قصه ذكور لا رجال بقلم هلا الغرابلي
قصه ذكور لا رجال بقلم هلا الغرابلي
<section
قصة قصيرة : ذكور لا رجال … الكاتبة : هلا الغرابلي
الجزء الاول:
ولو أن بيدي أن أغرقك بمآء النآر لأغرقتك أنت و شواربك ” التي لافائدة لها في وجهك سوى تذكيرنا بأنك #ذكر ….(مقتبس)
ملامحك الذكورية ما بتعني انك رجل ، لانو الرجولة مفهوم اكبر من مظهر خارجي و شوارب و خشونة و قوة عضلات ،الرجولة مبادئ و اخلاق و سلوك ، الرجولة انك تعرف ايمت و مع مين تستخدم القوة يلي الله اعطاك اياها ، اعطاك اياها لتكون السند و الدرع الحامي لاي انثى بتامنك على حالا ،الرجولة انك تكون سيد نفسك وصادق بوعودك و صاين اسمك و اسم المرة يلي بتنكتب على اسمك……
هاشم: لك ما رح تندمي ، الشغل مرتب كتير و اكتر من راتبك يلي عم تاخديه هلأ و بعدين منضل قراب على بعض انت بالطابق التالت و انا بالاول …
بسمة :بس انا مرتاحة بشغلي هيدا و ما بفكر ابدا اقدم استقالتي منو …
هاشم : بسمة ما تعصبيني ،انت بتعرفي اديش نحن قاتلين حالنا لنشتري بيت كبير و مرتب و اديش النا عم نصمد الليرة فوق الليرة و لهلأ ما بجيبو متل ما بدنا
بسمة :طيب ما النا ٣ سنين متزوجين ، ما بيوم و ليلة بصير معنا حق بيت
هاشم : اي بدنا ننطر لسا عشر سنين يعني ،اسمعي مني ولله هالوظيفة مريحة اكتر ،خلص بكرا بدي قدم اسمك لانو ما ضل وقت للمقابلة و اذا ما انقبلتي خلص خليكي بشغلك الحالي
بسمة : طيب بروح بس بشرط
هاشم : تفضلي اشرطي لنشوف
بسمة : بدي نجيب ولد
هاشم : هيدا الموضوع حكينا فيه من قبل و قلتلك قبل ما يتحسن وضعنا و يصير عنا بيت ملك ما في لا حبل و لا جيابة
بسمة: لك ولله قلبي ناطف على ولد ، يلي تزوجو بعدي صار عندن و بقولو ما بيسوا ضل منع و انا لسا ما عندي اولاد
هاشم : هيدا حكي فاضي ،بس طيب ماشي بفكر بالموضوع و قومي شوفي شو بدك تلبسي لبكرا ، البسي شي مرتب
بسمة : شي مرتب !!الي 3سنين ما اشتريت قطعة تياب …
هاشم : ماشي بكرا بعطيكي تشتري بس اختاري شي حلو و يبينك امورة و صغيرة
زوجي هاشم انسان مادي جدا و اقتصادي لابعد الحدود، بحب المصاري كتير و هوايتو تكديس الاموال ، و بشوف انو الانسان كلما صار غني كلما صار انسان سعيد اكتر و ما مهم ابدا الطريقة يلي بحصل فيها المصاري حتى لو كان على حساب راحته و راحتي،حاول كتير يزرع حب المال فيني بس ما قدر لانو انا عندي وجهة نظر مختلفة عنه و ما بشوف السعادة بتنحصر بالمال لانو المال بيروح و بيجي و الانسان ما لازم يرهن سعادتو بشي قابل للزوال باي لحظة ،السعادة عندي قناعة ورضا نابعة من الداخل و ما مرتبطة باي مظاهر خارجية ، تزوجت انا و اياه من ٣سنين و من اول يوم حطيت راتبي على راتبو لنقدر ندفع اجار البيت و نعيش منو و كمان نوفر منو و كنا كل شي نوفرو نحطو بحساب مشترك لنحقق هدفنا بانو يصير عنا بيت ملك و نخلص من تكلفة الاجار المتعبة ….
كنت اخد راتبي و ما مون اشتري فيه بجامة او حتى قطعة تياب داخلية ، كان هاشم ينزل يقبضو معي و ياخدو و يقلي بدنا نحط مبلغ بالحساب المشترك، كنت اعلق معو كتير و قلو اعطيني بدي اشتري كام غرض مضطرة علين ، يقلي ما وقتا هلأ ، حتى بمصروف البيت و الاكل كان جدا اقتصادي لدرجة الاسبوع كلو نقضيه يوم شوربة و يوم معلبات و يوم بيض مقلي و كنت اطبخ طبخة وحدة بكل الاسبوع على قطعة لحمة او فروج صغيرة و اما وجبة العشا ما كانت موجودة بقاموس حياتنا و وجبة الفطور كنا نفطر كل واحد بشغلو و ممنوع منعا باتا نشرب قهوة و شاي بالبيت ، لانو منبهات و بضر الجسم و بعدين يلي بدو يشربن يشرب بشغلو، و حتى بادق التفاصيل كان يوفر يعني مثلا بكل الحمام ما في عندي شامبو و يلي بدو يتحمم موجود صابون الغار لانو الشامبو مواد كيماوية و بضر الشعر بس انا بعرف تماما انو هالشي بيندرج تحت قائمة التوفير ……
كل هالمعيشة السيئة و القوانين الصارمة يلي فرضا هاشم علي ، كنت متحملتا و صابرة عليا لانو كنت بحبو و متأكدة انو نيتو يحسن وضعنا للافضل ، لهيك كنت احيانا اعترض على اسلوب العيشة و بعدين اسكت و ارضى بالامر الواقع ، وافقت على التقديم للوظيفة الجديدة بالشركة يلي بيشتغل زوجي فيها بعد ما اصر علي و قنعني باسلوبه ، كانت شركة كبيرة للاعلانات و نفس مجال شغلي الحالي ، رحت على الشركة و لقيت 3صبايا ناطرين برا ليجي دورن للمقابلة و يفوتو لعند مدير الشركة …
ا
هاشم : انا رح انزل على شغلي ، انطري معن و بس تطلعي مري علي و قليلي شو صار معك
الجزء التاني:
بعد ساعة اجا دوري و فتت على مكتب المدير
بسمة : مرحبا
الاستاذ زين : اهلين ، تفضلي ارتاحي ….بسمة اسم حضرتك !
بسمة : اي
الاستاذ زين : السي في مثير للاعجاب بس مكتوب هون انو بعدك عم تشتغلي بشركة الرائد ..
بسمة : اي صح لهلا عم اشتغل فيا ، ما حبيت اقدم استقالتي قبل ما اضمن قبولي بالشغل الجديد ..
الاستاذ زين : معناتا انت شايفة انو الوظيفة يلي عم قدملك اياها هلأ افضل من الوظيفة يلي عم تشتغلي فيا حاليا ،ليش ؟
بسمة : اولا لانو هالوظيفة مناسبة اكتر لقدراتي و حاسة حالي انو بقدر ابدع فيا و اثبت حالي اكتر يعني وقت بتحط الشخص المناسب بالمكان المناسب بيعطيك شغل مميز و بترجع الفائدة على الطرفين …
الاستاذ زين : امم و تانيا…
بسمة : لانو راتب افضل
الاستاذ زين : كيف سمعتي عن شركتنا ؟
بسمة : سمعت من زوجي ، لانو هو موظف عنكن
الاستاذ زين : اه انت متزوجة ! ما انتبهت انا و عم اقرا السي في … ما مبين عليكي …شو اسمو زوجك
بسمة : هاشم …..
الاستاذ زين : ما بعرفو ،بتعرفي هون عدد الموظفين كتير كبيرر ….طيب ….ممكن توقفي شوي
بسمة : اوقف!!عفوا !!
الاستاذ زين : اي اوقفي بدي شوف طولك و جسمك و طلتك …
بسمة : عفوا ما فهمت شو دخل طولي و مساحتي و كثافتي بهالوظيفة؟!
الاستاذ زين : ههههه….. الوظيفة بتطلب يكون صاحبها شكلو لائق و جذاب ، يعني انت بتعرفي بالاعلانات كيف منقدم صورة المنتج للزباين ، لازم تكون صورة حلوة و مثالية و هالشي بينطبق على كل شي ، ومظهر الموظفة لازم يكون جذاب و عندا كاريزما حتى ينجح اسم الشركة اكتر
بسمة : اممم لوبدنا نقيس الشغل و النجاح بالطول و الجسم و الكاريزما ما كنت شفت حالك هلأ قاعد ورا هيك مكتب وعندك هيك شركة….
الاستاذ زين: اممم …..بفهم منك اني ما حلو و ما جذاب !
بسمة : بعتذر منك ما قصدي هيك بس النظرية يلي عم تقولا بتنطبق على سلع و منتجات ما على ناس و بني ادمين ، ما كنت بعرف انو قيمة الانسان عنكن بقيمة المنتج يلي عم تعملولو اعلان…
بين على ملامح وجهي الانزعاج ، وقفت و مديت ايدي
بسمة : اذا بتريد ممكن تعطيني السي في
الاستاذ زين : ممكن تروقي ، الشغلة ما بدها كل هالقد عصبية ، خلص هاي وقفتي و شفت طلتك و خلصت القصة
اخدت السي في من قدامو و قلتلو بعتذر منك بس انا ما بقى بدي قدم على هالوظيفة و فرصة سعيدة و تركتو و هو متفاجأ بردة فعلي و طلعت من المكتب ،ونزلت على الطابق الاول عند زوجي
هاشم : شو شايفك ما طولتي قولي قمحة الا شعيرة ! لحظة شو هيدا؟؟! السي في ليش معك ؟
بسمة : ما مشي الحال تمشكلت مع مديركن
هاشم : شوووو ! انت مجنونة شي ؟ ليش ؟
بسمة : ما مريح ابدا و لا ارتحت لطريقة حكيو قلي قومي وقفي بدي شوف طولك …..واطي
هاشم : يبعتلك حمى يا مرتي و انشالله ما وقفتي
بسمة : طبعا ما وقفت .. قصفت جبهتو و طلعت
هاشم : الله يقصف عمرك لك هادا الاستاذ زين صاحب اكبر شركة اعلانات بالبلد ،مية بنت بتتمنى تتوظف بشركتو ،بس ما تكوني قلتيلو انو زوجك موظف هون
بسمة: اي طبعا خبرتو
هاشم : ما اغباكي …الله يستر… اذا بتقلع من وظيفتي بسببك يا بسمة لفرجيكي نجوم الضهر،اطلعي اعتذري منو …
بسمة : بالله من كل عقلك ، ما بعتذر لحدا و هو يلي غلط و تواقح معي …يلا انا راجعة على البيت
تركت زوجي و طلعت من الشركة و هو عم يناديلي بسمة لك ارجعي يا بسمة ، ضليت متابعة طريقي و ما رديت عليه …
الجزء التالت:
رجع زوجي من الشغل معصب كتير ، و تمشكلنا و عليت اصواتنا بعد ما سمع مني تفاصيل المقابلة ، و رحنا تاني يوم على شغلنا بدون حتى ما نصبح على بعض ، اتصل فيني فترة الضهر خلال الدوام ليرجع يبهدلني مرة تانية لانو مدير الشركة طالب يشوفو بمكتبو و خاف كتير من انو المدير يقلعو من شغلو ،بعد ساعة رجع اتصل فيني …
هاشم : اسمعي طلع المدير بدو يشوفني كرمال وظيفتك ، الشخص كتير محترم و شربني قهوة كمان
بسمة:بالله !يعني ما كرمال يقلعك من الشغل
هاشم : لا قلي انو فيكي تبلشي دوام من الاسبوع الجاي ،اسمعي معناتا بلشي باوراق استقالتك فورا
بسمة : اووف بهالسرعة انا ما ارتحت للجو عنكن بالشركة
هاشم : بلا علاك مصدي ، لنرجع على البيت منتفاهم
رجعت على البيت و شفتو معصب و قاعد عم يدخن و سالني اذا قدمت استقالتي ، قلتلو قدمتا بس لسا ناطرة الموافقة عليا ،قلي اها هيك بدي اياكي يا بسومتي …
بعد اسبوع بلشت شغل بالوظيفة الجديدة ، كانت الشركة فخمة كتير بمكاتبا و ديكورا ،بعد اسبوع من شغلي ، اتصلت سكرتيرة المدير و قلتلي اليوم الساعة 12في اجتماع لمدراء الاقسام بمكتب المدير ، يا ريت تكوني على الوقت و ما تتاخري ، قلتلا عفوا انت مخربطة انا ما مديرة قسم ، قلتلي ما عندي فكرة بس اسمك محطوط بقائمة المدعوين للاجتماع ….
رحت على غرفة الاجتماع ،و قعدت على طاولة طويلة كتير و فيها 6كراسي ، كل كرسي قاعد عليه مدير قسم و قاعدين عم يتحدثو مع بعض ،انا قعدت باخر الطاولة و ما حكيت مع حدا لانو ما بعرف حدا فين ، بعد شوي اجا الاستاذ زين و رحب فينا و بلش الاجتماع بانو في ماركة مجوهرات طالبة منا نعمل اعلان و دعاية لمجوهراتا بطريقة عصرية ، بلشو مدراء الاقسام باقتراحات للاعلان الجديد و انا بقيت ساكتة
الاستاذ زين : مدام بسمة ما سمعنا صوتك
بسمة : اممم كنت ناطرة للاخر لاسمع كل الاقتراحات و الافكار و بعدين بقدم فكرتي
الاستاذ زين : تفضلي
بسمة : هلا هون الاساتذة اقترحو افكار لدعايات تنعرض على التلفزيون بين فواصل المسلسلات و الافلام ، بس انا اقتراحي مختلف شوي لانو ما كل المشاهدين بيتفرجو على الدعايات و هن عم يتابعو مسلسل او فيلم،يعني ممكن يقلبو القناة على شي تاني لبين ما تخلص الدعاية او يلتهو بشي و هيك منكون ما وصلنا هدفنا لكل المشاهدين …
الاستاذ زين : صح مزبوط هالحكي ، بس نحن مطلوب مننا نعمل دعاية ناجحة و بس
بسمة : منعملا بس بطريقة مبتكرة و بفكرة غريبة من نوعا ، يعني بدل ما نعطي خيار للمشاهد بانو يتابع الدعاية او يقلب عنا ، ليش ما منفرض عليه يشوفا بطريقتنا ، فكرتي انو نتعاقد مع شركات الانتاج وهي بتتفق مع بطلة المسلسل او الفيلم بانو تلبس من مجموعة المجوهرات يلي رح نختار منا الاجمل و الاتقل و هيك منكون قدمنا المجوهرات على جسم ممثلة محبوبة و الها شعبية و ضمنا انو الدعاية وصلت للكل
الاستاذ محمد: بس هالشي معقد كتير و بدو وقت طويل ، بقترح انو نحن نتفق مع الممثلةاو مغنية الها شعبية كبيرة وهي تكون موديلز الدعاية
بسمة : ممكن بس هيك دعايات بتبين مبتزلة و انو الممثل عم يلبس من هالماركة كرمال بس يعمل دعاية و يقبض عليها مصاري ، يعني اعلان غير مقنع اما بالطريقة يلي انا طرحتا رح تكون عفوية
الاستاذ زين : صح بدا وقت بس فكرة حلوة و مميزة ، معناتا رح نشوف شوفي مسلسلات و افلام عم تنعمل هلأ تكون البطلة فيه الها قاعدة جماهيرية كبيرة و هي يلي رح تعرض قطع المجوهرات
انتهى الاجتماع بتعليمات الاستاذ زين لمدراء الاقسام بانو يتواصلو مع شركات الانتاج و يعملو بحث طويل عن الممثلة يلي بتمتلك الجسم المثالي و الشهرة و الشعبية ، جيت لاطلع من غرفة الاجتماعات و ارجع على مكتبي
الاستاذ زين : مدام بسمة ما تروحي ، حابب احكي معك
بسمة : اي تفضل عم اسمعك
الاستاذ زين : اول لقاء النا كان سيء جدا انا بعتذر منك اذا غلطت معك بشي ، ما كان قصدي ازعجك
بسمة : لا ولايهمك حصل خير بس انا عندي استفسار بانو الاجتماع كان لمدراء الاقسام و انا موظفة بسيطة ليش انحط اسمي بالقائمة
الاستاذ زين : كنت حابب شوف شو بدك تقدمي افكار مبدعة لهل الاجتماع و ما خاب ظني
بسمة : شكرا الك و انشالله بقدر قدم اكتر و ساهم و لو بجزء بسيط، عن اذنك انا بدي ارجع لمكتبي
الجزء الرابع:
طلعت من غرفة الاجتماع و رجعت على مكتبي ، بعد 3ايام رجعت دقتلي سكرتيرة المدير و قلتلي المدير زين طالب يشوفك بمكتبو ، رحت لعندو
بسمة : مرحبا ، استاذ طلبت تشوفني
الاستاذ زين : اهلين مدام بسمة تفضلي ارتاحي ، طلبت شوفك لقلك انو انا بلشت بتطبيق فكرتك و اليوم عنا عشا عمل مع مسؤولين عن شركة انتاج
بسمة : عفوا انا بعتذر جد بس ما بقدر روح ، يا ريت تاخد حدا تاني
الاستاذ زين : ليش ؟ يعني انت صاحبة الفكرة و ما بقدر اخد حدا تاني غيرك
بسمة : استاذ زين انا مرة متزوجة وبحب شغلي يكون ضمن نطاق الشركة و ما يطلع لبرا …يعني زوجي هاشم ما بيرضى بهالشي ، يا ريت تتفهم وضعي
الاستاذ زين: اممم اي اكيد
طلعت من مكتبو للاستاذ زين و انا ناهية موضوع عشاء العمل بس وقت رجعت على البيت ، و انا عم اتغدى مع هاشم
هاشم : اليوم طلب المدير يشوفني
بسمة : ولله….خير…ليش
هاشم : ليش !!لانو حضرتك طلعتيني قدامو رجال متخلف و من العصر الحجري قال زوجي ما بيرضى بانو يكون شغلي خارج الشركة ، مين قلك اني ما برضى ، قطعتي و وصلتي من عندك !
بسمة : شو بدو ياخدني !عشاء عمل !ما بحب هيك اجواء و يمكن يكونو كلن رجال و ما في غيري مرة
هاشم : اي و اذا شو بدن ياكلوكي ، هن ساعتين زمن بتحكو بالشغل و بتتعشو و خلصت القصة ، اعملي حسابك انو قلتلو للمدير انك رح تروحي
بسمة : هادا المدير انسان تافه يعني قلتلو ما بدي روح ، راح بعتلك ليقنعك
هاشم : هلا الاستاذ زين بكبرو انسان تافه ، اذا هو تافه نحن شو
بسمة : خلص انت ما بينحكى معك
هاشم : الساعة ٨رح يمر ياخدك ، قومي شوفي شو بدك تلبسي يا دوبك تلحقي
قمت على خزانتي لاختار شو البس على عشاء العمل و هاي اول مرة بحياتي بروح على شي اسمو عشاء عمل ، لبست قميص ابيض و جاكيت رسمي اسود و بنطلون اسود و انا عم حط ميك اب ، دخل زوجي على الغرفة
هاشم : بهالتياب بدك تروحي !الله يبهدلك يا مرتي !كانو رايحة على عزا
بسمة : شبن ليش؟؟
هاشم : بدلين بسرعة ما معك وقت ، هلا بيجي ما تنطريه
بسمة : شو بدي البس ؟هدول انسب شي
هاشم : تعي !انا رح قلك شو بدك تلبسي …انت لولاي بضيعي …..البس هيدا الفستان الاسود
بسمة : فستان ! هيدا للمناسبات
هاشم : اي طبعا فستان ، عشاء العمل بافخم مطعم بالبلد ، ما بينفات عليه بهيك تياب ، و تقلي مكياجك و حطي اكسسوار ما بدي تسوديلي وجهي قدام الاستاذ زين ، بدي الكل يقول نيالو هاشم على هالمرة يلي عندو
غيرت تيابي و نزلت بعد ما حكاني الاستاذ زين و قلي انزلي انا تحت البيت
بسمة : مسالخير
الاستاذ زين : يسعدلي هالمسا ، ما شالله عليكي ما عرفتك ، انت حلوة و صرتي احلى
بسمة : تسلم هيدا من ذوقك
الاستاذ زين : شو بتحبي تسمعي اغاني
بسمة : على ذوقك
الاستاذ زين : رح حطلك على ذوقي ، انا بحب صوت فضل شاكر كتير
مأثر فيي و بعيني
شوي شوي عليي
ساكن فيي وحواليي
بقلبي وبروحي
لا ما بدي منك وردة
بدي بالحنيي
ضلك حدي تدفي بردي
تنسيني جروحي ……
نظرة منك بتجنني
بتحيي حياتي
انا يا عيدي اخترتك عيدي
بدي قربك مني
لدنييي جديدة بتاخد ايدي دموعي وبسماتي
فرحان جن وحبك حب جنون
كنت قاعدة جنبو بالسيارة و هو كل شوي يطلع علي و يزيح نظرو عني ، نظراتو الي كانت بتلبكني و بتوترلي اعصابي ، نظرات غير بريئة و كلها خبث و مكر ….
وصلنا على المطعم يلي كنت كنت اسمع فيه سمع بس و شوفو من برا بس ما فكرت ابدا انو فوت و اقعد فيه لانو معروف باسعارو الغالية و ما اي حدا بفوت عليه الا اذا كان من الطبقة الهاي كلاس ، فتنا و قعدنا على الطاولة المحجوزة مسبقا على البحر
بسمة : ما حدا اجى منن لهلا ، ايمت قلولك رح يجو ؟
الاستاذ زين : على الساعة ٩
بسمة : اه انت قلت على الساعة ٨العشا
الاستاذ زين : صح انا كنت حابب نقعد شوي لحالنا قبل ما يجو ، شو بتحبي تشربي
بسمة : عصير برتقان فريش
الاستاذ زين : شو رايك بموقع الطاولة على البحر حلو عجبك ؟
بسمة : اي حلو
الاستاذ زين : انت بتحبي البحر ؟
بسمة : اي بحبو كتير ، بريح كتير بقولو المي المالحة بتمتص كل الطاقة السلبية يلي بجسم الانسان
الاستاذ زين : صح حكيك، انا بس حس حالي مدايق و مخنوق بروح على البحر حتى صفي راسي و ارتاح ، بتعرفي تسبحي ؟
بسمة : اي بعرف بس فضل اتفرج على البحر و جماليتو اكتر من انو فوت و اسبح فيه ، يعني مشوار خمس دقايق بشي مركب احلى من السباحة ساعتين
الاستاذ زين : امم …عن اذنك رح احكي مكالمة
بسمة : تفضل خود راحتك
الاستاذ زين : الو ….ابو فايز ….انا بمطعم مارينا ، بدي منك تجبلي اليخت و رح لاقيلك على الشط ، ما طول الله يخليك ، قومي يلا …
بسمة : لوين !
الاستاذ زين : رح نروح مشوار صغير باليخت قبل ما يجو ضيوفنا
بسمة : لا جد ميرسي كلك ذوق بس انا بفضل نبقى و ننطرن
الاستاذ زين : نص ساعة ما رح نطول يلا ، هيدي فرصة ما رح تصحلك على طول ، اذا بتريدي ما تخجليني ، صرت واقف …ليكي الناس عم تطلع فيني…..
الجزء الخامس:
نزلنا على الشط و اجا اليخت يلي كان يخت الاحلام ،نزل ابو فايز من اليخت و طلع قبلي زين و مدلي ايدو ليمسك ايدي و يطلعني ، طلعت و قعدت على سطح اليخت ، قلي اقعدي ارتاحي رح جبلك عصير بس لدور اليخت و نفوت لجوا شوي ،قلتلو ما كتير تبعد الله يخليك ، مشي باليخت لجوا البحر و وقفو و جاب كاستين عصير و اجا يقعد معي
الاستاذ زين : بسمة انا نسيت اسالك انت الك اديش متزوجة ؟
بسمة : ٣سنين
الاستاذ زين :و اكام ولد عندك ؟
بسمة : ماعندي ولا ولد
الاستاذ زين : عفوا على سؤالي الشخصي بس ليش؟
بسمة : لا عادي ، هاشم ما بدو اولاد هلأ قبل ما يتحسن وضعنا و يصير عنا بيت ملك
الاستاذ زين : اممم
بسمة : و انت كام ولد عندك ؟
الاستاذ زين : انا ماعندي ولا ولد كمان لاني ما متزوج
بسمة : اه فكرتك متزوج
الاستاذ زين : كنت متزوج بس طلقنا و ما كملنا مع بعض
بسمة : الله يعوضك
الاستاذ زين : ما سالتيني ليش ..
بسمة : انا ما بحب اسال كتير بامور غيري ما بحب كون حشرية
الاستاذ زين : امم يعني انا حشري
بسمة : لا ما قصدي هيك
الاستاذ زين : طيب انا بحكي معناتا بدون ما تسالي ،انا طلقت من 3سنين ،تزوجت بنت عمي و اخدنا بعض عن حب بس بعد الزواج طلعت انا ما بجيب اولاد و هي ما قدرت تبقى معي اكتر من 5سنين ، كانت حابة تصير ام و يصير عندا اولاد ، طلبت الطلاق و انا طلقتا فورا ، مع انو حبيتا حب جنون و ما كنت اقدر اتخيل حياتي بدونا
بسمة : ما بعرف شو بدي قلك الله يعوضك بالاحسن ، ما فكرتو ترجعو لبعض ؟
الاستاذ زين : انا كنت بتمنى بس هي ما كان بدا ، قولي هلأ هي متزوجة و صار عندا اولاد
بسمة : اه يالله ، كيف هالدنيا ، بعدك بتشوفا لهلأ ؟
الاستاذ زين : اي بشوفا بالنوادر ، بما انو هي بنت عمي و احيانا بتصير مناسبات عائلية بقا منضطر نلتقي مع بعض و لو جيتي علي ما بحب شوفا لانو كل ما بشوفا و بشوف اولادا بينحرق قلبي
بسمة : لهلأ بتحبا؟
الاستاذ زين : لا ما بحبا متل اول بس بحن لايام انا كنت مبسوط فيا ، غير هلأ ، الوحدة بتقتل و مستحيل ارجع اتزوج مرة تانية و ارجع اظلم وحدة تانية معي و احرما من حق الامومة
بسمة : الزواج قسمة و نصيب و هي ما كانت من نصيبك ، و اكيد لقدام انشالله رح تلتقي ببنت تقبل فيك متل ما انت او بنت يكون وضعا متل وضعك بس انت ما تستسلم لليأس ، صارت الساعة ٩ لازم نرجع
الاستاذ زين : اي صح رح لف و ارجع ، اخدنا الحكي و ما حسيت على الوقت
رجعنا قعدنا على طاولتنا و كانو ضيوفنا قاعدين و ناطرينا ، حكينا و اتفقنا معن على كل التفاصيل و على موعد توقيع العقد و على موعد التصوير و ايمت لازم نكون متواجدين ، خلص عشا العمل بعد.ساعة و نص و وصلني الاستاذ زين لبيتي و قلي كانت سهرة حلوة و انت يلي حليتيا ، قلتلو تصبح على خير و طلعت شفت زوجي قاعد و ناطرني
هاشم : شو صار معك ؟
بسمة : طول بالك لغير تيابي بالاول ، ما صار شي ، هلا ناطرين علين ليبلشو تصوير و هن بردولنا خبر
هاشم : طيب عرفتو مين الممثلة يلي بدا تعرض المجوهرات
بسمة : لا لسا لانو لسا ما اختارو الممثلين للفيلم يلي بدن ينتجوه بس فهمت من حكين انو ممكن يختارو سيرين عبد النور للفيلم لانو كانت عارضة ازياء و تمثيلا مقبول..
هاشم : سيرين عبد النور …واو …و اكيد الاستاذ زين رح يشوفا و يقعد معا ….لك نيالو ابن المحظوظة
بسمة : شبك ..اي انا احلا منها و ما في مجال للمقارنة
هاشم : اي احلى بس انت عبد النور و هي سيرين ههههه
بسمة : هيدا يلي طلع معك ، كلها عمليات تجميل و نفخ و شفط ، اعطيني قد المصاري يلي معا و شوف كيف بعملك حالي و بنفخلك تمي و بلبسك احلى لبس ، يا حبيبي هدول النسوان ما عندن شغل غير انو يهتمو بحالن و عندن مين يطبخلن و يشتغلن و كل شي بلاقوه جاهز مو متلي و متل نسوان كتير ، بس انتو الرجال بتشوفو كل النسوان احلى من مرتكن
هاشم : اي ولله المصاري بتعمل كل شي ، متل ما بقول المتل لبس العود بجود و لبس المكنسة بتصير ست النسا
بسمة : مكنسة …… كل تفكيرك انت بالمصاري …مفكر السعادة بالمال بس …لك الناس يلي الله عاطين مال حارمن من شي تاني انت عندك اياه ….احمد ربك و هلأ اتكنس من هون جاي تعبانة و بدي نام تصبح على خير ….
الجزء السادس:
مر شهر قبل ما يردولنا خبر شركة الانتاج بانو عقد الفيلم توقع و الاختيار وقع على الفنانة سيرين عبد النور ، خلال الشهر كان الاستاذ زين يطلب يشوفني بمكتبو لنتابع الموضوع و كتير احيان كان يبعت وراي لاسباب تافهة و غير منطقية ، بعد شهر بعتلي خبر انو اجي على مكتبو لانو الموضوع ضروري ومستعجل هالمرة…
الاستاذ زين : اتصلو اليوم فيني و خبروني انو بعد 4ايام رح يبلشو تصوير ب لبنان ، جهزي حالك و ضبي شنتايتك
بسمة : انا….شو خصني بالسفرة على لبنان
الاستاذ زين : كيف شو خصك ، انت صاحبة الفكرة و لازم تكفيا للاخر ، و بعدين حدا بصحلو سفرة ل لبنان و بقول لا
بسمة : انا بقول لا ، انا ما كتيرر بحب السفر ، انت سافر و خود الاستاذ محمد او ناصر معك و هن عندن خبرة اكتر بهالموضوع
الاستاذ زين : لا رح اخدك انت ، انت مرة و مذوقة و بتفهمي اكتر بهيك امور و بعدين كل شي بحسابو يعني رح اعطيك على تعبك بهالسفرة
بسمة : استاذ زين …انت مديري و انا بحترمك و بحترم رايك والموضوع ما موضوع حساب و مصاري يا ريت ما تضغط علي و تتركني على راحتي
الاستاذ زين : اذا كرمال زوجك هاشم ما تاكلي همو انا بحكي معو
بسمة : لا ما كرمال زوجي ، انا ما مرتاحة للسفرة و بس
الاستاذ زين : طيب ما تستعجلي بقرارك لسا في اسبوع ، فكري و رديلي خبر
بسمة : انا اخدة قراري
طلعت من عندو من المكتب و انا مدايقة لانو ما توقعت طبيعة شغلي تكون عشاء عمل و سفرات برا البلد ، رجعت على البيت و خبرتو لهاشم بالشي يلي صار معي و وقت سمع انو في مبلغ كبير مقابل السفرة عصب و انجن
هاشم : انا رجل كرسي بهالبيت ،كيف بتاخدي قرار بدون ما تاخدي رايي
بسمة : شبك جنيت ، بدك اياني سافر مع رجال غريب ، شو صايرلك، انت بطلت تحبني يعني و تغار علي
هاشم : شو دخل حبي الك بهالموضوع ؟بحبك و بغار عليكي بس هيدا شغلك و الرجال محترم و بعدين نحن هيك مبلغ بحاجتو هلأ
بسمة : كرمال المصاري يعني ما عندك مشكلة مرتك تسافر مع رجال غريب …. بتعرف شو ، انت واحد بلا شرف
وقت قلتلو هالكلمة هجم علي و ضربني متل المجنون ، هاي اول مرة بيضربني فيا ، يضربني و يسبني و يقلي انا بلا شرف ! ، انت الوسخة يلي مفكرة الرجال نيتو عاطلة اتجاهك و بدك تسافري متل الكلبة معو ، صرت ابكي و صرخ بعد عني ..خلص بسافر بس بعد عني… شوهتني ، تركني و طلع من البيت ،وقفت على المراية و كان اثار الضرب واضحة على وجهي و تحت عيني ازرق و بعد ساعة رجع و قلي انا بعتذر منك بس انت استفزيتيني بكلامك ، انا عم اشتغل متلي متلك و كلو كرمال مصلحتنا و يصير عنا بيت و نخلص من شنططة الاجار ، عاجبك وضعنا هيك يعني ، و ما تكوني مرة معقدة ، الرجال محترم و شايف فيك مرة مبدعة بشغلا و لو بدو شي ما مزبوط ، باشارة من اصبعو بيصطف قدامو طابور بنات ، بقيت ساكتة و ما رديت عليه ابدا و فتت نمت بغرفتي …
رحت تاني يوم على شغلي و حاولت اخفى اثار الضرب على وجهي بالفاونديشن و رحت على مكتب الاستاذ زين
بسمة : بعتذر لانو جيت لعندك بلاموعد مسبق منك ، انا موافقة على السفرة للبنان
اطلع فيني شوي و قام من ورا مكتبو ، و وقف قبالي
الاستاذ زين : ليش هيك وجهك و تحت عينك ؟ مين ضاربك ؟
حطيت ايدي على وجهي و نزلت راسي
بسمة : ما حدا ، مبارح انخبطت بالباب بالغلط
مسكني من ايدي و اخدني على المراية
الاستاذ زين : اطلعي منيح بوجهك على المراية …هيدي خبطة باب …ماني غبي لما ميز بين الضرب و خبطة الباب
بسمة : استاذ زين… اذا بتريد هاي حياتي الخاصة و ما بحب حدا يدخل فيا
الاستاذ زين : اممم صح حياتك الخاصة بس انت مرة واعية و ناضجة و متعلمة و معتمدة على حالك و ما بحاجة حدا ليش لتسمحي لحدا يعمل فيكي هيك ؟
بسمة : اديش بدنا نقعد ب لبنان حتى اعرف اديش اخد معي تياب ؟
سكت شوي و انتبه اني عم حاول سكر على الموضوع حتى ما يحرجني باسئلته، قلي ما بعرف حسب ما يخلص شغلنا بس اذا لزمك شي بتشتري من هنيك
الجزء السابع:
وصلنا على لبنان المسا ،فتنا على فندق و حجز زين لكل واحد فينا غرفة و غرفة للمندوبين من شركة تصميم المجوهرات
الاستاذ زين : فوتي غيري تيابك و انا رح اسبقك لمطعم الفندق لنتعشى لانو انا ميت من الجوع …
فتت تحممت و لبست و نزلت على المطعم ، وقفت على الباب دور بعيوني على الاستاذ زين ، كان قاعد عم يدخن و شارد و كانو ما بهالدنيا ، من الواضح انو زين رجال حساس كتير و قليل الحظ بهالدنيا بس انسان قنوع بنصيبو و بنفس الوقت انسان طموح ، المظهر الخارجي لزين بيوحي انو هو شاب غني من طريقة لبسو و ماركة الساعة يلي لابسا مع انو هو يعتبر انسان متوسط الجمال عيونو سود و شعرو اسود و لون بشرتو حنطية فاتحة و طولو متوسط ، انا اعتبرتو متوسط الجمال بالنسبة لزوجي هاشم يلي كان جمالو غربي و ملفت للنظر ، طويل و نحيف و شعرو اشقر و ابيض كتير و عيونو اخضر فاتح، بس زين كان واضح انو من عيلة مرموقة بالبلد من خلال تصرفاتو معي و مع اي موظف بالشركة عندو ، وقت اطلعت بالسيارة فتحلي الباب حتى اطلع و طول الطريق كان يجبلي اكل و مشروبات و يسالني اذا لازمني شي و مرتاحة بمحلي ، زين ببساطة جنتل مان…
بسمة : مسالخير ، انشالله كون ما تاخرت عليك
قام من محلو و سحبلي الكرسي لاقعد
الاستاذ زين : يسعدلي مساكي ، لا ابدا ، كيف شفتي الفندق و الغرفة ، انشالله عجبوكي ؟
بسمة : اي كتير مشكور على اختيارك
الاستاذ زين : اهلا و سهلا فيكي نورتي لبنان شو بتحبي تتعشي ؟
بسمة : ما بتفرق على ذوقك بس انا حابة دوق التبولة اللبنانية
الاستاذ زين : امم طيبة كتير رح اطلب تبولة و كبة نية و وجبتين كريسبي او اذا ما بتحبي الفروج ، بتحبي اطلبلك شرحات لحمة؟
بسمة : لا عادي باكل …
الاستاذ زين : هاي اول مرة بتجي على لبنان
بسمة : اي اول مرة
الاستاذ زين : اي ما رح خليكي تنسي ابدا هالسفرة بحياتك
بسمة : ما فهمت
الاستاذ زين : رح نفتل لبنان و فرجيكي اديشا حلوة
بسمة : ما بحس انو في بلد احلى من بلدي
الاستاذ زين : اكيد ما في احلى من بلدنا بس لبنان كمان حلوة كتير و البلدين عندن نفس الطبيعة الخضراء بس انا بشوف انو ب لبنان في اهتمام بالمناطق السياحية اكتر من عنا ، لبنان بلد السياحة…
تعشينا وبعد ما خلصت عشا استاذنت منو و قلتلو انا بدي روح نام لانو تعبانة كتير من السفر و بشوفك بكرا انشالله على الساعة ٩الصبح ، قلي ماشي انت و من اهلو انا بقيان شوي هون و اذا لزمك شي بالليل انا غرفتي جنب غرفتك دقي علي
رحنا تاني يوم على موقع التصوير و شفنا الممثلة سيرين عبد النور
بسمة : حلوة كتير على الواقع
الاستاذ زين : شو حلاها كلها نفخ و سليكون
بسمة : ههههههه
الاستاذ زين : ليش عم تضحكي
بسمة : فظيعين انتو الرجال كيف بتفكرو ، وقت سمع زوجي اني بدي شوف سيرين عبد النور قلي نيالك و قال عنا حلوة كتير و انا قلتلو جمالها مصطنع و عمليات تجميل
الاستاذ زين : الجمال اذواق ، يلي بتشوفيه انت حلو ما بالضرورة غيرك يشوفو حلو بس ما تقليلي انو شافا احلى منك كمان ؟
بسمة : يعني انا احلى منها !!
الاستاذ زين : طبعا شو ما عندك ثقة بهالشي!
بسمة : طبعا عندي و زوجي كان عم يمزح و قلي انو انا احلى منا بكتير و ما في مجال للمقارنة و حتى قال عنها شبه المكنسة
بقينا بموقع التصوير اول يوم بحدود ال 5ساعات و كان من المفروض نرجع تاني يوم لنكفي شغلنا بس تاجل التصوير لبعد بكرا ،و بعد ما خلصنا شغل اقترح الاستاذ زين انو نطلع على مدينة جونيه و ننام ليلة هنيك ، رجعنا على الفندق و اخدنا كام قطعة تياب و تركنا الباقي بالفندق و اطلعنا بالسيارة على منطقة جونيه و حجزنا بفندق ل ليلة وحدة بس ، و تاني يوم فقنا الصبح بكير و نزلنا تعرفنا على المنطقة و فتنا اسواق كتيرة سوق الكسليك و سوق الذوق العتيق و بعدا طلعنا بالتلفريك جونيه _حريصا مزار سيدة لبنان
الاستاذ زين : خايفة ؟
بسمة : اي كتير هاي اول مرة بحياتي بطلع بتلفريك ،كتير عالي بس المنظر بجنن كتير تحت و بيستحق هيك مغامرة
الاستاذ زين : تعي اقعدي جنبي ، مشان اذا وقعنا تهدي فيني
بسمة : بالله اذا وقع فينا منوقع نحن الاتنين سوا …انا مرتاحة بمحلي هون
الاستاذ زين : هلأ بس ننزل بدنا نروح على مغارة جعيتا ، قريبة من هون
رحنا على مغارة جعيتا وبعدا رجعنا على جونيه لنتغدى فيا و نضب اغراضنا و رجعنا على بيروت المسا
بسمة : انا تعبانة كتير رح نام فورا
الاستاذ زين : لسا بكير ، كنت مفكر نروح نسهر بالروشة
بسمة : لا مستحيل بعد هلأ اذا ضل معنا وقت بعد ما نخلص شغلنا بكرا منروح
طلعت تحممت و غيرت تيابي و لبست قميص نوم و تسطحت بالتخت لاغفى و نام ، بعد ربع ساعة اندق الباب علي
بسمة : مين !
الاستاذ زين : انا …زين
بسمة : لحظة بس
لبست روب فوق قميصي النوم و فتحتلو الباب
بسمة : اهلين استاذ زين ، في شي !
الاستاذ زين : بعدك سهرانة ؟
بسمة : كنت رح نام بعد شوي
الاستاذ زين:ممكن فوت شوي ؟
بسمة :…….تفضل…
فات و هو عم يطلع فيني
بسمة : خير استاذ زين صاير معك شي ؟ شغلتلي باالي …
الجزء التامن:
فتت وراه، رجع التفت علي فورا و ثبتني على باب الغرفة و قرب علي و باسني ، حاولت افلت من ايديه و بعدو عني بس كان اقوى مني، رفعت رجلي و ضربتو بركبتي على اعضائه التناسلية ، بعد عني و رجع لورا و هو عم يتوجع ،فتحت باب الغرفة
بسمة : انت واحد مجنون …اطلع برا هلأ
زين : اخ….بسمة ….انا ..
بسمة : زين عم قلك اطلع برا …شو مفكر حالك عم تعمل ، فكرتك انسان محترم و جنتل بس للاسف انتو كل الرجال نفس بعضكن ،فكرت انو اذا قبلت سافر معك اني وحدة ما بسوا ،انا مرة متزوجة و بتحب زوجا
زين : على شو بتحبيه لزوجك ، زوجك انسان ندل ، بيعبد المصاري ،بعتك مع انسان غريب برا البلد و ما خاف عليكي مني
بسمة : لانو واثق فيني و لانو مرة بمية رجال وقت اللزوم و لانو فكرك انسان محترم
زين : ااي و ليش ضربك من اسبوع؟
بسمة : ماضربني ؟
زين : ما تكذبي …ضربك
بسمة : طيب ضربني و هالشي ما بخصك
زين : بسمة انا بعرف هالنوعيات كتيرر منيح ببيعو نسوانن ل يلي بدفع اغلى انت ما بتستحقي هيك واحد
بسمة : شو شايفني قدامك سلعة حتى انباع و انشرى؟
زين : بالعكس انا ما شايفك هيك بس هو يلي شايفك هيك و بدو يطلع على كتافك و على كرامتك
بسمة : زين …زوجي بحبني و انا بحبو كتير
قرب علي و مسكني من ايدي
زين : ما تقولي بحبك لانو هو ما بحبك و انا مستعد بس نرجع اثبتلك انو هو ما بحبك
بسمة : حبو الي ما بدو اثبات و هلأ اطلع من هون و تصبح على خير
زين : ماشي ….انا طالع هلأ بس ما تنسي الحكي يلي قلتلك اياه
طلع زين من غرفتي و انا قعدت ابكي من الحكي يلي قلي اياه على زوجي ، كرهتو كتير لهاشم لانو حطني بهيك موقف و قررت بس ارجع انو اترك شغلي بشركة زين و حاول ارجع لشغلي القديم و نمت هديك الليلة انا و عم ابكي ….
فقت تاني يوم و ما نزلت فطرت مع زين وطلبت الفطور لغرفتي و بعدا لبست و نزلت و شفتو قاعد بالمطعم عم يشرب قهوة ، سلمت عليه انا و عابسة و بعدا قمنا لنكفي شغلنا و نحن على طريق الرجعة للفندق المسا ، بلش يحاول يحكي معي
زين : رح نروح نقعد بالروشة شوي و نتابع على السوليدير
بسمة : لا انا تعبانة و بدي ارجع نام و ضب اغراضي كرمال بكرا
زين : بسمة …انا بعتذر عن ليلة مبارح ، كنت ما بوعيي ، ما بعرف شو صرلي و كيف طلع معي هيك
بسمة : انا تناسيت تفاصيل ليلة مبارح
ونحن عم نحكي مع بعض رن موبايلي
بسمة : الو …اهلين حمودة….
محمد: بسمة وينك …بعدك ب لبنان ؟
بسمة : اي بعدني ب لبنان بس بكرا على الساعة وحدة بكون بالبلد .
محمد : ليكي الله يخليكي ما الي غيرك ، بكرا جابتني بضاعة و طلع سعرا اكتر من المصاري يلي معي بدي تدينيني شي 300الف و برجعلك اياهن بعد شهر
بسمة: ….بس 300الف ،تكرم عينك .،.اول ما وصل بسحبلك اياهن و انت مر خدن لاني بوصل تعبانة ..
محمد: اي ماشي الله يخليلي اياكي
.بسمة : ولو ..يلا باي حبيبي
زين : مين حمودة ؟
بسمة : هيدا اخي
رجعنا على الفندق و ضبيت شنتايتي و رجعنا تاني يوم من لبنان و طول الطريق يطلع فيني و انا ما اعمل حالي ما منتبهة عليه و اي حديث يفتحو معي رد باختصار عليه
زين : رح وصلك على البنك
بسمة : لا ما في داعي نزلني هون و بروح لحالي
زين : لا رح وصلك و انطرك وبعدا بوصلك على بيتك كرمال الشنتا
رحنا على البنك و نزلنا ل اسحب المصاري من الحساب المشترك بيني و بين زوجي ، بس كانت المفاجأة وقت قلتلي الموظفة الحساب تسكر من 6شهور و طالع عندي على الكمبيوتر انو زوجك سحب كل شي فيه ، قلتلا عفوا ارجعي تأكدي اكيد انت مخربطة ، قلتلي انت اسمك بسمة …و زوجك اسمو هاشم… ، قلتلا اي ، قلتلي ما مخربطة متل ما عم قلك الحساب فاضي و مسكر…..
طلعت من البنك و انا مخنوقة و مدايقة و عقلي مشتت ، قلي زين طولي بالك ما تدايقي ، انا هلا بعطيكي المبلغ تعطيه لاخوكي ، قلتلو لاا لاا بدي شوف هاشم وين حاطط المصاري ، بجوز قايمن و حاطن بالبيت او ناقلن لغير بنك ، قلي طيب ماشي اذا لزمك شي انا بالخدمة ….
رجعت على البيت و انا نار شاعلة فيني و ناطرة هاشم ليجي لصب كل غضبي عليه و ما كنت دقلو حتى ما يتهرب ، على الساعة 4رجع من شغلو
هاشم : لحمدلله على السلامة
بسمة : الله يسلمك ، هاشم كيف بتسكر الحساب المشترك بدون ما تخبرني و وين رحت بالمصاري؟
هاشم : ….شو عرفك !… ليش رحتي على البنك ؟
بسمة : رحت كرمال اسحب مصاري ، محمد لازمو مبلغ كرمال بضاعتو
هاشم : اهلين يا محمد ، يروح يدبر حالو ما لقى غيرك تعطيه
بسمة : هيدا اخي و طلب مني و انا معي و ما بدي خجلو ، وين المصاري يا هاشم ؟
هاشم: كنت حابب اعملك اياها مفاجئة بس انت نزعتيا هلأ
بسمة :شو هالمفاجأة يلي من ٦شهور لهلا ما فاجئتني فيا عم تبنيلي قصر يعني
هاشم : انا اشتريت بيت
بسمة : اشتريت بيت!!كيف اشتريت بيت بدون ما تقلي و بعدين تعا لهون نحن متفقين البيت يلي بدنا نشتريه يكون نصو باسمي و نصو باسمك
هاشم : له يا بسومة ليش في فرق بيني و بينك ، جيبتي و جيبتك وحدة
بسمة : ولله عم تضحك على عقلاتي ، انا فايتة البس لتفرجيني على هالبيت
هاشم: بسمة طولي بالك انا كنت بدي قلك من قبل بس ما اجت الفرصة لهلأ،انا اشتريت بيت و اجرتو..
بسمة : شوو اجرتو كمان !ليش اجرتو! يعني عنا بيت ملك و نحن مذروبين ببيت غرفة و صالون و عم ندفع اجارن كل شهر ..
هاشم : اي اجرتو و بسعر كتير مرتب و الاجار عم حطو بالبنك لنجمع حق سيارة ، هيك بصير عنا بيت و سيارة
بسمة : هاشم انت لعبت علي لعبة وسخة ، سحبت المصاري من الحساب المشترك و اشتريت بيت حطيتو باسمك و هلأ فاتح حساب بالبنك باسمك بس من اجار بيت انا دافعة نصو ،انت ببساطة اكلتلي حقي و نحن ما كان هيك الاتفاق ؟
هاشم : روقي شوي شو حقي و شو حقك !نحن الاتنين واحد
بسمة : طيب مدام نحن واحد اكتب البيت نصو باسمي و نصو باسمك
هاشم : خلص صرت حاطو هلأ باسمي و اذا بدي اعمل متل ما عم تقولي الاجراءات طويلة و بتاخد وقت كتير و انا ما فاضي هلأ
بسمة : بالله بتاخد اجازة يومين ما في مشكلة و بتمشي بالمعاملة و طلع المستاجرين من البيت و خلينا ننقل عليه
هاشم : عملتلن عقد اجار عن سنتين و دفعولي مقدم ، يعني ما بقدر طلعن قبل ما يخلص عقدن
بسمة : شو يعني هالحكي ،يعني بدنا نضل بالاجار لسا سنتين و عنا بيت ملك
الجزء التاسع: (الله ياخد امتالك يا هاشم 😐)
كانت صدمة كبيرة انو اعرف انو كل تعبي خلال هال3سنين راحو لزوجي و ما في اي اثبات انو انا مساهمة بنص حق البيت ، انا و عم اعلق مع هاشم ، دقلي اخي محمد و سالني شو صار معك ، قلتلو امهلني شوية وقت بس ،قلي الله يخليكي ما الي غيرك خايف التاجر يسحب البضاعة من عندي او يبلغ الشرطة علي ، قلتلو خلص ولا يهمك قلتلك رح امنلك المبلغ ، سكرت الخط معو و رجعت لنقاشي مع هاشم
بسمة : الحكي معك طويل لسا بس هلأ بدي تنزل تسحبلي من حسابك 300الف لاخي ؟
هاشم : ما رح اسحب شي ، شو الضمان يرجعن ،بلكي نصبن علي
بسمة : شو الضمان !هيدا اخي و حتى لو ما رجعن مني الو اصطفل، انا الي حق بالمبلغ يلي قبضتو مقدم اجار
هاشم :ما الك شي و ما في شي بيثبت انو الك منن
بسمة : هاشم شبك شو جنيت
هاشم : بسمة اعلى ما بخيلك اركبيه و ما رح اسحب ليرة منن لاخوكي ، هدول لحق السيارة ، يروح يدبر حالو من شي رفيق و بعدين ليش ليجيب بضاعة ما معو حقا ، على قد بساطك مد رجليك
بسمة : اعلى ما بخيلي اركبو !طيب اسمع لقلك انا شغل بالشركة عنكن ما بقا اشتغل و خليك انت يلي تصرف على هالبيت ،انا سحبت ايدي
هاشم : لانو على كيفك الشغلة ،يوم بدي اشتغل و يوم بدي اترك
بسمة : اي على كيفي و ما في حدا بيجبرني على شي ما بدي اياه
هاشم : لا في ، في انا ،زوجك كسار راسك
بسمة : زوجي النصاب البخيل المأنشح الكمونة
قام يضربني و انا اركض و هو يلحقني لمسكني، و زتني على التخت و قعد فوقي و بلش يضربني كفوف ، و انا سب عليه و قلو بعد عني انا بكرهك انا ما عاد بدي اياك ، عضيتو من رجلو و دفشتو و ركضت على المطبخ و مسكت سكينة و قلتلو اوعى تقرب بحطا ببطنك ، انا ما بقا قادرة اتحملك اكتر من هيك ،ما فيك صفة حلوة لابقى عليك و اتحمل كل هالاهانة و الذل و الضرب ، انت مانك رجال انت ذكر بالهوية بس ، بعد من طريقي ،اخدت شنتايتي يلي جيت فيها من لبنان وفتحت الباب و انا ماسكة السكينة بايدي و خايفة يهجم علي
هاشم : وين بدك تروحي ؟ لعند اخوكي ومرتو ؟كل بيتو غرفة و صالون، ما رح يتحملك ؟ مرجوعك لصرمايتي ؟
فتحت الباب و نزلت انا و عم ابكي و منظري مخزي و مبين علي انو حدا ضاربني، و انا نازلة على الدرج، دقلي زين ،ما رديت عليه اول مرة ، رجع دقلي مرة تانية رديت عليه
بسمة : الو….اي استاذ زين
زين: شبو صوتك …شبك …شو صاير معك
بسمة : ولاشي
زين : وينك انت ؟
بسمة : انا نازلة من البيت رايحة لعند اخي
زين : شكلك علقتي انت و هاشم ،طيب اطلعي على الشارع الرئيسي 5دقايق بس و بكون عندك
بسمة : لا ما في داعي باخد تكسي و بروح لحالي
زين : اعملي بسمة متل ما عم قلك، ليكني جاي
طلعت على الشارع الرئيسي و بعد دقيقتين وصل زين و نزل من السيارة وشافني واقفة عم ابكي ، قرب علي و حضني …
زين : خلص اهدي ..روقي
بسمة : اخد كل تعبي و ضربني
زين: الله يكسر ايديه ،خلص ما تبكي دخيل الله ، واحد ندل ما مقدر النعمة يلي بين ايديه
فتحلي باب السيارة و قلي اطلعي و حط الشنتا بالباكاج و طلع
زين : رح نروح على اقرب مركز شرطة ، بدك تقدمي بلاغ عنو يجو يشحطو من نص بيتو
بسمة : لااا اذا بتريد ما بحب هيك قصص و فضايح ،وصلني عند اخي بس
زين : قصص شو ….لكن تسكتي على هالضرب ، زوجك بدو حدا ينفضو و يضربو اتلة مرتبة ليحرم يستقوي على مرة
بسمة :هلا بخلي اخي يحكيه و يتفاهم معو
زين : هيدا زوجك ما بينفع معو لغة الحكي ، على كل حال انا ما رح اضغط عليكي هلأ رح احجزلك تنزلي بفندق ..
بسمة : لا كلك ذوق ما بدي اقعد بفندق ، بدي اقعد عند اخي لبين ما تنحل المشكلة
زين: تنحل!!!ليش مفكرة انشالله ترجعيلو بعد كل هالشي ؟
بسمة : ما عندي خيار تاني ….مستحيل ضل عند اخي بيتو صغير و يا دوب واسعو هو و مرتو و اولادو ، رح اقعد عندن فترة لبين ما يحس بغلطو و يجي يعتذر
زين : هيك بهالبساطة ،بيعتذر و بترجعيلو
وقف السيارة ،و قلي لحظة نازل على السوبر ماركت و راجع ، رجع بعد شوي و جايبلي انينة مي ، قلي اشربي و اطلعي غسلي وجهك
زين : بسمة حتى لو اعتذر هلأ بدو يرجع يمد ايدو عليكي مرة تانية ،خلص ما بيلزمك هالرجال ، رجال ما بفكر الا بحالو
بسمة : وانت شو !!و انت كمان ما بتفكر الا بحالك شو نسيت شو جربت تعمل ليلة مبارح ،انتو كلكن نفس الشي بتحبو تستغلو المرة بس كل واحد بدو شي مختلف
زين : يلعن هديك الليلة …..يلعن هديك الليلة ….انسيا بقا ، قلتلك كنت ما بوعيي
بسمة : طيب وصلني هلا عند اخي و بكون ممنونتك
زين : طيب رح وصلك عندو و رح ارجع جبلك المبلغ يلي طلبو اخوكي منك و ما تقولي لااا اعتبرين دين عليكي و بترجعين من شغلك ….خلص روقي انا معك و ما رح اتركك ابدا ،دموعك هيدول غالين علي و ما لازم ينزلو الا للفرح
الجزء العاشر :
نزلني زين عند بيت اخي و شافني اخي بهالمنظر و قلي شوفي مين عمل فيكي هيك ، قعدت حكتلو كل شي صار معي ، قلي طيب خلص هلأ انا بحكيه ، قلتلو لا ما تحكيه هلأ ، خليه يقعد مع حالو و يعرف غلطو و هو لحالو بيجي بيعتذر ما بدي يفكر انو نحن راكضين وراه ، بعد شوي دقلي زين و قلي اطلعي خدي المصاري ، طلعت جبتن و شكرتو و اعطيتن لاخي و قلتلو هدول سحبتلك اياهن على راتبي ،و وقت شافت مرتو المصاري فردت وجها فيني و استقبلتني منيح ، قعدت يومين ما رحت على شغلي لانو كان جسمي مكسر وكان يدقلي زين كتير ليطمن علي كيف صرت اما هاشم ما اتصل ابدا لا فيني و لا باخي….
نزلت على شغلي بعد يومين و ما اجا هاشم لعندي ابدا خلال هالفترة بس قبل ما اقبض راتبي بيومين ، كنت قاعدة ورا مكتبي وقت اجا هاشم لعندي
بسمة : خير شو جايبك لقسمي ، شغلك بالطابق الاول
هاشم: بسمة حياتي ولله انت عصبتيني و استفزيتيني ، وحدة بتقول لزوجا بخيل و كمونة ، و بتحمل عليه سكينة بدا تقتلو
بسمة : انت يلي بلشت و عملت شي من ورا ضهري و بدون ما تاخد رايي و بالاخير بطلب منك مبلغ و بتبخل علي
هاشم : ولله انا بحبك و ما فيني عيش بلاكي ، خلص خلينا نفتح صفحة جديدة ، انا اشتقتلك كتير
بسمة : امم ارجعلك حتى وقت تعصب ترجع تضربني و ضل عم تاخد راتبي و ما شوف منو ليرة
هاشم : خلص ما بقا اضربك و انا محضرلك كنت مفاجأة رح سجل السيارة باسمك و رح طلعلك شهادة سواقة و انت يلي رح تسوقيا شو رايك ؟ هيك ما الك حجة علي ؟
بسمة : بفكر بس ما قبل ما رجع المبلغ يلي دينتو من الاستاذ زين
هاشم : اه ليش دينتي منو لاخوكي ….طيب ماشي هلأ بجبلك اياهن و بترجعيلو اياهن و اعملي حسابك ترجعي على البيت معي لانو انا مشتقلك كتير
بسمة : طيب
راح هاشم و رجع بعد شوي و جايبلي معو المبلغ ، طلعت على مكتب الاستاذ زين لرجعلو اياه
بسمة : هاي 300الف و عنجد بتشكرك كتير على كل شي
زين: شو هيدا ؟ من وين جبتين ؟
بسمة : من هاشم ، اجا اليوم عندي و قلتلو باني دينتن منك و جبلي اياهن
زين : اي و شو كمااان ؟
بسمة : ما فهمت عليك شو كمان
زين : بدك ترجعيلو !!
بسمة : اي …هاشم عصبي بس قلبو طيب و انحلت المشكلة و رح يشتريلي سيارة و يحطا باسمي ، يعني رجعلي تقريبا حقي
زين : اممم
سكت شوي و حط ايديه على وجهو و بعدين كتفن على بعض
زين : انت ليش ما عم تفهمي علي !ليش!
رفع التلفون و حكى السكرتيرة و قلها ابعتيلي لهاشم… بقسم البوسترات و ما تقليلو انو في حدا عندي ، فوتيه فورا و سكر الخط و قام من محلو و اجا لعندي و مسكني من ايدي
زين : قومي معي …
بسمة : لوين !
زين : ما بقا انا تعبت معك و انا عم حاول قلك زوجك واحد بلا شرف و بلا نخوة و انت ما عم تستوعبي او ما عم تصدقي
بسمة: شبك …لوين اخدني ….اتركلي ايدي… عم توجعني
زين : فوتي هون .. رح اتركلك الباب مشقوق شوي و ما بدي اسمع ولا صوت منك بس قلك اطلعي بتطلعي اوك
بسمة : شو بدك تعمل؟ ليش بدك تزربني بحمام متر بمتر !
حط ايدو على تمي و قلي هسسس بتعرفي بعد شوي ، يلا عم يندق الباب
رجع قعد ورا مكتبو
زين : تفضل استاذ هاشم
هاشم : كيف استاذ زين
زين : لحمدلله بخير ….استاذ هاشم بتعرف انا شو رايي فيك
هاشم : لا صراحة بحب اعرف تفضل
زين : انت من اكتر الموظفين عندي ذكاء ، بتفهم علي على الطايرة و برتاح بالتعامل معك كتير و بتعرف شو بدك من هالدنيا و كيف تحصل عليه بسهولة ، بتحط مصلحتك رقم واحد ، انسان متحكم بعقلو ما مخلي المشاعر و العواطف المبتذلة تسيطر عليه و تلعب فيه و بتوقع قدامك مستقبل زاهر
هاشم : شكرا كلك ذوق استاذي خجلتني
زين : لهيك انا بدي فوت دغري بالموضوع ، تفضل خود هيدا من ايدي
هاشم :شو هيدا ؟
زين : هيدا شيك ب 10مليون
هاشم : 10مليون ….لمين ؟
زين : الك انت …حر التصرف فين
هاشم : هههه شو مقلب الا عم تمزح معي
زين : لا ما عم امزح …عم احكي جد
هاشم : ليش ….مقابل شو يعني ؟
زين : امممم ….مقابل شو ….هون بقا موضوعنا …مقابل مرتك ، قبل ما تحكي اي كلمة انا بعرف انو انت ما بتحبا لبسمة و جامعتكن مصالح مع بعض بس لا تنسى انا عم قدملك مبلغ كبير يعني لو بقيت بسمة تشتغل هون 10سنين لسا ما بتجبلك هالمبلغ
هاشم : ما فهمت شو بدك بالضبط من مرتي ؟
زين : استاذ هاشم من شوي كنت عم قول عنك ذكي و بتفهما على الطايرة ، رح بلش غير نظرتي عنك
هاشم : لااا استاذ زين انا فهمت عليك بس قصدي كيف بدك اياها ، ليلة …ليلتين ….شهر ..او صاحبة مثلا هيك قصدي
زين : بسمة عجبتني كتير و دخلت مشطي و انا شب عذابي متل ما بتعرف ، يعني بدي اياها على طول ، بس بشرط بدك طلقا
هاشم : طلقا !!!ليش ما في داعي !!
زين : انا انسان عندي حب التملك و الشي يلي بمتلكو بحب يكون الي وحدي بس و ما يشاركني فيه حدا تاني ، يعني بالمختصر بقرف من انو المرة يلي عم تنام معي تكون عم تنام مع غيري
هاشم : فهمت عليك ، حقك
زين : و هاي الشيك شفتو و قرات الرقم و هلا رح اخدو منك و ما رح اعطيك اياه الا لحتى اطلق بس كدفعة مسبقة رح اعطيك مليون ليرة كاش ، مر خدن هلأ من عند المحاسب ، شو قلت؟
هاشم : شو بدي قول ….ما تركتلي مجال لقول شي …يعني مبلغ كبير ما بينرفض ابدا
الجزء الحادي عشر :
زين : ايمت رح تبلش باوراق الطلاق ؟
هاشم : بدي كام يوم بس لمهد لبسمة و لاقي حجة مقنعة لطلقا فيا
زين : ماشي ما تتاخر علي، الله معك
….بسمة ….تعي …انقلع ….بسمة
فتح زين باب الحمام علي و شاف وجهي اصفر و عم اخد نفسي بصعوبة و ساندة ايدي على المغسلة حتى ما اوقع على الارض
زين : بسمة…شبك…..شو صرلك ….بسمة
حملني على ايديه و حطني على الصوفا و ركض جبلي مي باردة و رشا على وشي و قعد جنبي
زين : بسمة ….ولله ما بعرف انو هيك بدو يصير فيكي ، لو بعرف ما كنت عملت هالشي من الاول ….بسمة ردي علي …انت منيحة
بسمة : اي اي كتيررررر منيحة
زين : ما تبكي بس انت ما تركتيلي خيار تاني ، حاولت فهمك بس ما كنتي تفهمي علي
بسمة : انا كل هالقد بشعة …كل هالقد ما بنحب
زين : لاا بالعكس انت مرة بتجنني و متل القمر ، و الصفات يلي عندك ما شفتا عند حدا، انت مزيج من الانوثة و الرقة و الطيبة و القوة و الصرامة ، انت مرة كاملة بتكملي الناقص و ما بينقص منك شي ،انت هي المرة يلي بينكتب فيكي الشعر و القصايد و بينقال احلى الغزل فيكي ،الغلط ما منك الغلط منو هو الندل و الناقص
بسمة :عملتو علي صفقة تجارية بس مين الربحان فيكن؟
زين : لااا ما تحكي هيك اذا بتريدي انا ما بنزل لهيك مستوى صفقات وسخة بس انت وقت قلتيلي انك رح ترجعيلو جنيت و ما لقيت قدامي غير هالحل حتى تعرفيه على حقيقتو
بسمة :بكون هلأ قبض المليون الليرة
زين : اي بكون اخدن بس فداكي مال الدنيا ، المهم تخلصي منو
بسمة : يعني انت هلا اشتريتني و انا صرت من ممتلكاتك الخاصة يلي بتحب تنفرد فيا و ما حدا يشاركك اياها ، بتحب تبلش هلأ الا لتكفيلو لزوجي حقي ؟
زين : بسمة شو عم تخبصي ، انت ما ملك حدا ، لا ملكو و لا ملكي ، انت ملك حالك و ما بقدر اي انسان على وجه الارض ياخد منك شي اذا انت ما بدك تعطيه اياه و هالشي شفتو بعيني ، بقا خلص حاج تبكي و روقي و حاج تخوفيني عليكي
بسمة : زوجي باعني هههههههه زوجي باعني ما بعرف اضحك الا ابكي طب ليش ما حطني بالمزاد يمكن كنت جبت اكتر من عشرة مليون ، زين انا بجيب قولتك اكتر من عشرة الا عشرة كتير علي ؟!
زين : رح اطلبلك كاسة عصير فريش لتهدي اعصابك ، خليكي نايمة ما تقومي
بسمة : لا تعا ما في داعي، انا يمكن كنت بعرف بس كنت عم كذب على حالي و حطلو اعذار ،ما كنت قبلانة صدق انو زوجي ممكن يقبض علي مصاري
زين : خلص انسيه و خليه صفحة سودة بحياتك و اطويا
بسمة :اممم صح صفحة ، قصدك كتاب و احرقو ، انا لازم قوم و ارجع على شغلي
زين : خليكي مرتاحة ما تشتغلي اليوم ، ارجعي على بيت اخوكي و انا رح اعطيكي اجازة مفتوحة و بس تحسي حالك منيحة ارجعي
بسمة : انا ما رح ارجع لعند اخي ، رح ارجع مع هاشم اليوم
زين : مع هاشم !
بسمة : اي بدي ارجع معو ،بدي شوف شو الحجة يلي بدو ينكشا ليطلقني ، عندي فضول لاعرف و لاني بدي اكرهو اكتر لسا
زين : لا بلاها اذا بتريدي ، بخاف يرجع يضربك و هالمرة ما تسلم الجرة متل كل مرة
بسمة : معلش انا بدي شوف عيونو و هو عم يقلي انت طالق
زين : طيب بس بدي اطلب طلب منك
بسمة : تفضل
زين : ما بدي تخليه يلمسك ابدا و حتى لو حاول بالغصب ما تخليه، اتركيلو البيت و امشي و حكيني و انا بجي باخدك وين ما كنتي …
بسمة : ليش ؟ انا بعدني على ذمتو ؟ بس انت بدون ما تطلب مني هالطلب انا ما رح خليه لانو قرفتو
زين : طيب حكيني شو بصير معك رح يضل بالي عندك
طلعت من مكتب زين و انا تعبانة كتير و كانو طالعة على جبال و نازلة وديان ، عقلي ما معي ، صور حياتي مع هاشم هجمت على ذاكرتي وحدة ورا التانية ، و كانو الصور عم تحرق حالا بحالا ،رجعت على مكتبي و حطيت راسي على المكتب و بكيت كتير ، بكيت على الايام و التضحيات و الصبر، بكيت على الحب و السنين يلي قضيتن معو و قدام المال باع كل شي و باعني معن ، غفيت و نمت انا و عم ابكي وما فقت الا على صوتو لهاشم
هاشم : بسمة …قومي نايمة بالشغل
كنت حابة فيق و يكون كل هالشي كابوس او فيق و نسيانة كل شي ، رجعنا على البيت و نحن عم نتغدى
هاشم : بسمة لازم تروحي عند دكتور نسائي تشوفي ليش لهلأ ما حبلتي
بسمة : اي بروح بس نحن ما النا الا شهرين مفكرين نجيب ولد
هاشم : معلش روحي بلكي طلع عندك مشاكل ، رح اخدلك موعد عند الدكتور بكرا و بروح انا و اياكي بعد الدوام
بسمة : امم بروح طيب
اجا بالليل لينام معي بس انا ما قبلت و قلتلو تعبانة و اجلا لغير يوم و تاني يوم رحنا عند الدكتور ، فحصني و خبرني بالنتيجة
الدكتور رامز: مدام ….انا كيف بدي خبر ما بعرف بس انت عندك مشكلة و صعب انك تجيبي اولاد
بسمة : عفوا شويعني ؟ انا ما بجيب اولاد !
الدكتور رامز : انت كنتي تمنعي بحبوب منع حمل ؟
بسمة : اي
الدكتور رامز : اي و ما بتعرفي انو استخدامن على المدى الطويل قبل ما يكون على الاقل عندك ولد واحد بضرك كتير
بسمة : لا بعرف انو عادي ، اذا بتريد ارجع اتأكد لانو انا حبلت مرتين اول زواجي و اجهضت بارادتي
الدكتور رامز : و هالشي كمان الو اضرار….متل ما عم قلك انا بعتذر كتير لخبرك هيك خبر
نزلنا من عيادة الدكتور انا و عم ابكي ، و نحن نازلين على الدرج فتلت عليه و ضربتو بالشنتا يلي كانت بايدي و بزقت عليه ، ضربني كف و قلي حسابك بالبيت …
رجعنا على البيت لنصفي حسابات طويلة من اول يوم تزوجنا لحد هلأ و بالاخير قلي انت ما بقا بتلزميني وحدة عاقر ما بتجيب اولاد و كمان لسان و ايدا طويلة على زوجا انت طالق يا بسمة طالق طالق طالق
بسمة : انا كنت ناطرة اسمع هالكلمتين منك ، ما رح قول غير انك واحد بينشفق و بينزعل عليك لانو يلي جايك بشع كتير
ضبيت اغراضي و دقيت لاخي و قلتلو يجي ياخدني ، رجعت على بيت اخي و قلتلو انو انا رح اقعد عندك بس اكام يوم لاستاجر بيت لانو ما بحب تقل على حدا و انت بيتك يا دوب واسعك ، وافق بعد ما اصريت كتيرر و قلي اخرة هالشهر رح رجعلك المبلغ يلي دينتو منك …
رحت تاني يوم على شغلي و طلعت على المكتب لعند زين
بسمة : هاشم طلقني
زين : عنجد…طلقك على الاخير …شو كانت حجيتو ؟
بسمة : رحنا مبارح عند دكتور نسائي لافحص حالي كرمال نجيب ولد مع انو هو ما كان بدو من الاول ولد بس هلأ لقاها حجة و خبرني الدكتور انو انا ما بجيب اولاد لانو كنت منع بحبوب مانع حمل
زين: ههههههه مين هالدكتور ؟
بسمة : اسمو رامز …
زين : هادا الدكتور ما بس غبي و مادي و كمان معروف انو بفوت بقصص ما نظامية ، يعني اجهاضات بشهور متاخرة و ترقيع غشاء بكارة و كلو كرمال المصاري ،هيدا زوجك عاطيه قرشين و قلو قول لمرتي هيك ، ما اندلو
بسمة : اي انا صدقت اول الشي بس بعدين لانتبهت انو كل القصة كذبة ملفقينا الاتنين سوا
الجزء الثاني عشر :
زين : معناها هالاسبوع بيجي لعندي و بجيب ورقة طلاقك معو
بسمة : ما تقلي انو بدك تعطيه الشيك ؟
زين: طبعا لا ما رح اعطيه اياه و بدي تكوني موجودة وقت بيجي
بسمة : ليش ؟ ما بدي شوفو بقا؟
زين : بدي اياه يعرف انك كنت عرفانة بكل هالخطة من الاول حتى يستحقر حالو قدامك و حتى اضمن انو ما يلاحقك بعدين …
بسمة : اممم ماشي
زين : صحي انت بدك ضلي ببيت اخوكي ؟
بسمة : لا رح اطلع بس عم دور على بيت اجار
زين : امم طيب اتركي هالموضوع علي
بسمة : لا ما بدي عذبك معي بكفيك شو اجاك وجعة راس مني
زين: ما عم تعذبيني و رح اخترلك موقع البيت يكون جنب الشركة افضل
بعد 4ايام اجا هاشم عند زين لياخد االشيك ب 9مليون ، و اول ما وصل دقتلي السكرتيرة انو اجي على المكتب و اول ما فتت شافني هاشم و جلس قعدتو و تلبك كتير
زين : تفضلي انسة بسمة
بسمة : اي هاشم …قبضت الا لسا ….بس مو شايف انو مبلغ 10مليون كتيرة على مرتك …عفوا طليقتك يلي ما بتجيب اولاد
هاشم : بسمة …انت فهمانة غلط ….استاذ زين شو عم يصير …شو جابا هاي لهون؟
زين : تفضلي انسة بسمة اعطيه الشيك للاستاذ المحترم هاشم
اخدت الشيك من الاستاذ زين و مسكت القداحة وشعلت النار فيه
بسمة : يوووو….شوف النار كيف عم تاكل التسعة مليون ….اركض قوام جيب مي طفيا …انت ما بعتني للاستاذ زين انا يلي بعتك االو و كنت بعرف بكل وساختك من الاول و بعرف انك تعاقدت مع الدكتور لطلعني وحدة عاقر بس شو بدي احكي بس تفوووز عليك و على شواربك يلي بنص وجهك
التفت هاشم و وجهو احمر على الاستاذ زين و قلو نحن ما اتفقنا هيك
زين : من كل عقلك مفكر بدي اعطي واحد رخيص متلك هيك مبلغ حق مرتك
هاشم : اه يعني اخدتا ببلاش
زين : واحد متلك ببلاش ، بسمة ما تتقل بكنوز الدنيا ، بس بدا واحد يعرف هاالشي و يقدر قيمتا و هلأ قوم انقلع من هون قبل ما ناديلك السيكيورتي يجي يشحطك
هاشم : بفهم منك انك ضحكت علي و اتفقتو علي
زين : افهما متل ما بدك …ما بدي شوف خيالك عندي بالشركة و اياك ..اياك تقرب عليا لانو ما رح خليك مبسوط ابدا بحياتك ….قوم انقلع يلا
عصب هاشم و بلش يسب علي و على زين و هجم علي بس مسكو زين و ضربو بوكس بعينو و انا ركضت قلتلا للسكرتيرة تطلب السكيورتي وطلعو اخدو لهاشم و زتوه برا الشركة….
بعد اسبوع رحت انا و زين و وقعت عقد اجار الشقة عن سنة و كان بدو يدفع المقدم بس انا ما قبلت و دفعتن من المصاري يلي كنت مدينتن لاخي ، اخدت اجازة 3ايام لرتب الشقة الجديدة و بعدين رجعت على شغلي و بعد اسبوع انا و راجعة على بيتي ، وصلني زين بالسيارة لتحت البيت و هو تابع على بيتو و انا اطلعت على بيتي ، فتحت الباب و فتت و قبل ما سكرو ، حدا دفش الباب بقوة و فات علي ، و حط ايدو على تمي و ثبتلي ايدي ورا ضهري و سكر الباب برجلو
هاشم : هسسس ولا كلمة …ببالكن بتضحكو علي بهالسهولة ، انا لحمي مر ما بيتاكل ، عاملين فيا روميو و جوليت ، من ايمت المي ماشية من تحت رجلي و انا ما بعرف ، من ايمت لفيانة عليه و حاببتيه و مستغبيتيني ؟
بسمة : بعد عني ..يا عالم يا ناس
رجع حط ايدو على تمي و اخدني على غرفة النوم ، حطلي منديل على تمي حتى ما يطلع صوتي و ربطلي ايدي لورا ضهري و ربطلي رجلي و بلش يشلح تيابو
هاشم: انا رح خليه يركض وراي ليدفعلي ما بس 9مليون و فوقن حبة سكرة … شو بسومة ما اشتقتيلي انا اشتقتلك كتير ما لحقت ودعك قبل ما طلقك ، رح ودعك هلأ بطريقتي الخاصة
عرفت انو هاشم بدو يغتصبني بس اخر شي توقعت منو انو يصورني فيديو هو و عم يغتصبني ، بعد ما خلص شلح تيابو ، شغل كاميرة موبايلو و حطا على طاولة المكياج و وجها لعندي على التخت و قرب علي و بلش يشلحني تيابي ، كنت عم ابكي و حاول فك الحبل و ادفشو برجلي بس ما قدرت ، ريحتو و نفسو و شكلو لعولي نفسي و ما كنت بعرف حالي انو انا كرهتو كتير لدرجة ممكن انو اقتلو بايدي قبل هاليوم ، بعد ما خلص ، طفا الكاميرة و لبس تيابو
هاشم : بتقليلو للعاشق الولهان انو مقطع هالفيديو فيني بيعو لموقع اباحي و اقبض عليه مصاري و فيني كمان انشرو هيك …ببلاش… لوجه الله بس معلش انا رح اعطيكن فرصة اخيرة ، اذا ما امنلي ال 9مليون خلال يومين ، رح تشوفي هالمقطع بموبايل كل واحد بالبلد و رح ابعت نسخة لاخوكي كمان و رفقاتو و للموظفين بالشركة معك و رح تشوفيه من مقاطع الفيديو التوب هالسنة
لبس تيابو و مسك موبايلي و دقلو لزين
هاشم : اكيد ما نسيتني لف و ارجع بسيارتك لبيت عشيقتك لانو عاملك مفاجأة حلوة و رح تعجبك كتير سلام حبي
تركني مربطة و متل ما انا غطاني بشرشف التخت و طلع فورا و ترك باب البيت مفتوح كرمال زين يقدر يفوت و يشوفني بهالمنظر
الجزء الثالث عشر:
اجا زين و لقى الباب مفتوح و دخل على البيت و هو عم يركض من غرفة لغرفة ليدور علي و هو عم يناديلي
زين : بسمة….وينك…بسمة …شو هادا….الله يلعنو شو عامل فيكي …ولله لدفعو التمن غالي، ولله لخليه يندم على الساعة يلي اجى فيا على هالدنيا
فك المنديل عن تمي و الحبال عن ايدي و رجلي ، مسكت الشرشف و غطيت جسمي فيه انا و عم ابكي
بسمة : ….زين ……اطلع من الغرفة اذا بتريد بس لالبس تيابي
زين : طيب انا سابقك على غرفة القعدة
لبست تيابي و طلعت ركض على غرفة القعدة وقت سمعت صوت تكسير ازاز ، لقيت زين عم يمسك كل شي بشوفو بوجهو و عم يكسرو و يسب على هاشم
زين : لك شو دينو هادا ، عم يحط راسو براسي و عم يتحداني ، لك انت كيف حبيتيه ، كيف بقيتي معو كل هالسنين ؟
بسمة : ما توقعتو وسخ لهل درجة و انت طمعتو فيك لو ما عرضت عليه هالمبلغ ما كان عمل فيني هيك
زين : هلا صار الحق علي لانو بس بدي فرجيكي اياه على حقيقتو ….
بسمة : انا تعبت زين تعبت ولله تعبت حاسة حالي متل اللعبة بيناتكن
زين: طيب….. روقي شوي .. تعي لعندي …..ما بقا تبكي … احكيلي كيف فات لعندك و شو عمل معك ؟
بسمة : وقت وصلتني كان لاحقنا على ما يبدو من وقت ما طلعنا من الشركة و انا عم افتح الباب و فوت ،دفش الباب و فات و ربطني و اخدني على غرفة النوم ….
زين : اي كفي …شبك سكتي …اقرب عليكي لمسك شي الا بس شلحك تيابك حتى انا فوت و شوفك بهالمنظر ..احكي ما تخجلي
بسمة :….شغل كاميرة فيديو الموبايل و وجها على التخت و صور كل شي …كل شي ….
زين : صورك !!
بسمة : و قلي بدي انشرلك الفيديو اذا ما امنلي زين ال 9مليون يلي وعدني فين خلال يومين
زين : واطي لك ما عندو دم و ناموس ، انت ما بقا الك قعدة هون بدك تجي تقعدي عندي
بسمة : زين شو عم تحكي ؟ اقعد عندك بصفتك شو و بصفتي انا شو بالنسبة الك ، انا مطلقة و انت غريب علي ، رح ارجع لعند اخي
زين : لااا ما الك رجعة عند اخوكي لانو حتى عند اخوكي بجوز يصلك ، انا ما بقا بامن عليكي الا عندي و تحت عيني ، و اطمني انا ما قاعد لحالي ، قاعدة معي امي ، قومي البسي هلا بدنا نروح نبلغ عليه و ضبي تيابك يلي مزعن و الحبال و كلشي بيثبت انك تعرضي لاغتصاب و بدي اياك تكوني قوية و تحكي كل شي
بسمة : لااا ما بدي روح على الشرطة انا ما خرج فضايح ، و انت اطلع من هالقصة ما اجاك من وراي الا وجعة راس
زين : بسمة ما تجننيني …انت ما بتعرفي انت شو بالنسبة الي و مستحيل هالمرة سايرك لانو الموضوع صار كبير ، حابة ينشر هيك فيديو الك و ما يضل حدا بالبلد ما يشوفو و تتوسخ سمعتك ..انا ما برضى بهالشي ، قومي البسي و ما بقا تناقشيني بهالموضوع و بدك تنفحصي بالاول عند دكتورة نسائية لتعطينا تقرير بانك تعرضتي لاغتصاب حتى تثبت عليه التهمة
رحنا على مركز الشرطة و قدمنا بلاغ عنو و بانو صورني و هددني ، طلبو من زين انو يدقلو و يتفق معو على زمان و مكان ليسلمو المبلغ كاش و بهالوقت بطب عليه الشرطة و بتشحطو و نحن قاعدين بمركز البوليس دقلو
زين :انت حدد الوقت و المكان يلي بناسبك ؟
هاشم : بمنطقة الصناعة بكرا الساعة عشرة المسا و المبلغ كاش بدي ايااه
زين : طيب انا شو بدو يضمنلي انو مقطع الفيديو ما انعمل منو نسخة تانية
هاشم : ولو استاذ زين كلك معلمية و مفهومية بهالشغلة في برامج كتير بتكشف اذا الفيديو انعمل منو نسخة الا لا ، جيب لابتوب معك لتتاكد انو انا ما عملت منو نسخة تانية
زين : ….طيب ماشي بدك تعطيني الموبايل و انا بتاكد و اذا طلع حكيك مزبوط بسلمك المصاري
هاشم : اي بس اوعى تفكر تتذاكى علي و تخبر الشرطة لانو انت ما بتعرف هاشم شو ممكن يعمل لسا ، بخلص عليك بارضك لانو ما ضل عندي شي اخسرو
رجعت نمت عند اخي هديك الليلة و ما رحت على شغلي تاني يوم كنت قاعدة طول نهاري على اعصابي و دقتلو لزين كذا مرة و قلتلو خلص ما تروح بلاها لهل الشغلة ، اذا هاشم حس انك جايبلو الشرطة بجوز يكون معو سلاح و يقتلك و انت ما الك ذنب بهالشي ، انا اخترت هالشخص و انا يلي لازم اتحمل مسؤولية اختياري، قلي ما تعذبي حالك و تحكي انا خلص بعرف شو عم اتصرف و انت خليكي بالبيت اليوم ما تطلعي ابدا و شو بصير معي بخبرك فورا
صارت الساعة 12بالليل و لهلا ما دقلي زين و طمني و كل شي حاولت دقلو ما رد ، انشغل بالي كتير ، قلتلو لاخي لازم نروح و نسال شو صار ، خايفة يكون صرلو شي زين و هو ما الو ذنب بكل هالقصة ، ولله قلبي متل النار ، فتت البس تيابي و قبل ما نطلع رن موبايلي و كان المتصل زين
بسمة : الو …زين
…الو حضرتك مدامتو لصاحب هالرقم
بسمة : لا بس مين انت؟
….نحن من مشفى الرحمة ..دقينا على اخر رقم من موبايلو لنقلك انو صاحب هالرقم عنا بالمشفى
بسمة : بالمشفى … ليش …شو صاير معو
….تصاوب برصاصة بكتفو و حالتو حرجة يا ريت اذا انت من عيلتو او بتعرفي حدا من عيلتو تخبرين ليجو فورا
الجزء الاخير:

رحت انا و اخي على المشفى ، اول ما شفتو من ورا ازاز غرفة العناية المشددة بكيت عليه كان زين منظرو بيقطع القلب ، وجهو اصفر كتير و بالعناية المركزة و ما سمحولنا نفوت عندو اول ما وصلنا ،اعطتني الممرضة موبايلو و قررت دق لامو بعد ما تردت كتير لاني كنت خايفة من ردة فعلها بس تعرف اني انا السبب بحالة ابنها هلأ ، دقتلا و خبرتا و اجت هي و عيلتو لزين امو و خالتو و اخواتو الاتنين يلي ما بعرف حدا فين و كنت اسمع بالاسم عنن بس من زين ، الكل طلع فيني و عم يتسائل بينو و بين حالو مين انا ، عرفتن على حالي باني موظفة بالشركة عند زين و وقت سالوني شو بتعرفي عن حادثة زين ، قلتلن ما بعرف شي ، كنت مستحيل خبرن بالحقيقة لانو كنت متمناية تنشق الارض و تبلعني و كنت خايفة على زين يصرلو شي لانو ما رح سامح حالي ابدا و السبب الاقوى انو خفت اختو او امو تقلعني من المشفى قبل ما اطمن عليه و وعدت حالي انو اذا زين طلع بخير من هالحادثة انو اطلع من حياتو نهائيا ، انا و قاعدة بممر المشفى برا غرفة العناية المركزة شفت من بعيد المحقق يزن جاية لعنا وانا كنت بعرفو مسبقا بمركز الشرطة وقت بلغت عن حادثة اغتصابي ، رحت لعندو بسرعة قبل ما يصل و يعرفو اهل زين كل شي
بسمة : شو صار …كيف انصاب زين ؟
المحقق يزن : كان المفروض انو زين يسلم المصاري لطليقك و طليقك يطلع بالسيارة و نحن نلحقو و نعتقلو من نص الطريق بس يلي صار انو طليقك هاشم بعد ما اخد المصاري من زين و فتل ضهرو زين ليرجع على سيارتو ، طلع هاشم مسدس من ورا ضهرو و قوصو و نحن فورا فتحنا عليه النار
بسمة : هاشم مات ؟
المحقق يزن : لا هاشم موجود بالغرفة يلي جنب زين و حاطين عليه حراسة و ضعو الصحي حسب ما فهمت من الدكتور انو سيئ جدا كمان
بسمة : طيب الله يخليك الي رجاء عندك ما بدي تخبر اهلو بالشي يلي صار هلأ لانو خايفة من ردة فعلن اتجاهي
المحقق يزن : بس هدول اهلو و لازم يعرفو
بسمة : بعرف بس مو هلأ بس لنطمن على صحتو لزين
المحقق يزن: طيب مع انو ما عملنا هيك شي من قبل
بقيت على اعصابي و انا ادعي لربي ياخد من عمرو لهاشم و يعطيه لزين لانو زين هو يلي بيستحق يعيش ، بقيت طول نهاري بالمشفى ، كنت ارجع على بيتي لاتحمم بس و غير تيابي و ارجع على المشفى ، تقربو اهلو لزين مني كتير خلال هاليومين ، وقت شافوني ما عم اترك المشفى ابدا و مهتمة بحالة زين و كنت حسن عم يحكو بين بعضن عن نوعية العلاقة يلي بتربطني فيه ، بعد يومين مات هاشم ، اول ما سمعت الخبر بكيت عليه ما بس لانو كان زوجي بيوم من الايام و لانو شفقت على هيك انسان طمعه بالمال جاب اخرتو و بطريقة بشعة بس بنفس الساعة يلي مات فيها هاشم ، وعي زين و زالت عنو مرحلة الخطر ، و نقلوه على غرفة عادية بالمشفى و انا ما قدرت فوت عندو ابدا ، اول ما طمنت على صحتو رجعت على البيت فورا و تاني يوم نزلت على الشركة و قدمت استقالتي من الوظيفة و مريت على المشفى و طمنت على حالة زين من الممرضين بدون ما اطلع لعندو و بعدين صرت اطمن عن حالتو الصحية من الاخبار بالتلفزيون و الجرايد…..
بعد شهرين كاملين اندق باب بيتي علي ، فتحت الباب و تفاجأت بزين قبالي ، وقفنا عشر دقايق نطلع ببعض بدون ما نحكي كلمة وحدة
زين : مسالخير
بسمة : مسالنور ، تفضل
زين : كيفك ، كيف صرتي ، جاي اطمن على صحتك بعد الحادثة ؟
بسمة : زين …انا…جد بعتذر بس انا اخدت قرار اني اطلع من حياتك نهائيا اذا بتقوم بخير من اصابتك
زين : اممم …هيك قررتي لحالك ، و انا ؟ ما مهم بالنسبة الك شو بدي
بسمة : انت انسان ما بتستاهل الا كل خير
زين : اي و ما بستاهلك يعني ؟
بسمة : انت الشي يلي قدمتلي اياه ما بنساه بحياتي ، شو ما قدمتلك ما بكون وفيتك حقك لانك وقفت جنبي و عرضت حياتك للخطر بسببي حتى تخلصني من شخص اذاني كتير و كان رح يشوهلي سمعتي
زين : و ما ندمان و لو برجع الزمن فيني لورا كنت عملت نفس الشي ، ليش تركتيني ، وليش قدمتي استقالتك ؟
بسمة : انا خجلانة منك ، انا دخلتك بقصص ما اجاك منها شي الا كل اذى و ضرر
زين : انا ما هيك بشوف و طيب لنفرض هالحكي صحيح ، هيك بتكافئيني و بترديلي الجميل ، ببساطة بتطلعي من حياتي و انا كل هالشي عملتو لانو بدي اياكي تبقي فيا ، ارجعي على الشغل ؟
بسمة : انا قدمت على وظيفة تانية
زين : اي و اذا قدمتي عادي ،ارجعي انسحبي ، انا بدي اياكي بالشركة معي لانو انا بحاجة هيك موظفة عندا افكار مبدعة
رجعت على شغلي لعند زين ، و بقيت علاقتنا مع بعض متل قبل و كان اهتمامو فيني واضح ، بعد سنة تقدم لخطبتي شاب موظف معي بالشركة ، وانتشر الخبر بالشركةو وصل الخبر لزين و بعتلي خبر مع السكرتيرة انو اجي فورا لعندو
زين : سمعت انو في مشروع خطبة بينك و بين الشب احمد ؟
بسمة : اي اجا طلبني من اخي بس لسا ما صار شي رسمي
قام من ورا مكتبو و قرب علي
زين :اسمعي بسمة انا ما عملت كل هالشي و بالاخير حتى تروحي لغيري ،انا الي سنة ساكت و عم احترق من جوا وقت بشوفك عم تحكي مع شي موظف و هلأ سمعت انك رح تنخطبي لاحمد و الي يومين ما عرفت طعم النوم ، رح قلك اياها بصراحة لانو لمحتلك كتير ما فهمتي علي انا بحبك و بدي اياكي الي
بسمة : …زين انت..
زين : ما تحكي شي هلأ ابدا ، بعرف انو فاجئتك و بعرف انك يمكن ترفضيني لانو انت بتعرفي اني انا ما بجيب اولاد بس ما رح خليكي تروحي مع غيري قدام عيني و انا واقف ساكت و ما عم اعمل شي ، خدي وقتك و فكري ، انا ما رح لومك اذا رفضيني لانو رح اتفهم السبب بس ما بدي اياكي تنخطبي لشب من الشركة و شوفك معو على الرايحة و الجاية لانو الموت اهون علي بهالحالة ، فكري منيح يا بسمة و ما بدي توافقي مغصوبة لانو انا وقفت جنبك
بسمة : زين انا جد بعتذر بس على الكلام يلي بدي قلك اياه
زين : خلص ما تكفي فهمت عليكي
بسمة : لا معلش اتركني كفي ، انو جلطتني يعني الي سنة ناطرة عليك و بقول يلا اليوم بقلي انو بحبني و اليوم بيعترفلي ….سنة كاملة و انت كل يوم بتشوفني و بشوفك و ببتسملك … ..سنة كاملة و انا عم موت من برودك و انت عم تلمحلي و تحكيني بالالغاز و انا بردلك اني ايه موافقة بس دخيل الله بادر و بقا لهل البحصة ههههههه
زين : عنجد عم تحكي … ههههههه يعني موافقة ؟
بسمة : لا بدي سنة لسا لردلك خبر و اعطيك رايي ههههه
زين : ههههه سنة و اتنين و عشرة معك العمر كلو معك
بسمة : لازم انصبلو تمثال للزميل احمد انو فكر يجي يخطبني و لولاه يمكن كنت لسا نطرت عشر سنين عليك حتى تحكي
زين : يعني انت بتحبيني؟
بسمة : زين انا ما بس بحبك ،انا بشوف الدنيا من عيونك انت و ما بحس بالامان الا لما بكون جنبك ، و حتى لو ما صرت ام بحياتي ، بكفي انك تكون جنبي و حس انو في رجال بحبني لنفسي و عندو استعداد يفديني بحياتو
و اخيرا زين حكى الشي يلي كنت ناطرة اسمعو منو طول هالسنة ، اجا طلبني من اخي و كتبنا كتابنا و تزوجنا ، حبي لزين كان كل يوم عم يزيد اكتر و اكتر ، بالسنة التانية من زواجنا كنت قاعدة عندو بالمكتب عم نتناقش بدعاية جديدة و وقت وقفت و جيت اطلع من المكتب دخت و وقعت بالارض ، ركض علي و حملني و صحاني و قلي ارجعي على البيت ارتاحي عم تتعبي كتير بالشغل ، رجعت على البيت و بلشت اعراض تانية تصير معي لعية نفس و استفراغ بقيت اسبوع على هالحالة و كتير اصر زين انو روح عند الدكتور لاعرف شو عم يصير معي بس انا رفضت لانو شكيت اني انا ممكن كون حامل ، جبت تيست حمل من الصيدلية و طلعت حامل ،ما صدقت عيوني رجعت جبت 5اختبارات حمل و كل اختبار تطلع النتيجة خطين احمر ، لبست تيابي فورا و رحت عند الدكتور لاتاكد من حملي ، فحصني و قلي انت حامل باول الشهر التاني ، قلتلو انا زوجي قلي اني ما بجيب اولاد و كان متزوج قبلي 5سنين و ما اجاه ولا ولد و لا حتى حبلت مرتو القديمة ، قلي في حالات كتير هيك ممكن الرجال يجامع عشر نسوان و ما تحبل منو الا مرة وحدة بس لانو الرجاال بكون عندو مشكلة و بدو طبيعة رحم معينة و هالشي موجود عندك ، اخدت صورة عن تصوير الايكو و مريت على السوق اشتريت افرول بيبي صغير و حطيتو بصندوق هو و الصورة و رحت عند زين
زين : شو جابك لهون ….ما قلتلك خليكي مرتاحة بالبيت و ما تطلعي
بسمة : تفضل ( حطتلو الصندوق قدامو على المكتب )
زين : جايبتيلي هدية شو خطر على بالك هلأ شو بقلبو ؟
بسمة : ما بعرف افتح و شوف و اعطيني رايك
زين : امممم…..شو هيدا بسمة ….
التفت وجهو علي و صار يضحك
زين : شووو هيدا …ما عم افهم ….لمين صورة هالايكو و تياب البيبي ….
بسمة : شكلو بدو يجينا زين الصغير
قام من محلو و التفت علي
زين : بسمة ….قلبي ما بتحمل هيك شي عنجد عم تحكي
بسمة : اي متل ما سمعت و هلا جيتي من عند الدكتور و قلي اني حامل بالشهر التاني
زين : مستحيل….كيف لك انا ما بجيب اولاد….
بسمة: هالشغلة بدا شرح طويل و لازم تسمعو من الدكتور نفسو
حملني و برم فيني
زين : لك بحببببك …..بسمة انا بحبك
بسمة : لك نزلني من غير شي انا دايخة