كريسبي روعة وشوربة العدس التركية وبطاطا بالفرن والمتبل والبلة السورية ملكة الأطباق الجانبية في رمضان

المقادير

• للكريسبي (كيلو صدور دجاج مقطعة بشكل طولي او مسطح او حسب الرغبة + بيضة + ظرف بيكينغ باودر + 3 ملاعق نشا + ثلاث ارباع كوب كبير طحين + ملعقتين خل + قليل من الماء لمزج العناصر + بهارات”ملح وفلفل اسود وبهارات دجاج وبابريكا وهيل وقرفة وثوم بودرة او ثوم مهروس” + بكصمات مخلوط مع ملعقتين نشا للتغطية)
• للمايونيز : (نصف كوب ماء + ملعقتين كبار نشا + اربع او خمس فصوص ثوم + ملعقتين كبار لبن + ثلث كوب زيت نباتي + ملعقة عصير الليمون + ملح وفلفل اسود)
• للبطاطا بالفرن (كمية من حبات البطاطا + قشقوان + بهار حسب الرغبة)
• شوربة العدس التركية (ملعقة زبدة كبيرة وقليل من الزيت + بصلة كبيرة مقطعة جوانح + ملعقتين كبااار طحين + ملعقة صغيرة دبس بندورة ونصف ملعقة صغيرة دبس فليفلة اختيارية + ثلاث ارباع الكوب عدس احمر مجروش + ملح وفلفل اسود وعصرة ليمون + ماء حسب الرغبة لكثافة الشوربة)
• للبلة: (كوب كبير برغل ناعم منقوع جيدا + ربع كوب زيت زيتون + بصلة مفرومة ناعم + حبة فليفلة خضرا وحبة فليفلة حمرا مفروم ناعم + 3 ملاعق عصير ليمون او حسب الرغبة + حبة كبيرة بندورة مفرومة ناااعم + ملعقة كبيرة دبس رمان + شوية بقدونس مفروم + ملح وفلفل اسود ورشة كمون وفليفلة حمرا)
• للمتبل: (نصف كيلو بيتنجان مقشر ومقلي + 4 او 5 فصوص ثوم حسب الحجم + ملعقتين كبار لبن + ملعقتين كبااار طحينة + ملعقة عصير ليمون + ملح وفلفل) انا حطيت مقادير المتبل للتقريب لكن انتو بتزبطوها حسب رغبتكم

الخطوات

بسم الله الرحمن الرحيم

للكريسبي: منخلط كل المكونات عدا الجاج والبكصمات مع بعض ليتشكل عنا خليط لزج ومننقع فيه الجاج عحسب الوقت المتوفر عنا وكل مازاد كل ما كان افضل وبيطرى الجاج اكتر بس اذا مافي وقت مو مشكلة فينا نشتغل فيها فورا ومنشيل قطع الجاج من الخليط منغطو بالبكصمات ومنتأكد انو تغلف بالكامل وبصير جاهز للقلي اذا حبيتو بنفس الوقت او ممكن تكوني مجهزيتيه قبل وتقليه وقت الاكل بزيت غزير حاامي على نار قوية بالبداية منستنى حوالي دقيقتين ومنوطي النار تحتو ليستوي تماما من جوا بياخد حوالي 8 دقايق او حسب سماكة القطعة،،

ملاحظة النشا مابخلي القشرة الخارجية تحترق بسرعة لهيك بيبقى الجاج عم ينقلى ليستوي وبنفس الوقت بحافظ على لونو الحلو..

بالنسبة للمايونيز : مندوب النشا مع الماء عالبارد ومنشغل تحتن النار ومنحرك لحتى مايتكتل ليتماسك الخليط منطفي تحتو ومنتركو يبرد تماما، بس يبرد منضيف فوقو باقي المكونات ومنضربن عالخلاط منيح ليتجانسو ومنحطو بالبراد لوقت الاستخدام،،

فيكم تتحكمو بسماكتو اذا حبيتوه خفيف باضافة شوووي بس ماء او حليب..

للبطاطا بالفرن: منقشر البطاطا ومنغسلها “يفضل حبات بطاطا صغيرة” ومنقطع شرايح متل مو موضح بالصورة بس بدون ما نوصل للاخير ومنغلفها بقصدير ومندخلها الفرن لتستوي تماما وبس تستوي منطالعها ومنبهرها بملح وفلفل اسود وبابريكا او حسب الرغبة وبهدوء منبعد الشرائح عن بعض ومنحط بيناتن شرحات جبن قشقوان او اللي بتحبوه ومتوفر ومنرجعها عالفرن ليسيح القشقوان وطبعا فيكم تعملو كل الخطوات على بكير بس ماترجعوها عالفرن لتسيح الجبنة لوقت الفطور وانا بحسها بديل صحي نوعا ما عن البطاطا المقلية جنب اللحوم

اما شوربة العدس اللذييييييذة فمنقلي جوانح البصل بالزبدة والزيت لحتى يدبل منضيف عليه الطحين ومنحمصو شوي وبعدا البهارات ودبس البندورة والفليفلة والماء لتسخن منضيف العدس ومنحرك ومنسكر عليها لتستوي،، بس تستوي منطحنها عالخلاط ودوقو ودعولي

منجي للبلة  منقلي البصل بزيت الزيتون ليدبل منحط فوقو البندورة والفليفلة لترتخي شوي منضيف البرغل المنقوع مسبقا وباقي المكونات عدا البقدونس منعمل كم تقليبة ومنطفي النار ومنضيف البقدونس ومنرجع منحركهم ليختلطو منيح وفيكم تتحكمو بالنكهات حسب الرغبة والبلة عادة بتتاكل بورق العنب *اعتبروه خبز يعني*

اما المتبل : منقلي البيتنجان ليشقر بس بدون مانخليه يغمق لونو كتير ومنتركو يبرد منحطو عالخلاط ومنطحنو مع التوم بعدين منضيف الطحينة واللبن وعصير الليمون وملح ورشة فلفل ومنخلطو بالمعلقة مو عالخلاط لحتى ما يصير مريئ كتير وبصير جاهز للتقديم..

والصور مرتبة نفس ترتيب الوصفات

وهنا وعوافي يارب

بتمنى وصفاتي تكون عجبتكم وتحطوها بالمفضلة وعلى سفرتكم

بحبكم من كل قلبي

صياما مقبولا وافطارا شهيا حبايبي