قصه جبروت رجل
قصه جبروت رجل
رجل اصبح بوصلة حياتها إن هبت ريحه بأي اتجاه رفعت كفيها للسماء واقامت صلاتها للاله ، رجل تملكها و استحوذها و سد مسام جلدها ، قابع لا يتزحزح في فوضى حياتها المبعثرة يحجب عنها السماء والشمس و حتى الهواء ،يفقدها التوازن على الأرض و يلقي بها في الظلام …فعندما يتزاوج جبروت الرجل مع السلطة والنفوذ يعيش نشوة جلد العبيد تحت جبروته و أول من تدفع الثمن أنثاه فيخطف أنفاسها ويحاصر اوجاعها بنشوة ضحكاته ولا تملك غير الصمت فترقص على نهدات دموعها وأنات ألمها الى أن تموت فتلتقط النفس الأخير لتخرج لبوة
ام حمادة:يا هناء افتحي الباب
هناء:يلا …مييييين؟
….افتحو شرطة ……
هناء:شرطة!!!
فتحت الباب و انا مستغربة
رجال الشرطة:هيدا بيت ام حمادة..
هناء:اي …خير
رجال الشرطة: انت بنتا؟
هناء:ايه
رجال الشرطة:وينا امك ؟
هناء:امي ..جوا
التفت الرجال يلي كان عم يحكيني لباقي الرجال يلي كانو معن و قلن فوتو فتشوا البيت ،و انت ناديلنا امك ،و قبل ما فوت اجت امي
ام حمادة:خير اخي شوفي …شو القصة …ليش عم تفتشو البيت ….على شو عم دورو؟
رجال الشرطة:بدك تروحي معنا على المركز انت متهمة بسرقة فيلا ابو رائد
ام حمادة:سرقة..انا بشتغل بالبيت و بنظفو و من 3ايام تركت الشغل عندن
رجعو الرجال يلي كانو عم يفتشو و قلولو سيدي ما لقينا شي ، قلن خدوها و طالعوها بالسيارة ،مسكو امي كل واحد من جهة و اخدوها و هي عم تصرخ و تقلن انا ما سرقت شي ،ركضت وراها متل المجنونة و انا عم صرخ و قلن اتركوها لامي ،امي ما سراقة ،جيت لاطلع معن بالسيارة ما خلوني و قالولي الحقينا بتكسي ، طلعت وراهن بتكسي على المركز وراهن ،نزلوها لامي من السيارة و فوتوها و انا ماشية وراها
رجال الشرطة:خدوها على غرفة الضابط ماهر
فوتوها على غرفة الضابط ماهر يلي ما كان موجود و انا فتت معا ،و بعدا اجا الضابط ماهر يلي كان شاب بعمر الثلاتينات طويل كتير و ضخم ،عيونو سود كبار و شعرو اسود و لون بشرتو حنطية ،كانت ملامح وجهو قاسية كتير ،اول ما فات اطلع فيني نظرة سريعة و لف و قعد ورا مكتبو
ماهر:انت المدعوة ام حمادة
ام حمادة:اي
ماهر:و انت مين؟
هناء:انا بنتا
ماهر:شو اسمك؟
هناء:اسمي هناء
ماهر:ايه يا ام حمادة ،اليوم الصبح اجا السيد ابو رائد و قال انك سرقتيلو تحف من الفيلا تعيتو
ام حمادة :ولله كذاب انا شقفة خدامة و على باب الله شو بدخلني بهيك قصص بس هو لانو حاول….
ماهر:ايه حاول شو…
ام حمادة:حاول يعتدي علي و انا صديتو و تركت الشغل عندو قام افترى علي و طلع علي هالحكي
هناء: العمى بقلبو هالواطي ..امي ليش سكتي و خبيتي علينا ؟
اطلع فيني الضابط ماهر و اشرلي باصبعتو على تمو هس و قلي انا عم احكي
ماهر:وليش ما جيتي قدمتي بلاغ عليه بانو حاول يعتدي عليكي؟
ام حمادة:ولله يا ابني انا ما تعيت هيك قصص شرطة و مخافر و بلاغات …انا ام يتامة و كل همي طعمي اولادي و ماني قدو لابو رائد و غيرو
ماهر:امم طيب رح تنامي عنا اليوم و تبقي على ذمة التحقيق لتنعرف الحقيقة
هناء:بدكن تنيمو امي بالمخفر؟
ماهر:اي طبعا هاي اجراءات روتينية ،انت ارجعي على البيت
هناء:لا ما بدي ارجع
ام حمادة:معلش امي ارجعي بتكون اختك سمر انشغل بالا علينا
هناء:امي بس ما معقول اتركك لحالك هون
ام حمادة:معلش امي بكرا بتبان الحقيقة
ماهر:خدوها و حطوها تحت بالنظارة
مسكوها لامي كل واحد من جهة و اخدوها ، جيت لاطلع وراها
ماهر:خليكي انت هون شوي ؟
هناء:انا
ماهر:ايه في غيرك ليش بالغرفة
هناء:طيب
ماهر:شو عمرك انت ؟
هناء:انا 19سنة …اديش بدا تبقى امي عنكن؟
ماهر:ما بعرف لتبين الحقيقة
هناء:اي و ايمت بتبين الحقيقة معكن ..هيدا ابو رائد رجال وسخ و هو يلي لازم تاخدوه محل امي
ماهر:القصة ما بهالسهولة يلي انت مفكرتيا بدنا دلائل و اثباتات و هيك شي اي حدا فيه يشتري
هناء:ما فهمت ..يعني انا بدي ادفع حتى تطلع امي ..من وين بدي ادفع ….الله يخليكي ساعدها ولله امي ما الها ذنب و يلي فيها بكفيها
ماهر:امم واضح هالشي ،رح ساعدا و اعمل يلي بقدر عليه بس خلص ما تبكي ،(اعطاني محرمة )..تفضلي …بتدرسي شي انت ؟
هناء :ايه سجلت من يومين بالجامعة تربية معلم صف
ماهر:اممم يعني لسا ما بلشتي دوام ؟
هناء:لا لسا
ماهر:ابوكي ميت ؟
هناء:اي
ماهر:و ما عندك اخوة شباب ؟
هناء:عندي اخ واحد بس
ماهر:شو عمرو؟
هناء:صغير عمرو 9سنين و عندو متلازمة داون
ماهر:امممم معناها ما الكن سند ابدا و بهالحالة امك بتعصى هون
هناء:لا ما عنا الله يخليك اعتبرا امك ..اختك ..انت بتعرف انها بريئة
ماهر :اكيد رح ساعدا كرمال خاطر عيونك الحلوين ….صارت الساعة 2خلص دوامي مشي وصلك بطريقي على بيتكن
هناء:لا ما في داعي برجع لحالي
ماهر:لا ما حلوة مني اتركك تروحي لحالك و قلتلك خلص انا رح ساعدا لامك و طلعلك اياها من بكرا الصبح
هناء:عنجد
ماهر:اي جد قومي يلا
طلعت انا و الضابط ماهر بسيارتو و وصلني على البيت و طول الطريق كان يطلع فيني ،و نحن على الطريق صف سيارتو و نزل جاب اتنين قهوة
هناء:يسلمو ما كان في داعي ..
ماهر:طيبة القهوة بهالجو البارد …بردانة شي؟
هناء :لا ممكن نمشي لانو اختي سمر و اخي حمادة بكونو رجعو على البيت
ماهر:اي ماشي اختك سمر شو عمرا؟
هناء:اكبر مني بسنتين
ماهر:بتشبهك شي؟
هناء:لا سمر سمراء و شعرا اسود لابوا
ماهر:و انت شقرا لامك
هناء:اي …وصلنا يعطيك العافية
ماهر:هيدا بيتكن
هناء:اي سيد ماهر ما تنسى الكلام يلي قلتلي اياه بخصوص امي ،نحن ما عنا غيرا بهالدنيا ولله منضيع بدونها
ماهر:ولا يهمك ما نسيان اكيد و انا بكرا براسي بجيبا لبيتا
هناء:لا ما بدي عذبك انا بطلع لعندا
ماهر:لا خليكي انت بالبيت ما برضى صبية متلك حلوة تفوت هيك محلات
هناء:شكرا كلك ذوق
الجزء التاني:
فتت على بيتي و شفت اختي سمر قاعدة و عم تبكي ،حكتلها شو صار معنا و ضبينا البيت و بقينا طول النهار على اعصابنا و ندعي لامي و تاني يوم اجا الضابط ماهر و معو امي و فات عنا شرب قهوة و شكرناه كتير لانو هو يلي طلع امي من هالقصة بسرعة و وقت سالتو كيف ،قلي هيدا شغلنا ،بعد ما طلع ماهر من عنا
سمر : هيدا ماهر حاطط عينو عليكي لهيك ساعد امك
هناء(مبتسمة ):لا ولو الشاب كويس و حس انو امك مظلومة
سمر: بكرا بتشوفي ،انا ما بحكي كلام من فراغ ،كان مبين عليه كيف عم ياكلك بعيونو ما قام عينو عنك ولا دقيقة حتى امك انتبهت
هناء:عنجد
بعد يومين اندق باب بيتنا و فتحت اختي سمر الباب و فاتت لعنا
سمر:امي في مرة و بنت واقفين على الباب كتير اكابر و مرتبين
ام حمادة:مين هدول …بعدي هيك لنشوف …ليكونو ….هناء فوتي ترتبي فورا
هناء:ليش امي؟
ام حمادة: فوتي اعملي متل ما قلتلك الله لا يكذبني و يطلعو الناس يلي براسي
طلعت امي تستقبلن و انا فتت غير تيابي
هيا:انا اختو لماهر و هيدي امي ام ماهر
ام حمادة:اهلا و سهلا شرفتونا زارتنا البركة ولله الله يخليلك اياه و يحميلك اياه ولله لولاه ما كنت شفت الضو لهلأ
ام ماهر:تسلمي يارب و يخليلك اولادك ايه يا ام حمادة انا ابني ماهر حكالي عنكن و مدح فيكن و نحن جينا اليوم لنطلب ايد بنتك هناء لابنا ماهر ،وينا هناء؟
ام حمادة : ايه اهلا و سهلا منتشرف ولله…سمر قومي نادي لاختك
هناء:مرحبا
ام ماهر: اهلين حبيبتي تبارك الخالق مشالله عليكي اية من الجمال ابني مذوق و عرف يختار
ام حمادة:تسلمي يا رب
قعدت جنب امي و بقيت امو لماهر تطلع فيني و تتغزل فيني
ام ماهر:متل اللعبة يخزي العين
و بلشت تسالني عن عمري و دراستي ،و نحن قاعدين اجا اخي حمادة من الحارة هو و عم يبكي لانو اولاد الحارة ضاربينو ،اول ما شافتو ام ماهر تغيرت ملامحها و شربت قهوتا فورا و راحت
سمر:شفتو كيف تغيرت ملامحها وقت شافت حمادة
ام حمادة:اي انتبهت ..عادي امي ما تزعلي اذا راحو و ما رجعو بكون ما الك نصيب و الله مخبيلك الاحسن
سمر:ههههه تعودنا هاي عاشر عريس بيجي و بس يشوفو اخوي بروحو ما بقا برجعو و كانو ما خلقة الله
هناء:ما كتير فارقة معي المهم انو ساعدنا و طلعتي من السجن
انا كنت مقهورة من جوا من تصرف ام ماهر بس ما حاولت فرجي حدا هالشي و خاصة انو ماهر عجبني ،و امي شافتو فرصة لا تعوض و شب ما بحلم فيه بهالفقر يلي عايشينو ،بس بعد يومين رجعت ام ماهر هي و بنتا و رجعو طلبوني مرة تانية و استعجلونا بالرد بس كانت ام ماهر متل يلي جاي و مغصوب على امرها ،و وقت سالتا امي عن ابوه لماهر قلتلا ميت من زمان ،اجا ماهر بالزيارة التانية و لبسنا محابس الخطبة و بعدين بقينا 4شهور مخطوبين و بعدا كتبنا كتابنا عند الشيخ و بالمحكمة و حددنا العرس بعد عشرة ايام ،كان ماهر خلال فترة الخطبة انسان منيح بس ما كان في احتكاك بينا و بين اهلو كتير شبه معدوم ،بس انا كنت حبو رغم انو كان جدي معي زيادة عن اللزوم و نادرا جدا ليضحك على شي و قبل العرس ب 5ايام دقلي على موبايلي يلي اشترالي اياه بعد الخطبة
ماهر:كيف التحضيرات تمام ؟
هناء:اي تمام
ماهر:هناء اسمعي شو بدي قلك ، اخوكي ما رح يحضر عرسنا اوك
هناء:ليش بتخجل منو يعني بس هيدا بضل اخي و انا ما بخجل فيه
ماهر:بدو يخرب العرس و يصيرو الناس يتركو العرس و يطلعو عليه و هيدا غير الحكي يلي بدن يحكي علينا
هناء:حمادة اخي الوحيد و انا ما شايفة فيه شي غلط هاي خلقة ربي و لا اعتراض عليها و اذا كل هالقد خجلان منو ليش من الاساس بعتت اهلك و انت بتعرف من الاول عندي هيك اخ ؟
ماهر:شبك شبك انا ما عم ناقشك انا عم قلك بس يعني كلامي بدو يتنفذ اذا عجبك او ما عجبك
هناء:انا ما بينأمر علي ماهر و اذا بدك منلغي الزيجة كلها و العرس كلو
ماهر: لانو على كيفك الشغلة ،طب اسمعي وليه امك كمان ما في تحضر العرس
هناء:نعم نعم شو حكيت؟ شو هاي وليه و شو امي ما تحضر العرس؟انت عارف حالك شو عم تحكي؟
ماهر:اي عارف امك بتشتغل خدامة بالبيوت و يمكن كل معازيمنا تعرفا لانو يمكن تكون مشتغلة عندن من قبل ،بدك الناس تحكي عن النسب يلي مناسبينو و يقولو الضابط ماهر اخد بنت لفاية
هناء:…….
الجزء التالت:
ماهر:شبك سكتي …..ليش عم تبكي ….ما حكيت شي غلط او ما مزبوط
هناء:ماهر امي و اخوي و اختي رقم واحد بحياتي و ما بحب حدا يجيب سيرتن بالعاطل و ما برضى حدا يهتني فين او يهتني بنسبي …انا ما بقا بدي كمل بهالجازة كل واحد يروح بطريقو
ماهر:انت نسيانة انك مرتي و انا فيني ادفش باب بيتكن و اخدك ايمت ما بدي ،انت نسيانة مين طلع امك من الحبس و رجعلكن اياها تاني يوم ،لولاي كانت امك بعدا عم تخ بالحبوس
هناء:ليش هيك عم تحكي معي بهالطريقة ،انا بعدني خطيبتك و بعدنا على البر ، انا ما بنكر انك ساعدتنا بس هالشي ما بخليك تستملكني و تسلخني من عيلتي و من نسبي ،هاي انا و هاي امي يلي فنت جسما و حياتا كرمال تكبرنا و هاي اخي يلي شو ما كان مشكلتو و اعاقتو انا بحبو و بعترف فيه ..انا ما بناسبني اخد واحد بفكر بهالطريقة الدونية و فكرتك غير هيك انا مصدوم فيك
ماهر:امممم …دونية ….و مصدومة طيب سكري هلأ
سكر الخط بوجهي قبل ما رد عليه بشي و انا قعدت ابكي من كلامو يلي قلي اياه و انصدمت انو يطلع منو ،فاتت علي اختي سمر و شافتني عم ابكي و حكتلها كل شي
سمر:العمى بقلبو فكرناه بيختلف عن الباقي و انسان محترم طلع واحد بالمرة ،خلص قليلو الله معك ،و ما تنقهري و لا تزعلي و منيح يلي انكشف على حقيقتو قبل ما تتورطي بهالجازة
انا و عم احكي مع سمر و نبه عليها ما تجيب سيرة لاما بالحكي يلي قالو ماهر حتى ما تتحسس و تنهم مشاني،اندق باب بيتنا و اجا الصوت افتحو شرطة ،طلعنا ركض انا و سمر فتحت الباب
رجال الشرطة:وينا ام حمادة
هناء:شو بدكن منا لامي ،جيتو هديك المرة و اخدتوها بتهمة السرقة و طلعت بريئة و هالمرة ليش جاين
رجال الشرطة:بعدي هيك من وجهنا ملف امك لسا ما تسكر على الاخير
طلعت امي من الحمام و مخطوف لونا و لابسة الروب عليها ،قلولها مشي معنا، قلتلن بس لالبس تيابي ،فاتت لبست و هي طالعة قلتلي حكي ماهر قليلو يلي صار ،ابن الحرام ابو رائد رجع جدد الشكوى علي ،رجعت دقتلو لماهر كتير و عاشر مكالمة لحتى رد علي و قلتلو انا و عم ابكي انو رجعت الشرطة اخدت امي
ماهر :ايه و انا شو دخلني؟من شوي قلتيلي انا ما بناسبك و تفكيري دوني
هناء:ماهر قيم مشاكلنا على جنب الله يخليك و طلع امي
ماهر:ايه ؟و شو المقابل
هناء:ماهر شبك هاي حماتك
ماهر:من الاخر بتمشي العرس بلاها و بلا اخوكي بطلعها ما بتمشيه رح ارفع ملفها للمحكمة و ثبت كمان التهمة عليها و بتقعدلا سنتين بالسجن و يمكن اكترر و انتو بتنزتو بالشارع …
هناء:انت ..
ماهر:امم كملي انا شو ؟كملي و شوفي شو بدو يصير
هناء:ماشي …برجع بحكيك بعد شوي
سكرت الخط معو و حكتلا لسمر كل شي قلي اياه
سمر:انا حاسسني قلبي هو يلي بعت الشرطة و رجع فتح ملف امك
هناء:لا سمر مستحيل ما بيعملا ، شو بدنا نعمل هلأ ؟ما بقا عقلي جمد ،حاسة حالي مخنوقة
سمر:ما بعرف ما بعرف حسبي الله فيه بس امك لازم تطلع ،انت شايفة وضعنا
هناء:شو يعني ؟بدك اياني ارضى بهيك واحد واطي و اعمل عرس بدون امك و اخوكي
سمر:……
هناء:شبك سكتي …ردي
سمر: ما بعرف ولله يا هناء ولله ما بعرف،خلينا نروح عند امك هلا و نحكيلا و هي بتقلنا شو نتصرف معو
رحنا انا و سمر على مركز الشرطة و تركنا اخي عند جارتنا و وقفنا برا غرفتو
هناء:فوتي انت و قليلو بدك تشوفي امك ،انا مابدي فوت و شوفو قرفانة منو
سمر:طيب خليكي هون
فاتت سمر شي ربع ساعة و بعدين طلعت
سمر:تعي …فوتي
اشرتلا براسي و كتفي بانو ما بدي فوت لعندو ، و انا عم قلا ما بدي ،اجا من وراها لسمر ،انا طلعت فيه و درت وجهي فورا
ماهر:فوتي ،ما بدك تشوفي امك ؟
فتت لجوا و هو طلع و حكى شاب ليروح يجيب امي و ما رجع فات ،و بعد شوي اجت امي و قعدت معا حكتلا كل شي ،تفاجأت بشخصية ماهر و انو طلع انسان حقير
ام حمادة:لا ما لانو انا ما رح احضر عرسك بس لانو ما بدي اعطيكي هيك رجال ،هيدا شو ممكن يعمل فيكي لقدام هادا ما عندو ضمير و اخلاق
سمر:شو تتصرف هناء يعني ؟شو تقلو؟
ام حمادة:تقلو لا و خليه يرفع الملف للمحكمة ،انا شقيت و تعبت لشفتكن صبايا و لعلمكن و افرح فيكن ما بالاخير اعطي وحدة فيكن لهيك واحد
سمر:بس امي هيدا باينتو ابن حرام كبير و واصل نحن خايفين عليكي
ام حمادة:شو يعني نزتا لاختك هيك زتة بكفي استعجلنا بكتب الكتاب
هناء: امي معك حق بس انا خايفة ما يرضى يطلقني و نحن ما تعون محاكم و خايفة عليكي ما نقدر نثبت براءتك
ام حمادة:ما تخافو علي ديرو بالكن على حالكن و على اخوكن و في شوية مصاري كنت قايمتن لزنقة و هاي هلا انزنقنا ،و المحكمة بتوكلي محامي دفاع
و نحن عم نحكي مع امي ،دخل شرطي و اخدا و نزلها على النظارة ،و نحن طالعين من غرفة ماهر ،اجا و سحبني من ايدي فوتني و قلها لسمر تنطرني برا
هناء: ماهر اذا بتحب ارفع الملف للمحكمة
ماهر:ولله هلا ما بقا فارقة معك امك
هناء:امي بريئة و رح نحطلا محامي و هو يلي رح يثبت براءتها و لا من نيتك علينا
شلحت المحبس و حطتلو اياه على المكتب و قمت وقف لاطلع من عندو ،لف من ورا مكتبو و مسكني و لزقني بالحيط و هو حاطط ايديه الاتنين على رقبتي و انا عم حاول صرخ و بعدن عني
الجزء الرابع:
ماهر: هسسس ولا كلمة انت ما بتعرفيني لسا منيح لهيك رح سامحك هالمرة و ما بتعرفي انا شو ممكن اعمل انا بقدر لفقلا لامك تهمات كتيرة دعارة سرقة مخدرات هدول الشغلات كلن بينشرو و ارخص منن ما في بس انا بعدني ماسك اعصابي و بقول ما حلوة لانو اما لمرتي
هناء:اننناااا….لسسااا مااا..صررت ….مرتك
ماهر:انت بالشرع و القانون مرتي مع وقف التنفيذ بس هالشي ما بيمنع انك تسمعي كلامي و تمشي من تحت طوعي
هناء:بعد عني انا مستحيل ضل على ذمتك لانك واحد بلا اخلاق
ماهر:لسا ما فرجيتك شي من قلة اخلاقي ،معك يومين بس فكري فين و رديلي خبر يا بتمشي العرس و منثبت الحجز يا ودعوا لامكن لاجل غير مسمى
اندق باب الغرفة ،بعد عني ،و قال تفضل ،فاتت سمر و قلتلي يلا نمشي تاخرنا على حمادة ،طلعنا من عندو و اول ما طلعنا من المخفر ،صرت ابكي
هناء:شو علقنا بهيك عالم يا ربي ما عندا رحمة و ضمير ولله يلي فينا بكفينا
سمر:طولي بالك كل شي الو حل
رجعت على البيت و شربت حب وجع راس و نمت انا و عم ابكي و فقت انا و عم ابكي و دقيتلو لماهر و قلتلو اني موافقة ثبت الحجز و طلع امي فورا ،رجعت امي على البيت و اول ما اجت فاتت لعندي و شافتني نايمة ،فيقتني متل المجنونة
ام حمادة:شو قلتيلو ؟
هناء:لحمدلله على سلامتك
ام حمادة:شو قلتيلو عم قلك
هناء:قلتلو موافقة موافقة
ضربتني كف
ام حمادة:غبية انت وحدة غبية ليش هيك عملتي؟
هناء:لا ما غبية انا اذا رحت ما حدا رح يتأثر بوجودي بس انت عامود و اساس هالبيت و حمادة بحاجتك و سمر بحاجتك ،بعدين انا رايحة اتزوج ما رايحة موت و خلص انا وافقت انا و مبسوطة و رح اتحمل مسؤولية قراري
ام حمادة:بدك تاخدي هيك واحد ،هاتي موبايلك لشوف بدي حكيه
هناء: لا ما رح اعطيك اياه بدك تعلقي معو و تعصبيه و اذا عصب بخاف يعمل شي يضرنا اكتر خلص قلتلك انا قبلانة و بكرا بيتغير بعد الزواج
طلعت امي من غرفتي هي و عم تبكي و اجت سمر هدتها و صارت تقنعا بانو القرار يلي اخدتو لصالح الكل ،حسيت حالي متل القربان يلي بيتقدم ليكفر عن ذنوب قوم باكملو ،رجعت شربت دوا وجع راس و نمت و ما فقت الا على صوت موبايلي عم يرن
هناء:ايه
ماهر:انا ثبتت الحجز و حجزتلك عند الكوفيرة انت و سمر بس انزلي اختاري الفستان الابيض و خلي اختك سمر كمان تشتري الها فستان
هناء:ما رح نختار شي خلي امك او اختك هيا يختاروا عنا و يبعتون للكوفيرة و نحن هنيك منلبسن
ماهر:كيف يعني ؟ما بدك تشوفيا عليكي و تعرفي مقاسك
هناء:هلا بدقلا لهيا و بقلا مقاساتنا ما تاكل هم هيك تفاصيل و انا جاهزة على الاخر ايمت ما بدك بروح بعلق جهازي
ماهر:هناء انا بدي اياكي تكوني مبسوطة ،انا …انا بس عصب ما بقدر اتحكم بتصرفاتي و انت استفزيتيني كتير و ما تركتيلي قدامي الا هالخيار و بدي تعرفي انو هالشي عملتو كرمالي و كرمالك و كرمال اولادنا لقدام حتى ما حدا يعايرن بانو عندن خال منغولي و ستن خدامة….
هناء:خلص خلص ما في داعي لتبرر ..معك حق معك حق
اجا يوم العرس و طلعت انا و سمر من البيت لنروح عند الكوافيرة ،بس قبل ما اطلع ودعتا لامي يلي ما نشفت دمعتا من وقت ما عرفت بموافقتي و بست ايدها و قلتلا ضلي ارضي علي انا ما عملت هالشي الا كرمالك انت تعبتي مشانا كتير و ما في مشكلة اذا وحدة فينا ضحت كرمالك ،و تركتا و طلعت هي و عم تبكي و انا عم ابكي ،طلعنا بالسيارة يلي كان باعتلنا اياها ماهر لتاخدنا عند الكوفيرة ،و بقينا بحدود الاربع ساعات عند الكوفيرة،كنت ابكي فين كل شوي و اختي سمر تحاول تهديني
سمر : خلص بقا بدك تروحي على الصالة عيونك منفخين كانك رايحة على مأتم
هناء:اليوم انا متت اقراو الفاتحة على روحي رايحة برجلي على القبر
سمر:لا ما لهدرجة ،بكرا سايري زوجك و بيمشي متل ما بدك ،قومي يلا البسي الفستان الابيض
هناء:قصدك البس كفني …سمر …بدي اطلب منك طلب
سمر :اطلبي لنشوف عروس و بحقلك تتدللي الليلة ليلتك شو بدك
قربت على دانا و قلتلا طلبي
سمر:لااا صعب
هناء:لا ما صعب هادا اخر طلب بطلبو منك امانة برقبتك بحياة غلاتي عندك ما حدا رح يعرف
سمر: …….طيب
هناء :قوام بسرعة ما طولي
لبست فستاني و خلصت ، دقلي ماهر و قلتلو لسا ما خلصت بدي شوي انا بدقلك بس خلص ،قعدت عم هز رجلي و ناطرة على اعصابي ،بعد نص ساعة اجت و قلتلي اطلعي يلا هي برا
ام حمادة:بتجنننني طالعة ملكة
لفينا بعض و صرنا نبكي
ام حمادة :الله يسعدك الله يسعدك
سمر: ما تبكي هناء هلا بيخرب مكياجك
هناء:الله لا يوفقو و لا يسامحو الله ينتقم منو
سمر:موبايلك عم يرن هادا ماهر
هناء:ردي عليه و قليلو نحن خالصن يجي ياخدنا
ودعت امي و طلعت قبلي من عند الكوفيرة و انا لبست علي المشلح و زبطت مكياجي وعلملي و طلعت ،وقت طلعت شفت امي واقفة مع ماهر
الجزء الخامس:
هناء:سمر اسرعي خلينا نشوف شو القصة
مشينا بسرعة و سمر مشيت وراي و رفعتلي فستاني من ورا حتى ما يتوسخ ،وقت وصلت اطلع علي ماهر و ابتسم و فتحلي باب السيارة و قلي اطلعي
هناء:امي ليش ما رحتي ؟
اطلعت امي بماهر و قلتلو حسبي الله بس ،الله على القوي و تابعت طريقا و انا بقيت واقفة بالشارع ما عارفة شو اعمل اركض ورا امي ولا اطلع بالسيارة ،كانو خيارين و طريقين و الاتنين مفروشين بالشوك و الجمر
ماهر:يلا اطلعي رح نتأخر
سمر:يلا اطلعي هناء
هناء:(ما بدي اطلع بدي اركض ورا امي ما بدي اطلع )هاي الجملة يلي كان نفسي قولا بصوت عالي بس بلعتا و قربت على ماهر و قلتلو خليا تجي ساعة وحدة بس ما بطول بتقعد باخر الصالة هاي اول فرحة الها حرام عليك ما تكون قاسي لهل درجة بوطي على رجليك و ببوسن يعني حتى تقبل
ماهر:طيب اطلعي لنلحقا و نجيبا
طلعنا بالسيارة و لحقناها و نزلت سمر تقلها اطلعي بس امي ما قبلت و تابعت طريقا ،رجعت طلعت سمر بالسيارة و قلتلو ماهر امشي ما قبلت و معا حق ما تقبل ،و انا طلعت بماهر بقرف و تابعنا على الصالة و طول فترة العرس و انا قاعدة مكشرة و كانت تجي حماتي عندي تقلي افرديها ما حلوة قدام الناس ،ما صدقت ايمت خلص العرس و رحت على بيتي يلي كان فوق بيت حمايي ،اول ما فتت غيرت الفستان و فتت على الحمام تكورت بارض البانيو و بلشت ابكي لاجا ماهر و دق على الباب
ماهر:شو صار معك هناء الك ساعة جوا شو عم تعملي ؟….هناء …هناء
هناء:اي سامعتك …يلا طالعة
ماهر:ما طولي
رجعت ابكي و فرغ كل الحزن يلي جواتي و بعد شوي طلعت من الحمام و فتت على غرفتي و قفلت الباب ،كنت متل الوحدة يلي ضاعت بغابة و خايفة باي لحظة يطلعلا حيوان مفترس و ياكلا و انا كنت خايفة من ماهر و فكرة انو يقرب علي او يلمسني كانت فكرة بتثير اشمئزازي ،بعد شوي اجا ليفوت على الغرفة و لقى الباب مقفل
ماهر:مقفلتيه؟هناء افتحي الباب
هناء:ما بدي افتحو و اوعى تفكر انو اذا انا وافقت اتزوجك معناتا خلص صرنا متل اي اتنين متزوجين ،انت بحالك و انا بحالي
ماهر:اممم طيب رح قلك للمرة الاخيرة افتحي الباب مع انو انا كلامي ما بينعاد مرتين
هناء:قلتلك ما رح افتحو
ماهر:طيب ما تفتحيه انا رح افتحو بس ولله لتندمي انت وحدة بدك ترويض
راح من ورا الباب و انا ارتحت بس بعد شوي رجع و طلع صوت خرطشة مسدس ،انا حسيت وقف الدم بعروقي معقول يقتلني بس لانو ما فتحتلو الباب
ماهر:بعدي من ورا الباب اذا واقفة وراه
هناء:شو بدك تعمل ؟
ماهر:بعدي عم قلك الا اذا حابة تموتي الليلة
هناء:بدك تفتح الباب بالمسدس ،هيك كل الامور عندك بتحلا بالسلاح و القوة
ماهر:اي شطورة هاي عرفتيا لحالك
هناء:خلص رح افتحو ما خوفا من سلاحك بس ما حلوة الناس تسمع صوت رصاص من عنا باول ليلة
قمت فتحت الباب ،هجم علي و مسكني من شعري
ماهر:بقول المتل اقطع راس القط من اول ليلة
هناء:اتركني دخيل الله عم توجعني
ماهر:هون بهالبيت ما في شي بينعمل الا من تحت امري و اذني ،اذا بدك تسكري الباب بتاخدي اذني و اذا بدك حتى تفوتي تتحممي كمان بتاخدي اذني و شو بدك تاكلي و ايمت بدك تنامي كمان هدول باذني
هناء:لانو انا عبدة عندك
ماهر:اي عبدة
هناء: انا بكرهك بكرهك
و وقت قلتلو كلمة بكرهك حط المسدس براسي
ماهر:عيدي شو حكيتي ؟
هناء(تبكي):……
للحظة حسيت انو ما فارقة معي اذا قتلني و متت لانو بعرف انو يلي ناطرني معو اصعب بكتير
هناء:انا بككررهك ما بحبك ما بطيقك بقرف منك ما بدي اياك
بعد ما حكيت كلامي ندمت و حسيت حالي استعجلت على اخرتي ،غمضت عيوني حتى ما شوف وجهو بعد ما تحديتو و قلتلو هالحكي ،بعد المسدس عن راسي
ماهر:انت قضيتي على حالك
حكى هالجملة و طلع فورا من الغرفة و رجع بعد شوي معو حبال ،رجعت لورا و قعدت بزاوية الغ انا و خايفة
هناء:شو بدك تعمل فيني؟
ماهر :…..
قرب علي و ربطلي ايدي انا و عم حاول ادفشو و برجلي و اسحب ايدي و بعدين ربطلي رجلي و حطلي شقفة على تمي حتى ما يطلع صوتي وبعدين اندق الباب علينا ،حملني و زتني على التخت و راح ليفتح الباب ،سمعت صوت اختو هيا
هيا: شوفي شو هالاصوات يلي عم تطلع من عنكن ؟
ماهر:و انت شو دخلك ؟ تعي قلك كمان شو عم اعمل انا و مرتي
هيا :مااا قصدي بس سمعنا صوت هناء عم تصرخ و تبكي قلت ل…
ماهر:انقبري انزلي لتحت و يبقى خلي امك تفهمك هيك شغلات
نزلت هيا فورا ،و سمعت صوت طبقة الباب و صوت دعساتو راجع للغرفة ،كان قلبي عم يدق بسرعة و خايفة من عصبيتوو و شو ممكن يعمل فيني
ماهر:انبسطي هاي اهلي سمعو صوتك بس انا هلا رح خليكي تكرهيني على المزبوط ،نشلتك من الفقر و جبتك من حارة الشحادين و سكنتك بهالبيت يلي بعمرك ما بتحلمي فيه و عملتلك عرسك بارقى صالة بالبلد و عند اغلى كوفيرة و لبستك دهب بحياتك ما بتحلمي فيه و حملتك موبايل ما في وحدة بعمرك بتحملو ،وحدة تانية بتركع على رجلي و وبتبوسن بس انت ما بيلبقلك العز
الجزء السادس:
كان عم يحكي معي و يذلني بكل شي قدملي اياه و كانو مفكر هالشي هو السعادة بالنسبة الي ،سحبني من رجلي و جاب شحاطة الحمام البلاستيك و رفعني فلقة ،كان عم يمارس علي اساليب التعذيب يلي بتبعا مع المسجونين يلي عندو بالسجن ،بس ما كل الاحيان بكون المسجون مذنب احيانا بكون في سجين مظلوم و بريء ،كنت عم ابكي و حاول صرخ بس ما كان يطلع صوتي ،كان الوجع الجسدي على رجلي لا يذكر مقارنة بالوجع النفسي من كلامو ،كان عم يضربني على رجلي و يهتني
ماهر: اذا قمت وحدة متلك من ارضا و تزوجتا هيدا ما معناتا انك تشوفي حالك علي لانو ما بيطلعلك و بقدر جيب عشرة غيرك و بنات كتير بتمنو يكونو محلك بس انا شفقت عليكي و ساعدت امك بس انت على ما يبدو ناكرة جميل و بدل ما تحتاري كيف ترضيني عم تقولي بتكرهيني ،شو بتكرهيني لسا؟
اطلع فيني و هو عم يسالني و ناطر الجواب ،اشرتلو براسي انو ايه بكرهك و تابع ضرب على رجلي اقوى من قبل ،وصلت لمرحلة ما بقا قاوم او حاول اسحب رجلي
ماهر: مكبرة راس علي ،لك انا يلي بكسرلك هالراس وليه …..قال مقفلتلي الباب ….وليه يا بنت اللفاية ازدهار انا وقت بدي اخد شي منك باخدو بكيفي و ايمت ما بدي و ما حدا بيمنعني ،فهمانة ؟
اطلع فيني و اشرتلو براسي 3مرات ورا بعضن انو ايه فهمانة
ماهر:شطورة
ترك رجلي و زت الشحاطة بالارض و طلع من الغرفة ،و تركني مربطة ،تكورت على حالي بالتخت و تابعت بكي و هو رجع مر من الغرفة و هو ماسك كاس و عم يشرب ،وقف شوي و تابع لغرفة القعدة ،و انا تابعت بكا لنعست و غفيت و ما رجعت فقت الا وقت حسيت عليه عم يفكلي الحبال ،عملت حالي نايمة ،فك الحبال و تسطح جنبي و بلش يلعبلي بشعراتي ،و انا ما بقا قدرت مثل اكتر من هيك و رجعت ابكي ،لفني بايديه
ماهر:انا ما كان بدي تكون اول ليلة النا هيك بس انت حجتيني لاعمل معك هيك …هناء …هناء
هناء:……
ماهر:اطلعي فيني
هناء:خلص ماهر بعد عني
ماهر:طيب قومي تعشي …بدك تنامي بلا عشا و انا لهلا ما تعشيت
هناء:ما بدي اتعشى معقول بعد كل هالضرب بتقلي قومي اتعشي ما الي نفس
ماهر:ليش انا وجعتلك ؟
هناء:لا ابدا بس رجلي تخدرو و حاسة حالي ما قادرة امشي علين انا ما توقعتك لهل درجة انسان ظالم
ماهر:انا ما ظالم بس عصبي شوي …طب خلص ما تمشي انا بحملك
هناء:لا ما بدي ،بدي نام
ماهر:طيب على راحتك
بعدت عنو و برمت ضهري و نمت و هو قام من جنبي و طلع على البرندا يدخن ،تاني يوم فقت و لقيتو نايم جنبي
ماهر:صباح الخير
هناء:صباح النور
ماهر :قومي يلا بدنا ننزل نفطر عند اهلي
هناء:ما بدي انا رح افطر هون و انت انزل افطر عندن
ماهر:هناء اصطبحي عند هالصبح ..انا لابس و نازل و معك عشر دقايق لتنزلي وراي و الا بطلع انا بنزلك بطريقتي و صرتي تعرفي طريقتي بقا حاج تعانديني
قام من التخت هو و معصب و لبس و نزل و انا بعدو بربع ساعة لحقتو ،و شفت الخدامة عم تحط الفطور على الطاولة ،سلمت على حماتي و بنتا و قعدنا نفطر و قبل ما حط لقمة بتمي ،اطلعت فيه و قلتلو
هناء:معلش اكل ؟
اطلعو اهلو فيني مستغربين من سؤالي و هو زورني و تجاهلني و بلش ياكل و بعد ما فطرنا اجت الخدامة تقيم الفطور و انا جيت لقوم من عن الكرسي و اطلع لبيتي
ماهر:وين رايحة تعي قيمي الاكل مع ساري
هناء:هاي ما شغلتي
ماهر:اه صح هاي شغلة امك
هناء:اي شغلة امي و امي اشتغلت هالشغلة حتى ما تحيجني انا اشتغلا ،بس شوف اختك هيا عم تقيم الاكل مع ساري تعيتكن بجي بقيمو معا
ماهر:اممم ممتاز جوابك على طول حاضر على راس لسانك اطلعي على البيت لاحقك
طلعت على البيت و لحقني بعد ربع ساعة و فات و خبط الباب بايدو بقوة و انا كنت عم غير تيابي ،و قبل ما يوصل لعندي ركضت و سكرت الباب
ماهر:رجعتي قفلتي الباب
هناء: رح افتحو بس لحظة
لبست بسرعة قبل ما يعصب اكتر و فتحت الباب
ماهر:بجامة لابسة بجامة
راح فتح الخزانة و طلعلي فستان الصبحية الابيض
ماهر:العروس بتلبس هيك اول ليلة ،عندك واحد اتنين تلاتة
طلعن و زتن على التخت
ماهر:هدول اشترتلك اياهن كرمال تصمدين بالخزانة ،اشلحي هالقرف يلي لابستيه و البسي واحد منن
هناء:انا مرتاحة بالبجامة
ماهر:بس انا ما مرتاح
هناء:مشكلتك هيدا الموجود عندي
ماهر:و انا موجود عندي كتير كمان بس يلا انا هالمرة رح طول بالي عليك
طلع من الغرفة و راح على المطبخ و رجع بعد شوي و معو كاسة عصير برتقان ،شافني نايمة بالتخت
ماهر:قومي خلينا نحكي و هاي انا بنفسي عصرتلك هالكاسة عربون صلح بيناتنا
هناء:ماهر انت ما تركت مجال للحكي بيناتنا ،يلي عملتو فيني كتير كبير ،حرمتني من امي يوم فرحي و حرمت امي تفرح فيني و بعد كل هيدا بدك اياني كون معك طبيعية و اتعامل معك متل اي مرة
ماهر:يلي عملتو لصالحنا و هيدا الموضوع بتسكريلي اياه على الاخير و بيت اهلك بتنسيه ما الك روحة عليه ابدا و امك و اخوكي كمان بتنسين و اذا لسا بتفتحي هالسيرة معي ولله بحرمك من اختك سمر كمان
اطلعت فيه انا و مصدومة و ما عاد طلع من تمي الحكي و خفت احكي يقوم يضربني
ماهر:شبك …بدك ترجعي على بيت اهلك يلي جنب حاوية الزبالة و بحارة كلها سكرجية و حشاشين و ما بتفتلو الشمس و سقفو بنش مي و بتتحمو بالسطل ، شووو هيدا البيت يلي بدك ترجعيلو ،شوفي هالقصر يلي انا مقعدك فيه بيت كبير و خدم و حشم ….
هناء:حاج بقا ضلك تهتني باهلي و نسبي و بيتي ليش بعتت اهلك من الاساس اذا شايف كل هالقد وضعي بخزي
ماهر:لانك عجبتيني و حبيت تكوني الي وحدك بس من دون حاشيتك يلا يا روحي اشربي هالكاسة لشوف حتى تهدى اعصابك
هناء:ما بدي و اذا بتريد ممكن تقوم من هون خليني نام
مسكني من شعري
ماهر:لك انت شو بدك تجننيني انقبري اشربيا
قرب الكاسة على تمي
هناء:طيب طيب بس اترك شعري عم توجعني
ماهر:حتى الدلال ما عم يعطي نتيجة معك
اخدت كاسة العصير منو انا و عم ارجف وشربتا دفعة وحدة
هناء:شو المطلوب مني هلأ؟
ماهر:ولاشي كفي نومتك
قام من جنبي و انا رجعت نمت و ارتخت اعصابي بسرعة و نمت فورا و وقت فقت ،شفت حااالي ما لابسة شي وشفت ساري واقفة فوق راسي هي و عم تطلع علي ،سحبت الحرام انا و متفاجئة و غطيت حالي فورا
هناء:شو عم تعملي انت هون؟وين تيابي؟
ساري(تبتسم): السيد ماهر بعتني لعندك ،بقلك خدي هدول اشربين
هناء:شو هيدا ؟
قمت لجلس حالي على التخت ،وحسيت حالي موجوعة كتير ،اخدت معي القصة وقت حتى اقدر استوعب شو يلي صار
هناء:اطلعي برا اطلعي برا
ساري:مدام هناء رح اتركلك دوا المسكن هون …..
حطيت راسي تحت المخدة وبلشت ابكي ،بعد شوي سمعت صوت الباب عم يتسكر و بعدت صوت ماهر عم يحكي مع ساري
ماهر:فاقت؟
ساري:ايه بس عصبت علي وقلعتني
ماهر:شربت الدوا؟
ساري:لا ما قبلت و صارت تبكي
ماهر:طيب روحي انت هلا
نزلت ساري و فات ماهر على غرفة القعدة و بعد شوي اجا لعندي ،وقف على باب غرفة النوم
ماهر:هناء …هناء…فيكي شي ؟…يعني انا لو ما عملت هيك كنا ما منخلص من القصة بشهرين و تلاتة
هناء:روح من هون…. حاطتلي بكاسة العصير منوم
اجا قعد جنبي على التخت و اجا ليرفع الحرام عني
ماهر:انا زوجك و هيدا من حقي ..خلص قيمي هالحرام بقا ما تخجلي و بعدين شفت كل شي
هناء:……
ماهر:طيب ما تردي ،انا ما كنت حابب اعمل هيك بس انت كتير عنيدة ……..قومي يلا رح اخدك مشوار المسا بالسيارة و طعميكي بوظة
هناء:……
ماهر:طيب انا رايح مشوار و برجع و رح ابعتلك ساري مرة تانية خليا تساعدك
مر يومين هدوء بيني و بين ماهر قبل ما يرجع يقرب علي مرة تانية و انا صديتو ، عصب كتير و فتح شنتاية على التخت و ضبلي كل بيجاماتي
ماهر:انسين لهدول هالفترة ما بفوت الا بشوفك لابستيلي بجامة و كانو الك عشر سنين متزوجة
اعطى الشنتة لساري و قلها نزليها على بيت اهلي وحطيا بمعرفتك بمكتب ابي و التفت
ماهر :انا فايت اتحمم و بدي اطلع شوفك لابسة شي من هالخزانة النصانية
فات و طلع بعد شوي
ماهر:اها هيك بدي اياكي تعي لشوف دخيل هالعود ما احلاه اديش فرقتي عن يلي كنت لابستيه قبل ، هلا بينتي عروس
هناء:……..
قرب علي و فردلي شعري على اكتافي
ماهر:شعرك متل شلال دهب خلين هيك ما ضبين ابدا …شايفة هيك ما احلاكي وقت بتكون هادية و بتسمعي الكلمة اذا بضلي هيك رح عيشك ملكة زمانك
قعدني بحضنو و انا كنت عم اضغط على اعصابي ،كنت قرفانة منو و ما طايقتو بس خفت قلو لا و يعصب علي و يرجع يرفعني فلقة ،مع انو ماهر تصرفاتو غير متوقعة و شخصية مزاجية و متناقضة احيانا كنت حسو حنون و احيانا انسان ما عندو قلب و رحمة ،كانت الساعة معو بعشر ساعات ،كنت انا و مخطوبة استنى بفارغ الصبر الوقت يلي بدو يجمعني انا و ماهر على مخدة وحدة و تحت سقف بيت واحد بس بعد ما بين ماهر على حقيقتو صار الوقت يلي بقضيه فيه مع ماهر صعب علي و ما بصدق ايمت يخلص و يخلص معو الوجع النفسي و الجسدي و بحاول احبس دموعي كتير
الجزء التامن:
بعد اسبوعين من زواجي اجت عندي اختي سمر و اول ما شفتا حضنتا و بكيت
سمر:طولي بالك شو عامل فيكي هيك ؟
هناء:فوتي فوتي بحكيلك جوا …كيفا امك و اخوكي حمادة
سمر:مناح لحمدلله بس امك خافف شغلها هالفترة ما بقا متل اول
هناء:يالله و من وين عم تصرف ؟
سمر:ضايل معا شوية مصاري
هناء:كيفا هلأ متقبلة الموضوع
سمر:اي لحمدلله احسن من قبل بكتير بس اول 3ايام بقيت تبكي و بعدين خلص
هناء:اي لحمدلله
سمر:انت احكيلي كيفو ماهر معك ،انشالله مبسوطة ؟
هناء:اخ بس لو بتعرفي شو عمل فيني اول ليلة
قعدت حكتلها كل شي لاختي سمر
سمر:خلص يا اختي انسي و عيشي
هناء:بدك اياني انسى امك و اخوكي !
سمر:اي انسين هالفترة و بجوز بكرا مع الايام يتغير و يحن قلبو عليكي و يبعتك لعنا او يخلي امك تجي لعندك
هناء:ايمت يعني ،سنة ،اتنين تلاتة ؟
سمر: ربك اعلم بس انت سايريه و ما تعانديه
هناء:ما بقدر انت بتعرفيني و بتعرفي شخصيتي اديش قوية و هو بدو يمسحلي اياها لك حتى بدي فاتحو بموضوع الجامعة خايفة من ردة فعلو و عصبيتو
سمر:فاتحيه بالموضوع بس يكون رايق
هناء:و انت شو صار معك مع فؤاد؟ما عاد رجع حكاكي
سمر: لا …..عادي …..كل شي قسمة و نصيب بهاالدنيا ،
اصلا انا ما بقا بدي اياه يلي بدو يخجل باهلي ما بدي اياه
هناء:طب شو قول انا بضل يهتني بامك و باخوك و بفقرنا وصل على سطل الحمام يعايرني فيه
سمر:اخ بس نحن حظنا قليل وقت انخطبتيلو فرحنا و قلنا يلا الدنيا عوضتنا بس لا كنا عم نتوهم و فؤاد جرحني من جوا قال بقلي خايف اذا تزوجتك تجيبلي ولد منغولي هالجاهل
هناء:خلص انسيه و ما فيه خير اصلا
سمر:نسيتو نسيتو ….بيتك كتير حلو مشالله الله يهنيكي يا رب و يهديه لماهر ضلك اختي استغفري ربك ولله بقولو الاستغفار متل السحر …شو هيدا ؟
هناء:شو بعرفني هههههههه كلي و انت ساكتة ،جابن ماهر من يومين بس طيبين
سمر:امممم كتير طيبين بس كنت اساليه عن اسمن؟
هناء:ايوا بدك قائمة المهتات تكبر و يصير يقلي طعميتك شي ما كنتي تحلمي تاكليه بحياتك هههههههه
سمر:هههههههه العمى بقلبو و انت قليلو اخدت وحدة ما كنت تحلم تاخدا بحياتك
قعدت اختي سمر عندي ساعة و نص حكينا و ضحكنا و بكينا فين و انبسطت كتير بزيارتا و قلتلا على طول تعالي لانو شبه مسجونة بهالبيت ما بطلع ابعد من جنينة البيت لحاالي و هو بياخدني احيانا مشوار ،و وقت اجا ماهر العصر من شغلو ،فتحت معو موضوع الجامعة
ماهر:لشو جامعتك ؟كلا صياعة و فلتنة و فيها شباب بحبو اكل الهوا
هناء:شو بدي فين انا ؟
ماهر:انت شو بدك بالجامعة ؟وظيفة ما رح وظفك ،المرة لبيتا و زوجا
هناء:ما بدي اتوظف بس بتبقى الشهادة بايدي كرمال درس اولادي
ماهر:ما في داعي الها وهالموضوع خلص سكريه
هناء:كل شي متل ما بدك لازم يمشي، انا لازم نفذ بس بدون ما اعترض ،انت بدك وحدة ما عندا شخصية بكل شي تقلك ايه
ماهر:ايه
تركتو و قمت على غرفة النوم و نمت بالتخت و انا كل ما بزعل بروح بنام ،كان عندي احلام و طموح كتير بس بزواجي من ماهر انهار كل شي ،بعد اسبوع اجت عندي اختي سمر و قلتلي انو شافت امي راكبة مع ماهر بالسيارة
هناء:امك !!لتكوني مخربطة و ما تكون امك او ما يكون ماهر مثلا
سمر: ما بعرف بجوز لانو مرت السيارة من جنبي بسرعة و ما دققت منيح
هناء:اي اكيد انت مخربطة طب سالتي امك ؟
سمر:ساالتا و قلتلي شو بدو يطلعني معو و صارت تدعي عليه
راحت سمر من عندي و نطرت ليجي ماهر من شغلو و قلتلو انو سمر شافت امي معك
ماهر:امك !!شو بدو يطلعا معي و انا اصلا ما بطلع نسوان معي بالسيارة ،سمر يلي قلتلك هالحكي؟
هناء:ايه
ماهر:ولله هاي سمر شكلا بدا تجبلي وجعة راس
ومن هداك اليوم ما بقا رجعت شفت اختي سمر ،مر شهور و ما اجت لعندي ،و انا حسيت انو ماهر هو السبب بعدم جيتا لعندي و وقت واجهتو و قلتلو انو انت مانعا لسمر من الجية عندي
ماهر:اي انا
هناء:لك انت شو !هاي المخلوقة الوحيدة يلي عم شوفا من اهلي و اطمن علين و على اخبارن منا و هلا قطعتني عنا ،انت واحد ما في رحمة بقلبك
ضل ساكت و ما رد علي و انا بقيت متناشفة معو و ما اقعد بالغرفة يلي بيقعد فيا ،بعد يومين نزلت حكيت بنت حمايي هيا و طلبت منا طلب
هناء:امانة الله يخليكي الي شهور ما بعرف عنن شي بس اعطيا هالورقة و فيا شوية مصاري لاختي سمر وقت تشوفيا بالجامعة و قليلها تردلي عليا
هيا:ما تحرجيني هناء ولله اذا بيعرف ماهر بموتني هادا اخوي مجنون
هناء:من وين بدو يعرف..لا انا و لا انت رح نقلو و سمر اكيد ما رح يعرف منا ولله ما رح انسالك هالمعروف ،امي شغلا خافف عن قبل و ما بعرف كيف عم يدبرو امورن الله لا يحطك بمحلي
و وقت صرت ابكي ،شفق قلبا علي و اخدت مني الرسالة و المصاري و لفيتا و بستا و طلعت قعدت بالصالون مع حماتي و بعد ساعة اجا ماهر تغدينا عند امو و فات يغسل ايديه و لحقتو ساري تناولو المنشفة و وقت طلع من الحمام طلع معصب و متل المجنون راح على غرفة هيا و هو عم يناديلا بصوت عالي
ماهر:هيااا هيااا
انا هبط قلبي و ركضت وراه ،فات على غرفتا وسكرت الباب وقفلو وراه ، بلشت تصرخ هيا و انا اسمع صوتو كانو عم يضربا ،صرت خبط على الباب و اترجاه يتركا
هيا:ماهر طول بالك الله يخليك شوفي؟
ماهر:هاتيا لهون
هيا:شو هاي؟
ام ماهر:شوفي شو صاير ؟الله يرضى عليك ماهر افتح الباب
ماهر:امي ما تدخلي انت ،الرسالة يلي اعطتك اياها هناء
هيا (تأتأ) :اي اي اي رررسسسالة؟
ام ماهر:ما اجانا من هناء الا وجع راس
ماهر :ما تتهبلي علي شافتك ساري وقت اخدتي الرسالة منا
انا وقفت جامدة بارضي ، بلش يضرب اختو هيا و يقلا طلعي الرسالة
هناء:ما دخلا هيا ولله ما دخلا اضربني الي ولله هاي ما كان بدا تاخدا كرمالك بس شفقت علي ماهر خلص
فتح الباب و مسكني و دفشني و صرخ علي
ماهر:اطلعي انت على البيت حسابك فوق …اطلعي عم قلك
هناء:طيب طالعة ..هيا اعطيه الرسالة
اعطتو الرسالة هيا و كانت عم ترجف و تبكي و انا طلعت ركض على البيت ،وصلت مقطوع نفسي و عم ابكي و خايفة و ما عرفت وين بدي روح اتخبى لانو انا حسابي اكتر من حساب هيا ،فتحت الخزانة لاتخبى فيها رجعت سكرتا ،بالاخير نزلت تحت التخت و ضميت ركبي على صدري و حطيت ايدي على تمي حتى ما يطلع صوتي بكاي و يعرف محلي ،سمعت صوت دعساتو على الدرج ،طالع مستعجل و معصب ،فتح الباب و خبطو و فات يدور علي بكل البيت ،و انا وقت شفت رجليه داخلين على غرفة النوم ،خفت اكتر
الجزء التاسع:
ماهر:وينك وين متخبية اطلعي
صار يفتح الخزانات و يدور بين التياب ،بالاخير وطى راسو و شافني تحت التخت
ماهر:اطلعي اطلعي
هناء:ما بدي
ماهر:عم قلك اطلعي احسن ما طالعك من شعرك
هناء:بدك تضربني ؟
ماهر:لا بس بدي اسلخ جلدك عن عظمك ،عم تشتغلي من وراي ،قلتلك انسي اهلك انسي اهلك و هاي ورطي هيا و ورطي حالك لكن انا الدبانة بهالبيت اذا عطست بعرف اطلعي
قام و راح تناول كرباج من السقيفة ،كرباج عصاية حبال كل ادوات التعذيب كانت موجودة عندي بالبيت و كانو هالبيت صاير معتقل
ماهر:لسا ما طلعتي
هناء:خلص ولله العظيم ما بقا عيدا ،غلطت و منك السماح ،سامحني بس هالمرة
مسك التخت و قلبو و انا قعدت و رجعت زحف على زاوية الغرفة
ماهر:انت ما رح تمشي على الصراط المستقيم الا بهالطريقة
هناء:خلص بس هالمرة اعطيني فرصة اخيرة
ماهر:تحملتك كتير
ضرب اول ضربة على فرشة التخت يلي من قوة الضربة طلع منا غبرة ،اكيد اذا نزلت هالضربة على جسمي لتشققو ،استجمعت قوتي و قمت لاركض برا الغرفة بس رجع مسكني من شعري ليرجعني لورا وقعت على ضهري و صرخت من قوة الوجع
هناء:ضهري كسرتلي ضهري اخ بطني
صرت صرخ و ابكي من الوجع يلي صاب بطني و ضهري و بعدين نزل دم مني و وقت شافني ماهر عم انزف انخطف لونو و وقف مرعوب و انا عم صرخ و قلو دخيل الله الحقني ما بقا قادرة موجوعة رح موت و وقت شفت منظر الدم غبت عن الوعي و ما فقت الا بالمشفى ،ما شفت بالغرفة الا الممرضة
الممرضة:لحمدلله على سلامتك
هناء:الله يسلمك…اخ
الممرضة: خليكي مرتاحة ما تتحركي
هناء:عم يجعني بطني كتير
الممرضة:اي شي طبيعي بعد الاجهاض
هناء:اجهاض !انا حامل
الممرضة:امم للاسف كنت حامل ،العوض بسلامتك، كيف صار معك هيك ؟
هناء:زوجي …..كان بدو يضربني و انا كنت بدي اهرب منو قام مسكني و وقعني
الممرضة :ااااه طيب خليكي مرتاحة انا راجعة
راحت و رجعت بعد نص ساعة و معا شابين لابسين لباس شرطة
الممرضة:هدول الشابين جاين ليفتحو محضر و ياخدو اقوالك لازم تشتكي على زوجك
هناء:فيني اشتكي
الممرضة :طبعا
تركتني الممرضة و راحت معن و بقيت انا و اياهن و ما شفت ماهر ابدا او حدا من اهلو ،طلبو مني احكي عن الحادثة بالتفصيل و واحد منن قعد يكتب بعد ما خلصت حكي سالوني عن اسم زوجي ،و وقت قلتلن اسمو و كنيتو ،قالولي زوجك الضابط ماهر؟؟ ،قلتلن اي ،بلعو ريقن و تلبكو و سكرو المحضر و راحو و اجا بعد شوي ماهر ،فات لعندي و اطلع فيني و رفعلي ورقة المحضر يلي عليها كل اقوالي و شقفا قدامي لمية شقفة و كبا بالزبالة و انا وقت شفت هالشي رجعت ابكي لانو ما حسيت ما في مخرج من الشي يلي انا فيه ،كل الابواب و المخارج بايديه ، قرب قعد جنبي على التخت
ماهر:كيف صرتي ؟
هناء:…..
ماهر:طيب الدكتورة قالت انك احسن و وقف النزيف معك و فينا بكرا الصبح نطلع ….انا ما كنت بعرف انك حامل ليش خبيتي علي؟
هناء:و لا انا ما كنت بعرف اني حامل و يسلم ايديك يا رب لو ما عملت هالشي كان لسا الولد يلي منك ببطني
ماهر:انت مبسوطة يعني؟
هناء:اي كتير اكتر ما تتصور ،ما بتخيل انو جيب منك ولد يربطني فيك لحمدلله يا ربي
قام من جنبي و وقف على الشباك و بلش يدخن ،دخلت الممرضة و قالتلو اذا بتريد ممنوع التدخين هون ،عصب عليها و قلعا ،طلعت الممرضة و ما رجعت لاخر الليل ،كان ماهر بكافتريا المشفى
الممرضة:الله يعينك و يكون معك
هناء:الله يخليكي ما فيكي تعطيني شي امنع فيه حتى ما ارجع احبل مرة تانية
الممرضة:بشو بدك تمنعي؟فيه ابرة و فيه حب و في وسائل كتير
هناء: شوفي شي يدوم معي كتير لانو ما خرج ارجع على المشفى و ما بدي حدا يعرف اني عم منع و خاصة زوجي
الممرضة:اي في الابرة عن سنة هلا بعد عشرين يوم تعي و بعطيكي اياها
هناء:ما خرج ارجع على المشفى ما رح يقبل يجيبني
الممرضة:ولا يهمك اتركي هالموضوع علي،رح قلو انو بدك مراجعة بعد الاجهاض كرمال نفحص الرحم و نتأكد انو نظف منيح
اجا ماهر من برا و وقت شافتو الممرضة طلعت ركض من الغرفة
هناء:انت بدك تنام الليلة هون ؟
ماهر: طبعا ،ما حابة يعني ؟
هناء:لا ما حابة ارجع نام بالبيت و انا هون جنبي الممرضات
ماهر:لا ما حذرتي ،بقيان هون
انا نمت و غفيت و تركتو سهران عم يدخن و طول ما انا بالمشفى ما وقف تدخين ابدا ،و بالليل فقت لقيتو حاطط راسو على بطني و نايم بدون ما يحس ،هزيتو
من ايدو ليفيق و اول ما فاق حط ايديه على عيونو و فركن ،كانو عيونو حمر و منفخين كتير ،قام بدون ما يحكي اي كلمة و نزل على كافتريا المشفى ،تاني يوم طلعت من المشفى و رجعت على بيتي و طلعت ساري يلي ما كنت طايقتا و هي السبب بكل شي ، بقيت عندي على طول و جاب ماهر خدامة تانية لاهلو ،بقيت اسبوع ببيتي كانت تطلع حماتي شوي لعندي بس ما طلعت هيا ابدا ، بعد اسبوع نزلت عندا لاعتذر منا ،بس ما ردت علي ابدا
هناء:انت و اخوكي نفس الطينة انتو الاتنين ما عنكن رحمة
هيا: اكلت اتلة بسببك و انحبست بالبيت و ما عم يخليني انزل على الجامعة شو بدك اكتر من هيك ؟
هناء:ما بدي اكتر من هيك ،انا نازلة عم اعتذر منك و عم اترجاكي تطلعي فيني و انت لا كانك شايفتيني انا ما الي حدا هون و معتبرتك متل اختي
هيا:شو بدك هلا يعني؟
هناء:……
ما بدي شي ..سلامتك
طلعت من الغرفة انا و عم ابكي و انا طالعة على بيتي ،طلع بوجهي ماهر
ماهر:انت شو عم تعملي هون ؟
هناء:اناااا …انا نزلت شوف اختك هيا
ماهر:اي اطلعي نامي بتختك و ما بقا تنزلي هالفترة
الجزء العاشر:
طلعت على بيتي و طلع وراي بعد شوي ،انا فتت فورا و قعدت بالتخت ،فات تغدى و طلع غير تيابو و اجا قعد جنبي
ماهر:ليش كنت عم تبكي وقت كنت طالعة من عنا ؟
هناء:كنت عم احكي مع هيا و هيا ما قابلة تردي علي و حتى تطلع بوجهي و كلو منك هي ما الها علاقة
ماهر:بكرا بترضى لحالا
هناء:طب خليا ترجع داوم بالجامعة و بوصلا و برجعا الشوفير
ماهر:هالشي انا بقررو ما انت ..شو صار معك لسا ما خلصتي ؟
هناء:لا لسا مطولة لازم طبق ستين يوم
ماهر:شوووو!شو ولدانة
هناء:الولادة و الاجهاض نفس الشي ،هيك قلتلي الممرضة
طلع من الغرفة هو و عم ينفخ ،بس بعد اسبوع اجا على البيت هو و معصب
ماهر:عم تكذبي علي؟
هناء:انا ….بشو عم اكذب
ماهر:انت بتعرفي منيح بس ما في مشكلة رح تندمي كتير
مر تلات ايام على كلامو ،لوقت دقلي قبل ما يجي على البيت و قلي فضيلي البيت و نزلي نامي عند اهلي ،سالتو ليش ،قلي نفذي على الساكت ،لبست بجامتي و نزلت و ما رجع على البيت الا للساعة تسعة ،اجا و معو وحدة لابسة فستان قصير كتير و لاففا و عم تتمايل بين ايديه ،و قبل ما يطلع على البيت تباطأ بحركتو و علا صوتو و نادى ساري يلي نزلت معي عند اهلو و وقت فتحت الباب ساري ،انا كنت قاعدة بالصالون انا و امو ،وقف قبالي و انا شفتو ماسك ايدا و عم يقلا
ماهر:ههههههه لك دخيلو …اطلعي اسبقيني لاحقك رح نقضي الليلة كلها سوا
اطلعت بحماتي بانو شو هيدا يلي عم يعملو ابنك ،سكتت حماتي و ما حكت شي
طلعت البنت يلي كان جايبا معو لفوق على بيتي ،و هو وقف مع ساري يحكي معا و يعلي صوتو
ماهر:اي بعتت الشوفير يجبلنا غدا بس يجي بطلعين انت ، رح اتركلك المفتاح من برا و فوتي حطين بالمطبخ بدون ما تفوتي على غرفة النوم ماشي
كان عم يحكي مع ساري و يطلع علي ليشوف ردة فعلي ،كان متوقع مني اني عصب و اعلق معو و انقهر و نار الغيرة تشعل فيني بس انا خيبت امالو عن قصد ،و درت وجهي و عملت حالي ما سامعتو ابدا ، بعدين طلع على الدرج هو و عم يغني بصوت عالي ،بقينا انا و حماتي قاعدين ساكتين و انا مستغربة من سكوتها ،معقول ام بتخاف من ابنها و بتخاف تقلو شو هالتخبيص يلي عم تخبصو بس كان بالبيت ماهر عاملنا رعب و خوف و ما حدا بيسترجي يسالو ليش او حتى يقلو لا ،بقيت قاعدة و حاطة رجل على رجل و عم هز برجلي انا و متوترة و عم اتخيل ماهر و البنت نايمين على تختي انا ،حسيت بالقرف كتير بس حاولت اضبط اعصابي و ما نولو الشي يلي بدو اياه ،اجت ساري و معا الاكل و بدا تطلع فيه لفوق ،لحقتا و قلتلا انا يلي رح طلعو ،اول الشي ما قبلت بس انا اصريت عليها ،مسكت الاكياس ،و طلعتن ،دورت المفتاح و فتحت الباب ،رحت بوجهي على المطبخ ، فردتلن الاكل على طاولة المطبخ و شغلت شمع احمر و وزعتو على الطاولة و طفيت ضو المطبخ حتى يطلع جو رومانسي و تابعت على غرفة النوم ،فتحت الباب و شفت البنت واقفة على التخت و عم ترقصلو ديرتي دانس و هو قاعد عم يتفرج عليها و عم يدخن
هناء(مبتسمة):العشا جاهز يا حلوين صحة و هنا سلفا
كانت ملامح وجهو ما بتتفسر وقت شافني ،حكيت هالكلمتين و نزلت فورا انا و عم ابكي ،مسحت دموعي قبل ما فوت عند بيت حمايي،دخلت قعدت بمحلي ،بعد ربع ساعة طلع صوت تكسير من بيتي ،اطلعنا ببعض انا ومرة عمي و طلعت هيا من غرفتا و شافتني قاعدة و ما حكت ولا كلمة ،و بعد شوي نزلت البنت من عندو ركض على الدرج و راحت ،بعد شوي فتح باب بيتنا و طلع و وقف على الباب و ناداني
ماهر:هناااء…هناء اطلعي لفوق
ام ماهر:يا رب بس يا رب احسن الشي ،اطلعي لنشوف شو اخرة هالمسخرة
اطلعت لفوق انا و خايفة و عم ارجف ،طلعت شوي شوي على الدرج
هناء:اي
ماهر:فوتي لجوا
هناء:شبك ماهر معصب ،انا عملتلك شي عصبك
مسكني من ايدي و دخلني على البيت
ماهر:انت شو ؟وحدة ما فيها احساس ،شو هادا يلي عاملتيه بالمطبخ و مين قلك انت طلعي الاكل
هناء (تأتأ):انا…..انا قلت بطلع و بعملكن جو حلو
ماهر:انت هبلة الا عم تتهبلي علي ؟انا زوجك
هناء:ايه بقولو انك زوجي ،بدك غار عليك يعني ،يلي بغار بكون بحب و انا ما بحب لهيك ما غرت عليك
مسكني من شعري و جرني من مدخل البيت لغرفة النوم ،و راح جاب كرباج
ماهر:ما لحقت اضربك فيه هديك المرة
هناء: خلص دخيل الله ولله تعبت ولله ما بقا قادرة اتحمل اكتر من هيك شو بدك مني قلي ،بدك وطي على رجليك و بوسن حتى ترحمني
وطيت على رجليه لبوسن انا و عم ابكي ،رفع راسي فورا بايديه و ضمو لعندو
ماهر:قومي ….قومي
هناء:لا خليني عند رجليك و ادعس علي و على كرامتي ما هيك انت بدك ،انت بدك وحدة بلاشخصية ،قلي شو بدك مني ،بدك تموتني على البطيء بدك تذلني ،من اول يوم ضرب و ذل و هت و اغتصاب ،مارست علي كل انواع التعذيب النفسي و الجسدي علي ، صرت بقعد معك انا و خايفة من انو احكي كلمة تعصبك و دفعني تمنها ،عم تستقوى علي لانك قوي بس و انا ضعيفة بس خلص اعمل يلي بدك اياه انا خلصت تعبت
الجزء الحادي عشر:
نزل لعندي و قعدني بحضنو
ماهر:خلص دخيل الله ما بقا تبكي
هناء :انت واحد مريض
ماهر:اي مريض ،مريض فيكي
هناء:ليش هيك عم تعمل فيني ؟
ماهر:انا شو عملت فيكي ،انت من اول ما قلتلك بدي اقطعك عن اهلك و انت قمتي حرب بيناتنا و بضلي تستفزيني و قلتلك انا عصبي كتير ما بيمشي العناد معي ،وحدة بتكذب على زوجا و بتبينلو انو ما رغبانة فيه و قرفانة منو
هناء:انت قلت من وقت قلت بدك تقطعني عن اهلي ،ماهر طلقني الله يخليك طلقني و روح خود وحدة من مستواك ما تخجل من اهلا
ماهر:ما تجيبي سيرة الطلاق على لسانك ،موتك و طلاقك بكفة وحدة عندي
هناء: ليش؟ بتحبني؟
ماهر:انا ما بس بحبك انا بتنفسك
هناء:كيف الحب عندك ؟كيف بتحب وحدة و بتعذبا كتير ،يلي بحب التاني بيعمل كل شي بيسعدو و انت عم تعمل كل شي بيتعسني
ماهر:…..
هناء:شبك سكتت
ماهر:قومي من عن الارض ،هلأ بياخدك برد
قمنا و قعدنا على التخت ،قرب علي و انا بعدتو عني
هناء:ما بدي …قصدي يعني ما بدي هلأ لانو تعبانة
ماهر:طيب بدك تنامي ؟
هناء:ايه
حطيت حالي تحت الحرام و اجا تسطح جنبي و صتر يلعب بشعراتي حتى غفيت و نمت
بس رجعت فقت بنص الليل عطشانة و ما لقيتو جنبي ،تابعت على المطبخ شربت انا و راجعة سمعت صوت همس من غرفة الصالون ،مشيت على راس اصابيعي و صنتت و سمعت ماهر عم يحكي على الموبايل و كانو عم يبكي ،ما صدقت حالي شو عم اسمع ،ماهر عم يبكي
ماهر: ايه ….منيحة احسن من قبل ….نايمة هلأ ….اي تعبان و مخنوق و ما عارف شو بدي اعمل بقا اكتر من هيك ….ما بقدر اقسى عليها اكتر من هيك صارت بتكرهني و انا صرت عم اكره حالي ……تعي خديا …اي اي عملت متل ما قلتيلي بس انت لو كنت بمحلي ما كنت حكيتي هيك وطت على رجلي لتبوسن قلبي تقطع عليا و حسيت حالي ندل كتير …….انت طلعتي حالك بدور البريئة و المسكينة و انا طلعت الظالم و السفاح ……ياريتني ما سمعت كلامك و ما رحت شفتا و ما فتت بكل هالقصة …….لا ما ندمان بس مقهور عليا ما عم تقدر تتأقلم انا ظلمتا …اي ….لا…..اي ما ناسيها ولله عم اسعى بهالموضوع و الشاب شافا و عجبتو و بهاليومين بمر عليكن …اه خلص ماشي منسكر هلا معناتاو منحكي بعدين …… انت من اهلو
سكر الخط و انا رجعت فورا على التخت و عملت حالي نايمة ،رجع على التخت و نام جنبي و قرب علي و صار يلمسلي على وجهي و باسني ،و بالاخير لفني و نام ،بس تأكدت انو نام ،قمت من جنبو و اخدت موبايلو و فتت على الصالون و جيت لافتح موبايلو و اخد الرقم بس طلع مقفلو بكلمة مرور ،و انا طالعة من الصالون وراجعة على الغرفة و عم كبس بموبايلو و جرب كلمات مرور خبطت فيه ،رفعت راسي و بس شفتو ركضت و رجعت على الصالون ،لحقني و انا حطيت ايدي على وجهي و بلشت ابكي
ك
هناء:كنت بدي شوف اذا اختي سمر معك رقما
ماهر:بس اختك سمر ما معا موبايل
هناء:اي بس اخر مرة شفتا فيا قالتلي انو بدا تشتري موبايل
ماهر:طيب خلص ليش عم ترجفي ؟
صابتني رجفة و بردية و صارو اسناني يتكو ببعض
هناء:يمكن برد
ماهر:مشي على التخت لدفيكي
رجعت علاقتي بماهر تحسنت عن قبل ،بعد اسبوع نزلت عند بيت حمايي و قالولي انو انعزمنا على عرس بعد بكرا و قليلو لماهر اذا بخليكي تروحي معنا ،رجع ماهر و جايب معو موبايل جديد و فات لعند هيا يلي كانت بعدا زعلانة منو و سكر الباب وراه و بعد شوي سمعت صوتن عم يضحكو جوا ،اول ما طلع قالتلو امو انو معزومين على عرس ،قلها اي روحو و خدو هناء معكن و انا بوصلكن ، و وقت طلعنا على البيت قلي وصتلك الك على موبايل لسا احدث من يلي اعطيتو لهيا بس بدو وقت ليوصل ،اجا اليوم يلي بدنا نروح فيه على العرس ، تحممت و طلعت و انا عم البس تيابي الداخلية بغرفتي ،ضربت عيني على ساري واقفة عم تتفرج علي بطريقة بتخوف ،حطيت المنشفة على جسمي و رحت سكرت الباب ،بعد شوي اجت و فتحت الباب بدون ما دق
هناء:هيك الناس بتفوت ليش ما دقيتي على الباب قبل ما تفوتي
ساري:عفوا ..بدك ساعدك باللبس
هناء:لا بلبس لحالي و وقت بدي شي بناديلك
طلعت من الغرفة لبست و تمكيجت و انا عم البس الفستان نادتلا تجي ترفعلي السحاب ،اجت و تباطئت هي و عم ترفعو
ساري:جسمك كتير حلو
هناء:تسلمي
ساري:على فكرة ما تستقلي فيني بس انا بعجبك و بخدمك كتير
هناء:واضح ، كتير خدمتيني
ساري:فيني اتواصل مع اختك سمر و امك اذا بدك
صارت تلعبلي بشعراتي و انا خفت من تصرفاتا
هناء:ولله و شو المقابل ؟
ساري:ما بدي مصاري
هناء:لكن شو بدك ؟
الجزء الثاني عشر:
ساري:…..
هناء: شبك سكتي
ساري:ما بدي تفهميني غلط ،انا من يومين مريت من جنب غرفتك و كان الباب مشقوق و شفتك بالغلط انت و زوجك عم ….
هناء:اييه
ساري:حسيتك ما مبسوطة معو و عم تعملي هللشي بدون رغبة و انسجام
هناء:امم و شو دخل هالشي بالمقابل ؟
ساري:انا صدقيني بقدر ابسطك اكتر منو
هناء:ااااه طيب ،طلبك بسيط بس امهليني وقت لفكر
ساري:خدي وقتك انا موجودة ايمت ما بدك و ما رح خليكي تندمي ابدا
طلعت ساري من عندي و انا عم سبا بقلبي ،اجا ماهر و شافني بالفستان
ماهر:هيك بدك تروحي
هناء:اي رح البس فوقو عباية طبعا
ماهر:بعرف بس هيك بدك تقضي العرس بهللفستان
.هناء:شبك العرس نسوان بس
ماهر:بعرف ،و بعرف انو النسوان بتبصبص كمان ،فوتي بسرعة غيريه
كنت بدي عاندو بس قلت رح اسكت هالمرة لانو على بالي روح على العرس ،فتت على الغرفة و لحقني
ماهر:انا رح نقيلك ….هادا احمر مغري بلاه …هادا قصير كتير بلاه..هادا جاي على لون عيونك بلاه ….
نكشلي الخزانة كلها
ماهر:البسي بنطلون و بلوزة
هناء:شوووو ؟معقول انت !
ماهر: اي اذا بدك تروحي على العرس البسي بنطلون و بلوزة
هناء:..طيب
رحنا على العرس و خلال العرس فتت على الحمامات زبط مكياجي ،و انا واقفة على المراية ،شفت وحدة لابسة اسود من فوق لتحت و حاطة على وجها منديل ،كان منظرا بخوف ،رفعت المنديل عن وجها
هناء:سمر
سمر:اي سمر
ركضت عليا و بوستا
هناء:يالله اديش مشتاقتلك
سمر:و انا اكتر فوتي لجوا التواليت ،ما بدي حدا يشوفنا،اسمعي اضطريت شوفك هيك بدي قلك حكي مهم
هناء:شوفي
من يومين فقت بنص الليل و شفت امك عم تحكي على الموبايل مع واحد…..
هناء:امك معا موبايل !!
سمر:اي اشترت من شهر
هناء:اي،مين هادا؟
سمر: مابعرف ،هيك حسني قلبي
هناء:و شو حكت؟
سمر: كانت عم تسالو عن وحدة مريضة …كنت رح فكر بامك شي تاني لو ما نصتت للمكالمة و حسيتها عادية و باخر المكالمة قالتلو شو صار بموضوع سمر ،يعني الرجال بيعرفني و انا بعد ما فكرت كتير و استرجعت حكيا شكيت بماهر ؟
هناء:ايمت هالحكي ،من يومين ؟
سمر : ايه
هناء:ركزي معي عيدي بالتفصيل الممل شو حكت ؟
سمر:قلتلو شبو صوتك و بعدين قلتلو لا ما رح اخدا و اقسى عليها اكتر ،هي عنيدة و ما رح تجي معك الا هيك و سالتو جبتا للبنت عندك ،بس ما فهمت اي بنت و بعدين قالتلو يلا هانت بكرا بتتأقلم وصلنا لمرحلة منيحة ما تضعف و بعدين ذكرت اسمي و قالتلو شو مشان موضوع سمر انا ما فهمت كتير حكين بس يلي تاكدتو انو مخططين لشي
وقفت متفاجئة من حكي سمر و ما عم صدق و اقدر استوعب الصدمة
هناء:انطريني جاي
سمر:وين رايحة ؟
طلعت من الحمام بسرعة و جبت اغراضي و رجعت لعند سمر
هناء:يلا نمشي
سمر:لوين؟
هناء:لعند امك بدي تفسير منطقي لكل شي
سمر:و بيت حماكي و ماهر ولله بموتك ما خايفة منو
هناء:لااا ما بقا بهمني بدي اعرف شو عم يصير بين امك و ماهر ؟
طلعنا من الباب الخلفي للصالة و رحت على بيت اهلي يلي الي شهور ما فتو و شفت امي يلي الي زمان ما شفتا و انصدمت اول ما شافتني ،اول ما شفتا حضنتا و بكينا و شفت اخي حمادة يلي من ضحكتو البريئة بترجعلي الحياة و لفيتو و بوستو و وقت التفتت على امي ما شفتا جنبي ،اجت من غرفتا هي و متلبكة ،و قبل ما احكي معا بكلمة ،اندفش باب بيتنا و دخل ماهر ،انا اول ما شفتو ركضت و تخبيت ورا امي
ماهر:انت هون !!الحق علي يلي بعتك على العرس
قرب لياخدني من ورا امي
هناء:اتركني ما بدي روح معك
ام حمادة:هناء روحي مع زوجك
اطلعت بامي انا و متفاجئة
هناء:انت عم تقليلي هيك حكي ؟
ام حمادة :اي انا ..ماهر خدا بالغصب عنا
هناء:ما رايحة قبل ما اعرف شو عم يصير بينكن ؟
ام حمادة:ارجعي مع زوجك هلأ و زوجك بحكيلك كل شي
هناء:زوجي !انت بتعرفي شو عم يعمل فيني ؟
ام حمادة:بعرف و انا عاطيتو الضو الاخضر ،انت راسك كبير و عنيدة ،سايري زوجك و اسمعي كلامو و ما بيعمل فيكي شي
هناء:امي شبك ما كانو انت يلي كنت عم تدعي عليه يوم يلي تزوجتو ما تذكرتي شو عمل فيكي
ام حمادة:ماهر شبك واقف قلتلك احملا و خدا
التفتت على سمر
ام حمادة :و انت حسابك بعدين
قرب ماهر يسحبني من ايدي من ورا امي و انا ماسكة فيا و ما بدي روح ،بالاخير حملني على ضهرو و طلع من بيت اهلي
الجزء التالت عشر:
طلعنا بالسيارة و طول الطريق انا عم ابكي ،و على الطريق اتصل ماهر باختو هيا و قلها انو هناء صارت معي و رح ابعتلكن الشوفير يرجعكن على البيت ، وصلت على البيت ،و طلعت قبلو و غيرت تيابي و بس دخل على البيت قعد بالصالون و بلش يدخن ،فتت لعندو
هناء:شو في بينك و بين امي ؟احكيلي ،انا لقطتك عم تحكي معا بنص الليل و سمر شافتكن مع بعض بالسيارة شو القصة ؟ هلأ بدي اعرف
ماهر:……
هناء:احكي !ليش امي عملت فيني هيك ،لتكون باعتني الك
ماهر: لا لا مو هيك القصة ،ما متل ما انت مفكرة
هناء: لكن
ماهر :طيب رح احكيلك ،بس بدي قلك قبل انو امك بتحبك كتير و عملت كل هالشي كرمالك و عملتو هي و عم تتعذب
هناء:احكي عم اسمعك
ماهر :انا بعرفا لامك من زمان ،كانت تجي تشتغل عنا احيانا و عند جيرانا بيت ابو رائد و مرة فاتت لعندي هي و عم تبكي و قلتلي انو ما عرفت لمين تحكي و تلجئ و ما لقت غيري لانو بتعرف انو الكل بهابني و حكتلي عن ابو رائد انو عم يتحرش فيها و خايفة منو كتير و هي ما عندا سند ،قلتلا انا رح اتصرف معو و انت اتركي الشغل عندو و تعي اشتغلي عنا على طول و انا بعطيكي راتب كامل ،و فعلا تركت الشغل عندو و اجت عنا على طول و من وقتا امك صارت بتعزني كتير و انا عزيتا كتير لانو امي كانت على طول تحمد و تشكر فيها كتير ،لوقت سمعت امك انو انا عم دور على عروس و بدي اتزوج ، فاتت عندي على مكتبي و قلتلي
ام حمادة :سيد ماهر انا بعرف انو يمكن تقول عني هبلة و عم اطلب المستحيل بس اسمعني للاخر
ماهر:خير ام حمادة شو في ؟صاير معك شي جديد يعني بخصوص ابو رائد ؟
ام حمادة :لا ابدا ما بقا تعرضلي بعد ما صرت تحت حمايتك و انت حكيتو و بهدلتو ولله ما عارفة كيف بدي ردلك هالمعروف ، انا رح فوت بالموضوع فورا ،انا سمعت من امك انو بدك تخطب و عم دور على مواصفات بنت محددة
ماهر:اي
ام حمادة :طلبك عندي
ماهر :هههه عفوا !عندك!
ام حمادة :اي عندي بس اسمعني للاخير
ماهر:طيب تفضلي عم اسمعك بس مين هالبنت؟
ام حمادة:بنتي …بنتي هناء ..قبل ما تحكي و انا بعرف شو بدك تحكي ،بدي تشوفا بالاول و اذا ما عجبتك انسى الموضوع و انا متأكدة رح تعجبك
ماهر:يا ام حمادة الله يخليلك اياها و تفرحي فيها انشالله بس …
ام حمادة :بعرف شو بدك تقول ، هي لا من مستواك و لا من نسبك ، هي بنت خدامة و هالخدامة بتشتغل عنكن و شايفينا كل قرايبينكن و معارفكن و رح تخجلو فيني و فيها ،انا الكل بعرفني بس ما حدا رح يعرف انو هاي بنتي و انا ما رح جيب سيرة ابدا و رح وقف شغل عنكن و انا بوعدك اذا عجبتك اطلع من حياتا نهائيا انا و اخواتا و ما نقرب عليها ابدا و اذا بدك غيرلا كنيتا و انسبا لكنيتك
ماهر:………ليش طيب ؟ليش عم تقدميلي بنتك بهالطريقة ؟
ام حمادة:انا ام و بحبن لبناتي فوق ما تتصور و قلبي عم يتقطع علين ، بنتين متل الوردة ما اجا نصيبن لهلأ مع انو ولله حلوين ما لانو بناتي يعني ،انا بدي هناء تطلع من جو الفقر يلي عايشتو عندي ، حالتنا عدم و الدنيا جاية على شتا و سقف بيتنا هلا ببلش ينش علينا مي و متل ما شايف عم اشتغل بالبيوت و ما عم لحق على مصروف اكل و شرب رغم اني مريضة و الله عالم بحالي و هلأ هي بدا تسجل بالجامعة متلها متل رفقاتا و مصروف الجامعة كبير و خجلت قلا لا و اكسر بخاطرا و قلها ما معي ، الله يخليك شوفا بالاول و اذا ما عجبتك انسى كل شي قلتلك اياه
ماهر:…يا ام حمادة شو بدي قلك ما بعرف يعني ..انت…
ام حمادة:نظرة وحدة بس و اذا ما عجبتك و لهفلا قلبك انسى الموضوع كلو
ماهر :….طيب كيف بدي شوفا ؟
ام حمادة:هي نازلة بكرا تسجل بالجامعة و فيك تشوفها اذا جيت على راس حارتنا و نطرتا لتطلع من البيت و تشوفا …ما رح ضيعلك وقتك نظرة وحدة بس
———————————-
الجزء 14:
هناء(تبكي):ايه كمل
ماهر:رحت تاني يوم و نطرتك لتطلعي من البيت و وقت شفتك طالعة من بيتك …..ما تخيلت تكوني هالقد حلوة كنت اجمل بكتير من البنت يلي بحلم فيا ،لدرجة ما اكتفيت بنظرة وحدة بس لحقتك و فتت الجامعة وراكي ،كنت كل ما تمري من جنب حدا شاب او بنت ، تلفتي نظرو و الكل يطلع فيكي ، شفتك انت و عم تضحكي و تحكي و تاكلي ، فتنتيني و كان نفسي ما اتركك لحظة ،و وقت رجعتي على البيت رجعت معك انت فتي على بيتك و انا تابعت على بيت اهلي و من دخلتي سالت امي على امك و قالتلي لسا ما اجت ،قلتلا بس تجي ابعتيا على مكتبي ضروري ،فتت على مكتبي و نطرتا و بس اجت ،فاتت لعندي و هي متوترة
———————————–
ام حمادة:شفتا ؟
ماهر:اي شفتا و يا ريتني ما شفتا
ام حمادة :ليش ؟ما عجبتك
ماهر: عجبتني و بس اخدتلي عقلي كيف هيك بنت بهالجمال ما انخطبت و تزوجت لهلأ
ام حمادة:هناء مين ما شافا بحبا و بجي يحكي فيا فورا بس وقت يدخلو عنا و يشوفو فقرنا و يشوفو اخوا حمادة يلي عندو متلازمة الداون بخافو و بروحو ما بقا برجعو
ماهر:ايوا ،ايمت بدك ابعت اهلي لعنكن يطلبوها ؟
ام حمادة: لا ما بهالسرعة الشغلة بدا تخطيط و لازم تخبر امك و انا متأكدة انو امك رح ترفض رفض قاطع لانو بنتي و كمان ما من مستواكن
ماهر:انت بتعرفي منيح انو الكلمة كلمتي بهالبيت
ام حمادة :بعرف سيد ماهر و لو ما بعرف ما كنت رح امن على بنتي عندك بس انت فاتح اهلك بالموضوع و انا كمان بحكي مع امك بطريقتي و بدي قلك شغلة اخيرة قبل ما تقرر اتابع بهالموضوع رح تتعب مع هناء اول فترة لانو متعلقة فينا كتير و هي شخصيتا قوية و عنيدة ،يعني انت لازم تكون قاسي معا و حتى لو احتاج الامر انك ضل تذكرا بفقرا عند اهلا و تضربا بس ما توجعلا كتير و تفرجيا انك قاسي عليا و ما الها غيرك و شغلة تانية انا ما بدي تعرف انو انت يلي عرضتا عليك و طلبت منك هالشي لانو ما رح تستوعب انا ليش عملت هيك و رح تعتبرني اني زتيتها و تركتا لهيك بدي نفرجيا انو هالشي صار غصب عني ،انا ما بتحمل فكرة بناتي يكرهوني …فهمت علي سيد ماهر ؟
ماهر:اممممم …بس هيك مهمة صعبة و اذا قسيت عليها احتمال تصير تكرهني و انا بطبعي عصبي كتير
ام حمادة:سيد ماهر انت قلبك كبير و حنون رغم عصبيتك و متأكدة انك ما رح تظلم بنتي معك حتى لو اول فترة استفزتك و طلعت اسوء ما عندك بس رح تضطر تسايرك بالاخير و انت كمان رح تهذب شخصيتا بطريقتك لانو بالاخير هاي شغلتك ،انا مابدي بكرا بس يصير عندا اولاد يخجلو فيني و بخالن
————————————؛-؛؛؛؛؛؛————
هناء:شو يعني ،بفهم منك انو كل يلي تصرفتو معي كان من تدبير امي
ماهر :ايه
هناء:انتوجبارين ،انتو كيف الكن قلب تعملو فيني هيك ؟و انت كنت تضربني و تسمعني ابشع كلام لدرجة صرت اكرهك
ماهر:انا ما ضربتك ولا مرة وقت رفعتك فلقة ما وجعتلك ،و حتى وقت اطلعت اضربك بالكرباج ما ضربتك ضربت فرشة التخت و ما كنت مفكر اضربك ،بس كنت شدك من شعرك بس ما توقعتك اخر مرة توقعي و تطلعي حامل و يروح الولد ،متت الف موتة وقت عرفت بهالشي ،نزلت على حديقة المشفى و ما قدرت فرجيكي وجهي لانو حسيت بالذنب بس بعدين اجو الشابين عندي واعطوني المحضر و طلعت لعندك ،انا ما بنكر انو قسيت عليكي كتير و حتى بدون ما حس بجوز لانو هيك طبيعة شغلي و بالاخير انا خفت عليكي من حالي و دقيت لامك و قلتلا تعي خديا بس امك ما قبلت و قالتلي اعطيا لسا شوية وقت و اسعالي بجازة سمر كمان
هناء:طيب ..كمل بعدين شو صار
ماهر:بعدين حكيت مع امي و رفضت اول الشي بس قلتلا انو اما لهناء ما رح تحضر العرس و رح تطلع من حياتا و رح تترك الشغل عنا و انو البنت عجبتني كتير و مستحيل اخد غيرا ،بعد ما دبرنا انا و امك تمثيلية السرقة ،راحت طلبتك و وقت شافت اخوكي رجعت رافضة كمان بس انا رجعت قلتلا انا يلي بدي اتزوجا ما انت ،ارجعي احكي فيا ، و بعدين صار كل يلي صار
هناء:و البنت يلي جبتا معك تقضي ليلتك معا ؟
الجزء 15:
ماهر:انا جبتا لجاكرك بس ما لحتى نام معا لاني بقرف و هاي بنت ليل بس وقت شفتك ما فرقت معك عصبتيني كتير و حسيت انو وصلت معك لاخر مرحلة و ما ضل شي اعملو اكتر من هيك
هناء:اي وحدة بمحلي كانت رح تكون معك هيك ؟
ماهر:انا حرمتك من اهلك لانو انا كمان عندي اخت و بدي زوجا و افرح فيا و ما بدي الناس تعرف اني اخد بنت الخدامة يلي الكل شايفا عنا ،بضطر باختي و بنصيبا
هناء:بس انت قاسي كيف بتضرب اختك و انت بتعرف انو ما الها علاقة
ماهر:لاا انا ما ضربتا و لا بضربا هاي اختي الوحيدة ،انا صرخت عليها بس و قفلت باب الغرفة و خليت يتهيألك اني عم اضربا حتى تخافي ،انا انسان كويس ما وحش و مستقوي متل ما وصفتيني بس كمان انا ما توقعتك لهل الدرجة تعذبيني و يكون راسك يابس
هناء:بس حتى لو كنا فقرا كتير ،امي ما من حقا تعمل فيني هيك و لا انت ،انا بدي اطلق منك
ماهر : …..!
هناء :اي بدي اطلق و بكرا راجعة على بيت اهلي
ماهر:روحي بس امك ما رح تستقبلك ،لازم تفهمي شغلة انو ما الك الا حضن زوجك
فتت نمت انا و عم ابكي من الشي يلي عرفتو ،و تاني يوم لبست و بدي روح عند اهلي
ماهر :رح ابعتك بالسيارة المفيمة بتنزلي على الباب و بتقعدي ساعة وحدة بس و برجعك الشوفير
هناء:ما رح ارجع
ماهر :لا رح ترجعي لانو امك هي يلي تقلك ارجعي
رحت عند اهلي و فتت قعدت مع سمر و حمادة لبين ما ترجع امي من السسوق و وقت اجت
ام حمادة : شو جابك لهون ،روحي و ما بقا ترجعي
هناء:كيف الك قلب تعمل فيني هيك ؟كيف اجا من قلبك تعطي بنتك لواحد و تقليلو اقسى عليها و اعمل يلي بدك اياه ؟
ام حمادة : اي الي قلب ، لما بتقليلي لازمني بلوزة و ناقصني بنطلون و انا ما معي لجبلك او جيب لاختك ،و انا يا دوب شغلي اطعميكن و اسقيكن فيه ، لما جيتي و قلتيلي بدي سجل بالجامعة ،كيف دبرتلك رسم التسجيل ما حدا بيعرف ، و شغلات كتيرة قصر عن حالي و عن دواي لاعطيكن و لايمت لايمت هالوضع و هالعذاب ، و بقول يلا بكرا بيجي نصيبكن و مين ما اجا بروح ما بقا
ما بقا بيرجع ،شو عم احكي صح الا لا ؟
هناء:ليش ما قلتيلي من الاول هيك ،كنت سكتت و سايرت زوجي و اختصرت عذاب عليه و على حالي
ام حمادة :لاني غبية لانو ما كان بدي تفكري انو انا مستتقلة ب لقمتك و كرمال المصاري اعطيتك لواحد بعرف انو رح يحرمك من اهلك و ما بقا سالت عنك ،كان بدي تبقى الي صورة حلوة ببالك عرفتي ليش؟ و هلا ارجعي لبيت زوجك و ما بقا تجي لهون
هناء:انا طلبت الطلاق من ماهر و ما بدي ارجعلو انا بكرهو
ام حمادة : لانو على كيفك الشغلة ،انا ما رح استقبلك ببيتي هون و ما عندي وقت اخد و اعطي معك اكتر جاين جماعة يشوفو اختك سمر
هناء:اه بدك تزوجي اختي كمان بنفس الطريقة و تخلي زوجا يهينا و يضربا
ام حمادة : لا هالمرة انا فهمتا لاختك سمر انو وقت تطلعي من هالبيت ما عاد الك رجعة الو ،و اختك قدرت تفهم و تستوعب و بدا تساير زوجا و تمشي متل ما بدو
هناء:لك انت شو ؟بدك ايانا ننساكي نعتبرك ما كانك موجودة كرمال بس شو
ام حمادة : كرمال اني خدامة و الناس بتعرفني خدامة و ما حدا رح ينسى بيوم اني كنت خدامة ، اعتبريني متت انا و اخوكي و زوجك منيح بحياتو ما زعجني بكلمة بالعكس قلي اقعدي ببيتك و ما تشتغلي و كل شهر خصصلي راتب ببعتلا اياه مع الشوفير و بحكيني على طول و بطمني عنك ، روحي امي يلا الله يرضا عليكي ارجعي لبيت زوجك ،الدنيا هيك ناس لازم ضحي كرمال ناس وهيك الام بضحي كرمال اولادا و انا ما زعلانة بالعكس مبسوطة ، المهم انتو تكونو مبسوطين و ما ناقص عليكن شي ،و هاي اختك سمر متلك متلها ،ديرو بالكن على بعض و زورو بعض و انسوني اول عن اخر رح روح من هالدنيا
وقفت انا و متفاجئة ،اطلعت على سمر شفتا كمان عم تبكي ،وقفت على بيت اهلي وانا عم اطلع بالحيطان و الزوايا و العفش و بامي يلي كانت واقفة و صالبة حالا و حابسة دمعتا و طلعت من البيت يلي ربيت فيه و ما عارفة احقد على امي او بررلا و اعذرها ،و رجعت على بيتي جنتي و مقبرتي ،و حطيت راسي على المخدة و بكيت كتير و نمت و ما فقت لوقت رجع ماهر ،قرب فيقني
ماهر:شبك هناء ،ليش نايمة بهالوقت ؟
هناء:ولاشي بس راسي عم يجعني شوي
صارت علاقتي انا و ماهر متل اي اتنين متزوجين هادية و مستقرة ،وخبرتو عن ساري انو طلعت سحاقية و قلعا فورا و من هداك اليوم ما بقا جبتلو سيرة اهلي ابدا ،بس كنت حزينة و مكسورة كتير و لاحظ هالشي علي ماهر لانو كنت اقعد معو و اشرد كتير و روح لعالم تاني ،كان يسالني كتير
ماهر: هناء انت بتحبيني؟
هناء:…..
ماهر:كل مرة بسالك هالسؤال و بتسكتي او بتتهربي ،فيكي تقول لا ما بحبك عادي قوليها
هناء: ……..
بعد 4 شهور اجتني كرت الدعوة لعرس اختي سمر على رفيق ماهر الضابط مهند يلي حمد و شكر فيه كتير ماهر و خاصة انو ابن دفعتو و معاشرو منيح ،رحت حضرت عرسا و ما كانت لا امي و لا اخي حمادة ، و انا بعرسا قربت لعند سمر و سالتا اذا امي شافتا قبل ما تفوت على الصالة ،قلتلي ايه جابا مهند شوي و رجعا و اخدت رقم موبايلا لسمر و رقم موبايل امي و بعد ما رجعت من العرس تاني يوم دقيت لامي
هناء:الو
ام حمادة : …….
هناء:بعرف انك عم تسمعيني انا دقتلك لاعتذر منك عن اخر مرة بس … انت بتعرفيني منيح انا قوية و لو ما قوية ما كنت قدرت اتحمل كل هالشي ،بس كان ناقصني شوية حيلة و مكر و هالشي انت ما ربيتينا عليه
سكرت الخط معا و دقيت لسمر و اطمنت عليها و سالتا اذا اكلت فلقة من الضابط مهند ،صارت تضحك و قلتلي لا انا تربيت منك و من قصتك ،وسالتا عن حال امي قبل ما تطلع من عندا سمر،قالتلي تعبانة ولله بس ماشي حالا ،بعد ما خلصت مكالمتي مع سمر ،بكيت كتير و خفت يصير معا شي او تموت قبل شوفا و اشبع منا ،صح كنت عايشة بعز و غنى بس ما كنت مبسوطة ابدا و كانت امي ما تغيب عن بالي هي و اخي ،نطرت ليجي ماهر و فاتحت معو الموضوع
هناء:انا كنت معك خلال هالفترة زوجة مثالية ،كل شي تقلي عليه قلك ايه و ماشي ،قلتلي ما الك روحة على الجامعة لانك بتغار علي و قلتلك متل ما بدك ،قلتلي ما الك طلعة لحالك ،قلتلك متل ما بدك ،قلتلي ما تلبسي قصير او مكشوف قدام الناس قلتلك ماشي ،حتى بتسربحة شعري و باكلي دخلت ،بس في شغلة انا ما بقا بقدر سايرك فيا ،انا بدي صير شوف امي و اخي
ماهر:….هاي اختك سمر متلك متلها ،ما بعتقد بكرا تخرب حياتا من ورا هالشغلة ؟
هناء:انت اخد هناء ما اخد سمر ،اختين و طبعين
ماهر:شو خطر على بالك هالسيرة هلأ ،سكرناها من زمان
هناء:ما بحياتي سكرتا ،بس كنت مصدومة من امي و حاقدة عليها و ما كان بدي شوفا بس هلأ رقت و هديت
ماهر:امممم بعدين مين قال انك زوجة مثالية ؟شو هالزوجة يلي ما بتقول لزوجا كلمة بحبك من اول ما تزوجو لهلأ
هناء:الحب ما بكبسة زر ،الحب بدو وقت و بدو افعال من الطرف التاني حتى نحبو
ماهر:اممم يعني انت ما بتحبيني ؟
الجزء 16:
هناء:…..
ماهر:شفتك سكتي
هناء: انا ما عم قلك بدي شوف امي عندي او روح لعندا ،بشوفا بالسيارة او شي حديقة
ماهر :جاوبي ..انت ما بتحبيني؟ …هلأ بدي اعرف
هناء:و انا طبعا ما عم اسالك لانو انا مقررة بهالموضوع
قام و صار يكسر بالبيت ،حسيتو رجع ماهر يلي كان من قبل 4شهور بس هالمرة انا كنت بعرف تماما انو انا يلي استفزيتو و وحدة تانية بتقلو اي بحبك و بتسايرو ،بس انا ما قلتا عمدا حتى ما تبرد همتو و يحققلي طلبي حتى يسمعا مني ،قرب علي و مسكني من ايدي
ماهر:قولي …بدي اعرف …بتحبيني الا لا ؟
هناء:غريب ليش بهمك تعرف رايي بالموضوع ، و انت بكل شي رايك هو يلي ماشي ، و بهالموضوع كمان انت قرر كمان ،انت واحد عندك حب التملك و تملكتني و منعتني عن اهلي و عجبتك الفكرة كتير ما كرمال بس نسبي او فقر امي، لا انت كنت حابب كون الك لحالك و حبك الك بس و ما حب حدا غيرك حتى امي و اخي ،بس امي اليوم هون و بكرا يمكن ما هون ،و انا ليكني عندك و رح ابقى عندك و ما طالعة من عندك الا على القبر
ماهر:ليش هيك عم تحكي؟ كل هالقد الحياة معي بشعة و غاصبك عليها،انا بس بحبك كتير و بخاف عليكي من الهوا الطاير ، بعدين امك هي يلي رفضت تستقبلك عندا
هناء:لانو ما بدا اياك تدايق انت و اهلك …ماهر انا ما بكرهك لانك انت ساعدت امي كمان
ماهر:ما بتكرهيني بس لانو ساعدت امك ،يعني انا ما بنحب
هناء:لا ما قصدت هيك
ماهر:شو بدك مني هلا ،شو المطلوب ؟
هناء:بدي شوف امي بالاسبوع مرة
ماهر:طيب حاضر و هيك بتكوني مرتاحة و مبسوطة معي
هناء: اي بس حكيا و قلها اني بدي شوفا برضاك حتى تقبل
ماهر:ماشي
بعد يومين رحت شفتن بحديقة عامة و قلتلا لامي كيف بتفكري انو انا ممكن مبسوطة بالشي يلي عملتيه ،كنت عايشة بعز بس ما كنت مبسوطة و سعادتي ناقصة ،قلتلي بس تصيري ام رح تبرريلي ليش هيك عملت و انا ما اعطيتك لواحد ما بيسوى ،اعطيتك للضابط ماهر اسمو و اخلاقو اشهر من السيف على علم ، بعدا صرت كل اسبوع شوفن مرة و بعد شهر صرت روح انا و سمر ،تغيرت نفسيتي كتير عن قبل و ما صدق ايمت يجي هاليوم بالاسبوع لنجتمع كلنا و نقعد نضحك و نتسلى و احكيلن عن فصولة ماهر اول ما تزوجنا و اديش كنت عاندو ، كنت ارجع على بيتي انا و مبسوطة حتى بلش ماهر يلاحظ الفرق بين حالتي قبل و بعد و هالشي انعكس عليه كتير و خاصة وقت طلعت حامل ،انا انبسطت و هو انبسط كتير و مرة اجا هلى البيت
ماهر: انا بعتت العمال اليوم على بيت اهلك يزبطولا السقف و يلبسولا الحمام سيراميك
هناء:عنجد ماهر
ماهر:اي جد بس انا شو بيطلعلي من هالقصة ؟
هناء:ما فهمت شو بيطلعلك ؟
ماهر:ما فهمتي؟
هناء:اه اه بيطلعلك بوسة
قربت عليه و بستو
ماهر:بوسة !مين قال بدي بوسة
هناء: لكن ؟
ماهر:انت بتعرفي انا شو بدي
هناء:….طيب
ماهر:يلا
هناء:انا بحبك
ماهر:الله.. ارجعي عيديا كمان و كمان
هناء:بحبك و بحبك و بحبك…ليك ماهر بما انك اليوم رايق و متكارم معي ،شو رايك تحطلي اخي بمدرسة لذوي الاحتياجات الخاصة
ماهر:اممم بحطو بس بشرط بدك تقليلي
كلمة بحبك على طول بدون ما اطلبا منك
هناء:لا ما حذرت ههههه
ماهر:بلكي بدي حطك على بساط الريح هالمرة ههههههه
انتهت.