كبسة سريعة
كبسة سريعة
المقادير
- كمية لحمة شقف حسب الرغبة
- بهارات صحيحة لسلق اللحمة حسب الرغبة
- كمية من الأرز البسمتي حسب الرغبة
- بصل وتوم وفليفلة خضرا وبندورة كمان حسب الرغبة
- بهارات كبسة وشوية كركم وفلفل اسود وملح حسب الرغبة
- كمية خليط من الزبدة او السمنة مع شوية زيت نباتي للحمة وللرز كمان حسب الرغبة
- واذا بتحبو بلف وبرجع بسكت و ببطل نزل وصفات كمان حسب الرغبة😅😅 لا بمزح قاعدة على قلوبكم😛
الخطوات
بسم الله الرحمن الرحيم
اول شي منحمي شوية زبدة أو سمنة مع زيت ومنحمص فيهم قطع اللحمة (هالخطوة بتعطي نكهة اطيب للحمة ومابتخلي يطلع نكهة زناخة) وبس تتحمر شوي منضيف مي مغلية واذا طلع شوية زفرة منقيمن ومنضيف البهار الحب ومنتركها عالنار لحتى تناديلكم وتقلكم حرام عليكم كفاية كده
“وطبعا اكيد لاحظتو اني لخبطت وضفت البهار الحب مع اللحم قبل المي”
اما بالنسبة للرز كمان منسخن خليط من الزبدة او السمنة مع شوية زيت نباتي ومنحط بهارات الكبسة مع الكركم والملح والفلفل ومنحمصهن شوي ومنطحن الخضار كلها بمحضرة الطعام (كمية الخضار انتو حددوها لانو في ناس بتحب الصلصة تقيلة وناس خفيفة بالنسبة الي بكمية الخضار اللي بالصورة بطبخ 3 كاسات رز) ومنضيفها عالطنجرة ومنضيف من مرقة اللحمة (ممكن نص مرقة لحمة ونص مي مغلية لحتى ماتكون تقيلة كتير وانا هيك بعمل) ومنعدل الملح حسب الرغبة ومنضيف الرز
منترك الرز يغلي كم دقيقة على نار قوية وبعدها منوطي النار عالأخير ومنتركو يستوي على مهلو وبدون ماتطالعو ولا صوت تركوه براحتو لو سمحتو
وبعد ما يستوي منطفي النار ومنتركو يتهدى كمان كم دقيقة وبعدها صبوه وضيفو اللحم فوقو واذا بتحبو اي اضافة تانية وشمرو عن سواعدكم وماتنسو تدعولي
وصحة والف هنا
