسو؟
#مال_الشام

سمر: اه؟ مازن!

دلال: ايه… غريبه كيف طلع فجأة و اختفى فجأة

سمر: ايه بكون نسي ما تحطي ببالك…

دلال: ايه ان شاء الله… الله لا يسامحو… حرقلي قلبي

سمر بصوت واطي: مممم ما تخافي… رح جبلك حئك

رفعت دلال الغطا و عقدت حواجبها: شو يعني؟

سمر تلبكت و حطت راسها بالموبايل: ممممم لا و لا شي

#مال_الشام
دلال: سمر تطلعي فيني… اصلا سكوتك كل هالفترة مو عاجبني… شو في

#يتبع#مال_الشام

#حب_إلكتروني_بقلم_مال_الشام
#حب_إلكتروني

الجزء السادس

سمر : هلأ دلال .. مفكرة واحد متل مازن وصل لعند باب بيتنا
بدو يتركك بحالك هيك لله ؟ .. يعني مثلاً بدون يكون قعد مع حالو وقال عيب عليك الي بتعملو وتاب لله ؟

دلال : شو قصدك ؟
#مال_الشام

سمر : قصدي انو انتي رح تتزوجي و تنبسطي وما تخافي من شي .. واتركي الباقي علي
انا رح جبلك حئك وحيات عيونك .. تصبحي على خير

دلال : لك سمر .. سمررر قووووووووووومي .. سمررررر
يا الله نمتي ؟ شو قصدك هلأ انا ما فهمت شي .. افففف يااه الله يريحني منك يا مازن الزفت

نامو البنات وتاني نهار ردت خبر ام سامح لنسرين انهن موافقين على غسان وايمت ما بدو كتب الكتاب هن جاهزين
حددو موعد زيارة مشان يحكو بالنقد وباقي التفاصيل .. ودلال قلبها مو مرتاح والمسافة بينها وبين سمر عم تكبر
بعد شـــــــــهــــــــــــرين .. كانت دلال فيهن عم تتعرف على غسان و تكتشف تفاصيل الرجال الي رح يصير زوجها
حكي معا غسان وطلب منا يقربو موعد العرس لانو ما بدو يضل بعيد عنها اكتر من هيك .. تكركبت دلال كتير
و هالخبر ما فرحها متل اي صبيه ناطرة هاد اليوم بشوق وبلهفة .. خبرت امها وبلشت امها تزغلط و تبوس فيها ..

ام سامح : من وين بدنا نبلش ؟ لازم نستعجل بالجهاز ..لازم كل شي يكون كامل مكمل
لك الله يفرحني فيكن يا وردات حياتي انتي واختك يااااااااا حئ

كانت سمر قاعده و وشها ما بيتفسر .. ما اعطت ولا ردة فعل عالخبر الي جابتو دلال انو عرسها رح يكون بعد شهر ..
بعدين تركتهن وقامت على غرفتها ..

ام سامح : بنتي وين رايحه تعي فكري معنا كيف بدنا نلحق الجهاز

سمر : راسي عم يوجعني بدي نام شوي ..

فاتت سمر عالغرفة و ام سامح همست لبنتها : بنتي .. ليكون مكسور خاطرها لان خطبتك قبلها ؟
#مال_الشام

دلال : لا لا امي بالعكس هي الي اقنعتي والله .. انتي بتعرفي انو كنت رافضة الفكرة كلها بس هي ما تركتني لاقنعتني و وافقت

ام سامح : الله يريح بالك ريحتي بالي .. لكن قومي وراها وشوفي شبها برضاي عليكي

دلال : ايه يلا رايحه ..

فاتت دلال عالغرفة واول ما فتحت الباب كانت سمر عم تحكي عالموبايل .. ارتعبت سمر و انخطف لونها ..

سمر : انا بدي سكر منحكي بعدين .. سلام

قربت منها دلال : مع مين كنتي تحكي ؟

سمر : مع رفيقتي .. شو اتفقتو شو رح تعملو ؟

دلال : ومين رفيقتك هي ؟

سمر : هي .. هي سامية

دلال : كيف سامية مو انتي وياها متقاطعين من فترة طويلة ؟

سمر : اه ؟ لا هي سامية تانيه غير سامية هديك .. خلص شو تحقيق يعني ؟

رمت سمر الموبايل تبعها وطلعت من الغرفة .. بس راحت مسكت دلال موبايلها وحاولت تفتحو .. لقت اختها حاطة كلمة سر
للجوال مع انو بعمرها ما عملت هيك شي..

دلال : شو عم يصير معك يا سمر ؟

بلشت التجهيزات لعرس دلال … وكلو كان من افخم وأرقى الأنواع لان غسان وضعو المادي ممتاز جداً و عجبتو دلال كتير
ما قصر معها بأي شي
كانت جوازتها كأن امها داعيتلها بليلة القدر .. بلش يطلع مازن من راسها لان صار مارق وقت طويل وهو اختفى
بس اختها ما كانت على بعضها بنوب ..
#مال_الشام
اجا يوم الفرحة الكبيرة .. طلعت دلال متل الحورية .. جمالها ما بينحكى ولا بينوصف
قدرت تسرق قلب زوجها غسان من اول يوم .. سبحان مين الي بيزرع المحبة بين الزوج والزوجة ..
بس سمر بهداك اليوم ما عجبت حدا .. كانت نحفانه و وشها مصفر .. متغيرة عالكل ..

تمت الجوازة و زفو العرسان .. وانتقلت دلال على عش الزوجية السعيد ..
فاتت هي و جوزها و قلها انو رح يصلي ركعتين ..
وهي فاتت لتبدل فستان العرس و تفك شعرها ..

قبل ما تتحرك رن موبايلها .. ما اهتمت للموضوع لانو هي ليلتها ما فيها ترد على اتصالات حدا .
خلص غسان صلاة وشاف دلال واقفة مطرحها

غسان : حبيبتي ليش ما فكيتي شعرك ؟

دلال : اه ؟ انا كنت رايحه

ورجع رن الموبايل

غسان : ههههه ازا حابة تردي و خايفه ازعل ما تخافي .. كم مره بدي قلك اي شي بريحك رح يسعدني ؟

دلال : الله يخليلي ياك لا ما بدي رد بس انو مين عم يدئ بهل وقت ؟

غسان : رد انا ؟

دلال : لا خلص خليني اطفيه ..

مدت دلال ايدها لتاخد الموبايل وتطفيه .. بس غسان سبقها و اخدو

غسان : حبيبتي ما بدي هلأ تطفيه وتضلي تفكري مين كان عم يتصل .. بدي تركزي معي هههه

دلال : خلص هي ما بقى رن …

غسان : ايه منيح .. بتعرفي انك طالعه بتفلجي؟

وقبل ما تحكي شي دلال رجع الموبايل يرن

غسان : ايه لا بئى رح رد

دلال : حبيبي اعطيني انا برد ..

تجاهل غسان كلامها .. وفتح الخط ورد : ألو مين معي ؟

#يتبع
#مال_الشام

#حب_إلكتروني_بقلم_مال_الشام
#حب_إلكتروني

الجزء السابع

غسان : هههههههه هاد انتي ؟ لا ما رح اعطيكي مرتي شو من اولها اشتقتيلها ؟
خلص يلا تكرمي خدي احكيها مشان يرتاح بالها واعرف احكي معا كلمتين بقى ..

اعطى الموبايل لدلال وقلها هي اختك سمر ..
استغربت دلال كتير .. و غسان تركها لحالها مشان تحكي مع سمر على راحتهن

دلال : الو اختي خير في شي ؟

سمر : مبروك يا عمري .. انتي مبسوطة ؟

دلال: ايه مبسوطة ليش شو في ؟

سمر : ما بعرف تزكرت كيف جبرتك على هي الجوازة وخفت كون ظلمتك

دلال : لا انتي ما جبرتيني بالعكس .. غسان رجال بكل معنى الكلمة
#مال_الشام

سمر : بتحبيه ؟

دلال : بكزب ازا بقلك ايه .. حاسة قلبي مات بعد الي صار فيني

سمر : خلص مو وقت هالحكي .. انبسطي انتي وجوزك وديري بالك عليه اتفقنا ؟

دلال : سمر انا قلبي مو مرتاح انتي مخبيه علي شي؟

سمر : اه ؟ لا ولا شي حبيبتي .. ربي يباركلك و يحنن قلبكن على بعض .. طولت على صهري يلا سلام ..

دلال : لك سمر .. الو .. سمر

قعدت دلال عالتخت وهي عم تفكر شو عم يصير مع اختها ..
بعد شوي دق غسان الباب ..

غسان : شو بدك تتأخري علي اكتر من هيك ؟

ابتسمت دلال : لا حبيبي

فات غسان لعندا واخد الموبايل من ايدها و طفاه و حطو بجيبتو .. : انا سكرت موبايلي وموبايلكرح يضل مسكر لنخلص ايام العسل

دلال : لا بس انا بدي احكي مع امي واختي

غسان : لك دلال نحنا عرسان !!

دلال : ماشي متل ما بدك

غسان : طيب يلا تعي ناكول لقمتين

دلال : لا ماني مشتهية شي

غسان: اسم على مسمى دلال خانوم هههههه تعي قومي وبس تاكلي انا بساعدك لتفكي شعراتك ..

قامت دلال وقعدت مع زوجها و حاولت ما تشغل بالها لتقدر تكون طبيعية معو ..

ضلت دلال اسبوع عسل هي وغسان محدا بيعرف وينهن بناء على رغبة غسان الي كان حابب ينبسط هو وياها ..

بلشت دلال تنق عليه مشان يرجعو ويستقرو ببيتهن وانها مشتاقة لامها واختها و بدها ترجع
ضلت تقنعو وبس حس انها مو مرتاحه بنوب احترم رغبتها وضبو اغراضهن و رجعو

اول ما وصلت عالبيت الجديد الي رح تبلش حياتها فيه صارت تتفتل بالغرف .. بيت .. لا مو بيت .. هاد قصر
فخم وكبير كتير .. حست بسعادة و فرح .. وبلحظة تزكرت انها مشتاقة لاهلها ..

راحت لعند غسان وكان عم يلبس بيجامتو ..

دلال : حبيبي

غسان : يا حياتي

دلال : موبايلي ضل معك بدي ياه

غسان : اووه نسيانو .. لحظة

طلعو من الشنته واعطاه لدلال .. شكرتو وانبسطت كتير وركضت عالغرفة التانيه لتحكي معهن لحالها

اتصلت على سمر ما ردت عليها .. قامت اتصلت على هاتف البيت وردت امها .. اتطمن عليها وطمنتها انو مبسوطة مع جوزها
وخبرتها انو رجعو و بدها تشوفهن وضلو ساعة يحكو .. وبعدين دلال سألتها عن سمر
خبرتها انها بالجامعة هلا .. بس ترجع بتخليها تحكي معا ..
سكرت الخط و قامت دلال عالمطبخ تحضر غدا .. وعيونها على الموبايل وناطرة اتصال سمر على نار ..

خلص النهار وما اتصلت عليها .. و جوزها انزعج منا وهي ماسكة الموبايل كل الوقت ..

غسان : هلأ انتي هالئد متعلقة بأمك وبأختك ؟

دلال : ممممم ايه كتير .. هن كل حياتي

غسان : واخوكي سامح ؟

دلال : سامح ما في منو طيب كتير والبو ابيض .. والحمدلله مرتو نسرين بنت حلال كتير
بتعرف دايما بتتزكرني انا و سمر بهدايا حلوين وما بتخلي سامح يزعلنا بشي

غسان : هههه اي نسرين حنونة من وقت كنا صغار كانت كتير حنونة عالكل الله يرضى عليها

دلال : وانت كمان حنون
#مال_الشام
غسان : لك يخليلي البك

دلال : بس قلك شغله ؟

غسان : قولي

دلال : اول ما خطبت امي نسرين اختك كنت انا وسمر كتير كتير نغار منها
وكنا شايفينها جايه تسرق اخونا الوحيد قام قعدت انا وياها وصرنا نحلف الا نجننها

غسان : هههه عنجد ؟

دلال : ايه والله يا عمري .. قمنا نهار عرسها
كنا يعني شوي صغار .. نزعنالها العرس كلو ومو بس هيك

غسان صار يضحك من البو و دلال عم توصفلو كل شي عملوه

غسان : وشو كمان ؟

دلال : فوتتني سمر على غرفتهن لان انت بتعرف اول ما تجوزو كانو ماخدين غرفة عنا بالبيت قبل ما يشترو بيتهن
خلتني سمر فوت و تخبيت بالخزانة

و كل العرس وامي تدور علي وما لاقتني بعدين اشتلقت انو سمر عم تضحك من تحت لتحت..
والله مسكتها امي من ادنيها وشدتلها ياهن لاعترفت علي اني بغرفة العرسان متخبية بالخزانة
امي بس سمعت هيك طار عقلها .. بس كانو العرسان فايتين

غسان : هههههههههههههههههههههههههه العمى لك مو مبين عليكن هالجنان .. وشو صار ؟

دلال : الي صار انو اخي و مرتو كانو يتخانقو لان ما عرف يرقص معها سلو .. هي تقلو خجلتني قدام رفقاتي
وهو يقلها ما بكفي سايرتك و رديت عليكي
هي تحكي وهو يحكي وما اسمعلك الا حدا دق الباب عليهن .. ضل ساعه الباب يدق بعدين فتح سامح وكانت امي عالباب
قلها خير في شي؟
قالتلو بدي فوت شوي
قلها سامح شو في؟
قالتلو بعدلي هيك يامو
فاتت امي وفتحت الخزانة ولقتني قاعده متل الفارة بين التياب ..

غسان : ههههههههههه وشو عملت ؟

دلال : اجت اختك واخي اتطلعو بالخزانة وقالولها شو هاد ؟
قالتلهن امي هي الشيطانة هي واختها عم يلعبو قال .. والله لربيكون .. وسحبتني من شعري وانا طلع شرار متل بيكاتشو وسب على سمر
لانها فسدت عني
ونسرين ميته من الضحك

وبعدا طعمتني قتلة انا و سمر ويعلي عليها سمر تحاول تاكول القتلة عني ..
كانت كتير حنونة علي كأنها امي مع انو ما في فرق كبير بالعمر بيناتنا .. بتعرف
هي اكبر نعمة بحياتي .. اشتقتلها كتيرر

وصارت دلال تبكي . قرب منها غسان

غسان : حبيبتي ليش عم تبكي ؟

دلال : ما بعرف البي مو مرتاح بنوب .. الي كتير ما سمعت صوتا

غسان : طيب من عيوين بكرا رح اخدك لعندهن بس لا تبكي

دلال : جد رح تاخدني ؟

غسان : ايه والله جد
#مال_الشام
مسحت دمعتها و انبسطت كتير .. وسهرو سوا .. عالساعه 11 بالليل قامو لينامو .. طفو الضو وبلشو يغفو
و رن موبايل دلال

غسان : وبعدين يعني ؟

قامت دلال مرعوبة : اسفه حبيبي اسفه كان لازم حطو صامت

غسان : ميييييييين ؟؟

دلال : لحظة لشوف .. هي امي .. رد ؟

غسان : ردي خلصينا لنعرف ننام

ردت دلال و قلبها عم يدق لان يمكن سمر عالخط

دلال : الو

ام سامح : كيفك بنتي ؟

دلال : منيحه ماما .. شبو صوتك ؟
#مال_الشام
ام سامح : جوزك جنبك ؟

دلال : ايه شو في ؟

ام سامح : طيب اسمعي بدي اسالك .. حكيتي شي مع سمر اليوم ؟

دلال : لا قلتيلي رح تخليها تحكي معي وما اتصلت علي

ام سامح : ولا مرقت لعندك ؟

دلال : لك لا ولا مرقت شو في !!!!!!!وينا سمر

ام سامح : لك اسكتي لا يسمعك جوزك اسكتييييييييييييييييي

دلال : لك شو يعني اسكت شو يعني اختي وينها وينهااااااااااااا

قام غسان وشغل الضو : شبك دلال شو في ؟

ام سامح : يااارببي دخييييييييييلك يارب تلطف فينا .. اختك من الصبح مو مبينه مشان الله يا دلال تلحقيني مشان الله
اختك طلعت من بكير و لهلأ محدا بيعرف ويناااا

#يتبع#مال_الشام

غسان : طيب خبرتي سامح ؟ .. ايه سأل بالمشافي راح على جامعتها سألتو رفقاتها شي ؟
يا مرت عمي اهدي اهدي سمر مو بنت صغيرة خلص طولي بالك ..
هلأ جايين نحنا .. ان شاء الله ما بطلع الضو الا سمر بحضنك .. دقايق ومنكون عندك ..

سكر الخط و قام عالخزانة وطلع تيابو .. : دلالي قومي البسي يلا

دلال : وين بدها تكون راحت ؟
#مال_الشام
غسان : حاج بكي يلا البسي بسرعه ..

قامت دلال ولبست عالسريع .. ركبو بالسيارة ومشيو اول ما وصلو ركضت دلال
ورمت حالها بحضن امها وصارو التنتين يبكو مع بعضهن ..
وغسان حكي سامح وقلو يرجع ليروحو يدورو سوا لأن الو معارفو بلاقوها اسرع ..
حاول غسان يطمن دلال و وعدها يلاقوها وطلب منها انها تتصل برفقات سمر تسألهن ازا شافوها بالجامعة اليوم وكيف كانت
لان كل هالشغلات رح تساعدهن .. و طلع هو يدور عليها ..

دلال وهي عم تبكي : ليش هلأ لخبرتيني ليش

ام سامح : لك بنتي انتي عروس ما كان بدي خبرك بس كان عندي أمل تكون عندك

دلال مسحت دموعا : وين بدا تكون راحت اه ؟ وين بدها تكوووون

ام سامح : يارب ما يكون الي ببالي .. يارب لا تفضحني بكبرتي .. يا رب تستر على بناتي

استغربت دلال من حكي امها كتير !! شو يعني شو عم تحكي
ضلت تسأل امها و أصرت عليها تفهمها شو في
وصارت تقلها ازا بصير شي لسمر كيف رح تسامحي حالك
لازم تفهميني شو القصه

ام سامح : اختك .. اختك
وقت رجعنا من عرسك .. فتنا عالبيت .. اجت قعدت معي وقالتلي بدها تفاتحني بموضوع مهم
قلتلها انو تعبانه بس ما رضيت تأجلو

دلال خافت كتير : شو الموضوع ؟

ام سامح : اختك متعرفة على شب شوارعي .. و قال بدها تتجوزو
جن جناني عليها و ضربتا لأن صدمتي كانت كتير كبيرة .. كيف بنتي بطلع منا هيك كنت كتير مصدومة
جايبتلي شب ازعر و بتقلي بدي اتجوزو .. ما تحملني عئلي عليت اصواتنا و ضربتا من كل البي
اخر شي بس تعبت وتركتها .. ضحكت وبتعرفي شو قالتلي ؟

كانت دلال كلها عم ترجف .. وصارت تصب عرق : شو قالت ؟

ام سامح : قالتلي ازا ما بتجوزيني ياه برضاكي رح اتجوزو غضب عنكن

دلال : شو يعني ؟

بلشت ام سامح تضرب على وشها و تبكي اكتر : لك ما توقعت تكسرلي ضهرررررررررررررري
فكرتها كلمة وقالتلها .. اختك فضحتنا يا دلال فضحتنااااااااااا

دلال : لأ .. لأ هاد الحكي كلو كزب .. سمر ما بتعمل هيك شي
سمر ما بتهرب من بيت ابوها وبتحط راسنا بالأرض … سمر مو هيك مستحيل ..

ضلت تحاكي حالها ومو مسدئة الي سمعتو .. بس مين هاد الشب ؟ هي متأكدة انو اختها ما كان الها علاقات ابداً
بس لأ .. سمر اخر فترة كأنت كأنها مو سمر .. الكل كان ملاحظ انها متغيررررة

دلال : مازن ..

ام سامح : شو قلتي ؟
#مال_الشام
دلال شهقت شهقة قوية كأن رعد ضربها و قسم قلبها قسمين .. وصارت تتزكر حكي سمر
(انا رح اخدلك حئك)
(مفكرة واحد متل مازن تركك لله)

دلال مسكت تياب امها وصارت تصرخ وتبكي : ماااااااازن
ماااااااااااااااااازن … والله لادبحو بأيدي هدووووووووووووووول
والله لاكلو بسنااااااااااني
ماززززن … ماااااااااااااااازن

ام سامح خافت على بنتها وصارت تضمها لصدرها : خلللص خللللللللللللللص بس اسكتي اسكتي

دلال : اختي ما هربت ..

ام سامح : يارب .. يارررب يا عمري يارب #مال_الشام

دلال : يامو انا يمكن بعرف وين اختي بس بدي تساعديني

ام سامح : احلفي ؟ لك ليش ساكته لهلأ .. احكي احكييييييييييي وينااااااااااااا ..خلينا نرجعها ونستر فضيحتنا قبل ما يعرف جوزك

#يتبع#مال_الشام

#حب_إلكتروني_بقلم_مال_الشام
#حب_إلكتروني
الجزء التاسع

دلال : رح قلك بس بالاول احكيلي

ام سامح : لك شووووو احكي

دلال : سمر قالتلك شو اسم الشب؟

ام سامح : ايه .. قالت قالت بس ما عم اتزكر

دلال : مازن ؟

فكرت شوي ام سامح : مازن ؟ لا ما كان اسمو مازن

دلال : كييييييييييييف؟
#مال_الشام
ام سامح : مين مازن ؟ لك انتو شو مخبين عني

دلال : امي امي مو وقت هالحكي ركزي معي انتي متاكده انو اسمو مو مازن ؟

ام سامح : ايه متاكدة ما زكرت قدامي هيك اسم ابداً .. قالت انو زميلها بالجامعه و

قاطعتها دلال : و شو؟؟؟؟؟؟؟؟؟؟؟؟؟ زميلها بالجااااااااااااامعه ؟ لحظة لحظة .. راكاااااااااان ؟؟؟

ام سامح صرخت : ايه ايه ايه هاااد هاااد قالتلي راكان .. راكان
#مال_الشام
دلال حست الدنيا كلها عم تدور فيها ..

ام سامح : احكي شي بتعرفي وينها ؟

دلال : اه ؟ .. ايه .. ايه لحظة رح اتصرف ..

اتصلت برفيقة اختها وطلبت منها رقم راكان .. وقالتلها انو ما معا ياه
فطلبت رقم مرام الي كانت حبيبة راكان .. اخدتو و اتصلت عليها
بس سالتها دلال عن رقم راكان سكرت الخط بوشها
وضلت تتصل عليها وما ترد
بعتتلها دلال رسالة انو ازا ما بتردي رح اجي لعندك عالبيت واطلب منك رقم راكان قدام ابوكي
اتصلت عليها مرام وصارت تسألها شو بدا بالرقم وليش عم تعمل هيك
وبعد ما شرحتلها دلال شو القصة اعطتا الرقم بسرعه ..
#مال_الشام
اتصلت عليه مره وتنتين وتلاته

ام سامح : شووو ما عم يرد ؟

دلال : لأ ما عم يرد

ام سامح : الله لا يوفقك يا سمر الله ينتقم منك فضحتينا

دلال : رد رد .. الووو الوو راكان

راكان كان صوتو نايم وومطفي :الو .. مين ؟

دلال : اعطيني سمر احكي معا ضروري انا اختها دلال

راكان : مين سمر..مين دلال

حست دلال انو نايم و دب الخوف بقلبها !! ازا راكان نايم معناها سمر مو عندو
#مال_الشام
دلال : راكان انت نايم ؟ صحصح معي .. سمر وين ؟

راكان بلش يستوعب شوي .. : سمر ؟ ما بعرف وين ليش شو في ؟

سحبت ام سامح الموبايل من ايد دلال و صارت تحكي معو : مشااااااااااان الله رجعلي بنتي .. رجعلي بنت لا تفضحني مشان الله
اعتبرني متل امك استر كبرتي الله يوفقك لا تفضحني انت وياها .. رجعلي ياها يا ابني رجعلي يااااها

دلال عم تحاول تاخد الموبايل منها : امي امي هاااااااااااتي الموبااااااااايل هاااااااااااااتييييي .. الو راكان احكي معي ..

راكان : شووو عم يصير لك شبكن ؟

دلال : نحنا ما عم نلاقي سمر مشان الله ازا هي عندك تقول وتريح بالنا .. نحنا رح نبلغ الشرطة وازا لقيناها عندك رح تعتبر قضية خطف
رح تنسجن فهمان ؟ خلونا نحل الموضوع بدون فضايح .. رجعها عالبيت و منجوزكن خلص متل ما بدكن

راكان : دلال اهدي شوي وافهمي علي .. اقسم بالله سمر مو عندي .. كانت مداومة اليوم وشفتها وهي طالعه من الجامعة
هي اخر مرة شفتها فيها ..
#مال_الشام
دلال وقعت عالأرض : شو يعني وين دلال ؟

راكان : مازن الكلب .. برحمة امي ازا عامللها شي لاشرب من دمو

دلال : شو ؟ .. انت شو عم تحكي

سكر راكان الخط وما رد عليها

دلال : راكااااااان .. راكااااااااان ..
صارت تحاكي حالها .. شو عرفو بمازن ..
#مال_الشام
قعدت ربع ساعه وامها تسألها شو قلها راكان وهي ما عم تقدر تحرك تمها من الخوف .. بعدين رن موبايل دلال ..
كان المتصل غسان .. كانت ايدين دلال باردة و مصدومة حاسة حالها بدوامة .. ضل يتصل غسان وهي عقلها مو معها

سحبت امها الموبايل وردت : الو .. لقيتوها ؟؟؟؟؟؟؟؟
دلاااااااال لقو سمررر .. لقوها لقوها

كانت هالكلمات متل حبل النجاة الي سحب دلال من العتمة الي وقعت فيها ..
ابتسمت بدون شعور واخدت الهاتف من امها وقلبها رجع ينبض بالفرح

دلال : غسان وينكون ؟ رجع اختي بسرعه

غسان : دلال .. لا تخبري امك مشان ما تخاف .. بس سمر بالمستشفى .. وحالتها خطيرة

وهيك انقطع الحبل .. و ألف سكين وسكين قطعت بسمتها البريئة الي ابتسمتها ..

#حب_إلكتروني_بقلم_مال_الشام
#حب_إلكتروني

الجزء العاشر

غسان : بعتلك سامح يجيبك .. و إزا سألت امك عن شي قليلها انك جايه تجيبها لانها خايفه ترجع

دلال خافت على امها من الخبر وتماسكت حالها : يوه لشو خايفه ؟ شو ذنبها هي ازا تأخر الباص عليها واضطرت تروح مع رفيقتها مشان ما تضل بالشوارع
خلص انا جايه جيبها قلها ما تخاف

وسكرت الخط و قامت لتطلع

ام سامح : لك وين رايحه

دلال : ماما ما سمعتي شو كنت احكي؟ يعلي عليها مقطوعة من المواصلات وصفيت بالشارع .. ورفيقتها اخدتا معا على بيتهن مشان ما تضل عرضة
للرايح والجاي .. وهلأ خايفه ترجع عالبيت لانك زعلانه منها
#مال_الشام
ام سامح : و ليش ما ردت على اتصالاتنا !!!ليش

دلال : اه ؟ لك موبايلها مسروق ما هون كل المشكلة اصلاً

مسكت ام سامح بدلال : خلص اتصلي قليلهن انا مو زعلانه منها ازا هيك القصة الف الحمدلله يارب .. يلا اتصلي

احتارت دلال وما عاد ردت بشي .. وغلبتها دمعتها ..

ام سامح : شبك ؟ شو في

دلال : ماما .. سمر بالمستشفى

طلعو تنيناتهن و ضلو بالشاارع بنصاص الليل وما في حدا بالشوارع .. بس هن التنتين عم يرجفو مو من البرد ولا من الخوف
من الوجع الي عم يحسو فيه .. وصل سامح واول ما طلعو صارو يسألوه عن سمر وشبها وشو صاير معا
وسامح ما رد بأي حرف … ضل ساكت
ومع كل الترجيات وكل دموعهن ما رد عليهن لوقت ما وصلو على المستشفى ..
(مال_الشام)
نزل سامح وفتحلهن باب السيارة

سامح : انزلو

دلال : سمر شبها ؟

مشي سامح وما رد عليهن و لون وشو مخطوف .. لحقوه ورجليهن ما عم تحملن

بس شافت دلال جوزها من بعيد ركضت عليه وارتمت بحضنو بدون ما تسأل عن كل الناس الي حواليهن .. خجل غشان بس حط ايدو على راسها

غسان : خلص اهدي
#مال_الشام
دلال : شبها اختي شو في ؟

ام سامح : وين بنتتتتتتتتتتتتتي … بنتي وينهااااااااااااااااااا شو صار فيا

قعد سامح عالكرسي وحط ايديه على وشو ..

سامح : استغفر الله العظيم واتوب إليه

قعدت امو عند رجليه : امي .. مشان الله تقلي شبها اختك قلبي ما عاد متحمل

تطلع فيها سامح و نزلت دمعتو الي كل الوقت حابسها : ما بعرف يا امي .. ما بعرف .. ونحنا عم ندور بالمشافي لقيناها
قالو انو جابوها لهون غرقانه بدمها

دلال صارت تصرخ والعالم يتفرجو عليهن : شوووووووووووووووو ….. لك احكووووووووووووو شو فييييييييي

غسان : دلال دلال صووووتكككك نحنا بمستشفى

دلال : بلا صوتي بلا بطيخ .. اختييييييييييييي شبهاااااااااا هلأ بدكن تحكووو

سامح : سمر كانت مطعونة .. و نزفت كتير ..

بعد عياط وبكي .. سألتن دلال مين طعنها وكيف

غسان : الي اسعفوها شافوه للشب .. واجت الشرطة وراحو معن لياخدو افادتهن ومواصفاتو
#مال_الشام
ام سامح : بنتي رح تعيش ؟

سامح : رح تعيش نص ميته

دلال : شو يعني ؟
#يتبع#مال_الشام

#حب_إلكتروني_بقلم_مال_الشام
#حب_إلكتروني

الجزء الحادي عشر

الي طعن سمر متسبب بضرر كبير بالأعصاب وحاولو يعملولها عملية ويخففو الأضرار بس ما قدرو يساعدوها بشي
والجزء السفلي من جسمها ما عم يتجاوب لأي شي ..
نزل الخبر متل الصاقة على دلال وامها .. ومرت ساعات طويلة ليبين مع الدكاترة شو وضع سمر وازا استقرت حالتها ..
بلش راكان يتصل على دلال ويبعتلها رسائل وهي مو قادرة ترد عليه
بعدين خطرلها انو لازم تحكي معو مشان يساعد الشرطة يمسكو مازن .. لان ما في غيرو عمل هالعملة .. كيف وليش ما بتعرف بس رح تفهم كل شي
بس تقوم اختها بالسلامة ..
#مال_الشام
تركت الكل وتسحبت عالتواليت و اتصلت على راكان .. وقالتلو كل شي وخبرتو عن حالة سمر والي صار فيها ..جن جنانو وخاف كتير على سمر
حتى دلال استغربت ردت فعلو .. سمر كتير كانت تقلها اديش بيترجاها لتحكيه واديه بيعمل شغلات كرمالها بس مع هيك استغربت ردت فعلو

راكان : انا رح خبر الشرطة عن بيتو ليمسكوه .. ورح اجي على المستشفى لشوف سمر
(مال_الشام)
دلال : انت مجنووون .. كيف يعني بدك تجي واخي وجوزي شو بدك تقلهن

راكان : مااااااا بهمني المهم شوفهااا

دلال : راكان بكفيها الي فيها لا تزيد مصيبتا

راكان : دلال الا سمر … الا سممرررر ما بتحمل يصرلها شي

دلال : طيب ساعد الشرطة ليمسكو مازن و تعال عالمستشفى .. بس يسمحولها بالزيارات رح
ساعدك لتشوفا بدون ما حدا يعرف .. بوعدك بس لا تسببلنا مشاكل ..

سكرت الخط و رجعت لتعرف شو صار بوضع اختها !! طلع الضو و خبروهن الأطباء انو وضعها استقر
بس ما قدرو يساعدوها لتحرك رجليها .. وخبرون انو بعد كم ساعه رح ينقلوها لغرفتا وبعدا بقدرو يشوفوها

مضت الساعات .. واجت الممرضة وقالتلهن ممكن يفوتو بس ما يخلوها تتعب بالحكي
وما يخبروها عن وضع رجليها مشان نفسيتا .. يحكولها انو هاد التخدير لسه ما راح مفعولو
بالفعل فاتو الكل واول ما شافتها دلال بوستها وانبسطت كتير فيا
ضلو قاعدين حواليا ومحدا حب يسألها عن سبب الحادثة ..

سمر : انا نعست

غسان : طيب يا جماعة اتركو البنت ترتاح وبعد شوي منرجع نشوفا

دلال : ايه انتو روحو رح ضل جنبها انا وما رح ازعجها ..

تركو دلال عندا وطلعو .. وهون اجا الوقت المناسب ..

دلال : انتي شو عاملة ؟

غمضت سمر عيونا وبكيت : ما بعرف

دلال : سمر فهميني لنعرف شو بدنا نحكي لاخي احكيلي

سمر : لما قلتيلي انو مازن اجا لعند بيتنا انرعبت كتير
خفت يعملك شي او يفضحنا .. رحت فتحت حسابك تبع الفيس بوك وكان شكي بمحلو
مازن كان شخص قذر كتير .. كان باعتلك تهديدات وباعتلك صورك مركبهن على اجسام عريانه بدون اي ملابس
انا وقف قلبي وما عرفت شو بدي اتصرف

دلال : ليش ما حكيتيلي ؟

سمر : كان بدي تتجوزي وما تكوني خايفه .. ما بدي تعيشي هالرعب هاد او تخافي منو وتعمليلو الي بدو ياه

دلال : وانتي شو عملتي ؟

سمر : انا ؟ انا حمارة … بعد ما فكرت كتير لقيت لازم خلي حدا يساعدني
وهاد الحدا ما كان ينفع يكون سامح لان سامح ادمي كتير وطيوب .. كان لازم يكون واحد ازعر متل مازن
#مال_الشام

دلال : لهيك لجئتي لراكان ؟ يعني متل الي طلع من تحت الدلف لتحت المزراب

ضحكت سمر وهي موجوعه : ايه .. قلتلو يساعدني وهو كان بس بدو رضاي وما سدء انو حكيت معو ..
وبالفعل ساعدني اما شو مساعده .. شي غير شكل

دلال : كيف يعني ؟

سمر : صرت اتفقد الحساب كل يوم .. ويوم عن يوم كان مازن يوقف تهديداتو
فهمت من راكان انو حكي معو وهددو ما يقرب منا وقلو انو هو اخي

دلال : طيب ؟

سمر : مازن اكتشف انو راكان مو اخي ..حبيبي .. هيك قلو راكان بس كشفو قلو انو حبيبي
ولما ما بقى نفعت التهديدات مع مازن .. راكان عمل شغله وسخه كتير خلت مازن يجن
ويعمل الي عملو

دلال : شو عمل ؟؟!!احكيييي

#يتبع#مال_الشام

#حب_إلكتروني_بقلم_مال_الشام
#حب_إلكتروني

الجزء الثاني عشر _ قبل الأخير

سمر : الغبي صار يلاحق اخت مازن .. ومعلقها فيه وماخد صور منها وهي بدون حجاب
لانو وسخ والو بهل طريق ما لقى غير هالحل وما خبرني .. بس كان الأتفاق انو يخلصني من مازن و انا بقبل فيه وبتزوجو

دلال : شووووووووو .. كيف وصل لاخت مااااااااااازن

سمر : ما بعرف مو قلتلك التنتين نفس الطينة … لما راكان يئس من محاولاتو مع مازن بعتلو صور اختو وهددو فيهن
ومازن كان فيه شوية عئل وطارو .. جن جنانو ولقيتو باعت على حسابك حكي وسخ كتير وتهديدات كتيررررة
اتصلت براكان وقلتلو انت شو عامل .. ووقتها خبرني عن عملتو السودا ..
ايه .. و تهجم علي مازن وانا طالعة من الجامعه .. وبس .. هاد كل شي
#مال_الشام
دلال : انتي شو عملتي ؟

سمر : تعبت كتير وانا احكي خلص .. انتي وقعتي مع واحد حقير
وانا حاولت احميكي و كبرت المشكلة .. يمكن كان لازم نحكي لأمي وما نتصرف من راسنا .. بس هاد الي صار
اتركيني نام شوي تعبانه كتير

دلال ما ردت بشي و كانت طالعه من الغرفة

سمر : دلال .. رجلي كتير تقال حاسة بشي غريب كتير فيهن .. حاسة كأنو جسمي انقسم نصين .. خلي الممرضة تجي

دلال : لا تخافي عادي الممرضة حكتلنا انو خدروكي بالعملية وطبيعي تحسي هيك

سمر : ماشي ..

طلعت دلال وقعدت برا واخوها و جوزها عيونهن فيها شك وحيرة .. لقت دلال انو راكان متصل عليها كتيييييييييير
سكرت موبايلها ، وقالت لسامح تعال معي شوي على جنب ..
استغرب غسان بس ما قدر يحكي شي

بعدو سامح و دلال عن الكل و وقفو لحالهن

دلال : شايفه يعيونك كل الأسئلة .. وبعرف انو نفسك هلأ تضربنا من كل البك

سامح : تنكسر ايدي قبل ما مدها عليكون .. بس ريحي قلبي

دلال : يا ريت فيني ريح قلبك .. بس الي رح قلك ياه رح يزيد النار الي جواتك ..

بلشت دلال تحكي لأخوها كل شي صار معا من الأول وانو مازن كان واعدا بالزواج وطلع وسخ كتير
واختها حاولت تحميها وقالتلو كل التفاصيل .. لوقت ما خلصت
كان وش سامح احمر كتير من العصبية
و عروق ايديه واضحه كتر ما كان مشدود ومتشنج
#مال_الشام
قبل ما يحكي شي اجا غسان من بعيد ..

غسان : سامح الشرطة اجت .. مسكوه للشب مشي معي لنروح نشوف شو القصه

صارت ترجف دلال لان هلأ جوزها رح يعرف كل شي .. اكيد مازن رح يحكي كل شي
وخلص غسان ما رح يسامحها ..
مشي غسان ولحقتو دلال وهي ميته من الرعبه

سامح : انت خليك .. لازم حدا يضل مع البنات انا رح روح

غسان : بس

سامح : خلص صهري انا بحلها وبخبرك بكل شي ..

بهديك اللحظة حسيت اديش كانت القصة رح تكون اسهل لو خبرنا اخي .. اديش كنا رح نحس بالأمان
حسيت بسند وضهر حاميني .. حسيت انو غلط كتير اتناسى وخاف من اخي من لحمي ودمي
يمكن وقتا كان رح يضربنا .. يمكن يعاقبنا و يزعل منا
ويمكن يعلق مع مازن ويضربو بعضهن
هاد اقصى شي كان ممكن يصير .. بس هلأ وين صرنا ؟هيك ضلت الأفكار تاخدها وتجيبها وهي شايفه اخوها راح وغسان حط ايدو
على كتفها ..

غسان : ما تخافي خلص كل شي رح يصير منيح ..

مسكو مازن و سامح رفع عليه قضية و بعد ما بلشت سمر تبكي من احساسها البشع بتقل رجليها عرفت انها انشلت
.. رفضت المستشفى تخرجها لان لسه ما اطمنو عليا
و سامح حاول يلفلف القصة قدام غسان وقلو انو هاد شب ازعر و سمر شرشحتو قدام رفقاتها وهو انتقم منها
تقريباً اقتنع بهل قصة وما بحبش كتير ورا الموضوع
مال_الشام
اتصالات راكان ما وقفت ابداً و دلال كانت بدها تخبر اخوها لان ما بدها مصيبه جديده
بس حست الحمل صار تقيل عليه

ردت على راكان وحكيت معو

#يتبع#مال_الشام

#حب_إلكتروني_بقلم_مال_الشام
#حب_إلكتروني

الجزء الثالث عشر – الآخــــــــــــــــيــــــــــــــــــر

دلال : ايه راكان

راكان : انتي وعدتيني تخليني شوف سمر ليش هيك عم تهربي مني ؟

دلال : ليك .. سمر صارت مشلولة .. خلص ما عاد تنفعك لا انت ولا غيرك .. بدها علاج لسنين لترجع طبيعيه
خلص اخي اتركنا بهمنا الله ييسر امرك

راكان : جد سمر انشلت ؟

دلال : ايه والله ..

راكان : طيب ازا هيك خلص ما عاد ازعجكن .. سلام
#مال_الشام
فصل الخط و دلال جن جنانها .. انو العمى كل الشباب بهل حقارة هي شو عم يصير

رمت كل شي ورا ضهرها .. و وقفت جنب اختها لتقويها وتتحسن نفسيتا .. وخرجوها من المستشفى بس رفضت سمر تتعالج
استقرت أمورهن و بلشو يتعافو من الصدمة الي عاشوها … سألت سمر عن راكان وحست دلال انو اختها بتحبو
خافت تقلها شو الي صار بس بعدين ما حبت تخبي عليها
وحكتلها كل شي .. وبالفعل احساس دلال طلع بمطرحو
سمر كانت حاببتو لراكان ومتوقعه منو غير تصرف ..
قررت دلال ترجع لبيتها و تهتم بغسان شوي لان من لما تجوزو وهي ما ورجتو يوم حلو ..كان رجال متفهم كتير وحنون
وقدر يستوعب ظروفها ووقف جنبا ..
بعد شهر بالضبط .. طلعت دلال حامل .. وعلى أثر هالخبر سامح حكي معا وباركلها والزعل بيناتهن راح
وقررو يفتحو صفحة جديدة

كانت دلال عم تطبخ وتغني .. و اجا غسان قلها انو سمر عالخط بدا تحكي معا ضروري

راحت دلال وردت عليها

دلال : ايه اختي ؟

سمر : لك طلع بيحبنننننننننننننني … بيحبني بيحبني والله بيحبني

دلال استغربت: لك مين الي بيحبك شبك

سمر : راااكاااااااااااااان .. خطبني .. خطبني ..اليوم اجت خالتو و طلبتني بشكل رسمي و بتعرف بوضعي واني مشلولة

حاكي مع اهلو ومخبرهن بوضعي وباع ابوه شقفة أرض ليعالجوني بس بدهن موافقتي

فرحت دلال كتير لان من وقت الحادث ما سمعت ضحكت اختها بنوب ..

دلال : الله يفرح قلبك ويهنيكي يا بعد عمري انتي
#مال_الشام
وافقت سمر على راكان .. وبدل ما يقضو سهر عسل طلعو ليقضو شهر علاج بأحسن المشافي
مصاري راكان ما كفو للعلاج .. ساعدو غسان وبعتلو المبلغ الي نقص عليه

وبسرعه كبيرة بلشت تتعافى سمر بسبب حالتها النفسيه الممتازة الي سرعت بالعلاج .. والخبرة الي عند الأطباء كان الها دور كبير

قبل ما يرجعو غسان دبر شغل منيح لراكان لان كان بيعرف انو رح يكون بوضع مادي سيء شوي

وانقضت فترة العلاج و رجعت سمر وهي حليانة و موردة وكانت فرحة اللقاء اكبر ما ممكن ينحكى وينوصف
الله اكرمها وتعافت بفضل رب العالمين .. واستلم راكان شغلو بس كان وضعهن المادي صعب كتير
رجعت سمر لجامعتها و لحقت امتحانات الفصل وتعبت كتير لتقدر تمتحن وتنجح وتاخد شهاداتها ..
بلشت تشتغل لتساعد جوزها ويحسنو وضعهن .. و بعد عدة شهور
الله رزق دلال ببنوتة كتير حلوة
سماها غسان دلال ..
كانت دلال حاضنة بنتها بالتخت و زعلانه و عم تقلو ما حلو يكون اسم بنتي متل اسمي غيرلي ياه

قرب من تختها و قلها

غسان : الحمدلله عالسلامة حبيبي .. دلال وحده ما بتكفيني .. بدي دلال ودلال ودلال ودلال …

#تمت

#مال_الشام