كبة مشوية على الطريقة الحمصية هي اول مشاركة الي

المقادير

• كيلو برغل ناعم
• من نص كيلو الى تلات ارباع لحمة عجل حمرة خالية من الدهن نهائيا
• ملح وفلفل اسود معلقتين دبس فليفلة
• هي بالنسبة للقشر الخارجي اما الحشوة عبارة عن :
• تلات ارباع كيلو لحمة غنم مفرومة
• مكسرات (جوز.صنوبر.لوز )
• ملح وفلفل وبهار حسب الرغبة
• شحمة خروف (عبارة عن دهن ياخذ من بطن الخروف غير اللية )مفرومة ومذوبة على النار و بنرجع بنبردا للاستخدام

الخطوات

بنجيب البرغل الناعم وبنغسلو بالمي من الحنفية كزا مرة يعني بنحط فوقو مي وبنصفي وبنرجع بنعيدا شي 4 او 5 مرات بعدين بنحطو دقيقتين لحتى ينفش شوي بس وبنبدا نديرو عالماكينا الكهربا بنديرو اول وجه لحالو وبنكون طاحنين اللحمة الحمرة بالمحضرة انا بفضل فيها اكتر من الماكينة لان بتطلع انعم و بنحطا فوق البرغل المطحون وجه واحد وبنضيف الملح والفلفل ودبس الفليفة بنخلطون سوا وبنديرون بالماكينا وجهين تانيات هيك بيكونو تجانسو منيح وصارو عجينة ناعمة بعدا بنصير نبل ايدنا بمي باردة ونعجنها شي 5 دقايق تقريبا

وبندخلا البراد لحتى تضل باردة وبنكون مجهزين الحشوة بنطبخ اللحمة المفرومة بمعلقة سمنة وبنضل نقلبها لحتى تنشف ميتها وبنحط المكسرات بنقلبون شوي والملح والبهار وبنطفي عليهون وكمان بندخلون البراد لحتى يبردو تماما لان اهم شي بهي الاكلة انو كلشي يكون بارد العجينة والحشوة والشحمة هيك بتضمني انو مستحيل تفرط معك وقت الشوي

هلق بدنا نبلش بشغلا وطريقتي مضمونة باذن الله بتكوري العجينة كور قد البيضة تقريبا وبعدين على سفرة نايلون بحط العجينة بنص النايلون وبفطيها بالنايلون نفسو يعني بتصير العجينة تحتا وفوقا سفرة النايلون بجيب علبة حليب النيدو المقاس الصغير تبع 400غ انا هي لي بستخدمها فيكي تغيري الحجم حسب المقاس لي بتفضلو بس هي قياسها مناسب المهم بحط العلبة فوق العجينة وبضغط بقوة شوي وبشيلا بيكون صار عندي قرص دائري متناسق بحطو عل سفرة تانية بكون مجهزتا وبعيد نفس الشي مع باقي العجينة وبيكون جنبي مي باردة لبل ايدي فيها

وبعدين بمسك قرص عجين وبحط معلقتين حشوة وفوقها معلقة شحمة او حسب الرغبة وبنحط فوقها قرص عجينة تانية بنحاول نسكرها بهدوء وبعدين بنحط علبة الحليب لي قطعنا فيها من قبل وبنحط فوقها نايلون وبنحط قرص الكبة وفوقو كمان نايلون متل ما عملنا بالاول بتصير الكبة بالنص وبنشد الكيس لتحت لحتى يتسكر القرص منيح ويتساوا شكلو منيح وبنكفي الباقي نفس الطريقة بنكون مشغلين المنقل والفحم وحاطين شبكة فوقون وبنحط الكبة عالمنقل وبنقلبا كل شوي لازم النار ما تكون عالية كتير حتى ما تحترق

بنقلبون كم دقيقة وبس استو بنشيلون وبنحط غيرون حتى الانتهاء هي الكمية ساوتلي 20 قرص فيكون تضاعفو المقدار وفيكون تفرزوها باكياس التفريز بعد سحب الهوا منها وبتطالعوها باي وقت وبالمكرويف او الفرن الساخن بترجع تازة بعرف اني طولت عليكون سامحوني بس حبيت اشرحلكون بالتفصيل حتى تحصلو على افضل النتائج وبصراحة نسيت صور التفاصيل بس ان شاء الله مرة تانية بصور وبفرجيكون الطريقة كاملة