الدخيلة بقلم هلا غرابلي الجزء الاول
الدخيلة بقلم هلا غرابلي الجزء الاول
#الجزء الاول:
….اسعاف…اسعاف …..فوتوها ونادي الدكتور سعيد فورا ….حادث سيارة …
…
….
…..
الممرضة:دكتور صحيت المريضة
الدكتور:…..لحمدلله على سلامتك اطلعي لهون ….اديش هدول
المريضة: …..تلاتة…اخ راسي
الدكتور: ما تتحركي…شو اسمك انت؟
المريضة :…..انا …..اسمي ……ما بعرف …..ما بتذكر…ما بعرف اسمي
الدكتور :طيب ماشي خليكي مرتاحة …انسة سالي نادي السيد ابو يزن يلي اسعفا لهون
الممرضة:حاضر دكتور
كنت متسطحة على تخت بمشفى و راسي عم يجعني و ما بعرف شو يلي جابني لهون و ما بعرف اسمي او عمري او مين انا و مين اهلي ،ما متذكرة اي تفصيلة عن حياتي،دخل رجال كبير بالعمر على الغرفة يلي انا فيها و المدعو بالسيد ابو يزن و وقف يحكي مع الدكتور على باب الغرفة
الدكتور: متل ما توقعت صار معا فقدان ذاكرة على اثر الحادث
السيد ابو يزن:كيف يعني ؟
الدكتور:يعني المريضة ما متذكرة حتى اسما
السيد ابو يزن :طيب دكتور ممكن تكون حالة مؤقتة و ترجع ذاكرتا
الدكتور:تماما ، فقدان جزئي للذاكرة ،و بدا وقت لترجع لذاكرتا القديمة يمكن بعد اسبوع او اتنين او شهر و حتى اكتر و الافضل انو تشوف ناس و اماكن بتعرفا من قبل حتى تستفز الذاكرة و تستعيد صور و معلومات عن حياتا القديمة
السيد يزن:طيب كيف بدنا نعرف اسما او اي معلومات عنا ؟
الدكتور:اذا ما لقيت معا اوراق او هوية ،الموضوع صعب و بدو وقت ،بدنا ننطر لحدا يجي يسال عليا و يعطينا مواصفاتا وقتا نحن منخبرن انو البنت عنا و غير هيك ما في اي طريقة
السيد ابو يزن: شو بتقترح نتصرف هلأ ؟
الدكتور:هلا بعد يومين منخرجا من المشفى لانو قعدتا عنا ما بقا بتفيد و برايي تاخدا عندك او تحطا عند حدا واثق فيه
السيد ابو يزن :عندي ،ما فينا تبقى بالمشفى و انا مستعد ادفع كل التكاليف
الدكتور :ما قصة تكاليف بس القعدة بالمشفى ما بتفيدا الها ،اولا لانو لازم تطلع و تشوف ناس و اماكن حتى تسعيد ذاكرتا باسرع وقت و تاني شي نحن ما منحتفظ بمريض منتهي علاجو لانو في غيرو احق منو بالغرفة
ابو يزن :اكيد ماشي انا فايت شوفا عن اذنك….مرحبا كيف صرتي هلأ ؟
المريضة:….انا منيحة مين حضرتك ؟
السيد ابو يزن :ناديلي ابو يزن ….انا الشخص يلي ضربك بالسيارة بس يعني انت يلي طلعتي بوجهي فجأة و كنت عم تطلعي بورقة و ما منتبهة علي و انا كنت عم لف كوع
المريضة: ….يعني الغلط علي صار
ابو يزن :المهم يا ……معلش رح ناديلك ….جوري ..اي..رح سميكي جوري..لبين ما ينعرف اسمك الحقيقي
جوري (تبكي): و ايمت بدي اعرف اسمي ؟
ابو يزن :طولي بالك عمو بس الشغلة بدا وقت
بقيت يومين بالمشفى و بعدا اجا العم ابو يزن و خرجني من المشفى ،طلعت بالسيارة انا و اياه من ورا و مشي فينا الشوفير
جوري:لوين رايحين ؟
ابو يزن : رح تقعدي معنا هالفترة انا و عيلتي
جوري:ما بدي سببلكن احراج
ابو يزن :لا عادي اعتبرينا عيلتك التانية و انا خبرت عيلتي انو في ضيفة جاي تقعد معنا هالفترة
جوري:انشالله ما طول هالفترة ….وين ضربتني بسيارتك ؟
ابو يزن :لقدام شوي على طريق البيت
بعد ساعة و نص وصلنا لبيت العم ابو يزن يلي كان برا البلد ،كان فيلا بطابقين و مسبح كبيررو تراسات و حديقة كتير كبيرة ،وقفت السيارة و نزل الشوفير فتحلنا الباب و بعدين فتنا على الفيلا
ابو يزن :نتاشا اعطي خبر للمدام و الاولاد انو جينا
طلعت الخدامة للطابق الفوقاني و بعد شوي نزلت ام يزن و معا اولادا يزن و نتالي ،يلي كانو تقريبا بعمري ،رحبو فيني و عرفوني عن حالن و بعدين قلا ابو يزن للخدامة انو دلني على غرفتي يلي جهزولي اياها،اطلعت على الطابق الفوقاني و كانو عم يطلعو فيني من فوق لتحت و كانو منبوذة او دخيلة مشؤومة علين ،فتت على غرفتي يلي كانت كبيرة كتير و فيها كل شي ،قعدت على التخت انا و عم اطلع بالغرفة و بلشت ابكي بحرقة قلب ،دخل عندي العم ابو يزن
ابو يزن :ما تبكي عمي فترة قصيرة انشالله ،انزلي افطري معنا و بكرا من الصبح بتاخدك بنتي نتالي على السوق و بتشتريلك شو لازمك
جوري:يسلمو ما الي نفس اكل
ابو يزن :لا معلش كلي و ديري بالك على صحتك
جوري :طيب ماشي عمو اسبقني هلا بلحقك
نزلت فطرت مع العم ابو يزن و عيلتو و بعدا طلعت فورا على غرفتي حتى اهرب من نظرات الكل و تساؤلاتن ،بعد ما طلعت على غرفتي ،اندق الباب علي و انا متسطحة على التخت
جوري:تفضل
يزن:مرحبا
جوري:اهلين …يزن ….
جلست قعدتي
جوري : تفضل
يزن:حبيت الك اهلا و سهلا فيكي و اعتبريني متل اخوكي و اي شي بتحتاجيه انا جاهز
جوري(تبكي): ما بعرف اذا عندي اخ
يزن :لاا ليش عم تبكي
قرب علي و صار يمسحلي دموعي
يزن :خلص ما تبكي ،ما بقا بدي شوفك عم تبكي ،لازم تكوني قوية و تتجاوزي هالمحنة
جوري (تبكي): انا حاسة حالي وحيدة ،ما بعرف اذا عندي اهل و ما بعرف وينن و شو عاملين على غيابي
قرب يزن علي اكتر و لفني و حطيت راسي على صدرو و رجعت ابكي ،صار يلمسلي على شعري
جوري:انتو اكيد ما حبتوني و قلتو شو جابا هاي لبيتنا و لحياتنا بس ولله ما بايدي
يزن:لا ما تحكي هيك ،ما تفكري بهالطريقة ، هيدا نصيبك و بعدين انت بتنحبي فورا مشالله عليكي ابي سماكي جوري و انت اسم على مسمى متل الوردة الجورية
بعدت عنو و و انتبهت على حالي كيف كنت بحضنو
جوري: يمكن انت حبيتني و اعتبرتني اختك بس اختك نتالي حسيتا ما حبتني،على كل حال شكرا الك يزن و انا رح اعتبرك متل اخي انشالله
يزن:امم اكيد ،اي شي بتحتاجيه انا موجود
قمت من عن التخت
جوري: ريحتي مشافي ، وين الحمام عنكن
يزن:بكل غرفة في حمام خاص ….و هيدا حمامك…بدك تتحممي مو ؟
جوري :اي بس ما عندي تياب
يزن:ولا يهمك هلا بجبلك تياب من عند نتالي ،اوك
جوري:لا ما تطلب منا بلكي ما بدا تعطيني ما بدي احرجا
يزن :لا بتعطيكي
راح يزن و غاب نص ساعة و سمعت صوتو و صوت اختو نتالي من الغرفة يلي جنبي ، كانو عم يعلقو و نتالي ما بدا تعطيني شي من عندا ، فقدت الامل انو يرجع لهيك فتت على الحمام و شلحت تيابي و تحممت و انا عم اتحمم فات يزن على غرفتي
يزن:جوري عم تتحممي
جوري:ايه
يزن:ليكي جبتلك تياب ..رح اتركن على تختك
جوري:يسلم ايديك كنت رح ارجع البس تيابي نفسن
لبست تياب نتالي و نزلت على حديقة الفيلا اتمشى ،انا و عم اتمشى لمحت نتالي واقفة على البرندة ،رفعت ايدي و هوتلا ،دارت ضهرا و فاتت لجوا و تجاهلت سلامي،تابعت مشي و انا ماشية طلعلي كلب كبير وشرس و بلش يركض وراي و انا اركض بالحديقة و صرخ ، حتى نزل شاب من سيارتو كان داخل فيها على الفيلا و نادى للكلب باسم ماكس ،تركني الكلب و راح لعندو ،قرفص على رجليه و صار يحكي مع الكلب و يقلو اهدى ماكس و الكلب هدي و ما بقا نبح علي ،اخدو و حطو ببيتو و بعدين رجع
تامر : انت جوري مو هيك ؟
جوري:ايه
تامر: انا اسمي تامر ،ابن اخوه لابو يزن
جوري: تشرفنا
تامر: ما بقا تقربي لعندو ،الكلب ما بيألفك لسا لهيك ركض وراكي
جوري:انا ما كنت مفكرتو شرس هيك ،اذا بدي اياه ياخد وجه علي شو لازم اعمل ؟
تامر: لازم تهتمي فيه و يشوفك كل يوم و ….
نتالي (طلعت على البرندا): تاااامر ….
تامر:عن اذنك
تركني تامر قبل ما يكفي كلامو و طلع و انا بعدني عم اطلع عليه ،كان شاب عندو كاريزما و جاذبية مميزة ،تابعت مشي بالحديقة بالاتجاه المعاكس لبيت الكلب ،كانت الحديقة كتير حلوة و منظمة بطريقة حلوة ،قعدت بالتراس و انا عم فكر ،بعد شوي اجت الخدامة ام رضا يلي كان عمرها بالاربعين
ام رضا :شو بتحبي تشربي؟
جوري:ما بعرف ما بتفرق شو ما بدك و اذا بدك تتغلبي خلص بلا
ام رضا :ههههه لا هاي شغلتي
جوري:هلا انا جيت اليوم وما بعرف الكل منيح
ام رضا: السيد ابو يزن رجال مسالم كل وقتو بالشركة بشغلو و ام يزن كمان معظم وقتا برا البيت مع رفقاتا ،و ما بتجتمع هالعيلة الا مرة وحدة بس على الفطور، اما يزن الابن الكبير لابو يزن ،شاب هادي كتير ،نتالي البنت الوحيدة لابوا و قصي اصغر واحد بيناتن
جوري:قصي؟؟ما شفتو لهيدا يمكن
ام رضا:هيدا على طول مشاكل هو و ابوه ،حتى يوم يلي ضربك بالحادث كان السيد ابو يزن عم يعلق معو و طلع هو ومعصب منو و بعدا هداك طلع من البيت و لهلا ما اجا ،بكون مع رفقاتو
جوري:اممم و تامر بكون ابن عمن ؟
ام رضا:السيد تامر بكون ابن عمن و خطيبا لنتالي
جوري:خطيبا ؟
ام رضا :ايه ابن عما و خطيبا و شريك ابوا بالشركة ،السيد تامر يتيم الاب و الام ، ماتو اهلو من سنتين بحادث سيارة و صار شريك عمو محل ابوه الله يرحمو و بعدين السيد ابو يزن خطبن لبعض و رح تشوفيه كتير هون لانو بقضي معظم وقتو بين الشركة و بين هون لانو ما كتير بحب يقضي وقتو لحالو و ببيت اهلو بعد ما ماتو اهلو
جوري:يعني بدن يتزوجو هون ؟
ام رضا:السيد تامر عم يجهز فيلا الو و بيت اهلو رح يبقى موجود و مسكر من ريحة اهلو
جوري:صح معو حق الله يصبر قلبو ،صعبة كتير ،طيب و نتالي ؟
ام رضا : شبا نتالي ؟
جوري:انت اكيد الك زمان هون و بتعرفي كل واحد و طبعو بهالفيلا ،انا حسيتا ما حبتني
ام رضا :نتالي عصبية كتير و عندا شوفة حال كتير ،بس قلبا طيب كتير و ما بتاخد على حدا فورا ،بدا وقت بس
جوري:مختلفة كتير عن يزن ،شاب هادي و حباب و خدوم كتير
ام رضا:صح …يلا لروح جبلك كاسة عصير
قعدت بالتراس و بعد شوي جابتلي ام رضا كاسة العصير و راحت ،شربتا و فتت على المطبخ لحطا بالمجلى و ضيعت لوصلت على المطبخ و انا بطريقي سمعت نتالي هي و اما عم يحكو بغرفة
نتالي:يعني كيف ابي بجيبا تعيش معنا و نحن ما منعرف اصلا و فصلا من وين ،بلكي طلعت ما كويسة ؟
ام يزن :كلها فترة قصيرة انشالله و بتروح ،يعني انا مبسوطة بوجودا بيناتنا
نتالي :لازم نلاقيلها حلة فورا بضلها غريبة و دخيلة علينا
ام يزن :ما دخلني انا ،حكيت كتير مع ابوكي قبل ما يقرر يجيبا بس كان مصر كتير
نتالي:انا طالعة لعند تامر ،بدي دبرلا خطة طفشها فيا
ام يزن:اقعدي عاقلة يا نتالي ما تزعلي ابوكي كلها 4شهور و بتتزوجي و بتطلعي من هالبيت
سمعت صوتا جاي على الباب ،و رحت فورا لتابع طريقي انا و عم دور على المطبخ لانو الفيلا كانت كتير كبيرة ،شفت تامر قاعد على كرسي بالمطبخ و ام رضا عم تعملو فنجانين نسكافيه
جوري :و اخيرا …لقيت المطبخ
ام رضا :اهلين جوري ،كان خليها بمحلا انا بجي باخدا منك
جوري:لا عادي ،خالة ام رضا
و وقت قلتلا خالة ام رضا ،صار يضحك تامر ،التفتت عليه و شفتو حاطط ايدو على تمو ليخبي ضحكتو ،رجعت درت وجهي لعند ام رضا و تابعت حديثي
جوري : شو ممكن الواحد يعمل شي يتسلى فيه بهالبيت ،غير انو يطلع يتمشى بالحديقة ؟
ام رضا :ما بعرف انا معظم وقتي بالمطبخ ،هاي قدامك تامر اساليه
تامر :في شغلات كتير هون تتسلي فيها
جوري:متل شو
نتالي:تاااامر …..وينك ….انت هون
تامر:كانت جوري عم تسال شو الشغلات يلي ممكن تتسلى فيها هون
سكتت نتالي و كانو عم تفكر و بعدين ابتسمت ابتسامة صفراوية
نتالي : في كتير ،مشي معي …يلا تامر و انت تعا كمان
طلعت انا و نتالي و تامر على الحديقة ، و مشينا مسافة منيح لوصلنا على اسطبل فيه حصان
جوري:حلو كتير ،الك هيدا نتالي؟
نتالي:اي الي جبلي اياه تامر هدية عيد ميلادي من 5شهور ،شو رايك تاخدي لفة فيه ؟
جوري:انا ….بس انا ما بعرف يعني كيف بركبوه
نتاالي:سهل كتير ،حطي رجلك هون و اطلعي و شدي الحبل شوي و هو بيمشي لحالو
جوري:اممم طيب تامر اطلع معي اول مشوار و بالتاني بطلع لحالي
تامر: ماشي
نتالي:…..اممم طيب ماشي اطلع تامر معا
طلع تامر على الحصان و مدلي ايدو ليساعدني لاطلع ،اطلعت قدامو و نتالي واقفة معصبة و عم تهز برجلا ،مسك تامر الحبل و شدو و مشي الحصان فينا ،و بعدنا عن نتالي
جوري:حلو كتير ،شو اسمو ؟
تامر :اسمو اوسكار
جوري :اسم حلو كتير مين اختارو ؟
تامر: انا
جوري : ما فيك تخليه يركض فينا
تامر :اي طبعا
لفينا و رجعنا عند نتالي و الحصان كان عم يركض فينا و كنا عم نضحك و كانت نتالي واقفة و حاطة ايد على ايد و عم تهز برجلا و ناطرتنا
نتالي :طولتو
جوري:يااا كتير حلو نتالي
نتالي:يلا تامر انزل ،خلي جوري لحالا ،لنشوف اذا تعلمت بهاللفة الا لا
جوري:اي سهل ما بدو شي ،يسلمو تامر كتير انبسطت
نزل تامر و بقيت لحالي و قبل لسا ما امشي ،فجاة الحصان صار يصهل بصوت عالي و ارتفع عن الارض و كنت رح اوقع منو و بلش يركض فيني و انا ماسكة بالحبل و عم صرخ
جوري:نتالي الله يخليكي قليلو يوقف …تامر ….رح اوقع
التفتت على نتالي و شفتا عم تضحك علي و عرفت انو هي السبب بس ما عرفت شو عملتلو للحصان حتى جن فجاة ، صار تامر يصفرلو للحصان ،لف الحصان و انا وقعت على الارض على رجلي و صرت صرخ و ابكي ،ركضو علي و حملني تامر
جوري:رجلي …رجلي عم تجعني كتير ،يمكن انكسرت
نتالي:شبك شو صرلك قلتيلي سهلة يييي ما توقعتك توقعي
تامر:ما كنتي لازم تطلعي عليه اذا ما كنت متمكنة
رجعنا على البيت و من اول الطريق و تامر حاملني و انا لاففتو من رقبتو و عم ابكي و نتالي راكضة ورانا ومدايقة من هالشي ،طلعني على غرفتي و حطني على التخت وقعد مسكلي رجلي و صار يحركا
تامر :هيك عم تجعك
جوري:اخ اي اي
تامر:ما بظن في كسر ،رضة بس
نتالي:تامر خلينا نتركا ترتاح و هلا منبعتلك ام رضا
اجت ام رضا فورا على صوتي
ام رضا :شبا جوري
تامر :وقعت عن الحصان
ام رضا:ييييي شو طلعك عليه ،ارتاحي بشو حاسة؟
جوري:رجلي شوي عم تجعني
ام رضا :رح اتصل بالدكتور
جوري:لا ما في داعي خالة انا صرت احسن بس بدي راحة
ام رضا :لا اضمن
طلعت ام رضا و تامر و نتالي و بقيت لحالي بالغرفة و بعد شوي اجا الدكتور و فحصني و قلي بدك راحة بس ما في اي كسر ، بقيت بقية النهار بالتخت و تاني يوم كمان و كان يجيبولي الاكل على غرفتي و طلع عندي يزن و العم ابو يزن اطمنو علي و بعدا فات ابو يزن لعند نتالي على غرفتا و علق معا ليش لطلعني على الحصان لحالي و هالشي زاد من كره و حقد نتالي علي اكتر ،بعد يومين تحسنت كتير ،طلع عندي يزن
يزن:رح روح معك على السوق كرمال تشتري تياب الك
جوري :ليش نتالي ما بدا تروح معي ؟
يزن : …..خلص انا بروح معك و رح تروح معنا كمان ساندي
جوري:مين ساندي ؟
يزن:البنت يلي بحبا معي بالجامعة، هلا بعرفك عليها ،حكتلا عنك و حابة تتعرف عليكي
جوري:اي كتير منيح بلكي منصير رفقات
نزلنا على السوق انا و يزن و ساندي و اتعرفت على ساندي بنت بسيطة كتير و متواضعة ،اشتريت تياب كتير الي ،لانو ما كان عندي ابدا و نحن بالسوق شفنا نتالي و تامر و رفقاتن قاعدين عم ياكلو بوظة ،سلمنا علين من بعيد و اشرتلنا نتالي بايدا نجي نقعد معن ، رحنا قعدنا معن
نتالي:شو اشتريتي ؟
جوري:شغلات كتيرة
نتالي:اممم عرفت تشتري من هون او لحظة لعيد صياغة السؤال تذكرتي شي انك كنتي تشتري تيابك من هون لانو هون كلو وكالات و ماركات عالمية و ما شكلك كنتي تشتري من هون قبل ما تفقدي ذاكرتك لانو هالشي واضح من تيابك يلي جيتو فين لعنا
يزن: ….نتالي ….
جوري:بس يلي بشوف ذوقك باللبس وطريقة تطبيقك للالوان على بعضا ما بحس انو تيابك ماركة و وكالة او مدري القطعة الغالية بدا جسم لبيس لتنعرف قيمتا
نتالي(معصبة ):ما عرفتكن يا جماعة على جوري ،ابي سماها بهالاسم لبين ما ينعرف اذا الها اهل الا لا ،خايفة تعجبك القعدة عنا و يصير ما بقا بدك تتذكري اصلك و فصلك
يزن :جوري خلينا نقوم
جوري: اي منقوم ،تشرفنا بالجميع
قمت انا و مدايقة ،قربت لعندي ساندي
ساندي: ما تزعلي هاي نتالي وحدة ما مزبوطة نفسيا ، مفكرة حالها احسن من الكل بمصرياتا ،حتى انا بتكرهني كتير و بس لانو فقيرة بتشوفني ما مناسبة لاخوا لهيك ما تاخدي على حكيا ابدا
رجعت على البيت ،و طلعت ركض على غرفتي لقيس التياب الجديدة يلي اشتريتا ،نزلت على العشا انا و لابسة تياب جديدة و اول ماشافتني نتالي قلبت وجها و خاصة وقت قلي العم ابو يزن انو كتير حلوين و لابقينلي ،بعد ما خلصنا عشا ،راح العم ابو يزن و مرتو يسهرو عند رفقاتن و بقينا بالبيت و اقترح علي يزن نحضر فيلم كوميدي سوا ،قعدنا بغرفة التلفزيون و جابتلنا ام رضا بوشار و كولا ،و نحن عم نتفرج على التلفزيون اجا تامر من برا و فات لعنا و شافنا عم نضحك
تامر :يا سلام اخر رواق ..شو عم تحضرو ؟
جوري:عم نحضر فيلم للممثل …شو قلتلي اسمو يزن ؟
يزن:بن ستيلر
جوري:اي هيك كتير حلو جيب نتالي و تعو احضروه معنا
قعد تامر جنبنا و نادى تامر لام رضا و قلها قليلا لنتالي انو جيت ، بعد شوي نزلت نتالي من غرفتا و شافتنا مبسوطين
نتالي:بدنا التلفزيون
يزن: نعم
نتالي: بدنا التلفزيون انا و تامر ،من مبارح اتفقنا انا و تامر انو نتفرج على فيلم
اطلع فيها تامر هو و متفاجا
تامر:خلص قعدي منحضر هيدا الفيلم معن
يزن : نتالي اذا ما حابة تحضريه لهيدا معنا ،بس يخلص الفيلم بيجي دورك و بعدين في تلفزيون تاني
نتالي:بعرف في، بس هيدا اكبر بكتير من هداك
جوري:خلص يزن بعدين منكفي الفيلم
قمنا و اعطاها الكونترل بعصبية
يزن :تفضلي ست نتالي
و التفت علي
يزن:مشي نلعب بلاي ستيشن بغرفتي
جوري:بلاي ستيشن ؟
فتت على غرفتو ليزن و علمني كيف بلعبو بلاي ستيشن ،بعد شوي انتبهت انو وقعانة ساعتي من ايدي قلتلو ليزن انا نازلة جيب ساعتي شكلا وقعانة بغرفة القعدة ،و اول ما فتت على غرفة القعدة شفت تامر عم يبوس نتالي ،اول ما شافني تامر تلبك كتير اما نتالي عصبت
جوري:عفوا
نتالي: الناس بدق الباب قبل ما تفوت
جوري :ما في باب لدقو
نتالي: على الاقلية طلعي صوت و انت فايتة ،شو بدك هلا،؟
جوري:وقعت ساعتي هون
دخلت انا و عم اطلع على الارض ،
تامر:هاي قصدك ….تفضلي
اعطاني تامر الساعة يلي كانت ورا ضهرو و اخدتا و طلعت فورا و رجعت عند يزن انا و مكركبة و وقت سالني يزن شبك ،قلتلو ولاشي ،بعد ساعة طلعت من غرفة يزن ،وانا رايحة على غرفتي يلي جنب غرفة نتالي ،شفت تامر طالع من غرفتا و عم يسكر الباب شوي شوي و شالح تيابو من فوق و بايدو بلوزتو ،اول ما شفتو ،نزلت راسي على الارض و مشيت بسرعة على غرفتي ،فتحت الباب و فتت على غرفتي وو انا عم اشلح تيابي لالبس قميص النوم و عم فكر بالشي يلي شفتو ،اندق بابي ،انا و عم افتحو ، حدا دفشو ،فات و سكر الباب
:
تامر:جوري اوعى تجيبي سيرة لحدا بالشي يلي شفتيه هلأ ….
جوري: ما دخلني بشي و ما شفت شي انا قاعدة بهالبيت فترة بس و طالعة و ما بدي اعمل مشاكل مع حدا
رجع خطوتين لورا و اطلع علي من فوق لتحت
جوري: ما تطلع علي هيك … اطلع لبرا
تامر:امم طالع ،متل ما اتفقنا اوك
طلع من عندي تامر و انا قلبي عم يدق بسرعة ، كانت ريحتو بدوخني ،غيرت تيابي و طلعت من غرفتي وكنت رايحة على غرفة نتالي لاحكي معا و اعتذر بس سمعت صوتا عم تحكي مع حدا ،حطيت داني على الباب و سمعتا عم تحكي
نتالي:انا بحبك الك ،هو ما بيعنيلي شي و كلها فترة قصيرة و بفشكل الخطبة و منصير مع بعض …حسام …شبك…زعلت …لا ابدا ما عم خليه يقرب علي ابدا …هههههه…الك و بس …يلا انا نعست و بدي نام تصبح على خير حبيبي
سكرت الخط مع حبيبا حسام و سمعت صوتا عم تبكي ،فكرت فوت لعندا بس غيرت رايي و رجعت على غرفتي و انا عم احكي مع حالي ،نتالي عم تخون تامر و ما بتحبو و بتحب حدا تاني اسمو حسام بس من تصرفاتا كان واضح انو بتحبو ،طيب ليش كانت عم تبكي ؟ ،حطيت راسي و نمت و بنص الليل فقت على صوت نفس تاني بغرفتي ،خفت كتير لدرجة ما استرجيت افتح عيوني و شوف مين يلي واقف جنب تختي و كانو عم يطلع علي ،بقي الشخص عشر دقايق واقف و كانو كان عم يبكي على الساكت ،بعدين سمعت صوت طبقة باب غرفتي ،قمت مرعوبة و عم خمن مين بدو يكون بس توقعت تكون نتالي بس ما عرفت السبب ،تاني يوم فتت عند يزن على الغرفة و من جملة الحكي معو سالتو
جوري :نتالي بتحب تامر ،يعني قصدي مخطوبين عن حب ؟
يزن :لاا نتالي كانت بتحب واحد تاني قبل ما تنخطب لتامر
جوري :و ليش انخطبتلو اذا ما بتحبو ؟
يزن:لانو يلي بتحبو فقير كتير اما تامر احوالو ممتازة و هاي اختي نتالي ما بتقدر الا تعيش بنفس المستوى ،متل ما شايفتيها معظم وقتا بالاسواق يعني فيكي تقولي اخدت تامر عن قناعة ما عن حب
جوري:اي و انت ؟قصدي يعني رح تعمل نفس الشي مع ساندي؟
يزن:لااا انا بحبا كتير لساندي و مستحيل اخد غيرا حتى لو بدي اتحدى اهلي و المجتمع كرمالا
جوري:ههههههه
يزن:ليش عم تضحكي؟
جوري:عنجد انتو غريبين ،ما بتحبو الا الفقرا ،طب ليش من الاول ما حبيتو من نفس مستواكن و وفرتو على حالكن تعب قلب
يزن:لانو الحب ما بينحكم بعادات و شروط ،بيجي لحالو هيك و بعدين عندك مثال حي قدامك ابي و امي..
جوري:شبن؟
يزن:اخدو بعض كرمال يبقو محافظين على نفس المستوى و البرستيج بس ما في بيناتن اي انسجام او حب ،علاقتن روتينية و باردة و انا ما بدي يكون زواجي هيك لا بفضل اتحدى الكل و كون بالاخير انا مرتاح و مبسوط
جوري:امممم،رايح على الجامعة ؟
يزن :ايه تروحي معي ، شو رايك ؟
جوري:اي بروح اذا ما عندك مانع
يزن :لا ابدا بالعكس و ساندي بتنبسط بجيتك و فرصة الك لتعرفي جو الجامعة و بلكي بتتذكري اذا درستي فيها
فتت غيرت تيابي فورا و طلعنا بالسيارة و رحنا على الجامعة ، اول ما فتنا على الجامعة ،سالتو وين كلية نتالي ،قلي قريبة من هون انا بدرس تجارة و اقتصاد سنة رابعة و هي بتدرس ادارة اعمال سنة تالتة و الاتنين قراب من بعض
،
جوري: و تامر بيدرس معا ؟
يزن:لا تامر من زمان متخرج تجارة و اقتصاد و ما بيجي على الجامعة
جوري:طيب انا رايحة شوفا ،شفتا نزلت على الجامعة من الصبح
يزن :بس انت ما بتعرفي الطريق
جوري: ما تخاف علي رح اسال اي حدا بشوفو بوجهي ما تاكل همي ،حابة اعملا اياها مفاجأة
رحت على كليتا و فتت على الكافتريا و شفتا قاعدة مع شاب ،شكيت يكون حسام يلي بتحبو ، وقفت من بعيد راقبن ،كانو عم يطلعو ببعض هن و مبسوطين حتى نتالي البنت المعصبة على طول شفتا اول مرة عم تضحك من قلبا و حطت ايدا على وجهو لحسام و قرصتو من خدو ،كان اي حدا بشوفن بيعرف انو هدول بعشقو بعضن ، بعدا رجعت لعند يزن و قعدنا شوي مع رفقاتو
يزن :يااا طلع عندي محاضرة مهمة هلا ما كنت بعرف
جوري:خلص فوت حضرا بنطرك هون او برجع عالبيت بس اكتبلي العنوان حتى ما ضيع
يزن :طيب ماشي بس حاولي انطريني
جوري:ما بوعدك اذا مليت رح روح
دخل يزن على محاضرتو و انا رجعت على البيت ،اول ما نزلت من التكسي على باب الفيلا ، شفت تامر بسيارتو بدو يفوت لجوا بس وقف سيارتو و صار يحكي معي
تامر:شو شايفك جاي لحالك ،وين كاينة ؟
جوري:بالجامعة مع يزن و اعطاني العنوان و طلعت بتكسي و جيت
فتحت باب سيارتو و قعدت جنبو
جوري:اطلع هيك
اطلع فيني هو و مستغرب و رجع بسيارتو لورا و تابع طريقو
تامر:اذا بدك تحكي معي مشان هديك الليلة ،بقا رح قلك هالشي ما تدخلي فيه و الامور ما موصلة لمحل ما انتي مفكرة
جوري:نتالي ما بتحبك
اعطى فريم للسيارة فجأة
تامر:شو قلتي ؟ليش عم تحكي هيك ؟بدك توقعي بيناتنا ،غيرانة منا
جوري:نتالي متل اختي و ما بردلا الا الخير و خطبتكن غلط ،هي ما بتحبك بتحب حدا تاني اسمو حسام كمان و بيدرس معا بالجامعة
مسكني من ايدي
تامر:مجنونة انت ؟شو عرفك ؟ شو الدليل على صحة كلامك ؟
جوري:الدليل اليوم شفتو ،كانت قاعدة معو ،و اذا ما مصدق راقبا و شوف بعينك و انا ما عم اعمل هالشي كرمالك لا كرمالا لانو هي عم تتعذب و تختار الشخص الغلط لتكفي حياتا معو
تامر:قصدك انا الشخص الغلط ؟مين انت لتقيمي هالشي؟
جوري:انا زعلت على نتالي لانو مفكرة الزواج بدو مال بس و نسيانة انو العامود الاساسي للزواج هو الحب و الانسجام بس انا ما بدي اياك تفاتحا بهالحكي لانو ما رح تفهمني و رح تحقد علي ،اتصرف على الساكت
تامر:انت وحدة كذابة و ما رح صدقك
جوري:طيب ليش جاي على الفيلا و خطيبتك ماهون ؟
تامر :حكيتا و جاي على الطريق
جوري:طيب متل ما بدك ،انا حكيت يلي شفت انو لازم ينحكى
لف السيارة و رجعنا على الفيلا نحن و ساكتين و انا ندمانة ليش حكيت ،كان ما لازم ادخل ،معقول ضربة راسي ماثرة علي ، طلعت على غرفتي و هو رجع طلع بسيارتو و راح و ما بعرف لوين راح ،رجعت المسا نتالي هي و معصبة و طلعت بوجها على غرفتي و اول ما فاتت ضربتني كف
نتالي:انت جاي تخربي حياتي ،انقلعي برا هالبيت ،انا ما بقا قادرة اتحملك اكتر من هيك ،ما بقا بدي شوف صورة وجهك ،مين مفكرة حالك و شو عرفك اصلا بحسام؟
وهي عم تبهدلني ،سمعنا صوت عياط و صراخ من الطابق التحتاني ،نزلنا ركض على الدرج انا و اياها ،و شفنا عمي ابو يزن عم يعلق مع شاب و يصرخ عليه و مرتو عم تفصل بيناتن
جوري:مين هيدا ؟
نتالي: ……
نزلت نتالي تهدي ابوها و التفتت على الشاب
نتالي:قصي خلص روح من وجه ا
قصي:لك ما شربان ،كلها كاسة كاستين بس ،عملتني سكران
طلع قصي على الدرج و هو عم يتمايل و ريحة المشروب طالعة منو ،شافني واقفة على الدرج ،اطلع فيني
قصي:ياااا ويل قلبي انت حقيقة ام خيال ،من اين اتيتي و كيف دخلتي و كيف عصفتي بوجداني
و تابع طريقو على الدرج و هو عم يتلفت علي ،طلعت على غرفتي و قفلت الباب لانو
خفت ترجع نتالي و تكفي بهدلتي و انا ماتوقعت الامور تتأزم هيك و وقت اجا الليل قفلت الباب قبل ما نام و بقيت صحيانة و انا عم اطلع على مسكة الباب ،على الساعة 3تحركت مسكة الباب و كانو حدا بدو يفوت بس لقى الباب مقفل ،وقف شوي و بعدين راح و انا ما عرفت مين هالشخص بس لانو كنت خايفة صرت سكر الباب على طول وقت نام ،تاني يوم الصبح نزلنا على الفطور
ابو يزن :وينو ؟؟بعدو نايم ؟؟الو اسبوع ما اجا على البيت و بس اجا ،اجا سكران ،ام رضا اطلعي دلقي عليه سطل مي و فيقيه
جوري:لا انا بفيقو
اطلعو فيني هن و متفاجئين و قمت عن الكرسي و طلعت فورا ،دقيت على بابو دقتين ،و ما سمع صوتو ،فتحت الباب و فتت ،ما لقيت حدا بالتخت،اجا من وراي
قصي:صباحو
التفتت عليه و شفتو طالع من الحمام و لابس بنطلون ،وطيت راسي
جوري:صباحو انا كنت جاي قلك انو انزل افطر معنا
قعد على التخت و صار ينشف راسو و يطلع فيني من فوق لتحت
قصي:اي انا يلي بنزل ،انت رفيقة نتالي ،ما بعرف انو عندا رفيقة حلوة لهل الدرجة
جوري:لا انا ما رفيقتا ،انا ….ابوك جابني لهون من كام يوم ،ضربني بسيارتو بالغلط و صار معي فقدان ذاكرة
قصي:ايوا ايوا ،و انا ما بعرف بكل هالحكي ،اهلا و سهلا فيكي ،معناتا اقامتك عنا طويلة
جوري:انشالله لا
قصي:امم انا اسمي قصي و انت ؟
جوري:جوري
قصي:امم جوري طب ممكن شمك هههههه عم امزح يلا هلا بلحقك
نزلت قعدت على الطاولة ،و بعد شوي لحقني قصي ، فطرنا نحن و ساكتين
يزن :جوري ما بدك تروحي معي على الجامعة اليوم كمان
جوري:لا رح ابقى بالبيت ،سلم على رفقاتك
خلصت فطور و طلعت فورا على غرفتي و بعد شوي اندق الباب و فات قصي
قصي:صباحو ،ما لحقنا ندردش شوي
جوري:اهلين ،انا اول ما جيت ما شفتك ،يعني كنت مسافر ؟
قصي:لا كنت عم غني
جوري:بتغني!!
قصي:اممم بتحبي سمعك شي
جوري:اي بسمع
قصي:
لزرعلك بستان ورود
وشجره صغيرة تفييكي
واغزلك من نور الشمس
اسواره تزين ايديكي
و رح جبلك من ابعد بحر
احلا درة بلائيها
و اسرئلك من حول البدر
اجمل نجمة و خبيها
جوري:اممم حلو كتير صوتك بس ما فهمت لهلا وينك بهالاسبوع؟
قصي:انا بغني بكتير محلات ،اذا غنيت بفندق مثلا بنام فيه او بنام عند حدا من رفقاتي يلي بكونو من الفرقة
جوري:اممم خلصت دراستك يعني ؟
قصي:لا طبعا ،تركتا لانو ما عدت لحق بين الدراسة و الحفلات
جوري:قام بديت حفلاتك على دراستك ؟
قصي:اي لانو بطبيعة الاحوال رح كفي بهالمجال
جوري:و ابوك ما قبلان بهالشي بس ليش لترجع سكران ؟
قصي:بشرب كاس مع هالطاولة و كاس مع هالطاولة برجع سكران
جوري:اممم حياتك غلط
قصي:وين الغلط يعني بس الولد يكون بدو شي ما بيتوافق مع اهلو بصير مغضوب و منبوذ
جوري:لا بس كان فيك توفق بين الطرفين هوايتك ودراستك ،و الاهم هن اهلك ،يعني خلي الغناء بفترة الصيف وقت عطلتك و خلي الشتا لجامعتك
قصي:اممم منفكر ،شو عمرك انتي ؟
جوري:انا ما بعرف اسمي حتى اعرف عمري ،بس انا متاكدة اني اكبر منكن كلكن
قصي:اووف ليش متأكدة بقا
جوري:يمكن من طريقة تفكيري و نظرتي للامور
قصي:شو قصدك يعني ؟انك انت انضج مني
جوري:ما تزعل بسس ايه لانو العقل و المنطق بقول تصرفك غلط و لو انا بمحلك ما رح ارجع سكران على البيت و بعرف ابي بيدايق مني بهالموضوع بالعكس بحاول اكسب رضاه ليحققلي للشي يلي ببالي ،يعني اكيد بكرا بمسيرتك الغنائية بدك دعم مادي اذا بدك تعمل CD
قصي:لا ما بحاجة دعم ابي لانو حفلاتي بتخليني اصرف على حالي و اعمل يلي بدي اياه
جوري:طيب بس ما بدك موافقة و مباركة الاهل ،هيدا شي اساسي،و المطرب لازم يكون مثقف كمان و معو شهادة و علاقتو منيحة مع اهلو لانو باول مقابلة او مؤتمر صحفي الك مستقبليا رح تنسال عن علاقتك مع اهلك و اذا تسرب للصحافة الحقيقة رح تخسر جمهورك
قصي:امممم صح انا ما فكرت لقدام كتير لهل الدرجة
…ايييه اهلا و سهلا فيكي ست جوري كيف شفتينا الجو هون ،عجبك؟
جوري :اي بس نتالي ..ما حبتني ابدا لا هي و لا تامر ،بس يزن كتير كويس ،يزن انسان هادي و منظم و بيعرف شو بدو بعتقد لانو هو الكبير فيكن
قصي:نيالو يا عمي ،يعني يزن عاجبك
جوري:يزن متل اخي و انت رح اعتبرك اخي
قصي:لا اعتبريني متل رفيقك احسن
جوري:اوك و هلا روح اعتذر من ابوك على تصرف مبارح ،انا نازلة حطلو اكل لماكس
نزلت على الحديقة ،و رحت حط اكل للكلب ماكس ،انا و واقفة كنت عم اطلع على الباب و احكي مع حالي تامر ما اجا اليوم و بالعادة بيجي بيفطر معنا ، التفتت على البرندا و شفت نتالي واقفة عم تطلع فيني و تزورني و بعد شوي نزلت فورا ،توقعت انو نازلة لعندي تكفي حكي مبارح ،تركت الكلب و تابعت طريقي لاسطبل الحصان اوسكار ،لانو ما بدي حدا يسمع اصواتنا نحن و عم نعلق ،التفتت وراي انا و ماشية و شفتا لاحقتني
نتالي:جوري …..لحظة ….انت شو عرفك بحسام ….من وين بتعرفيه ؟
جوري:بعرفو بالشكل بس و بدي قلك شغلة انا لو قاصدة خرب عليكي كنت رحت قلت لحسام شو شفت اول مبارح بس انا يلي عملتو لصالحك خليكي مع الشخص يلي بتحبيه
نتالي:هههههه لصالحي ،ليش مين انت حتى تقرري شو هو يلي لصالحي ؟،بس انا بعرف ليش هيك عملتي ،بدك تاخدي تامر مني بس ما حذرتي ،تامر ما صدقك ابدا و عرف نيتك
جوري:لا بدي اخدو لا هو و لا غيرو ،كلها فترة و رايحة
نتالي:كذابة ،انت عجبتك العيشة هون و العز و الغنى و يمكن اصلا استرجعتي ذاكرتك بس عم تخبي علينا حتى تبقي
جوري:……نتالي الحكي معك متعب جدا ،اعملي يلي بدك اياه،انا من اول ما جيت على هالبيت و انت كارهتيني ما بعرف ليش و انا عم حاول اتجاهل الكره و اتقرب منك وكون صديقتك
نتالي:ولا بحياتك رح بتصيري صديقتي و يا ريت تلاقيلك بيت تاني تقعدي فيه ،انت واعية روح دبريلك شغل و اشتغلي و اعتمدي على حالك
جوري:امممم بفكر بالموضوع بس ما بعرف شي ،رح اطلب من حسام يساعدني بهالموضوع
نتالي(معصبة):اوعى تقربي على حسام اوعى
جوري:ههههههه ،انت وحدة مريضة ،عم تضحكي على شابين و حاجزتين باسمك واحد عشيق و التاني زوج مستقبل ،شو رايو ابوكي بهالموضوع ؟
نتالي:اخرسي اذا بتجيبي سيرة لابي او لاي حدا تاني ،رح تشوفي شي ما رح يعجبك
جوري:اذا ابوكي عرف ما بالضرورة انا قلو ،بجوز تامر يقلو
نتالي:لا تامر ما رح يقلو ،لهيك اذا حدا تاني عرف انت السبب و رح تندمي كتير
بعد ما هددت و مشيت خطوتين لقدام ،ردت رجعت
نتالي:انت شو عم تعملي هون ؟هادا الحصان الي
جوري:اي الك بس انت ما مهتمة فيه ابدا و انا قلت بدير بالي عليه لبين ما تفضيلو
نتالي :ما دخلك ،التهي بامورك الشخصية و بعدي عن اغراضي
جوري:هههههه تامر و حسام و الحصان هدول اغراضك !!
تركتا معصبة و ركضت و هي لحقتني و عم تصرخ و تقلي وقفي و انا عم اركض و اضحك ، دخلنا على البيت و نحن عم نركض و انا طلعت فورا على غرفتي و قفلتا
مر اسبوع على حالة هدوء نسبي بيني و بين نتالي ، كنت بهالاسبوع اقضي وقتي مع قصي او يزن واحيانا كانت تجي ساندي تزورني و احيانا فوت لمكتب عمي ابو يزن ،لندردش شوي و اسالو اذا صار شي جديد بقصتي او حدا سال عني بشي مشفى و كنت احكيلو عن قصي و بانو بدو حدا يستوعبو و يسايرو ،و كان العم ابو يزن يسمعني كتير و يسايرني ز حتى مرة قلي انت صار الك معزة بقلبي ،بس كان خلال هالاسبوع ملازمني وجع راس و صور كتيرة و ذكريات بس مشوشة ،تذكرت انو كنت حاملة شنتاية سفر و ودعت اهلي و تذكرت حالي قاعدة بقطار و صور كتير ما قدرت فسرا و افهما ،لليوم يلي رجع ظهر فيه تامر يلي غاب عن االفيلا اسبوع و على ما يبدو كان على مشاكل مع نتالي ،بس هالمرة رجع تامر و ما حكى نتالي ابدا و كان عم يتجاهلا ،كنت بالحديقة عم العب مع ماكس وقت دخل بسيارتو صفا و نزل و اجا لعندي
تامر:شايفك صرتو رفقات انت و ماكس ؟
جوري:اي كتير لذيذ ، يلي بشوفو كيف كان عم يركض وراي باول يوم الي بهالبيت ما بصدق انو هيدا هو نفسو ،صار اول ما يشوفني بيركض علي ،اخد وجه علي كتير
تامر:اييه واضح ،وين القوم؟
جوري:اذا قصدك نتالي هي فوق بدا تروح على الجامعة و يزن بالجامعة و قصي نايم
تامر:قصي هون ؟
جوري:اي اجا من اسبوع
تامر:ولله كيف هيك ؟و الو قاعد اسبوع هون ،ما بالعادة
جوري:وطي صوتك هلا بيسمعك و بيقوم بطرقنا شي موال ما بيخلص للمسا هههههه
تامر:هههههه
جوري:ها….ليكو فاق
طلع قصي على البرندا و كان اول ما فايق و سلم علينا بايدو من بعيد
قصي:صباحك سكر سيدتي
جوري:صباحك كاري
قصي:ابن العم كيفك ؟
تامر:مشتالك عاش مين شافك
قصي:نازل
نحن و واقفين ،طلعت نتالي من البيت و رايحة على الجامعة ،بس رجعت دققت بنظرا و شافت تامر واقف معي ،اجت لعنا فورا
نتالي:هاي انت هون
تامر:اي هون شوفي ماكس اديش اخد وجه على جوري
نتالي:شي طبيعي يعني ، الاتنين من نفس الفصيلة
جوري:……..
تامر:عيب هالحكي
نتالي:مشي معي ،بدي احكي معك
تامر:ما رايح لمحل ،بقيان هون
نتالي:طيب،راجعة
طلعت نتالي على البيت و نزلت بعدشوي وكانت مغيرة تيابا و بعد شوي نزل قصي
قصي:الله شو هالجمعة الحلوة ،بما انو مجتمعين تعو نقضي النهار سوا ،نعمل حفلة باربكيو على المسبح طبعا برعاية الفنان الصاعد قصي
جوري:انا ما عندي مانع
قصي:معناها انتشرو لنزبط القعدة ،نتالي اعطيه لتامر تياب من عندي يغير تيابو حتى ما يتوسخو و انت جوري روحي عند ام رضا و قليلا تحضرلنا اغراض الشوي ………..يتبع