قصه احترسي المجهول بقلم هلا الغرابلي



الجزء الاول :

مي : كلن كلن عم يحبو و ينحبو و ينخطبو الا انا …انا ام حظ ناقص لك العين تطرقني على هالحظ ،ليش اصلا مين رح يطرقني عين ،ما في شي لانطرق عين عليه ،امي انا لازم حرك حالي

ام مي: يختي حركي حالك مين ماسكك يعني انا كتير مبسوطة على قعدتك بوجهي ، البنات الشاطرات بتعرف كيف دبر حالها مش متلك مقضية الجامعة سيرانات قلتيلي فوتيني على الجامعة لجبلك عريس مثقف و متعلم على اساس وينو هالعريس

مي: ما حدا اطلع بوجهي شو اعمل ؟ولله انا حلوة ما بشعة ،ليش لهلا ما اجى نصيبي ،امي بدك تشوفيلي شي شيخ يكتبلي كتيبة و يعملي سحر تخلي اي شاب يشوفني يوقع بغرامي فورا و يجي يخطبني ، يعني فتح نصيب بس .

ام مي : كلو حكي فاضي بس رح اشفلك خالتك ام صبحي هي بتعرف بهيك قصص…

مي: ايمت ؟ دقيلا هلأ و اساليا و روحو بكرا عند الشيخ …ايمت بدي حط حالة عالواتس انا و نوتيلتي قصة عشق لا تنتهي

ام مي: انشالله يكون نوتيلا و ما يطلع غوريلا بعد كل هالنطرة

اتصلت امي بخالتي ام صبحي و قلتلا في شيخ اسمو ابو مسعود هيدا الشيخ شاطر بهيك قصص ،منروح لعندو بكرا ،راحت امي و خالتي و ما قبلو ياخدوني ابدا ،رجعو بعد ساعتين و جايبة امي معا الوصفة يلي رح تجبلي العريس المنتظر و تعلقو بشباكي

ام مي: خدي هدول الاربع وراق بتنقعين اربع ليالي و بتشربي ميتن ،كل ورقة ب لتر مي

مي: شو مكتوب علين ،ما مفهوم

ام مي : ما مهم ما مهم الشيخ ادرى بهيك قصص شو بدنا ندخل بشغلو كمان

مي: طيب طيب شو كمان قلك ؟

ام مي: في هاي الورقة كمان، كتبلي عليها شو لازم تعملي انت و عم تشربي مية الورق ، اول لتر لازم تقفزي قفزات ضفدعية 5خطوات لورا و 5خطوات لقدام و تشربي المي و تتشقلبي 5شقلبات متتالية و تقولي اللهم شقلب حياتي شقلبة

مي: اتشقلب!ليش ؟

ام مي: قال حتى مفعول المي يتوزع على كل الجسم

مي: كملي

ام مي: اللتر التاني هيدا لازم تشربي شوي منو و تتحممي بالباقي و اللتر التالت لازم تقراي عليه هالكلام قبل ما تشربيه (شبرك بربرك قرب مي بنت سعاد طالبة قربك و بعدين بتقولي انا فاتنة الجمال 3مرات و بتنفخي بالمي و بتقولي انا محظوظة 5مرات و بتنفخي بالمي و بتشربين

مي : و الرابع

ام مي : يع هيدا مقرف لازم تشرب قطة منو قبل ما تشربي منو قال حتى تصيري نعومة و مقطقطة

مي: اه عادي يعني القطة حيوان اليف

ام مي : اه كمان لازم تشربين كلن بيوم واحد قبل ما تغيب الشمس و لازم تنامي بهديك الليلة بوضعية الخفاش

مي: خفاش!شو يعني؟

ام مي: تنامي انت و رافعة رجليكي لفوق و راسك تحت و الافضل تربطين بحبل و تعلقيه بالسقف و رح تصبحي انشالله مطلوق نصيبك و بعشرة ايام بتنخطبي

مي:يوووو هاي صعبة كتير

ام مي : بدك تنفذين كلن مش دفعت كل هالمصاري و بالاخير تقليلي صعبة و ما قادرة

مي : طيب هاتي لانقعن من هلأ يا دوب لحق

ام مي : صحي سالني اذا في واحد محدد براسي و حابين نعملو جلب او ربط بس قلتلو لا ما في لسا

مي: هو يجي بس و منعملو ربط و لزق

نقعت الورق و اشربت ميتن و انتفخ بطني لدرجة حسيت حالي حامل بالشهر السابع و طبقت كل شي قلي اياه الشيخ ابو مسعود بالحرف الواحد و نمت هديك الليلة رجلي فوق و راسي تحت حسيت حالي متل الخاروف يلي بعلقوه ليقطعوه و فقت تاني يوم كل جسمي مكسر ،لبست و ترتبت و قلت رح انزل على الجامعة حتى شوف مفعول الكتيبة ، فتحت الباب

مي : امي انا رايحة على الجامعة ادعيلي

ام مي : الله معك…. الله ياخدك لبيت زوجك عن قريب

….الله يفشكلك بشب ابن حلال

طلعت من البيت و جيت لانزل على الدرج و فجاة شفت شب طلع بوجهي و قلي صباح الخير ، قلتلو صباح النور ،(لك شو هالصباح هيدا ،لك ولا صباح طلع علي متل هالصباح ) ، وقف كانو عم يدور على بيت حدا و ضايع ،قلت يلا يا بنت هاي فرصتك اقتحمي ،انت لها

مي: عفوا عم دور على بيت حدا كانك ضايع ؟

….اي انا هون مستأجر جديد و مبارح وقعت عقد الاجار و صراحة ما بقا اتذكر هادا البيت الا يلي تحتو و ما حابب افتح اي باب بالمفتاح بخاف يكون مسكون

مي (اه هو دا اه هو دا): انت استاجرت عند ابو وفيق

….اي صح

مي : اي معناتا هيدا البيت يلي قبال بيتنا

….اي يعطيكي العافية

وقفت عم اطلع فيه متل اللبخة ،ييي عندو غمازة و دقن و عضلات مفتولة يعني جلطة ثلاثية الابعاد،فتح الباب و تركو مفتوح وفات و بعدين طلع نادى لواحد اسمو ابو محمد بانو يبلشو يطلعو العفش ، بعدين اطلع فيني و شافني بعدني واقفة ، اصلا انا نسيت حالي انو بعدني واقفة ، نزلت راسي و خجلت و فتت على البيت

مي : اميييي….اميييي…كتيبة ابو مسعود بلشت تعطي مفعولا

الجزء التاني:

ام مي: شبك بنتي …ليش رجعتي من الجامعة؟

مي: امي شو شفتلك شوفة …اجا شب حلو كتير يستأجر عند ابو وفيق قبال بيتنا

ام مي: اي نحن شو دخلنا ؟

مي: كيف شو دخلنا !!شو نسيتي كتيبة ابو مسعود،هالكتيبة هي يلي جابت هالشب يسكن قبالنا حتى يطلع من نصيبي

ام مي: وللله …روحي روحي على الجامعة

مي: لا لشو بقا لروح …

فتت على غرفتي و غيرت تيابي بسرعة و طلعت على برندتي ،ممتاز موقعا استراتيجي على صف برندتو ،اتصلت برفيقتي هبة ام الخطط الجهنميةو يلي عندا خبرة بهيك شي و قلتلا تجي عندي و بعد ساعة اجت و قلتلا انو في شب سكن قبالنا حطيلي خطة تكتيكية لخليه يحبني و يجي يخطبني بسرعة ، اعطتني كام شغلة لبلش نفذن تاني يوم

تاني يوم الصبح طلعت على البرندة و فتت و طلعت بحدود العشر مرات و انا ناطرتو ليطلع و اخيرا طلع هو و ماسك فنجان قهوة ليشربو على البرندا ،دخلت فورا و شغلت اغنية ابن الجيران لنانسي عجرم و طلعت لطبقها قبالو ،هو يطلع فيني يبتسم و يدير وجهو ،انا قلت خلص خلص وقع و ما حدا سم عليه ،بعدين قلت يلا خليني ابادر لانو شكلو من النوع التقيل

مي: صباح الخير

مجهول: صباح النور

مي: انت يلي مبارح سالتني عن البيت مو ؟

مجهول : اي انا هو

مي : كيف شفت البيت و الحارة ؟

مجهول : تمام لحد الان ،لسا هيدا اليوم الاول الي هون

مي : اي صح انشالله تنبسط بحارتنا ،انا اسمي مي

مجهول: و انا اسمي قيس

مي: انت من هون ؟لانو لهجتك كانو ما من عنا

مجهول: اي صح انا ما من هون ،انا دارس معلم صف و ساكن بالشام و اجا تعييني عنكن

مي: اي نورت ،كانو ساكن لحالك ؟

مجهول: اي لحالي ،شو عمرك انت؟

مي: انا عمري 20سنة و بدرس ادب انكليزي سنة تانية

مجهول: اي معناتا اذا حكيتك انكليزي بتفهمي علي

مي: ههههه ما كتير لسا

مجهول:ما تخافي انا ما كتير شاطر بالانكليزي و بدي تقوية كتير بس بما انو صرنا جيران بتساعديني

مي: اي طبعا

و انا عم احكي معو ، طلع صوت امي ياااا مي يااا مقصوفة الرقبة تعي اجلي الجليات ،يالله على هالخجلة هلا وقتك يا امي

مي: عن اذنك مامي عم تناديلي

قيس:الله معك

فتت على البيت و انا ما الي قلب اترك البرندا

مي : لك جيت جيت الله ياخدا لمي ….السرلنكية تعيتكن مي …..العمر بيخلص و الجلي ما بيخلص و انا عم اجلي خطرت ببالي فكرة ،نطرت امي لتخلص طبخة الملوخية و تفوت تنام قيلولة الضهر و سكبت صحن ملوخية لقيس و رحت عندو ،دقيت الباب دقات ناعمة و بعد شوي اجا فتحلي

قيس: اهلين مي

مي: اشتهتك امي بصحن ملوخية

قيس:يسلم ايديكي و ايديها ولله ما في داعي تعذبي حالك ،تفضلي

مي: لا مرة تانية انشالله

اعطيتو الصحن و رجعت على البيت ،فتت على غرفتي و بلشت حط اغاني حب و غرام و اعلي الصوت حتى يسمعن قيس

رحت تاني يوم عندو بحجية بدي الصحن يلي سكبتلو فيه مبارح

قيس: اهلين مي ،اكيد جاي بدك الصحن

مي: اي صح

قيس: بس خجلان رجعلك اياه

مي: لا عادي ولا يهمك ما فارقة بيناتنا

قيس: طيب معناتا فوتي لشربك فنجان قهوة من تحت ايدي على الاقل

ترددت كتير قبل مافوت

قيس: فوتي شبك خايفة ما باكل انا بني ادمين

مي: ههه لا ما خايفة و هاي رح فوت بس ما رح طول

فتت عندو و قعدت على كنباية و هو فات على المطبخ يعمل قهوة و بعد شوي اجا و جايب القهوة معو

مي: انت ايمت دوامك ؟

قيس: انا من ال8الصبح ل 12الضهر بس و برجع على البيت

مي: بتقضي باقي نهارك بالبيت ؟

قيس: اي انا ما بعرف حدا هون لسا و ما الي اصدقاء بس هاي انت اول صديقة الي

مي: اي اكيد بتشرف

قعدت عندو ربع ساعة و حكينا فيا عن جامعتي و عن مهنة التدريس و بعدين استاذنت لروح

قيس: انا انبسطت و تسليت كتير بزيارتك على طول زوريني

مي: اي طبعا

طلعت من عندو و انا مبسوطة كتير من انو تطورت علاقتنا فورا و صرنا اصدقاء

بعد يومين رجعت رحت عندو و اخدتلو سكبة رز بعدس بس بدون ما تعرف امي ،و فتت لعندو و راح فورا عمل فنجان قهوة و اجا قعد جنبي

قيس: مي انت مرتبطة …يعني بتحبي حدا؟

مي: انا لا ابدا

قيس: ما حبيتي حدا من قبل …يعني ما كان عندك علاقات سابقة؟

مي: لا ابدا ،ما اجا الشخص يلي خلاني حبو لهلأ

قيس: طب انا بعجبك؟

بين علي اني خجلت فورا و احمر وجهي و نزلت راسي وقلت اكيد عم يجس نبضي

مي: اي يعني انت شب كامل مكمل و بتعجب اي بنت ما بس انا

قرب علي و حط ايدو على وجهي

قيس: و انت كمان بنت بتجنني متل القمر ،كاملة مكملة ،اول ما شفتك لفتيلي نظري فورا ،عندك جاذبية قوية

مي(الله عليك يا ابو مسعود ):عن جد

قيس: اي عن جد جذبتيني فورا …بتعرفي صرت عم فكر فيكي كل يوم و كل ساعة و قبل ما نام و اول ما فيق

قرب علي اكتر و باسني من خدي و بعدين من شفايفي، بعدت عنو و قلتلو انا لازم ارجع على البيت ،هلا بتكون امي استفقدتلي

قيس: ماشي الله معك بس ما طولي علي ،ولله عم حب شوفك و اقعد معك بوحدتي

مي: اي اكيد

الجزء التالت:

طلعت من عندو بسرعة و قلبي عم يدق بسرعة و حاسة بدوخة خفيفة ،هاي اول مرة حدا ببوسني بس شعور حلو كتير ،فتت على غرفتي و تسطحت على تختي و شغلت على اغنية اول مرة تحب يا قلبي و ضليت ساعة و ساعتين على نفس الوضعية و انا عم فكر بقيس و حكياتو و بالشي يلي صار بيناتنا ،المسا سمعت صوت شي انزت على برندتي،قمت ركض و شفت ورقة ملفوفة مسكتا و شفت قيس واقف على برندتو و قلي افتحي اقرأيا و ناطر رسالة منك ،فتحت الرسالة و كان مكتوب فيا

اسقيني حبيبتي من شفتيـكِ خمـر

فالخمر مصنوعٌ مـن رحـيـق شفـتيكِ

ضمـينـي بيـن أحضـانُكِ فـلا مسكن

يـدفءُ حـــنيـنـي وأشـــواقـي إليـكِ

أعــشــق تفاصيـلُكِ فعـنوان خريـطة

عـــالـمــي تــقــع عــنــد جـسـدُكِ

أرغبُ بالنوم لمدة عامٌ على شاطئُكِ

لأُعــوض حــرمـان غـيــــابُـكِ عــنـي

سأُعلـن الـحـربَ بـجيـوش أشواقـي

ســــأغـــزو خـــــارطــــة جـســدُكِ

ســأجعــلـهــا حــربٌ هــوجـاء وأقتلُ

ســـفيـــر الأشـــــــواقــــ بــيــنـنــا

فـلـن تـهـدأ تـــلك الـحــرب إلا وأنـتِ

أسيـرةُ بسجـن قلبـي يانبـض قلـبي~

قرات الرسالة 10مرات و كل مرة يدق قلبي اكتر من المرة يلي قبلا و حسيت حالي طايرة بالسما و بين الغيوم ،ما عرفت شو بدي رد على هيك كلام اول مرة بحياتي بسمعو ،طلعت ورقة و بلشت اكتبلو عليها

ايها الغريب من أين اتيت… بحثت عنك طويلاً من وجوهِ المارين في دواوين العاشقين، في ما سطرته اساطير الحب عبر السنين، أخذتَ بيدي إلى عالمٍ أخر كأنهُ فوقَ الغمامِ بين كواكب المشتري والميزانِ حيثُ يسبح الخيال بطيفه كالنسيم، حلّقت بي بجناحِ الحبِ، ارفرِفُ كملاكٍ وانجمُ الكونً تعزف الحاناً وترانيم ذاك العشق الجنون

طويت الورقة و زتتلو اياها على البرندا ،فتحا و قرأها و اطلع فيني و صرنا نضحك ، بعدين صرنا على طول نبعت لبعض رسائل شعر او كلام عادي و اخرة الرسالة يكتبلي فيا انا ناطرك بكرا حاولي تجي او خليني شوفك بالحديقة ،صرت شوف قيس كتير احيانا بالحديقة و معظم الاحيان بالبيت عندو و مرة استغليت عدم وجود امي و اخواتي بالبيت و رحت لعندو ،فتحلي الباب و سحبني من ايدي و بلش يبوسني

مي: قيس بعد عني ما اتفقنا هيك ، صاير عم تغمق كتير معي و هالشي ما لازم يصير بيناتنا قبل ما تخطبني

قيس: انا عم اشتقلك كتير انت ما بتتقاومي

فلتت من بين ايديه و فتت لجوا

مي: ما بدك تشربني قهوة ؟

قيس: اي بدي شربك بس لشوفك بالاول ،الك اديش ما جيتي لعندي مو حرام عليكي

مي: ما بقدر على طول اجي ،اليوم امي راحت عند خالتي لهيك قدرت اجي

قيس: طيب تعي لهون

مي: قيس اذا بتريد ما بصير يصير هالشي بيناتنا هلأ ،تعا خطبني بالاول

قيس: رح اجي بس لافتح مع اهلي الموضوع و هلأ ستي توفت من فترة لهيك خجلان افتحلن سيرة خطبة و جازة ،شبك مبعدة ..قربي ولو …كانو لمحت شامة عندك

انتبهت على قميصي بانو مفتوح ، تلبكت كتير و بكلت ازرارو فورا

قيس : ههههه خلص شفت كل شي

مي: ما ابيخك انا راجعة على البيت

قيس: يالله منك لسا هلأ جيتي ما لحقت شفتك منيح ،ما الك روحة

مي: بخاف يجي ابي فجاة

طلعت من العين الساحرة لشوف اذا في حدا طالع او نازل ، و قبل ما افتح الباب و اطلع رجع قرب علي قيس ،بعدتو عني و فتحت الباب و ركضت على البيت و المسا كنا عم نتعشى انا و اهلي و عم نحكي ،قالت امي

ام مي: اليوم انا و راجعة من عند خالتك ام محمد و طالعة على البيت وقفتني وحدة و سالتني عن واحد اسمو قيس قال مستاجر عنا بالبناية ،انا قلت يمكن هيدا يلي ساكن قبالنا

مي: وحدة ؟مين هاي !

ام مي: قالتلي بتكون مرتو و على ايدا ولد عمرو بالسنة و بالايد التانية حاملة شنتاية كبيرة كانو هلا جاية من السفر

غصيت باللقمة و قلتلن دايمة و رحت فورا على غرفتي و انا عقلي ماعم يستوعب ،قيس طلع متزوج و عندو ولد ، كذب علي و استغلني و خلاني حبو و اتعلق فيه و بالاخير طلع متزوج ،طلعت و فتت على البرندا بس لالمحو و حط على عينو بس ما شفتو ابدا ، بقيت طول الليل ابكي و طلع الصبح علي تاني يوم انا و عم ابكي و مكتئبة و بقيت اسبوع بالبيت ما طلعت خطوة منو ،بعد اسبوع نزلت على الجامعة بعد ما اجت عندي رفيقتي هبه و خبرتا بكل شي صار معي ،و اصرت انو انزل غير جو و وقت رجعت صدفت قيس على درج البناية طالع على بيتو ، اطلعت فيه نظرة قرف و استحقار من تحت لفوق و تابعت طريقي ،مسكني من ايدي

قيس: مي…شبك

مي: اترك ايدي يا كذاب ….طلعت متزوج و عندك ولد

قيس: مي…انا كنت بدي خبرك بس ما عرفت كيف …انا مرتي بتكون بنت عمي و ولله ما بحبا و اخدتا غصب عني

مي: انت واحد واطي و اوعى تطلع بوجهي مرة تانية

قيس: مي انا ولله حبيتك

مي: حب مرتك و ابنك اولى فيك

طلعت على بيتي و فتت على غرفتي و رجعت ابكي و رجعت قرات رسائلو من جديد و ابكي بعد ساعة سمعنا اصوات ناس عم تعلق مع بعضا،مسحت دموعي و طلعت على الصالون ،شفت امي فاتحة باب البيت شوي

مي: شوفي امي ؟

ام مي: هادا جارنا الجديد قيس كانو عم يضرب مرتو الله يكسر ايديه ،رح يموتا الحقير، وين اهلا!

ركضت على الباب و وقفت جنب امي ،اسمع اصواتن ،و دعيت لربي ما اكون انا السبب من ورا هالمشكلة لانو مرتو ما الها ذنب و لا انا الي ذنب

مي: عرفتي ليش عم يضربا؟

ام مي: شو بعرفني شو انا عايشة معن

و فجاة انفتح باب بيتن ،سكرنا بابنا فورا ،و سمعنا صوت قيس عم يقلا لمرتو انقلعي ما عاد بدي اياكي و سكر الباب ،وقفت مرتو عم تبكي برا و تترجاه ليفتحلا الباب و تقلو ما في حدا روح لعندو

ام مي : الله لا يوفق هيك رجال ولله تقطع قلبي عليها رح فوتا عنا

فتحت الباب امي و نادتلا ،التفتت علينا

ام مي: تعي خالتو فوتي عنا بس يهدى و يروق زوجك بترجعي احسن ما تبقي هيك بالبناية و يشوفك حدا

فاتت مرتو لقيس عنا هي و عم تبكي و انا واقفة بارضي و مصدومة من الشي يلي عم شوفو ،كانت بنت طويلة و نحيفة شعرا اشقر و عيونا زيتوني ،ما شفت بجمالا و نعومتا بنت ،بس كان وجها احمر كتير و تحت عينا ازرق و عم ينزل دم من شفتا من كتر الضرب ،فوتتا امي عنا و جابتلا كاسة مي ، و انا جبتلا محارم و معقم ،قربت عندا واعطيتا اياهن و قعدت جنبا

الجزء الرابع:

مي: معقول في رجال وحوش هيك …وين اهلك؟

مرة قيس: انا ما من هون ،انا من الشام و اهلي بالشام …الله يخليكن فيني استخدم تلفونكن لاحكي اخي

ام مي: اي اكيد تفضلي

اتصلت باخوا و قلتلو انو زوجا ضربا وقلعا و هي عند الجيران هلأ و اعطتو العنوان و قلتلو انو يجي لعندا فورا ،سكرت الخط مع اخوا

مرة قيس : الله يخليكي خالتو فيني ابقى عنكن بس لبين ما يجي اخوي شغلة ساعة بس

ام مي : اي طبعا انت متل بنتي …مي خديا على غرفتك لتاخد راحتا

اخدتا لمرة قيس على غرفتي و اول ما فاتت ركضت فورا ضبيت الرسائل يلي كان يبعتلي اياهن زوجا

مي : تفضلي ارتاحي ،شو اسمك انت ؟

مرة قيس : انا اسمي حنين

مي : و انا اسمي مي، هاي اول مرة بيضربك؟

حنين : لا مو اول مرة بس هاي اول مرة بعرف اهلي بهالشي

مي: يالله طب ليش ضربك ؟

حنين: ما بعرف فجأة اجى معصب على البيت و شافني عم حمم الولد بمي فاترة و قلي انو عم حممو بمي باردة و انو هلا بيمرض و بعدين تخانقنا و هجم علي ضربني

مي: طيب ولا يهمك رح اعملك فنجان قهوة حتى تروقي اعصابك

طلعت من غرفتي على المطبخ وانا عم اعمل فنجان قهوة ،صرت فكر بانو اديش قيس انسان سيء و كنت مخدوعة فيه و اخدة فكرة عنو بانو انسان جنتل ،و اديش انسان ندل ما بس انا كنت ضحيتو و مرتو كمان ضحية نزواتو ،رجعت لعند حنين يلي كانت بعدا عم تبكي ،قعدنا نشرب قهوة

مي: كيف تزوجتو ،قصدي يعني حبيتو بعض الا زواج تقليدي؟

حنين: انا و قيس اولاد عم ، حبينا بعض كتير و اجا يخطبني كذا مرة بس اهلي ما وافقو عليه لانو كان تبع قصص بنات بس انا قلت بكون عقل بعد ما حبني و بعدما نتزوج بس ما عقل ابدا و كل فترة بلقطو مع بنت شكل

مي: الله يهديلك اياه،ليش ما جيتي معو اول ما اجا سكن هون ؟،يعني هيك بتبقي فوق راسو

حنين: اخ بس ليش قلي وين ساكن ،تركني عند اهلي و نزل لهون و انا عرفت بعدين من رفيقو وين ساكن و جيت لحالي انا و ابني و وقت شافني تفاجأ و حسيتو ما انبسط ابدا

مي: اممم يلا طولي بالك ،هلا بيجي اخوكي و بحلها انشالله

حنين: انا ما بحب خبر اهلي لانو بيكرهو كتير و خاصة اخي علاء و خايفة كتير من المشاكل هلأ بس يجي و يعرف انو ضربني و قلعني

مي: اخوكي ساكن هون يعني؟

حنين: اي لانو شغلو هون

بعد ساعة رن جرس بيتنا ،رحت افتح الباب و طلع بوجهي شب ،اتوقعت انو هو اخوا لحنين

علاء: مسالخير

مي: مسالنور

علاء: انا اخوا لحنين

مي: اي هي عنا لحظة لناديلك اياها ،تفضل

علاء:لا يكتر خيرك كلك ذوق بنطرا هون

فتت على غرفتي و قلتلا لحنين اجا اخوكي علاء ،طلعت حنين و اول ما شافت اخوا حضنتو و صارت تبكي و هو صار يهديا و يقلا طولي بالك ولله لخليه يندم على الساعة يلي اجا فيا على هالدنيا ،التفتت حنين علي و قلتلي شكرا على استقبالكن الي لولاكن ما عرفت وين بدي روح ،قلتلا ولا يهمك الجيران لبعضا و سكرت الباب بس بعد شوي رجعت سمعت اصواتن عم يعلقو و كانو علاء عم يضربو لقيس و سمعتو عم يقلو

علاء : يا كلب بتستقوى على مرة حفيت وراها لتاخدا و نحن نقلعك و نرفضك و بالاخير بتعاملها معاملة البهايم ، اذا بسمعك مرة تانية ضربتا انا و اخواتا الخمسة بدنا نخفيك عن وجه الارض

قيس: اختك ما بتحترم زوجا ،راسا كبير و عاملة حالها هي الرجال بالبيت

علاء: اختي بتحترم زوجا وقت بحكيا باحترام ما بعاملا معاملة الجارية ،هاي اختي وحيدة و مدللينا دلال الدنيا و لو ما كانت هي بتحبك و بدها اياك ما كنت شفت اظفر رجلا بمليون سنة

وطي صوتن و ما عاد سمعت شي ، حطيت راسي على المخدة و حمدت ربي مية مرة انو قيس طلع متزوج و ما من نصيبي لانو يمكن كنت هلأ بمحل حنين يلي كان مبين على ملامح وجها التعب و العذاب و التعاسة و على عيونا نظرة الحزن ، من فترة قرات عبارة بمجلة (المراة هي انعكاس لرجلها ستكون مدهشة لو كانت علاقتك معها مدهشة انظر الى امرأتك و ستفهم من انت )، و هلأ فهمت منيح شو قصدن بهالعبارة ،اكيد لو اخدت قيس او رجال تاني بيشبهو رح اتغير من جوا و صير انسانة كئيبة و حزينة ، لازم اعرف اختار مين هو الشخص يلي بدو يشاركني باقي حياتي و يخلي مني انسانة افضل من قبل ، ما بس اتزوج و بس ،هاي هي النتيجة يلي توصلتلا بعد تجربتي مع قيس يلي ما انتهت بسهولة ابدا ، حطيت راسي و نمت انا و مرتاحة اكتر من قبل و خاصة انو الي اسبوع كامل ما عرفت طعم النوم

الجزء الخامس:

تاني يوم انا و نازلة من بيتي و رايحة على الجامعة ،شفت علاء اخوا لحنين طالع من عندا ،سلمت علين و نزلت و هو نزل وراي ، طلعت على الشارع الرئيسي لانطر الباص يلي بدو ياخدني على الجامعة و الا حدا وقف قبالي بسيارة و زمرلي ،وطيت راسي لشوف مين ،طلع علاء اخوا لحنين

علاء: كيفك

مي: اهلين

علاء : وين رايحة؟

مي: على الجامعة

علاء: اطلعي لوصلك

مي : لا شكرا ما بدي عذبك هلا بيجي الباص ،صار موعدو

علاء: جد عم احكي اطلعي و ما تخجليني اذا بتريدي و بعدين انت صرتي رفيقة اختي حنين

مي: جد ما تحرجني يعني انت شب غريب و بخاف حدا يشوفني عم اطلع معك و يفهمنا غلط

علاء: اه عفوا جد بعتذر ما خطرلي هالموضوع ابدا بس على كل حال فرصة سعيدة

تابع علاء بسيارتو و انا رحت على جامعتي و تاني يوم اجت عنا حنين صبحية هي و ابنا يلي كان نسخة مصغرة عن قيس، قعدت عنا ساعة و حكتلنا كيف انحلت المشكلة و بانو قيس تعهد لاخوا انو ما بقا يمد ايدو عليا ابدا ،و بعد يومين كنت بغرفتي عم ادرس ،بريت قلمي الرصاص و طلعت لكب بريتو من البرندا و وقت لفيت ضهري لارجع على غرفتي شفت علاء و حنين قاعدين على البرندة عم يشربو قهوة سلمت علين و فتت ،بعد شوي نادتلي حنين من البرندا ،طلعت لحكيا

حنين: تعي اشربي قهوة

مي: ولله عم ادرس هلأ ،انشالله غير مرة

حنين: ما رح خليكي طولي ابدا ،انا رايحة افتحلك الباب

و قبل ما لحق رد عليا ،فورا طلعت من البرندا و راحت تفتح باب بيتا ،فتت على غرفتي انا و مدايقة ،شو بدو ياخدني عندا و هنيك اخوا ،طلعت من غرفتي و قلتلا لامي حنين نادتلي اشرب قهوة و طلعت من البيت و شفتا ناطرتني على باب بيتا ،فتت انا و متلبكة

حنين: فوتي ….من هون البرندا

مي: مرحبا

علاء: اهلين ،كيفك

مي: لحمدلله

علاء: مي انا بعتذر عن هديك المرة ما بدي تاخدي عني صورة باني شب ما بخاف على سمعة البنت ، انا كنت حابب اتشكرك بس لانك وقفتي جنب اختي حنين بظرفا

مي: لا عادي ولايهمك انت متل اخي انشالله

علاء: متل اخوكي! ما لهل الدرجة كمان ههههه

مي: ههههه

علاء: انا فهمت من حنين انو بتدرسي ادب انكليزي سنة تانية

مي: اي صح

علاء: انا عندي معهد و بعطي فيه معظم المواد من الاول الابتدائي للبكالوريا و لازمني انسة انكليزي للاول و التاني ، شو رايك ادرسي بمعهدي؟

مي: انا…ما بعرف

علاء: ما تعطيني قرارك هلأ فكري و استشيري اهلك و بعدين رديلي خبر انا كل يومين بجي عند حنين

انا و عم احكي معو ،انفتح الباب و اجا قيس ،وقت شافني اتفاجأ و انا توترت و حاولت انهي حديثي فورا مع علاء ، فات على البرندا و سلم علينا و قعد جنب علاء

قيس: اي شو كنتو عم تحكو قبل ما فوت؟

علاء: كنت عم اعرض على جارتكن مي شغل

قيس: ولله شغل شو ؟عندك بالمعهد يعني

علاء: اي

قيس: اممم بس مي حسب ما فهمت من حنين انو سنة تانية لسا يعني ما عندا خبرة كتير

علاء: رح سلما صف اول و تاني و رح ابقى فوق راسا و وجها اول باول

قيس: بس ابن حماي بنات الادب الانكليزي معبين الدنيا عنا بالبلد و في ناس متخرجة و قاعدة بلا شغل و كمان مي بعدا عم تدرس و بجوز تلتهي عن دراستا

علاء: اي صح بس انا اخترت مي لانو رفيقة حنين و حنين حمدت و شكرت فيا و انا بحب الانسات بمعهدي اكون اعرف اصلن و فصلن منيح و بعدين هيدا معهدك الا معهدي ؟

قيس: ايه صح تصطفل انت ادرى بمصلحتك

انا بقيت ساكتة و عم اسمع بس ،لاجت حنين هي و ابنا من جوا و قلتلنا مشو نقعد جوا اوسع،انا استأذنت منن و قلتلن بدي ارجع على البيت كمل دراستي

علاء: الله معك بس متل ما قلتلك فكري و ما تستعجلي

طلعت من عند حنين و رجعت على البيت و خبرتا لامي بانو اخوا لحنين عرض علي اشتغل بمعهدو ،انبسطت كتير و شجعتني بس انا بقيت مترددة و خاصة وقت شفت ردة فعلو لقيس ،تاني يوم خبرتا لحنين باني موافقة و باليوم يلي بعدو نادتلي لاتفق مع اخوا على تفاصيل الشغل و قلي بكرا تعي على المعهد ….

تاني يوم و انا على الطريق رايحة على المعهد ،وقفني قيس يلي كان على ما يبدو عم يلحقني من اول الطريق

قيس: رايحة عندو ؟

مي: روح من هون ،انا ما قلتلك ما تطلع بوجهي و اطلع من حياتي و التفت لبيتك و مرتك و ابنك

قيس: انا طلعت من حياتك ،انت يلي عم تحاولي ترجعي لحياتي لتجاكريني و مع مين كمان مع ابن حماي

مي: ولله ،ابن حماكي هو يلي عرض علي الشغل و ما فرضت حالي على حدا و بعدين انت شو دخلك بابن حماك

قيس: اسمعي منيح مي انت بتعرفي منيح انو انت عجبتيه لعلاء و لو ما عجبتيه ما شغلك عندو بالمعهد ،ارجعي على بيتك و ارفضي هالشغل و اعطيني شوية وقت بس لطلق مرتي و رح اخطبك من اهلك

مي: انت مجنون شي ،انا ما بقا بحبك لك انت عندك مرة بتجنن و بتحبك كتير روح حافظ عليها قبل ما طير من ايدك

قيس: انا بحبك مي

مي: انا ما بحبك و لا ممكن حب واحد متزوج و كمان بيضرب مرتو و بيستقوى عليها و لو بعرف انك متزوج من الاول ما كنت حكيت معك و ما بقا تطلع بوجهي

الجزء السادس:

تركتو لقيس و تابعت طريقي على المعهد و اول ما وصلت فتت فورا على مكتب الادارة و سلمت على علاء و قعدنا شربنا قهوة سوا و حكينا عن كل التفاصيل يلي بتتعلق بالدوام و الراتب و بعدا عرفني على الصف و الطلاب يلي بدي اعطين دروس و حددلي دوام 3ايام بالاسبوع و قلي اذا ما عجبك الراتب قليلي لزيدو ،قلتلو لا تمام هيك و بلشت دوام من تاني يوم ،خلال فترة دوامي بالمعهد كان اهتمام علاء فيني واضح اكتر من باقي المعلمات بالمعهد و كان على طول يجي يشوفني ليسالني اذا لازمني شي و احيانا يبعتلي فنجان قهوة او قطعة كروسان مع كاسة شاي و كتير احيانا يعرض علي انو يوصلني للبيت او للجامعة بعد دوامي بالمعهد بس انا كنت دائما ارفض لانو تجربتي مع قيس وعتني كتير بانو البنت ما لازم تنجر ورا عواطفا و تتمادى و تخرج عن حدود الادب حتى لو كان عاجبا الشخص كتير و بتحبو و انا مع الايام حبيتو لعلاء بس كان حبي الو حب متزن و متوازن بين العقل و القلب و حتى انا حسيت حالي ناضجة اكتر و قادرة حدد انو هالشخص انسان جيد بس كنت دائما اصرف النظر عن فكرة انو انا و علاء ممكن نكون لبعض لانو فكرة ارتباطي فيه معقدة

بعد شهرين من دوامي بالمعهد ،طلب مني علاء يشوفني بعد ما خلص اعطاء دروس ،خلصت و رحت عندو على المكتب

علاء: انا ما بعرف كيف بدي افتح هالموضوع معك بس رح كون مباشر و صريح معك ،مي انت عجبتيني و حابب اني اطلب ايدك من اهلك

مي: …..

علاء: بعرف فاجئتك ،خدي وقتك و فكري و حتى لو رفضتي هالشي ما رح يأثر على علاقتنا بالمعهد

طلعت من عندو و انا متفاجئة من طلب علاء و انو بدو يخطبني فورا ،كنت مبسوطة كتير و من الصدمة ما بقا طلع مني حكي ، بس بعدين رجعت اكتئبت لانو ربطت هالشي بمفعول سحر و كتيبة ابو مسعود و لانو انا كنت على علاقة سابقة مع زوج اختو ،وقعت بحيرة و شك لهيك اول شي عملتو بس رجعت على بيتي ، رحت لعند امي فورا

ام مي: شبك داخلة متل القضا المستعجل

مي: بدي تبطليلي كتيبة ابو مسعود

ام مي : هههههه ليش انشالله ؟شايفة طابور العرسان واقف برا يعني؟

مي: امي عنجد عم احكي ،ما تاخدي الامور مسخرة

ام مي: ليش ؟ حتى اذا بدو يبطلك اياها بدو يقش مصاري

مي: ياخد قد ما بدو ،انا بدفعلك مني

ام مي: شو يلي غير بالموضوع؟ما انطلق نصيبك لسا

مي: خلص هيك بدي ،خايفة ما اتوفق بحياتي لانو اشتغلت بالسحر و امنت فيه ،بكرا بتروحي انت و خالتي ام صبحي لعندو الله يخليكي

ام مي: اخ بس هم البنات للممات ،بكرا بروح بس ما ترجع تقليلي ارجعي روحي عندو

مي : لا خلص ابدا

راحت امي عند ابو مسعود تاني يوم و اجت و جايبتلي ورق مرة تانية

مي: شو هدول ؟ما تقليلي انقعن و اشرب ميتن او بدي نام نومة الخفافيش

ام مي : لاااا هالمرة بدك تنامي نومة القرود هههه

مي: شو قلك؟

ام مي: هدول الورق بدك تحرقين و الصفوة تعيتن بتكبيا بشي زريعة

مي: ايه؟

ام مي: ايه بس هيك

مي: لحمدلله كنت اكلة هم نام متل هديك الليلة

قمت فورا و حرقتن و كبيتن بالصفوة و حسيت حمل عن ضهري نزل و تاني يوم فقت لبست فورا و نزلت على المعهد لشوف ردة فعل علاء بعد ما راح مفعول السحر عنو و اكيد راح عن قيس ،فتت سلمت عليه و طلبلي فنجان قهوة فورا

علاء: مي ما تفكريني عم استعجلك بس انشالله فكرتي بالشي يلي قلتلك اياه مبارح

مي: اااااه ،(بلعت ريقي)،بعدني عم فكر و بدي خبر اهلي لسا

علاء: خدي راحتك

طلعت من مكتب علاء انا و عم اضحك على صغر عقلي كيف صدقت انو ممكن سحر و كتايب تتحكم بحياتنا ،كل شي صار معي هو صدفة بحتة ،رجعت على البيت و بلشت فكر جديا بطلب علاء و انو علاء فعلا حبني لشخصي متل ما انا حبيتو و هو شب ما بينرفض ابدا مذوق كتير و اي بنت بمحلي مستحيل ترفضو ،بس الشي الوحيد يلي كان عم يخليني اتردد هو قيس ،كنت خايفة كتير من ردة فعلو اذا وافقت على علاء ،بس ما رح يعمل شي لانو هو كمان عندو بيت و بخاف عليه ينخرب ،لهيك ما ممكن ابدا انو يضرني لانو رح تنخرب على راسي و راسو ،خبرت اهلي بانو علاء اخوا لحنين بدو يجيب اهلو و يخطبني ، طبعا امي انبسطت و زلغطت حتى قبل ما يصير اي شي و خبرت ابي و العيلة و الجيران بانو مي رح تنخطب ،بعد 3ايام اجا علاء و اهلو يلي اجو من الشام و اجت حنين كمان و طلبوني رسمي و تمت الخطبة ،بس بعد اسبوع من خطبتي على علاء ،لحقني قيس و هددني بانو اذا بستمر بهالخطبة و بتزوجو لعلاء ، رح يخربا على راسي و يخبر اهلي و خطيبي بالشي يلي كان بيناتنا ،انا صرت ابكي و قلتلو انت غلطة و ندمت عليها ،و اذا بدك تخبرن رح تخرب بيتك كمان ،اتركني كمل حياتي الله يخليك ..

فكرت كتير انو افسخ خطبتي عن علاء بس حبي الو كان اكبر من انو اقدر نفذ هالشي لهيك طلبت منو نستعجل بالزواج حتى يفقد قيس الامل و بعد 3شهور من خطبتي لعلاء و كانت من احلى ايام حياتي ،حبيتو اكتر من قبل لانو كان فيه كل الصفات يلي اي بنت بتحلم فيها ، تزوجنا و سافرنا على الشام تاني يوم من العرس ،بس اول ليلة كانت ببيتنا و اول ما فتت على البيت كان عامل اجواء رومانسية كتير و فارش الارض بالورد و الشموع، علاء الشخصية المتزنة االراكزة هو انسان حساس و رومانسي كتير و كان يعمل شغلات انا ما اعرف كيف بدي ردلو علين ،احيانا فيق و لاقيه حاطتلي وردة على المخدة و احيانا يكتبلي على المراية بحبك يا قطقوطتي واحيانا يجبلي قهوتي لعندي على التخت ، كان يدللني كتير و يجبلي دائما الشغلات يلي بحبا حتى قلي ما بقا في داعي داومي بالمعهد و اتفرغي لدراستك و لحالك ، كنت اكتر من انسانة سعيدة معو و هالشي بين علي فورا بس بعد شهر و نص من زواجي اضطر علاء يسافر على الشام و اخد حنين معو كرمال ابوه يلي مرض فجأة و قلي انو دير بالي على المعهد و روح نام عند اهلي بالفترة يلي بدو يبقى فيها بالشام ،ودعتو على الباب و فتت لضب اغراضي لروح عند اهلي ، بعد نص ساعة اندق الباب علي ،فكرت علاء نسي ياخد شي غرض ،فتحت الباب بسرعة و طلع قيس بوجهي ، جيت لسكر الباب بوجهو ،حط رجلو فورا قبل ما اطبقو و دفش الباب بايدو و فات ….

الجزء السابع:

مي: قيس اطلع برا شو جابك لهون ؟

قيس: جاي نرجع ايام الخوالي

مي : قيس انقلع برا انا متزوجة و بحبو لعلاء … خلص بقا قيمني من راسك

قرب خطوتين لعندي ، رجعت لورا

قيس : ما اشتقتيلي ؟

مي: اطلع برا و الا ولله بصرخ و بلم الناس عليك

قيس: اوف اوف الله يرحم وقت كنت تجي عندي على البيت ،يا مجنونة انت متزوجة و انا متزوج و هلا حنين و علاء ما هون خلينا نعيش اكام يوم مبسوطين مع بعض

مي: شو عم تخبص انت ؟ انا هلا متزوجة ،هديك الايام كنت بنت طايشة و هبلة و ما كنت بعرفك متزوج افهم بقا

هجم علي قيس و انا هربت منو ، مسكني و زتني على الصوفا و حاول يغتصبني ، و انا ابكي و حاول بعدو عني ، بالاخير مسكت الفازا و ضربتو على راسو ،قام وقف و اختل توازنو و بلش ينزل الدم من راسو ، انا خفت كتير وقت شفت الدم عم ينزل من راسو و خفت تكون الضربة قوية بس بعدين رجع ركز و بلش يسبني و يضربني و قلي بالاخير ولله لندمك على فعلتك هاي و طلع من البيت ،انا بقيت ارجف و ابكي شو عملت بحالي ،بستاهل كل شي عم يصير فيني لانو كنت بنت غبية و وثقت فورا بواحد ما بعرفو و تماديت معو كتير ،بعد ما هديت ، مسحت الدم يلي نزل من راسو لقيس على الارض و الصوفا و تحممت و كملت ضب اغراضي لروح عند اهلي مع انو ترددت كتير روح عندن حتى ما اصدف قيس بالطلعة و النزلة بس بضل احسن ما يفكر يجي عندي على البيت مرة تانية …

رجعت عند اهلي و بقيت اسبوع ، كنت ما انزل على معهدي قبل ما اتاكد انو قيس نزل على دوامو و حتى وقت ارجع عند اهلي كنت اخد تكسي من باب المعهد لباب البناية واطلع انا و خايفة ،بعد اسبوع رجع علاء هو و اختو من الشام و رجعت على بيتي ،كان مبين علي التوتر و الشرود و سالني علاء كذا مرة شبك ما على بعضك من وقت ما رجعت من الشام ،و انا كنت اتحججلو انو تعبانة من المعهد لانو حملت مسؤولية الادارة كمان

انا كنت متوترة من الشي يلي صار معي خلال غيابه و ما كنت قادرة ابدا احكيلو لانو بعرف رح يطلقني فورا بس بعد يومين من رجعتو لعلاء من السفر، اجا على البيت فجاة ،فات معصب و نادالي بصوت عالي

علاء:مي…. مي

مي: ايه

علاء: تعي لهون …

مسكني من ايدي و زتني على الصوفا

علاء: اقعدي هون

مي: شوفي ..شبك ؟

مسك الطاولة و حطا قدامي بعصبية و زت عليها اوراق

مي: شو هدول؟

علاء : انت يلي بدك تقليلي شو هدول ؟

الجزء التامن:

مسكتن بايدي و كانت الصدمة بانو الوراق هن الرسائل يلي كنت ابعتلو اياهن لقيس و ما بقدر انكر لانو بنهاية كل رسالة كاتبة اسمي و موقعة كمان

مي: علاء …انا

مسكني و ايدي و صار ياخدني شمال و يمين حسيت حالي متل الرخويات

علاء: انت شو ….انت شو

مي: لحظة …طول بالك …الموضوع ما بعرف كيف فهمانو انت ، خليني اشرحلك انا اياه بالاول

علاء: من ايمت المي عم تمشي من تحت رجلي انا و ما عارف ؟

مي: ولله مو هيك الموضوع

علاء: مع زوج اختي !

مي : هادا حكي قديم و ولله ما كنت بعرف انو متزوج ،انا فكرتو شب عذابي اول ما اجا سكن قبالنا و بس عرفت انو متزوج ولله بعدت عنو فورا

علاء: حتى لو شب عزابي بتفوتي عندو على البيت و بتخليه يقرب عليكي

مي: كذب هالحكي ما مزبوط

علاء: انت يلي كذابة شو عرفو بالشامة يلي موجودة عندك ؟

مي: هي مرة وحدة بس

علاء: لو بعرفك هيك ما كنت فكرت اتزوجك بحياتي

مي: اي انا غلطت و بعترف بغلطي بس ولله كل هالشي قبل ما اعرفك ،طيش بنات

علاء: طيش بنات؟ لك كيف بتفوتي لعند شب عزابي على بيتو لك ما خفتي على حالك يعملك شي ،لوين وصلتي معو ؟نمتي معو؟

مي: عيب عليك تحكي معي هيك ،الامور ما وصلت لهون ابدا

علاء: هاتي احكيلي لوين وصلت لكن ؟

مي :علاء ولله انا وقتا ما كنت واعية و كنت طايشة ،وكلها 3او 4مرات يلي فتا لعندو و مرة كنت لابسة قميص و مفتوح اول زر منو يعني بالغلط شاف هالشي

علاء: كذابة

مي : ولله ما كذابة ولله ، كل انسان بيغلط و انا غلطت بهالشي و هو راح قلك شي من الماضي حتى يخرب علاقتنا مع بعض و بدو اياني اطلق ….

علاء: انت و اياه لابقين لبعض كتير انتو الاتنين رخاص

مي: علاء ما بسمحلك تحكي معي بهالطريقة وانا لو رخيصة كنت استمريت احكي معو بعد ما عرفت انو متزوج و خربتلو حياتو و قبل ما تجي تحط كل اللوم علي ،روح شوفو بالاول ،بغيابك تهجم علي و حاول يغتصبني و لو ما ضربتو بفازة على راسو و نزلتلو الدم …..

و قبل ما كفي كلامي

علاء: شوو شوو عيدي عيدي شو عمل ؟

مي: متل ما سمعت

ضربني كف و مسكني من ايدي

علاء: و ايمت كنت ناوية تخبريني ؟ هلأ عم تحكي ؟شو عم يصير من ورا ضهري

صرت ابكي و حاول اشرحلو بانو انا ماكان بدي اعمل مشاكل بيناتن بس ما سمعني ولا شوي و طلع من البيت فورا هو و معصب مع انو حاولت امنعو بس دفشني و طلع ، قعدت على اعصابي و عديت الثواني و الدقايق ليرجع علاء و ما كنت قادرة خبر اهلي بكل هالشي لانو الحق علي من الاول ،بعد ساعة رجع علاء و معو حنين يلي كانو عيونا حمر و منفخين من كتر البكا و معا ابنا و شنتاية تيابا و اول ما شافتني حنين دارت وجها عني و عملت حالا ما شايفتني و فاتت على غرفة القعدة هي و اخوا و انا لحقتن فورا

مي : حنين ولله العظيم ما كنت بعرف انو متزوج و هالشي من زمان صار بس هو ضل يلاحقني

ما ردت علي حنين ولا بكلمة و لا حتى علاء، قعدو الاتنين يحكو مع بعض بصوت واطي و لا كاني موجودة ،تجاهلن الي استفزني كتير، فتت على غرفتي و ضبيت شنتاية تيابي و جيت لارجع على بيت اهلي

علاء: لوين رايحة ؟

مي: اي منيح هلا شفتني …رايحة على بيت اهلي

علاء: اي فوتي لجوا …هلأ ما الك روحة لانو لسا ما صفينا حسابنا مع بعض

مي: شو بدك تصفي ؟بدك تضربني يعني قوم ضربني

علاء: فوتي مي لجوا ….ما طايق شوف وجهك او اسمع صوتك ….فوتي على غرفتك و ما تطلعي منا قبل ما انا قلك و هلأ ما فاضي احكي اكتر من هيك معك

مي: طيب

فتت على غرفتي و قعدت و انا عم خمن شو بدن يعملو و على شو عم يتفقو حنين و علاء و بعد ساعة فات علاء و ضب شنتايتو

علاء: انا طالع على الشام ،حكيت امك تجي تقعد عندك هاليومين و باب البيت بضل مقفل ما بينفتح ابدا و ما بتنزلي من البيت ابدا لو شو ما صار ،و لارجع النا حديث طويل

مي: ليش مسافر على الشام ؟

علاء: هالشي ما بخصك

سافر علاء هو و اختو على الشام ،و اجت امي نامت عندي ليلتين لرجع علاء من سفرتو و باليومين يلي بقي فين بالشام عرفت حالي اني حامل ،انبسطت كتير لانو هالشي رح يخلي علاء يفكر مرتين قبل ما يطلق و نبهت على امي ما تخبرو بس يرجع و تتركني انا خبرو بس نكون لحالنا و طبعا امي ما كانت بتعرف المشاكل يلي صارت بيني و بينو ،بعد يومين اجا لحالو بدون حنين ،سالتو شو رحتو عملتو بالشام سكت و ما حكى شي ابدا لا بعد ما رجع فورا و لا حتى بعد شهر و لا حتى بعد شهرين ، اتبع اسلوب الصمت معي يلي كان بالنسبة الي موت على البطيئ و ما قدرت خبرو انو انا حامل بعد ما شفت برودو معي و خاصة انو صار ينام بغرفة القعدة و بطل يحكي معي ابدا ،يرجع على البيت لياكل و ينام بس ،عاملني كانو ما موجودة بحياتو ،بس منعني من روحة المعهد و الجامعة و حتى عند اهلي مرة وحدة بالاسبوع و كان هو ياخدني و يرجعني و ما كان يطلع يقعد عندن ابدا ، بعد 3شهور تقريبا من القصة سمعتو عم يحكي على الموبايل مع واحد بس ما قدرت حدد مين هو بس كان عم يقلو بانو حنين ما الها شي مطلقة و ما بصير ينحكى فيها حتى تخلص عدتا و بعدين فيها تنخطب مرة تانية ، لهيك فهمت انو المتصل هو عريس لحنين و ما استغربت ابدا لانو حنين كانت فائقة الجمال و بتلفت النظر بسرعة و على ما يبدو العريس بيقربلن ،بعد ما سكر الخط ،فتت

مي: حنين اطلقت ؟

الجزء التاسع:

علاء : اي ..روحي اعمليلي قهوة

مي: علاء ولله ما بستاهل كل هالقساوة منك ،عم تحاسبني على شي ماضي،اي وحدة بمحلي ما كانت رح تقلك انو انا كنت بحكي مع زوج اختك و كانت رح تخبي عليك ..

علاء: مطول فنجان قهوة ؟

مي: هلا بعملك اياه بس اسمعني بالاول

علاء: يلا بشربو بالمعهد

نزل من البيت بدون ما يعطيني فرصة احكي ،صرت بالشهر الرابع و زاد علي تعب الحمل بدل ما يخف،و وقت كان يشوفني علاء دايخة و تعبانة ،ما كان يهتم فيني او يسال علي ابدا ،بالعكس كان يتجاهلني اكتر حتى يقهرني وانا من قهري منو ما كنت خبرو اني حامل لانو حتى لو خبرتو كنت متاكدة انو ما رح يهتم و تركتو حتى هو ينتبه و يسالني وقت يشوف بطني عم يكبر قدامي ، تعبت كتير بوحامي و كرهتو كتير لعلاء و تغيرت نظرتي فيه من الانسان الحنون و الرومانسي لانسان قاسي و حقود ،بعد شهر كنت عم اجلي وقت سمعت صوت الباب عنا حدا عم يخبط عليه و يصرخ ،ركضت لشوف مين ،كان علاء واقف ورا الباب و عم يتسمع و يضحك ،كان صوت قيس عم يخانق و يصرخ

قيس : افتح الباب و اطلع ..بدكن تزوجو يا اولاد….لك هاي مرتي ….و لمين ؟لابن عمي ؟لك انتو شو ؟افتح يا علاء خلينا نتفاهم و الا ولله لفرجيك شي ما رح يعجبك انت و ست الحسن مرتك خرابة البيوت ،خربتلي بيتي و خلتني طلق مرتي

جيت لرد بس اشرلي علاء باصبعتو ..هس ولا كلمة

قيس: لك افتح ….ولله اذا بتزوجوها للكر وليد لادبحو و ادبحا …ما عم امزح يا علاء ….افتح الباب و اطلع لنحكي بعرف انك عم تسمعني …ماشي ما تفتح الباب بس انا طالع على الشام و رح اخرب الدنيا على راسكن و اقلبلكن العرس لمأتم

صرخ شوي قيس و بعدين راح ، فات علاء لجوا و اتصل باخوه علي

علاء: اسمعو هادا بدو يطلع لعنكن هلا …..اجا جعر متل الكلب على باب بيتي و هدد بالقتل ……اي تمام ديرو بالكن منو و خلو هالعرس يمشي على خير …. هات احكي مع حنين ….اي حبيبتي الله يتمملك على خير و ما تخافي انت عملتي الصح لانو رح يضل طول عمرو هيك من وحدة لوحدة و رح ضلي تعبانة معو ،وليد ابن عمك شاب مرتب و بحبك و من زمان رايدك و بدو اياكي و رح تعيشي مبسوطة معو انشالله …..اخ ولله كنت حابب احضر عرسك بس ما بقدر …الله يتمم على خير …الله معك حياتي

مي: ليش ما رح نحضر العرس ؟

علاء: شووو!بدك تروحي تحضري عرسا كمان؟

مي: بتعرف شو ؟انا هالعيشة ما بقا قادرة اتحملا انت انسان لئيم كتير و ما انت يلي كنت مخدوع فيني ، انا يلي كنت مخدوعة فيك و كنت مفكرتك انسان متعلم و مثقف و متفهم ،طلقني علاء

علاء: روحي من هون مي

مي:: رايحة بس على بيت اهلي و انا يلي رح احكيلن كل شي و يلي بدو يصير يصير

فتت على غرفتي و بلشت غير تيابي ،لحقني فورا علاء لنكمل حديثنا

علاء: لك مرتي كانت بتحكي مع زوج اختي و فايتة عندو على البيت و صاير بيناتن بوس و احضان و بدك اياني كون انسان متفهم ،واحد تاني محلي بطلقك فورا

مي: ماضي ….م ا ض ي …افهم بقا ما بحقلك تحاسبني كل هالقد …غلطنا و بجوز الله غفرلي و سامحني و انت بعدك معاقبني

علاء: شبو بطنك !

مي: شبو ! اه …صحي انا حامل و بالشهر الخامس و رح فوت بالسادس ، نسيت خبرك او بالاحرى تناسيت خبرك

علاء: حامل ! ايمت ناوية تخبريني لتولدي يعني ،انت كيف بتفكري ،خبيتي علي انو قيس فات على البيت و هلا لو ما شفت بطنك كبران ما كنت رح تقليلي ،عم تروحي عند الدكتور ؟

مي: اي طبعا عم روح وقت كنت تاخدني عند اهلي ،كنت روح انا و امي كشفية بالشهر مرة

علاء: ولله …اي …شو قلك؟

مي: ما قلي شي ، الولد صحتو منيحة بس الام هي يلي نفسيتا تعبانة ،بتعرف انو المرة بشهور حملا بتحتاج لزوجا كتير نفسيا و انا ما شفتك جنبي و لا بقا اصلا بدي شوفك …..بعد هيك من قدامي

علاء: تعي لهون …لوين رايحة …ما الك روحة

مي: بدي روح عند اهلي و انا بعدني مصرة علاء طلقني انا مستحيل عيش هيك معك طول العمر ،حاسة حالي عايشة مع اخي ،يا زواج متل العالم و الناس يا طلاق ،انا بدي ربي ابني بجو عيلة متماسكة ما الاب موجود و ما موجود

علاء: هادا ابني كمان و انت ما بس لحالك مسؤولة عنو ،اقعدي و خلينا نحكي

مي: هاي قعدت ،الي شهور عم قلك تعا لنحكي و انت ما بدك تحكي او حتى تطلع بوجهي

علاء: مي انا بدي وقت لاتقبل هالصدمة ،ما بيوم و ليلة بقدر انسى فورا

مي: امم طيب انا رايحة عند اهلي و اقعد اتقبل على مهلك و يلي بسمعك عم تحكي بفكر مرتك خانتك و عملت كل هالشي هي و على ذمتك ،علاء ممكن تاخد وحدة تانية متلي و عندا علاقة من قبل و انت ما بتعرف فيا و تستمر حياتك معا عادي بس لانو انا عرفت ماضيي صرت ما بقا تتقبلني و لانو هالماضي كان مع زوج اختك بالصدفة ،انا رح اقعد عند اهلي فترة و انت اقعد مع حالك و شو بدك انا جاهزة ،ما رح اغصب عليك بشي اذا حسيت حالك ما بقا قادر تتقبلني ك مرتك طلقني و خلي كل واحد يروح بطريقو و اوعى تحط ابنك حجية بيناتنا ،بدي تعرف بس اني انا بحبك كتير و لو ما بحبك كتير ما كنت قدرت اتحمل تجاهلك الي كل هالفترة ..

الجزء العاشر :

نزلت من بيتي و رحت عند اهلي و خبرتا لامي انو انا تعبانة كتير من الحمل و جاي غير جو عندن و طول فترة زيارتي عندن ما شفت فين علاء ابدا ،بعدين امي قلتلي انت جاي حردانة شو القصة ،قلتلا رح احكيلك كل شي بس ما تعصبي او تفكري تحكي لابي ،حكتلا كل شي و طول ما انا عم احكيلا و هي تقلي الله

لا يعطيكي شطارة ما عرفت ربيكي،اكلت بهدلة مرتبة من امي بس ارتحت كتير بس حكتلا و يا ريت خبرتا من زمان لكانت نصحتني و قلتلي كيف اتصرف لانو حطت الحق علي و انو كان لازم خبر علاء قبل حتى ما يجي يخطبني لانو الموضوع حساس كتير ، بعد اسبوع اتصلو بيت حماي و عزمونا على عرس حنين بعد يومين ، و بنفس اليوم اتصل علاء

علاء: انا بدي روح احضر عرس اختي

مي :اي روح الله معك و يبقى بارك للعرسان

علاء: ما بدك تروحي معي ؟

مي: لا لانو تعبانة

علاء: شبك ليش …فيكي شي؟

مي : لا بس الولد عم يبلش يتحرك و انا ما الي مزاج روح

علاء: طيب

سكرت الخط مع علاء و فتت على غرفتي لابكي انو بدو يروح على العرس و ما سائل علي ابدا بس بعد ساعة اندق الباب و كان علاء على الباب ،فتحتلو امي و استقبلتو و فاتت عندي هي و مبسوطة و قلتلي اجا زوجك ،طلعت سلمت عليه و قعدنا نشرب قهوة

علاء: قومي ضبي اغراضك نرجع على بيتنا

مي: ما رح ارجع قبل ما تقلي انت شو قررت لانو اذا بدي ارجع لعيش متل قبل ،انا ما بدي ارجع معك

علاء: انا ما بحب المرة تحرد برا بيتا ،هادا صغر عقل

مي: انت حجتني لاعمل هيك و بعدين انت رايح على عرس اختك شو بدا تفرق معك

علاء: ما رايح …بطلت روح …قومي بقا و معك عشر دقايق ما قمتي حضرتي حالك انا طالع من هون و ما بقا راجع

مي: طيب

قمت لبست و رجعت مع علاء على بيتنا ، رجع يحكي معي عادي و رجع ينام جنبي بس ابدا ما قرب علي و انا ما حاولت اتقرب منو و تركتو على راحتو ،و يوم عرس حنين كان قاعد و متحرقص و خايف قيس يعملو شي عملة ، اتصل اخوه علي فيه و قلو اجا قيس سكران و فات على عرس الرجال و بدو يقتل العريس بس اتصلنا بالشرطة فورا و اجو شحطوه ،بعد اسبوع اجا قيس على بيتي و كان علاء ما بالبيت و دق و خبط على الباب كتير

قيس: افتحي يا ….. انت السبب ولله لدفعك التمن يا بنت ال…يا ………يا…..افتحي احسن ما كسر الباب عليكي …

انا خفت كتير و فورا اتصلت بعلاء و قلتلو قيس متل المجنون رح يكسر الباب علي ،اجا علاء فورا و اجت الشرطة وراه و شحطوه لقيس هو و عم يبكي متل اولاد صغار و يقول بدي مرتي … بدي ابني ….رجعولي مرتي و يتحلف لعلاء بانو ما رح يسكتلو لانو هو السبب بجازة حنين من ابن عمها وليد ….،دخل علاء على البيت و شافني عم ابكي ،ركضت لعندو و حضنتو

مي: تعبت اعصابي …ايمت بدي اخلص من شي اسمو قيس صار عم يلاحقني باحلامي

علاء: خلص روقي ،تعي اشربي مي و اقعدي ، انا رح انزل على مركز الشرطة حتى انكتبو تعهد بانو ما يقرب علينا ابدا

مي: علاء هيدا جانن على الاخر و بدو مرتو ،انا خايفة كتير ، خايفة يقتلني او يقتلك ،ما رح يهدى ابدا لك متل التور الهايج

علاء: ما تخافي هيدا واحد حقير هلا عرف اديش بحب مرتو بعد ما راحت لغيرو

مي: خليا تطلق و ترجعلو بضل ابو ابنا

علاء: لا طبعا لانو هيدا رح يضل طول عمرو هيك و ما رح يتغير و حتى لو رجعتلو ما رح ينصلح حالو ،خلص تزوجت الانسان يلي بيستاهلا و قادر يصونا و يسعدا …انا نازل فوتي ارتاحي …سلام

راح علاء على الشرطة و كتبوه تعهد بانو ما يتعرضلنا ابدا و انا فكرت انو القصة خلصت هون بس لا ،قيس لسا لهلا ما تحرك و اعطى ردة فعل قوية و كان بس عم يحكي و يتوعد ،بعد اسبوع نزلت انا و امي عند الدكتورة لاطمن على حملي ، نحن و راجعين من عند الدكتور مرقنا على السوق ،فاتت امي على المحل لتشتري كام غرض و انا وقفت برا عم اكل بوظة ، وما شفت غيرا واحد غريب مسكني من ايدي و سحبني بقوة و حطني بالسيارة ،صرت صرخ و ابكي و نادي امي الحقيني ،و وقت طلعت امي كانت السيارة ماشية فيني ، كان قيس و واحد تاني معو

مي: هيدا انت ،لك شو بدك مني ،ولله تعبت ،شو عملت حتى اتعاقب كل هالعقاب

قيس: ولله لعاقبك انت و زوجك على الشي يلي عملتوه فيني ،حرمني زوجك الكلب من مرتي و ابني و انا كمان رح احرمو منن

الجزء الحادي عشر:

مي: قيس الله يخليك نزلني حرام عليك انا حامل ، شو بدك تعمل ؟

قيس: حرام علي و ما حرام على زوجك الشي يلي عملو فيني

مي: انت يلي بلشت ليش لتعطيه الرسائل و تقلو عن كل شي صار بيناتنا كانت صفحة و طويناها و كل واحد عايش و مبسوط

قيس: لاني غبي ،فكرت حالي هيك بقهرك متل ما قهرتيني بس ما توقعت ياخدا و بعد ما طلقا ، يزوجا فورا

مي: و انا شو دخلني ،حل موضوعك معو ،اخطفو الو ما الي

قيس: اسكتي هلا و ما تسمعيني صوتك

وصلنا بعد ساعة على خرابة كانو معمل مهجور و نزلني من السيارة هو و ماسكني من ايدي ،و فوتني على المعمل و ربطني بعامود حديد بالمعمل و انا عم ابكي و اترجاه يتركني و خايفة يقتلني و يقتل الولد يلي ببطني ،طلع موبايلو و اتصل فيه

قيس: اسمع ولا كلب مرتك و ابنك عندي و انا حر التصرف فين ،فيني اغتصب مرتك و فيني اقتلا و فيني اعمل فيا شغلات كتيرة بس انا ما رح اعمل شي بحال رجعتلي مرتي و ابني ،رجعلي مرتي و ابني لرجعلك مرتك و ابنك و هيك منطلع خالصين و كل واحد بروح بطريقو ….معك لليوم المسا حكي حنين و قلا تنزل لهون فورا و قلو للكر يطلقا و ينزل على المحكمة يبلش بمعاملة الطلاق

مي: علاء الله يخليك ما تتركني ولله بيقتلني هالمجنون

قيس: ها ..سمعت بدانك …بقتلا ولله اذا ما رجعتلي حنين و ابني ..و انا المسا بدقلك من رقم تاني و منتفق على الوقت و المكان للتسليم

سمعت صوت علاء معصب و عم يخانق عليه بس ما قدرت افهم منيح شو عم يحكي و سمعت صوت امي جنبو عم تبكي و تدعي على قيس ،سكر الخط معو،و قرفص قبالي

قيس: شو قولتك ميوشة بيستغنى عنك زوجك و بفضل اختو عليكي و على ابنك ؟

مي: تفو عليك الله ياخدك

ضربني كف

قيس: انا بكره المرة القوية و العنيدة بحب كسرلا راسا

مي: انت واحد مريض نفسيا و علاء عاملك عقدة نقص و بتغار منو كتير،بتحب تحصل الشي يلي ما قادر تحصل عليه و مستعد تموت و تخرب الدنيا كرمالو و بس يصير بايدك بتصير مستقلع منو و بدور على شي تاني صعب المنال .

قيس: هههههههه على اساس انت كنتي صعبة المنال شو نسيتي انك انت يلي تحركشتي فيني اول ما سكنت قبالك …ههههه شو نسيتي كيف كنت دايبة بين ايدي

مي : لا ما نسيت وقت بتذكر بتلعي نفسي و بستفرغ ، لك انا زعلانة على حنين كيف قدرت تعيش كل هالوقت مع واحد معقد متلك بس هلأ الله عوضا برجال بيسوى تقلو دهب ،وليد شيخ الشباب

قيس: اخرسي …ما بقا تحكي

مي: ههههههههه اي اي حنين مبسوطة كتير مع وليد ،مقدر قيمتا و شايفا و ما مصدق ، ببالك بدو يطلقا هههه مستحيل عم تحلم ….بتعرف انو وليد بحبا اكتر منك و كان يحبا حتى قبل ما انت تحبا بس لانو حنين كانت بتحبك، بتحب الشخص الغلط لهيك ما استرجا يخطبا و هلأ بعد ما صارت ملكو و على اسمو و عم تتفتل ببيتو و يمكن اصلا تكون حامل منو هلأ بدك بقا يستغنى عنا

حط ايديه على رقبتي و بدو يخنقني و هو يقلي اخرسي …حنين بتحبني الي ….حنين بدا اياني انا …موتي …انت السبب ،كنت رح اختنق و موت لو ما اجا رفيقو يلي كان واقف برا بعد ما سمع صوتو و ركض بسرعة و بعدو عني و قلو شبك يا مجنون رح تموتا ما اتفقنا هيك

قيس: حقيرة عم تستفزني بحكيا

مي: وينك يا علاء تعا خدني من هون …الله لا يوفقك يا قيس رح تموتني

اخدو رفيقو لقيس و طلعو برا و انا بقيت جوا عم ابكي و اندب على حظي و العن الساعة يلي شفت فيها قيس ،كنت خايفة كتير علاء ما يسال ابدا عني و خاصة علاقتنا اخر فترة ما كانت علاقة اتنين متزوجين ،بعد ساعتين ناديتلو ل قيس

قيس: شبك

مي: بدي اكل …انا جعت ..انا حامل ما بسوى ضل وقت طويل بلا اكل

قيس: شو بدك تتلسعي ؟

مي: شو ما كان

راح و رجع بعد ساعة و جايبلي سندويشتين فلافل

مي: فكلي ايدي حتى اكل

قيس: ما رح فكن …رح طعميكي بايدي

قرب السندويشة على تمي ، فتحت تمي لاكل اول لقمة ، سحبا فورا و صار يضحك

مي: انت بدك طعميني الا بدك تلعب متل اولاد صغار

قيس: انا بحب اللعب كتير ،اكيد صرتي بتعرفيني ، صحي زوجك شو عمل فيكي بعد ما قلتلو عن علاقتي فيكي بالتفصيل الممل ؟ههههه

مي: علاء انسان راقي كتير ،اكيد كنت مفكرو انت انو رح يرجع يضربني و يقلعني و يطلقني بس خاب ظنك كتير مو ههههه

قيس: اي خاب فكرتو رجال طلع تشتوش

مي: هيك الرجولة عندك بالضرب و الصوت العالي ما بتشوف ابعد من انفك

قيس: لكن اجا اخدك بالاحضان و قلك برافو مرتي الك سجل و ماضي بيشرف هههه

مي: تافه ..الرجال بعاقب مرتو بالصمت و هادا كان اقوى من الضرب و العنف

قيس: ولله ..بتحبيه ؟

مي: ما بحبو بس انا بموت فيه بعشقو ،علاء و حنين اولاد عالم و ناس ومحترمين و تربو على ايدين ملكة اما انت …!

قيس: انا شووو..كفي ليش سكتي

مي: هلأ بدك طعميني الا لا ؟

قيس: مضطر طعميكي لازم تعيشي و لو علي لتركتك تموتي و ما شفقت عليكي ….اي كملي عم اسمعك

مي: شو بدي كمل

قيس:احكيلي عنك و عن علاء ؟شو صار بعدين

الجزء الثاني عشر:

مي: انت زودتا كتير

هاي خصوصيات بين اتنين متزوجين

قيس: معناتا ما رح طعميكي

مي:طيب طعميني اول سندويشة و بالسندويشة التانية بكفيلك

بعد ما اكلت السندويشة الاولى ،فتح التانية و قلي يلا كملي

مي: عن شو بدي احكيلك ؟

قيس: احكيلي ليش بتحبيه كل هالقد لعلاء؟

مي: لا اله الا الله ،هي سندويشة فلافل منيح ما عم طعميني شاورما شو كنت عملت ؟

قيس: على الجوع كل شي طيب حتى الفلافل

مي:طيب …اي وحدة محلي كانت رح تحبو لعلاء ….. علاء شخصية مخملية و معتقة و تقيلة ،انسان بيعرف كيف يتعامل مع المرة كيف يسعدا و كيف يزعلا ،وقت بيبتسم بحس الدنيا كلا عم تضحكلي و وقت بكشر بحس الدنيا سكرت ابوابا بوجهي ،الحياة معو جنة لانو هو انسان اقرب للملاك ، و لو بعيش معو عمرين بحسن قلال كتير ، كبرت و نضجت على ايدو ،انسان ساحر خلاني سافر معو بخيالي لعالم تاني وقت بحط راسي على صدرو بنسى كل الدنيا و بحس بالامان ،معو ما بخاف من شي و بس يبعد عني بحس حالي ضعت متل الاولاد الصغار

صرت ابكي وقت تذكرت ايامي مع علاء قبل كل هالمشاكل

مي: رجعني لزوجي …انا ما بقدر عيش بلاه …انت خربتلي حياتي

قيس: رح رجعك بس ليرجعلي مرتي …احكيلي شو حكتلك حنين عني وقت اجت لعنكن وقت ضربتا؟

مي: شو ببالك حكتلي متل ما حكيت انا عن علاء ، طبعا لا ،قلتلي بيضربني كتير و عندو قصص بنات و كل فترة بكمشو مع بنت شكل و ما مبسوطة معو ،كانت عم تحكي هي و عم تبكي و باين عليا التعاسة من العيشة معك ،ما تحط حالك بنفس الكفة مع علاء

قيس: بتعرفي انو انا اكتر اخ لحنين بكرهو هو علاء

مي: حسيت هالشي بدون ما تقلي، غيرتك و كيدك واضح

قيس: ما قلتيلي كيف كان معك بالتخت ؟فحل؟

مي: اخرس و قوم انقلع من هون انت واحد وسخ و منيح كتير انو حنين خلصت منك

قيس: شبك عصبتي روقي عم نتساير ،يلا لنتصل فيه لنشوف شو انجز

مسك الموبايل و حط شريحة تانية فيه و دق لعلاء

قيس: ايه شو صار معك ؟ ..اجت ؟ممتاز …الساعة عشرة بمنطقة المساكن القديمة ما تتاخرو لانو اانا ما بقا قادر اتحمل لعي مرتك اكتر من هيك ..ليك اوعى تفكر تلعب بديلك …سكينة بنص بطنا و 2ب1 و خالصين لانو يلي متلك ما لازم يتكاثرو

سكر الخط مع علاء و التفت علي

قيس: شطور هالعلاء طلع بحبك

صارت الساعة تسعة و نص ،فك الحبال عني قيس و مسكني من ايدي و طلعني بالسيارة ،كنا انا و اياه لحالنا و ما كان رفيقو معنا ،وصلنا للمكان المحدد و بعد ربع ساعة اجا علاء و معو حنين و ابنا ،نزلنا من السيارة ،قلو قيس لعلاء ،ابعتا لحنين لابعت مي، مشيت باتجاه علاء و حنين باتجاه قيس،وقت مريت من جنب حنين ،كانت قوية و متماسكة و متغيرة عن قبل و انا استغربت من برودا ،سلمت عليا و ردت السلام ،وصلت لعند علاء و حضنتو وصرت ابكي و سالني اذا اذاني او عملي شي ،قلتلو لا بس حنين شو بدو يصير فيا ،قلي ما تخافي وليد و الشرطة ناطرينو برا ،اول ما يطلع من هون رح يحاوطو بالسيارات و تحت تهديد السلاح رح يسلم حالو فورا ،طلعت بالسيارة انا و علاء و اتصل بوليد فورا و قلو مي صارت معي و هلا طلع قيس،نحن رح ننطركن على الطريق، و بعدا اتصل باهلي و طمنتن عني ،بقينا ناطرين بالسيارة و علاء قاعد على اعصابو و خايف على اختو و بعد نص ساعة اجت الشرطة و كان قيس قاعد بوحدة فين و بسيارة تانية وليد و حنين و ابنا ،نزلو منا و طلعو معنا و تابعنا على بيتنا واجو اهلي و نامو هديك الليلة عنا حنين و وليد و رجعت علاقتي بحنين متل قبل ، اما قيس انحبس 5سنين بتهمة الخطف و التهديد بالقتل ،بهالخمس سنين يلي بقي فين قيس بالحبس ،حنين صار عندا ولدين من وليد يلي عاشت معو مبسوطة ،اما انا تابعت حياتي مع علاء متل قبل و رجعنا متل اتنين متزوجين و جبت صبي سميتو ليث و بعد بسنة رجعت حبلت و جبت بنت و سميتا ميس و تابعت جامعتي و تخرجت منا ، اما علاء رجع متل ما كنت بعرفو و قويت علاقتنا اكتر بعد ما صار عنا اولاد ، و قصتي مع قيس كانت صفحة و طويناها بحياتنا، بس بعد 5سنين ،دقتلي حنين لتقلي

حنين : طلع قيس

مي: شو !حنين ما تقوليا ،شو عرفك ؟

حنين: هو هون بالشام ،بعتلي خبر مع اهلو بدو يشوف ابنو

مي: ايه؟و بدك تفرجيه ابنو ؟

حنين: طبعا هيدا حقو ،بس وليد هو يلي رح يصير ياخدو

مي: انا خايفة كتير ،معقول يعمل شي يضرنا فيه

حنين : لا ابدا ، حسيتو طالع من االسجن و متقبل الموضوع ،الله يهديه

سكرت مع حنين و دقيت فورا لعلاء انا و عم ابكي و قلتلو طلع قيس،صار يضحك

علاء:ولله هالقيس الو هيبة و بتخافي منو ،بس تعذبيني معناتا بدي قلك اجا قيس ههههه

مي: بلا غلاظتك علاء ما خايف انت يعني

علاء:هههه من شو بدي خاف يا مجنونة ،يلي بيقعد بالسجن 5سنين و بيطلع منو ،ما بفكر ابدا يرجعلو لهيك اطمني انا متأكد ما رح يقرب علينا …. هلأ قيمينا من سيرتو عملتي متل ما قلتلك ؟

مي: هههههه اي اي عملت

انتهت.بقلم هلا غرابلي

ما حدا يسالني شو قلها تعمل